Azərbaycan Texniki Universitinin (AzTU) rektoru Vilayət Vəliyev və universitetin nümayəndələri 31 Mart - Azərbaycanlıların Soyqırımı Günü ilə əlaqədar Şamaxıda "Türk şəhidliyi" abidəsini ziyarət edib. 1918-ci ildə Osmanlı qoşunlarının Bakının azad olunması üçün həyata keçirdikləri hərbi əməliyyatlarda şəhidlik zirvəsinə ucalan 1130 qəhrəman türk əsgərinin əziz xatirəsi yad olunub. Allah bütün şəhidlərimizə rəhmət eləsin!

Azərbaycan Texniki Universitetinin (AzTU) Kitabxana İnformasiya Mərkəzinin (KIM) direktoru Xəyalə Hacıyeva akademik açıq əlyetərli jurnalların dünyada nüfuzlu bazası sayılan DOAJ-ın  (Directory of Open Access Journals) Azərbaycan üzrə redaktoru təyin olunub. DOAJ dünya üzrə bütün açıq əlyetərli jurnalları özündə indeksləyən başlıca beynəlxalq akademik bazadır. Burada indekslənən jurnalların beynəlxalq tələblərə uyğun nəşri tələb olunur. AzTU əməkdaşının redaktorluq fəaliyyəti çərçivəsində Azərbaycandan müraciət olunan jurnalların dəyərləndirilməsi, onların beynəlxalq tələblərə uyğunlaşdırması məqsədilə redaktorlar üçün təlim və vebinarların təşkili nəzərdə tutulur. Məqsəd Azərbaycanda akademik jurnalların inkişafının və akademik yazı mədəniyyətinin daha yüksək səviyyəyə çatdırılmasından ibarətdir.

Azərbaycan Texniki Universiteti (AzTU) ilə “Dithari Technologies” şirkəti arasında DISC İnnovasiya və Dayanıqlılıq Laboratoriyasının qurulması ilə bağlı anlaşma memorandumu imzalanıb. İmzalanma mərasimi AzTU-nun Dayanıqlı İnkişaf Məqsədləri (SDG) guşəsində keçirilib. Bu əməkdaşlıq dairəvi İT təcrübələrinin inkişafı və texnologiyada dayanıqlığın təşviqi istiqamətində mühüm addım kimi qiymətləndirilib. Yeni laboratoriyanın yaradılması Birləşmiş Millətlər Təşkilatının (BMT) Dayanıqlı İnkişaf Məqsədlərinə, xüsusilə SDG 12-yə — məsuliyyətli istehlak və istehsal prinsipinə uyğun olaraq innovasiya və ekoloji məsuliyyətin gücləndirilməsinə töhfə verməyi hədəfləyir. “Dithari Technologies” dairəvi İT sahəsində aparıcı şirkət kimi bu təşəbbüs vasitəsilə elektron tullantıların azaldılması və dayanıqlı İT həllərinin inkişafını dəstəkləyir. AzTU-nun rektoru Vilayət Vəliyev bu əməkdaşlığın əhəmiyyətini vurğulayaraq bildirib: “Bu təşəbbüs dayanıqlılığın texnoloji innovasiya ilə inteqrasiyasına doğru atılmış mühüm addımdır. DISC İnnovasiya və Dayanıqlılıq Laboratoriyası tələbələrə dayanıqlı İT sahəsində praktik bacarıqlar qazandıracaq və ekoloji cəhətdən məsuliyyətli innovatorlar nəsli yetişdirəcək.” “Dithari Technologies” şirkətinin nümayəndəsi: “Bizim əsas məqsədimiz dairəvi İT həllərini təşviq etməklə elektron tullantıların azalmasına nail olmaq və uzunmüddətli təsir yaratmaqdır. AzTU ilə əməkdaşlıq edərək bilik və təcrübəmizi universitetin akademik potensialı ilə birləşdirərək innovasiya və dayanıqlılığı daha da inkişaf etdirəcəyik.” Qeyd edək ki, DISC İnnovasiya və Dayanıqlılıq Laboratoriyasının əsas məqsədi dairəvi İT təcrübələrinin təşviqi, elektron tullantıların idarə edilməsi və tələbələrə innovasiya bacarıqlarının aşılanmasıdır. Laboratoriya həmçinin İT avadanlıqlarının təkrar emalı və bərpası üçün dayanıqlı çərçivə yaratmağı hədəfləyir. Əməkdaşlıq çərçivəsində “Dithari Technologies” şirkəti texniki bilik və resurslar təqdim edəcək, təlim və sertifikat proqramları həyata keçirəcək, eləcə də universiteti ekoloji cəhətdən təmiz İT məhsulları ilə təmin edəcək. Bundan əlavə, hakatonlar və texnologiya yönümlü tədbirlər təşkil ediləcək. AzTU laboratoriya üçün müasir infrastruktur və məkan ayıracaq, tələbələrin layihələrdə aktiv iştirakını təşviq edəcək və inzibati dəstək göstərəcək. DISC İnnovasiya və Dayanıqlılıq Laboratoriyasının yaradılması texnologiya, dayanıqlılıq və innovasiyanı birləşdirərək tələbələri qlobal iqtisadiyyatın dəyişən tələblərinə hazırlayan müasir təhsil yanaşmasını əks etdirir.

Azərbaycan Texniki Universitetində (AzTU) Həmkarlar İttifaqı Komitəsi (HİK), Tələbə Həmkarlar İttifaqı Komitəsi (THİK) və Tələbə Gənclər Təşkilatının birgə təşkilatçılığı ilə “Novruz nəğməsi” adlı tədbir keçirilib. Əvvəlcə fakültələrin və tələbə təşkilatlarının Novruz bayramı münasibətilə stendləri nümayiş olunub. Novruz bayramı münasibətilə təbriklərini çatdıran AzTU-nun rektoru Vilayət Vəliyev bu əziz el bayramının tarixindən, onun milli birlik və həmrəylik rəmzi olmasından bəhs edib. Bu cür milli bayramların və şənliklərin təşkilinin gənc nəslin həm də milli adət-ənənlərə bağlılığını aşıladığını vurğulayıb. Rektor son illər AzTU-nun uğurları, müasir mühəndis kadrların hazırlanması istiqamətində universitetdə həyata keçirilən layihələrdən də danışıb. Daha sonra universitetin ictimai həyatında fəallıq nümayiş etdirmiş tələbələrə təşəkkürnamə təqdim olunub. Rəsmi hissədən sonra tədbir konsert proqramı ilə davam edib.

Azərbaycan Texniki Universitetində (AzTU) Türkiyənin laboratoriya avadanlıqlarının istehsalı ilə məşğul olan “Argemsan” şirkətinin nümayəndələri ilə görüş keçirilib. Görüşdə tərəflər arasında texniki əməkdaşlıq imkanları, müxtəlif ixtisaslar üzrə laboratoriyaların təchizatı, həmçinin birgə layihələrin həyata keçirilməsi müzakirə olunub. Sonda tərəflər gələcək əməkdaşlıq istiqamətlərinin müəyyənləşdirilməsi üçün işçi görüşlərin davam etdirilməsi barədə razılığa gəlib.

Azərbaycan Texniki Universitetində (AzTU) Çanaqqala Zəfərinin 110-cu ildönümünə həsr olunan tədbir keçirilib. AzTU-nun türkiyəli tələbələrinin təşkilatçılığı ilə keçirilən tədbirdə universitetin professor-müəllim heyəti və tələbələr iştirak ediblər.  Humanitar fənlər kafedrasının müdiri Həbib Mirzəyev, kafedranın dosentləri Afaq Zeynalova və Arzu Xəlilzadə Çanaqqala döyüşünün tarixi əhəmiyyətindən və bu zəfərin yaratdığı milli ruhdan bəhs ediblər. Tədbirdə qəhrəmanlıq mövzusunda şeirlər səsləndirilib, vətənpərvərlik ruhunu əks etdirən musiqi nömrələri təqdim olunub.

Elm və Təhsil Nazirliyi, Azərbaycan Respublikasının Təhsil İnstitutunun (ARTİ) təşkilatçılğı və Azərbaycan Texniki Universitetinin (AzTU) Təhsildə İnformasiya Texnologiyaları və Metodik Dəstək İnstitutunun dəstəyi ilə “Proqramlaşdırma yaz düşərgəsi”nə seçim turu keçirilib. Məqsəd beynəlxalq yarışlarda (IOI EJOI, EGOI) ölkəmizi təmsil edəcək məktəblilərdən ibarət komandaları müəyyən etmək və onların hazırlığını təşkil etməkdir. Seçim turunda 50-yə yaxın 8, 9, 10 və 11-ci sinif şagirdləri iştirak edib. İştirakçılara 4 saat ərzində 3 alqoritmik məsələni C++ proqramlaşdırma dilində həll etmək tapşırığı verilib. Qiymətləndirmə avtomatik qiymətləndirmə sistemi ilə aparılıb.

Azərbaycan Prezidenti İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə “Dünya düzəninin yenidən düşünülməsi: Çağırışların fürsətə çevrilməsi” mövzusunda keçirilən XII Qlobal Bakı Forumunda iştirak etmək üçün ölkəmizdə səfərdə olan Latviyanın keçmiş Prezidenti Andris Berzins Azərbaycan Texniki Universitetinin (AzTU) qonağı olub. Qonaq AzTU-nun rektoru Vilayət Vəliyev və universitetin nümayəndələri ilə görüşüb. Rektor Vilayət Vəliyev AzTU-da görülən işlər və həyata keçirilən layihələr barədə məlumat verib. Bildirib ki, AzTU Latviya universitetləri ilə əməkdaşlığın genişləndirilməsində maraqlıdır. Latviyanın keçmiş Prezidenti Andris Berzins də öz növbəsində qeyd edib ki, o Latviyanın qabaqcıl texniki universitetləri ilə AzTU arasında əməkdaşlığın inkişaf etdirilməsində dəstəyini göstərəcək. Görüş çərçivəsində qonaq AzTU-nun fəaliyyətini əks etdirən video təqdimata baxıb.

Azərbaycan Texniki Universitetinin (AzTU) rektoru Vilayət Vəliyevin rəhbərlik etdiyi nümayəndə heyəti “Azertexnolayn” MMC-yə səfər edib. Nümayəndə heyətində Türkiyə-Azərbaycan Universitetinin (TAU) prorektoru Mehmet Şimşir də iştirak edib. Qonaqları salamlayan şirkətin direktoru Vüqar İzzətli müəssisənin fəaliyyəti və istehsalat imkanları haqqında ətraflı məlumat verib. AzTU-nun rektoru Vilayət Vəliyev də öz növbəsində universitetdə həyata keçirilən islahatlar və yeniliklər haqqında danışıb. O, universitet-sənaye işbirliyinin əhəmiyyətini vurğulayaraq, birgə kadr hazırlığının və təcrübə mübadiləsinin əhəmiyyətini qeyd edib. Görüşün sonunda AzTU ilə “Azertexnolayn” MMC arasında anlaşma memorandumu imzalanıb. Memorandumda müxtəlif ixtisaslar üzrə təhsil alan tələbələrin şirkətdə istehsalat təcrübələrinin təşkili, həmçinin mütəxəssislərin peşəkar inkişafı üçün birgə təlim və seminarların keçirilməsi nəzərdə tutulur. Bununla yanaşı, metallurgiya, materiallar mühəndisliyi, maşınqayırma, energetika, avtomatlaşdırma, nanotexnologiya və digər müasir mühəndislik sahələrində birgə elmi-tədqiqatların aparılması və bu tədqiqatlar vasitəsilə istehsalat proseslərinin təkmilləşdirilməsi əsas hədəflər sırasındadır. Eyni zamanda, müəssisənin ehtiyaclarına uyğun ixtisaslı kadrların hazırlanması üçün innovativ tədris proqramlarının hazırlanması və tətbiqi, sənaye sahəsində yeni texnoloji həllərin işlənməsi, istehsalat problemlərinə elmi yanaşmalarla həll yollarının axtarılması və universitet-sənaye əməkdaşlarının qarşılıqlı səfərlərinin təşkili də əməkdaşlığın əsas istiqamətlərindəndir.

Azərbaycan Texniki Universitetinin (AzTU) nəzdində fəaliyyət göstərən Biotibbi Mühəndislik İnstitutunda elmi-tədqiqat təcrübəsinə cəlb olunmuş magistrantlarla onlayn elmi seminar keçirilib. Seminarda Biotibbi Mühəndislik İnstitutunun direktoru, tədqiqatçı professor, tibb elmləri doktoru Nuran Abdullayevin rəhbərliyi ilə "Biotibbi və radioelektron aparatların servis xidməti" və "Tibbi və texniki diaqnostik üsul və cihazlar" ixtisaslaşmaları üzrə təhsil alan magistrantlarla aktual elmi mövzular ətrafında geniş müzakirələr aparılıb. Magistrantların cari elmi-tədqiqat işləri, dissertasiya mövzuları, tətbiq etdikləri metodlar ətrafında diskussiyalar təşkil edilib və gələcək fəaliyyət istiqamətləri müəyyənləşdirilib. Görüşdə institutun böyük elmi işçisi Cavid Abbaslı və təcrübə rəhbərləri, texnika üzrə fəlsəfə doktorları Günay Xasməmmədova, Xanım Səmədova və Aybəniz Abdullayeva iştirak edərək magistrantların təqdim etdiyi elmi nəticələrlə bağlı təklif və tövsiyələrini bölüşüblər.