Müdafiə və kibertəhlükəsizlik sahəsində elmi-tədqiqat potensialını vahid strateji istiqamət altında birləşdirərək bu sahələrdə tədqiqatların təkrarlanmasını aradan qaldırmaq, müasir trendləri və innovasiyaları vahid sistemə gətirmək və dövlət-sənaye-universitet əməkdaşlığını gücləndirmək məqsədilə AzTU-da Müdafiə Texnologiyaları və Kibertəhlükəsizlik Tədqiqat Klasteri yaradılıb. Yeni yaradılan klaster avtonom sistemlər, pilotsuz platformalar, süni intellekt əsaslı nəzarət sistemləri, elektromaqnit müdafiə texnologiyaları, şəbəkə və informasiya təhlükəsizliyi, süni intellekt (AI) əsaslı kiberhücumların aşkarlanması, SCADA və sənaye sistemlərinin qorunması, "smart grid", "e-mobility", enerji təhlükəsizliyi və dözümlü infrastruktur modelləri, Big Data və süni intellektlə kritik sistemlərin proqnozlaşdırılması və risklərin azaldılması tədqiqat istiqamətləri üzrə fəaliyyət göstərəcək. Bu təşəbbüs AzTU-nun ölkədə elmi-texniki tərəqqinin qlobal inkişafına verdiyi töhfəni artırmaq, rəqəmsal transformasiya proseslərinə dəstək vermək və milli müdafiə texnologiyaları ekosistemində universitetin aparıcı mövqeyini gücləndirmək məqsədi daşıyır. Klaster bu sahədə tədqiqat ehtiyaclarına uyğun sinerji yaradan platforma olaraq AzTU-nun Müdafiə Texnologiyaları və Kibertəhlükəsizlik İnstitutunun koordinasiyası ilə fəaliyyətini təşkil edəcək.

Azərbaycan Texniki Universitetinin (AzTU) Xüsusi texnika və texnologiya fakültəsinin tələbələrinə Tələbə Elmi Cəmiyyəti (TEC) haqqında infosesiyası keçirilib. Dekan Yadullah Babayev fakültə TEC-in məqsəd və vəzifələri barədə məlumat verib. O, Xüsusi texnika və texnologiya fakültəsinin tələbələrinin yerli və beynəlxalq layihələrdə iştirakının əhəmiyyətini vurğulayaraq, bu istiqamətdə TEC-in mühüm rol oynadığını qeyd edib. Daha sonra AzTU-nun “SmartTech” İnnovatorlar Mərkəzinin direktoru Azər Bayramov həyata keçirilən layihələr haqqında məlumat verib və gələcəkdə TEC ilə birgə əməkdaşlığın yaradacağı imkanlardan danışıb. AzTU-nun Kommunikasiya şöbəsinin müdiri Səfa Bağırov tələbələri TEC-in müxtəlif klublarında iştiraka dəvət edib. AzTU-nun Ömürboyu Öyrənmə Məktəbinin mühəndisi, fakültənin məzunu Azad Musayev tələbələrlə birgə həyata keçirilən layihələrin onların şəxsi və peşəkar inkişafında mühüm rol oynadığını bildirib, tələbələri bu layihələrdə aktiv iştiraka çağırıb. Sonda sosial məsələlər, ictimaiyyətlə əlaqələr və infrastruktur üzrə dekan müavini, fakültə TEC-in sədri Amin Məmmədov görüləcək işlər barədə təqdimatla çıxış edib. Sonda Xüsusi texnika və texnologiya fakültəsinin Tələbə Elmi Cəmiyyətinin şüarının “Qərarlılıqla Uğura” olduğunu qeyd olunub, tələbələr bu şüar ətrafında birgə fəaliyyətə dəvət olunub.

Kənd Təsərrüfatı Nazirliyinin Aqrar İnnovasiya Mərkəzi və Qarabağ Universitetinin birgə təşkilatçılığı ilə Xankəndi şəhərində “Dəqiq kənd təsərrüfatında süni intellektin tətbiqi” layihəsi çərçivəsində növbəti “bootcamp” keçirilib.  “Bootcamp”da Azərbaycan Texniki Universitetini (AzTU) İnformasiya texnologiyaları və telekommunikasiya fakültəsinin tələbəsi Nihad Əliyev və “SmartTech” İnnovatorlar Mərkəzinin direktoru Azər Bayramov təmsil edib. Məqsəd aqrar sahədə süni intellekt və rəqəmsal texnologiyaların tətbiqini təşviq etmək, gənclərin bu istiqamətdə bilik və bacarıqlarını artırmaq, azad edilmiş ərazilərin aqrar potensialı ilə yaxından tanış olmalarına şərait yaratmaq olub.Proqram çərçivəsində təşkil edilən infotur zamanı iştirakçılar Suqovuşan su anbarına səfər ediblər. Onlara bölgənin strateji su ehtiyatlarının idarə olunması, aqrar infrastrukturun bərpası prosesində rəqəmsal texnologiyaların rolu və sənaye müəssisələrinin kənd təsərrüfatı istehsalına inteqrasiyası barədə ətraflı məlumat təqdim olunub. İştirakçılar həmçinin aqrar sahədə müasir texnoloji həllərin tətbiqinin məhsuldarlığın artırılması, resursların səmərəli istifadəsi və ixrac imkanlarının genişlənməsi baxımından əhəmiyyətini yerində müşahidə ediblər."Bootcamp” iştirakçıları Xankəndi şəhərində Aqrar Biznes Festivalı və toxum sərgi-satış yarmarkasında da iştirak edib.

Azərbaycan Texniki Universitetinin (AzTU) Kitabxana İnformasiya Mərkəzinin (KİM) direktoru Xəyalə Hacıyeva və əməkdaşı Məhsəti Əliyeva COAR "Controlled Open Access Repositories" təşkilatnıdan gələn birgə fəaliyyət təklifi ilə Rəqəmsal Repozitariya sahəsində onlayn terminoloji lüğətin Azərbaycan dilinə tərcüməsini həyata keçiriblər. Qeyd edək ki, COAR dünyanın hər yerindən kitabxanaları, universitetləri, tədqiqat institutlarını təmsil edən 130-dan çox üzvü və tərəfdaşı olan beynəlxalq bir assosiasiyadır. COAR Açıq Əlyetərlilik potensialını artırmaq, hüquqi sənədləri inkişaf etdirmək, təcrübələri uyğunlaşdırmaq və repozitariyalar üçün qlobal səs kimi çıxış edərək repozitor şəbəkələri birləşdirir. Təşkilatın fəaliyyətlərindən biri də dünyada elm və təhsil sahəsində tendensiya sayılan və açıq elmə, açıq əlyetərliyə dəstək göstərən rəqəmsal repozitariyaların dünya dillərində tərcümə edilməsidir. Beləliklə, ilk dəfə olaraq Azərbaycan dilində terminologiyanı COAR-ın "Controlled Vocabulary of Open Access Repositories" adlı onlayn lüğətinə daxil etməyə məhz AzTU KİM əməkdaşları müvəffəq olub. 

Azərbaycan Texniki Universitetinin (AzTU) rektoru Vilayət Vəliyev Avstraliyanın Sidney şəhərində keçirilən 76-cı Beynəlxalq Astronavtika Konqresində iştirak edən tələbələr Rəsul İbrahimli, Hüseyn Hüseynov, Amil Cəmilov, Sahib İskəndərli, Əli Həsənli, Seymur Şıxalızadə və İlahə Kərimova ilə görüşüb. Görüşdə AzTU "SABAH" qruplarının rəhbəri Aytən Sadıqova da iştirak edib. Qeyd olunub ki, tələbələr konqresdə elmi məqalələrlə çıxış ediblər. Müxtəlif ölkələrdən olan alimlər və sənaye nümayəndələri AzTU tələbələrinin təqdimatlarını yüksək qiymətləndirib. Bu tədbir AzTU tələbələrinin beynəlxalq elmi ictimaiyyətlə təmaslarını genişləndirmək, kosmik tədqiqatlar və astronavtika sahəsində müasir elmi nailiyyətlərlə tanış olmaq, həmçinin universitetin elmi potensialını qlobal miqyasda nümayiş etdirmək imkanı yaradıb. Rektor tələbələrə gələcək elmi fəaliyyətlərində uğurlar arzulayıb.

Azərbaycan Texniki Universitetinin (AzTU) Radiotexnika və telekommunikasiya kafedrasının müdiri professor Mehman Həsənov və Mühəndis riyaziyyatı və süni intellekt kafedrasının müdiri dosent Atif Namazov Dövlət Təhlükəsizliyi Xidməti (DTX) və Xüsusi Rabitə və İnformasiya Təhlükəsizliyi Dövlət Xidmətinin (XRİTDX) təşkilatçılığı, Azərbaycan Kibertəhlükəsizlik Təşkilatları Assosiasiyasının (AKTA) tərəfdaşlığı ilə keçirilən “CIDC 2025 – Critical Infrastructure Defence Challenge” kibertəhlükəsizlik festivalında iştirak edib. Festivalın əsas məqsədi kritik infrastrukturun müdafiəsi, informasiya təhlükəsizliyi, rəqəmsal sabitlik və süni intellektin tətbiqi sahəsində qabaqcıl beynəlxalq təcrübələrin paylaşılması, həmçinin dövlət və özəl sektorlar arasında əməkdaşlığın gücləndirilməsi olub.

Azərbaycan Texniki Universitetinin (AzTU) Xüsusi texnika və texnologiya fakültəsinin IV kurs tələbələri Fizika İnstitutunun “Nazik təbəqəli quruluşlar” laboratoriyasında Nanotexnologiyalar fənnindən praktiki məşğələ keçiblər. Məşğələ Xüsusi texnologiyalar və avadanlıqlar kafedrasının assistenti Elnur Bağıyev tərəfindən aparılıb. Tələbələr laboratoriyanın müasir avadanlıqları ilə tanış olub, “Angstrom” qurğusunda müxtəlif üsullarla nanometr ölçülü təbəqələrin alınması prosesini müşahidə ediblər. Məşğələdə həmçinin fakültənin sosial məsələlər, ictimaiyyətlə əlaqələr və infrastruktur üzrə dekan müavini Amin Mamedov da iştirak edib. Qeyd edək ki, bu cür praktiki məşğələlərin gələcəkdə də davam etdirilməsi nəzərdə tutulur.

"Times Higher Education" (THE) beynəlxalq reytinq agentliyinin 2026-ci il üzrə açıqladığı nəticələrə əsasən, Azərbaycan Texniki Universiteti (AzTU) dünyanın aparıcı ali təhsil müəssisələri arasında 1501+ pillədə yer alıb. Bu göstərici AzTU-nun elmi-tədqiqat potensialının, tədris keyfiyyətinin və beynəlxalq nüfuzunun artdığını bir daha təsdiqləyir. AzTU-nun reytinqdə yer alması universitetin beynəlxalq akademik müstəvidə tanınması və qlobal təhsil standartlarına uyğun fəaliyyət göstərməsi baxımından böyük əhəmiyyət kəsb edir. Belə ki, son illər universitet elmi-tədqiqat infrastrukturunu gücləndirib, beynəlxalq layihələrdə və proqramlarda aktiv iştirak edib, həmçinin tədris prosesində innovativ metodları tətbiq edərək tələbələrin bilik və bacarıqlarını artırıb. Bu nailiyyət universitetin elmi fəaliyyətlərinin geniş auditoriyaya çatdırılması, beynəlxalq əməkdaşlıqların gücləndirilməsi və Azərbaycan ali təhsilinin qlobal səviyyədə tanınması baxımından vacibdir. AzTU-nun qlobal reytinqdə yer alması həm də universitetin rəqabət qabiliyyətini artırır, tələbə və müəllim heyətinin elmi-tədqiqat fəaliyyətinə stimul yaradır və ölkəmizin elmi potensialının beynəlxalq səviyyədə nümayiş etdirilməsinə şərait yaradır. Sözügedən uğur həmçinin universitetin gələcəkdə daha yüksək reytinq göstəricilərinə nail olmaq üçün atdığı strateji addımların uğurlu nəticəsini əks etdirir və AzTU-nun elmi və akademik fəaliyyət sahəsində davamlı inkişafını nümayiş etdirir.

Azərbaycan Texniki Universitetinin (AzTU) İnformasiya texnologiyaları və telekommunikasiya fakültəsinin tələbələrinə “Peerstack Academy” ilə bağlı məlumatlandırma sessiyası keçirilib. Fakültənin dekanı Leyla Məmmədova 2025–2026-cı tədris ilinin payız semestri üzrə keçiriləcək “Peerstack” proqramlaşdırma dərslərinin tələbələrin praktik təcrübəsi üçün əhəmiyyətindən danışıb. Layihə rəhbəri Camal Rzayev dərslərdə iştirak üçün qəbul və tədris prosesi, həmçinin mövcud “Full Stack”, “Front-End” və “Back-End” proqramlarının tədris üsulları, dərs saatları haqqında məlumat verib. Sonda tələbələrin sualları cavablandırılıb.

Azərbaycan Texniki Universitetinin (AzTU) elm və innovasiyalar üzrə prorektoru Sübhan Namazov və Tədqiqat və inkişaf departamentinin direktoru Bəxtiyar Bədəlov Pakistan Respublikasının paytaxtı İslamabad şəhərində yerləşən və beynəlxalq reytinqlərdə qabaqcıl mövqelərdə qərarlaşan universitetlərə işgüzar səfər ediblər. Səfərdə həmçinin Elm və Ali Təhsil üzrə Dövlət Agentliyinin əməkdaşı Jalə Kərimova da iştirak edib. Nümayəndə heyəti İslamabadda yerləşən Milli Elm və Texnologiya Universiteti (NUST), COMSATS Universiteti, Kompüter və İnkişaf edən Elmlər Universiteti (FAST), Bahria Universiteti və Air Universitetində rəsmi görüşlər keçirib. Səfər çərçivəsində qeyd olunan ali təhsil müəssisələri ilə əməkdaşlığın perspektiv istiqamətləri ətrafında geniş müzakirələr aparılıb. Görüşlərdə elmi-tədqiqat, birgə elmi nəşrlər, ortaq tədqiqat layihələri və qarşılıqlı tədqiqat platformalarının yaradılması barədə razılıqlar əldə olunub. Pakistanın ən qabaqcıl mühəndislik və innovasiyayönümlü ali məktəblərindən biri olan NUST-da keçirilən danışıqlarda birgə Mükəmməllik Mərkəzinin yaradılması, yüksək impakt faktorlu jurnallarda məqalələrin birgə dərc olunması, sertifikat proqramlarının təşkili və müəllim mübadiləsinin həyata keçirilməsi məsələləri müsbət qarşılanıb. COMSATS Universitetinin rektoru professor Sajid Qamar AzTU ilə əməkdaşlığa hazır olduqlarını bildirib. Nümayəndə heyəti ilə keçirilən görüşlərdə birgə elmi konfransların təşkili, beynəlxalq reytinqlərdə əməkdaşlığın gücləndirilməsi, yüksək indeksli elmi məqalələrin dərcində birgə fəaliyyət, eləcə də qısamüddətli qonaq professor mübadiləsi imkanları üzrə razılıq əldə olunub. FAST Universitetinin rektoru professor Aftab A. Maroof ilə keçirilən görüşdə anlaşma memorandumunun imzalanması, mövcud laboratoriya bazasından birgə istifadə, eləcə də doktorant və magistrantlara ikili elmi rəhbərlik məsələləri müsbət dəyərləndirilib. Bahria və Air universitetlərinin rəhbərlikləri ilə aparılan müzakirələrdə isə yaxın müddətdə anlaşma memorandumlarının imzalanması və tədqiqatçıların qarşılıqlı əlaqələndirilməsi barədə razılıq əldə olunub. Səfər zamanı nümayəndə heyəti universitetlərin maddi-texniki və laboratoriya imkanları ilə tanış olub, əməkdaşlığın real istiqamətlərini müəyyənləşdirib. Görüşlərin yekununda Pakistanın bir sıra ali təhsil müəssisələri ilə qarşılıqlı anlaşma memorandumlarının imzalanması və geniş elmi, innovativ və akademik əməkdaşlığın inkişaf etdirilməsi barədə razılıq əldə edilib.