Alman Akademik Mübadilə Xidmətinin (DAAD) Tbilisi Regional Ofisinin Cənubi Qafqaz ölkələrindən olan DAAD Alumni/Səfirləri üçün Gürcüstanın Tsinandali şəhərində regional görüşü təşkil edilib. Tədbirdə AzTU-nun elm və innovasiyalar üzrə prorektoru prof. Sübhan Namazov, Maşınqayırma texnologiyası kafedrasının müdiri prof. Nizami Yusubov və Alman mühəndislik fakültəsinin dekanı dos. Ərəstun Məmmədov iştirak edib. Tədbir ali təhsilin beynəlmiləlləşdirilməsi üçün Almaniya və Cənubi Qafqaz ölkələrinin ali təhsil müəssisələri arasında mövcud əlaqələrin gücləndirilməsi və yeni tərəfdaşlıq əlaqələrinin qurulmasına xidmət edən DAAD-nin institusional əməkdaşlıq proqramları ilə yaxından tanış olmaq, region universitetlərini maraqlandıran təhsil, tədqiqat və elm sahələrində mövcud çağırışlar, ali təhsilin inkişafı üçün vacib məsələləri müzakirə etmək məqsədilə təşkil edilib. Sözügedən məsələlər alman universitetlərinin Cənubi Qafqaz ölkələri universitetləri ilə mövcud və ya artıq yekunlaşdırılmış layihələri üzərindən praktiki misallara əsaslanan təqdimatlarla müzakirə olunub. Görüşdə həmçinin 2024-cü ilin oktyabrın 19-21-də Tbilisidə keçirilməsi planlaşdırılan DAAD Alumni/Məzunları üçün Cənubi Qafqaz regional tədbirinə hazırlıq, tədbirin yüksək səviyyədə təşkili üçün təkliflərin verilməsi ilə bağlı fikir mübadiləsi aparılıb. Bundan başqa, oktyabrda Tbilisidə keçiriləcək DAAD Alumni/Məzunları üçün Cənubi Qafqaz regional tədbirinə AzTU-nun əməkdaşlıq edəcəyi planlaşdırılan alman universitetlərindən nümayəndələrin cəlb edilməsi də təklif edilib.

Azərbaycan Texniki Universitetində (AzTU) “Texnest” çərçivəsində təşkil olunan təlimlərin mükafatlandırılma mərasimi keçirilib. AzTU SABAH qrupları, İnnovasiya və Rəqəmsal İnkişaf Agentliyi , “IT Brains Academy” və “Technest University”nin tərəfdaşlığı və dəstəyi ilə təşkil olunan təlimlər 3 ay davam edib. Tədbirdə AzTU-nun tədris işləri üzrə prorektoru Nurəli Yusifbəyli, Elm və Ali Təhsil üzrə Dövlət Agentliyinin SABAH qrupları layihəsi İcra  Komitəsinin rəhbəri Elza Səmədova, İnnovasiya və Rəqəmsal İnkişaf Agentliyinin departament rəhbəri Fatimə Ələkbərova, “IT  Brains Academy”nin təhsisçisi və rəhbəri Orxan Məmmədov çıxış edərək təlimlərin əhəmiyyətindən danışıblar. Sonda təlimləri uğurla bitirən tələbələrə sertifikat təqdim olunub.

Azərbaycan Texniki Universitetinin (AzTU) 6 tələbəsi və 1 akademik işçisinin qatıldığı təcrübə və tədqiqat proqramının ilk həftəsi uğurla tamamlanıb. Təcrübə proqramı Avropa Birliyinin maliyyələşdirdiyi “Erasmus+ KA2” proqramı üzrə həyata keçirilən “İnnovasiya və dayanıqlılıq prinsipləri ilə klasterlərin işlənməsinə başlamaqda və iştirakda universitetlərin potensialının artırılması” (UniClaD) layihəsi çərçivəsində həyata keçirilir. Proqram çərçivəsində tədqiqatçılar 28 gün ərzində Avstriyanın Vyana şəhərində yerləşən Aqrar və Ekoloji Pedaqogika Universitetində (HUAP) təcrübə və tədqiqat proqramında iştirak edəcəklər.   Proqramın ilk həftəsində iştirakçılar araşdırma yönümlü müxtəlif təlimlərdə iştirak ediblər. Həmçinin universitet nəzdində fəaliyyət göstərən kitabxananın zəngin kitab fondundan öz tədqiqat istiqamətlərinə uyğun materiallar əldə edib, Avstriyada ənənəvi olaraq keçirilən araşdırma günləri çərçivəsində tədqiqatda rəqəmsal alətlərdən istifadə mövzusunda seminara qatılıb və müxtəlif proqram təminatlarının praktiki tətbiqini öyrəniblər.

Azərbaycan Texniki Universitetinin (AzTU) “SmartTech” İnnovatorlar Mərkəzinin direktoru, universitetin baş müəllimi Kərim Tahiroğlunun “Proqramçı olmaq istəyirəm” adlı kitabının təqdimatı keçirilib. Tədbirdə AzTU-nun professor-müəllim heyəti, tələbələr və Türkiyənin aparıcı universitetlərindən qonaqlar iştirak edib. Təqdimat mərasimində çıxış edən AzTU-nun rektoru Vilayət Vəliyev, Azərbaycan İnternet Forumunun prezidenti Osman Gündüz, Bakı Mühəndislik Universitetinin baş müəllimi Bəhman Qüdsi, Türkiyənin Orta Doğu Texniki Universitetinin (ODTU) professoru Mehmet Halit Oğuztüzün kitab haqqında fikirlərini bildirib. Qeyd olunub ki, “Proqramçı olmaq istəyirəm” kitabı proqramçı peşəsinə yiyələnmək istəyənlərə əhatəli yol xəritəsi təqdim edir. Nəşrdə oxucuları müvafiq sahə üzrə düşündürən suallar ətraflı cavablandırılıb, proqramlaşdırma ixtisasının mahiyyəti, başlıca istiqamətləri geniş şərh edilib. Kitab kompüter mühəndisliyi və kompüter elmləri ixtisaslarında təhsil alan tələbələr, bu sahələr üzrə dərs deyən müəllimlər, gənc proqramçılar və ümumilikdə proqramlaşdırma sahəsinə maraq göstərən hər kəs üçün nəzərdə tutulub. Qeyd edək ki, kitabın öz sözünün müəllifi AzTU-nun rektoru Vilayət Vəliyevdir.

İsrailin Bar-İlan Universitetinin Mühəndislik fakültəsinin dekanı Zeev Zalevskinin başçılıq etdiyi nümayəndə heyəti ölkəmizə səfəri çərçivəsində Azərbaycan Texniki Universitetinin (AzTU) qonağı olub. Qonaqlar AzTU-nun rektoru Vilayət Vəliyev və universitetin nümayəndələri ilə görüşüblər. Rektor Vilayət Vəliyev AzTU-da görülən işlər və həyata keçirilən layihələr haqqında qonaqlara ətraflı məlumat verib. Dekan Zeev Zalevski təmsil etdiyi ali təhsil müəssisəsinin və müvafiq fakültənin fəaliyyəti barədə geniş məlumat verib. Görüşdə mühəndislik ixtisasları üzrə tədris və tədqiqat sahəsində əməkdaşlıq imkanları müzakirə olunub.

Azərbaycan Texniki Universitetinin (AzTU) SABAH qruplarının bakalavriat və magistratura səviyyələrində 2024/2025-cü tədris ilinə qəbulla bağlı tələbələrin məlumatlandırılması üçün infosessiya keçirilib. Tədbirdə AzTU-nun tədris işləri üzrə prorektoru Nurəli Yusifbəyli, Elm və Ali Təhsil üzrə Dövlət Agentliyinin SABAH qrupları layihəsi İcra Komitəsinin rəhbəri Elza Səmədova çıxış edərək AzTU SABAH qruplarına qəbul proseduru barədə zəruri məlumatları tələbələrin diqqətinə çatdırıblar.  Sonda tələbələrin sualları cavablandırılıb.

Azərbaycan Texniki Universitetinin (AzTU) İdman sarayında Tam Gənc Basketbol Liqasının final oyunu keçirilib. Finalda AzTU və Azərbaycan Dövlət Bədən Tərbiyəsi və İdman Akademiyasının (ADBTİA) basketbol komandaları qarşılaşıb. Gərgin mübarizə şəraitində keçən final oyununda AzTU komandası 85-73 hesabı ilə Tam Gənc Basketbol Liqasının qalibi olub. Xatırladaq ki, ötən ilin oktyabrdan start görürən liqada 11 komanda mübarizə aparıb.

Azərbaycan Texniki Universitetinin (AzTU) İqtisadiyyat və statistika kafedrasının müdiri Arzu Süleymanov və kafedranın dosenti Ramil Quliyev "Erasmus+ KA171" mübadilə proqramı çərçivəsində Türkiyə Respublikasının Tokat Gaziosmanpaşa Universitetində akademik heyət üçün nəzərdə tutulmuş bir həftəlik mübadilədə iştirak edib. AzTU əməkdaşları Tokat Gaziosmanpaşa Universitetinin İqtisadiyyat və idarəetmə fakültəsinin fəaliyyəti ilə tanış olub, birgə tədqiqatların aparılması və layihələrin hazırlanması imkanlarını müzakirə ediblər.    Mübadilədə olduqları müddətdə Arzu Süleymanov və Ramil Quliyev Tokat Gaziosmanpaşa Universiteti və AzTU-nun birgə təşkilatçılğı ilə təşkil olunmuş I beynəlxalq iqtisadi və inzibati araşdırmalar konfransında iştirak edib. İqtisadi və inzibati elmlərin bütün sahələrinə aid mövzularda məqalələrin dinlənildiyi konfransda Azərbaycandan ümumilikdə 10 məqalə qəbul olunaraq proqrama daxil edilib. Bunlardan 8-i AzTU-nun professor-müəllim heyəti, doktorant və magistr tələbələrinin məqalələridir.

Azərbaycan Texniki Universitetinin (AzTU) Xarici dillər kafedrasının müəllimi Leyla Quliyeva “Erasmus+” mübadilə proqramı çərçivəsində Rumıniyanın Kluj-Napoka Texniki Universitetində akademik heyət üçün nəzərdə tutulmuş bir həftəlik mobillikdə iştirak edib. Leyla Quliyeva Kluj-Napoka Texniki Universitetinin Müasir dillər və kommunikasiya kafedrasının fəalliyəti ilə yaxından tanış olub, akademik heyətlə görüşərək AzTU-nun Xarici dillər kafedrasının fəaliyyəti barədə ətraflı məlumat verib. İki kafedra arasında mümkün əməkdaşlıq imkanları müzakirə olunub. Leyla Quliyeva həmçinin, kompüter elmləri ixtisası üzrə təhsil alan tələbələrə "Təqdimatlar və müsahibə" mövzusunda mühazirə deyib.

Azərbaycan Texniki Universitetinin (AzTU) Mexatronika kafedrasının müdiri professor İftixar Çələbi Almaniyada səfərdə olub. Səfər çərçivəsində İftixar Çələbi Drezden şəhərində keçirilən "DMK-2024" adlı texniki alman universitetlərinin təmsil olunduğu konfransda məruzə ilə çıxış edib. Daha sonra İftixar Çələbi Hannover və Aaxen universitetlərinə səfər edib, bu universitetlərdə mütəxəssislərlə işgüzar görüşlər keçirib, mexatronika və robototexnika laboratoriyaları ilə tanış olub.