Azərbaycan Texniki Universiteti (AzTU) əməkdaşların  sosial rifahını yüksəltmək məqsədilə “Sağlam Ailə” MMC ilə əməkdaşlığa başlayıb. Əməkdaşlıq çərçivəsində AzTU əməkdaşlarına və onların birinci dərəcəli ailə üzvlərinə “Sağlam Ailə” MMC-də 25 faizə qədər endirimlər və əlavə imtiyazlar təqdim olunur. Qeyd edək ki, AzTU hər zaman əməkdaşlarının rifahını düşünür və onların sağlam, rahat həyat şəraitinə töhfə verməyə çalışır.

“PAŞA Property Management” şirkətinin baş icraçı direktoru Tural Əliyev və şirkətin nümayəndələri Azərbaycan Texniki Universitetində (AzTU) olub. Qonaqlar AzTU-nun rektoru Vilayət Vəliyev və universitetin əməkdaşları ilə görüşüblər. Rektor Vilayət Vəliyev AzTU-da son illər həyata keçirilən layihələr, universitet- sənaye əməkdaşlığı çərçivəsində görülən işlər barədə məlumat verib. “PAŞA Property Management” şirkətinin baş icraçı direktoru Tural Əliyev öz növbəsində əməkdaşlıq üçün göstərilən təşəbbüsə görə təşəkkür edib. Şirkətin tələbələr üçün müxtəlif təcrübə proqramları həyata keçirdiyini bildirən Tural Əliyev, AzTU tələbələrinin bu proqramlarda fəallıq göstərərək seçildiyini və işlə təmin olunduğunu vurğulayıb. Görüş zamanı AzTU ilə “PAŞA Property Management” arasında əməkdaşlığın perspektivləri, birgə elmi-tədqiqat, universitetin şirkət üçün peşəkar kadr hazırlığı prosesinə verəcəyi töhfə, tələbələrin şirkətdə təcrübə və iş imkanları kimi məsələlər müzakirə olunub. Görüşün sonunda tərəflər arasında əməkdaşlıq haqqında memorandum imzalanıb.

Azərbaycan Texniki Universitetinin (AzTU) tələbələri Selcan Kərimli və Xalidə Hacızadə Türkiyənin Orta Doğu Texnik Universiteti (ODTÜ) və Türk Əməkdaşlıq və Koordinasiya Agentliyinin (TİKA) birgə təşəbbüsü ilə robot texnologiyaları mövzusunda həyata keçirilən yay təcrübə proqramında iştirak hüququ qazanıblar.  Seçim 7 ölkənin namizədləri arasında aparılıb və ümumilikdə 12 tələbə bu beynəlxalq layihə çərçivəsində yay təcrübə proqramında iştirak imkanı əldə edib. Proqram ümumilikdə 6 həftə davam edəcək və ilk həftəsi nəzəri təlimlərdən ibarət olacaq. Proqramın əsas məqsədi robot texnologiyalarını inkişaf etdirərək onları praktikada tətbiq edə bilən yeni nəsil tədqiqatçılar yetişdirmək, həm Türkiyə daxilində, həm də beynəlxalq səviyyədə robototexnika sahəsində tədqiqatları dəstəkləmək, robot və süni intellekt üzrə tədqiqatları daha yüksək səviyyəyə qaldırmaq, robot texnologiyalarının sənaye istehsal proseslərinə inteqrasiyasını təmin etmək və bu  texnologiyalardan istifadə edən məhsulları inkişaf etdirmək, eləcə də müdafiə sənayesinin ehtiyaclarına uyğun insansız və ağıllı sistemlər inkişaf etdirməkdir. Tələbələrin təcrübə müddətindəki bütün əsas xərcləri TİKA tərəfindən qarşılanacaq.

İtaliyanın “Proges Engineering” şirkətinin direktoru Andrea İmbrenda və direktor müavini Asif Namazov Azərbaycan Texniki Universitetini (AzTU) ziyarət edib. Qonaqlar AzTU-nun rektoru Vilayət Vəliyev və universitetin nümayəndələri ilə görüşüblər. Andrea İmbrenda bildirib ki, bu artıq onun AzTU-ya ikinci səfəridir. Qeyd edib ki, AzTU ilə İtaliyanın texniki sahə üzrə ixtisaslaşan nüfuzlu ali təhsil müəssisələri arasında əlaqələrin qurulmasında hər zaman dəstəyini göstərməyə hazırdır. Müzakirələr zamanı mühəndisliyin bütün istiqamətləri üzrə qarşılıqlı təcrübə mübadiləsinin həyata keçirilməsi, doktorant və gənc tədqiqatçıların birgə elmi-tədqiqat işləri aparması kimi məsələlər ətrafında fikir mübadiləsi aparılıb.

Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti (XRİTDX) tərəfindən 2024-2025-ci tədris ilinin yaz semestrində Azərbaycan Texniki Universitetində (AzTU) bakalavriat və magistratura səviyyələrində təhsil alan tələbələrin kibertəhlükəsizlik sahəsində biliklərinin qiymətləndirilməsi məqsədilə növbəti müsabiqə təşkil edilib. Müsabiqənin nəticələrinə əsasən Universitetin İnformasiya və telekommunikasiya texnologiyaları fakültəsinin informasiya təhlükəsizliyi ixtisasının 3-cü kurs bakalavr tələbələri Tural Səlimov və Orxan Eminbəyli, habelə Universitetin nəzdində Yüksək Təhsil İnstitutunun dövlət informasiya sistemlərinin təhlükəsizliyi ixtisaslaşmasının 2-ci kurs magistr tələbələri Rəna Sadıqova və Aytac Ağayeva xüsusi fərqlənərək qalib elan olunublar. Mükafatlandırılma mərasimində XRİTDX-nın rəis müavini general-mayor Allahverən İsmayılov, AzTU-nun rektoru professor Vilayət Vəliyev və digər nümayəndələr iştirak etmişlər. Tədbir zamanı çıxışlarda dövlət qurumları ilə tədris müəssisələri arasında qurulmuş əməkdaşlığın əhəmiyyəti vurğulanaraq, kibertəhlükəsizlik sahəsində gənc mütəxəssislərin hazırlanmasının strateji prioritetlərdən biri olduğu bildirilmişdir. Qeyd edilmişdir ki, XRİTDX ilə AzTU-nun arasında imzalanmış Memorandumun icrası çərçivəsində həyata keçirilən tədbirlər tələbələrin nəzəri biliklərinin praktiki bacarıqlara çevrilməsi və ölkədə kibertəhlükəsizlik sahəsinin insan resursları potensialının gücləndirilməsi istiqamətində mühüm əhəmiyyət kəsb edir. Memorandum çərçivəsində XRİTDX tərəfindən AzTU-nun informasiya təhlükəsizliyi üzrə bakalavriat pilləsində təhsil alan tələbələrə praktiki-təcrübə proqramı çərçivəsində tədbirlərdə iştirak etmələri üçün şərait yaradılmışdır. Daha sonra XRİTDX-nın nümayəndələri Universitetin müasir tədris infrastrukturu, maddi-texniki bazasının gücləndirilməsi istiqamətində Xidmətlə birgə yardılmış laboratoriyaları, eləcə də rabitə və telekommunikasiya üzrə mövcud müasir tipli tədris otaqları, innovativ təlim metodları üzrə tətbiq olunan qabaqcıl texnologiyalar və sahə üzrə toplanmış təcrübə ilə yaxından tanış olmuşlar.

Azərbaycan Təhsil İşçiləri Azad Həmkarlar İttifaqı Respublika Komitəsinin (ATİAHİRK) təşkilatçılığı ilə həyata keçirilən ağacəkmə aksiyasında Azərbaycan Texniki Universiteti (AzTU) Tələbə Həmkarlar İttifaqı Komitəsinin (THİK) fəal üzvləri də iştirak edib. Aksiya ölkəmizdə ekoloji tarazlığın qorunması, yaşıllıq sahələrinin genişləndirilməsi və gənclərdə ekoloji mədəniyyətin formalaşdırılması məqsədilə təşkil olunub. THİK fəalları müxtəlif növ ağac tingləri əkərək onların suvarılması və ilkin qulluq işlərini həyata keçirib, təbiətin mühafizəsinə töhfə vermək məqsədilə həmrəy olduqlarını nümayiş etdiriblər. Aksiyada iştirak edən tələbələr belə tədbirlərin gənclərin ekoloji məsuliyyətinin artırılmasında mühüm rol oynadığını vurğulayaraq, gələcəkdə də bu istiqamətdə fəaliyyətlərə həvəslə qoşulacaqlarını bildiriblər. Ətraf mühitin qorunması ilə bağlı layihələrin dəstəklənməsi və tələbələrin bu prosesdə fəal iştirakının təmin edilməsi AzTU THİK-in prioritet fəaliyyət istiqamətlərindən biridir. Bu kimi aksiyaların davamlı xarakter alması üçün gənclərin təşəbbüskarlığı və həmrəyliyi mühüm əhəmiyyət kəsb edir.

Azərbaycan Dövlət Mədəniyyət və İncəsənət Universitetinin (ADMİU) tələbələri Azərbaycan Texniki Universitetinin (AzTU) Kitabxana İnformasiya Mərkəzində (KİM) istehsalat təcrübələrini uğurla başa vurub. AzTU-nun rektoru Vilayət Vəliyev təcrübəçi tələbələrlə görüşüb, Kitabxana İnformasiya Mərkəzinin yenidənqurulmasında və açılış mərasimində fəal iştiraklarına görə onlara təşəkkürnamə təqdim edib. Rektora məlumat verilib ki, təcrübə müddətində tələbələr ixtisasları üzrə müasir biliklərə yiyələnib, akademik məlumat bazaları, bibliometriya, kataloqlaşdırma, beynəlxalq kitabişləmə qaydaları və s. üzrə praktiki bilik və bacarıqlar əldə ediblər. Tələbələr həmçinin KİM-də gedən yenidənqurma işlərində iştirak edib, biblioqrafik və bibliometrik bazalar haqqında məruzə dinləyib, “Web of Science” platforması, "IEEE", "DOAJ", "EBSCO" kimi  akademik bazalar haqqında beynəlxalq vebinarlara qatılıb sertifikatlar əldə ediblər. Bundan başqa, təcrübəçi tələbələr kitabxana texnologiyasının qurulmasında iştirak edib, yeni texnologiyanın proqram təminatı haqqında təlimatlandırılıb, avadanlığın iş prinsipinə yiyələniblər.

Azərbaycan Texniki Universitetində (AzTU) məzuniyyət növləri haqqında məlumatlandırma təlimi keçirilib. İnsan resurslarının idarə edilməsi departamentinin təşkil etdiyi təlim departamentin müdiri Aytən Şıxalıyeva tərəfindən aparılıb.   Məqsəd əməkdaşları əmək məzuniyyətinin verilməsi, hesablanması, istifadə qaydaları, eləcə də bunların əmək qanunveriliciyində əks olunması barədə məlumatlandırmaqdan ibarət olub. Aytən Şıxalıyeva bildirib ki, əmək məzuniyyəti işçinin iş ili müddəti, yəni əməkdaşın işə başladığı tarixdən növbəti 12 ay müddət üçün hesablanır, burada işçinin iş stajı, iş yükü və digər məqamlar da nəzərə alınır.   Daha sonra Aytən Şıxalıyeva akademik və inzibati heyət üçün nəzərdə tutulan məzuniyyət müddəti, əsas və əlavə əmək məzuniyyəti, minimum əmək məzuniyyətinin müddəti, onların işləmə prinsipləri və hesablanma qaydası barədə də iştirakçılara ətraflı məlumat verib. Sonda iştirakçıların sualları cavablandırılıb.

Azərbaycan Texniki Universitetində (AzTU) rektor Vilayət Vəliyevin iştirakı ilə “Açıq qapı” günü keçirilib. “Açıq qapı” günündə iştirak üçün müraciət edən abituriyentlər, tələbələr və valideynlərlə görüşən rektor onların suallarını dinləyib. Rektor problemlərin operativ və mövcud qanunvericiliyə uyğun həlli ilə bağlı aidiyyəti strukturların rəhbərlərinə müvafiq tapşırıqlarını verib.

Azərbaycan Respublikası Müdafiə Sənayesi Nazirliyinin (MSN) yaradılmasının 20 illik yubileyi ilə əlaqədar keçirilən tədbirlər çərçivəsində Azərbaycan Texniki Universitetinin (AzTU) tələbələri üçün MSN-in müəssisələrindən birinə növbəti infotur təşkil edilib. Əvvəlcə infotur iştirakçıları müəssisənin ərazisində ucaldılmış müasir Azərbaycan dövlətinin qurucusu və memarı Ümummilli Lider Heydər Əliyevin abidəsini ziyarət edib, Ulu Öndərin və Vətən uğrunda canından keçmiş şəhidlərimizin əziz xatirəsini bir dəqiqəlik sükutla anıblar. Tələbələrə Azərbaycanın müdafiə sənayesinin tarixi, inkişaf mərhələləri və müasir imkanları haqqında ətraflı məlumat verilib. Bildirilib ki, Ulu Öndər Heydər Əliyev tərəfindən əsası qoyulan Azərbaycanın müdafiə sənayesi bu gün cənab Prezident İlham Əliyevin rəhbərliyi ilə uğurla inkişaf edir və ölkəmizdə bu sahənin daha da gücləndirilməsi dövlət siyasətinin prioritet istiqamətlərindəndir. Vətən müharibəsində Azərbaycan silahının düşmənə öz gücünü və qüdrətini əməli döyüş şəraitində göstərdiyi diqqətə çatdırılıb, yerli istehsal olan hərbi məhsullarla Ordumuzun etibarlı silahlanmasının təmin edilməsinin döyüş əməliyyatlarının uğurla həyata keçirilməsinə şərait yaradığı barədə danışılıb. Sonra tələbələr müəssisənin istehsalat prosesi ilə tanış olublar və onları maraqlandıran suallar cavablandırılıb. İştirakçılar bu cür maarifləndirici turların təşkilinə görə MSN-in rəhbərliyinə minnətdarlıqlarını bildirib və belə tədbirlərin davamlı olmasını arzuladıqlarını ifadə ediblər.