AzTU-nun Elmi şurasının iclasında ChatGPT və buna bənzər digər süni intellekt sistemlərinin universitet daxilində kütləvi istifadəsi ilə bağlı qərar verilib. İclasda mühəndis hazırlığının müasir texnoloji inkişaf trendlərini qarşılayan ixtisas fənlərinin data elmi, süni intellekt üsulları, kiber-fiziki sistemlər əsasında formalaşdırılması qərara alınıb.   Həmçinin qərar verilib ki, universitetin beynəlxalq reytinqlərdə nüfuzlu mövqedə olması ilə bağlı görülən işlər daha da təkmilləşdiriləcək və bu istiqamətdə idarəetmədə müvafiq meyarlar (KPİs) tətbiq ediləcək.

AzTU-da hazırlanan “CUBESAT” nanopeykinin prototipinin təqdimatı keçirilib. Təqdimatda “Azərkosmos”, Müdafiə Sənayesi Nazirliyi, Milli Aerokosmik Agentliyi və Milli Müdafiə Universitetinin nümayəndələri iştirak edib. Layihənin rəhbəri, AzTU-nun Radiotexnika və telekommunikasiya kafedrasının müdiri professor Mehman Həsənov layihənin ərsəyə gəlməsi ilə bağlı geniş təqdimatla çıxış edib. Bildirib ki, bu layihə Azərbaycanda bir ilk hesab olunur və nanopeykin işlək modelidir. Aşağı yer orbitində yerləşən peyklərin yaradılmasında bu layihənin böyük rolu olacaq. Nanopeykin hazırlanmasında AzTU tərəfindən patentləşdirilmiş ilk 3D optik kommutator istifadə olunub. Daha sonra AzTU-nun bu layihə üzrə tədqiqat aparan doktorantı, layihənin əsas icraçılarından olan Nadir Atayev prototipin detalları haqqında geniş məlumat verib.

  Azərbaycan Texniki Universiteti (AzTU) növbəti uğura imza atıb. Belə ki, AzTU-nun koordinatorluğu ilə hazırlanan “Gürcüstan, Azərbaycan və Qazaxıstanda optik şəbəkələr və optik kommunikasiyalar üzrə ali təhsil müəsisələrinin monitorinq və idarəetmə potensiallarının artırılması” (Enhancing monitoring and management capacities of Higher education institutions on optical networks and optical communication in Georgia, Azerbaijan, Kazakhstan, ERASMUS-EDU-2024-CBHE-STRAND-2 -“OPTIFY”) adlı "Erasmus+" layihəsi Avropa Komissiyası tərəfindən qalib elan olunub. Layihə çərçivəsində Azərbaycanda genislənməkdə olan optik şəbəkələrin monitorinqi və idarəolunması üzrə magistratura səviyyəsində yeni ixtisas açılacaq. Bu ixtisas üzrə müasir səriştələrə və bacarıqlara malik kadr hazırlığı yerinə yetiriləcək, akademik heyətin qabaqcıl Avropa ali təhsil müəssisələrində müvafiq məzmun və müasir tədris üsulları üzrə təlimi yerinə yetiriləcək. Həmçinin layihənin tərəfdaş universitetlərinin bazasında yeni tədris laboratoriyası yaradılacaq, sənaye üçün müvafiq məzmunlu təhsil modulları formalaşdırılacaq. Qeyd edək ki, layihənin Azərbaycan üzrə tərəfdaşları Elm və Təhsil Nazirliyi, Bakı Mühəndislik Universiteti, Milli Aviasiya Akademiyası və Azərbaycan Texnologiya Universitetidir. Layihə konsorsiumuna Avropa Komissiyasının proqram ölkələrinə daxil olan 4 , Qazaxstandan 3 və Gürcüstandan 3 tərəfdaş ali təhsil müəsisəsi daxil edilib. 

Mingəçevir Dövlət Universitetinin koordinatoru olduğu Avropa Komissiyasının maliyyə dəstəyi ilə həyata keçirilən “Azərbaycan ali təhsil müəssisələrində davamlı sahibkarlıq ekosisteminin gücləndirilməsi” (ENGAGE) layihəsi çərçivəsində daha bir təlim Portuqaliyada keçirilib. Təlimə layihənin Avropa tərəfdaşı Lissabon Texniki Universiteti ev sahibliyi edib.   Səfərdə Azərbaycan Texniki Universitetini (AzTU) tədris işləri üzrə prorektor professor Nurəli Yusifbəyli təmsil edib. Təlim proqramının ilk günü universitetin beynəlxalq əlaqələr üzrə vitse-prezidenti professor Zita Martins layihənin üzvü olan Azərbaycanın 9 ali təhsil müəssisəsinin nümayəndə heyətini salamlayaraq sahibkarlıq təhsilində beynəlxalq əməkdaşlığın vacibliyindən danışıb. Oeiras şəhərciyinin vitse-prezidenti professor Joana Mendonça isə universitet şəhərciyinin sahibkarlıq təşəbbüslərinin dəstəklənməsində rolunu, eləcə də yerli və beynəlxalq innovasiya ekosisteminə verdiyi töhfələri qeyd edib. Daha sonra layihənin koordinatoru tərəfindən ENGAGE layihəsi haqqında qısa hesabat verilərək, təlim proqramının məqsədlərini və planlaşdırılan fəaliyyətləri iştirakçıların diqqətinə çatdırıb. Nümayəndə heyəti “Técnico Lisboa Doktorantura Məktəbi” və onun tədqiqat və innovasiyaları inkişaf etdirilməsi üzrə yanaşması ilə tanış olublar. Təlim müddətində Azərbaycan nümayəndə heyəti ilə sahibkarlıq təhsili üzrə açıq müzakirə də təşkil edilərək təcrübə mübadiləsi aparılıb. Daha sonra tələbələrin öz sahibkarlıq layihələrini təqdim etdikləri “E.Awards” proqramın təqdimatı keçirilib. Təlim proqramının yekununda Texnologiya Laboratoriyasına ziyarət təşkil edilib,  İnnovasiya Mərkəzi və tələbə laboratoriyaları təcrübələri haqqında geniş məlumat verilib.

Azərbaycan Texniki Universitetinin (AzTU) Nəqliyyat logistikası və hərəkətin təhlükəsizliyi kafedrasının dosenti Eldar Əfəndiyev vəfat edib. Eldar Əfəndiyev 1969-cu ildən AzTU-nun Avtomobillər kafedrasında əmək fəaliyyətinə başlayıb, daha sonra fəaliyyətini Nəqliyyat logistikası və hərəkətin təhlükəsizliyi  kafedrasında müxtəlif vəzifələrdə davam etdirib.    60-a yaxın elmi, elmi-metodiki məqalənin müəllifi idi. AzTU-nun rəhbərliyi və kollektivi Eldar Əfəndiyevin vəfatından kədərlənir, ailəsinə və yaxınlarına başsağlığı verir. Allah rəhmət eləsin!

Azərbaycan Texniki Universitetinin (AzTU) “SmartTech” İnnovatorlar Mərkəzinin əməkdaşı Vüqar Hüseynli “ICPC Azərbaycan” çərçivəsində keçirilən simpoziumda ICPC hərəkatının inkişafında xüsusi xidmətlərinə görə mükafatlandırılıb. Qeyd edək ki, simpozuim çərçivəsində ICPC hərəkatı, proqramlaşdırma olimpiadalarının İT sənayesinə təsiri və ölkənin rəqəmsallaşmasında rolu mövzularında panel sessiyalar təşkil olunub. Tələbələrin, ümumilikdə isə gənclərin proqramlaşdırma və İT sahəsinə marağının artırılması istiqamətində müzakirələr aparılıb. Həmçinin yerli universitetlərin beynəlxalq müsabiqələrdə göstərdiyi yüksək nəticələr diqqətə çatdırılıb. AzTU-nun rektoru Vilayət Vəliyev simpoziyumda mükafatlandırılan Vüqar Heseynli ilə görüşüb, ona fəaliyyətində uğurlar arzulayıb.

Azərbaycan Texniki Univeristetinin (AzTU) tərəfdaşı olduğu “Erasmus+ KA2” proqramı çərçivəsində yerinə yetirilən “Rusiya Federasiyası, Qazaxıstan və Azərbaycanda səhiyyədə strateji keyfiyyət menecmenti, risklərin idarə olunması üzrə açıq və distant təhsil formatında peşə bakalavrı, peşə magistr hazırlığı” (LMQS) layihəsi üzrə növbəti təlimlər təşkil olunub. Təlimlər Yunanıstanın Afina şəhərində layihənin koordinator universiteti Qərbi Attika Universitetində keçirilib. Səfərdə AzTU-nu Beynəlxalq əlaqələr şöbəsinin müdiri Orxan Vətənxah və İqtisadiyyat və idarəetmə fakültəsinin baş müəllimi Mürşüd Mehdiyev təmsil edib. “Səhiyyədə keyfiyyətin və risklərin idarə olunması” ixtisaslaşması üzrə yeni magistr proqramına  uyğun olaraq səhiyyədə idarəetmə, tədqiqat metodları, səhiyyə iqtisadiyyatı, səhiyyə maliyyəsi, səhiyyədə keyfiyyətin idarə edilməsi, səhiyyə siyasəti, sosial sığorta kimi mövzularında təlimlər təşkil edilib.  Səfərdə AzTU ilə yanaşı, layihənin yerli tərəfdaşlarından Naxçıvan Dövlət Universitetinin və Qazaxıstan universitetlərinin nümayəndələri də iştirak ediblər.

Mingəçevir Dövlət Universitetinin koordinatoru olduğu və Avropa Komissiyasının maliyyə dəstəyi ilə həyata keçirilən “Azərbaycan ali təhsil müəssisələrində davamlı sahibkarlıq ekosisteminin gücləndirilməsi” (ENGAGE) layihəsi çərçivəsində Polşaya işgüzar səfər keçirilib. Səfər 24-28 iyun tarixlərində Polşanın Bydgoszcz İqtisadiyyat Universitetinin ev sahibliyi ilə təşkil olunub. 5 günlük təlim proqramının əsas məqsədi layihənin hədəflərinə uyğun olaraq ali təhsil sistemində sahibkarlıq təşəbbüsləri və təcrübələrinə dair xarici təcrübənin öyrənilməsi olub. Belə ki, təlimlər zamanı sahibkarlığın inkişaf etdirilməsində geniş istifadə olunan müasir üsul və mexanizmlər, o cümlədən dizaynyönümlü düşüncə, Canvas biznes modelinin qurulması, sahibkarlıq təşəbbüsləri vasitəsilə sosial məşğulluq mühitinin yaradılması, şəxsi brendinqin formalaşdırılması, vizual marketinqin həyata keçirilməsi, fərdi potensialın kəşf edilməsi, sahibkarlıq təhsilində innovativ tədris metodlarının tətbiqi üzrə bilik və təcrübələr əldə edilib. Eyni zamanda təlim proqramı çərçivəsində Bydgoszcz şəhərinin sahibkarlıq subyektləri, eləcə də Bydgoszcz Sənaye və Texnologiya Parkı ilə tanışlıq həyata keçirilib. Təlimlərin nəticəsi olaraq öz biznes ideyaları üzərində qrup işləri aparan universitet nümayəndələri təqdimatlarla çıxış edərək geniş təcrübə mübadiləsi aparıblar. Azərbaycan Texniki Universitetinin (AzTU) təlimlərdə Beynəlxalq ticarət, logistika və marketinq kafedrasının professoru Fuad Qənbərov təmsil edib. Proqrama uyğun olaraq təlimlərin yekununda iştirakçılara Bydgoszcz İqtisadiyyat Universiteti tərəfindən sertifikat təqdim olunub.

Azərbaycan Texniki Universiteti (AzTU) ilə Milli Aerokosmik Agentliyi (MAKA) arasında əməkdaşlığa dair anlaşma memorandumu imzalanıb. Memorandumu AzTU-nun rektoru Vilayət Vəliyev və MAKA-nın baş direktoru Natiq Cavadov imzalayıblar. Sənədə əsasən, tərəflər müdafiə təyinatlı məhsulların yaradılmasının elmi-texniki və texnoloji problemlərini əhatə edən yeni mövzuların yazılması, o cümlədən universitet-sənaye işbirliyi istiqamətində əməkdaşlıq edəcəklər. Bundan başqa, tələbələrin MAKA-nın bazasında istehsalat təlimi və təcrübəsi keçmələri, elmi-tədqiqat işlərinin aparılması, MAKA-nın aparıcı mütəxəssislərinin AzTU-da tədris prosesinə, AzTU-nun professor-müəllim heyətinin isə MAKA-da elmi-tədqiqat, təcrübi-konstruktor və texnoloji layihələrin icrasına cəlb edilməsi nəzərdə tutulub.

Azərbaycan Texniki Universiteti (AzTU), Rəqəmsal İnkişaf və Nəqliyyat Nazirliyi tabeliyində İnnovasiya və Rəqəmsal İnkişaf Agentliyi və Elm və Təhsil Nazirliyi nəzdində Təhsil Sisteminin İnformasiyalaşdırılması İdarəsinin nümayəndələri arasında aparılan müzakirələrin nəticələrinə uyğun olaraq universitetə qəbul olunanların qeydiyyatı ilə bağlı bir ilkə imza atılıb. Belə ki, bu ildən AzTU-ya qəbul olunanlardan (bakalavr, magistr, doktorant) kağız formada heç bir sənəd tələb olunmayacaq. Sənədlər yalnız Elm və Təhsil Nazirliyinin portal.edu.az platforması üzərindən aparılacaq. Qeyd edək ki, bundan əvvəl ali təhsil müəssisələrinə qəbul olunanların qeydiyyatı portal.edu.az üzərindən aparılsa da, paralel olaraq universitetlər tələbələrdən kağız formada da sənədlər tələb edirdi. AzTU rəhbərliyi tələbələrin rahatlığını düşünərək onların vaxt itkisinin, əlavə xərclərinin, həmçinin kağız israfının qarşısını almaq, xüsusilə də ölkədə rəqəmsal transformasiyanın inkişafına töhfə vermək məqsədilə sözügedən yeniliyin tətbiqi ilə bağlı qərar verib.