Azərbaycan Texniki Universitetinin (AzTU) İnformasiya texnologiyaları və telekommunikasiya fakültəsinin I kurs tələbələri ilə görüş keçirilib. İnformasiya texnologiyaları və telekommunikasiya fakültəsinin dekanı Leyla Məmmədova fakültənin fəaliyyəti, ixtisaslar və proqramlar, bacarıqlar və karyera imkanları (İT Akademiyalarla əməkdaşlıq, Code Academy), həmçinin nəzərdə tutulmiş hakatonlar, startap yarışları, layihələr və mübadilə proqramları haqqında məlumat verib. O, fakültənin əsas hədəfinin təkcə elmi biliklərin paylaşılması ilə məhdudlaşmadığını, eləcə də məsuliyyətli və vətənpərvər vətəndaş formalaşdırmaq olduğunu vurğulayıb. Akademik məsləhətçi Səfa Əsədova tələbələrə ali təhsil sistemində tətbiq olunan kredit sistemi və digər vacib məlumatlar haqqında məlumat verib. Beynəlxalq əlaqələr üzrə dekan müavini Aytən Mövsümova, sosial məsələlər, ictimaiyyətlə əlaqələr və infrastruktur üzrə dekan müavini Ülviyyə Kərimova müvafiq məlumatları tələbələrin diqqətinə çatdırıblar. Kitabxana İnformasiya Mərkəzinin direktoru Xəyalə Hacıyeva mərkəzdə yaradılan imkanlar haqqında tələbələrə məlumat verib. Kommunikasiya şöbəsinin müdiri Səfa Bağırov tələbələrin sosial fəaliyyətinin səmərəli şəkildə təşkil olunması ilə bağlı fikirlərini çatdırıb. O, xüsusi istedadı ilə seçilən tələbələri yaradılacaq dərnəklərinə qoşulmağa dəvət edib.

Azərbaycan Texniki Universitetinin (AzTU) I kurs tələbələrinə Tələbə Gənclər Təşkilatı (TGT) haqqında infosessiya keçirilib. AzTU TGT sədri Ruslan Qənbərov təqdimatla çıxış edərək təşkilatın məqsədi, prinsipləri, tələbə klubları, komanda üzvləri, eləcə də cari il ərzində görülmüş ictimai, sosial, mədəni tədbirlər, müsabiqələr, layihələr və düşərgələr haqqında ətraflı məlumat verib. O, yeni tələbələrə universitetin ictimai-sosial həyatında fəal olmağı tövsiyə edib. AzTU TGT-nin fəal üzvlərindən biri Emil Cəfərov TGT-nin nəzdində yaradılmış CreART proqramı və proqram çərçivəsində mədəniyyət sahəsində nəzərdə tutulan fəaliyyət planlarından bəhs edib.   Görüş zamanı müxtəlif tədbirlər və düşərgələrdən sosial çarxlar nümayiş etdirilib. Sonda TGT üzvləri tələbələrin suallarını cavablandırıb.  

Azərbaycan Texniki Universitetinin (AzTU) elm və innovasiyalar üzrə prorektoru Sübhan Namazov və Tədqiqat və inkişaf departamentinin direktoru Bəxtiyar Bədəlov Pakistanın Lahor şəhərində Lahor Universiteti, Mühəndislik və Texnologiya Universiteti, Menecment və Texnologiya Universieti, Mərkəzi Pinjab Universitetində işgüzar səfərdə olub. Səfər çərçivəsində qardaş Pakistan Respublikasının dünya reytinqində qabaqcıl universitetləri ilə əməkdaşlığın perspektiv imkanları və istiqamətləri geniş müzakirə olunub. Pakistanın böyük mühəndislik universitetlərindən biri olan Mühəndislik və Texnologiya Universiettin vitse-kansleri  professor Şahid Munir və universitetin nümayəndə heyəti ilə görüş zamanı bildirilib ki, AzTU ilə əməkdaşlıq universitet üçün prioritetdir. Qeyd olunub ki, AzTU ilə qarşılıqlı anlaşma memorandumu imzalamaqla əməkdaşlığı genişləndirməkdə maraqlıdırlar. Lahor Universitetinin rektoru professor Muhammad Aşraflə görüş zamanı AzTU ilə tədqiqat, birgə layihələr, elmi məqalələrin birgə dərc olunması  sahəsində əməkdaşlığa hazır olduqları vurğulanıb. Menecment və Texnologiya Universitetinə səfər zamanı prorektor Sübhan Namazov və Menecment və Texnologiya universietinin prorektoru Əsgər Zaidinin görüşü zamanı AzTU tələbələrinə təqaüd proqramlarında iştirak, beynəlxalq elmi bazalarda indekslənən birgə elmi konfransların təşkili, qarşılıqlı tədqiqatçı mübadiləsi, beynəlxalq reytnqlərdə qarşılıqlı dəstəkdə maraqlı olduqları bildirilib. Mərkəzi Pinjab Universitetinə ziyarət zamanı nümayəndə heyəti ilə görüşdə prorektor Hammed Naved və nümayəndə heyəti ilə görüşdə universitetin Mühəndislik sahəsində əməkdaşlıq imkanları yüksək qiymətləndirilib və bütün istiqamətlərdə əməkdaşlığa hazır olduqları bildirilib. Səfər zamanı nümayəndə heyəti universitetlərin ayrı-ayrı sahələrdə mövcud maddi-texniki, laboratoriya bazaları ilə tanış olub və qarşılıqlı əməkdaşlıq imkanlarını müzakirə ediblər. Müzakirələrdən sonra universitetlərlə qarşılıqlı anlaşma memorandumu imzalanması və geniş əməkdaşlıq razılaşdırılıb.

Azərbaycan Texniki Universitetində (AzTU “Korporativ idarəetmə” mövzusunda təlim keçirilib. AzTU-nun Tələbə Həmkarlar İttifaqı Komitəsi (THİK) və Tələbə Gənclər Təşkilatının (TGT) fakültə sədrlərinin və digər aktiv üzvlərinin qatıldığı təlim tələbələrin kapital bazarında məlumatlılıq və maarifləndirmə səviyyəsinin artırılması məqsədilə təşkil olunub. Təlimçi - AzTU-nun baş müəllimi Pərvin Hacıyeva tələbələri korporativ idarəetmənin mahiyyəti və məqsədləri, korporativ sosial məsuliyyət, etik kodeks və işgüzar davranış qaydaları, maraqlar toqquşması və onun idarə olunması və digər istiqamətlərdə maarifləndirib. Daha sonra iştirakçılar komandalara bölünərək mövzu ətrafında müzakirələr aparıblar.

Azərbaycan Texniki Universitetinin (AzTU) tələbələri üçün Almaniyada təqaüdlü təhsil fürsətləri, o cümlədən Alman Akademik Mübadilə Xidmətinin (DAAD) təqaüd proqramları haqqında məlumatlandırma sessiyası keçirilib. Tədbirdə beynəlxalq əlaqələr üzrə prorektor Fariz Məmmədov təqaüd proqramlarının AzTU-nun ixtisasları üzrə yaratdığı imkanlardan bəhs edib. Məlumatlandırma sessiyasında AzTU-da fəaliyyət göstərən alman dili müəllimi Klaudio Kasperl Almaniyada təhsil, DAAD-nin təqaüd proqramları, müraciət şərtləri, tələb olunan sənədlər toplusu və seçim meyarları haqqında tələbələrə ətraflı məlumat verib. Tədbirdə Almaniyada bakalavr tələbələri üçün təşkil edilən yay məktəbləri və müraciət qaydaları da ətraflı izah olunub. Sessiyada həmçinin Beynəlxalq əlaqələr şöbəsinin əməkdaşı Aysel Bədəlova AzTU-da mövcud mübadilə proqramları və müraciət şərtləri barədə ətraflı məlumat verib. Tədbirin sonunda iştirakçıların sualları cavablandırılıb.

Azərbaycan Texniki Universitetində (AzTU) Almaniyanın keyfiyyət təminatı agentliyi AQAS tərəfindən keçiriləcək 20 proqramın beynəlxalq akkreditasiya proqramın hazırlıq məqsədilə fakültə və kafedraların məsul şəxsləri ilə silsilə görüşlər təşkil olunur. Keyfiyyətin təminatı şöbəsi tərəfindən təşkil və koordinasiya edilən görüşlərdə iştirakçılara akkreditasiya proqramının mahiyyəti, məqsədləri və mərhələləri barədə ətraflı məlumat verilib. Bildirilib ki, proqram universitetdə tədris prosesinin beynəlxalq standartlara uyğunluğunu təmin etməklə, AzTU-nun beynəlxalq arenada mövqeyini möhkəmləndirməyə xidmət edir. Müzakirələr zamanı qeyd olunub ki, proqram çərçivəsində keçiriləcək sahə səfəri xüsusi əhəmiyyət kəsb edir. Bu mərhələdə ESG-2015 meyarlarına əsasən sənədlərə baxılacaq, müsahibələr aparılacaq və yerində baxışlar təşkil ediləcək. Eyni zamanda, təhsilverənlərin və təhsilalanların prosesdə iştirakı, onların rəy və təkliflərinin nəzərə alınması da vacib amillərdən biri kimi vurğulanıb. Görüşlərdə fakültə və kafedralardan təqdim olunmalı sənədlərin siyahısı, hesabat materialları və digər zəruri məlumatlar barədə də geniş izah verilib. Sənədlərin vaxtında və düzgün hazırlanmasının, həmçinin prosesin şəffaflığının təmin edilməsinin önəmi diqqətə çatdırılıb. Beynəlxalq akkreditasiya proqramına qoşulmaq AzTU-da tədris keyfiyyətinin yüksəldilməsinə, idarəetmə proseslərinin təkmilləşdirilməsinə və beynəlxalq əməkdaşlıq imkanlarının genişlənməsinə şərait yaradacağı üçün bu prosesin komanda olaraq təşkil edilməsi və izlənilməsi hər bir kəsin marağındadır. Bu məqsədlə belə görüşlərin davamlı aparılması nəzərdə tutulur.

Azərbaycan Texniki Universitetinin (AzTU) Keyfiyyət təminatı şöbəsinin əməkdaşları – Nərmin Xasayeva və Həmidə Həsənova ADA Universitetinin təşkilatçılığı və Təhsildə Keyfiyyət Təminatı Agentliyinin (TKTA) tərəfdaşlığı ilə ali təhsildə keyfiyyət təminatına həsr olunmuş “Ali təhsildə keyfiyyət təminatı üzrə II ADA Simpoziumu”nda iştirak edib. Simpoziumun əsas məqsədi ali təhsil müəssisələrinin keyfiyyət təminatı sahəsində fəaliyyət göstərən nümayəndələrini bir araya gətirərək, fikir və təcrübə mübadiləsinə şərait yaratmaq olub. İki gün davam edən simpozium çərçivəsində yerli və beynəlxalq ekspertlərin iştirakı ilə keyfiyyət təminatı və akkreditasiya sahəsində aktual mövzular, qlobal tendensiyalar və qabaqcıl təcrübələr müzakirə olunub, həmçinin mövzu üzrə seminarlar təşkil edilib. Müzakirələrdə milli akkreditasiya, daxili keyfiyyət təminatı sistemləri, tədris proqramlarının qiymətləndirilməsi, tədris və öyrənmənin keyfiyyəti, insan resurslarının inkişafı, dayanıqlılıq və layihə idarəçiliyi kimi mövzular xüsusi diqqət mərkəzində olub. Tədbirin sonunda iştirakçılara sertifikat təqdim edilib.

Azərbaycan Texniki Universitetinin (AzTU) tələbəsi Xüsusi texnika və texnologiya fakültəsinin II kurs tələbəsi Kamal Həsənli VIII Respublika Robot Olimpiadasında “Robomission” kateqoriyası üzrə II yerə layiq görülüb. Qeyd edək ki, Gənclər və İdman Nazirliyi, Rəqəmsal İnkişaf və Nəqliyyat Nazirliyi, İnnovasiya və Rəqəmsal İnkişaf Agentliyi, Dünya Robot Olimpiadası Assosiasiyası və Azərbaycan Robotexnika Mühəndisliyi Akademiyasının (AREA) birgə təşkilatçılığı 8-19 yaşadək yeniyetmə və gənclər arasında keçirilən olimpiadada iştirakçılar 4 kateqoriya (“Robomission”, “Robosports”, “Future innovators”, “Future engineers”) üzrə mübarizə aparıblar.   

Azərbaycan Texniki Universitetinin (AzTU) Nəqliyyat və logistika fakültəsinin 1-ci kurs tələbələri ilə görüş keçirilib. Nəqliyyat və logistika fakültəsinin dekanı Allahverdi Şərifov tələbələri AzTU-ya qəbul olunmaqları münasibətilə təbrik edib və onlara təhsillərində uğurlar diləyib. Dekan universitet, fakültənin tarixi və təhsil istiqamətləri barədə I kurs tələbələrinə məlumat verib.   Daha sonra fakültə nəzdində fəaliyyət göstərən Nəqliyyat logistikası və hərəkətin təhlükəsizliyi kafedrasının müdiri Razim Bayramov və Nəqliyyat texnikası və idarəetmə texnologiyaları kafedrasının məsləhətçi professoru Heybətulla Əhmədov kadr hazırlığında kafedraların əsas prioritet istiqamətləri, universitet-sənaye əməkdaşlığının əhəmiyyəti, nəqliyyat və logistika sahəsində əmək bazarına olan çağdaş tələblər haqqında ətraflı məlumat veriblər. Görüşdə müxtəlif dövlət və özəl müəssisələrdə yüksək vəzifələrdə çalışan AzTU məzunları çıxış ediblər. Bildirilib ki, Nəqliyyat və logistika fakültəsinin məzunlarına bütün yerli və xarici müəssisələrdə tələb var. İxtisası dərindən mənimsəmə, sənayedə möhkəmlənmiş praktiki vərdişlər, bir neçə xarici dil və kompüter bilikləri, özünü təqdimetmə, ünsiyyət və davranış bacarıqları AzTU məzunlarına geniş iş imkanları açacaq. AzTU-nun Texnologiya Transfer Mərkəzinin əməkdaşı Sahib Əsgərov mərkəzin tələbələr üçün yaratdığı imkanlar haqqında geniş təqdimatla çıxış edib. Fakültənin dekan müavinləri Qəzənfər Axundov və Mahir Mustafayev isə tələbələrə tədris prosesi, fakültədə kommunikasiya prosesi ilə bağlı zəruri məlumatlar veriblər.   Tələbələr adından çıxış edən, hazırda IV kursda təhsil alan Rəşvin Şirəlizadə fakültənin onun təhsil və şəxsi inkişafına qatdığı dəyərlərdən danışıb.

Azərbaycan Texniki Universiteti (AzTU) ilə “Focus Optika”nın əməkdaşlığı çərçivəsində 24, 25, 26 sentyabr tarixlərində universitetin əməkdaş və tələbələri üçün ödənişsiz göz müayinəsi həyata keçirilib. “Focus Optika”nın həkimləri tərəfindən aparılan müayinədə ümumiləkdə 160-dan çox əməkdaş və tələbə iştirak edib.   Müayinə zamanı gözün sağlamlığının qorunması istiqamətində əhəmiyyətli tövsiyələr verilib, həmçinin əlavə suallar cavablandırılıb. Bundan əlavə, müayinədən keçən AzTU əməkdaş və tələbələri üçün eynək və digər əlaqədar məhsulların alışı zamanı xüsusi endirimlərin tətbiq olunacağı bildirilib. Qeyd edək ki, AzTU əməkdaş və tələbələrinin sağlamlığını hər zaman diqqətdə saxlayır. Universitetdə belə layihələrin bundan sonra da davam etdirilməsi planlaşdırılır.