Azərbaycan Texniki Universiteti (AzTU) növbəti dəfə ilkə imza atıb. İnnovasiya və Rəqəmsal İnkişaf Agentliyinin təşəbbüsü ilə “Nokia” şirkəti AzTU-da laboratoriya açıb. AzTU-nun İnformasiya və telekommunikasiya texnologiyaları fakültəsində fəaliyyətə başlayan yeni xPON laboratoriyası “Nokia” tərəfindən tam təchiz olunub. Qeyd edək ki, xPON texnologiyası daha aşağı maliyyə sərf etməklə 5G stansiyaları üçün transmissiya təmin etmək imkanı verir. Açılış mərasimində AzTU, İnnovasiya və Rəqəmsal İnkişaf Agentliyi, İnformasiya Kommunikasiya Texnologiyaları Agentliyi, “Nokia” şirkətinin region və Azərbaycan üzrə rəhbər heyəti, şirkət rəhbərləri və digər qonaqlar iştirak edib. Onlar laboratoriyada yaradılan şəraitlə yaxından tanış olublar. Laboratoriya haqqında məlumat verən AzTU-nun Radiotexnika və telekommunikasiya kafedrasının müdiri Mehman Həsənov bildirib ki, 5G yalnız mobil texnologiyalara aid olmayıb, eyni zamanda son mildə işləyən müasir ağıllı ev, tibb, nəqliyyat, hərb və sənaye əşyalarının idarə olunması üçün geniş istifadə olunur. Laboratoriyanın açılmasında məqsəd əmək bazarının tələblərinə uyğun yerli kadrların hazırlanmasıdır. Laboratoriyada müvafiq istiqamət üzrə tədqiqatlar da aparılacaq. AzTU-nun rektoru Vilayət Vəliyev, Təhsilin İnkişafı Fondunun İdarə Heyətinin sədri Elnur Nəsibov, İnnovasiya və Rəqəmsal İnkişaf Agentliyinin departament müdiri Fatimə Ələkbərova, İnformasiya Kommunikasiya Texnologiyaları Agentliyinin İdarə Heyətinin rəhbəri Nail Mərdanov, “Nokia” şirkətinin Azərbaycan üzrə rəhbəri Aleksandr Shunin və satış müdiri Hilal Əfrasiyabov çıxış edərək rəqəmsal savadlılığın artması baxımından laboratariyanın əhəmiyyətini vurğulayıblar. Bildirilib ki, bu təşəbbüs yeni həllərin və tədqiqatların inkişaf etdirilməsi üçün geniş imkanlar yaradacaq. İlkin mərhələdə AzTU-nun İnformasiya və telekommunikasiya texnologiyaları fakültəsinin 800-ə yaxın tələbəsinə və müəllim heyətinə avadanlıqlardan düzgün istifadə qaydalarına dair təlimatlar veriləcək. Eyni zamanda, istifadəyə veriləcək laboratoriya yerli şirkətlərə açıq olacaq ki, bununla da şirkətlər avadanlıqlar üzərində sınaq və təcrübə prosesləri həyata keçirə biləcəklər. Daha sonra keçirilən dəyirmi masada universitet-sənaye tandemində mövcud əməkdaşlıq imkanları müzakirə olunub. Xatırladaq ki, ötən ilin aprel ayında İnnovasiya və Rəqəmsal İnkişaf Agentliyinin təşəbbüsü ilə AzTU və “Nokia” şirkəti arasında yeni laboratoriyanın təsis olunmasına dair müqavilə imzalanmışdı.

“Azərbaycanda Rektorlar Konfransının yaradılması” (ECAR) layihəsi çərçivəsində hesabat konfransı keçirilib. Konfransda 28 yerli ali təhsil müəssisəsindən, Kiçik və Orta Biznesin İnkişafı Agentliyindən,  Dövlət Məşğulluq Agentliyindən, Əmək Bazarı və Sosial Müdafiə Məsələləri üzrə Milli Observatoriyadan, həmçinin layihənin xarici partnyorları olan Litvanın Mykolo Romero Universitetindən, İsveçin Kral Texnologiya Universitetindən, Belçikanın EFMD təşkilatından ümumilikdə 100-dən çox nümayəndə iştirak edib. Tədbirdə Azərbaycan Texniki Universitetini (AzTU) beynəlxalq əlaqələr üzrə prorektor Fariz Məmmədov, Beynəlxalq əlaqələr şöbəsinin əməkdaşları Mətanət Paşayeva, Nubar Fərhadzadə və Karyera və Məşğulluq Mərkəzinin baş mütəxəssisi Ülviyyə Rəsulova təmsil edib. Konfransın əsas məqsədi layihə çərçivəsində fəaliyyət göstərən komitələrin hesabatlarının dinlənilməsi və müvafiq müzakirələrin aparılması olub. Hesabat məruzələri dinlənildikdən sonra “Erasmus” Azərbaycan Ofisinin rəhbəri Pərviz Bağırov çıxış edərək həyata keçirilən beynəlxalq layihələrin Azərbaycan ali təhsilinin hərtərəfli inkişafı baxımından önəmindən bəhs edib. Layihənin xarici tərəfdaşları qismində isə Litvanın Mykolo Romerio Universitetinin  tədris işləri üzrə prorektoru Regina Valutytė və Belçika EFMD təşkilatının beynəlxalq layihələr üzrə direktoru Kristofer Terrase çıxış edərək layihə barəsində öz təəssüratlarını bölüşüblər.

Məlumat informasiya sistemləri sahəsində ixtisaslaşmış Almaniyanın məşhur SAP şirkətinin Azərbaycan üzrə baş direktoru Anar Əliyev Azərbaycan Texniki Universitetində (AzTU) seminar keçib. Seminarda  Beynəlxalq ticarət, logistika və marketinq kafedrasının müəllimi, AzTU-nun SAP üzrə əlaqələndiricisi Nuran Süleymanova da iştirak edib.  İqtisadiyyat və idarəetmə fakültəsinin tələbələri üçün təşkil edilən seminarda SAP mütəxəssisi kimi formalaşmaq üçün mövcud tələblər, SAP-nin yerli və qlobal bazarlarında təcrübə fürsətləri müzakirə edilib. Həmçinin SAP Universitet Alyanslarının qlobal meneceri Yuri Kuprianov görüşə onlayn formatda qatılaraq tələbələri maraqlandıran sualları cavablandırıb. Qeyd edək ki, AzTU 2024-cü ildən etibarən Qlobal SAP Universitetlər Alyansının üzvüdür və şirkətlə birgə mütəmadi tədbirlər həyata keçirir.

Kənd Təsərrüfatı Nazirliyinin Aqrar İnnovasiya Mərkəzi, Azərbaycan Texniki Universiteti (AzTU) və AzTU-da yerləşən “Bilişim Vadisi Bakı”nın təşkilatçılığı, bir sıra inkubasiya və akselerasiya mərkəzlərinin tərəfdaşlığı ilə “GreenAgroHack" hakaton yarışması ilə bağlı görüşlərə start verilib. Bu qəbildən olan ilk məlumatlandırma sessiyası AzTU-da keçirilib. Tədbirdə çıxış edən AzTU-nun rektoru Vilayət Vəliyev, Aqrar İnnovasiya Mərkəzinin direktoru Anar Cəfərov, “Bilişim Vadisi Bakı”nın direktoru Qamət Kərimov, “FemTech” Akselerasiya Mərkəzinin rəhbəri Nərgiz Əmrəhova hakatonun əhəmiyyətindən danışıb və tələbələri yarışmada iştiraka dəvət ediblər. Bildirilib ki, “GreenAgroHack” 15-17 may 2023-cü il tarixində keçiriləcək “17-ci Azərbaycan Beynəlxalq Kənd Təsərrüfatı Sərgisi” çərçivəsində 29 saat 29 dəqiqə 29 saniyə müddətində verilmiş texniki tapşırığa uyğun olaraq müəyyən texnoloji həllərin tapılması və hazırlanması müsabiqəsidir. Hakatonunun məqsədi “Yaşıl dünya naminə həmrəylik ili” çərçivəsində ölkənin qabaqcıl ali təhsil müəssisələrinin tələbələrinin iştirakı ilə kənd təsərrüfatı sahəsi istiqamətində xüsusi proqram təminatlarının, ağıllı həllərin hazırlanması, aqrar sahədə innovasiyanın rolu və əhəmiyyətini gənclər arasında təşviq etməkdir. Qeyd edək ki, hakatonda iştirak üçün ən azı iki fərqli universitetin tələbələrindən formalaşdırılan maksimum 5 nəfərdən ibarət (minimum 1 xanım olmaqla və ötən illərin məzun tələbələrindən 1 nəfər mentor qismində) komanda və ya fərdi şəkildə müraciət etmək olar. Fərdi müraciət edən şəxslər müraciətlər bitdikdən sonra təşkilat komitəsi tərəfindən 5 nəfərlik komandalar şəklində qruplaşdırılacaq. İnfosessiyadan sonra universitetin laboratoriya və emalatxanasına baxış keçirilib.

Rəqəmsal İnkişaf və Nəqliyyat Nazirliyi, İnnovasiya və Rəqəmsal İnkişaf Agentliyinin İsrailin “Technion” Texnologiya İnstitutu ilə birgə təsis etdiyi Azərbaycan Kibertəhlükəsizlik Mərkəzinin IV dalğasına start verilib. Bununla bağlı Azərbaycan Texniki Universitetində (AzTU) tələbələrin iştirakı ilə infosessiya keçirilib.   Əvvəlcə AzTU-nun prorektoru Rəşad Əliyev mərkəzin təlimlərinin yeni dalğası barədə ətraflı məlumat verib. Bildirib ki, təlimlərdən yararlanmaq üçün ingilis dili bilikləri və baza İKT bacarıqlarına malik olan 17 yaşdan yuxarı hər bir Azərbaycan vətəndaşı müraciət edə bilər.  Daha sonra Azərbaycan Kibertəhlükəsizlik Mərkəzinin əməkdaşları təlimlərin mahiyyəti və seçim proseduru haqqında zəruri məlumatları tələbələrin diqqətinə çatdırıblar. Sonda tələbələri maraqlandıran suallar cavablandırılıb.

AzTU Elmi şurasının növbəti iclası keçirilib. İclasda Baş nazir Əli Əsədovun “Azərbaycan Texniki Universitetinin yenidən təşkili və Nizamnaməsinin təsdiq edilməsi haqqında” Qərarından irəli gələn məsələrlə bağlı müvafiq tapşırıqlar verilib. Eyni zamanda, tədrisin keyfiyyətinin artırılması, elmi-tədqiqat işlərinin beynəlxalq standartlar əsasında formalaşdırılması, eləcə də texnoloji transfer fəaliyyətinin və universitet sahibkarlığının artırılması ilə bağlı qərar qəbul edilib. Buna müvafiq olaraq AzTU-nun yeni strukturu təsdiqlənib. “Machine science” jurnalının beynəlxalq elmi bazalara düşməsi üçün tədbirlər planı da təsdiq olunub. İclasda Prezident İlham Əliyevin 2022-cil il dekabrın 24-də Qərbi Azərbaycan İcmasının üzvləri ilə görüşdə səsləndirdiyi fikirlər, xüsusilə Qərbi Azərbaycana Qayıdış Konsepsiyasının hazırlanması istiqamətində verdiyi tapşırıqlara uyğun olaraq, AzTU-da “Qərbi Azərbaycan Texnoloji İrsi” Mərkəzinin yaradılması haqqında qərar qəbul edilib. Mərkəz ictimai əsaslarla fəaliyyət göstərəcək. 

4-5 dekabr 2023-cü il tarixlə­rin­də Azər­­­­baycan Texniki Universiteti (AzTU) (Azərbaycan), Brandenburq Texniki Universiteti Kotbus-Zenf­­tenberq (Almaniya) və Qazi Universitetinin (Türkiyə) təş­ki­lat­çı­lı­ğı ilə AzTU-da keçirilmiş “Maşınqayırma və energetika: yeni konsepsiyalar və tex­nologi­ya­lar” 2-ci beynəlxalq konfransının materialları İsveçrənin “Trans Tech Publication” nəşriyyatı ilə razılaşmaya əsasən beynəlxalq bazalara daxiıl olan jurnallarda dərc olunub. “Trans Tech Publication” nəşriyyatı məqalələri rəydən keçirdikdən sonra Scopus xülasələndirmə və indeksləmə bazasına daxil olan “Advances in Science and Technology” jurnalında 35 məqalə, “Key Engineering Materials” jurnalında 9 məqalə, “Materials Science Forum” jurnalında 6 məqalə olmaqla ümumilikdə 50 elmi məqalə dərc edib.  Əlavə olaraq konfransın 23 məqaləsi isə “Google Scholar”, “ProQuest”, “Ulrichsweb”, “EBSCOhost Research Databases”, “WorldCat (OCLC)” və digər  xülasələndirmə və indeksləmə bazlarına daxil olan  “Engineering Headway” toplusunda nəşr olunub. Yaxın günlərdə bütün materiallar müvafiq  beynəlxalq elmi xülasələndirmə və indeksləmə bazalarında əks olunacaq. Qeyd edək ki, AzTU “QS World University Ranking”, “Times Higher Education” və s. beynəlxalq bazalarda reytinqinin yüksəldilməsi məqsədilə bu qəbildən olan konfransların təşkilini davam etdiməyi planlaşdırır. https://www.scientific.net/MSF.1119 https://www.scientific.net/KEM.979 https://www.scientific.net/AST.148 https://www.scientific.net/EH.7

Baş nazir Əli Əsədov “Azərbaycan Texniki Universitetinin yenidən təşkili və Nizamnaməsinin təsdiq edilməsi haqqında” Qərar imzalayıb. Qərara əsasən, Azərbaycan Texniki Universiteti Elm və Təhsil Nazirliyinin tabeliyində publik hüquqi şəxs statusuna malik olan Azərbaycan Texniki Universitetinə çevrilmə yolu ilə yenidən təşkil edilib və “Azərbaycan Texniki Universitetinin Nizamnaməsi” təsdiq edilib. Elm və Təhsil Nazirliyi bu Qərar qüvvəyə mindiyi tarixdən üç gün müddətində Azərbaycan Texniki Universitetinin “Hüquqi şəxslərin dövlət qeydiyyatı və dövlət reyestri haqqında” Azərbaycan Respublikasının Qanununa uyğun olaraq dövlət qeydiyyatına alınması üçün zəruri tədbirlərin görülməsini təmin edəcək.

Azərbaycan Texniki Universitetinin (AzTU) Maşınqayırma və robototexnika fakültəsinin qida mühəndisliyi ixtisasında təhsil alan tələbələrlə Azərbaycan Qida Təhlükəsizliyi İnstitutunun (AQTİ) nümayəndələrinin görüşü keçirilib. “Şəkəri azalt, ömrünü uzat!” kampaniyası çərçivəsində keçirilən görüşdə “Şəkərin zərərləri”, “Şəkər əvəzediciləri” və “Gündəlik qida rasionunda meyvə-tərəvəzin əhəmiyyəti” mövzularında təqdimatlar edilib. Qeyd olunub ki, kampaniya əhali arasında sağlam həyat tərzinin təbliğ olunması və vətəndaşların sağlam qidalanmaya, o cümlədən şəkərin normaya uyğun qaydada istehlak edilməsinə təşviq olunması məqsədilə həyata keçirilir.  Xüsusi vurğulanıb ki, şəkərdən normadan artıq istifadə edilməsi insan orqanizmində ürək-damar xəstəlikləri, ll tip diabet, piylənmə, diş çürüməsi, uşaqlarda diqqət zəifliyi və allergik reaksiyaların yaranması, yeniyetmələrdə qavrama qabiliyyətinin aşağı düşməsi, immun sistemin zəifləməsi və xərçəng xəstəliyinin bəzi növlərinin yaranma ehtimalını artırması kimi problemlər yarada bilər. Görüşün sonunda tələbələrin sualları cavablandırılıb.

Taylandın Banqkok şəhərində Stamford Beynəlxalq Universitetinin təşkilatçılığı ilə “İxtiraçılıq hesablamaları və informasiya texnologiyaları” mövzusunda 6-cı beynəlxalq konfrans keçirilib. Onlayn formatda təşkil olunan konfransda dünyanın müxtəlif ölkələrindən alimlər və tədqiqatçılar iştirak edib. Konfransda Azərbaycan Texniki Universitetini (AzTU) Radiotexnika və telekommunikasiya kafedrasının müdiri professor Mehman Həsənovun rəhbərliyi ilə kafedranın doktorantları Nadir Atayev, Emin Payızov, Turanə Rəsullu, həmçinin Mühəndis riyaziyyatı və süni intellekt kafedrasının dosenti Sahib Piriyev təmsil edib. AzTU nümayəndələri konfransda “Süni neyron analizindən istifadə edərək boş fəzada optik şəbəkələrin adaptiv monitorinqi (Adaptive monitoring of free space optical networks utilizing artificial neuron analysis)” mövzusunda çıxış ediblər. Konfransın sonunda iştirakçılara sertifikat təqdim olunub. Qeyd edək ki, konfransda seçilən məqalələr “Web of Science” və “Scopus” bazalarında indeksləşən jurnallarda nəşr olunacaq.