Azərbaycan Texniki Universiteti (AzTU) “QS World University Rankings Europe 2026” reytinqində yer alaraq 476-cı yerə layiq görülüb. Eyni zamanda, AzTU Qərbi Asiya regionu üzrə yüksək nəticə göstərib. Belə ki, AzTU ilk 30 universitet sırasında (30-cu yer) qərarlaşıb. Bu göstərici universitetin regionda artan akademik nüfuzunun və beynəlxalq tanınmasının bariz nümunəsidir. QS reytinqində universitetlər akademik reputasiya, işəgötürənlər arasında tanınma, elmi-tədqiqat fəaliyyəti, beynəlxalq əməkdaşlıq və digər əsas göstəricilər üzrə qiymətləndirilir. AzTU-nun əldə etdiyi bu nəticələr son illər təhsil və elm sahəsində aparılan ardıcıl islahatların uğurlu nəticəsidir. Qeyd edək ki, “QS World University Rankings” dünyanın ən nüfuzlu və etibarlı ali təhsil reytinqlərindən biri hesab olunur.

Əlcəzair Xalq Demokratik Respublikasının Tissemsilt Universitetinin Elm və texnologiya fakültəsinin tədqiqatçısı xanım Vafaa Kasri tərcübə mübadiləsi çərçivəsində Azərbaycan Texniki Universitetinin (AzTU) qonağı olub. O, AzTU-nun Radiotexnika və telekommunikasiya və Mühəndis riyaziyyatı və süni intellekt kafedralarının, həmçinin Biotibbi Mühəndislik İnstitutunun fəaliyyəti ilə tanış olub. Görüşlər zamanı qonaq sözügedən kafedraların və institutun tədqiqat istiqamətləri ilə bağlı əməkdaşlıq imkanlarını müzakirə edib.

Azərbaycan Texniki Universitetində (AzTU) ali təhsilin keyfiyyətinin beynəlxalq standartlara uyğunluğunun təmin edilməsi istiqamətində mühüm nailiyyət əldə olunub. Almaniyanın nüfuzlu keyfiyyət təminatı agentliyi olan AQAS (Agency for Quality Assurance through Accreditation of Study Programmes – Ali Təhsilin Keyfiyyətinin Xarici Qiymətləndirilməsi və Akkreditasiyası Agentliyi) tərəfindən universitetdə həyata keçirilən 10 bakalavr və 10 magistr olmaqla ümumilikdə 20 təhsil proqramının beynəlxalq akkreditasiya prosesi başa çatıb. Beynəlxalq proqram akkreditasiya prosesi ərzində AQAS-ın beynəlxalq ekspertlərdən ibarət nümayəndə heyəti AzTU-ya 4 sahə səfəri həyata keçirib. Akkreditasiya prosesində iştirak edən 20 təhsil proqramı məzmun və istiqamətlərinə uyğun olaraq 4 klaster üzrə qruplaşdırılıb. - Elektrik mühəndisliyi – 29-31 oktyabr 2025-ci il - Kompüter mühəndisliyi və informasiya texnologiyaları - 8-10 dekabr 2025-ci il - Maşın mühəndisliyi – 14-16 yanvar 2026-cı il - Nəqliyyat və logistika – 21-22 yanvar 2026-cı il Akkreditasiyası zamanı tədris proqramlarının məzmunu, əmək bazarının tələblərinə uyğunluğu, sənaye ilə əməkdaşlıq səviyyəsi, tələbələrin praktik bacarıqlarının formalaşdırılması, təlim-tədris prosesi, akademik heyətin peşəkarlıq səviyyəsi, maddi-texniki baza, tələbəyönümlü yanaşmalar, qiymətləndirmə mexanizmləri, daxili keyfiyyət təminatı sisteminin fəaliyyəti hərtərəfli şəkildə təhlil olunub. Qiymətləndirmə zamanı AQAS ekspertləri AzTU-da həyata keçirilən islahatları, təhsil proqramlarının strukturlaşdırılmasını və davamlı inkişaf yönümlü yanaşmanı müsbət qiymətləndirib, təkmilləşmə ilə bağlı tövsiyələr veriblər. Qeyd edək ki, AQAS tərəfindən akkreditasiya olunmuş proqramlar Avropa Ali Təhsil Məkanında tanınır. Bu, AzTU məzunlarının diplomlarının beynəlxalq səviyyədə tanınmasına, tələbə və müəllim mübadiləsinin genişlənməsinə, universitetin beynəlxalq reytinqlərdə mövqeyinin möhkəmləndirilməsinə əhəmiyyətli töhfələr verəcək. Əldə olunan nəticə AzTU-nun keyfiyyətin davamlı təminatı siyasətinin və beynəlxalq standartlara inteqrasiya istiqamətində atılan məqsədyönlü addımların bariz göstəricisidir. AzTU gələcək dövrdə də strateji inkişaf xəttinə təhsil proqramlarının beynəlxalq akkreditasiyasının genişləndirilməsi və ali təhsilin keyfiyyətinin daha da yüksəldilməsi istiqamətində fəaliyyətini davam etdirəcək.

Azərbaycan Texniki Universitetinin (AzTU) İnkubasiya Mərkəzində AzTU, Türkiyə-Azərbaycan Universiteti (TAU) və Milli Aviasiya Akademiyasının (MAA) tələbələrinin iştirakı ilə keçirilən Startap Günləri uğurla başa çatıb. “Startap Azərbaycan” platformasının tərəfdaşlığı ilə təşkil olunan tədbir iki gün ərzində innovativ ideyalara maraq göstərən gəncləri, mentorları və ekspertləri bir araya gətirib. “Startap Azərbaycan” platformasının rəhbəri Osman Gündüz açılış nitqi ilə iştirakçıları salamlayıb. O, ölkədə startap ekosisteminin inkişafı, gənclərin innovativ təşəbbüslərə cəlb olunması və bu kimi tədbirlərin əhəmiyyəti barədə fikirlərini bölüşüb. Daha sonra AzTU İnkubasiya Mərkəzinin koordinatoru Azad Musayev Startap Günlərinin proqramı bardə məlumat verib. Tədbirin ilk günü tələbələr tərəfindən ümumilikdə 44 startap ideyası təqdim olunub. Qısa təqdimatlardan sonra səsvermə nəticəsində 8 ən perspektivli ideya seçilərək növbəti mərhələyə vəsiqə qazanıb. Seçilmiş ideyalar üzrə komandalar formalaşdırılıb və layihələrin ilkin prototiplərinin və biznes modellərinin hazırlanmasına start verilib. Tədbirin ikinci günü ideyaların formalaşdırılması, düzgün istiqamətin seçilməsi, komanda işi və təqdimat bacarıqlarının inkişafı qiymətləndirilib. Günün sonunda komandalar hazırladıqları layihələri münsiflər heyəti qarşısında 4–5 dəqiqəlik təqdimatlar şəklində nümayiş etdirib. Layihələr münsiflər heyəti (Fərid Kazımov, Samir Həbibli, Rahid Ələkbərli, Rasim Abdullayev, Rəşad Əliyev) tərəfindən innovativlik, texniki əsaslandırma, reallaşdırma potensialı və biznes dəyəri meyarları üzrə qiymətləndirilib. Nəticələrə əsasən, AzTU və MAA tələbələrindən ibarət “Timeless History” komandası 1-ci olub. AzTU tələbələrindən ibarət “Youth.az” və “Skill Match” komandaları 2-ci yerə layiq görülüb. AzTU və TAU tələbələrindən ibarət “Nexo” komandası isə 3-cü yerin sahibi olub.

Türkiyənin Çankaya Universitetinin professoru Buket Akkoyunlu Azərbaycan Texniki Universitetində (AzTU) "Müasir təhsil standartlarında süni intellektin tətbiqləri" mövzusunda seminar keçirib. AzTU-nun professor-müəllim heyətinin iştirak etdiyi seminarda professor Buket Akkoyunlu süni intellekt texnologiyalarının təhsil sahəsində düzgün və səmərəli tətbiqi məsələlərindən danışıb, həmçinin süni intellektin tədris prosesində istifadəsi, tələbələr və akademik heyət üçün yaratdığı imkanlar barədə ətraflı məlumat verib. Bundan başqa, süni intellekt alətlərinin elmi məqalələrdə düzgün istifadəsi, həmçinin dünyanın aparıcı universitetlərinin bu istiqamətdə təcrübəsi də slaydlar vasitəsilə ətraflı təqdim olunub. Seminar sual-cavab sessiyası ilə yekunlaşıb.

Azərbaycan Texniki Universitetinin (AzTU) Xüsusi texnika və texnologiya fakültəsinin nümayəndələri və 4-cü kurs tələbələri "İqlim Elmi-İstehsalat Müəssisəsi" MMC-nin tabeliyində fəaliyyət göstərən "Alov" zavoduna səfər ediblər. Görüşdən əvvəl tələbələrə zavodun əsas fəaliyyət istiqamətləri, mövcud istehsal imkanları, eləcə də müdafiə sənayesi sahəsində tətbiq olunan texnoloji prosesləri barədə ətraflı məlumat verilib. "Alov" zavodunun direktoru Kənan Məmmədli ilə görüşdə direktor AzTU ilə müəssisə arasında mövcud əməkdaşlığın əhəmiyyətini qeyd edib, bu əlaqələrin davam etdirilməsinin həm sənaye, həm də ali təhsil üçün əhəmiyyətindən danışıb. Xüsusi texnika və texnologiya fakültəsinin dekanı Yadullah Babayev zavod rəhbərliyinə və kollektivinə səmimi qəbul və yaradılan şəraitə görə təşəkkür edib. Dekan universitet–sənaye əməkdaşlığı çərçivəsində gələcəkdə tələbələrin istehsalat təcrübələrinin və praktiki məşğələlərinin genişləndirilməsinin nəzərdə tutulduğunu qeyd edib. O, həmçinin bu cür əməkdaşlıqların ölkənin müdafiə sənayesi üçün rəqabətqabiliyyətli və ixtisaslı kadrların hazırlanmasında mühüm rol oynadığını xüsusi vurğulayıb.Görüşün sonunda fakültə ilə faydalı əməkdaşlığa görə "Alov" zavodunun direktoruna universitet rəhbərliyi adından təşəkkür plaketi təqdim olunub.

“Times Higher Education” (THE) tərəfindən 2026-cı il üçün sahələr üzrə fənn reytinqi açıqlanıb. Sözügedən reytinqdə Azərbaycan Texniki Universiteti (AzTU) ilk dəfə iştirak edərək 1251+ pillədə yer alıb. AzTU reytinq çərçivəsində “Mühəndislik” və “Fizika elmləri” sahələri üzrə qiymətləndirilib. Bu nəticə universitetdə müvafiq sahələr üzrə tədris və elmi-tədqiqat fəaliyyətinin inkişaf etdirilməsi, akademik potensialın gücləndirilməsi və beynəlxalq akademik mühitə inteqrasiya istiqamətində aparılan tədbirlərin göstəricisi kimi dəyərləndirilir. Qeyd edək ki, THE-nin sahələr üzrə fənn reytinqinin metodologiyası 5 əsas istiqamət və 18 meyar əsasında formalaşdırılır. Qiymətləndirmə prosesinə tədris, tədqiqat mühiti, tədqiqat keyfiyyəti, sənaye ilə əməkdaşlıq və beynəlmiləlləşmə göstəriciləri daxildir. Bu yanaşma universitetlərin akademik və elmi fəaliyyətinin kompleks şəkildə qiymətləndirilməsinə imkan yaradır. AzTU-nun THE-nin fənn reytinqində təmsil olunması universitetin institusional inkişaf strategiyasının icrası, elmi-tədqiqat fəaliyyətinin nəticəliliyi və beynəlxalq əməkdaşlıq imkanlarının genişləndirilməsi baxımından əhəmiyyətli hesab olunur.

Qanlı 20 Yanvar faciəsinin 36-cı ildönümü ilə əlaqədar Azərbaycan Texniki Universitetinin (AzTU) rəhbərliyi və kollektivi Şəhidlər xiyabanını ziyarət edib. Torpaqlarımızın azadlığı və suverenliyi uğrunda canlarından keçən Vətən övladlarının əziz xatirəsi ehtiramla yad edilib, məzarları üzərinə qərənfillər düzülüb.  

Azərbaycan Texniki Universitetində (AzTU) 20 Yanvar faciəsinə həsr olunan anım tədbiri keçirilib. Əvvəlcə torpaqlarımızın azadlığı və suverenliyi uğrunda canlarından keçmiş Vətən övladlarının əziz xatirəsi bir dəqiqəlik sükutla yad olunub. Azərbaycanın Dövlət Himni səsləndirilib. AzTU-nun Humanitar fənlər kafedrasının müdiri Həbib Mirzəyev bildirib ki, 20 Yanvar hadisələri Azərbaycan xalqının tarixinə həm faciəli, həm də qəhrəmanlıq səhifəsi kimi yazılıb. 36 il əvvəl – yanvarın 19-dan 20-nə keçən gecə Azərbaycanın mərd övladları Vətənin azadlığı uğrunda canlarından keçərək şəhidlik zirvəsinə ucaldılar. Həbib Mirzəyev deyib ki, sovet imperiyasının Azərbaycanda törətdiyi  faciədən uzun illər keçsə də xalqımız o dəhşətli cinayəti unutmur. Daha sonra çıxış edən tarix elmlər namizədi dosent Akif Nağı həmin qanlı gecədə həyatlarını qurban verən Vətən övladlarının misilsiz fədakarlıqlarından və xalqın şərəf və ləyaqətini hər şeydən üstün tutaraq yenilməz iradə nümayiş etdirmələrindən danışıb. Qeyd olunub ki, şəhidlərimizin əziz xatirəsi xalqımızın qəlbində əbədi yaşayacaq. 

Qazaxıstanın Satbayev Universitetinin 4-cü kurs bakalavr tələbəsi Rinat Çapay ikili əməkdaşlıq çərçivəsində iki universitet arasında həyata keçirilən tələbə mübadiləsi ilə 2025/2026 tədris ilinin payız semestrində Azərbaycan Texniki Universitetinin (AzTU) Maşınqayırma və metallurgiya fakültəsində təhsil alıb. AzTU-nun beynəlxalq əlaqələr üzrə prorektoru Fariz Məmmədov tələbə ilə görüşüb, ona gələcək həyatında uğurlar arzulayıb. Semestr imtahanlarını uğurla başa vuran və təhsilini tamamlayan tələbəyə sertifikat təqdim olunub.