Azərbaycan Texniki Universitetində (AzTU) Dayanıqlı İnkişaf İnstitutunun əməkdaşı İqor Nasirov “Azərbaycanın dünyanın yaşıl gələcəyinə artan töhfəsi” (“Growing Contribution of Azerbaijan to Earth’s Green Future”) mövzusunda master-klass keçib. Tədbirin birinci hissəsi "Birləşmiş Millətlər Təşkilatının İqlim Dəyişikliyi üzrə Çərçivə Konvensiyasına (UNFCCC) həsr olunub. Məqsəd COP29-un müxtəlif aspektlərini və onun qlobal iqlim gündəliyinə uyğunluğunu tədqiqatçıların, professor-müəllim heyətinin, tələbələrin diqqətinə çatdırmaq olub. Tədbirdə qlobal tendensiyalar və təcrübələr, Azərbaycanın yaşıl dünyaya verəcəyi töhfələr, COP29 çərçivəsində ölkəmizdə icra olunacaq layihələr və digər məsələlər haqqında geniş məlumat verilib.

Azərbaycan Texniki Universitetinin (AzTU) məzunları universiteti bitirmələrinin 30 illiyini təhsil aldıqları ali təhsil müəssisəsində qeyd ediblər.    1994-cü ildə elektron hesablama maşınları, kompleksləri, sistemləri ve şəbəkələri ixtisasında təhsil almış məzunlar AzTU-nun rektoru Vilayət Vəliyevlə görüşüblər. Rektor Vilayət Vəliyev məzunları görməkdən məmnunluğunu bildirib və bu ənənənin davam etdirilməsinin vacibliyini vurğulayıb. Məzunların universitetin ictimai-sosial həyatında yaxından iştirak etmələrinin, təcrübələrini tələbələrilə bölüşmələrinin əhəmiyyəti də qeyd olunub.   AzTU-da həyata keçirilən yeniliklər haqqında məlumat verən rektor məzunların vahid platformada birləşmələri məqsədilə universitetdə qurulacaq Məzun Assosiasiyası haqqında da məlumat verib. Görüşün sonunda AzTU məzunları adından Məzun Assosiasiyasına universitetin fotosunun əks olunduğu xalça hədiyyə edilib. 

Azərbaycan Texniki Universitetinin (AzTU) rektoru Vilayət Vəliyev AzTU basketbol komandasının üzvləri ilə görüşüb. Tam Gənc Basketbol Liqasının qalibi olmaları münasibətilə komandanın üzvlərini təbrik edən rektor, onlara gələcək yarışlarda uğurlar arzulayıb. Rektor həmçinin tələbələrin dərsləri ilə maraqlanıb və onların suallarını cavablandırıb. Qeyd edək ki, Tam Gənc Basketbol Liqasının final oyununda AzTU komandası Azərbaycan Dövlət Bədən Tərbiyəsi və İdman Akademiyasının (ADBTİA) komandasını 85-73 hesabı ilə məğlub edərək çempion adını qazanıb.  

Şimali Kipr Türk Respublikasının Dünya Barış Universitetinin inzibati işlər üzrə prorektoru Behiyye Tüzel Çavuşoğlunun başçılıq etdiyi nümayəndə heyəti ölkəmizə səfəri çərçivəsində Azərbaycan Texniki Universitetinin (AzTU) qonağı olub. Qonaqlar AzTU-nun rektoru Vilayət Vəliyev və universitetin nümayəndələri ilə görüşüblər. Rektor Vilayət Vəliyev AzTU-da görülən işlər və həyata keçirilən layihələr haqqında qonaqlara ətraflı məlumat verib. Prorektor Behiyye Tüzel Çavuşoğlu təmsil etdiyi ali təhsil müəssisəsinin fəaliyyəti barədə geniş məlumat verib. Görüşdə ortaq ixtisaslar üzrə tədris və tədqiqat sahəsində əməkdaşlıq imkanları müzakirə olunub.

Alman Akademik Mübadilə Xidmətinin (DAAD) Tbilisi Regional Ofisinin Cənubi Qafqaz ölkələrindən olan DAAD Alumni/Səfirləri üçün Gürcüstanın Tsinandali şəhərində regional görüşü təşkil edilib. Tədbirdə AzTU-nun elm və innovasiyalar üzrə prorektoru prof. Sübhan Namazov, Maşınqayırma texnologiyası kafedrasının müdiri prof. Nizami Yusubov və Alman mühəndislik fakültəsinin dekanı dos. Ərəstun Məmmədov iştirak edib. Tədbir ali təhsilin beynəlmiləlləşdirilməsi üçün Almaniya və Cənubi Qafqaz ölkələrinin ali təhsil müəssisələri arasında mövcud əlaqələrin gücləndirilməsi və yeni tərəfdaşlıq əlaqələrinin qurulmasına xidmət edən DAAD-nin institusional əməkdaşlıq proqramları ilə yaxından tanış olmaq, region universitetlərini maraqlandıran təhsil, tədqiqat və elm sahələrində mövcud çağırışlar, ali təhsilin inkişafı üçün vacib məsələləri müzakirə etmək məqsədilə təşkil edilib. Sözügedən məsələlər alman universitetlərinin Cənubi Qafqaz ölkələri universitetləri ilə mövcud və ya artıq yekunlaşdırılmış layihələri üzərindən praktiki misallara əsaslanan təqdimatlarla müzakirə olunub. Görüşdə həmçinin 2024-cü ilin oktyabrın 19-21-də Tbilisidə keçirilməsi planlaşdırılan DAAD Alumni/Məzunları üçün Cənubi Qafqaz regional tədbirinə hazırlıq, tədbirin yüksək səviyyədə təşkili üçün təkliflərin verilməsi ilə bağlı fikir mübadiləsi aparılıb. Bundan başqa, oktyabrda Tbilisidə keçiriləcək DAAD Alumni/Məzunları üçün Cənubi Qafqaz regional tədbirinə AzTU-nun əməkdaşlıq edəcəyi planlaşdırılan alman universitetlərindən nümayəndələrin cəlb edilməsi də təklif edilib.

Azərbaycan Texniki Universitetində (AzTU) “Texnest” çərçivəsində təşkil olunan təlimlərin mükafatlandırılma mərasimi keçirilib. AzTU SABAH qrupları, İnnovasiya və Rəqəmsal İnkişaf Agentliyi , “IT Brains Academy” və “Technest University”nin tərəfdaşlığı və dəstəyi ilə təşkil olunan təlimlər 3 ay davam edib. Tədbirdə AzTU-nun tədris işləri üzrə prorektoru Nurəli Yusifbəyli, Elm və Ali Təhsil üzrə Dövlət Agentliyinin SABAH qrupları layihəsi İcra  Komitəsinin rəhbəri Elza Səmədova, İnnovasiya və Rəqəmsal İnkişaf Agentliyinin departament rəhbəri Fatimə Ələkbərova, “IT  Brains Academy”nin təhsisçisi və rəhbəri Orxan Məmmədov çıxış edərək təlimlərin əhəmiyyətindən danışıblar. Sonda təlimləri uğurla bitirən tələbələrə sertifikat təqdim olunub.

Azərbaycan Texniki Universitetinin (AzTU) 6 tələbəsi və 1 akademik işçisinin qatıldığı təcrübə və tədqiqat proqramının ilk həftəsi uğurla tamamlanıb. Təcrübə proqramı Avropa Birliyinin maliyyələşdirdiyi “Erasmus+ KA2” proqramı üzrə həyata keçirilən “İnnovasiya və dayanıqlılıq prinsipləri ilə klasterlərin işlənməsinə başlamaqda və iştirakda universitetlərin potensialının artırılması” (UniClaD) layihəsi çərçivəsində həyata keçirilir. Proqram çərçivəsində tədqiqatçılar 28 gün ərzində Avstriyanın Vyana şəhərində yerləşən Aqrar və Ekoloji Pedaqogika Universitetində (HUAP) təcrübə və tədqiqat proqramında iştirak edəcəklər.   Proqramın ilk həftəsində iştirakçılar araşdırma yönümlü müxtəlif təlimlərdə iştirak ediblər. Həmçinin universitet nəzdində fəaliyyət göstərən kitabxananın zəngin kitab fondundan öz tədqiqat istiqamətlərinə uyğun materiallar əldə edib, Avstriyada ənənəvi olaraq keçirilən araşdırma günləri çərçivəsində tədqiqatda rəqəmsal alətlərdən istifadə mövzusunda seminara qatılıb və müxtəlif proqram təminatlarının praktiki tətbiqini öyrəniblər.

Azərbaycan Texniki Universitetinin (AzTU) “SmartTech” İnnovatorlar Mərkəzinin direktoru, universitetin baş müəllimi Kərim Tahiroğlunun “Proqramçı olmaq istəyirəm” adlı kitabının təqdimatı keçirilib. Tədbirdə AzTU-nun professor-müəllim heyəti, tələbələr və Türkiyənin aparıcı universitetlərindən qonaqlar iştirak edib. Təqdimat mərasimində çıxış edən AzTU-nun rektoru Vilayət Vəliyev, Azərbaycan İnternet Forumunun prezidenti Osman Gündüz, Bakı Mühəndislik Universitetinin baş müəllimi Bəhman Qüdsi, Türkiyənin Orta Doğu Texniki Universitetinin (ODTU) professoru Mehmet Halit Oğuztüzün kitab haqqında fikirlərini bildirib. Qeyd olunub ki, “Proqramçı olmaq istəyirəm” kitabı proqramçı peşəsinə yiyələnmək istəyənlərə əhatəli yol xəritəsi təqdim edir. Nəşrdə oxucuları müvafiq sahə üzrə düşündürən suallar ətraflı cavablandırılıb, proqramlaşdırma ixtisasının mahiyyəti, başlıca istiqamətləri geniş şərh edilib. Kitab kompüter mühəndisliyi və kompüter elmləri ixtisaslarında təhsil alan tələbələr, bu sahələr üzrə dərs deyən müəllimlər, gənc proqramçılar və ümumilikdə proqramlaşdırma sahəsinə maraq göstərən hər kəs üçün nəzərdə tutulub. Qeyd edək ki, kitabın öz sözünün müəllifi AzTU-nun rektoru Vilayət Vəliyevdir.

İsrailin Bar-İlan Universitetinin Mühəndislik fakültəsinin dekanı Zeev Zalevskinin başçılıq etdiyi nümayəndə heyəti ölkəmizə səfəri çərçivəsində Azərbaycan Texniki Universitetinin (AzTU) qonağı olub. Qonaqlar AzTU-nun rektoru Vilayət Vəliyev və universitetin nümayəndələri ilə görüşüblər. Rektor Vilayət Vəliyev AzTU-da görülən işlər və həyata keçirilən layihələr haqqında qonaqlara ətraflı məlumat verib. Dekan Zeev Zalevski təmsil etdiyi ali təhsil müəssisəsinin və müvafiq fakültənin fəaliyyəti barədə geniş məlumat verib. Görüşdə mühəndislik ixtisasları üzrə tədris və tədqiqat sahəsində əməkdaşlıq imkanları müzakirə olunub.

Azərbaycan Texniki Universitetinin (AzTU) SABAH qruplarının bakalavriat və magistratura səviyyələrində 2024/2025-cü tədris ilinə qəbulla bağlı tələbələrin məlumatlandırılması üçün infosessiya keçirilib. Tədbirdə AzTU-nun tədris işləri üzrə prorektoru Nurəli Yusifbəyli, Elm və Ali Təhsil üzrə Dövlət Agentliyinin SABAH qrupları layihəsi İcra Komitəsinin rəhbəri Elza Səmədova çıxış edərək AzTU SABAH qruplarına qəbul proseduru barədə zəruri məlumatları tələbələrin diqqətinə çatdırıblar.  Sonda tələbələrin sualları cavablandırılıb.