Azərbaycan Texniki Universiteti (AzTU), Rəqəmsal İnkişaf və Nəqliyyat Nazirliyi tabeliyində İnnovasiya və Rəqəmsal İnkişaf Agentliyi və Elm və Təhsil Nazirliyi nəzdində Təhsil Sisteminin İnformasiyalaşdırılması İdarəsinin nümayəndələri arasında aparılan müzakirələrin nəticələrinə uyğun olaraq universitetə qəbul olunanların qeydiyyatı ilə bağlı bir ilkə imza atılıb. Belə ki, bu ildən AzTU-ya qəbul olunanlardan (bakalavr, magistr, doktorant) kağız formada heç bir sənəd tələb olunmayacaq. Sənədlər yalnız Elm və Təhsil Nazirliyinin portal.edu.az platforması üzərindən aparılacaq. Qeyd edək ki, bundan əvvəl ali təhsil müəssisələrinə qəbul olunanların qeydiyyatı portal.edu.az üzərindən aparılsa da, paralel olaraq universitetlər tələbələrdən kağız formada da sənədlər tələb edirdi. AzTU rəhbərliyi tələbələrin rahatlığını düşünərək onların vaxt itkisinin, əlavə xərclərinin, həmçinin kağız israfının qarşısını almaq, xüsusilə də ölkədə rəqəmsal transformasiyanın inkişafına töhfə vermək məqsədilə sözügedən yeniliyin tətbiqi ilə bağlı qərar verib.

İyulun 4-də Heydər Əliyev Mərkəzində “SABAH-ın məzunu – 2024” tədbiri keçirilib. Tədbirdə Prezident Administrasiyasının Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyeva, elm və təhsil naziri Emin Əmrullayev, millət vəkilləri, dövlət və özəl qurumların rəsmiləri, ali təhsil müəssisələrinin rektorları, müəllim və tələbələr, eləcə də digər qonaqlar iştirak ediblər. Əvvəlcə tədbir iştirakçıları SABAH məzunlarının nailiyyətlərini əks etdirən sərgi ilə tanış olublar.  Tədbir Dövlət Himninin səsləndirilməsi ilə başlayıb, ardınca şəhidlərimizin xatirəsi birdəqiqəlik sükutla yad edilib.   Sonra çıxış edən elm və təhsil naziri Emin Əmrullayev qonaqları salamlayaraq "SABAH qrupları" layihəsinin mahiyyət və məqsədi barədə danışıb. Layihənin ali təhsildə yenilik istiqamətində nəzərdə tutulan hədəflərə doğru bir addım olduğunu vurğulayan Emin Əmrullayev qeyd edib ki, SABAH ali təhsil müəssisələrinə yeni yanaşma gətirib. Nazir əlavə edib ki, savadlı və bacarıqlı tələbələr üçün yaradılmış bu proqrama nəzər saldıqda uğurlu nəticələri görmək mümkündür.   Nazir həmçinin bildirib ki, SABAH qruplarının 10 illik fəaliyyəti ərzində yaratdığı fərqli imkanlar tələbələr arasında rəqabət formalaşdırıb. Gələcəkdə bu pilot layihənin genişləndirilməsinin zəruriliyinə toxunan elm və təhsil naziri çıxışının sonunda SABAH məzunlarını təbrik edib və sözügedən qrupların fəaliyyətinin Azərbaycanı gələcəkdə daha güclü dövlətə çevirəcəyinə inamını bildirib.   Ardınca isə SABAH-ın uğurlu məzunları ilə bağlı videoçarx nümayiş etdirilib.   Tədbirdə hər il təkrarlanan ənənə – rəmzi SABAH açarının növbəti ilin məzunlarına ötürülməsi mərasimi də keçirilib.   Daha sonra yüksək göstəriciləri ilə fərqlənən məzunlar ali təhsil müəssisələrinin rektorları tərəfindən təltif olunublar.  Azərbaycan Texniki Universitetinin (AzTU) rektoru professor Vilayət Vəliyev AzTU-nun “SABAH” qruplarından iki fəxri məzuna (Babayev Elsevər Rəsul oğlu, Şükürov Ehtiram Etibar oğlu) sertifikat təqdim edib.   Təltifetmə mərasimindən sonra “SABAH qrupları – 2024” mövzusunda videoçarx nümayiş etdirilib.   Tədbir çərçivəsində SABAH qrupları tələbələrinin ifasında musiqi nömrələri də səsləndirilib.   Tədbirin sonunda isə xatirə şəkli çəkdirilib.   Qeyd edək ki, 2023–2024-cü tədris ilində 31 ixtisas üzrə 727 bakalavr, 8 ixtisas üzrə 339 magistr SABAH qruplarından məzun olub. AzTU-nun “SABAH” qruplarından 172 tələbə məzun olub.

Technest təqaüd proqramı çərçivəsində “ICPC Azərbaycan” və İnnovasiya və Rəqamsal İnkişaf Agentliyinin dəstəyi ilə ADA Universitetində "ICPC Azərbaycan: Yay Proqramlaşdırma Düşərgəsi" keçirilib. Düşərgə tələbələrin və tələbə komandalarının məşqçilərinin "49-cu ICPC Tələbələrin Beynəlxalq Proqramlaşdırma Müsabiqəsi"nə, məktəblilərin Respublika Fənn Olimpiadasına (RFO) və Beynəlxalq İnformatika Olimpiadalarına hazırlığı mərhələlərindən biri hesab olunur. Hazırlıq çərçivəsində hər gün olimpiada üçün mövzular izah olunur və bu mövzuya aid yarışlar keçirilir. Azərbaycan Texniki Universitetinin (AzTU) “SmartTech” İnnovatorlar Mərkəzinin əməkdaşları Kənan Əsgərli və Vüqar Hüseynli düşərgədə təşkil olunmuş təlimlərdə və yarışlarda universiteti uğurla təmsil ediblər.

Gənclər və idman naziri Fərid Qayıbov nazirliyin dəstəyi ilə “Enactus Misir” təcrübə mübadiləsində iştirak edən gənclərlə görüşüb. Görüşdə Azərbaycan Texniki Universitetinin (AzTU) “Enactus” komandasının nümayəndə heyəti, Tələbə Gənclər Təşkilatının sədri Ruslan Qənbərov Misir Ərəb Respublikasının “Enactus Misir” nümayəndəliyində təşkil olunan təcrübə mübadiləsi proqramında göstərdikləri fəaliyyətdən, səfər çərçivəsində topladıqları məlumatlardan bəhs ediblər. Gənclərin fikirlərini və təkliflərini dinləyən nazir Fərid Qayıbov onların bundan sonra da fəaliyyətlərinin davamlılığını arzulayıb.

Təcrübə tədris proqramının son mərhələsidir və tələbənin universitetdə qazandıqları nəzəri biliklərinin praktikada tətbiqi, eləcə də peşə bacarıqlarının gücləndirilməsinə xidmət edir. Tələbələr paytaxtda və bölgələrdə yaşayış yerlərinə yaxın təcrübə müəssisələrinə göndərilir, əcnəbi tələbələrə öz ölkələrində təcrübə keçmək imkanı yaradılır. 2023-2024-cü tədris ilinin yaz semestrində Azərbaycan Texniki Universitetinin (AzTU) bakalavriat səviyyəsinin IV təhsil ilində tədris alan 1542 tələbələsi ixtisaslarından asılı olaraq 6, 21 və 30 kreditlik təcrübələrdə iştirak ediblər. Magistratura səviyyəsi üzrə II təhsil ilində tədris alan 1179 magistrant hər biri 8 kredit olmaqla elmi-tədqiqat və elmi-pedaqoji təcrübələrdə iştirak ediblər.   AzTU tələbələrin təcrübə keçmələri ilə əlaqədar çoxsaylı müəssisələr, dövlət qurumları, xarici şirkətlərlə əməkdaşlıq edir. Belə ki, son tədris ili ərzində bazaya 42 daimi, 522 müvəqqəti əməkdaşlığımız olan müəssisə daxil olunub. Bu müssisələrlə 600-dən çox müqavilə bağlanılıb. Növbəti ildə də bir çox yerli və xarici müəssisələrlə əlaqələrin qurulması planlaşdırılır.

Azərbaycan Texniki Universitetində (AzTU) İnnovasiya və Rəqəmsal İnkişaf Agentliyinin (İRİA) və Təhsil Sisteminin İnformasiyalaşdırılması İdarəsinin (TSİİ) nümayəndələri ilə növbəti görüş keçirilib. Dəyirmi masa çərçivəsində İRİA və TSİİ-nin rəqəmsal təhsil həlləri ilə bağlı təqdimatları olub. Görüşdə rəqəmsal universitet mühitinin formalaşdırılması, tələbələrin qəbul prosesinin rəqəmsallaşdırılması və bunula əlaqəli atılacaq addımlar müzakirə olunub.

Azərbaycan Respublikasının Gənclər və İdman Nazirliyinin dəstəyi ilə Azərbaycan Texniki Universitetinin (AzTU)  “Enactus” komandası “Enactus Misir” təcrübə mübadiləsində təmsil olunub. Nümayəndə heyətində AzTU TGT sədri Ruslan Qənbərov da iştirak edib. Səfərin ilk günü “Enactus Azərbaycan” komandaları “Enactus Misir” nümayəndəliyinin partnyor şirkəti “Orange Digital Center”də görüş keçirib. Görüş ərzində Enactus Misir nümayəndəliyinin fəaliyyət strategiyaları, iş prinsipi və tərəfdaşlıq cəlbi məsələləri müzakirə edilib. Növbəti günlərdə isə Misir Ərəb Respublikasının Gənclər və İdman Nazirliyinin heyəti ilə görüş keçirilib. Görüş ərzində komandaların fəaliyyəti, görülmüş işlər və gələcək planlar müzakirə edilib.

Azərbaycan Texniki Universiteti (AzTU) Türkiyənin Sakarya Tətbiqi Elmlər Universiteti ilə “Erasmus+” mübadilə proqramı çərçivəsində əməkdaşlığı uğurla davam etdirir. Bu əməkdaşlıq çərçivəsində Sakarya Tətbiqi Elmlər Universitetinin Mexatronika mühəndisliyi kafedrasının müəllimi Gökhan Atalı AzTU-da səfərdə olub. AzTU-nun Mexatronika kafedrasının akademik heyətilə görüşən qonaq kafedranın tədris infrastrukturu, texniki bazası və laboratoriyaları ilə yaxından tanış olub və birgə layihələrin həyata keçirilməsi istiqamətində müzakirələr aparıb. Gökhan Atalı AzTU-nun mexatronika və robototexnika mühəndisliyi ixtisası üzrə təhsil alan tələbələrinə ixtisas üzrə mövzu ilə mühazirə oxuyub.

Azərbaycan Texniki Universitetində (AzTU) “Məzun Günü” keçirilib. Əvvəlcə torpaqlarımızın ərazi bütövlüyü və suverenliyi uğrunda canlarından keçən Vətən övladlarının əziz xatirəsi bir dəqiqəlik sükutla yad olunub. Azərbaycanın Dövlət Himni səsləndirilib. AzTU-nun rektoru Vilayət Vəliyev məzunları təbrik edib. Bildirib ki, bu il 2936 tələbə məzun adını qazanıb. Onların 1641-i bakalavr, 27-si əcnəbi tələbə, 1295-i magistr məzunlardır. Rektor son illər AzTU-da tədris və tədqiqat sahəsində həyata keçirilən yeniliklərdən də danışıb. Qeyd edib ki, bu il AzTU-da KOB subyektlərinin inkişafına dəstək məqsədilə KOB Model Müəssisəsi yaradılıb. Universitet-sahibarkalıq modelinə inteqrasiyanı təmin etmək məqsədilə universitetdə qurulan Mühəndis Gəliştirmə Proqramının emalatxanasında çalışan AzTU və Milli Aviasiya Akademiyasının tələbələri bir ilkə imza atdı. Belə ki, AzTU, TUSAŞ və MAA-nın birgə əməkdaşlığı çərçivəsində həyata keçirilən "AzTU-Turkish Aerospace, MGP 2023.1" yüksək ixtisaslı mühəndis hazırlığı təlim proqramı çərçivəsində müdafiə təyinatlı pilotsuz uçuş aparatının ilk uçuşu həyata keçirildi. Sağlam həyat tərzinin təbliği, tələbələrin zərərli vərdişlərdən uzaq olması, asudə vaxtlarının səmərəli təşkili istiqamətində təşkil olunan idman yarışları bu il də davam etdi. AzTU basketbol komandası Tələbə Basketbol Liqasında 1-ci yerə çıxaraq qızıl medala layiq görüldü. Məzunlara gələcək həyatlarında uğurlar diləyən rektor onlara Vətənə layiqli vətəndaş olmağı arzulayıb. Yasamal Rayon İcra Hakimiyyəti başçısının müavini Təravət Muradova, elm və təhsil nazirinin müşaviri Nicat Məmmədli, AzTU-nun fəxri məzunu, İnformasiya Texnologiyaları İnstitutunun baş direktoru akademik Rasim Əliquliyev, millət vəkili Müşfiq Məmmədli, valideyn Günay Bağcı məzunları təbrik edərək onlara ən xoş arzularını bildiriblər. Sabah qruplarını ən yüksək ÜÖMG (Ümumi Orta Müvəffəqiyyət Göstəricisi) ilə bitirən məzun Ehtiram Şükürov da öz təəssüratlarını bölüşüb, tədris aldığı müddətdə qazandığı uğurlarından danışıb. Daha sonra AzTU-nu ən yüksək ÜOMG ilə bitirən, eləcə də universitetin ictimai-sosial həyatında fəallıq nümayiş etdirən məzunların təltifolunma mərasimi keçirilib. Tədbir konsert proqramı ilə davam edib. 

Azərbaycan Texniki Universitetinin (AzTU) tərəfdaş olduğu “Rusiya Federasiyası, Qazaxıstan və Azərbaycanda səhiyyədə strateji keyfiyyət menecmenti və risklərin idarə olunması üzrə açıq və distant təhsil formatında peşə bakalavrı ve magistr hazırlığı” (LMQS) layihəsi üzrə fəaliyyətlər və maliyyə hesabatlılğı üzrə görüş keçirilib. Layihə Avropa Birliyinin “Erasmus+” proqramı çərçivəsində Yunanıstanın Qərbi Attika Universitetinin koordinatorluğu ilə həyata keçirilir. Qərbi Attika Universitetinin ev sahibliyi ilə keçirilən görüşün əsas müzakirə mövzusu layihə üzrə fəaliyyətlərə və maliyyə məsələlərinə həsr olunub. Hesabat görüşündə AzTU-nu Maşınqayırma texnologiyası kafedrasının məsləhətçi professoru Həsən Hüseynov və Beynəlxalq əlaqələr şöbəsinin beynəlxalq layihələr qrupunun rəhbəri Mətanət Paşayeva təmsil edib. Azərbaycan və Qazaxıstanın tərəfdaş universitetlərinin iştirak etdiyi hesabat görüşündə tərəfdaşların hesabatlarına baxılıb, layihənin 2024-cü ilin sonunda bitməsi ilə əlaqədar yekun tələblər izah olunub, müvafiq tövsiyələr verilib, suallar cavablandırılıb.