Azərbaycan Texniki Universitetində (AzTU) İnkubasiya Mərkəzinin açılış mərasimi keçirilib. Tədbirdə universitet rəhbərliyi, dövlət qurumlarının, innovasiya sahəsində fəaliyyət göstərən təşkilatların nümayəndələri və tələbələr iştirak edib. Rektorun rəqəmsal məsələlər üzrə məsləhətçisi Osman Gündüz AzTU-da innovativ düşüncə və startap mədəniyyətinin təşviq olunmasının zəruriliyini vurğulayaraq bildirib ki, universitetdə yaradılan İnkubasiya Mərkəzi tələbələrin ideyalarının reallaşması üçün mühüm platforma olacaq. Osman Gündüz qeyd edib ki, bu mərkəz təkcə universitet miqyasında deyil, ümumilikdə ölkənin innovasiya ekosisteminə dəyər qatacaq bir təşəbbüsdür. Daha sonra AzTU İnkubasiya Mərkəzinin koordinatoru Azad Musayev çıxış edərək mərkəzin yaradılma məqsədi, qarşıya qoyulan hədəflər və planlaşdırılan fəaliyyət istiqamətləri barədə məlumat verib. O bildirib ki, mərkəz tələbələrə ideyalarını startap layihələrinə çevirmək, texnoloji bacarıqlarını inkişaf etdirmək və müxtəlif mentorluq proqramlarında iştirak etmək imkanı yaradacaq. Mərkəzin işinə uğurlar arzulayan AzTU-nun rektoru Vilayət Vəliyev universitetdə həyata keçirilən innovasiyayönümlü fəaliyyətlərdən danışıb. Rektor qeyd edib ki, AzTU İnkubasiya Mərkəzinin fəaliyyəti tələbələrin yaradıcı potensialının üzə çıxarılmasına, elmi nəticələrin tətbiqə yönəldilməsinə və universitetin innovasiya strategiyasının gücləndirilməsinə xidmət edəcək. Vilayət Vəliyev bildirib ki, universitet bu istiqamətdə dövlət qurumları, özəl sektor və beynəlxalq tərəfdaşlarla sıx əməkdaşlıq etməyi planlaşdırır.İnnovasiya və Rəqəmsal İnkişaf Agentliyinin İdarə heyətinin sədr müavini Rəşad Xalıqov, ABB İnnovasiya Mərkəzinin direktoru Həsən Eminov, KOBİA İdarə Heyəti sədrinin müşaviri Zaur Qardaşov, mentor Elşad Yusifli çıxış edərək İnkubasiya Mərkəzinin yaradılmasını ölkədə ekosistemin gücləndirilməsi baxımından mühüm addım olaraq dəyərləndirib və əməkdaşlığa hazır olduqlarını bildiriblər.

Azərbaycan Texniki Universitetinin (AzTU) Xüsusi texnika və texnologiya fakültəsində 2025/2026-cı tədris ilinin payız semestri üzrə keçirilən aralıq imtahanları uğurla davam edir. Aralıq imtahanlarının il ərzində iki dəfə keçirilməsi nəzərdə tutulur. Bu yanaşma tələbələrin semestr boyu davamlı öyrənməsini stimullaşdırmaqla yanaşı, qiymətləndirmənin obyektivliyinin və şəffaflığının daha da artırılmasına xidmət edir. Qeyd edək ki, regionda müdafiə sənayesi sahəsində ixtisaslı mühəndis kadrlar hazırlayan yeganə fakültə olan Xüsusi texnika və texnologiya fakültəsində imtahanlar müasir qiymətləndirmə mexanizmi əsasında keçirilir, prosesin gedişinə isə fakültə rəhbərliyi və nümayəndələri tərəfindən nəzarət olunur.

Azərbaycan Texniki Universitetinin (AzTU) nümayəndə heyətinin İsrailə işgüzar səfəri çərçivəsində AzTU və İsrailin Bar-İlan Universiteti arasında magistratura səviyyəsində elektrik və elektronika mühəndisliyi ixtisası üzrə ikili diplom proqramı haqqında müqavilə imzalanıb. İmzalanma mərasimində Azərbaycan Respublikasının İsrail Dövlətində fövqəladə və səlahiyyətli səfiri Müxtar Məmmədov da iştirak edib. İkili diplom proqramına qəbul olunacaq tələbələr bir il AzTU-da, bir il Bar-İlan Universitetində təhsil alacaqlar. Qeyd edək ki, nümayəndə heyətində beynəlxalq əlaqələr üzrə prorektor Fariz Məmmədov, Müdafiə Texnologiyaları və Kibertəhlükəsizlik İnstitutunun direktoru Rahid Ələkbərli və Beynəlxalq əlaqələr şöbəsinin Layihələrin idarə olunması sektorunun müdiri Elşən Qurbanov təmsil olunub.

Azərbaycan Texniki Universitetində (AzTU) Milli Qəhrəman Mübariz İbrahimova həsr olunmuş "Mübarizdən sonra" kitabının təqdimatı olub. 44 günlük Vətən müharibəsində qazanılan qələbənin  5 illiyi münasibətilə keçirilən təqdimatda Humanitar fənlər kafedrasının müdiri Həbib Mirzəyev Azərbaycan Yazıçılar Birliyinin üzvü, şair, yazıçı, publisist Müşfiq Malik Muğanlının qələmə aldığı “Mübarizdən sonra” kitabının iki hissə, dörd bölümdən ibarət olduğunu bildirib. Birinci hissədə Milli Qəhrəman Mübariz İbrahimovun atası Ağakərim İbrahimovun uşaq, yeniyetmə və gənclərə verdiyi dəyərli məsləhətlər, Mübariz haqqında görkəmli şəxsiyyətlərin fikirləri, ikinci hissədə isə Mübariz İbrahimovun həyatı və onun qəhrəmanlığına dair müəllifin bədii-publisistik düşüncələr, o cümlədən “Müqəddəs Mübarizim” adlı poemasına yer verilib. Humanitar fənlər kafedrasının əməkdaşları - filologiya üzrə fəlsəfə doktoru, dosent Afaq Zeynalova, müəllim Rəna Nəcəfova, tələbələrdən adından isə Fatih Emir Torum kitabın əhəmiyyətindən danışıblar. Xüsusi olaraq vurğulanıb ki, Azərbaycan igidlərinin Vətən sevgisi və bu müqəddəs duyğuların müqabilində baş qaldıran yüksək qəhrəmanlıq  keyfiyyətləri tarixin şanlı səhifəsi kimi daim xatırlanacaq.   Kitabın müəllifi Müşfiq Malik Muğanlı çıxış edərək nəşrin ərsəyə gəlməsinə dair mühüm  məqamları açıqlayıb, Mübarizin atası Ağakərim İbrahimovun bu istiqamətdə verdiyi dəyərli tövsiyələri xatırladıb. O, kitabın təbliği və təşviqi istriqamətində Milli Qəhrəmanın atasına verdi sözün yerinə yetirilməsi məqsədilə bütün imkanlarını səfərbər edəcəyini qeyd edib. Tədbirin sonunda müəllif  "Mübarizdən sonra" və Mübariz İbrahimovun atasının düşüncələrini özündə əks etdirən "Ağakərim İbrahimovun düşüncələri" adlı kitablarını universitetə hədiyyə edib.

Azərbaycan Texniki Universitetində (AzTU) Pakistanın Milli Elm və Texnologiya Universitetinin (NUST) nümayəndə heyəti ilə görüş keçirilib. Nümayəndə heyətində NUST-ın tədris işləri üzrə prorektoru professor Hasan Osman və Tədqiqat direktoru professor Muhammad Junaid Khan təmsil olunub. Nümayəndə heyətinin bir həftəlik səfərinin ilk günü keçirilən görüşdeə AzTU-nun rektoru Vilayət Vəliyev, elm və innovasiyalar üzrə prorektor Sübhan Namazov, beynəlxalq əlaqələr üzrə prorektor Fariz Məmmədov və Tədqiqat və inkişaf departamentinin direktoru Bəxtiyar Bədəlov iştirak edib. Görüşdə Azərbaycan və Pakistan universitetləri arasında elm, təhsil və innovasiya sahələrində əməkdaşlığın genişləndirilməsi, birgə elmi-tədqiqat layihələrinin həyata keçirilməsi, müəllim və tələbə mübadiləsi, eləcə də birgə doktorantura proqramlarının yaradılması imkanlarını müzakirə olunub. Eyni zamanda, müasir texnologiyalar və innovasiyayönümlü tədqiqat sahələrində birgə fəaliyyətin əhəmiyyəti vurğulanıb. Səfər çərçivəsində AzTU əməkdaşları üçün təqdimat və müzakirə sessiyası da təşkil olunub. NUST nümayəndələri universitetin elmi-tədqiqat infrastrukturu, innovasiya mərkəzləri, beynəlxalq əməkdaşlıq proqramları və qlobal layihələrdə iştirakı barədə təqdimatla çıxış ediblər.

Azərbaycan Texniki Universitetində (AzTU) Yunus Əmrə İnstitutunun təşkilatçılığı ilə Türkiyənin ilk kosmonavtı, hərbi pilot Alper Gezeravcı ilə görüş keçirilib. Tədbirdə AzTU tələbələri ilə yanaşı, Türkiyə-Azərbaycan Universitetinin (TAU) tələbələri də iştirak edib. Rektor Vilayət Vəliyev Türkiyənin ilk kosmonavtı Alper Gezeravcının AzTU-ya səfər etməsindən məmnunluğunu bildirib. Qeyd edib ki, Alper Gezeravcının tələbələrlə görüşü onlar üçün böyük motivasiyadır. Yunus Əmrə İnstitutunun koordinatoru Gökhan Seyhan tələbələrin elm, tədqiqat, texnologiya sahəsində uğur qazanan dünyaşöhrətli insanlarla görüşlərinin təşkil edilməsinin qürurlu olduğunu deyib. Daha sonra Türkiyənin ilk kosmonavtı Alper Gezeravcı geniş təqdimatla çıxış edib. Bildirib ki, son 19 ay ərzində 224 şəhərdə 503 proqram həyata keçirilib. Məqsəd gələcəyin təminatı olan gənclərlə birbaşa ünsiyyət qurmaq, onları maraqlandıran sualları cavablandırmaqdır. Alper Gezeravcı tələbələrə kosmonavtikanın görünən və görünməyən tərəflərindən bəhs edib. O həmçinin çəkisizlik şəraitində baş verən dəyişikliklər və onun insan psixologiyasına təsirindən danışıb. Tədbirdə kosmonavt Alper Gezeravcının keçdiyi həyat yolu, eləcə də karyerasında qazandığı təcrübələrdən bəhs edən videolar da nümayiş etdirilib. Türkiyə ilə Azərbaycan arasındakı sarsılmaz birlik və qardaşlıq münasibətlərindən danışan kosmonavt, türkiyəli və azərbaycanlı gənclərin yüksək intellekt və praktik düşüncə qabiliyyətinə malik olduğunu deyib. Görüş zamanı tələbələrin sualları cavablandırılıb.   Xatırladaq ki, ilk türk astronavt Alper Gezeravcının 2024-cü il yanvarın 19-da kosmosa səyahəti başlayıb. O, Beynəlxalq Kosmik Stansiyada 22 gün qalıb və 13 fərqli elmi təcrübədə iştirak edib. Mikroqravitasiya və kosmik mühitlərdə aparılan bu araşdırmalar insan genetikası və sağlamlığı, biologiya, materialşünaslıq, istehsal texnologiyaları, fundamental elmlər sahələrini əhatə edib.

Türkiyənin ilk kosmonavtı, hərbi pilot Alper Gezeravcı  Azərbaycan Texniki Universitetinin (AzTU) qonağı olub. Qonaq AzTU-nun rektoru Vilayət Vəliyevlə görüşüb. Daha sonra Alper Gezeravcı universitetin ərazisini gəzib. Həmçinin “Mühendis Geliştirme Proqramı” (MGP) emalatxanası ilə tanış olub. Qeyd olunub ki, MGP emalatxanası Türk Aviasiya ve Kosmik Sənayesi Şirkəti (TUSAŞ) ilə AzTU-nun əməkdaşlığı çərçivəsində qurulub. Emalatxanada Alper Gezeravcıya AzTU və Milli Aviasiya Akademiyasının (MAA) tələbələrinin birgə hazırladığı müdafiə təyinatlı pilotsuz uçuş aparatı (PUA) haqqında da ətraflı məlumat verilib. Bildirilib ki, sözügedən PUA AzTU, TUSAŞ və MAA-nın birgə əməkdaşlığı çərçivəsində həyata keçirilən "AzTU-Turkish Aerospace, MGP 2023.1" yüksək ixtisaslı mühəndis hazırlığı təlim proqramı nəticəsində ərsəyə gəlib. PUA düşmən və dost təyinatı məqsədilə əsgərlərin geyindiyi formaların (beretlər) rənglərinə görə fərqləndirmək funksiyasına malikdir. PUA 50 metr hündürlükdə uçuş vasitəsilə öz missiyasını həyata keçirə bilir. Prosesin ümumi davametmə müddəti 14 dəqiqədir. Uçuş zamanı düşmən koordinatları proqram vasitəsilə avtomatik hesablanır, ümumi əsas məlumatlar təhlil olunaraq Yer İdarəetmə Stansiyasına ötürülür. Uçuş Yer Stansiya İnterfeysində (GUI-də) göstərilən məlumatlara PUA-nın istiqamətinə nəzarət etməklə həyata keçirilir.

Özbəkistan Respublikasının Daşkənd şəhərində Daşkənd Beynəlxalq Universitetinin ev sahibliyi ilə Türk Universitetlər Birliyinin (TÜRKÜNİB) 8-ci Baş Assambleyasının iclası keçirilib. İclasda Azərbaycan Texniki Universiteti (AzTU) də daxil olmaqla ümumilikdə Azərbaycanın 13 universiteti TÜRKÜNİB-ə yeni üzv qəbul olunub. Tədbir çərçivəsində üzv universitetlər arasında elm və təhsil sahəsində proqramların uyğunlaşdırılması, tələbə və müəllim mübadilələrinin artırılması, eləcə də birgə akademik fəaliyyət, layihə və konfransların təşkili, həmçinin mədəniyyət, elm və idman sahələrində müsabiqələrin keçirilməsi istiqamətində əməkdaşlıq imkanları müzakirə edilib.

Azərbaycan Texniki Universitetinin (AzTU) nümayəndə heyəti İsrail Dövlətində rəsmi səfərdə olub. Səfərin əsas məqsədi AzTU ilə İsrailin aparıcı universitetləri arasında elmi-tədqiqat, tədris və innovasiya sahələrində əməkdaşlıq əlaqələrinin qurulması və genişləndirilməsi olub. Səfər çərçivəsində nümayəndə heyəti İsrailin Tel-Aviv Universiteti, Bar-Ilan Universiteti, Ben-Qurion Neqev Universiteti, Holon Texnologiya İnstitutu kimi qabaqcıl ali təhsil müəssisələrini, “Check Point” kibetəhlükəsizlik şirkətini, Qüds İnnovasiya Mərkəzini ziyarət edib. Görüşlər zamanı AzTU nümayəndə heyəti təmsil etdikləri universitet barədə geniş məlumat verib. AzTU-nun ikitərəfli tədris və tədqiqat layihələrinin yerinə yetirilməsi, müəllim-tələbə mübadiləsi, beynəlxalq reytinqlərdə iştirak, birgə elmi məqalələrin yazılması, ikili diplom və elmi rəhbərliklərin həyata keçirilməsi istiqamətində əməkdaşlıqda maraqlı olduğu vurğulanıb. Səfər çərçivəsində nümayəndə heyəti həmçinin Holon Texnologiya Universitetində (HTİ) təşkil olunmuş “Süni Zəka, Dayanıqlılıq və Rəqəmsal İrs” mövzusunda HTİ və onun Avrasiya və Balkan Ölkələri Tərəfdaşlarının 4-cü İllik Seminarında iştirak etdib. Seminarda Rahid Ələkbərli məruzə ilə çıxış edib.  Qeyd edək ki, nümayəndə heyətində beynəlxalq əlaqələr üzrə prorektor Fariz Məmmədov, Müdafiə Texnologiyaları və Kibertəhlükəsizlik İnstitutunun direktoru Rahid Ələkbərli və Beynəlxalq əlaqələr şöbəsinin Layihələrin idarə olunması sektorunun müdiri Elşən Qurbanov təmsil olunub.

Azərbaycan Texniki Universitetinin (AzTU) Kommunikasiya şöbəsinin və 1 nömrəli Tələbə Poliklinikasının birgə təşkilatçılığı ilə tələbələr üçün “Sağlam bədəndə sağlam ruh olar” devizi altında maarifləndirici tədbir təşkil olunub. Dayanıqlı İnkişaf Məqsədləri (SDG) çərçivəsində keçirilən tədbirdə Kommunikasiya şöbəsinin əməkdaşı Mehti Namazov qeyd edib ki, fiziki və psixoloji sağlamlıq hər bir uğuru şərtləndirən əsas amillərdəndir. O, AzTU-da bu cür maarifləndirici tədbirlərin təşkilinə böyük önəm verildiyini diqqətə çatdırıb. Tələbə Poliklinikasının həkimləri – terapevt Nəcibə Quliyeva və infeksionist Gülnarə Allahverdiyeva tələbələri allergik xəstəliklər, o cümlədən suçiçəyi xəstəliyi və həmin xəstəliklərə qarşı mübarizə üsulları barədə maarifləndiriblər. Onlar gənclərə sözügedən xəstəliklərə qarşı düzgün davranış və profilaktik tədbirlər haqqında məlumat verərək, gigiyena qaydalarına riayət etməyi tövsiyə ediblər.