Azərbaycan Texniki Universitetinin (AzTU) tələbələri üçün Alman Akademik Mübadilə Xidmətinin (DAAD) təqaüd proqramları haqqında növbəti məlumatlandırma sessiyası keçirilib.  Məlumatlandırma sessiyasında AzTU-da fəaliyyət göstərən DAAD-nin alman dili müəllimi Klaudio Kasperl Almaniyada təhsil, DAAD-nin fəaliyyəti və təqaüd proqramları, müraciət şərtləri, tələb olunan sənədlər toplusu və seçim meyarları haqqında tələbələrə ətraflı məlumat verib. DAAD-nin bakalavr tələbələri üçün təşkil etdiyi yay məktəbləri və onlara müraciət qaydaları ətraflı izah olunub. Tədbirin sonunda iştirakçıların sualları cavablandırılıb.  Bundan başqa, Klaudio Kasperl DAAD-nin tədqiqatçılar və doktorantura təhsili üçün təqaüd proqramları haqqında da məlumatlandırma sessiyası təşkil edib. Sessiyada tələblər və müraciət qaydaları haqqında ətraflı məlumat verilib, maraqlananlara əlavə məsləhət saatları təyin edilib.  

Özbəkistanın Daşkənd şəhərində  BMT-nin Ətraf Mühit Proqramının (UNEP) dəstəyi ilə DKU tərəfindən təşkil olunan “Davamlı Həyat Tərzləri Festivalı 2024: universitetlərdə daha yaxşı və asan yaşamağı öyrənək” (Sustaınable lifestyles festival 2024: learning to live better and lighter on campus and beyond) adlı tədbir keçirilib. Tədbirdə Azərbaycan Texniki Universitetini (AzTU) Dayanıqlı İnkişaf İnstitutunun direktoru i.e.f.d. Natavan Namazova təmsil edib.  Festivalın məqsədi qlobal və regionlararası qabaqcıl təcrübə mübadiləsi vasitəsilə Mərkəzi Asiya və Qafqaz universitetlərində davamlı həyat tərzinin tətbiqi üçün innovativ strategiyalar haqqında məlumatlılığı artırmaqdır. Festival çərçivəsində keçmişdən bu günə qədər daha yaşıl və daha məsuliyyətli həyat tərzinə aparan irslər geniş müzakirə edilib.

Almaniyanın Frayberq Dağ Akademiyası Texniki Universitetinin (TUBAF) Additiv hazırlama kafedrasının elmi işlər üzrə baş mühəndisi Rezo Əliyev Alman Akademik Mübadilə Xidmətinin (DAAD) təqaüdü əsasında 2 həftə müddətində Azərbaycan Texniki Universitetində (AzTU) səfərdə olub. Rezo Əliyev AzTU-da tədrisin keyfiyyəti, həmçinin tədris və eimi-tədqiqat laboratoriyaları ilə tanış olub.  O, Alman mühəndislik və Maşınqayırma və robototexnika fakültələrinin alman dili qruplarında ixtisas üzrə silsilə mühazirə və praktiki məşğələ dərsləri tədris edib. Rezo Əliyev həmçinin AzTU-nun maşınqayırma və metallurgiya sahəsi üzrə fəaliyyət göstərən kafedralarının professsor-müəllim heyəti və tələbələri üçün "Additiv hazırlama texnologiyasının əsas aspektləri" mövzusunda elmi-metodiki seminar keçib. Səfər zamanı AzTU ilə TUBAF arasında gələcək tədris və elmi-tədqiqat əlaqələrinin perspektivləri də müzakirə edilib.

Sentyabrın 27-də - Anım Günündə Azərbaycan Texniki Universitetinin (AzTU) və Türkiyə-Azərbaycan Universitetinin (TAU) kollektivi Bakıda inşası davam etdirilən Zəfər parkında olub. Parkın girişində xatirə daşının önünə gül dəstələri düzülüb, şəhidlərin əziz xatirəsi ehtiramla anılıb.

Azərbaycan Texniki Universitetində (AzTU) 27 Sentyabr - Anım Gününə həsr olunan tədbir keçirilib. Əvvəlcə torpaqlarımızın suverenliyi və ərazi bütövlüyü uğrunda canlarından keçən Vətən övladlarının əziz xatirəsi bir dəqiqəlik sükutla yad olunub. Azərbaycanın Dövlət Himni səsləndirilib. Tədbirdə çıxış edən AzTU-nun rektoru Vilayət Vəliyev bildirib ki, 2020-ci il sentyabrın 27-də Müzəffər Ali Baş Komandan, Prezident İlham Əliyevin rəhbərliyi ilə başladılan Vətən müharibəsi nəticəsində 30 illik işğala son qoyuldu. Bu tarix şanlı Qələbəmizin başlanğıcı oldu. Həmin gündən 4 il keçməsinə baxmayaraq Vətən müharibəsində istifadə olunan müasir texnologiyalar, ordumuzun yenilməzliyi dünyanın hərbi ekspertlərinin tədqiqat mövzusuna çevrilib. Azərbaycan 44 günlük müharibədə qazandığı Qələbə ilə hərbi gücünü bütün dünyaya sübut etdi. Daha sonra çıxış edən tarix elmləri namizədi, dosent Akif Nağı da Vətən müharibəsində qazanılan şanlı Qələbənin tarixi əhəmiyyətindən danışıb. O, həmçinin 2023-cü il sentyabrın 19-da ordumuzun keçirdiyi antiterror tədbirlərinə də diqqət çəkib. Bildirib ki, antiterror tədbirləri nəticəsində Azərbaycan öz suverenliyini bərpa etdi. Ərazi bütövlüyümüzün və suverenliyimizin bərpa olunmasında hərbçilərimizin qəhrəmanlığı, şücaəti və peşəkarlığı, xalqımızın birliyi xüsusi vurğulanıb. Qeyd olunub ki, torpaqlarımızın azad olunmasında  qəhrəmanlıq göstərərək şəhidlik zirvəsinə yüksələn Vətən övladlarının əziz xatirəsi xalqımızın qəlbində daim yaşayacaq.  

Azərbaycan Texniki Universitetinin (AzTU) Alman mühəndislik fakültəsinin proseslərin avtomatlaşdırılması mühəndisliyi ixtisasının tələbəsi Anabacı Əmiraslanova 20-22 sentyabr tarixlərində Gənclər və İdman Nazirliyi, Dünya Robot Olimpiadası Assosiasiyası və Azərbaycan Robotexnika Mühəndisliyi Akademiyasının (AREA) birgə təşkilatçılığı ilə Milli Gimnastika arenasında VII Dünya Robot Olimpiadasının Azərbaycan mərhələsində iştirak edib. Olimpiadanın keçirilməsində əsas məqsəd gənclərin robot texnologiyaları sahəsində bacarıqlarını inkişaf etdirmək, komanda işini təşviq etmək və innovativ düşüncəni dəstəkləməkdir. Belə olimpiadalar gənclərin motivasiyasını artırmaqla yanaşı, texnoloji biliklərini daha da inkişaf etdirmələri üçün böyük imkanlar yaradır. Ümumilikdə Olimpiadada kateqoriyalar üzrə respublikanın 20 rayon və şəhərindən 316 komanda qeydiyyatdan keçib. Qeydiyyatdan keçən komandaların hazırlıq səviyyəsi ilə bağlı monitorinqlər keçirilib və final mərhələsində 163 komanda iştirak etmək hüququ qazanıb. Anabacı Əmiraslanova Olimpiadada “Future İnnovators-Senior” kateqoriyasında Qlobal iqlim dəyişikliyi ilə mübarizə aparan “CO2toD” qurğusu ilə 2-ci yerə layiq görülüb. Olimpiada qalibləri ölkəmizi Türkiyədə təmsil edəcəklər.

QS (Quacquarelli Symonds) beynəlxalq reytinq agentliyinin nümayəndələri Azərbaycan Texniki Universitetində (AzTU) təlim keçib. AzTU-nun Tədqiqat və inkişaf şöbəsinin təşkilatçılığı ilə keçirilən təlimdə QS agentliyinin fəaliyyəti, reytinq metodologiyası və AzTU-nun QS reytinqlərindəki fəaliyyəti haqqında ətraflı məlumat təqdim olunub. Elm və innovasiyalar üzrə prorektor Sübhan Namazov AzTU-nun beynəlxalq reytinqlərdə irəliləməyi əsas hədəf kimi müəyyənləşdirdiyini və qlobal rəqabət qabiliyyətinin artırılması istiqamətində həyata keçirilən tədbirlərin vacibliyini vurğulayıb. Bu görüşün AzTU-nun QS reytinqindəki mövqeyinin yüksəldilməsinə xidmət etdiyi də qeyd olunub. Təlim iştirakçıları QS reytinq metodologiyası ilə tanış olmaqla yanaşı, universitetin beynəlxalq arenada tanınması və müvəffəqiyyətinin artırılması üçün müvafiq strategiyalar üzərində fikir mübadiləsi aparıblar.

Azərbaycan Texniki Universitetinin (AzTU) təşəbbüsü ilə “ADEX-2024” 5-ci Yubiley Azərbaycan Beynəlxalq Müdafiə Sərgisi çərçivəsində "Müdafiə sahəsində avtomatlaşdırma və robotlaşdırma: perspektivlər və çağırışlar" mövzusunda panel müzakirəsi keçirilib.  AzTU-nun rektoru Vilayət Vəliyevin moderatorluğu ilə keçirilən panel müzakirədə Azərbaycan Milli Aviasiya Akademiyasının yeni texnologiyalar üzrə prorektoru Xəqani Abdullayev, Türk Aerokosmik Sənayesinin beynəlxalq proqramlar üzrə məhsul meneceri Yasin Kaygusuz, AzTU-nun Sənaye Sistemləri və Kibertəhlükəsizlik İnstitutunun direktoru Manafəddin Namazov, Milli Müdafiə Universiteti nəzdində Hərbi İdarəetmə İnstitutunun rektor müavini Əsəd Rüstəmov və Müdafiə Sənayesi Nazirliyi nəzdində Milli Aerokosmik Agentliyinin Məsafədən zondlamanın optik-elektron cihazları şöbəsinin rəisi Günel Əliyeva mövzu haqqında təqdimatla çıxış ediblər. Məruzəçilər  müdafiə sənayesi və avtomatika sahəsində görülmüş və görüləcək işlər, ən son trendlər, universitet-sənaye işbirliyi istiqamətində təcrübələrini bölüşüblər.  Rektor Vilayət Vəliyev AzTU-da müdafiə sənayesi istiqamətində görülən işlər barədə məlumat verib. Bildirib ki, AzTU regionda müdafiə sənayesi üzrə kadr hazırlayan yeganə universitetdir. Rektor universitet-sənaye işbirliyinin inkişafından və çağdaş trendlərdən də danışıb. Panelin sual-cavab sessiyasında rektor Vilayət Vəliyev süni intellekt və kibertəhlükəsizlik sahəsində etik çağırışlar barədə məruzəçilərlə dialoq formatında müzakirələr aparıb. Sonda panelin moderatoru və məruzəçilərinə sertifikat təqdim olunub. Qeyd edək ki, “ADEX-2024” 5-ci Yubiley Azərbaycan Beynəlxalq Müdafiə Sərgisi sentyabrın 26-na kimi davam edəcək.

Azərbaycan Respublikasının Baş naziri Əli Əsədov sentyabrın 23-də ölkəmizdə səfərdə olan Türkiyə Respublikasının Ali Təhsil Şurasının sədri Erol Özvarla görüşüb.  Görüşdə elm və təhsil naziri Emin Əmrullayev, həmçinin Azərbaycan Texniki Universitetinin rektoru Vilayət Vəliyev və Türkiyənin aparıcı ali təhsil müəssisələrinin rektorları da iştirak ediblər. Görüşdə iki ölkə arasında strateji tərəfdaşlıq və müttəfiqlik münasibətlərinin bütün sahələrdə uğurlu inkişafından məmnunluq ifadə olunub, təhsil sahəsində əlaqələrin dinamikası xüsusi vurğulanaraq, iki ölkənin ali təhsil müəssisələri və elmi-tədqiqat mərkəzləri arasında uzunmüddətli səmərəli əməkdaşlığın nəticələri təqdir edilib.   Həmçinin Türkiyə-Azərbaycan Universitetinin (TAU) yaradılmasının əhəmiyyəti qeyd edilib, layihədə iştirak edən universitetlərin iki ölkənin aparıcı ali təhsil müəssisələri olduğu xüsusi vurğulanıb. Bildirilib ki, qəbul nəticələrinə əsasən, 2024-2025-ci tədris ilindən fəaliyyətə başlayan TAU-da kompüter mühəndisliyi, sənaye mühəndisliyi və qida mühəndisliyi ixtisasları üzrə ümumilikdə 90-a yaxın tələbə təhsil alacaq.  Görüş çərçivəsində Türkiyə-Azərbaycan Universitetinin fəaliyyəti ilə bağlı cari məsələlər, həmçinin iki ölkə arasında elm və təhsil sahəsində əməkdaşlığın inkişaf perspektivləri də müzakirə olunub.

Azərbaycan Texniki Universitetinin (AzTU) Dayanıqlı İnkişaf İnstitutunun əməkdaşı İqor Nasirovun "Azərbaycanın Dünyanın Yaşıl Gələcəyinə Artan Töhfəsi” (Growing Contribution of Azerbaijan to Earth’s Green Future) adlı növbəti master-klassı onlayn təşkil edilib. “Yaşıl layihələr və məhsullar: bazarlar və ticarət" (Green Projects and Products: Markets and Trade) adlanan beşinci hissə ətraf mühitin qorunması məqsədilə sahibkarlıq layihələrinin ekoloji məqsədlər üçün məhsul istehsalı, onların bazarlara çıxarılması və satılması prorsesinə həsr edilib.Əsas məqsəd COP29-un müxtəlif aspektlərini və onun qlobal iqlim gündəliyinə uyğunluğunu araşdırmaq üçün elmi tədqiqatçıların, professor-müəllim heyətinin, tələbələrin diqqətinə çatdırmaq olub.Görüşdə qlobal tendensiyalar və təcrübələr, COP29-da Azərbaycanda icra olunacaq layihələr, Azərbaycanın yaşıl dünyaya verəcəyi töhfələr haqqında geniş müzakirələr aparılıb.Tədbirin qonaqları Valentin Korlomin (Consulting Director, Middle East and Asia-Pacific, Argus Media) və Alexander Yanovskiy (Trader)  öz məruzələri ilə çıxış ediblər.