Sərfəli təklifləri ilə seçilən mobil operator Nar ölkədə peşəkar kadr hazırlığı məqsədilə növbəti layihəsini həyata keçirib. On ildən çoxdur ki, davam edən tərəfdaşlıq çərçivəsində Nar Azərbaycan Texniki Universitetinin (AzTU) tələbələri üçün karyera planlaşdırılması təlimi təşkil edib. Təlim zamanı AzTU tələbələri ilə birgə mobil rabitə sektorunda karyera imkanları, gənc kadrlar üçün əsas tələblər və sürətlə dəyişən rəqəmsal mühitə uyğunlaşma yolları müzakirə olunub. Proqram çərçivəsində iştirakçılar tərcümeyi-hal (CV) tərtibatı, motivasiya məktublarının hazırlanması və işgüzar müsahibələr üzrə biliklər əldə ediblər.  Həmçinin Nar nümayəndələri iş mühitində effektiv ünsiyyət, nəticəyə fokuslanma, məsuliyyətli yanaşma və komanda ilə işləmək kimi peşəkar keyfiyyətlərin əhəmiyyəti barədə tələbələrlə öz təcrübələrini bölüşüblər. İnteraktiv formatda təşkil olunan təlimdə tələbələrin telekommunikasiya sahəsinə, mobil operatorun daxili proseslərinə və təcrübə proqramlarına dair sualları cavablandırılıb. Sonda Nar tərəfindən iştirakçılara təlimdə iştiraklarını təsdiq edən sertifikatlar təqdim edilib. Təlim zamanı xüsusi fərqlənən tələbələr Nar tərəfindən dəyərli hədiyyələrlə mükafatlandırılıb.

Azərbaycan Texniki Universitetinin (AzTU) Özbəkistanın Əndican Dövlət Texniki İnstitutu (ƏDTİ) ilə əməkdaşlığı çərçivəsində ƏDTİ-nin Nəqliyyat və logistika, həmçinin İqtisadiyyat kafedralarının ümumilikdə 14 nəfərdən ibarət professor-müəllim heyəti mübadilə proqramı ilə AzTU-nun qonağı olub.  AzTU-nun beynəlxalq əlaqələr üzrə prorektoru Fariz Məmmədov qonaqlara universitetin fəaliyyəti barədə məlumat verib. Daha sonra qonaqlar müvafiq olaraq AzTU-nun Nəqliyyat və logistika və Sənaye iqtisadiyyatı və menecment fakültələrinin müəllim və tələbələri ilə görüşüb, tədris prosesi ilə tanış olub, müxtəlif mövzularda seminarlar təşkil ediblər.  Görüş zamanı hər iki universitetin nümayəndələri arasında gələcəkdə birgə tədris və tədqiqat imkanları barədə müzakirələr aparılıb.

Azərbaycan Texniki Universitetinin (AzTU) tələbələrindən ibarət ESTIEM Lokal Qrupu (LG) Serbiyanın Niş şəhərində keçirilən ESTIEM Şəbəkəsinin LXXI Şura İclasında iştirak edib. Bu tədbir ESTIEM-in (Sənaye mühəndisliyi və idarəetmə ixtisası üzrə Avropa Tələbələri Assosiasiyası) əsas fəaliyyət istiqamətlərindən biri olub, lokal qrupların beynəlxalq əməkdaşlıq imkanlarını genişləndirmək, təcrübə mübadiləsi aparmaq və şəbəkənin qərarvermə prosesində iştirak etmək məqsədi daşıyır.    Tədbirdə AzTU ESTIEM Lokal Qrupunu tələbələr - Mühəmməd-Əli Salamov və Ülvi Cəfərli təmsil edib. Onlar şəbəkənin qərarvermə mexanizmlərində fəal iştirak edib. Təxminən 300 nəfərin qatıldığı iclasda AzTU tələbələrinin əsas hədəfi lokal qrupun Müşahidəçi (Observer) səviyyəsinə keçidini təmin etmək olub. AzTU nümayəndələrinin hazırlıq səviyyəsi və peşəkar təqdimatı nəticəsində paralel olaraq Qonaq (Guest) səviyyəsində iştirak edən digər lokal qruplardan fərqli olaraq, AzTU ESTIEM Lokal Qrupu növbəti mərhələyə ilk keçən qrup olub. AzTU tələbələri təqdimatlarında həm qrupun fəaliyyətini, həm də “Novruz Europe 3D” layihəsini uğurla nümayiş etdiriblər. Təqdimatdan sonra keçirilən səsvermə nəticəsində AzTU ESTIEM Lokal Qrupu rəsmi olaraq Müşahidəçi səviyyəsinə yüksəlib.

“50-ci ICPC – Universitetlərarası Beynəlxalq Proqramlaşdırma Müsabiqəsi”nin Azərbaycan üzrə regional mərhələsi keçirilib. Müsabiqə "ICPC Azərbaycan" icması, Azərbaycan Texniki Universiteti (AzTU) və ADA Universitetinin təşkilatçılığı, İnnovasiya və Rəqəmsal İnkişaf Agentliyinin tərəfdaşlığı ilə həyata keçirilib. Müsabiqənin regional mərhələsi AzTU-da təşkil olunub. Yarışda Azərbaycanın 20 ali təhsil müəssisəsindən 52 komanda (hər biri üç tələbə və bir komanda rəhbərindən ibarət olmaqla), həmçinin müsabiqədən kənar 3 məktəblilər komandası iştirak edib. Komandalara 5 saat ərzində 12 alqoritmik məsələni C++, Java və ya Python proqramlaşdırma dillərində həll etmək və bu həlləri avtomatik qiymətləndirmə sistemində sınaqdan keçirmək tapşırığı verilib. Müsabiqənin nəticələrinə əsasən, "AzTU4" komandası (Səməd Mastanov, Əlimdar Musayev, Yusif İsmayılov, komanda rəhbərləri: Kənan Əsgərli, Etibar Seyidzadə) III dərəcəli sertifikata layiq görülüb və 15–17 dekabr 2025-ci il tarixlərində Gürcüstanın Tbilisi şəhərində keçiriləcək “50-ci ICPC – Universitetlərarası Beynəlxalq Proqramlaşdırma Müsabiqəsi”nin yarımfinal mərhələsində və Cənubi Qafqaz Açıq Çempionatında (komanda və fərdi nominasiyalar üzrə) iştirak etmək hüququ əldə edib. Müsabiqənin yarımfinal mərhələsində Azərbaycanı 21 komanda təmsil edəcək.

Azərbaycan Texniki Universitetinin (AzTU) Xüsusi texnika və texnologiya fakültəsində ISO 21001:2018 – Təhsilin idarəedilməsi standartı üzrə növbəti təlimlər uğurla tamamlanıb. Təlimlər “Daxili auditin keçirilməsi” və “Tələbələr və tətbiq üzrə rəhbərlik beynəlxalq standartı – məlumatlandırma” mövzularını əhatə edib.Dekan Yadullah Babayev ISO 21001:2018 standartının tətbiqinin fakültədə idarəetmə proseslərinin optimallaşdırılmasına, tədris fəaliyyətinin sistemli şəkildə qurulmasına və tələbəyönümlü yanaşmanın gücləndirilməsinə mühüm töhfə verəcəyini bildirib. O deyib ki, fakültədə həyata keçirilən bu proses təhsildə şəffaflığın, planlaşdırmanın və məsuliyyət bölgüsünün daha yüksək səviyyədə təşkil olunmasına şərait yaradacaq. Təlimdə çıxış edən “Keyfiyyət Assosiasiyası” İctimai Birliyinin sədri Samir Novruzlu qeyd edib ki, ISO 21001:2018 standartının tətbiqi fakültənin idarəetmə sistemini beynəlxalq tələblərə uyğunlaşdırmaqla yanaşı, burada keyfiyyət mədəniyyətinin gücləndirilməsinə də səbəb olacaq. Onun sözlərinə görə, bu standartın tətbiqi fakültənin rəqabətqabiliyyətliliyini artırmaqla, tələbələrin təhsil xidmətlərindən məmnunluğunu yüksəldəcək və beynəlxalq əməkdaşlıq imkanlarını genişləndirilməsinə töhfə verəcək.Təlimlər zamanı iştirakçılar ISO 21001 üzrə daxili auditin mahiyyəti, audit planlaması, qeydlərin aparılması, uyğunluq və uyğunsuzluqların müəyyən edilməsi, eləcə də təhsil təşkilatlarında proseslərin təkmilləşdirilməsi alətləri ilə tanış olublar. Bununla yanaşı, iştirakçılar tələbələrlə iş, kommunikasiya, məlumatlandırma və əməliyyat fəaliyyətlərinin standart tələblərinə uyğun qurulması mövzularında da praktiki biliklərə yiyələniblər.Tədbirin sonunda təlimi müvəffəqiyyətlə başa vuran iştirakçılara sertifikatlar təqdim olunub.

Dünya Bankı tərəfindən həyata keçirilən “Azərbaycan üçün sürətləndirilmiş texniki yardım aləti” (AZTAF) vasitəsilə icra olunan “Enerji səmərəliliyi və iqlim” layihəsi çərçivəsində Energetika Nazirliyinin təşkilatçılığı ilə Şamaxı şəhərində binalarda enerji səmərəliliyinin artırılması mövzusunda maarifləndirici təlim keçirilib. Məqsəd binalarda enerji səmərəliliyi tədbirlərinin həyata keçirilməsi, eyni zamanda “Enerji Effektivliyi Fondu” layihələrinin effektiv idarə olunması üçün bilik və bacarıqların artırılmasıdır. Təlimdə Azərbaycan Texniki Universitetinin (AzTU) Enerji effektivliyi və yaşıl enerji texnologiyaları kafedrasının baş müəllimi Asif Sadıqov və kafedranın assistenti Murad Rzayev iştirak edib. İki gün davam edən təlim zamanı iştirakçılara enerji auditi, binaların enerji səmərəliliyi üzrə modernizasiya və təkmilləşmə mexanizmləri, layihə idarəçiliyi, monitorinq və qiymətləndirmə üzrə mövzular təqdim edilib. Eyni zamanda, ölkənin enerji səmərəliliyi siyasəti haqqında ətraflı məlumat verilib. Gələcəkdə daha geniş auditoriya üçün təlimlərin yerli mütəxəssislər tərəfindən keçirilməsini təmin etmək məqsədilə yerli auditorlar üçün treninq keçirilib. Bunlarla yanaşı, təlimin praktiki hissəsi kimi Şamaxı rayonu ərazisində yerləşən ictimai binalardan birində enerji auditi aparılıb.

Cənubi Afrika Respublikasının ali təhsil və təlim nazirinin müavini xanım Nomusa Dube-Ncubenin rəhbərlik etdiyi nümayəndə heyəti ölkəmizə səfəri çərçivəsində Azərbaycan Texniki Universitetində (AzTU) olub. Qonaqlar AzTU-nun rektoru Vilayət Vəliyev və universitetin nümayəndələri ilə görüşüb. Qonaqları salamlayan rektor Vilayət Vəliyev onları AzTU-da görməkdən məmnunluğunu ifadə edib. Rektor universitetdə görülən işlər, həyata keçirilən təhsil proqramları, icra edilən layihələr, beynəlxalq əməkdaşlıq, eləcə də AzTU-nun müxtəlif sahələrdə gələcək hədəfləri barədə qonaqları məlumatlandırıb. Cənubi Afrika Respublikasının ali təhsil və təlim nazirinin müavini müavini xanım Nomusa Dube-Ncube təmsil etdiyi ölkənin ali təhsil sistemi haqqında geniş məlumat verib. Bildirib ki, Cənubi Afrika Respublikasının ali təhsil müəssisələri beynəlxalq əməkdaşlığı genişləndirir və Azərbaycan ali təhsil müəsssələri ilə tədris və elmi-tədqiqat istiqamətlərində əməkdaşlıqda maraqlıdırlar.  Görüş zamanı AzTU və Cənubi Afrika Respublikasının ali təhsil müəssisələri arasında tələbə və akademik heyətin qarşılıqlı mübadiləsi, birgə elmi-tədqiqatlar, ikili diplom proqramları imkanları müzakirə olunub. Sonda qonaqlar AzTU-nun müxtəlif laborariyaları və mərkəzləri ilə tanış olub.

Azərbaycan Texniki Universitetinin (AzTU) tələbələrindən ibarət komanda Elm və Təhsil Nazirliyinin dəstəyi və “STEAM Azərbaycan” layihəsinin təşkilatçılığı ilə Bakı Ekspo Mərkəzində keçirilən Beynəlxalq STEAM Azərbaycan Festivalında (SAF 2025) iştirak edib. AzTU komandası festival çərçivəsində yaradıcı yanaşma, texnoloji hazırlıq və praktiki bacarıqlarını nümayiş etdirib.

Azərbaycan Texniki Universiteti (AzTU) “QS Sustainability 2026” beynəlxalq reytinqində ətraf mühitə təsir, ictimai təsir və idarəetmə modeli sahələrində əldə etdiyi uğurlarla öz mövqeyini möhkəmləndirib. Reytinqə əsasən, AzTU dünyada 1501+, Asiyada 582-ci yerdə, Azərbaycan üzrə isə 5-ci yerdə qərarlaşıb. Ətraf mühitə təsir“Environmental Impact” indikatoru üzrə AzTU dünya üzrə 1247-ci yerdə qərarlaşıb. Bu, universitetin ekoloji siyasət, layihə və tədqiqatlarının beynəlxalq səviyyədə tanındığını göstərir. Universitet ətraf mühitə təsirin azaldılması, dayanıqlı enerji və resurslardan istifadənin təşviqi, tullantıların idarə olunması və ekoloji təhsilin gücləndirilməsi istiqamətində ardıcıl fəaliyyət göstərir. İctimai təsir“Sosial Impact” indikatoru üzrə universitet 1251+ kimi qiymətləndirilib. Bu göstərici universitetin sosial məsuliyyət, inklüzivlik, ictimai iştirakçılıq və cəmiyyətlə əlaqələrinin gücləndirilməsi sahəsindəki fəaliyyətlərinin beynəlxalq səviyyədə tanındığını təsdiqləyir. AzTU tələbələr, akademik heyət və yerli icmalar arasında sosial ədalət və bərabər imkanların təşviqinə xüsusi önəm verir. İdarəetmə modeli“Governance” indikatoru üzrə 670-ci yer universitetin strateji planlaşdırma, şəffaf idarəetmə, akademik etika, institusional effektivlik və keyfiyyət təminatı sahələrindəki nailiyyətlərini göstərir. Nəticə AzTU-nun idarəetmə strukturlarının beynəlxalq standartlara uyğun olduğunu və institusional potensialının gücləndirildiyini nümayiş etdirir. “QS Sustainability 2026” reytinqində əldə olunan nəticələr AzTU-nun ətraf mühitə məsuliyyət, İctimai təsir və idarəetmə modeli isqtiqamətində həyata keçirdiyi ardıcıl siyasətin beynəlxalq səviyyədə tanındığını göstərir. Bu nailiyyətlər universitetin qlobal ali təhsil sistemində rəqabət qabiliyyətini artırmaqla yanaşı, milli ali təhsil məkanının beynəlxalq nüfuzuna da əhəmiyyətli töhfə verir.

Azərbaycan Texniki Universitetinin (AzTU) SABAH qruplarında təhsil alan 3-cü və 4-cü kurs tələbələrinin karyera inkişafına dəstək və işə qəbul prosesi ilə bağlı maarifləndirici seminar təşkil olunub. AzTU SABAH Mərkəzinin rəhbəri Aytən Sadıqovanın təşəbbüsü və təşkilatçılığı ilə keçirilən seminar tələbələrin peşəkar inkişafına töhfə vermək məqsədi daşıyır. AzTU-nun İnsan resurslarının idarəedilməsi departamentinin müdiri, Beynəlxalq Kouçluq Federasiyasının (ICF) Azərbaycan bölməsinin direktoru Aytən Şıxəliyeva işə qəbul mərhələlərinin mahiyyəti, CV və motivasiya məktubunun hazırlanması, müsahibə zamanı effektiv davranış strategiyaları, korporativ mühitə uyğunlaşma və şəxsi brendin formalaşdırılması kimi vacib məsələlər barədə tələbələrə məlumat verib. Tədbir çərçivəsində tələbələrə real iş müsahibələrində tez-tez rast gəlinən suallar cavablandırılıb, işəgötürənlərin namizədlərdən gözləntiləri barədə praktiki məlumatlar təqdim olunub. Seminar interaktiv formatda keçirilib və tələbələrin sualları ətrafında geniş müzakirələr aparılıb.