Azərbaycan Texniki Universiteti (AzTU) Dövlət İmtahan Mərkəzinin təşkilatçılığı ilə keçirilən ali təhsil müəssisələrinin sərgisində təmsil olunur. Sərginin keçirilməsində məqsəd ixtisas seçimindən öncə abituriyentləri ali təhsil müəssisələrinin mövcud imkanları ilə tanış etmək və onların ixtisas seçiminin müəyyən olunmasına dəstək göstərməkdir. Ziyarətçilər sərgidə AzTU nümayəndələri ilə birbaşa ünsiyyət quraraq ixtisaslar, tədris proqramları, maddi-texniki baza, təhsil haqqı, güzəştlər, təqaüd proqramları və digər məsələlərlə bağlı onları maraqlandıran suallara cavab tapmaq imkanına malikdirlər. Sərgi çərçivəsində əvvəlcədən təyin olunmuş zallarda və saatda AzTU-nun abituriyentlər üçün daha geniş formada təqdimatı nümayiş etdirilir. Qeyd edək ki, sərgidə ölkəmizdə fəaliyyət göstərən 40-a yaxın dövlət və özəl ali təhsil müəssisəsi, həmçinin müxtəlif qurumların stendləri yer alıb. Sərgi 2 avqust 2024-cü il tarixinə kimi davam edəcək.

Azərbaycan Texniki Universitetinin (AzTU) Energetika və avtomatika fakültəsinin dekanı professor Hüseynqulu Quliyev Rusiyanın Arxangelsk şəhərində “Böyük energetik sistemlərin etibarlılığının metodik məsələləri” mövzusunda beynəxalq elmi konfrasda iştirak edib. Hüseynqulu Quliyev “Uzaq məkanların avtonom elektrik təchizatı üçün bərpaolunan mənbəli hibrid AC .DC paylanmış generasiya sisteminin optimal ölçülərinin təyini” və “330 kV gərginlikli elektrik şəbəkələrində idarə olunan şuntlayıcı reaktorların seçilməsi və onların istismar rejimlərinin tədqiqi” mövzularında elmi məruzələrlə çıxış edib.   AzTU professorunun ilk məruzəsi yaşıl enerji texnologiyaları bazasında hibrid sistemlərin uzaq məsafələrdə yerləşən zonaların etibarlı elektrik təchizatının yaradılmasında tətbiqinin nəzəri-metodik məsələlərinə həsr olunub. Onun növbəti çıxışı isə energetika sistemlərinin dayanıqlılığının yüksəldilməsi üçün idarəolunan şuntlayıcı reaktorların optimal yerləşdirilməsi və onların istismar rejimlərinin tədqiqindən bəhs edib. Hər iki məruzənin materialları Rusiyanın Elmi Sitat İndeksləşməsi (RESİ) və “Scopus” bazasında indeksləşdirilmiş dövrü nəşrlərdə çap olunmaq üçün qəbul edilib. 

Azərbaycan Texniki Universitetinin (AzTU) rektoru Vilayət Vəliyev İnnovasiya və Rəqəmsal İnkişaf Agentliyinin (İRİA) İnformasiya təhlükəsizliyi departamentinin direktoru Şahmar Hacıyahyayev və agentliyin digər əməkdaşları ilə görüşüb.    Görüşün əsas məqsədi AzTU ilə İRİA arasında kibertəhlükəsizlik ekosisteminin inkişafı üçün yeni əməkdaşlıq sahələrinin və formalarının müəyyənləşdirilməsi olub. Universitet-sənaye işbirliyinin inkişafının önəmindən danışan rektor Vilayət Vəliyev bildirib ki, AzTU ilə İRİA-nın nəzdində fəaliyyət göstərən Azərbaycan Kibertəhlükəsizlik Mərkəzinin (AKM) yeni əməkdaşlıq istiqamətləri üzrə birgə fəaliyyəti təqdirəlayiq hesab olunur və tələbələrin müvafiq sahədə bacarıqlarının təkmilləşməsinə töhfə verəcək. Qeyd olunub ki, əməkdaşlıq çərçivəsində ilkin olaraq kibertəhlükəsizlik sahəsində yaranmış peşəkar kadr çatışmazlığını aradan qaldırmaq üçün AzTU və AKM arasında birgə yol xəritəsi hazırlanacaq.  Bundan başqa, AKM əməkdaşlarının AzTU-nun müəllim və tələbələrinə kibertəhlükəsizlik sahəsi üzrə təlim verməsi, bu istiqamətdə yeni startapların yaradılmasını təşviq etmək məqsədilə kiber klubların yaradılması kimi məsələlər də müzakirə olunub.

Türkiyənin Atılım Universitetinin Metal Formalaşdırmada Mükəmməllik Mərkəzinin tədqiqatçı mühəndisi Çağlar Ceylan “Erasmus+” mübadilə proqramı çərçivəsində Azərbaycan Texniki Universitetində (AzTU) səfərdə olub. Səfər çərçivəsində Çağlar Ceylan AzTU-da təlim keçib, müvafiq fakültə və kafedranın əməkdaşları ilə görüşüb, laboratoriyalarda aparılan işlərlə tanış oub. O həmçinin Atılım Universitetinin tanıtımı və Metal Formalaşdırmada Mükəmməllik Mərkəzinin fəaliyyəti barədə geniş təqdimatla çıxış edib.

Azərbaycan Texniki Universitetində (AzTU) məktəblilərin “Açıq qapı” günü keçirilib. “Açıq qapı” günündə X və XI sinif şagirdləri, həmçinin onların müəllimləri iştirak ediblər. Görüşdə AzTU-da həyata keçirilən yeniliklər barədə abituriyentlərə məlumat verilib. Universitetin tarixi, fakültələr, ixtisaslar, beynəlxalq əlaqələr, ikili diplom proqramları, laboratoriyalar, karyera imkanları və digər vacib məlumatlar abituriyentlərin diqqətinə çatdırılıb. Daha sonra məktəblilər AzTU-nun kampusu ilə tanış olublar.

Azərbaycan Texniki Universitetinin (AzTU) tərəfdaş olduğu “Erasmus+KA2” “Rusiya Federasiyası, Qazaxıstan və Azərbaycanda səhiyyədə strateji keyfiyyət menecmenti və risklərin idarə olunması üzrə açıq və distant təhsil formatında peşə bakalavrı və magistr hazırlığı” (LMQS) layihəsi çərçivəsində səhiyyə işçiləri üçün təlim keçirilib. Təlim “Səhiyyənin idarə edilməsi” mövzusunda təşkil edilib. Təlimi İqtisadiyyat və statistika kafedrasının baş müəllimi Pərvin Soltanlı və Beynəlxalq ticarət, logistika və marketinq kafedrasının baş müəllimi Mürşüd Mehdiyev keçiblər. Səhiyyə işçilərini salamlayan İqtisadiyyat və idarəetmə fakültəsinin dekanı Fərqanə Musayeva onlara layihə və layihə çərçivəsində yeni açılmış “Səhiyyədə keyfiyyətin və riskin idarəolunması” magistratura proqramı haqqında ətraflı məlumat verib, səhiyyə içiləri üçün təlimlərin əhəmiyyətindən bəhs edib. Təlim zamanı səhiyyə işçiləri üçün gərəkli olan ünsiyyət və yumşaq bacarıqlar, səhiyyənin idarə olunmasının əsas prinsipləri və strategiyaları, qərar qəbulunda çətinlik və həll yolları kimi bir sıra məsələlər barədə məlumat verilib.

“Rusiya Federasiyası, Qazaxıstan və Azərbaycanda səhiyyədə strateji keyfiyyət menecmenti və risklərin idarə olunması üzrə açıq və distant təhsil formatında peşə bakalavrı və magistr hazırlığı” (LMQS) layihəsi üzrə Fransada yeni yaradılan tədris proqramı üzrə təlimlər təşkil edilib. Təlimlər layihənin Avropa tərəfdaşı olan Kot d’Azur Universitetində keçirilib. Səfərdə AzTU-nu beynəlxalq əlaqələr üzrə prorektor Fariz Məmmədov və İqtisadiyyat və idarəetmə fakültəsinin dekanı Fərqanə Musayeva təmsil edib. Tədbir layihə çərçivəsində yaradılan “Səhiyyədə keyfiyyətin və risklərin idarə olunması” magistr proqramının məzmununun təkmilləşdirilməsinə xidmət edib. 10 gün davam edən təlimlərdə tədris modullarının hazırlanması, Boloniya prosesinə uyğun tədrisin təşkili, ikili diplom proqramlarının və distant təhsilin təşkili, eyni zamanda səhiyyədə keyfiyyət və risklərlərin idarə olunması ilə bağlı mövzularda təqdimatlar edilib.

Azərbaycan Texniki Universitetinin (AzTU) tələbəsi Lalə Qarayeva Avstriyanın Aqrar və Ekoloji Pedaqogika Universitetində (HUAP) təcrübə və tədqiqat proqramında mübadilədə iştirak edib. O, “Yaşıl Pedaqogika” mövzusunda seminar təşkil edərək tədris prosesində onun tətbiqi və prisipləri barədə Avstriyada qazandığı təcrübəni AzTU əməkdaşları ilə bölüşüb. Xatırladaq ki, Lalə Qarayeva “Erasmus+ KA2” proqramı üzrə həyata keçirilən “İnnovasiya və dayanıqlılıq prinsipləri ilə klasterlərin işlənməsinə başlamaqda və iştirakda universitetlərin potensialının artırılması” (UniClaD) layihəsi çərçivəsində Avstriyada 1 aylıq təcrübə proqramında iştirak edib. Təcrübə proqramında nəzəri mövzularla yanaşı, praktiki təcrübələr də təşkil edilərək universitetin ətraf mühitin qorunması sahəsindəki fəaliyyəti barədə ətraflı məlumatlar əldə edilib.

Azərbaycan Texniki Universitetinin (AzTU) rektoru Vilayət Vəliyevin başçılıq etdiyi nümayəndə heyəti Balakən rayonuna səfəri çərçivəsində rayonun təhsil ictimaiyyəti ilə görüşüb. Görüşdə məktəb və lisey direktorları, rayonda fəaliyyət göstərən tədris kurslarının rəhbərləri, gənclər təşkilatlarının nümayəndələri, müəllimlər, həmçinin qəbul imtahanlarında yüksək bal toplayan şagirdlər iştirak ediblər. AzTU-nun rektoru Vilayət Vəliyev universitet haqqında geniş təqdimatla çıxış edib. Bildirib ki, AzTU regionda müdafiə sənayesi üzrə kadr hazırlayan yeganə universitetdir. AzTU-nun hədəfi mühəndislik elmləri və ağıllı texnologiyaların tətbiqi sahəsində regionda lider universitet olmaqdır. Rektor AzTU-nun beynəlxalq əlaqələri, ikili diplom proqramları, tələbələr üçün yaradılan imkanlar, həyata keçirilən yeni layihələr barədə də ətraflı məlumat verib. Həmçinin universitetlə rayonun təhsil qurumlarının qarşılıqlı əməkdaşlığının gücləndirilməsinin faydalı olacağını diqqətə çatdırıb. Şəki-Zaqatala Regional Təhsil İdarəsinin Balakən rayonu üzrə təhsil sektorunun müdiri Mehparə Murtuzəliyeva görüşün universitet-məktəb əlaqələrinin genişləndirilməsi baxımından mühüm əhəmiyyət kəsb etdiyini bildirib. Sonda rektor görüş iştirakçılarının suallarını cavablandırıb. Qeyd edək ki, AzTU rektorunun rəhbərlik etdiyi nümayəndə heyətində Ömürboyu Öyrənmə Məktəbinin direktoru Aynurə İsmayılova, Logistika və Nəqliyyat İnstitutunun direktoru Fuad Daşdəmirov, AzTU-nun rəqəmsal transformasiya üzrə məşvərət şurasının koordinatoru, universitetin İctimai şurasının sədri Osman Gündüz, İctimaiyyətlə əlaqələr şöbəsinin müdiri Sevinc İsgəndərova iştirak edib.

Azərbaycan Texniki Universitetinin (AzTU) rektoru Vilayət Vəliyevin rəhbərlik etdiyi nümayəndə heyəti Qəbələ Dövlət Peşə Təhsil Mərkəzinə səfər edib. Məqsəd universitet-peşə təhsili işbirliyinin inkişaf etdirilməsi, ömürboyu təhsil istiqamətində müvafiq proqramların həyata keçirilməsi, həmçinin tədris proqramlarının sənayenin tələblərinə uyğunlaşdırılması və əməkdaşlığın yeni istiqamətlərinin müəyyənləşdirilməsi olub. Əvvəlcə Qəbələ Dövlət Peşə Təhsil Mərkəzinə infotur həyata keçirilib. Mərkəzin direktoru Qalib Nəbiyev burada görülən işlər, həyata keçirilən layihələr, tədris proqramları barədə qonaqlara məlumat verib. Qeyd edək ki, AzTU rektorunun rəhbərlik etdiyi nümayəndə heyətində Ömürboyu Öyrənmə Məktəbinin direktoru Aynurə İsmayılova, Logistika və Nəqliyyat İnstitutunun direktoru Fuad Daşdəmirov, AzTU-nun rəqəmsal transformasiya üzrə məşvərət şurasının koordinatoru, universitetin İctimai şurasının sədri Osman Gündüz, İctimaiyyətlə əlaqələr şöbəsinin müdiri Sevinc İsgəndərova iştirak edib.