“Baykar Texnoloji Azərbaycan” şirkətinin direktoru Hüseyin Topuz Azərbaycan Texniki Universitetində (AzTU) olub. Qonaq AzTU-nun rektoru Vilayət Vəliyev və universitetin nümayəndələri ilə görüşüb. Görüşdə həmçinin “Bilim Bakı” Mərkəzinin direktoru Ahmet Köse də iştirak edib. Rektor Vilayət Vəliyev qonaqları salamlayaraq universitetdə həyata keçirilən layihələr və müasir mühəndislik təhsilinin inkişafı istiqamətində görülən işlərdən danışıb. O, “Baykar Texnoloji Azərbaycan” şirkəti ilə qurulan əməkdaşlığın universitet-sənaye işbirliyinin inkişafı baxımından mühüm addım olduğunu vurğulayıb. “Baykar Texnoloji Azərbaycan” şirkətinin direktoru Hüseyin Topuz qonaqpərvərliyə görə təşəkkürünü bildirib, rəhbərlik etdiyi qurumun universitetlərlə əməkdaşlıqda maraqlı olduğunu, o cümlədən AzTU ilə birgə layihələrdə iştirakdan məmnunluğunu ifadə edib. Daha sonra AzTU ilə “Baykar Texnoloji Azərbaycan” şirkəti arasında elm, təhsil və texnologiya sahələrində əməkdaşlıq haqqında anlaşma memorandumu imzalanıb. Sənəd tərəflər arasında elmi-tədqiqat layihələrinin təşkili, tələbələr üçün təcrübə proqramları, birgə tədris və təlim fəaliyyətlərinin həyata keçirilməsi, konfrans və seminarların təşkili, habelə akademik əməkdaşlığın daha da genişləndirilməsini nəzərdə tutur. Memorandumda göstərilən istiqamətlərə uyğun olaraq beynəlxalq standartlara uyğun birgə kurs və proqramların hazırlanması, birgə elmi tədbirlərin təşkili və universitetin tələbə və gənc müəllim heyəti üçün təlim imkanlarının yaradılması da planlaşdırılır.

İspaniya Krallığının Elm, İnnovasiyalar və Universitetlər Nazirliyinin nəzdində fəaliyyət göstərən Təhsilin Beynəlmiləlləşməsi üzrə İspan Xidmətinin (SEPIE) nümayəndəsi Ana Kornexo Roman və İspaniyanın Jaen Universitetinin beynəlmiləlləşmə üzrə prorektoru Karmen Konti-Ximenez ölkəmizə səfəri çərçivəsində Azərbaycan Texniki Universitetində (AzTU) olub. Qonaqları İspaniyanın Azərbaycandakı səfirliyinin nümayəndələri müşayiət edib. Qonaqları salamlayan AzTU-nun beynəlxalq əlaqələr üzrə prorektoru Fariz Məmmədov universitetdə tədris, tədqiqat, beynəlxalq əməkdaşlıq və reytinqlər istiqamətində görülən işlərdən danışıb. O, həmçinin AzTU-nun İspaniyanın ali təhsil müəssisələri ilə əməkdaşlığı barədə qonaqları məlumatlandırıb. SEPİE-nin nümayəndəsi Ana Kornexo Roman təmsil etdiyi qurumun fəaliyyəti barədə məlumat verərək İspaniya və Azərbaycan ali təhsil müəssisələri arasında əməkdaşlığın genişləndirilməsinin vacibliyini diqqətə çatdırıb. Görüş zamanı AzTU-nun İspaniya ali təhsil müəssisələri ilə əməkdaşlığının genişləndirilməsinin perspektivləri müzakirə edilib.

Əqli Mülkiyyət Agentliyinin təşkilatçılığı ilə Azərbaycan Texniki Universitetində (AzTU) “Sənaye mülkiyyəti obyektləri və onların qeydiyyatı” mövzusunda tədbir təşkil olunub. AzTU-nun elm və innovasiyalar üzrə prorektoru Sübhan Namazov əqli mülkiyyətin qorunması və effektiv idarə olunmasının ölkənin elmi potensialının reallaşdırılması baxımından strateji əhəmiyyət kəsb etdiyini vurğulayıb. O, bu baxımdan elmi-tədqiqat və ali təhsil müəssisələrinin agentliklə birgə fəaliyyətinin gələcək uğurlar üçün möhkəm zəmin yaradacığını diqqətə çatdırıb. Qeyd edib ki, əqli mülkiyyət sahəsində maarifləndirmə işləri gənc tədqiqatçıların bu sahəyə cəlb olunması və innovasiya mühitinin formalaşdırılması üçün əhəmiyyətli olacaq. Görüşdə Əqli Mülkiyyət Agentliyinin tabeliyində olan Patent və Əmtəə Nişanlarının Ekspertizası Mərkəzinin İxtira və faydalı modelin ekspertizası şöbəsinin müdiri Sevinc Zeynalova çıxış edərək, tədbirin təşkilinə görə universitet rəhbərliyinə təşəkkürünü bildirib və görüşü qarşılıqlı əməkdaşlığın ilk addımı kimi dəyərləndirib. Əqli mülkiyyətin qorunması və bu sahədə biliklərin artırılması məqsədilə keçirilən tədbirdə iştirakçılar üçün mütəxəssislər tərəfindən təqdimatlar olunub. Şöbə müdiri Sevinc Zeynalova “Əqli mülkiyyət obyektlərinin mahiyyəti üzrə ekspertizanın aparılması” və “Beynəlxalq və regional patentləşdirmə prosedurları”, Patent və Əmtəə Nişanlarının Ekspertizası Mərkəzinin İlkin ekspertiza və sənaye nümunələrinin ekspertizası şöbəsinin müdiri Afət Qasımova “Patent hüququ obyektləri və patentin alınmasına dair iddia sənədinin tərtibatı və verilməsi” mövzularında təqdimatla çıxış ediblər. İnteraktiv müzakirələrlə davam etdirilən tədbirdə agentliyin nümayəndələri iştirakçıların suallarını cavablandırıblar. Əqli Mülkiyyət Agentliyinin İdarə Heyətinin sədri Kamran İmanovun müəllifi olduğu əqli mülkiyyətə dair kitablar AzTU kitabxanasına hədiyyə edilib.

Azərbaycan Texniki Universitetinin (AzTU) AI-Baku 2025: Süni İntellekt və Biotibbi İnnovasiyalar üzrə Azərbaycan-Almaniya Strateji Tərəfdaşlıq Forumu çərçivəsində Yeni Klinikada “İşemik insultların müalicəsində müasir yanaşmalar" mövzusunda elmi seminar və Angioqrafiya laboratoriyasında master-klass təşkil olunub.Dünyadakı ən son yeniliklərin müzakirəsi və klinik praktikada tətbiq imkanlarının genişləndirilməsi məqsədilə təşkil olunan tədbirdə TƏBİB-in İcraçı direktorunun müavini Anar İsrafilov, TƏBİB-in İcraçı direktorunun müşaviri, Yeni Klinikanın direktor müavini, Somatika və STROK mərkəzinin rəhbəri Pərvin Əkbərov, Almaniya-Azərbaycan Radioloji və Neyroradioloji Cəmiyyətinin sədri, Almaniyanın 600 minlik əhalisi olan Reyn Zig bölgəsinin Radiologiya, Nuklear Tibb və Neyroradiologiya Klinikasının rəhbəri, Köln Universitetinin əməkdaşı və AzTU-nun Biotibbi Mühəndislik İnstitutunun direktoru professor Nuran Abdullayev çıxış ediblər.TƏBİB-in İcraçı direktorunun müavini Anar İsrafilov insult xəstəliyinin müasir dövrdə cəmiyyət üçün ciddi sağlamlıq problemi olduğunu vurğulayaraq, insult mərkəzinin fəaliyyəti və əhəmiyyətindən söz açıb.TƏBİB-in İcraçı direktorunun müşaviri Pərvin Əkbərov işemik insult və digər nevroloji xəstəliklərin müalicəsi üçün multidisiplinar komandanın vacibliyini qeyd edərək Azərbaycanda bu istiqamətdə işlərin həyata keçirildiyini vurğulayıb və TƏBİB tabeliyində fəaliyyət göstərən 4 xəstəxanada insulta hazır olan xidmətlərin beynəlxalq standartlara uyğunlaşdırılması üçün müvafiq işlərin həyata keçirildiyini bildirib.AzTU-nun Biotibbi Mühəndislik İnstitutunun direktoru professor Nuran Abdullayev bildirib ki, AI-Baku 2025: Süni İntellekt və Biotibbi İnnovasiyalar üzrə Azərbaycan-Almaniya Strateji Tərəfdaşlıq Forumu 2025-ci il 19 mart tarixli Sərəncamı ilə təsdiq olunmuş “Azərbaycan Respublikasının 2025–2028-ci illər üçün süni intellekt Strategiyası” çərçivəsində müəyyən edilmiş prioritet hədəflərə uyğun olaraq təşkil olunub. O, qeyd edib ki, işemik insultların müalicəsində müasir yanaşmalarda da artıq süni intellektin rolu qaçılmazdır və bunun tətbiqi mütləqdir. Məhz buna görə də forum çərçivəsində belə bir elmi-praktik konfransın keçirilməsinə qərar verildi. Professor Nuran Abdullayev elmə əsaslanan, doğru qurulmuş müasir insult mərkəzlərinin digər ölkə səhiyyələrində inqilabi dəyişikliyə səbəb olduğu nümunələri qeyd edib və Avropa təcrübəsinə əsaslanan müasir müalicə yanaşmaları barədə ətraflı məlumat verib. Mobil insult diaqnostikasından bəhs edən Nuran Abdullayev onun tətbiqinin yaxın gələcəkdə çox önəmli olduğunu vurğulayıb. Tanınmış mütəxəssis seminarın tibb sahəsində peşəkar inkişaf və beynəlxalq təcrübələrin paylaşılması baxımından böyük əhəmiyyət daşıdığını xüsusi vurğulayıb.İnteraktiv şəkildə klinik təcrübələr və aktual yanaşmaların təqdim olunduğu seminarda Yeni Klinikanın digər həkimləri də çıxış ediblər.Daha sonra Angioqrafiya laboratoriyasında master-klass təşkil olunub. Master-klass zamanı Nuran Abdullayev beyin damarlarında icra olunan ən müasir əməliyyat texnikaları barədə azərbaycanlı həmkarlarına əyani təqdimatla ətraflı məlumat verilib.Tədbir çərçivəsində xüsusilə beyin insultu zamanı tətbiq olunan qabaqcıl müdaxilə üsullarına diqqət yetirilib və Nuran Abdullayev tərəfindən inkişaf etdirilən ən yeni əməliyyat texnikası, Avropada artıq patent almış ən yeni stent azərbaycanlı həkimlərə nümayiş olunub. Bundan başqa, iştirakçılar beynin damar anevrizmalarının müalicəsində istifadə olunan, ən müasir mühəndis texnologiyaları ilə hazırlanmış və hazırda Azərbaycanda istifadə olunmayan stentlərlə tanış olmaq imkanı da əldə ediblər.Qeyd edək ki, Yeni Klinikada təşkil olunan seminar çərçivəsində ilk dəfə yeni texnologiyaların tətbiqinə dair məlumatlar geniş auditoriyaya təqdim olunub və iştirakçılara beyin damarlarının müalicəsində innovativ yanaşmalar nümayiş etdirilib.Nəzərinizə çatdıraq ki, ən müasir mühəndis texnologiyaları ilə hazırlanmış stentlərin elmi tətqiqatlarla daha da öyrənilməsi bundan sonra Azərbaycanda da aparılacaq. Belə ki, AzTU-da keçirilən AI - Baku 2025: Süni İntellekt və Biotibbi İnnovasiyalar üzrə Azərbaycan-Almaniya Strateji Tərəfdaşlıq Forumu çərçivəsində Azərbaycan Texniki Universitetində “AI-MED LAB” laboratoriyasının açılış mərasimi keçirilib. AzTU-nun Biotibbi Mühəndislik İnstitutunun nəzdində yaradılan “AI-MED LAB”ın məqsədlərindən biri də qeyd edilən elmi-tətqiqat işlərini aparmaq və Azərbaycanı beynəlxalq səviyyədə layiqincə təmsil etməkdir. Bu isə təkcə milli səhiyyəmiz üçün deyil, həmçinin beynəlxalq səviyyədə elmi innovasiyalara və müasir elmin inkişafına mühüm töhfədir.

Azərbaycan Texniki Universitetinin tələbələri (AzTU) Elm və Təhsil Nazirliyinin Dendrologiya İnstitutunun “Konstitusiya və Suverenlik İli” və Azərbaycan Milli Elmlər Akademiyasının (AMEA) yaradılmasının 80-ci ildönümü ilə əlaqədar təşkil etdiyi bilik yarışında uğur qazanıb. Belə ki, AzTU-nun SABAH qruplarının tələbəsi Əliyoldaş Əmiraslanlı və Maşınqayırma və robotexnika fakültəsinin tələbəsi Anabacı Əmiraslanovanın birgə hazırladığı “CO2toD” adlı cihaz birinci yerə layiq görülüb. Qeyd edək ki, sözügedən qurğu hazırda dünyanın ən böyük problemlərindən olan qlobal istiləşmənin qarşısının alınması məqsədilə yaradılıb. Startap Beynəlxalq Yaşıl STEAM Azərbaycan Festivalında 1-ci yerə, Dünya Robot Olimpiadasında 2-ci yerə, həmçinin digər müsabiqələrdə müxtəlif mükafatlara layiq görülüb. AzTU-nun rektoru Vilayət Vəliyev tələbələrlə görüşüb, onları təbrik edib. Rektor bu cür nailiyyətlərin davamlı olmasını arzulayıb.

“Synergia Academy” şirkətnin icraçı direktoru Rəna Əfəndiyevanın rəhbərlik etdiyi nümayəndə heyəti Azərbaycan Texniki Universitetinin (AzTU) qonağı olub. Qonaqlar AzTU-nun rektoru Vilayət Vəliyev və universitetin nümayəndələri ilə görüşüblər.Görüş zamanı “Synergia Academy” şirkəti tərəfindən uğurla həyata keçirilən “Təhsildən Karyeraya” layihəsində AzTU tələbələrinin iştirakı və əldə etdikləri nailiyyətlər müzakirə edilib. Qeyd olunub ki, bu kimi layihələr tələbələrin praktiki bilik və bacarıqlarını artırmaqla yanaşı, onların karyera inkişafına da mühüm töhfə verir.Görüşün sonunda AzTU ilə “Synergia Academy” şirkəti arasında əməkdaşlıq haqqında müqavilə imzalanıb. Müqavilə çərçivəsində universitet-sənaye əlaqələrinin gücləndirilməsi, tələbəyönümlü yanaşmaların inkişaf etdirilməsi və əmək bazarının tələblərinə uyğun mütəxəssis hazırlığı nəzərdə tutulur.

Azərbaycan Texniki Universitetində (AzTU) “AI-MED LAB” laboratoriyasının açılış mərasimi keçirilib. Tədbir AzTU-da keçirilən AI - Baku 2025: Süni İntellekt və Biotibbi İnnovasiyalar üzrə Azərbaycan-Almaniya Strateji Tərəfdaşlıq Forumu çərçivəsində təşkil olunub. Forum Azərbaycan Prezidenti İlham Əliyevin 2025-ci il 19 mart tarixli Sərəncamı ilə təsdiq olunmuş “Azərbaycan Respublikasının 2025–2028-ci illər üçün süni intellekt Strategiyası” çərçivəsində müəyyən edilmiş prioritet hədəflərə uyğun olaraq keçirilən ilk beynəlxalq tədbirdir. Eyni zamanda, laboratoriyada qan-damar sistemində trombların yeni texnoloji sistemlər vasitəsilə aradan qaldırılması üsulları master-klas vasitəsilə təqdim olunub. Tibb elmləri doktoru, Almaniyanın Troisdorf şəhərində Radiologiya, Nuklear Tibb və Neyroradiologiya Klinikasının rəhbəri, Köln Universitetinin əməkdaşı və AzTU-nun Biotibbi Mühəndislik İnstitutunun direktoru, professor Nuran Abdullayev laboratoriyanın fəaliyyəti barədə məlumat verib. Qeyd olunub ki, AzTU-nun Biotibbi Mühəndislik İnstitutunun nəzdində yaradılan “AI-MED LAB”ın məqsədi Azərbaycanı beynəlxalq səviyyədə təmsil etməkdir. Burada biotibbi mühəndislik sahəsində ən müasir problemlərin süni intellekt alqoritmləri ilə həllinə yönəlmiş qabaqcıl elmi-tədqiqat işləri aparılacaq. Bu, təkcə milli səhiyyəmiz üçün deyil, həmçinin beynəlxalq səviyyədə elmi innovasiyalara və müasir tibbin inkişafına mühüm töhfədir. Tədbirdə Almaniyadan gələn mütəxəssislər, şirkət nümayəndələri, həmçinin AzTU-nun professor-müəllim heyəti iştirak edib.

Azərbaycan Texniki Universitetində (AzTU) AI-MED Baku 2025: Süni İntellekt və Biotibbi İnnovasiyalar üzrə Azərbaycan-Almaniya Strateji Tərəfdaşlıq Forumu keçirilib. AzTU-nun Biotibbi Mühəndislik İnstitutunun təşkilatçılığı ilə keçirilən forumda süni intellektin elm sahəsində, tədqiqat işlərində, səhiyyədə tətbiqindən bəhs olunub. İştirakçıları salamlayan AzTU-nun rektoru Vilayət Vəliyev bildirib ki, forum 2025-ci il 19 mart tarixli Sərəncamı ilə təsdiq olunmuş “Azərbaycan Respublikasının 2025–2028-ci illər üçün süni intellekt Strategiyası” çərçivəsində müəyyən edilmiş prioritet hədəflərə uyğun olaraq təşkil olunub.  Rektor süni intellekt sahəsində dünyada və ölkədə görülmüş işlərdən danışıb. O, bu cür beynəlxalq forumların AzTU-nun bir elm ocağı kimi nüfuzunun artmasına və Azərbaycanın elmi arenada daha da tanınmasına, yeni nəslin tədqiqat işlərində süni intellektdən düzgün formada bəhrələnməsinə, sənaye və müxtəlif mühəndislik sahələrində süni intellektin tətbiqinə, beynəxalq şirkətlərlə əməkdaşlığa müsbət töhfələr verəcəyini vurğulayıb.Daha sonra Almaniya-Azərbaycan Radioloji və Neyroradioloji Cəmiyyətinin sədri, Almaniyanın Troisdorf şəhərində Radiologiya, Nuklear Tibb və Neyroradiologiya Klinikasının rəhbəri, Köln Universitetinin əməkdaşı və AzTU-nun Biotibbi Mühəndislik İnstitutunun direktoru, professor Nuran Abdullayev forumun əhəmiyyəti və gənc tədqiqatçılar üçün faydasından danışıb. Çıxışdan sonra Nuran Abdullayev “Süni intellekt səhiyyədə: inqilab yoxsa reallıq”, “Acandis” şirkətinin nümayəndəsi Kılıckap Andas “Yeni nəsil stendlər və yeni biotibbi texnologiyalar”, AzTU-nun Data Elmi və Süni İntellekt İnstitutunun direktoru, AMEA-nın müxbir üzvü Ramiz Alıquliyev “Süni intellekt: inkişaf mərhələləri, mənbələri, trendləri və təhlükələri” mövzusunda geniş təqdimatlar ediblər.Təqdimatlardan sonra forum sual-cavab sessiyası ilə davam edib.

Azərbaycan Texniki Universitetində (AzTU) AI-MED Baku 2025: Süni İntellekt və Biotibbi İnnovasiyalar üzrə Azərbaycan-Almaniya Strateji Tərəfdaşlıq Forumu çərçivəsində işgüzar görüş keçirilib. Görüşdə AzTU-nun rektoru Vilayət Vəliyev, Almaniya-Azərbaycan Radioloji və Neyroradioloji Cəmiyyətinin sədri, Almaniyanın Troisdorf şəhərində Radiologiya, Nuklear Tibb və Neyroradiologiya Klinikasının rəhbəri, Köln Universitetinin əməkdaşı və AzTU-nun Biotibbi Mühəndislik İnstitutunun direktoru, professor Nuran Abdullayev, “Philips” şirkətinin regional meneceri Nigar Zeynalova, “Acandis” şirkətinin nümayəndəsi Kılıckap Andas və universitetin nümayəndələri iştirak edib. Görüş zamanı AzTU-da keçirilən beynəlxalq forumun əhəmiyyəti vurğulanıb, həmçinin forumun Azərbaycan-Almaniya əlaqələrinin daha da inkişafına töhfə verəcəyi qeyd olunub. Həmçinin elmi-tədqiqatlar və kadr hazırlığı istiqamətində əməkdaşlıqlara dair layihələr müzakirə edilib. Daha sonra AzTU ilə Almaniya-Azərbaycan Radioloji və Neyroradioloji Cəmiyyəti arasında əməkdaşlıq haqqında memorandum imzalanıb.

Alman Akademik Mübadilə Xidmətinin (DAAD) təşkilatçılığı ilə aparıcı Almaniya universitetlərinin rəhbər heyəti Bakıda səfərdə olub. Səfər çərçivəsində DAAD-nin təşkilatçılığı ilə Azərbaycan universitetləri ilə görüşlər təşkil edilib. Görüşlərdə Azərbaycan Texniki Universitetini (AzTU) elm və innovasiyalar üzrə prorektor Sübhan Namazov, beynəlxalq əlaqlər üzrə prorektor Fariz Məmmədov, Tədris şöbəsinin müdiri Ərəstun Məmmədov, Maşınqayırma texnologiyaları kafedrasının müdiri Nizami Yusifov təmsil edib.  Görüşlər zamanı AzTU haqqında Almaniya universitetlərinə məlumat verilib və potensial əməkdaşlıq sahələri müzakirə olunub.