Azərbaycan Texniki Universitetində (AzTU) müasir müstəqil Azərbaycan dövlətinin memarı və qurucusu, dünyaşöhrətli siyasi xadim, xalqımızın Ümummilli Lideri Heydər Əliyevin anım gününə həsr olunan tədbir keçirilib.  AzTU-nun Heydər Əliyev Mərkəzində təşkil olunan tədbirdə Ulu Öndərin xatirəsi bir dəqiqəlik sükutla yad edilib. Azərbaycanın Dövlət Himni səsləndirilib. Tədbirdə çıxış edən AzTU-nun rektoru Vilayət Vəliyev, Milli Məclisin deputatı, tarix elmləri doktoru Vasif Qafarov Ulu Öndər Heydər Əliyevin Azərbaycan xalqı qarşısında xidmətlərindən, böyük xilaskarlıq missiyasından, ölkənin bütün sahələrində həyata keçirdiyi mühüm islahatlardan danışıblar. Qeyd olunub ki, ötən əsrin 90-cı illərinin əvvəllərində xalqın təkidli tələbi ilə yenidən hakimiyyətə qayıdan Ümummilli Lider Heydər Əliyev ölkəni məhv olmaq təhlükəsindən xilas etdi. Bugünkü müstəqil Azərbaycan Ümummilli Lider Heydər Əliyevin əsəridir. O da vurğulanıb ki, Heydər Əliyevin uzaqgörən siyasəti Azərbaycanda müstəqilliyin əbədiliyinin təmin edilməsi, dövlətçiliyin möhkəmləndirilməsi, milli-mədəni irsin qorunmasının təminatçısı olub.  Bu gün onun siyasi xətti Azərbaycan Prezidenti, Silahlı Qüvvələrin Müzəffər Ali Baş Komandanı İlham Əliyev tərəfindən uğurla davam etdirilir.

Azərbaycan Texniki Universitetində (AZTU) Everest zirvəsini fəth edən azərbaycanlı qadın alpinist və təlimçi-pedaqoq Vəfa Musayeva ilə tələbə və əməkdaşların görüşü təşkil olunub. AzTU rektorunun müşaviri Sevil İmanova bildirib ki, Vəfa Musayeva ilə görüş qadın əzmkarlığının və peşəkar təcrübəsinin nəticələri ilə tanışlıq xarakteri daşıyır. O, Vəfa Musayevanın Everest zirvəsi ilə yanaşı, məşhur Lhotze, Yurhim zirvələrinə, Elbrus, Savalan dağlarına və digər yüksəkliklərə də qalxdığını diqqətə çatdırılıb. Daha sonra alpinist Vəfa Musayeva çıxış edib. O, alpinizmin insan həyatındakı rolu, yaratdığı ruh yüksəkliyi və güclü özünəinamdan bəhs edib. Vəfa Musayeva həmçinin təcrübələrini bölüşüb, hədəflərinə doğru gedən yolda maneələri aşmasından danışıb. Tədbir alpinistin sualları cavablandırması ilə davam edib. Sonda AzTU-nun prorektoru Rəşad Əliyev Vəfa Musayevaya təşəkkür edib və bu tədbirin tələbələrin şəxsi inkişafında motivasiya olacağına inandığını bildirib. Qeyd edək ki, Vəfa Musayeva Everesti fəth edən ilk azərbaycanlı qadın, ümumilikdə isə bu zirvəyə qalxan 3-cü Azərbaycan alpinistidir.

Azərbaycan Texniki Universitetində (AzTU) Azərişıq ASC-nin əməkdaşlarının tələbələrlə "Gələcəyin mühəndisləri: Universitet–Sənaye Əməkdaşlığının Müasir Trendləri" mövzusunda görüşü keçirilib. AzTU-nun Enerji və Dayanıqlı İnkişaf İnstitutunun direktoru vəzifəsini icra edən Nicat Hüseynov universitet-sənaye əməkdaşlığının əhəmiyyətini vurğulayıb və bu cür tədbirlərin tələbələrin inkişafı və gələcək karyeraları üçün böyük fayda təmin edəcəyini qeyd edib. Azərişıq ASC-nin Texnoloji İnnovasiyalar və Beyin Mərkəzinin müdiri Fərid Zalıyev təmsil etdiyi qurumun tətbiq etdiyi ən son innovativ texnologiyalar, rəqəmsallaşma sahəsində aparılan islahatlar və enerji sektorunda insan kapitalının inkişafı üzrə həyata keçirilən layihələr barədə geniş məlumat verib. O həmçinin enerji sahəsində yeni tendensiyalar və bu istiqamətdə gənc mütəxəssislər üçün təqdim olunan karyera imkanlarından da danışıb. Tədbirdə tələbələrə paylayıcı elektrik şəbəkələrində tətbiq olunan müasir sistemlər, "Ağıllı Şəbəkə" (Smart Grid) konsepsiyası, rəqəmsal idarəetmə platformaları və innovativ avadanlıqlar barədə ətraflı məlumat təqdim edilib. Bundan əlavə, düzgün peşə seçiminin əhəmiyyəti, mühəndislik sahəsində motivasiyanın rolu və müasir əmək bazarının tələbləri ətrafında fikir mübadiləsi aparılıb. Tələbələrlə interaktiv müzakirə formatında davam edən görüşün sonunda suallar cavablandırılıb.

Azərbaycan Texniki Universitetinin (AzTU) İnkubasiya Mərkəzində “Startap Azərbaycan” platformasının tərəfdaşlığı ilə Startap Günləri təşkil olunub. İki gün davam edən tədbir tələbələrin innovativ ideyalar üzrə bilik və bacarıqlarını inkişaf etdirmək, yeni startap komandalarının formalaşmasını dəstəkləmək və universitetdə startap mühitini gücləndirmək məqsədi daşıyıb. Açılış tədbirindən sonra tələbələr tərəfindən 43 startap ideyası təqdim olunub və səsvermə nəticəsində 8 ən perspektivli komanda növbəti mərhələyə vəsiqə qazanıb. Seçilmiş komandalar mentorların dəstəyi ilə layihələrinin ilkin prototiplərinin və biznes modellərinin hazırlanma mərhələsinə başlayıb. Tədbirin ikinci günü seçilmiş komandalar layihələrini inkişaf etdirmək üçün mentorlarla (Orxan Əhmədov, Bəhruz Mustafayev, Azər Bayramov, Rasim Abdullayev və Rəşad Əliyev) birgə çalışıblar. Günün sonunda komandalar layihələrini münsiflər heyəti qarşısında təqdim ediblər. Qiymətləndirmə innovativlik, texniki əsaslandırma, komanda işi və reallaşdırma potensialına əsasən aparılıb. Nəticələrə əsasən, “Tibb-X” komandası 1-ci, “Safe Her” komandası 2-ci, “Work Finder” komandası isə 3-cü yerə layiq görülüb. Qalib komandalara diplom və sertifikatlar təqdim olunub.

Azərbaycan Texniki Universitetinin (AzTU) Maşınqayırma və metallurgiya fakültəsinin Mexanika kafedrasının, eləcə də Tələbə Həmkarlar İttifaqı Komitəsinin (THİK) təşkilatçılığı ilə mexanika mühəndisliyi ixtisası üzrə təhsil alan IV kurs tələbələrinin “Hidroservice Engineering” MMC-yə ekskursiyası təşkil olunub. Ekskursiyanın əsas məqsədi tələbələrin nəzəri dərslərdən əldə etdikləri biliklərin təcrübədə tətbiqi, real istehsalat mühiti ilə tanışlıq və texnoloji proseslərin öyrənilməsi olub. Müəssisəsinin direktoru Bəxtiyar Qənbərov, baş mühəndis Səbuhi Cabbarlı və Mexanika kafedrasının dosenti İsmayıl İsmayıl tələbələrə müəssisənin istehsal sahələri, avadanlıqların iş prinsipi, burada tətbiq olunan innovativ mühəndislik həlləri haqqında ətraflı məlumat verib. Burada həmçinin tələbələr mexaniki konstruksiyaların hazırlanması, materialların emalı, texnoloji xəttin təşkili və təhlükəsizlik tələblərinin tətbiqi kimi mühüm mərhələləri öyrənmək imkanı əldə ediblər. Ekskursiyanın sonunda tələbələrin praktiki biliklərini inkişaf etdirən bu cür səfərlərin sayının artırılması, eləcə də bəzi ixtisas dərsləri üzrə açıq dərslərin müəssisədə keçirilməsinin mümkünlüyü ilə bağlı razılıq əldə olunub.

“Konstitusiya və Suverenlik İli” və Azərbaycan Texniki Universitetinin (AzTU) 75 illiyi çərçivəsində AzTU Məzun Assosiasiyasının II Zirvə Görüşü keçirilib. Əvvəlcə torpaqlarımızın ərazi bütövlüyü və suverenliyi uğrunda canlarından keçən Vətən övladlarının əziz xatirəsi bir dəqiqəlik sükutla yad olunub. Azərbaycanın Dövlət Himni səsləndirilib. Məzunları salamlayan AzTU-nun rektoru Vilayət Vəliyev bildirib ki, tədbir həm “Konstitusiya və Suverenlik İli”nə, həm də universitetin 75 illik yubileyinə həsr olunub. Rektor deyib ki, AzTU-da vətənpərvərlik ruhu, tələbələrin Vətən sevgisi həmişə ön planda olub. AzTU tələbə və məzunları Azərbaycanın müstəqilliyi və suverenliyi uğrunda aparılan istər Birinci Qarabağ, istərsə də 44 günlük Vətən müharibəsində hər zaman ön sıralarda döyüşüb. Bununla yanaşı, AzTU 75 il ərzində Azərbaycan elminə, o cümlədən ölkənin sənaye və iqtisadiyyatına mühüm töhfələr verən görkəmli şəxsiyyətlər bəxş edib.   Hazırda AzTU məzunları dövlət qurumları və özəl şirkətlərdə, eyni zamanda xarici ölkələrdə müxtəlif vəzifələrdə çalışırlar. Bütün bunlar AzTU-nun zəngin elmi ənənələri olan, tələbələrinə xüsusi diqqət və qayğı ilə yanaşan ali təhsil müəssisəsi olduğunu göstərir. AzTU-nun məzunu, Azərbaycan Metrologiya İnstitutunun baş direktorunun müavini Madar Quliyev AzTU Məzun Assosiasiyasının birillik fəaliyyəti ərzində məzunların məşğulluğu və karyera inkişafı ilə bağlı geniş təqdimatla çıxış edib. AzTU məzunu, İnformasiya Texnologiyaları İnstitutunun baş direktoru, AMEA-nın vitse-prezidenti akademik Rasim Əliquliyev çıxışı zamanı mühəndislik peşəsinin dünyada əhəmiyyətindən danışıb. Bildirib ki, bu gün bütün sahələrdə mühəndis kadrlara ehtiyac var. O həmçinin qeyd edib ki, məzunlar universitet illərində öyrəndikləri biliklərlə kifayətlənməməli, mühəndisliklə bağlı müasir dövrün tələblərinə uyğun informasiyaları mənimsəmək üçün mütəmadi olaraq ali təhsil müəssisəsinin imkanlarından yararlanmalıdırlar. AzTU məzunu və əməkdaşı Günel Məmmədli yaxın vaxtlarda istifadəyə veriləcək AzTU Məzun Platformasının iş prinsipi və qeydiyyat prosesi barədə ətraflı məlumat verib. Sonra AzTU haqqında videoçarx nümayiş olunub. AzTU məzunu, Milli Məclisin deputatı Mixail Zabelin də öz növbəsində Məzun Assosiasiyasının II Zirvə Görüşünün təşkilinə görə universitet rəhbərliyinə təşəkkür edib. 1988-2003-cü illərdə universitetin Elektron hesablama maşınları kafedrasının dosenti vəzifəsində çalışmış AzTU məzunu Abil Əliyev tələbəlik illərinin xatirələrindən danışıb. AzTU-nun türkiyəli məzunları “Kar Tem Temizlik” şirkətinin rəhbəri Özcan Karavar, “Galata Medikal” və “CTR Group CIS” şirkətlərinin həmtəsisçisi Ertuğrul Altıntaş Türkiyədən məhz bu tədbirdə iştirak etmək üçün Azərbycana gəldiklərini bildiriblər. Onlar tələbələik illəri ilə bağlı xatirələrini bölüşüblər. Tədbir beynəlxalq müsabiqələr laureatı, Müdafiə Nazirliyinin Əlahiddə Nümunəvi Hərbi Orkestrinin solistləri Aynur İsgəndərli və Kənan Qədimovun ifası ilə davam edib.

Azərbaycan Texniki Universiteti (AzTU), Mingəçevir Dövlət Universiteti (MDU), Türkiyənin Gazi Universiteti və “HBN Group”un birgə təşkilatçılığı ilə keçirilən “Dayanıqlı İnkişaf Strategiyası: Qlobal trendlər, milli təcrübələr və yeni hədəflər” mövzusunda III beynəlxalq konfransın bağlanış mərasimi keçirilib. AzTU-da keçirilən bağlanış mərasimində rektor Vilayət Vəliyev regionlarda bu formatda beynəlxalq konfransların təşkilinin təqdirəlayiq addım olduğunu bildirib. O, konfransın yüksək səviyyədə təşkilinə görə MDU rəhbərliyinə təşəkkür edib. Rektor qeyd edib ki, bu konfransın nəticəsi olaraq universitetlər multidisiplinar əlaqələri genişləndirməli, beynəlxalq əlaqələrin inkişafına önəm verməlidir. Daha sonra çıxış edən “HBN Group”un icraçı direktoru Tariyel Dövlətov konfransa hazırlıq mərhələsi və nəticələrdən danışıb. O, bundan sonra da universitetlərlə birgə belə formatda tədbirlərin təşkilində iştiak edəcəklərini bildirib.   Polşanın Vistula Universitetinin və Cənubi Koreyanın Koreya Universitetinin professoru Şəhriyar Muxtarov konfransın dayanıqlı inkişafa töhfə verəcəyinə əminliyini ifadə edib. Qeyd edib ki, konfransda müzakirə olunan məruzələrin ümumi nəticəsi universitetlərin tədqiqat potensialının gücləndirilməsinə istiqamətlənib. MDU-nun elmi işlər üzrə prorektoru Natəvan Namazova konfransın yekunu olaraq əsas çağırışları diqqətə çatdırıb. Bildirib ki, 3 gün ərzində regional və beynəlxalq əməkdaşlığın gücləndirilməsi, universitet-tədqiqat mərkəzləri-dövlət qurumları, həmçinin universitet-sənaye işbirliyinin inkişafı, süni intellektdən istifadənin daha da təkmilləşdirlməsi kimi məsələlər əsas çağırışlardan olub. Çıxışlardan sonra konfrans işini yekunlaşdırıb.

Azərbaycan Texniki Universitetində (AzTU) “Dayanıqlı İnkişaf Strategiyası: Qlobal trendlər, milli təcrübələr və yeni hədəflər” mövzusunda III beynəlxalq konfransın iştirakçıları ilə görüş keçirilib. AzTU-nun rektoru Vilayət Vəliyev konfransda müzakirə olunan məsələlərin mühüm nəticələr verəcəyinə inandığını bildirib. Görüş zamanı konfransda səslənən çağırışlar ətrafında fikir mübadiləsi aparılıb.

"Dayanıqlı İnkişaf Strategiyası: Qlobal trendlər, milli təcrübələr və yeni hədəflər" mövzusunda III beynəlxalq konfrans çərçivəsində Azərbaycan Texniki Universiteti (AzTU) və Mingəçevir Dövlət Universiteti (MDU) arasında Elektroenergetika Tədqiqat Klasterinin birgə yaradılması və istifadəsinə dair strateji əməkdaşlıq memorandumu imzalanıb. Bu əməkdaşlıq əsasında formalaşan klaster akademiya, sənaye və dövlət strukturlarının birgə fəaliyyətinə əsaslanan, enerji istehsalı, ötürülməsi, paylanması, idarə olunması və dayanıqlı inkişaf sahələrində innovasiyaları dəstəkləyən, tədqiqatları təmin edən şəbəkə əsaslı ekosistemin yaradılmasına xidmət edir. Sözügedən klasterin yaradılması texnoloji transformasiya və rəqəmsal energetika hədəfli tələbə-tədqiqat-sənaye inteqrasiyasını təmin edəcək.

“Konstitusiya və Suverenlik İli” çərçivəsində Mingəçevir Dövlət Universiteti (MDU), Azərbaycan Texniki Universiteti (AzTU), Türkiyənin Gazi Universiteti və “HBN Group”un birgə təşkilatçılığı ilə keçirilən “Dayanıqlı İnkişaf Strategiyası: Qlobal trendlər, milli təcrübələr və yeni hədəflər (Sustainable Development Strategy: Global Trends, National Experience and New Goals)” mövzusunda III beynəlxalq konfrans öz işinə başlayıb. Konfransın əsas məqsədi Müzəffər Ali Baş Komandan, Prezident İlham Əliyevin qətiyyəti və rəşadətli Azərbaycan ordusunun şücaəti sayəsində əldə olunan tarixi Zəfərdən sonrakı mərhələnin reallıqları nəzərə alınmaqla müvafiq istiqamətlər üzrə aparılan elmi-tədqiqatların nəticələrinin təqdim edilməsindən ibarətdir. Konfrans Azərbaycan Respublikası Prezidentinin 2021-ci il 2 fevral tarixli müvafiq Sərəncamı ilə təsdiq olunmuş “Azərbaycan 2030: sosial-iqtisadi inkişafa dair Milli Prioritetlər”dən, eləcə də Birləşmiş Millətlər Təşkilatının “Dünyamızın transformasiyası: 2030-cu ilədək dayanıqlı inkişaf sahəsində Gündəlik”dən irəli gələn vəzifələri əhatə edən mövzularda elmi diskussiya platformasının yaradılmasını hədəfləyir. Tədbir iştirakçıları əvvəlcə ümummilli lider Heydər Əliyevin abidəsini ziyarət ediblər. Sonra MDU-nun foyesində tələbələrin hazırladıqları startap layihələrindən ibarət sərgiyə baxış keçirilib. Konfransın açılış mərasimi Ulu Öndərin və torpaqlarımızın ərazi bütövlüyü və suverenliyi uğrunda canlarından keçən şəhidlərimizin əziz xatirəsinin bir dəqiqəlik sükutla yad edilməsi ilə başlayıb. Daha sonra Azərbaycanın Dövlət Himni səsləndirilib. Qonaqları salamlayan Mingəçevir Şəhər İcra Hakimiyyətinin başçısı  İlham İsmayılov konfransın işinə uğurlar arzulayıb. MDU-nun rektoru Anar Eminov bildirib ki, tədbirə dünyanın 19 ölkəsindən, eləcə də Azərbaycanın 24 ali təhsil və tədqiqat mərkəzindən olan alim və tədqiqatçıların 600-dən çox tezis və məqaləsi daxil olub. Rektor qeyd edib ki, Mingəçevir Dövlət Universiteti bu beynəlxalq elmi konfransın əsas ev sahibi kimi qlobal çağırışlara uyğun yeni bilik və innovativ yanaşmaların müzakirəsinə xüsusi önəm verir. Onun sözlərinə görə, “Davamlı inkişaf” konsepsiyası həm milli inkişaf strategiyalarının, həm də ali təhsilin gələcək hədəflərinin müəyyənləşdirilməsində əsas istiqamətlərdən birinə çevrilib. AzTU-nun rektoru Vilayət Vəliyev konfransın elm, texnologiya və innovasiya sahəsində qlobal trendlərin müzakirəsi üçün mühüm platforma olduğunu bildirib. Rektor qeyd edib ki, müasir dövrdə süni intellekt, yaşıl enerji, kibertəhlükəsizlik, rəqəmsallaşma və dördüncü sənaye inqilabı ilə bağlı dəyişikliklər cəmiyyətin bütün sahələrinə təsir göstərir. Azərbaycan universitetlərinin bu dəyişikliklərə uyğunlaşması üçün universitetlərarası əməkdaşlığın genişlənməsinin vacibliyini vurğulayıb. Açılış nitqlərindən sonra konfrans proqrama uyğun olaraq protokol çıxışları ilə davam edib.  Üç gün davam edəcək konfrans işini bölmə iclasları ilə davam etdirir. Konfransın bağlanış mərasimi dekabrın 8-də AzTU-da keçiriləcək. Bağlanış iclasında konfrans ərzində əldə olunan nəticələrin və gələcək əməkdaşlıq perspektivlərinin vurğulanması və yekun qərarın qəbulu nəzərdə tutulur.