Azərbaycan Təhsil İşçiləri Azad Həmkarlar İttifaqı (ATİAHİ) Respublika Komitəsi tərəfindən təhsildə və tələbə həmkarlar ittifaqı hərəkatında fəal iştirak edən tələbələrə “Adlı təqaüd”ün  təqdim olunması mərasimi keçirilib. Tədbirdə elm və təhsil nazirinin müavini Firudin Qurbanov, Azərbaycan Həmkarlar İttifaqları Konfederasiyasının sədri Sahib Məmmədov, ATİAHİ Respublika Komitəsinin sədri Araz Paşayev, Milli Məclisin Elm və təhsil komitəsinin sədri Anar İsgəndərov, ali təhsil müəssisələrinin rəhbərləri, müəllim və tələbələr iştirak ediblər. Əvvəlcə Azərbaycan Respublikasının Dövlət Himni səsləndirilib, ulu öndər Heydər Əliyev və ölkəmizin ərazi bütövlüyü uğrunda şəhid olmuş qəhrəmanlarımızın xatirəsi bir dəqiqəlik sükutla yad edilib. Çıxış edənlər ölkəmizdə həyata keçirilən gənclər siyasəti, təhsilin inkişafı və tələbələrin sosial rifahı istiqamətində görülən tədbirlərdən bəhs ediblər. “Adlı təqaüd” layihəsinin tələbələrin elmə, təhsilə və ictimai fəallığa marağının artırılmasında əhəmiyyətli rol oynadığı qeyd olunub. Qeyd edək ki, ATİAHİ tərəfindən 1995-ci ildən etibarən həyata keçirilən bu layihə çərçivəsində bu günədək 3179 tələbə təqaüdlə mükafatlandırılıb.  2024–2025-ci tədris ili üzrə isə 308 tələbəyə “Adlı təqaüd” təqdim edilib. Sevindirici haldır ki, bu tələbələr arasında Azərbaycan Texniki Universitetinin (AzTU) Tələbə Həmkarlar İttifaqı Komitəsinin (THİK) təşəbbüslərində fəal iştirak edən və dərslərində əla nəticələr göstərən 14 tələbə də yer alıb. 

13–16 may tarixlərində Qazaxıstanın Türkistan şəhərində “Türk Mühəndislər Dərnəyi” nin təşkilatçılığı, Azərbaycan Təhsil İşçiləri Azad Həmkarlar İttifaqı Respublika Komitəsinin dəvəti ilə Azərbaycan Texniki Universitetinin (AzTU) Həmkarlar İttifaqı Komitəsinin (HİK) sədri Elvin Bəxtiyarlı, Radiotexnika və telekommunikasiya kafedrasının müdiri professor Mehman Həsənov, Kibertəhlükəsizlik kafedrasının müdiri professor Yadigar İmamverdiyev və Mühəndis riyaziyyatı və süni intellekt kafedrasının müdiri dosent Atif Namazov “II Türk Dünyası Uluslararası Mühəndislik Zirvəsi”ndə müxtəlif sahələr üzrə keçirilən müzakirələrdə iştirak edib. AzTU əməkdaşları tədbirdə müvafiq mövzularda geniş təqdimat ediblər. Tədbirdə mühəndisliyin müxtəlif istiqamətləri üzrə müzakirələr aparılıb, mühəndisliyin müasir problemləri, qarşıda duran vəzifələri, Türk Dünyası Mühəndislik Birliyi, gələcək perspektivlər barədə fikir mübadiləsi aparılıb. Bundan başqa, ictimai təşkilatların, həmkarlar ittifaqlarının mühəndislikdə rolu istiqamətində çıxış edən Elvin Bəxtiyarlı tədbirdə ATİAHİ Respublika Komitəsi və müvafiq olaraq AzTU HİK tərəfindən həyata keçirilən işlərdən danışıb. Dörd gün davam edən zirvə görüşündə mühəndisliyin bir sıra istiqamətlərində müzakirələr aparılıb. Tədbirin sonunda 2026-cı ildə “III Türk Dünyası Uluslararası Mühəndislik Zirvəsi”nin Azərbaycanda keçirilməsi qərara alınıb.

Azərbaycan Texniki Universitetinin (AzTU) İnformasiya texnologiyaları və telekommunikasiya fakültəsinin tələbəsi Ramazan Quliyev İtaliyanın Cosenza şəhərində keçirilən ESTIEM təşkilatının “General Assembly” adlı tədbirində iştirak edib. Tədbirdə ESTİEM-in ümumi idarəetmə strukturu ilə bağlı vacib mövzular müzakirə edilib, yeni yerli qrupların ESTIEM ailəsinə qoşulması və lider heyətində baş verən dəyişikliklər elan edilib. Son 6 ayın fəaliyyət hesabatları, həmçinin “Council Meeting (CM)” tədbirinə dair hesabat da iştirakçılara təqdim olunub. Eyni zamanda, səsvermə yolu ilə növbəti il üçün CM tədbirinin keçiriləcəyi ölkə müəyyən olunub. Tədbir çərçivəsində müxtəlif ölkələrdən olan ESTIEM üzvləri ilə tanış olmaq, təcrübə mübadiləsi aparmaq və şəbəkələşmək üçün geniş imkanlar olub. ESTIEM-in bu tədbiri AzTU tələbəsi Ramazan Quliyev üçün beynəlxalq tələbə şəbəkəsində təmsil olunmaq, təşkilati qərarların qəbul prosesində bilavasitə iştirak etmək və ESTIEM-in fəaliyyət mexanizmlərini yaxından öyrənmək baxımından əhəmiyyətli təcrübə olub.

“Konstitusiya və Suverenlik İli” çərçivəsində Azərbaycan Texniki Universitetinin (AzTU) tələbələri üçün hüquqşünas Şükufə Muradsoy tərəfindən seminar keçirilib. Əvvəlcə torpaqlarımızın ərazi bütövlüyü və suverenliyi uğrunda canlarından keçən Vətən övladlarının əziz xatirəsi bir dəqiqəlik sükutla yad edilib. Azərbaycanın Dövlət Himni səsləndirilib. Salamlama nitqi ilə çıxış edən AzTU-nun Kommunikasiya şöbəsinin əməkdaşı Mehti Namazov bildirib ki, Prezident İlham Əliyevin 28 dekabr 2024-cü il tarixli Sərəncamı ilə 2025-ci il “Konstitusiya və Suverenlik İli” elan olunub və bununla əlaqədar ölkədə müxtəlif tədbirlər keçirilir. Bu gün keçirilən seminar da həmin tədbirlərin məntiqi davamıdır. Daha sonra çıxış edən Humanitar fənlər kafedrasının müdiri Həbib Mirzəyev “Konstitusiya və Suverenlik İli”nin Azərbaycanın tarixində böyük ictimai-siyasi hadisə olduğunu diqqətə çatdırıb. Həbib Mirzəyev vurğulayıb ki, bu cür tədbirlər tələbələrin vətənpərvər ruhunun yüksəlməsinə xidmət edir. Hüquqşünas Şükufə Muradsoy tələbələri Azərbaycan Respublikasının Konstitusiyasının əsas müddəaları ilə tanış edərək, konstitusion hüquqlar barədə məlumat verib. Şəbnəm Muradsoy ailə, sağlamlıq, təhsil, nikah, əmək, şərəf və ləyaqətin müdafiəsi və digər hüquqlardan bəhs edib. İnteraktiv şəkildə keçən seminarda tələbələr onları maraqlandıran sualları hüquqşünasa ünvanlayıb.

Səhiyyə Nazirliyinin Respublika QİÇS-lə Mübarizə Mərkəzi (RQMM) insanın immunçatışmazlığı virusunun (İİV) törətdiyi xəstəliklə (İİV infeksiyası) mübarizə tədbirləri çərçivəsində Azərbaycan Texniki Universitetində (AzTU) infosessiya keçirib. AzTU Tələbə Gənclər Təşkilatının təşkilatçılığı ilə keçirilən tədbirin əsas məqsədi tələbələr arasında insanın immunçatışmazlığı virusu (İİV) və Qazanılmış İmmunçatışmazlıq Sindromu (QİÇS) barədə məlumatlılığı artırmaq və bu sahədə profilaktik tədbirlərin vacibliyini vurğulamaq olub. Maarifləndirmə tədbirində İİV və QİÇS-in yoluxma yolları, qarşısının alınması üsulları və xəstəliyin cəmiyyətə təsiri ilə bağlı geniş məlumat verilib. Tələbələrə həmçinin bu mövzuda düzgün məlumatlanmağın önəmi və İİV-lə yaşayan insanların hüquqlarının qorunması məsələləri izah edilib.

Azərbaycan Texniki Universitetində (AzTU) “Bitget Hackaton – Startap” müsabiqəsinin yekun mərhələsi keçirilib. Müsabiqəyə AzTU, Bakı Mühəndislik Universiteti (BMU) və Azərbaycan Memarlıq və İnşaat Universitetinin (AzMİU) tələbələrindən ibarət komandaların “Blockchain”, “Kriptovalyuta”, “Süni İntellekt” və “Data Analitika” mövzuları üzrə 30-a yaxın startap layihəsi təqdim edilib. Onlardan 19 layihə final mərhələsinə keçərək geniş təqdimat formatında nümayiş etdirilib. Layihələr 5 əsas meyar – komanda və təqdimat bacarığı, ideya, texniki əsaslandırma, praktiki tətbiq imkanı, kommersiya potensialı üzrə peşəkar münsiflər heyəti (Osman Gündüz, Elnur Quliyev, Orxan Əhmədov və Aytən Mövsümova) tərəfindən qiymətləndirilib. Gərgin rəqabət və yüksək səviyyəli təqdimatlar nəticəsində qalib komandalar müəyyənləşdirilib və ümumi 3.000 ABŞ dolları məbləğində mükafat (1-ci yer 1.500$, 2-ci yer 1.000$, 3-cü yer 500$) qaliblərə təqdim olunub. Nəticələrə görə, 1-ci yerə AzTU, 2-ci yerə BMU, 3-cü yerə isə AzTU komandası lazyiq görülüb. Tədbirin təşkilatçıları olan AzTU və “Bitget” platforması bu hakaton vasitəsilə Azərbaycanda startap ekosistemi və rəqəmsal texnologiyaların inkişafına dəstəyini nümayiş etdirib. Bu cür təşəbbüslər gənclərin texnoloji biliklərini yalnız nəzəriyyədə deyil, real layihələr və biznesyönümlü məhsullara inteqrasiya edilməsinə imkan yaradır. Belə tədbirlər gənclərin teorik biliklərini real texnoloji layihələrə çevirməsi, komanda ruhu formalaşdırması və qlobal texnologiya sektoruna çıxması üçün zəruri zəmin yaradır.

Azərbaycan Texniki Universitetində (AzTU) tələbələr üçün “Brainzy” mobil tətbiqi haqqında infosessiya keçirilib. Təqdimat zamanı “Brainzy” mobil tətbiqinin əsas imkanları, istifadə qaydaları və inkişaf perspektivləri haqqında ətraflı məlumat verilib. Qeyd olunub ki, mobil tətbiqin tələbələr arasında tanıdılması gələcək istifadəçi auditoriyasının genişlənməsi baxımından mühüm addımdır.   Tələbələr mobil tətbiqlə bağlı onları maraqlandıran sualları səsləndiriblər.

Azərbaycan Texniki Universitetinin (AzTU) Enerji effektivliyi və yaşıl enerji texnologiyaları kafedrasının müdiri professor Vaqif Həsənov Azərbaycan Metrologiya İnstitutunun (AzMİ) əməkdaşları üçün təlim keçib. “Scopus bazasında məqalələrin dərc edilməsi” mövzusunda keçirilən təlimdə elmi məqalələrin beynəlxalq bazalarda, xüsusilə də “Scopus” indeksli jurnallarda dərc olunma prosesi, tələblər və uğurlu nəşr strategiyaları barədə ətraflı məlumat verilib. İştirakçılar elmi tədqiqat işlərinin hazırlanması, məqalənin strukturu, yazılması, tərtibatı və təqdimatı, eləcə də uyğun jurnalın seçilməsi barədə məlumatlandırılıb. Təlimin sonunda iştirakçılara sertifikatlar təqdim olunub.

Beynəlxalq Kouçinq Federasiyasının (ICF) “Ruhlan, Dəyiş, Çiçəklən” şüarı ilə keçirilən Beynəlxalq Kouçinq Həftəsi çərçivəsində Azərbaycanda ilk dəfə geniş miqyaslı tədbir keçirilib. Beynəlxalq Kouçinq Həftəsi çərçivəsində hər il dünyanın müxtəlif ölkələrində keçirilən silsilə tədbirlər kouçinqin insanlara, təşkilatlara və cəmiyyətlərə olan müsbət təsirini nümayiş etdirməyi hədəfləyir. Əvvəlcə Azərbaycan Respublikasının Dövlət Himninin səsləndirilməsi ilə başlayıb. Tədbirdə müxtəlif sahələri təmsil edən rəsmilər, millət vəkilləri, ali təhsil müəssisələrinin rəhbər şəxsləri və kouçinq sahəsinin aparıcı mütəxəssisləri iştirak ediblər. Qonaqları salamlayan Azərbaycan Texniki Universitetinin (AzTU) rektoru Vilayət Vəliyev kouçinqin müasir təhsil və idarəetmə proseslərində əhəmiyyətini vurğulayaraq, bu sahənin həm fərdi, həm də təşkilati inkişaf üçün mühüm rol oynadığını qeyd edib. Tədbirdə çıxış edən Beynəlxalq Kouçinq Federasiyasının sədri Ebru Kaya Caymaz kouçinqin fərdi potensialın üzə çıxarılmasında və insanların özlərinə güvənməsində oynadığı rolu xüsusi vurğulayıb. ICF-in tədbirlər direktoru Aytən Şıxalıyeva da çıxışında bu tədbirin hazırlanması və reallaşması prosesindəki əhəmiyyətli detallara toxunaraq, yerli və beynəlxalq kouçların bir araya gəlməsinin qarşılıqlı öyrənməni təşviq etdiyini bildirib. O, bu təşəbbüsün gələcək illərdə də davamlı olacağını və kouçinq yanaşmasının yayılmasının cəmiyyətimizə böyük fayda verəcəyini dilə gətirib. Tədbirdə Milli Məclisin deputatları Arzu Nağıyev, Pərvin Kərimzadə və Sevinc Hüseynova da çıxış ediblər. Onlar kouçinqin cəmiyyətin rifahı, təhsilin inkişafı və insan kapitalının gücləndirilməsi baxımından əhəmiyyətini vurğulayaraq, bu sahənin dəstəklənməsinin vacibliyini qeyd ediblər. İki panel müzakirəsi və spiker çıxışları ilə davam edən tədbirdə ümumilikdə 14 spiker çıxış edib. Çıxışçılar arasında dövlət və özəl müəssisələrin rəhbər şəxsləri, tanınmış kouçlar yer alıb. Panel müzakirələrdə kouçinqin fərdi və təşkilati inkişafda rolu, liderlik, motivasiya və dəyişiklik menecmenti kimi aktual mövzular ətrafında dərin və maraqlı fikirlər səsləndirilib. Tədbir zamanı sponsor qismində çıxış edən qurumlara rəsmi təşəkkür bildirilib və onların dəstəyi yüksək qiymətləndirilib. Təşkilatçılar tərəfindən tədbirin sonunda iştirakçılar arasında maraqlı bir hədiyyə mərasimi də həyata keçirilib. Adları əvvəlcədən hazırlanmış siyahı əsasında şüşə qabdan adları çəkilən 10 iştirakçıya sponsor şirkətlər tərəfindən xüsusi hədiyyələr təqdim olunub. Tədbir iştirakçılar tərəfindən böyük maraq və yüksək qiymətləndirmə ilə qarşılanıb. Beynəlxalq Kouçinq Federasiyasının bu təşəbbüsü Azərbaycanda kouçinq sahəsinə artan marağın və bu sahənin inkişaf potensialının göstəricisi kimi dəyərləndirilir.

Türkiyədə Tokat Gaziosmanpaşa Universiteti və Azərbaycan Texniki Universitetinin (AzTU) birgə təşkilatçılığı ilə II Beynəlxalq İqtisadi və İnzibati Araşdırmalar Konfransı keçirilib. Tokat Gaziosmanpaşa Universitetinin İqtisadiyyat və idarəetmə fakültəsi və AzTU-nun İqtisadiyyat və statistika kafedrasının birgə əməkdaşlığı çərçivəsində təşkil olunan konfransda iqtisadi və inzibati elmlərin müxtəlif sahələri üzrə müzakirələr aparılıb. Tədbirdə bank və maliyyə, əmək iqtisadiyyatı və sənaye münasibətləri, ekonometrika, iqtisadiyyat, statistika, biznesin idarə edilməsi, dövlət idarəçiliyi, maliyyə və beynəlxalq iqtisadi münasibətlər mövzularında təqdimatlar edilib. Konfransda AzTU-nu İqtisadiyyat və statistika kafedrasının dosentləri -  Enerji və Dayanıqlı İnkişaf İnstitutunun direktoru Natəvan Namazova və Ömürboyu Öyrənmə Məktəbinin direktoru Aynurə İsmayılova təmsil ediblər.