Şimali Kipr Türk Cümhuriyyətinin Prezidenti Ersin Tatar Azərbaycan Texniki Universitetinin (AzTU) “Mühendis Geliştirme Proqramı” (MGP) emalatxanası ilə tanış olub. Qeyd olunub ki, MGP emalatxanası Türk Aviasiya ve Kosmik Sənayesi Şirkəti (TUSAŞ) ilə AzTU-nun əməkdaşlığı çərçivəsində qurulub. Emalatxanada Prezident Ersin Tatara AzTU və Milli Aviasiya Akademiyasının (MAA) tələbələrinin birgə hazırladığı müdafiə təyinatlı pilotsuz uçuş aparatı (PUA) haqqında da ətraflı məlumat verilib. Bildirilib ki, sözügedən PUA AzTU, TUSAŞ və MAA-nın birgə əməkdaşlığı çərçivəsində həyata keçirilən "AzTU-Turkish Aerospace, MGP 2023.1" yüksək ixtisaslı mühəndis hazırlığı təlim proqramı nəticəsində ərsəyə gəlib. PUA düşmən və dost təyinatı məqsədilə əsgərlərin geyindiyi formaların (beretlər) rənglərinə görə fərqləndirmək funksiyasına malikdir. PUA 50 metr hündürlükdə uçuş vasitəsilə öz missiyasını həyata keçirə bilir. Prosesin ümumi davametmə müddəti 14 dəqiqədir. Uçuş zamanı düşmən koordinatları proqram vasitəsilə avtomatik hesablanır, ümumi əsas məlumatlar təhlil olunaraq Yer İdarəetmə Stansiyasına ötürülür. Uçuş Yer Stansiya İnterfeysində (GUI-də) göstərilən məlumatlara PUA-nın istiqamətinə nəzarət etməklə həyata keçirilir. Prezident Ersin Tatar emalatxanada fəaliyyət göstərən tələbələrlə görüşüb, onlara uğurlar arzulayıb. 

Şimali Kipr Türk Cümhuriyyətinin Prezidenti Ersin Tatar Azərbaycan Texniki Universitetinə (AzTU) səfəri çərçivəsində Kitabxana İnformasiya Mərkəzi ilə tanış olub. Kitabxana İnformasiya Mərkəzinin direktoru Xəyalə Hacıyeva bildirib ki, mərkəz Elm və Təhsil Nazirliyinin tərəfdaşlığı, BP şirkəti və Azərbaycan Texniki Universitetinin (AzTU) maliyyə dəstəyi ilə qurulub. Mərkəzdə yaradılan imkanlar haqqında Prezident Ersin Tatara məlumat verən Xəyalə Hacıyeva qeyd edib ki, iki mərtəbədən ibarət olan kitabxana eyni vaxtda 200 nəfər istifadəçiyə xidmət göstərir. Beynəlxalq standartlara cavab verən mərkəzdə elmi-mədəni irsin mühafizəsi və istifadəsini təmin edən repozitariya yaradılıb və kitabxananın elektron xidmətlərinin inteqrasiya olunduğu veb sayt hazırlanıb. Mərkəz ən son kitabxana təhlükəsizlik və özünə xidmət sistemi ilə təchiz edilib. Elektron kiosklar oxuculara fiziki resurs kolleksiyasında olan resursun mövcudluq vəziyyətini təyin etməyə, özünə xidmət texnologiyası isə materialların istifadəçilər tərəfindən hesablarına daxil olmaqla sərbəst istifadəsini təmin edir. Bundan əlavə, Kitabxana istifadəçilər üçün printer və skaner avadanlıqları ilə də təchiz olunub. O da qeyd olunub ki, AzTU Kitabxana İnformasiya Mərkəzi yerli mütəxəssislər tərəfindən ölkədə yaradılmış ilk tam beynəlxalq infrastrukturlu kitabxanadır.

Azərbaycan Texniki Universitetinin (AzTU) sənaye mühəndisliyi ixtisası üzrə təhsil alan tələbələrinin Bakı Gəmiqayırma Zavodunun Təlim və inkişaf departamentində istehsalat təcrübəsi başa çatıb. 30 iyun 2025-ci il tarixində tələbələr istehsalat təcrübəsinin hesabatlarını müvəffəqiyyətlə müdafiə ediblər. İstehsalat təcrübəsinin nəticələrinə uyğun olaraq, Bakı Gəmiqayırma Zavodu Təlim və inkişaf departamenti tərəfindən tələbələrə sertifikat və hədiyyələr təqdim olunub. AzTU-nun rektoru Vilayət Vəliyev tərəfindən təcrübənin yüksək səviyyədə təşkilinə görə təcrübə rəhbəri, Təlim və inkişaf departamentinin müdiri Nəcəf Mustafayevə fəxri fərman təqdim edilib. Həmçinin sənaye mühəndisliyi ixtisası üzrə təhsil alan tələbələrin istehsalat  təcrübəsinin  yüksək səviyyədə təşkil olunmasına görə Bakı Gəmiqayırma Zavodunun İdarə Heyətinin sədri Elşad Nuriyevə təşəkkür məktubu ünvanlanıb.

Azərbaycan Texniki Universitetinin (AzTU) beynəlxalq əlaqələr üzrə prorektoru Fariz Məmmədov və Beynəlxalq əlaqələr şöbəsinin müdiri Orxan Vətənxah Çin Xalq Respublikasında işgüzar səfərdə olub. Məqsəd AzTU ilə Çin Xalq Respublikasının ali təhsil müəssisələri arasında əməkdaşlıqların qurulması, tədqiqat və təhsil sahəsində birgə fəaliyyətlərin həyata keçirilməsi olub. AzTU nümayəndələri səfər çərçivəsində Çinin Jenqjou şəhərində Sias Universiteti, Pekin şəhərində Pekin Texnologiya İnstitutu, Pekin Kimya Texnologiyaları Universiteti, Şimali Çin Energetika Universiteti, Ninqbo şəhərində yerləşən Nottinqem Universitetinin Ninqbo filialını, Şanxay şəhərində yerləşən Şanxay Mühəndislik Elmləri Universiteti, Şanxay Elm və Texnologiya Universiteti, Şərqi Çin Elm və Texnologiya Universiteti, Tonci Universiteti, Nancinq şəhərində yerləşən Nancinq İnformasiya Elmləri və Texnologiya Universitetində görüşlər keçirib. Beynəlxalq əlaqələr üzrə prorektoru Fariz Məmmədov və Beynəlxalq əlaqələr şöbəsinin müdiri Orxan Vətənxah görüşlər zamanı AzTU haqqında geniş məlumat veriblər. Çin universitetlərinin nümayəndələri ilə aparılan müzakirələrdə ikitərəfli tədris və tədqiqat layihələrinin yerinə yetirilməsi, qarşılıqlı müəllim-tələbə mübadiləsi, birgə elmi məqalələrin yazılması, ikili diplom proqramlarının hazırlanması, birgə elmi rəhbərliklərin həyata keçirilməsi, tələbələrin yay məktəbi proqramlarında qarşılıqlı iştirakı, doktorantların elmi-tədqiqat və təcrübə proqramlarına cəlb olunması kimi məsələlərdən bəhs olunub. Səfər zaman nümayəndə heyəti həmçinin Pekin şəhərində “Huawei” şirkətinin Tədqiqat və İnnovasiya Mərkəzi, “GEİDCO” təşkilatı (Global Energy Interconnection Development and Cooperaton Organization – Energetika Sahəsində Qlobal Qarşılıqlı Əlaqələrin İnkişafı və Əməkdaşlığı Təşkilatı) və Şanxay şəhərində fəaliyyət göstərən “CHINT Global” şirkətini ziyarət ediblər. Qeyd olunan təşkilatlarla keçirilən görüşlərdə AzTU tələbələrinin beynəlxalq təcrübə proqramlarına cəlb edilməsi və təşkilatlarla birgə elmi-tədqiqatların yerinə yetirilməsi istiqamətində ətraflı fikir mübadiləsi aparılıb. “Huawei” şirkətinin Tədqiqat və İnnovasiya Mərkəzində nümayəndə heyəti şirkətin qabaqcıl texnoloji həlləri və ixtira olunmuş məhsulları haqqında məlumatlandırılıb.  “CHINT Global” şirkətində istehsal sahələri ilə əyani tanışlıq həyata keçirilib, sənaye və universitet əməkdaşlığı modelləri, həmçinin universitetlərlə ortaq layihələrin icrası üzrə mövcud təcrübə öyrənilib.

Çinin Pekin Kimya Texnologiyaları Universitetinin Beynəlxalq təhsil məktəbinin sədri Li Qifangın başçılıq etdiyi nümayəndə heyəti Azərbaycan Texniki Universitetinin (AzTU) qonağı olub. Nümayəndə heyətində Materialşünaslıq və Mühəndislik Kollecinin dekan müavini Li Xiaofeng, Tədris işləri şöbəsinin direktor müavini Hou Hong, Xarici işlər şöbəsinin direktoru Zhang Shuai təmsil olunub. Qonaqlar AzTU-nun rektoru Vilayət Vəliyev və universitetin nümayəndələri ilə görüşüb. Rektor Vilayət Vəliyev universitetdə elm və tədqiqat sahəsində görülən işlər, həyata keçirilən ikili diplom proqramları və layihələr, eləcə də AzTU-nun Azərbaycanın təhsil sahəsinə gətirdiyi yeniliklər barədə qonaqlara ətraflı məlumat verib. Pekin Kimya Texnologiyaları Universitetinin nümayəndələri də öz növbəsində universitet haqqında geniş təqdimatla çıxış ediblər. Görüşdə iki universitet arasında materialşünaslıq və biomühəndislik sahələrində ikili diplom proqramlarının həyata keçirilməsi, birgə tədqiqatların aparılması, ortaq məqalə nəşri, təcrübə proqramlarında iştirak, birgə konfransların təşkili, həmçinin, tələbə-müəllim mübadiləsi kimi bir sıra məsələlər müzakirə olunub. 

Azərbaycan Texniki Universitetində (AzTU) “Məzun Günü-2025” adlı tədbir keçirilib. Əvvəlcə tədbir iştirakçıları universitetin foyesində ulu öndər Heydər Əliyevin büstü önünə gül dəstələri düzüb, xatirəsinə ehtiramlarını ifadə ediblər. “Məzun Günü-2025” tədbiri ölkənin ərazi bütövlüyü uğrunda canlarından keçmiş Vətən övladlarının xatirəsinin bir dəqiqəlik sükutla yad olunması və Azərbaycanın Dövlət Himninin səsləndirilməsi ilə başlayıb. Daha sonra AzTU-nun 75 illik yubileyinə həsr olunan videoçarx nümayiş etdirilib. Qonaqları salamlayan AzTU-nun rektoru Vilayət Vəliyev bu il bakalavriat və magistratura səviyyələri üzrə ümumilikdə 3000-dən çox tələbənin məzun olduğunu bildirib və onları təbrik edib. O, qeyd edib ki, bu il AzTU-nun 75 illik yubileyi qeyd olunacaq. Universitetin 75 illik tarixi inkişaf yoluna nəzər salan rektor bu illər ərzində AzTU-nun qazandığı mühüm uğurlara diqqət çəkib. Rektor AzTU-nun son illər beynəlxalq reytinqlərdə uğurla irəliləməsini və bu uğurlarda AzTU əməkdaşlarının, eləcə də tələbə, müəllim və məzunların rolunu xüsusi vurğulayıb. Tədbirdə çıxış edən Yasamal Rayon İcra Hakimiyyəti başçısının müavini Təravət Muradova, AzTU-nun fəxri məzunu, millət vəkili Zahid Oruc, Türkiyə-Azərbaycan Universitetinin (TAU) prorektoru Mehmet Şimşir, əmək və əhalinin sosial müdafiəsi nazirinin müşaviri Jalə Əhmədova, Bakı Gəmiqayırma Zavodunun Tədris Mərkəzinin Təlim və inkişaf bölməsinin rəhbəri Nəcəf Mustafayev AzTU məzunlarını təbrik ediblər. Çıxış edənlər məzunlara uğurlar arzulayaraq Azərbaycanın əmək bazarında layiqli yerləri tutmağı, xaricdə ölkəni layiqincə təmsil etməyi tövsiyə ediblər. Çıxışlardan sonra AzTU-nu yüksək ümumi orta müvəfəqiyyət göstəricisi ilə bitirən, həmçinin universitetin ictimai-sosial həyatında fəal iştirak edən məzunlara fəxri fərman və hədiyyələr təqdim olunub. “Məzun Günü-2025” tədbiri konsert proqramı ilə davam edib.

Konya Texniki Universitetinin rektoru Osman Nuri Çelik və baş katib Kamil Gök Azərbaycan Texniki Universitetinin (AzTU) qonağı olub. Qonaqlar AzTU-nun rektoru Vilayət Vəliyev və universitetin nümayəndələri ilə görüşüb. Rektor Vilayət Vəliyev universitetdə görülən işlər, həyata keçirilən layihələrlə bağlı qonaqlara məlumat verib. Konya Texniki Universitetinin rektoru Osman Nuri Çelik AzTU ilə əməkdaşlıq etməkdə maraqlı olduqlarını bildirib. Görüş zamanı univerisitetlər arasında birgə elmi-tədqiqat layihələrinin hazırlanması, doktorantura səviyyəsində ikili elmi rəhbərlik imkanları, həmçinin tələbə-müəllim mübadiləsi kimi məsələlər müzakirə olunub. Görüşdən sonra tərəflər arasında əməkdaşlıq haqqında anlaşma memorandumu imzalanıb. 

Azərbaycan Texniki Universitetinin (AzTU) rektoru Vilayət Vəliyevin rəhbərlik etdiyi nümayəndə heyəti Türkiyədə səfərdə olub. Səfərin məqsədi “Times Higher Education” tərəfindən təşkil olunan Dayanıqlı İnkişaf Konqresində iştirak etməklə yanaşı, elmi-tədqiqat, tədris və innovasiya sahələrində əlaqələrinin qurulması, mövcud tərəfdaşlıqların dərinləşdirilməsi və Türkiyənin aparıcı universitetləri ilə qarşılıqlı əməkdaşlıq imkanlarının müzakirəsi olub. AzTU nümayəndə heyətində elm və innovasiyalar üzrə prorektor Sübhan Namazov, Tədqiqat və inkişaf departamentinin direktoru Bəxtiyar Bədəlov və Keyfiyyətin təminatı şöbəsinin müdiri Pərvanə Mövsümova təmsil olunub. Səfər çərçivəsində nümayəndə heyəti Türkiyənin qabaqcıl ali təhsil müəssisələrindən olan Bahçeşehir Universiteti və Gəbzə Texniki Universitetində görüşlər keçirib. Tərəflər arasında əməkdaşlıq imkanları, xüsusilə mühəndislik, informasiya texnologiyaları, süni intellekt, rəqəmsal marketinq və innovasiya sahələrində birgə təşəbbüslər müzakirə edilib. Görüşlər zamanı AzTU rektoru Vilayət Vəliyev universitetin beynəlxalq tərəfdaşlıq strategiyasına uyğun olaraq birgə elmi layihələr, ortaq təhsil proqramları, tələbə və müəllim mübadiləsi, eləcə də beynəlxalq reytinqlərdə irəliləyişə yönəlmiş fəaliyyətlərə böyük önəm verildiyini qeyd edib. Tərəflər mühəndislik sahəsində müasir tədris texnologiyalarının tətbiqi, ortaq tədqiqatların həyata keçirilməsi, reytinq göstəricilərinin təkmilləşdirilməsi, eləcə də Mini MBA proqramlarının icrası, süni intellektin tədris və tədqiqatlarda istifadəsi, rəqəmsal texnologiyalar və innovasiya sahəsində ortaq layihələrin hazırlanması istiqamətində təcrübə və bilik mübadiləsinin vacibliyini xüsusi vurğulayıblar. Bu səfər nəticəsində AzTU-nun beynəlxalq elmi əməkdaşlıq şəbəkəsinin daha da genişləndirilməsi və qlobal elm-təhsil platformalarına inteqrasiyası istiqamətində mühüm addımlar atılıb. Görüşlər AzTU-nun strateji inkişaf hədəfləri çərçivəsində beynəlxalq reytinqlərə müsbət təsir edəcək tərəfdaşlıqlar üçün güclü təməl formalaşdırıb. AzTU rəhbərliyinin təşəbbüsü ilə gerçəkləşən səfər universitetin qlobal elm və təhsil məkanında nüfuzunun artırılmasına yönəlmiş uğurlu beynəlxalq fəaliyyətlərin davamı kimi qiymətləndirilir.

Azərbaycan Texniki Universiteti (AzTU), Daşkənd Dövlət Nəqliyyat Universiteti və İstanbul Texniki Universitetinin (İTÜ) birgə təşkilatçılığı ilə “21-ci əsrdə İpək Yolu: Müasir nəqliyyat və logistika texnologiyaları” adlı onlayn beynəlxalq konfrans keçirilib.   Konfrans İTÜ-nün prorektoru professor Lütfiyə Durak Ata və AzTU-nun prorektoru i.ü.f.d. Rəşad Əliyevin açılış çıxışları ilə başlayıb. Təşkilatçı ali məktəblərdən başqa İngiltərə və ABŞ universitetlərindən məruzəçilərin də iştirak etdiyi konfrans 3 bölmədə işini davam etdirib. AzTU əməkdaşları - dosent Fuad Daşdəmirov, professor Heybətulla Əhmədov, dosent Nicat Zöhrabov, dosent Qasım Manafov, dosent Atif Namazov və Logistika və Nəqliyyat İnstitutunun əməkdaşı Ülvi Cavadlı konfransın “Sərnişin və yük daşımalarının enerji və ekoloji problemləri”, “Yeni İpək Yolunun avtomobil, dəmiryolu, dəniz şəbəkəsi”, “İpək Yolunun gələcəyində yeni texnologiyalar və innovasiyalar” bölmələrində məruzə ilə çıxış ediblər.

Azərbaycan Texniki Universiteti (AzTU) ali təhsildə qlobal səviyyədə mühüm uğura imza atıb. Belə ki, universitet ilk dəfə “QS World University Rankings 2026” (QS 2026 Dünya Universitetlərinin Reytinqi) siyahısına daxil olaraq dünyanın ən yaxşı 1000 universiteti sırasında qərarlaşıb. AzTU reytinqdə 851–900 aralığında yer alıb. Bu nəticə, AzTU-nun son illərdə həyata keçirdiyi sistemli islahatların və tədris-elmi fəaliyyətin keyfiyyətinin yüksəldilməsinin göstəricisidir. Universitetin tətbiq etdiyi məqsədyönlü strategiya, elmi potensialın gücləndirilməsi, innovativ yanaşmaların təşviqi və sənaye ilə inteqrasiya olunmuş tədris modeli, AzTU-nun qlobal reytinqdə tanınmasına şərait yaradıb. Qeyd edək ki, QS World University Rankings dünyanın ən nüfuzlu və etibarlı ali təhsil reytinqlərindən biridir. Hər il bu reytinq çərçivəsində minlərlə universitet müxtəlif kriteriyalar əsasında qiymətləndirilir. Qiymətləndirmə meyarlarına akademik nüfuz, elmi tədqiqatların təsiri, işəgötürənlərin universitet məzunlarına verdiyi dəyər, tələbə-müəllim nisbəti, sitat sayı və beynəlxalq tələbə və müəllim heyətinin payı daxildir. AzTU-nun bu göstəricilər üzrə topladığı nəticələr, universitetin qlobal ali təhsil məkanında rəqabətqabiliyyətli bir elm və tədris müəssisəsinə çevrildiyini nümayiş etdirir. Builki reytinq nəticələrinə əsasən, Azərbaycan Cənubi Qafqaz regionunda lider mövqedədir. Belə ki, Azərbaycandan reytinqə düşən universitetlərin sayı, digər Cənubi Qafqaz ölkələrinin birlikdə əldə etdiyi nəticədən 3 dəfə çoxdur. AzTU-nun bu uğuru həm milli ali təhsil sisteminin inkişafına, həm də Azərbaycanın beynəlxalq elm və təhsil məkanındakı nüfuzunun daha da möhkəmlənməsinə töhfə verir.