Azərbaycan Texniki Universitetinin (AzTU) Xüsusi təyinatlı material və vasitələr kafedrasının müdiri dosent Mərziyyə Ağayeva “Erasmus+” mübadilə proqramı çərçivəsində Rumıniyanın Kluj-Napoka Texniki Universitetində akademik heyət üçün nəzərdə tutulmuş bir həftəlik mobillikdə iştirak edib. Mərziyyə Ağayeva Kluj-Napoka Texniki Universitetinin Materiallar və ətraf mühit mühəndisliyi fakültəsi, həmçinin Materialşünaslıq və texnologiya, Materialşünaslıq və mühəndislik kafedralarının əməkdaşları ilə görüşüb, onların faəliyyəti ilə yaxından tanış olub. Kluj-Napoka Texniki Universitetində materialşünaslıq sahəsində müxtəlif laboratoriyalarının fəaliyyəti ilə yaxından tanış olan AzTU əməkdaşı hər iki universitetin tədqiqat layihələrində birgə iştirakı məsələlərini müzakirə edib. Dosent Mərziyyə Ağayeva Materiallar və Ətraf mühit mühəndisliyi fakültəsinin tələbələrinə AzTU haqqında ətraflı məlumat verib, həmçinin materialşünaslığa aid müxtəlif mövzularda mühazirə deyib.

“Rusiya Federasiyası, Qazaxıstan və Azərbaycanda səhiyyədə strateji keyfiyyət menecmenti və risklərin idarə olunması üzrə açıq və distant təhsil formatında peşə bakalavrı və magistr hazırlığı” (LMQS) layihəsi üzrə Fransada növbəti menecment görüşü keçirilib. Görüş layihənin koordinatoru Yunanıstanın Qərbi Attika Universitetinin təşkilatçılığı və Fransanın Cote d'Azur Universitetinin ev sahibliyi ilə təşkil olunub.  Layihə Avropa Birliyinin maliyyələşdirdiyi “Erasmus+KA2” proqramı çərçivəsində ali təhsildə potensialın artırılması istiqaməti üzrə həyata keçirilir. Səfərdə Azərbaycan Texniki Universitetini (AzTU) layihənin koordinatoru professor Həsən Hüseynov və Beynəlxalq əlaqələr şöbəsinin müdiri Orxan Vətənxah təmsil edib. Görüşdə layihənin Avropa, həmçinin Qazaxıstan və Azərbaycandan olan tərəfdaşlarının nümayəndələri də iştirak ediblər. Menecment görüşündə Qərbi Attika, Cote d'Azur, Azərbaycan və Qazaxstan universitetlərinin nümayəndələri “Səhiyyədə keyfiyyətin və risklərin idarə olunması” ixtisası üzrə magistratura səviyyəsində birgə ikili diplom proqramının hazırlanması perspektivləri barədə müzakirələr aparılıb.

Türkiyə Dəyanət Vəqfi Bakı Türk Liseyinin X və XI sinif şagirdləri və onların müəllimləri Azərbaycan Texniki Universitetinə (AzTU) ekskursiya ediblər. Qonaqlar əvvəlcə AzTU-nun ərazisində təşkil edilən infoturda iştirak ediblər. Daha sonra keçirilən görüşdə AzTU-da həyata keçirilən yeniliklər barədə abituriyentlərə məlumat verilib. Universitetin tarixi, fakültələr, ixtisaslar, beynəlxalq əlaqələr, ikili diplom proqramları, laboratoriyalar, karyera imkanları və digər vacib məlumatlar abituriyentlərin diqqətinə çatdırılıb.

Azərbaycan Texniki Universitetinin (AzTU) rektoru Vilayət Vəliyevin rəhbərlik etdiyi nümayəndə heyəti “Radio-Televiziya Yayımı və Peyk Rabitəsi” İstehsalat Birliyində (“Teleradio” İB) olub. Qonaqlar “Teleradio” İB-nin baş direktor vəzifəsini icra edən Elman Həsənovla görüşüblər. Rektor Vilayət Vəliyev universitetdə görülən işlər və həyata keçirilən yeniliklərdən danışıb. Müvafiq ixtisaslarda təhsil alan tələbələrin “Teleradio” İB-də təcrübəyə cəlb olunması, birgə tədqiqatlarda iştirakla bağlı məsələlər müzakirə olunub. Elman Həsənov tələbələrin yüksəkixtisaslı kadr kimi yetişməsində birgə yeni tədris proqramının hazırlanmasının vacibliyini vurğulayıb. Daha sonra Bakı Teleqüllə Kompleksində yerləşən istehsalat sahəsinə baxış keçirilib. Əməkdaşlıq əlaqələrinin möhkəmləndirilməsi məqsədilə bu cür görüşlərin qarşılıqlı və davamlı olmasının əhəmiyyəti diqqətə çatdırılıb.

Azərbaycan Texniki Universitetinin (AzTU) tərəfdaşı olduğu “Azərbaycan ali təhsil müəssisələrində davamlı sahibkarlıq ekosisteminin gücləndirilməsi” (ENGAGE) layihəsi çərçivəsində növbəti təlimlər İsveçin Kral Texnologiya Universitetində keçirilib. Təlimlərdə tərəfdaş universitetlərdə sahibkarlıq fənnini tədris edən professor-müəllim heyəti iştirak edib.   AzTU-nu təlimlərdə İqtisadiyyat və statistika kafedrasının professoru Fuad Qənbərov təmsil edib. İştirakçılar həm təşkilati, həm də fənn səviyyəsində təhsilin keyfiyyətinin artırılması strategiyaları,  problem əsaslı öyrənmə imkanları kimi bir sıra mövzularla tanış olub və komanda işi təqdim ediblər. Proqrama uyğun olaraq təlimlərin sonunda iştirakçılara İsveçin Kral Texnologiya Universiteti tərəfindən sertifikat təqdim olunub.    Qeyd edək ki, layihənin 4-cü iş paketinə ali təhsil müəssisələrində intitusional səviyyədə davamlı sahibkarlıq ekosisteminin gücləndirilməsi məqsədilə sahibkarlığın universitetlərin inkişaf strategiyalarına inteqrasiyası, sahə üzrə akademik kadrların təlimi və  sahibkarlığın seçmə fənn olaraq bütün ixtisaslarda tədrisi daxildir. İş paketi çərçivəsində sahibkarlığın konsepsiyası, maliyyələşdirilməsi və sosial sahibkarlıq kimi mövzular üzrə Bakı, Gəncə, Naxçıvan və Mingəçevir şəhərlərində təlimlər təşkil olunacaq.

Azərbaycan Texniki Universitetinin (AzTU) Nəqliyya və logistika fakültəsinin məzunu, Vətən müharibəsində şəhidlik zirvəsinə yüksələn Raul Piriyevin doğum gününə həsr olunan “Qəhrəmanlar unudulmur” adlı tədbir keçirilib. Tədbirdə şəhid Raul Piriyevin ailə üzvləri, yaxınları, şəhid ailələri, qazilər, universitetin nümayəndələri iştirak ediblər. Əvvəlcə torpaqlarımızın ərazi bütövlüyü və suverenliyi uğrunda canlarından keçən Vətən övladlarının xatirəsi bir dəqiqəlik sükutla yad olunub, Azərbaycanın Dövlət Himni səsələndirilib. Daha sonra Humanitar fənlər kafedrasının müdiri Həbib Mirzəyev çıxış edərək universitetdə şəhid məzunların xatirəsinin hər zaman yad olunduğunu bildirib. Raul Piriyevə dərs demiş müəllimi Anar İsmayılov çıxışında şəhid haqqında xatirələrini bölüşüb. Tədbir qəhrəmanlıq mövzusunda mahnı, şeir və kompozisiyalarla davam edib.

Azərbaycan Texniki Universitetinin (AzTU) İqtisadiyyat və statistika kafedrasının dosenti Günay Əliyeva və baş müəllimi Aysel Qədirova “Erasmus+” mübadilə proqramı çərçivəsində Polşanın Powislanski Universitetində akademik heyət üçün nəzərdə tutulmuş bir həftəlik mobillikdə iştirak ediblər. Günay Əliyeva və Aysel Qədirova Powislanski Universitetinin İqtisadiyyat və idarəetmə kafedrasının fəaliyyəti ilə yaxından tanış olub, akademik heyətlə görüşərək AzTU-da iqtisadiyyat və idarəetmə sahəsində tədris, tədqiqat fəaliyyəti barədə ətraflı məlumat veriblər. Onlar Powislanski Universitetinin tələbələrinə "Dayanıqlı inkişaf" və “Makroiqtisadi modellər” mövzusunda mühazirə deyib və iki kafedra arasında mümkün əməkdaşlıq imkanlarını müzakirə ediblər. AzTU əməkdaşları həmçinin Powislanski Universitetində təşkil olunmuş “International Week 24”də iştirak edərək universiteti təmsil edib və dünyanın 26 ölkəsindən tədbirə qatılan universitet nümayəndələri ilə müxtəlif görüşlər keçiriblər.

Azərbaycan Texniki Universitetinin (AzTU) Mühəndis fizikası və elektronika kafedrasının professoru Sevda Qasımova mühəndislik və texnologiya inkişafı sahəsində cəmiyyətə verdiyi əhəmiyyətli töhfəyə görə AET-in (Beynəlxalq Mühəndislik və Texnologiya Akademiyasının) üzvü seçilib. Qeyd edək ki, AET beynəlxalq səviyyədə nüfuzlu elmi tədqiqatçılar və sənye mütəxəssisləri arasında əlaqə yaradan akademiyadır. Bu akademiya tanınmış elmi tədqiqatçılar və sənye mütəxəssisləri arasında əlaqələri möhkəmlədirir, onların fikir və biliklərini bölüşməyə imkan yaradır.

Azərbaycan Texniki Universitetində (AzTU) bakalavriat və magistratura (əyani) səviyyələrində 2023/2024-cü tədris ilinin yaz semestrinin yay imtahan sessiyası başlayıb. Sessiya iyulun 4-də yekunlaşacaq. Qiyabi təhsil alanlar üçün imtahan sessiyası isə 5-11 iyun tarixlərini əhatə edəcək. İmtahanlar əyani təhsil alan I kurslar üçün test, yazılı-elektron, II, III və IV kurslar üçün şifahi (yazılı) və test üsulu ilə keçirilir. Qiyabi təhsil alan I, II, III, IV kurslar üçün imtahanlar test, V kurslar üçün isə şifahi (yazılı) üsulla təşkil edilib. Magistratura səviyyəsində isə imtahanlar şifahi (yazılı) üsulla keçiriləcək. Sessiya zamanı üzrlü səbəblərdən imtahanda iştirak etməyən tələbələrə iyulun 9-dan 15-dək həmin fənlərdən imtahan vermək üçün şərait yaradılacaq. Qeyd edək ki, sessiyanın gedişinə nəzarət, həmçinin şəffaflığın təmin olunması məqsədilə AzTU-da Apelyasiya Komissiyası, İmtahan Qərargahı və "Qaynar xətt" (+99412 539 13 05) fəaliyyət göstərir.

Azərbaycan Texniki Universitetində (AzTU) Dayanıqlı İnkişaf İnstitutunun əməkdaşı İqor Nasirov “Azərbaycanın dünyanın yaşıl gələcəyinə artan töhfəsi” (“Growing Contribution of Azerbaijan to Earth’s Green Future”) mövzusunda master-klass keçib. Tədbirin birinci hissəsi "Birləşmiş Millətlər Təşkilatının İqlim Dəyişikliyi üzrə Çərçivə Konvensiyasına (UNFCCC) həsr olunub. Məqsəd COP29-un müxtəlif aspektlərini və onun qlobal iqlim gündəliyinə uyğunluğunu tədqiqatçıların, professor-müəllim heyətinin, tələbələrin diqqətinə çatdırmaq olub. Tədbirdə qlobal tendensiyalar və təcrübələr, Azərbaycanın yaşıl dünyaya verəcəyi töhfələr, COP29 çərçivəsində ölkəmizdə icra olunacaq layihələr və digər məsələlər haqqında geniş məlumat verilib.