Aprelin 6-da Qazaxıstanın Almatı şəhərində yerləşən Əl-Farabi adına Qazax Milli Universitetinin Farabi Hub İnnovasiya Mərkəzində Azərbaycan ali təhsil müəssisələrinin “Study in Azerbaijan” beynəlxalq sərgisinin açılış mərasimi olub.  Sərgi iki ölkə arasında təhsil və elm sahələrində strateji tərəfdaşlığın gücləndirilməsi, tələbələr, eləcə də gənc mütəxəssislərin Azərbaycanda təhsil almaq imkanları barədə məlumatlandırılması məqsədi daşıyır.   Sərginin açılış mərasimində Azərbaycan Respublikasının elm və təhsil naziri Emin Əmrullayev, Qazaxıstan Respublikasının elm və ali təhsil naziri Sayasat Nurbek, hər iki ölkənin aparıcı universitetlərinin rektorları və təhsil mütəxəssisləri iştirak ediblər. Sərgidə Azərbaycan Texniki Universitetini (AzTU) rektor Vilayət Vəliyevin başçılıq etdiyi nümayəndə heyəti təmsil edir. Həmçinin sərgidə AzTU-nun stendi də nümayiş olunur. Sərgi çərçivəsində abituriyent və tələbələr Azərbaycandakı ali təhsil proqramları, akademik imkanlar və elmi nailiyyətlər haqqında məlumat əldə edə bilərlər. Sərgidə həmçinin qrantlar, akademik mobillik, ikili diplom proqramları və qəbul tələbləri ilə bağlı ətraflı məlumatlar verilir.  Sərginin açılışında çıxış edən Qazaxıstanın elm və ali təhsil naziri Sayasat Nurbek bu təşəbbüsün ikitərəfli əməkdaşlığın məntiqi davamı olduğunu vurğulayıb. Qeyd edib ki, ötən il Azərbaycanda təşkil olunmuş "Study in Kazakhstan" sərgisində 2500-dən çox azərbaycanlı gənc iştirak edib. Həmin sərgi zamanı 80-ə yaxın mühüm razılaşma əldə olunub. Bugünkü tədbir də belə səmərəli əməkdaşlığın nəticəsidir.   Elm və təhsil naziri Emin Əmrullayev öz növbəsində təhsildə inteqrasiyanın vacibliyini bildirib. Nazir vurğulayıb ki, Qazaxıstan və Azərbaycan ortaq tarixi və mədəni köklərə malik ölkələrdir. Təhsil sahəsində əməkdaşlıq bu mənəvi yaxınlığı daha da gücləndirir. Nazir qeyd edib ki, bu cür platformalar gənclərə gələcək peşəsini düzgün seçməyə və beynəlxalq rəqabətədavamlı olmağa kömək edir.   Qeyd edək ki, sərgi 7-8 aprel tarixlərində Farabi Hub KazNU Mərkəzində davam edəcək.

Aprelin 6-da Almatı şəhərində Qazaxıstan və Azərbaycan ali təhsil müəssisələrinin II Rektorlar Forumu keçirilib.   Forumun rəsmi açılış hissəsindən əvvəl Azərbaycan Respublikasının elm və təhsil naziri Emin Əmrullayev və Qazaxıstan Respublikasının elm və ali təhsil naziri Sayasat Nurbek arasında universitet rəhbərlərinin və aidiyyəti qurumların nümayəndələrinin iştirakı ilə görüş keçirilib. Tərəflər ali təhsil sahəsində dövlətlərarası əməkdaşlığın inkişafı, o cümlədən akademik mobillik, birgə təhsil proqramları, tərəfdaşlıq əlaqələrinin genişləndirilməsi ilə bağlı cari məsələləri müzakirə ediblər.  Forumun açılış mərasimində salamlama nitqi ilə çıxış edən Qazaxıstan Respublikasının elm və ali təhsil naziri Sayasat Nurbek ölkələrimiz arasında akademik əlaqələrin gücləndirilməsinin strateji əhəmiyyətini vurğulayıb. Qeyd edib ki, həyata keçirilən təşəbbüslər qarşılıqlı akademik fəaliyyətə yeni təkan verib və ölkələrimizin təhsil imkanlarına ikitərəfli marağı gücləndirib. Əlavə edib ki, hazırda Qazaxıstanın 62 universiteti Azərbaycanın 81 universiteti ilə əməkdaşlıq edir. Forum çərçivəsində Azərbaycanın 18 universiteti ilə Qazaxıstanın 29 universiteti arasında 63 yeni memorandumun imzalanması planlaşdırılır.   Nazir Sayasat Nurbek akademik mobillik və tələbə mübadiləsinin artdığını da qeyd edib və  bildirib ki, 2025-ci ilin yekununa əsasən, Qazaxıstanın 58 universitetində 333 Azərbaycan vətəndaşı təhsil alır. Eyni zamanda Azərbaycan universitetlərində 164 Qazaxıstan vətəndaşı oxuyur.   Forumda çıxış edən elm və təhsil naziri Emin Əmrullayev qeyd edib ki, Qazaxıstan və Azərbaycan ali təhsil müəssisələrinin II Rektorlar Forumu ölkələrimiz arasında akademik əməkdaşlığın inkişafı baxımından mühüm platformadır. Nazirin sözlərinə görə, son illərdə universitetlər arasında əlaqələrin genişlənməsi, birgə proqramların və akademik mobilliyin artması bu əməkdaşlığın real nəticələrini göstərir.  Nazir çıxışında forum çərçivəsində imzalanacaq yeni anlaşmaların tərəfdaşlığı daha da gücləndirəcəyinə, tələbə və müəllimlər üçün yeni imkanlar yaradacağına inamını ifadə edib.   Forumda iştirak edən Azərbaycan Texniki Universitetinin (AzTU) rektoru Vilayət Vəliyev “Azərbaycan-Mərkəzi Asiya bilik dəhlizi: universitet-sənaye-dövlət əməkdaşlıq konteksti” mövzusunda təqdimatla çıxış edib.  Forumun rəsmi açılış mərasimindən sonra akademik mübadilə, elmi əməkdaşlıq və birgə təhsil proqramlarının inkişaf etdirilməsi məqsədi daşıyan anlaşma memorandumlarının imzalanması mərasimi keçirilib.

Azərbaycan Texniki Universitetinin (AzTU) rektoru Vilayət Vəliyev Özbəkistanın Daşkənd şəhərində Mərkəzi Asiya Universitetində keçirilmiş “CAU Tech Hackathon 2026” adlı beynəlxalq yarışda uğurlu nəticə göstərən AzTU tələbələri və onların mentorları ilə görüşüb. Rektor 120 komandanın mübarizə apardığı yarışda Azərbaycanı və AzTU-nu layiqincə təmsil etdikləri üçün tələbələrə təşəkkür edib, onlara gələcək yarışlarda uğurlar arzulayıb. Qeyd edək ki, beynəlxalq yarışda AzTU komandaları “AI in Healthcare Hackathon 2026” və “International Cybersecurity Capture the Flag (CTF) 2026” istiqamətləri üzrə təmsil olunub.  “International Cybersecurity Capture the Flag (CTF) 2026” istiqaməti üzrə yarışan AzTU komandası 7-ci yerə layiq görülüb. Hər iki istiqamət üzrə AzTU komandalarının nəticələri digər Azərbaycan universitetlərini qabaqlayıb. AzTU komandalarını İnkubasiya Mərkəzinin koordinatoru Azad Musayev müşayiət edib. Eyni zamanda, komandaların hazırlıq və yarış prosesində effektiv iştirakın təmin olunması məqsədilə Energetika fakültəsinin dekan müavini Şamxal Əliyev, “CTF” komandası üzrə isə Murad Əhmədov tərəfindən mentorluq dəstəyi göstərilib.

Azərbaycan Texniki Universitetinin (AzTU) Xüsusi texnika və texnologiya fakültəsinin mexatronika və robototexnika mühəndisliyi ixtisasının I kurs tələbəsi İsmayıl Babanın kapitanı olduğu komanda “RoboCode III” robotik kodlama düşərgəsində uğurla çıxış edərək II yerə layiq görülüb.“ASAN xidmət”in təşəbbüsü ilə təşkil olunan düşərgə Azərbaycan Respublikası Prezidentinin yanında Vətəndaşlara Xidmət və Sosial İnnovasiyalar üzrə Dövlət Agentliyinin İnnovasiyalar Mərkəzi, “Bilişim Vadisi” və “SAHA Robotics” şirkətinin birgə təşkilatçılığı, “Expressbank”ın sponsorluğu ilə həyata keçirilib.Düşərgə müddətində iştirakçılar komandalar şəklində müxtəlif innovativ layihələr üzərində çalışaraq öz bilik və bacarıqlarını nümayiş etdiriblər. Final mərhələsinə vəsiqə qazanan komandaların prototipləri münsiflər heyəti tərəfindən qiymətləndirilib.Qeyd edək ki, II yerə layiq görülən komanda “SoilMate” adlı innovativ layihə ilə çıxış edib. Layihə kənd təsərrüfatında istifadə üçün nəzərdə tutulmuş ağıllı robot sistemidir və torpağın əsas göstəricilərini analiz edərək fermerlərə operativ məlumat təqdim edir.

Azərbaycan Texniki Universitetində (AzTU) tədris olunan bir sıra mühəndislik ixtisasları nüfuzlu AQAS (Agentur für Qualitätssicherung durch Akkreditierung von Studiengängen) Akkreditasiya üzrə Daimi Komissiyası tərəfindən uğurla akkreditasiyadan keçib. Akkreditasiya 5 təhsil proqramından ibarət bir klaster üzrə həyata keçirilib: Elektrik və elektronika mühəndisliyi (bakalavr) Elektrik mühəndisliyi (magistr) Proseslərin avtomatlaşdırılması mühəndisliyi (bakalavr) Proseslərin avtomatlaşdırılması mühəndisliyi (magistr) Energetika mühəndisliyi (magistr) Akkreditasiya prosesi çərçivəsində AQAS ekspertləri tərəfindən 27–31 oktyabr 2025-ci il tarixlərində AzTU-da yerində qiymətləndirmə (site visit) həyata keçirilib. Sahə səfəri zamanı qeyd olunan 5 proqramdan ibarət klaster üzrə tədris proqramlarının məzmunu, tədris keyfiyyəti, infrastruktur və idarəetmə mexanizmləri hərtərəfli təhlil edilib. Qiymətləndirmənin nəticələrinə əsasən, qeyd olunan proqramlar beynəlxalq standartlara uyğun hesab edilib və 31 mart 2032-ci il tarixinədək akkreditasiya olunub. Bu uğur AzTU-da mühəndislik təhsilinin keyfiyyətinin beynəlxalq səviyyədə tanındığını, universitetin təhsil və elmi potensialının yüksək olduğunu bir daha təsdiqləyir. Akkreditasiya həmçinin tələbələr üçün beynəlxalq səviyyədə tanınan diplom əldə etmək, eləcə də əmək bazarında rəqabət qabiliyyətini artırmaq baxımından mühüm əhəmiyyət daşıyır. AzTU bundan sonra da təhsil proqramlarının keyfiyyətinin yüksəldilməsi və beynəlxalq əməkdaşlığın genişləndirilməsi istiqamətində fəaliyyətini davam etdirəcək.

Azərbaycan Texniki Universitetinin (AzTU) Beynəlxalq əlaqələr şöbəsinin müdiri Orxan Vətənxah və şöbənin Əcnəbi tələbələrin qəbulu sektorunun baş mütəxəssisi Müşviq Mehbalıyev Türkiyənin İzmir şəhərində keçirilən beynəlxalq təhsil sərgisində istirak edib.  Sərgi çərçivəsində Türkiyədən və digər ölkələrdən olan iştirakçılara AzTU-da təhsil imkanları barədə məlumat verilib, xarici ali təhsil müəssisələrinin nümayəndələri ilə potensial əməkdaşlıq imkanları müzakirə olunub.  

Ordumuzun zəfər əzmini nümayiş etdirən Aprel döyüşlərindən 10 il keçir. 2016-cı il aprel ayının 1-dən 2-nə keçən gecə Ermənistan silahlı qüvvələrinin təxribatlarına cavab olaraq Azərbaycan Ordusunun həyata keçirdiyi uğurlu əks-həmlə əməliyyatı ərazilərimizin işğaldan tam azad olunmasına aparan Şanlı Zəfər yolunun başlanğıcıdır. Bu döyüşlər xalqımız və dövlətimiz üçün böyük Qələbənin başlanğıcı kimi hörmət və qürur hissi ilə xatırlanır. Ordumuzun peşəkarlığı sayəsində həm canlı qüvvə, həm də texnika baxımından ağır itkilər verən Ermənistan silahlı qüvvələri haqqında uydurulmuş “məğlubedilməzlik” mifi dağıldı və millətimizin qələbə əzmi yüksəldi. Bölmələrimizin qətiyyətli zərbələri nəticəsində Ermənistan ordusunun 30-dək tankı, 25-dən çox artilleriya qurğusu və digər zirehli texnikası, 320 hərbçisi məhv edildi, 500-dən artıq döyüşçüsü yaralandı. İşğal altında olan 2 min hektardan çox torpaqlarımız azad olundu, həmçinin Lələtəpə yüksəkliyi, Cəbrayıl rayonunun Cocuq Mərcanlı kəndi və minlərlə hektar strateji əhəmiyyətli ərazi Ordumuzun tam nəzarətinə keçdi. Azərbaycan Ordusunun şücaəti və peşəkarlığı bu döyüşlərdə özünü göstərdi. Aprel döyüşləri həm hərbi, həm də psixoloji baxımdan mühüm dönüş nöqtəsi oldu. Azərbaycan Ordusunun döyüşlərdə qazandığı üstünlük sayəsində xalqımızda torpaqlarımızın hərbi yolla azad ediləcəyinə inam daha da möhkəmləndi. Aprel döyüşləri torpaqlarımızın işğaldan azad edilməsi uğrunda Zəfərə gedən yolun əsasını qoydu və təcrübə baxımında ordumuz üçün ciddi sınaq oldu. Xalq-dövlət-ordu birliyi naminə həmrəyliyin təntənəsinə çevrilən Aprel qələbəsi, eyni zamanda Azərbaycan əsgərinin peşəkarlığının, ordumuzun qüdrətinin və Vətən övladlarının misilsiz şücaətinin ifadəsi kimi tarixləşdi. Aprel döyüşlərində Azərbaycan Texniki Universitetinin (AzTU) məzunları - Mahir Quliyev, Əbdülməcid Axundov, Müşfiq Orucov və Elvin Mirzəyev şəhidlik zirvəsinə yüksəldilər. Aprel döyüşləri Azərbaycanın işğalla heç vaxt barışmayacağını dünyaya göstərdi və 44 günlük müharibədə qazanılan Şanlı Qələbənin təməli oldu. 2020-ci il sentyabrın 27-də Ermənistan silahlı qüvvələrinin bütün cəbhəboyu törətdiyi genişmiqyaslı təxribatlara cavab olaraq Müzəffər Ali Baş Komandanımızın rəhbərliyi ilə Azərbaycan Ordusu başladığı əks-hücum əməliyyatını 44 gün ərzində möhtəşəm tarixi qələbə ilə başa vurdu. Vətən müharibəsi, antiterror əməliyyatı da daxil olmaqla, postmüharibə dövründəki uğurlu döyüş əməliyyatları nəticəsində şəhidlərimizin qisası alındı, separatizmə son qoyuldu, ölkəmizin bütün ərazisində Azərbaycan Respublikasının konstitusiya quruluşu tam bərpa olundu, ərazi bütövlüyümüz, suverenliyimiz təmin edildi, həmçinin azad olunmuş ərazilərimizdə genişmiqyaslı bərpa və quruculuq işlərinə start verildi. 

Azərbaycan Texniki Universitetində (AzTU) tələbələrin alternativ və bərpa olunan enerji mənbələri sahəsində biliklərinin artırılması məqsədilə “Külək enerjisi sahəsində nəzəri və praktiki təlim” adlı nəzəri və praktiki təlim proqramı təşkil olunub. Təlim çərçivəsində xüsusilə külək enerjisinin müasir enerji sistemində rolu, qlobal enerji təhlükəsizliyində əhəmiyyəti və davamlı inkişaf kontekstində strateji mövqeyi geniş şəkildə təhlil edilib. Proqram zamanı ənənəvi fosil yanacaqların istifadəsinin yaratdığı istixana qazı emissiyaları, karbon tullantılarının artımı və bunun qlobal iqlim dəyişikliklərinə təsiri elmi faktlar əsasında izah edilib. Qeyd olunub ki, kömür və digər fosil yanacaqların yandırılması qlobal istiləşməni sürətləndirir və beynəlxalq iqlim hədəflərinə nail olunmasını çətinləşdirir. Bu mənada külək enerjisi ekoloji cəhətdən təhlükəsiz, bərpa olunan və dayanıqlı enerji mənbəyi kimi mühüm alternativ hesab edilir və atmosferə zərərli qazlar buraxmadan elektrik enerjisi istehsal etməyə imkan yaradır. Təlimin praktik hissəsində tələbələr külək elektrik stansiyalarının enerji infrastrukturunun inkişafındakı rolu, onların müasir elektrik enerjisi sistemlərinə inteqrasiyası və enerji şəbəkəsinin dayanıqlığının artırılması mexanizmləri barədə nəzəri və tətbiqi biliklər əldə edib. Eyni zamanda, yüksək güclü külək turbinləri, ağıllı idarəetmə sistemləri və enerji saxlama texnologiyaları kimi müasir enerji həlləri haqqında ətraflı məlumat təqdim olunub. Bundan əlavə, enerji səmərəliliyinin artırılması və enerji resurslarından səmərəli istifadə məsələləri də müzakirə edilmişdir. Qeyd olunub ki, külək enerjisinin tətbiqi regionların enerji asılılığının azaldılmasına, daha əlverişli enerji imkanlarının yaradılmasına və iqtisadi səmərəliliyin artırılmasına şərait yaradır. Ənənəvi enerji mənbələri ilə müqayisədə külək enerjisinin daha ekoloji və uzunmüddətli enerji həlli olduğu vurğulanıb. Təlim tələbələrdə alternativ enerji sahəsində həm fundamental nəzəri biliklərin, həm də praktik bacarıqların formalaşmasına şərait yaradıb.

Qazaxıstan Respublikasının Əl-Fərabi adına Qazax Milli Universitetinin (KazNU) magistrantları elmi-tədqiqat təcrübəsi keçmək üçün mübadilə proqramı ilə AzTU-da səfərdədir. Magistrantlar AzTU-nun beynəlxalq əlaqələr üzrə prorektoru Fariz Məmmədov, Maşınqayırma texnologiyası kafedrasının müdiri Nizami Yusubov və Maşınqayırma və metallurgiya fakültəsinin dekan müavini Anar Hacıyevlə görüşüb, elmi-tədqiqat təcrübəsinin planı və məzmunu barədə ətraflı məlumat əldə ediblər. Görüşdən sonra magistrantlar AzTU-nun infrastrukturu, kitabxanası, eləcə də kafedranın tədris və laboratoriya bazası ilə tanış olub. Qeyd edək ki, mübadilə proqramı 2 həftə davam edəcək.

Azərbaycan Texniki Universitetinin (AzTU) Beynəlxalq əlaqələr şöbəsinin Əcnəbi tələbələrin qəbulu sektorunun müdiri Sevinc Absalamlı və İnformasiya texnologiyaları və telekommunikasiya fakültəsinin dekan müavini Aytən Mövsümova Türkiyənin İstanbul şəhərində keçirilən Beynəlxalq Təhsil Sərgisində istirak edib. Sərgi çərçivəsində Türkiyədən və digər ölkələrdən olan iştirakçılara AzTU-da təhsil imkanları barədə məlumat verilib, xarici ali təhsil müəssisələrinin nümayəndələri ilə potensial əməkdaşlıq imkanları müzakirə olunub.