AzTU rektoru Vilayət Vəliyev və beynəlxalq əlaqələr üzrə prorektor Fariz Məmmədov Pakistana səfər çərçivəsində Milli Elm və Texnologiya Universitetinin (NUST) Beynəlxalq Biznes Məktəbinin binasında yerləşən Heydər Əliyev adına auditoriyada olublar. Məktəbin müdiri Nauxez Sarvar auditoriyanın açılışı haqqında məlumat verərək Ulu Öndərin fəaliyyətinin Azərbaycanla yanaşı Pakistan üçün də dəyərli olduğunu qeyd edib. Bildirib ki, bu auditoriyanın açılışı Azərbaycan və Pakistan xalqlarının qardaşlığının rəmzi olmaqla bərabər ölkələrimiz arasında təhsil sahəsində əməkdaşlığın inkişaf etdirilməsinin simvoludur. 200 nəfərdən çox tutumu olan amfiteatr tipli, yüksək təqdimat və müzakirə imkanı olan bu təhsil mərkəzi müxtəlif səviyyəli elmi müzakirələr, konfranslar və tədqiqat disskusiyaları aparmaq üçün ideal məkan hesab olunur. Auditoriyanın mütəmadi olaraq elmi tədbirlərin keçirilmə mərkəzi olması ulu öndər Heydər Əliyevin elmə verdiyi töhfə və qoyduğu irsin ölkəmizin hüdudlarından kənarda, xüsusilə Pakistanda hər zaman yad edilməsinin və elm-təhsilə göstərdiyi xüsusi diqqətinin göstəricisidir. Ulu öndər Heydər Əliyevin adını daşıyan auditoriyanın hər zaman elmi müzakirələrin mərkəzində olması, Azərbaycan və Pakistan elmi məktəblərinə və elmi əməkdaşlığına verdiyi töhfəni diqqətdə saxlamaq üçün əhatəli iş planının hazırlanması razılaşdırılıb.

Azərbaycan Texniki Universitetinin (AzTU) təşkilatçılığı və DAAD-nin (Alman Akademik Mübadilə Xidməti) “Şərqə Get” proqramı çərçivəsində “Multikultural Şəraitlərdə Mühəndislik Bacarıqlarının İnkişafı” adlı “yay məktəbi” öz işinə başlayıb. “Yay məktəbi” AzTU-nun ev sahibliyi ilə 14 sentyabra kimi davam edəcək. İki həftəlik xüsusi proqram mühəndislik sahəsində biliklərini genişləndirmək və real iş şəraitində praktiki bacarıqlar əldə etmək üçün Azərbaycan və Almaniyadan 18 tələbəni bir araya gətirib. “Yay məktəbi”nə Almaniyanın müxtəlif universitetlərindən 8, AzTU-dan isə 10 tələbə qatılıb. Tələbələr iki həftə ərzində müxtəlif seminarlarda iştirak edəcək, AzTU-nun müasir texnologiyalarla təchiz olunmuş MGP Emalatxana - 3D Printer Mərkəzində 3D (Layihələndir, Düzəlt və İşlət) iş prinsi əsasında müxtəlif layihələr üzərində komanda şəklində işləyəcəklər. “Yay məktəbi”nin fəaliyyəti çərçivəsində tələbələr üçün peşəkar təlimçilərin iştirakı ilə müxtəlif mövzularda təlimlər, Azərbaycanı daha yaxından tanımaq üçün səfərlər və mədəni turlar təşkil ediləcək.  Bu proqram tələbələrə mültikultural mühitlərdə ilk iş təcrübələrini formalaşdırmaqla yanaşı, yeni perspektivlər qazanmaq və beynəlxalq dostluqlar qurmaq üçün fürsət təqdim edir.

26-26 avqust  2024-cü ildə Niderland Krallığının paytaxtı Amsterdam şəhərində İn­for­ma­­siya Texnologiyaları, Robototexnika, Dizayn, Mühəndislik və Tətbiqi Elmdə Yeni Trendlər üzrə 6-cı Beynəlxalq Konfransı  (6th International Conference on Emerging Trends in Information Technology, Robotics , Design, Engineering and Applied Scien­ce (ETITR-AUG-2024)) keçirilib. Bu konfrans tədqiqatçılara yeni ideyalar və tətbiq təcrübələri mübadiləsi, biz­nes və ya tədqiqat əlaqələri qurmaq və gələcək əməkdaşlıq üçün qlobal tərəfdaşlar tap­maq imkanı verir. Bu ümumi platformanın cəmiyyətə daha yaxşı xidmət etmək üçün müxtəlif sahələr arasında birgə sahibkarlıq fəaliyyətinə zəmin yaradacağı göz­lə­nilir. Maşınqayırma texnologiyası kafedrasının doktorantı Samir Əmirli 26 avqust 2024-cü ildə Amster­dam şəhərində bu konfransda “S.Simon, N.Yusubov, S.Amirli, F.Ami­rov.  Hidroabrazivlə HARDOX-500 markalı poladın kəsilməsində kələ-kötür­lüyün tədqiqi üçün tam faktorlu eksperimentlərin planlaşdırılması (“Planning of full Factorial Experiments For The Investigation Of Roughness In Hydroabrasive Waterjet Cutting of HARDOX-500 Steel”)” adlı məruzə ilə çıxış edib. Məruzə maraqla qarşılanıb və seçilmiş konfrans məqaləsi kimi çap üçün Scopus xülasələn­dir­mə və indeksləmə sisteminə düşən jurnalda çap üçün tövsiyə olunub. Qeyd edək ki, dərc ediləcək konfrans materiallar eyni zamanda xülsələndirmək və indeksləşdirmək üçün ISI Thomson Reuters Web of Science-a təqdim olunacaq.

AzTU rektoru Vilayət Vəliyev və beynəlxalq əlaqələr üzrə prorektor Fariz Məmmədov Pakistana səfər çərçivəsində beynəlxalq reytinq sistemlərində Pakistan üzrə birinci yerdə olan Quiad-i-Azam Universitetinin (QAU) rektoru Niyaz Əhməd Axtar və yüksək reytinqli tədqiqatçıları ilə görüşüblər. Tədqiqat universiteti kimi təsis olunmuş Quiad-i-Azam Universiteti və AzTU arasında görüşün əsas hədəfi sənaye əhəmiyyətli birgə keyfiyyətli tədqiqatlar aparılmaqla peşəkar tədqiqatçılar arasında mübadilə, magistrant və doktorant tələbələrə birgə rəhbərlik, eləcə də birgə layihələrin həyata keçirilməsi olub. Görüş çərçivəsində tədris, tədqiqat və innovasiyalar istiqamətində razılaşdırılmış birgə əməkdaşlıq məsələləri üzrə Anlaşma Memorandumu imzalanıb.

AzTU rektoru Vilayət Vəliyev və beynəlxalq əlaqələr üzrə prorektor Fariz Məmmədov 26-28 avqust tarixlərində Pakistana səfər çərçivəsində Pakistanın Milli Elm və Texnologiya Universitetinin (NUST) rektoru Cavid Mahmud Buxari və universitet rəhbərliyi, eləcə də bu ali təhsil müəssisəsinin digər akademik, tədqiqat və innovasiya strukturlarında görüşlər keçirib. Görüşlərdə NUST və AzTU-nun son illər inkişaf edən əməkdaşlıqları nəticəsində davamlı sənayeni dəstəkləyən tədris, tədqiqat və yeni texnologiyaların inkişafını diqqətdə saxlayan birgə fəaliyyət planının layihəsini hazırlayaraq ilkin müzakirəsini keçiriblər. İki ölkənin maraqları baxımından birgə müəllim və tələbə mübadiləsi üzrə akademik proqramlar, birgə tədqiqat layihələri, innovativ texnologiyaların və sahibkarlığın inkişafına dəstək sahələrini əhatə edən birgə fəaliyyət planının ilin sonuna kimi təsdiq edilməsi və fəaliyyətə başlanılması qərara alınıb. Görüşlərdə iki universitetin inkişafını dəstəkləyən digər mühüm məsələlər də müzakirə edilərək razılaşdırılıb.

Azərbaycan Texniki Universitetinin (AzTU) Dayanıqlı İnkişaf İnstitutunun əməkdaşı İqor Nasirovun "Azərbaycanın Dünyanın Yaşıl Gələcəyinə Artan Töhfəsi” (Growing Contribution of Azerbaijan to Earth’s Green Future) adlı növbəti master-klassı onlayn formatda təşkil edilib. “Yaşıl Maliyyə” (Green Finance) adlanan dördüncü hissə emissiyaların azaldılması, biomüxtəlifliyin qorunması və s. kimi ətraf mühitin qorunması məqsədilə sahibkarlıq layihələrinin ekoloji məqsədlər üçün maliyyələşdirilməsi prorsesinə həsr edilib. Tədbirin əsas məqsədlərindən biri COP29-un müxtəlif aspektlərini və onun qlobal iqlim gündəliyinə uyğunluğunu araşdırmaq üçün elmi tədqiqatçıların, professor-müəllim heyətinin, tələbələrin diqqətinə çatdırmaq olub. Tədbirdə qlobal tendensiyalar və təcrübələr, Azərbaycanın yaşıl dünyaya verəcəyi töhfələr, COP29-da Azərbaycanda icra olunacaq layihələr, “yaşıl gələcəyə” verəcəyi töhfə haqqında bacarıqlarını inkişaf etdirmək istiqamətində geniş müzakirələr aparılıb. Tədbirdə xüsusi qonaq olaraq Asiya İnkişaf Bankı İnstitutunun (ADBI) baş elmi işçisi Dina Azhgaliyeva öz məruzəsi ilə çıxış edib.

Dövlət İmtahan Mərkəzi tərəfindən aparılan qəbul zamanı 2024-2025-ci tədris ili üzrə 2585 nəfər Azərbaycan Texniki Universitetində (AzTU) bakalavriat səviyyəsində texniki və texnoloji, eyni zamanda iqtisadiyyat və idarəetmə ixtisaslar qrupu üzrə təhsil almaq hüququ qazanıb. Onlardan 2072 nəfəri müsabiqə yolu ilə, 513 nəfər müsabiqədənkənar qəbul nəticəsində tələbə adı qazanıblar. Beynəlxalq və respublika fənn olimpiadalarının, beynəlxalq müsabiqələrin və yarışların siyahısı və onların qaliblərinin ali təhsil müəssisələrinə müsabiqədənkənar qəbulu aparıldığına görə, Riyaziyyat fənni üzrə Respublika fənn olimpiadasının qalibi Atayev Fuad Ramil oğlu qəbul imtahanlarında iştirak etmədən AzTU-da təhsil almağa başlayıb. Əlavə olaraq 512 nəfər subbakalavr müxtəlif ixtisaslar üzrə alternativ qəbul formasının üstünlüklərindən yararlanıb. Bu tələbələrin ixtisaslar üzrə proporsiyası aşağıdakı kimidir: -116178 Kompüter elmləri (tədris ingilis dilində) – 1 nəfər; -116218 Cihaz mühəndisliyi – 9 nəfər; -116242 Elektrik və elektronika mühəndisliyi – 37 nəfər; -116259 Energetika mühəndisliyi – 80 nəfər; -116267 Həyat fəaliyyətinin təhlükəsizliyi mühəndisliyi – 3 nəfər; -116275 İnformasiya təhlükəsizliyi – 8 nəfər; -116348 Kimya mühəndisliyi – 6 nəfər; -116389 Logistika və nəqliyyat texnologiyaları mühəndisliyi – 9 nəfər; -116397 Maşın mühəndisliyi – 28 nəfər; -116412 Materiallar mühəndisliyi – 27 nəfər; -116429 Mədən mühəndisliyi – 20 nəfər; -116437 Metallurgiya mühəndisliyi – 11 nəfər; -116445 Mexanika mühəndisliyi – 10 nəfər; -116478 Nəqliyyat mühəndisliyi – 106 nəfər; -116494 Qida mühəndisliyi – 20 nəfər; -116526 Radiotexnika və telekommunikasiya mühəndisliyi – 90 nəfər; -116534 Sənaye mühəndisliyi – 4 nəfər; -116559 Beynəlxalq ticarət və logistika – 7 nəfər; -116615 İqtisadiyyat – 10 nəfər; -116689 Menecment – 10 nəfər; -116712 Statistika – 17 nəfər.

Pakistan İslam Respublikasının İslamabad şəhərində bu ölkənin Milli Elm və Texnologiya Universitetinin və (METU) Azərbaycan Texniki Universitetinin (AzTU) birgə təşkilatçılığı ilə “İnnovativ və Yaradıcı Həllərin Tapılması (FICS)” adlı beynəlxalq müsabiqənin yekun mərhələsi keçirilib. FICS Pakistan İslam Respublikasında 2013-cü ildən etibarən hər il keçirilən ən böyük startap müsabiqəsidir. Müsabiqədə təqdim olunan bütün layihələrin Dayanıqlı İnkişaf Məqsədlərinə uyğun olmasına diqqət yetirilir. Tədbirdə çıxış edən AzTU-nun rektoru professor Vilayət Vəliyev müsabiqənin qlobal çağırışlarla bağlı innovativ həllərin yaradılmasındakı rolu barədə danışıb. Rektor müsabiqədə Azərbaycan, Türkiyə və Pakistan universitetlərinin komandalarının iştirakının üç qardaş ölkənin əməkdaşlığının bariz nümunəsi olduğunu diqqətə çatdırıb. Qeyd edək ki, beynəlxalq müsabiqənin qalibi Azərbaycan Dövlət Neft və Sənaye Universitetinin komandası seçilib. AzTU komandası isə “sosialyönümlü ən innovativ ideya” nominasiyasının qalibi olub.

Azərbaycan Təhsil İşçiləri Azad Həmkarlar İttifaqı Respublika Komitəsinin sədri Araz Paşayev ali təhsil müəssisələrində fəaliyyət göstərən tələbə həmkarlar ittifaqı komitələrinin sədrləri ilə görüş keçirib. Görüş bu ilin  sentyabr ayında Xaçmaz rayonunun Nabran qəsəbəsində yerləşən “Təhsil” İstirahət Mərkəzində keçiriləcək “Sağlam insan və dayanıqlı gələcək” mövzusunda konfransa hazırlıq məqsədilə təşkil olunub.  Görüşdə AzTU THİK sədri Mirməhəmməd Ələkbərli iştirak edib.    Gənclər siyasətinin ATİAHİ-nin əsas fəaliyyət istiqamətlərindən biri olduğunu qeyd edən A.Paşayev bildirib ki, bu istiqamətdə fəaliyyət bundan sonra da davam etdiriləcək, təşkilat gənclərin asudə vaxtlarının səmərəli təşkili, onların sağlam ruhda tərbiyə olunması, müasir düşüncə tərzinə malik layiqli vətəndaşlar kimi yetişməsi ilə bağlı müxtəlif layihələr reallaşdıracaq. O bildirib ki, “Sağlam insan və dayanıqlı gələcək” mövzusunda keçiriləcək konfrans da bu tədbirlərdən biri olacaq.  Sonra tədbir diskussiya şəklində davam etdirilib, THİK sədrlərinin təklifləri dinlənilib.  A.Paşayev konfransın yüksək səviyyədə təşkil edilməsi ilə bağlı müvafiq tövsiyələrini verib. 

Azərbaycan Texniki Universitetinin (AzTU) Elektrotexnika kafedrasının baş müəllimi Əmiraslan Manafov uzunsürən xəstəlikdən sonra vəfat edib. Əmiraslan Manafov 1995-2007-ci illərdə AzTU-nun Elektrik enerji təchizatı və izolyasiya kafedrasında tədris ustası vəzifəsində çalışıb. 2015-ci ildən fəaliyyətini Elektrotexnika kafedrasında baş müəllim vəzifəsində davam etdirib.   AzTU-nun rəhbərliyi və kollektivi Əmiraslan Manafovun vəfatından kədərlənir, ailəsinə və yaxınlarına başsağlığı verir. Allah rəhmət eləsin!