Azərbaycan Texniki Universitetində (AzTU) gənclərin karyera planlamasına dəstək göstərilməsi və onların şəbəkələşməsini təmin etmək məqsədilə “İT sahəsində karyera planlaması və müasir dünyada süni intellektin rolu” mövzusunda panel müzakirə keçirilib.  Tədbirin açılışında Gənclərin İnkişaf və Karyera Mərkəzinin nümayəndəsi Mətanət Xəlilova, Azərbaycan Tələbə Gənclər Təşkilatları İttifaqının nümayəndəsi Bəxtiyar Quluzadə, AzTU-nun Karyera və Məşğulluq Mərkəzinin müdiri Ülviyyə Rəsulova və universitetin TGT sədri Ruslan Qənbərov çıxış edərək gənclər üçün karyera quruculuğu istiqamətində keçirilən layihənin faydasından söz açıblar.  Daha sonra “İT sahəsində karyera planlaması və müasir dünyada süni intellektin rolu” mövzusunda panel müzakirələr keçirilib.  150-dən çox gənci əhatə edən panel müzakirədə “Müasir dünyada İT, bazardakı iş imkanları və reallıqlar; Beynəlxalq şirkətlərdə İT”, “Universitet illərindən sonra İT mütəxəssisin ilk 5 ildəki hədəfləri”, “İnformasiya təhlükəsizliyi və kibertəhlükəsizlik”, “Gənclərin universitet illəri üçün İT karyerası”, “Müasir dünyada süni intellekt rolu, istiqamət-karyera seçimləri” mövzuları ətrafında bir sıra önəmli fikirlər səsləndirilib. Daha sonra gənclərin sualları cavablandırılıb.

Azərbaycan Respublikası Xüsusi Rabitə və İnformasiya Təhlükəsizliyi Dövlət Xidməti ilə Azərbaycan Texniki Universiteti (AzTU) arasında imzalanmış əməkdaşlıq haqqında memorandumda nəzərdə tutulmuş tədbirlər çərçivəsində universitetin tələbələri üçün növbəti ustad dərsi keçirilib. Xüsusi Rabitə və İnformasiya Təhlükəsizliyi Dövlət Xidmətinin əməkdaşları Murad Balayev və Əli Babayev tələbələrə “İnformasiya ekosistemində kibertəhlükəsizlik əməliyyatları və alətləri” mövzusunda nəzəri və "Kiberinsidentlərin monitorinqi, təhlili və cavablandırılması" mövzusunda praktiki təlim keçiblər. Məruzəçilər təhlükəsizlik əməliyyatları mərkəzləri, onların strukturu, modeli və fəaliyyəti istiqamətində, həmçinin kibermüdafiə məqsədilə istifadə olunan məhsullar barədə məlumat verib, daha sonra bir neçə hücum vektorlarını ehtiva edən real nümunələr üzərindən baş vermiş insidentlərin düzgün təhlili və cavablandırılması qaydalarını əks etdirən praktiki laboratoriya işləri nümayiş etdiriblər. Sonda tələbələrin sualları cavablandırılıb və onlara tövsiyələr verilib.

Mayın 14-də Təhsilin İnkişafı Fondunun təşkilatçılığı, Elm və Təhsil Nazirliyinin dəstəyi və “Lenovo Global Technology Azerbaijan” MMC-nin tərəfdaşlığı ilə ümummilli lider Heydər Əliyevin anadan olmasının 101-ci ildönümünə həsr olunmuş “Təhsilin inkişafında innovativ metodlar II” müsabiqəsinin qaliblərinin mükafatlandırılması mərasimi keçirilib. Tədbirdə Elm və Təhsil Nazirliyinin nümayəndələri, ali təhsil müəssisələrinin rəhbər şəxsləri, özəl və dövlət qurumlarının nümayəndələri və tələbələr iştirak ediblər. Açılış nitqi ilə çıxış edən Azərbaycan Texniki Universitetinin (AzTU) rektoru Vilayət Vəliyev qonaqları salamlayıb və Təhsilin İnkişafı Fondunun təşəbbüsü ilə keçirilən müsabiqəni tələbələrin potensialının qiymətləndirilməsi istiqamətində təqdirəlayiq addım hesab edib. Çıxış edən Təhsilin İnkişafı Fondunun İdarə Heyətinin sədri Elnur Nəsibov “Təhsilin inkişafında innovativ metodlar” müsabiqəsinin keçirilməsində əsas məqsədin Ulu Öndərin elmə, təhsilə və gənclərə qayğısını rəhbər tutaraq, tələbələrin təhsilin inkişafına töhfə verəcək ideyalarının dəstəklənməsi olduğunu qeyd edib. Finalçılar ideyalarını tədbir iştirakçılarına təqdim etdikdən sonra 7 komanda və tələbə müsabiqənin final mərhələsində iştirakına görə Azərbaycan Texniki Universitetinin rektoru Vilayət Vəliyev tərəfindən təltif ediliblər. Tələbələr Bakı Dövlət Universitetinin tələbəsi Kəmalə Məmmədova, Bakı Mühəndislik Universitetinin tələbələri Murad İbrahimov və Ayxan Ələkbərov, Azərbaycan Dövlət Neft və Sənaye Universitetinin tələbəsi Kamran Murtuzov, Dövlət Gömrük Komitəsinin Akademiyasının tələbəsi Aysel Məmmədova, Bakı Ali Neft Məktəbinin tələbələri Aydan Eyvazova, Fidan Ağakişiyeva, Nübar Həsənquliyeva, Rəvan Xıdırov, Tamerlan Ağayev, Əkbər Bünyadzadə, Leyla Quliyeva, İranə Hüseynzadə və Çingiz Məmmədovdur. Tədbir 4 nömrəli Uşaq-Gənclər İnkişaf Mərkəzinin şagirdlərinin xor və rəqs nömrəsi ilə davam edib. Daha sonra 1-ci, 2-ci və 3-cü yerlərin qalibləri açıqlanıb, onlara mükafatlar təqdim olunub. Tədbirin yekununda müsabiqənin həlledici mərhələsində böyük rolu olan münsiflər heyətinin üzvləri Təhsilin İnkişafı Fondu tərəfindən mükafatlandırılıbar.

Azərbaycan Texniki Universitetinin (AzTU) tələbələri üçün Alman Akademik Mübadilə Xidmətinin (DAAD) təqaüd proqramları haqqında növbəti məlumatlandırma sessiyası keçirilib.  Tədbirdə Alman mühəndislik fakültəsinin dekanı Ərəstun Məmmədov DAAD-nin uzunmüddətli əməkdaşlığından, təqaüd proqramlarının mühəndislik ixtisasları üzrə yaratdığı imkanlardan danışıb.  Daha sonra AzTU-da fəaliyyət göstərən DAAD-nin alman dili müəllimi Klaudio Kasperl Almaniyada təhsil, DAAD-nin fəaliyyəti və təqaüd proqramları, müraciət şərtləri, tələb olunan sənədlər toplusu və seçim meyarları haqqında tələbələrə ətraflı məlumat verib. DAAD-nin bakalavr tələbələri üçün təşkil etdiyi yay məktəbləri və onlara müraciət qaydaları da ətraflı izah olunub.      Tədbirin sonunda iştirakçıların sualları cavablandırılıb.

Azərbaycan Texniki Universitetinin (AzTU) Maşınqayırma və robototexnika fakültəsinin məzunu, Vətən müharibəsində şəhidlik zirvəsinə yüksələn Rəşad Zeynallıya həsr olunan “Rəşadətli ömür” filminin təqdimatı olub. Tədbirdə şəhid Rəşad Zeynallının ailə üzvləri, yaxınları, şəhid ailələri, qazilər, universitetin nümayəndələri iştirak ediblər. Əvvəlcə torpaqlarımızın ərazi bütövlüyü və suverenliyi uğrunda canlarından keçən Vətən övladlarının xatirəsi bir dəqiqəlik sükutla yad olunub, Azərbaycanın Dövlət Himni səsələndirilib. Daha sonra “Rəşadətli ömür” filmi nümayiş olunub. Filmdə Rəşad Zeynallının keçdiyi ömür yolunun mərhələləri, onunla bağlı xatirələr əks olunub. Şəhidin yaxınları və dostlarının onun haqqında fikirləri də filmdə yer alıb. Təqdimat mərasimində çıxış edən filmin yaradıcı heyəti bir neçə aya ərsəyə gələn ekran əsəri haqqında qürurla danışıblar. Rəşad Zeynallının valideynləri və yaxınları şəhidin xatirəsinə göstərilən hörmət və ehtirama görə təşəkkürlərini bildiriblər. Tədbir Rəşad Zeynallının təhsil aldığı orta məktəbin şagirdlərinin ifasında qəhrəmanlıq mövzusunda mahnı və şeirlərlə davam edib.

Ulu öndər Heydər Əliyevin anadan olmasının 101 illiyi münasibətilə Azərbaycan Texniki Universitetinin (AzTU) və Milli Aviasiya Akademiyasının (MAA) tələbələrinin birgə hazırladığı müdafiə təyinatlı pilotsuz uçuş aparatının (PUA) ilk uçuşu həyata keçirilib. Tədbirdə AzTU-nun rektoru Vilayət Vəliyev, MAA-nın birinci prorektoru Ədalət Səmədov, Türk Aviasiya ve Kosmik Sənayesi Şirkətinin (TUSAŞ) MGP Academy başkanı Ahmet Pinarbaşı, TUSAŞ MGP Akademi müdiri Sərhat Gül, TUSAŞ MGP layihə koordinatoru Görkəm Şimsek, TUSAŞ-dan təlimçi-mühəndis Sabri Orçun, TUSAŞ PUA pilotları Okan Çindemir, Muhammed Furkan Bahat iştirak edib. Qeyd edək ki, sözügedən PUA AzTU, TUSAŞ və MAA-nın birgə əməkdaşlığı çərçivəsində həyata keçirilən "AzTU-Turkish Aerospace, MGP 2023.1" yüksək ixtisaslı mühəndis hazırlığı təlim proqramı nəticəsində ərsəyə gəlib. PUA-nın koordinat məlumatları GPS sistemi vasitəsilə yer stansiyasına göndərilir. Məsələn: Düşmən və dost təyinatı məqsədilə əsgərlərin geyindiyi formalar (beretlər) rənglərə görə fərqlənməlidir. Göy rəngli beret dost ünsürünü bildirir, burada düşmən digər rəngdə geyimə görə müəyyən edilir. Missiya 50 metr hündürlükdə 10 dəqiqə sabit uçuş zamanı həyata keçirilir. Prosesin ümumi davametmə müddəti 14 dəqiqədir. Tapşırıq zamanı düşmən koordinatları proqram vasitəsilə avtomatik hesablanır, ümumi əsas məlumatlar analiz olunaraq Yer İdarəetmə Stansiyasına ötürülür. Uçuş Yer Stansiya İnterfeysində (GUI-də) göstərilən məlumatlara PUA-nın istiqamətinə nəzarət etməklə həyata keçirilir. PUA-nın uçuşunun izlənilmə mərasimindən sonra layihənin bağlanış tədbiri keçirilib. Əvvəlcə tədbir iştirakçıları AzTU-nun foyesində ümummilli lider Heydər Əliyevin büstü önünə güllər düzüb, xatirəsinə ehtiramlarını bildiriblər. Daha sonra Ulu Öndərin və torpaqlarımızın ərazi bütövlüyü və suverenliyi uğrunda canlarından keçən Vətən övladlarının xatirəsi bir dəqiqəlik sükutla yad olunub. Azərbaycanın və Türkiyənin dövlət himnləri səsləndirilib. Tədbirdə çıxış edən AzTU-nun rektoru Vilayət Vəliyev, MAA-nın birinci prorektoru Ədalət Səmədov, TUSAŞ MGP Academy başkanı Ahmet Pinarbaşı, Ömürboyu Öyrənmə Məktəbinin direktoru Aynurə İsmayılova və digərləri layihədə zəhməti olan hər kəsi təbrik ediblər. Qeyd olunub ki, layihə iştirakçıları 8 ay ərzində TUSAŞ mütəxəssislərinin təlimlərində iştirak edərək Mühəndis Gelişdirmə Proqramını (MGP) uğurla başa vurublar. Proqrama hər iki ali təhsil müəssisəsinin iqtisadiyyat üzrə ixtisaslar istisna olmaqla, digər bütün mühəndislik fakültələrində təhsil alan (aerokosmik mühəndislik, informasiya texnologiyaları, mexatronika, maşın mühəndisliyi, elektrik-elektronika, xəbərləşmə (radioelektronika), metallurgiya və s.) tələblər cəlb edilib. Layihədə ümumilikdə 43 nəfər (tələbə, doktorant, gənc müəllim) iştirak edib. Qeyd edilən ixtisaslarda təhsil alan bütün təlbələr layihə əsaslı və açıq rəqabətli öyrənmə-öyrətmə modelinə söykənən bu təlim proqramına ingilis dili və qabiliyyət testləri ilə yanaşı, müsahibə mərhələsindən keçməklə qəbul edilib. Ümumilikdə təlim proqramı 4 mərəhlədən ibarət olmaqla ideyadan ilk uçuşa qədər olan pilotsuz uçuş aparatının layihələndirilməsi və istehsalı məqsədilə təşkil edilib. (Nəzəri hissə 3 həftə, praktiki əsaslar 5 həftə, istehsal 4 həftə, test (uçuş) 4 həftə) PUA-nın bütün detalları layihə çərçivəsində AzTU-da yaradılan xüsusi emalatxanada hazırlanıb. Qeyd edək ki, proqramda iştirak edən 4 tələbə “Bayraktar Texnologiya Azərbaycan" şirkətindən iş təklifi alıb və hazırda Türkiyədə təlimlərdə iştirak edir.

Ali təhsil müəssisələrinin tələbələri arasında voleybol üzrə növbəti ölkə çempionatı başa çatıb. Turnirdə 15 komanda iştirak edib. Gərgin idman mübarizəsi şəraitində keçən turnirin final mərhələsində Azərbaycan Texniki Universitetinin (AzTU) komandası ikinci yerə layiq görülüb.

Azərbaycan dövlətinin memarı və qurucusu, dünya şöhrətli siyasi xadim, Heydər Əliyevin anadan olmasının 101 illiyi ilə əlaqədar Azərbaycan Texniki Universitetinin (AzTU) rəhbərliyi və kollektivi Fəxri xiyabanda Ulu Öndər Heydər Əliyevin məzarı önünə gül dəstələri düzüblər, xatirəsini ehtiramla yad ediblər.

Dövlət İmtahan Mərkəzinin keçirdiyi buraxılış imtahanlarında yüksək nəticə göstərən abituriyentlər və onların validieyinləri Azərbaycan Texniki Universitetində (AzTU) olublar. Qonaqlar əvvəlcə AzTU-nun ərazisində təşkil edilən infoturda iştirak ediblər. Daha sonra keçirilən görüşdə AzTU-da həyata keçirilən yeniliklər barədə abituriyentlərə məlumat verilib və videoçarx nümayiş olunub. Videoçarxda universitetin tarixi, fakültələr, ixtisaslar, beynəlxalq əlaqələr, ikili diplom proqramları, laboratoriyalar, karyera imkanları və digər vacib məlumatlar abituriyentlərin diqqətinə çatdırılıb.

Azərbaycan Texniki Universitetində (AzTU) “Yaşıl dünya naminə həmrəylik ili” çərçivəsində “İnnovativ və yaradıcı həllərin tapılması” adlı beynəlxalq startap müsabiqəsinin ilkin mərhələsi keçirilib. AzTU və Pakistan İslam Respublikasının Milli Elm və Texnologiya Universitetinin (METU) birgə təşkilatçılığı ilə keçirilən müsabiqədə Azərbaycanın ümumilikdə 10 ali təhsil müəssisəsindən 22 komanda iştirak edib. Məqsəd universitetlərin müəllim və tələbələrinin innovativ ideyalarla qlobal problemlərin həllinə töhfə verilməsinə cəlb olunmasıdır. Tədbirin rəsmi hissəsində AzTU-nun rektoru Vilayət Vəliyev və METU-nun tədqiqat, innovasiya və kommersiyalaşdırma üzrə prorektoru Rizvan Riaz çıxış edərək qaliblərə uğurlar arzulayıblar. Qeyd olunub ki, müsabiqənin ilkin mərhələsinin qalibləri Pakistan İslam Respublikasının paytaxtı İslamabadda keçiriləcək final mərhələsinə vəsiqə qazanıblar. Daha sonra qaliblərin mükafanlandırılması olub. Qeyd edək ki, qaliblər sənaye və təhsil sahəsinin nümayəndələrindən ibarət münsiflər heyəti tərəfindən qiymətləndirilib. Tədbir AzTU tələbələrinin iştirakı ilə hazırlanan bədii hissə ilə davam edib.