Gənclər və idman naziri Fərid Qayıbov Azərbaycan Tələbə Gənclər Təşkilatları İttifaqı (ATGTİ) və TGT-lərin nümayəndələri ilə görüşüb. Məqsəd tələbələrin təşəbbüslərinin dəstəklənməsi, qərarvermə prosesində iştirakı, onların dövlət gənclər siyasətinə töhfə verməsinə şərait yaradılmasından ibarət olub.2025-ci ilin “Gənclər Paytaxtı” Sumqayıt şəhərində keçirilən görüşdə Azərbaycan Texniki Universietinin (AzTU) TGT sədri Ruslan Qənbərov və sədr müavini Nigar Həsənova iştirak edib. Görüş zamanı Gənclər və İdman Nazirliyinin dəstəyi ilə ATGTİ-nin tələbələri üçün həyata keçirdiyi fəaliyyətlər, TGT-lərin irəli sürdüyü təklif və təşəbbüslər, nazirliyin gənclər üçün layihələri və yeni planları barədə danışılıb, eləcə də tələbələrin idman tədbirlərinə cəlb olunması ilə bağlı təqdimat nümayiş olunub.

Azərbaycan Texniki Universitetində (AzTU) BMT-nin Dayanıqlı İnkişaf Məqsədlərini (SDGs) dəstəkləyən “İnnovativ və yaradıcı həllərin tapılması” adlı beynəlxalq startap müsabiqəsinin ilkin mərhələsi keçirilib. AzTU və Pakistanın Milli Elm və Texnologiya Universitetinin (NUST) birgə təşkilatçılığı ilə keçirilən müsabiqənin məqsədi universitetlərin müəllim və tələbələrinin innovativ ideyalarla qlobal problemlərin həllinə töhfə verilməsinə cəlb olunmasıdır. Builki beynəxalq müsabiqədə Azərbaycanın ümumilikdə 21 ali təhsil müəssisəsindən 60 komanda, Qazaxıstanın 1 universitetindən 2 komanda iştirak edib. AzTU tələbələri bu il müsabiqəyə 9 startap layihəsi təqdim edib. Tədbirin rəsmi hissəsi Azərbaycan və Pakistanın Dövlət himnlərinin səsləndirilməsi ilə başlayıb. AzTU-nun rektoru Vilayət Vəliyev Pakistanla Azərbaycanın qardaşlıq və tərəfdaşlıq münasibətlərindən danışıb. Bildirib ki, bu tərəfdaşlıq münasibətləri təhsil, elm, innovasiya sahələrində də davam etdirilir. Rektor AzTU-nun ev sahibliyi etdiyi beynəlxalq startap müsabiqəsinin bilik və praktik bacarıqları yoxlayan, tələbələrin ideyalarını dəstəkləyən ciddi platforma olduğunu və ötən illə müqayisədə bu il layihə müraciətlərinin sayının artaraq 60-ı keçdiyini qeyd edib. O, müsabiqədə iştirak edən bütün universitet tələbələrinə uğurlar diləyib və əlavə edib ki, müsabiqənin ilkin mərhələsinin qalibləri Pakistan İslam Respublikasının paytaxtı İslamabadda keçiriləcək final mərhələsinə vəsiqə qazanacaq. Bakı Ali Neft Məktəbinin (BANM) rektoru Elmar Qasımov dəvətə görə AzTU rektoruna təşəkkürünü bildirib. Qeyd edib ki, bu cür beynəlxalq müsabiqə həm BANM tələbələrinin, həm də bütovlükdə Azərbaycan gənclərinin yaradıcı beyin məhsulunu üzə çıxarmaq üçün gözəl motivasiyadır. Rektor BANM tələbələrinə və onları beynəlxalq müsabiqəyə hazırlayan elmi rəhbərlərinə aktiv iştirak üçün təşəkkür edərək bütün gənclərə uğurlar diləyib. Qarabağ Universitetinin rektoru Şahin Bayramov bu cür beynəlxalq tədbirdə iştirak etdiyi üçün məmnunluq hissini ifadə edib. Bildirib ki, strateji və gənc universitet olaraq Qarabağ Universitetinin bu cür layihələrdə iştirakı vacibdir. O qeyd edib ki, Qarabağ Universiteti gələcəkdə AzTU və Pakistanın nüfuzlu universitetləri ilə bütün sferalarda əməkdaşlıq etməyə hazırdır. NUST-un tədqiqat, innovasiya və kommersiyalaşdırma üzrə prorektoru Rizvan Riaz bildirib ki, “İnnovativ və yaradıcı həllərin tapılması” beynəlxalq startap müsabiqəsi hər iki ölkənin gənclərinin potensialını üzə çıxarmaq üçün əla fürsətdir. Prorektor sonda müsabiqədə iştirak edən startapçı gənclərə uğurlar arzulayıb. Tədbir AzTU tələbələrinin iştirakı ilə hazırlanan bədii hissə ilə davam edib və tədbirdə beynəlxalq müsabiqə ilə bağlı videoçarx nümayiş etdirilib. Gün ərzində müsabiqədə iştirak edən komandalar öz startap layihələrini təqdim ediblər. Qaliblər sənaye və təhsil sahəsinin nümayəndələrindən ibarət münsiflər heyəti tərəfindən qiymətləndirilib. Tədbirin sonunda qaliblər mükafanlandırılıb. FICS (Finding Innovative & Creative Solutions) Pakistan İslam Respublikasında 2013-cü ildən etibarən hər il keçirilən ən böyük startap müsabiqəsidir. AzTU artıq ikinci ildir ki, beynəlxalq tədbirə ev sahibliyi edir.

“Paşa Bank”ın təşkilaçılığı və Azərbaycan Texniki Universitetinin (AzTU) Təhsildə İnformasiya Texnologiyaları və Metodik Dəstək İnstitutunun təşkilati dəstəyi ilə ölkədə informasiya texnologiyaları (İT) sahəsinin inkişafına dəstək verilməsi, bu istiqamətdə təhsil alan gənclərin, eləcə də İT üzrə fəaliyyət göstərən peşəkar kadrların potensialının üzə çıxarılması və bacarıqlarının təkmilləşdirilməsi məqsədilə artıq yeddinci dəfə təşkil olunan “PAŞA Bank Kuboku VII” proqramlaşdırma müsabiqəsinin final mərhələsi keçirilib. “PAŞA Bank” tərəfindən 2019-cu ildən etibarən keçirilən müsabiqəyə müxtəlif yaş qruplarına aid iştirakçılar, o cümlədən məktəblilər, tələbələr və peşəkar proqramçılar qoşularaq proqramlaşdırma və alqoritmik biliklərini sınayıblar. Üç mərhələdən ibarət olan müsabiqənin ilk iki mərhələsi (I mərhələ: verilənlərin strukturları, axtarış və çeşidləmə alqorimtləri; II mərhələ: dinamik proqramlaşdırma, qraflar nəzəriyyəsi; mövzularında) onlayn keçirilib. Sözügedən iki mərhələdə yüksək nəticə göstərmiş 60 iştirakçı finala vəsiqə qazanıb. AzTU-da keçirilən final turunda iştirakçılara 4 saat ərzində 6 alqoritmik məsələnin proqramını tərtib etmək və “HackerRank” platformasında sınaqdan kecirmək tapşırığı verilib. Müsabiqənin nəticələrinə görə 3 kateqoriya (şagird, tələbə, peşəkar) üzrə qaliblər müəyyənləşib. Hər kateqoriya üzrə ilk üç yerin qalibləri “PAŞA Bank” tərəfindən qiymətli hədiyyələrlə (I yer “MacBook Pro M3”, II yer “iPad Pro 11 M4”, III yer “Apple watch”) mükafatlandırılıb. AzTU-nun Təhsildə İnformasiya Texnologiyaları və Metodik Dəstək İnstitutunun əməkdaşı Kənan Əsgərli peşəkarlar kateqoriyası üzrə II yerə layiq görülüb.

Azərbaycan Texniki Universiteti (AzTU), Türkiyə-Azərbaycan Universiteti və Pakistanın Milli Elm və Texnologiya Universitetinin (NUST) birgə təşkilatçılığı ilə AzTU-da “Strategic Talks on Innovation & Commercialization for Knowledge Sharing” – (STICKS International 2025) mövzusunda beynəlxalq tədbir keçirilib.Tədbirin əsas məqsədi universitet-sənaye əməkdaşlığının inkişaf etdirilməsi, elmi-tədqiqatların kommersiyalaşdırılması, startapların dəstəklənməsi və beynəlxalq tərəfdaşlığın gücləndirilməsi olub.Açılış mərasimində AzTU-nun rektoru Vilayət Vəliyev və NUST-un tədqiqat, innovasiya və kommersiyalaşdırma üzrə prorektoru Rizvan Riaz çıxış edərək tədbirin əhəmiyyəti və məqsədləri barədə iştirakçılara məlumat veriblər.Forum çərçivəsində iki əsas panel müzakirəsi keçirilib. Birinci panel “Sərhədləri Aşan Universitet-Sənaye Əməkdaşlığı – Pakistan, Türkiyə və Azərbaycanın Baxışı” mövzusuna həsr olunub. Panel müzakirəsində universitetlər və sənaye nümayəndələri arasında əməkdaşlıq imkanları, birgə tədqiqat layihələrinin təşkili və innovasiya ekosistemlərinin inkişafı məsələləri diqqət mərkəzində olub.İkinci panel isə “Tədqiqatların Qlobal Təsirə Çevrilməsi – Sərhədlərarası Kommersiyalaşdırma Strategiyaları” mövzusunda təşkil olunub. Bu sessiyada iştirakçılar elmi nəticələrin kommersiya potensialı, texnologiyaların transferi, investisiya mühiti və regionlararası əməkdaşlıq imkanlarını müzakirə ediblər.“STICKS International 2025” tədbiri iştirakçılar tərəfindən yüksək qiymətləndirilib və gələcəkdə daha genişmiqyaslı elmi əməkdaşlıqlar üçün yeni imkanlar yaradacağına dair inam ifadə olunub. Sonda AzTU-nun rektoru Vilayət Vəliyev, TAU-nun prorektoru Mehmet Şimşir və NUST-un prorektoru Rizvan Riaz rəmzi olaraq birlikdə səhnədə “start” düyməsin sıxıblar. Bu zaman ekranda  “Pakistan – Azərbaycan – Türkiyə innovasiya dəhlizi” təşəbüsünün anonsu nümayiş olunub. Qeyd edək ki, tədbir hər il Pakistanda təşkil olunur. Bu il ilk dəfə tədbir Pakistan xaricində - Azərbaycanda keçirilib.  

Azərbaycan Texniki Universitetinin (AzTU) rektoru professor Vilayət Vəliyevin rəhbərlik etdiyi nümayəndə heyəti Malayziyaya rəsmi səfər edib. Nümayəndə heyətində AzTU-nun elm və innovasiyalar üzrə prorektoru professor Sübhan Namazov və Tədqiqat və inkişaf departamentinin direktoru Bəxtiyar Bədəlov təmsil olunub. Səfərin əsas məqsədi AzTU ilə Malayziyanın aparıcı universitetləri arasında elmi-tədqiqat, tədris və innovasiya sahələrində əməkdaşlıq əlaqələrinin qurulması və genişləndirilməsi olub. Səfər çərçivəsində nümayəndə heyəti Malaya Universiteti, MARA Texnologiya Universiteti, Malayziya Milli Universiteti, Asiya-Sakit Okean Texnologiya və İnnovasiya Universiteti, İNTİ Beynəlxalq Universiteti və Beynəlxalq İslam Universiteti kimi ölkənin qabaqcıl ali təhsil müəssisələrini ziyarət edib. Görüşlər zamanı universitetlərarası əməkdaşlıq imkanları, xüsusilə mühəndislik, informasiya texnologiyaları, innovasiya və beynəlxalq reytinqlər sahəsində təcrübə mübadiləsi və birgə təşəbbüslər geniş şəkildə müzakirə olunub. Malaya Universitetində keçirilən görüşdə professor Vilayət Vəliyev AzTU-nun beynəlxalq tərəfdaşlıq strategiyası çərçivəsində ortaq elmi layihələr, birgə təhsil proqramları, tələbə-müəllim mübadiləsi və beynəlxalq reytinqlərdə irəliləyişə yönəlmiş birgə fəaliyyətlərə xüsusi önəm verdiyini vurğulayıb. Tərəflər bu istiqamətdə əməkdaşlıq imkanlarını araşdırıblar. Malayziya Milli Universiteti və MARA Texnologiya Universiteti ilə görüşlərdə mühəndislik sahəsində tədris texnologiyalarının təkmilləşdirilməsi, ortaq tədqiqatların aparılması, reytinq göstəricilərinin yüksəldilməsi üçün təcrübə mübadiləsi və innovativ layihələrin inkişafı müzakirə olunub. Hər iki universitetlə niyyət protokolu imzalanıb. Asiya-Sakit Okean Texnologiya və İnnovasiya Universiteti ilə görüş zamanı süni intellekt, rəqəmsal transformasiya, texnologiyaların tətbiqi və beynəlxalq görünürlük sahəsində birgə layihələr və təşəbbüslər müzakirə olunub. Tərəflər arasında anlaşma memorandumu imzalanıb. İNTİ Beynəlxalq Universiteti ilə keçirilən görüşdə isə birgə layihələrin həyata keçirilməsi, tələbə və akademik heyətin mübadiləsi, birgə konfrans və tədqiqat təşəbbüsləri ilə yanaşı beynəlxalq reytinqlərdə qarşılıqlı dəstək imkanları da müzakirə olunub. Görüşün sonunda anlaşma memorandumu imzalanıb. Beynəlxalq İslam Universiteti ilə keçirilən görüşdə də müxtəlif istiqamətlər üzrə, xüsusilə ortaq tədris proqramları, elm və innovasiya sahəsində əməkdaşlıq və beynəlxalq layihələrdə birgə iştirak imkanları müzakirə edilib. Səfərin nəticəsi olaraq AzTU-nun beynəlxalq tərəfdaşlıq şəbəkəsinin genişləndirilməsi və dünya elm məkanına inteqrasiyası istiqamətində mühüm addımlar atılıb. Professor Vilayət Vəliyevin rəhbərliyi ilə reallaşan bu səfər AzTU-nun beynəlxalq strategiyasının uğurlu icrasını təmin edir və gələcəkdə daha dərin, sistemli və reytinqə töhfə verən əməkdaşlıqlar üçün möhkəm zəmin yaradır.

Elm və Təhsil Nazirliyi (ETN) ilə Müdafiə Sənayesi Nazirliyi (MSN) arasında müdafiə sənayesi üçün kadr hazırlığı sahəsində əməkdaşlıq haqqında Memorandumun imzalanması ilə əlaqədar mayın 26-da Azərbaycan Texniki Universitetində (AzTU) tədbir keçirilib.  Tədbirdə elm və təhsil nazirinin müavini İdris İsayev, müdafiə sənayesi nazirinin müavini Hidayət Əzimov, AzTU-nun rektoru Vilayət Vəliyev, MSN-in tabeliyində olan “Azərsilah” Müdafiə Sənayesi Holdinqi” Qapalı Səhmdar Cəmiyyətinin baş direktoru Emil İbrahimov, MSN-in və ETN-in digər rəhbər işçiləri, universitetin müəllim və professor heyəti, həmçinin akademik göstəriciləri yüksək olan bir qrup tələbə iştirak edib.  Əvvəlcə iştirakçılar ulu öndər Heydər Əliyevin abidəsi önünə gül dəstələri qoyub, əziz xatirəsini ehtiramla yad ediblər.  Universitetin Heydər Əliyev Mərkəzində davam edən imzalanma tədbirində elm və təhsil nazirinin müavini İdris İsayev çıxış edərək müasir təhsil sistemi, bu sahədə aparılan islahatlar, ali məktəblərin bakalavriat, magistratura və doktorantura pillələrinə qəbul proqramları haqqında ətraflı məlumat verib. Nazir müavini imzalanacaq memorandumla ETN və MSN arasındakı əməkdaşlığın yeni mərhələyə qədəm qoyacağını qeyd edib. İdris İsayev müasir təhsilvermənin tələbləri nəzərə alınmaqla hazırlanmış çoxistiqamətli əməkdaşlığı ehtiva edən sənədin müdafiə sənayesi üzrə kadr hazırlığına olan tələbatın, o cümlədən yeni texnologiyalar sahəsində çağdaş bilik və bacarıqlara malik yüksəkixtisaslı mühəndis kadr hazırlığının təmin edilməsində xüsusi rol oynayacağını vurğulayıb.  Müdafiə sənayesi nazirinin müavini Hidayət Əzimov öz növbəsində müdafiə sənayesi üzrə ixtisaslı kadr hazırlığı, sahəvi mütəxəssislərin təkmilləşdirilməsi və innovativ mühəndisliyin daha da inkişaf etdirilməsi məqsədilə ETN və onun strukturuna daxil olan elmi-tədqiqat institutları, eləcə də ali və peşə təhsili müəssisələri ilə səmərəli əməkdaşlıq edildiyini, bu sahədə əlaqələrin genişləndirilməsinin vacibliyini diqqətə çatdırıb. Hidayət Əzimov memorandumun ölkəmizin prioritet inkişaf istiqamətləri üzrə kadrlara olan tələbatının, o cümlədən yeni texnologiyalar sahəsində yüksəkixtisaslı mühəndislərin hazırlığının təmin edilməsinə geniş imkanlar yaratdığını, müasir dövrdə sənaye-universitet əlaqələrinin inkişafı baxımından bu sənədin mühüm əhəmiyyət kəsb etdiyini bildirib.  AzTU-nun rektoru Vilayət Vəliyev isə çıxışında rəhbərlik etdiyi ali təhsil müəssisəsi ilə MSN arasında səmərəli əməkdaşlıq əlaqələrinin qurulduğunu qeyd edib. O, Nazirlər Kabinetinin müvafiq qərarı və MSN-in təşəbbüsü əsasında 2012-ci ildən AzTU-da Xüsusi texnika və texnologiya fakültəsinin uğurla fəaliyyət göstərdiyini, təhsil müddətində yüksək nailiyyətlər əldə etmiş məzunların əksəriyyətinin MSN-in müəssisələrində müvəffəqiyyətlə çalışdıqlarını vurğulayıb. Rektor müdafiə sənayesi üzrə kadr hazırlığı ilə bağlı çağdaş dövrün tələblərinə uyğun yeni strategiya hazırlandığını diqqətə çatdırıb.  Sonra əməkdaşlıq haqqında Memorandum imzalanıb.   Tədbirin sonunda qonaqlar AzTU tərəfindən müasir tədris-təhsil proqramlarının həyata keçirilməsi məqsədilə ali təhsil müəssisəsinin maddi-texniki bazasının əsasında yaradılmış texnoloji imkanlar və perspektiv layihələrlə tanış olublar.

Elm və Təhsil Nazirliyinin İnformasiya Texnologiyaları İnstitutunda Səhiyyə Nazirliyi, Milli Məclisin Səhiyyə Komitəsi, Milli Onkologiya Mərkəzi, Azərbaycan Tibb Universiteti, İnformasiya Texnologiyaları İnstitutu, Azərbaycan Texniki Universiteti və Biofizika İnstitutunun təşkilatçılığı ilə “Rəqəmsal tibb 4.0: problemlər, imkanlar və perspektivlər” II respublika elmi-praktiki konfransı keçirilib. Tədbirdə ölkənin müvafiq dövlət qurumlarının rəhbərləri, ali təhsil müəssisələri, AMEA, həmçinin Elm və Təhsil Nazirliyinin elmi-tədqiqat institutlarının alim və mütəxəssisləri, KİV nümayəndələri iştirak edirdilər. Konfransın məqsədi rəqəmsal transformasiya şəraitində Azərbaycanda generasiya olunan böyük həcmli rəqəmsal səhiyyə və tibb məlumatlarının toplanması, emalı və mübadiləsi, süni intellekt texnologiyaları əsasında müxtəlif təyinatlı tibbi informasiya sistemlərinin yaradılması və tətbiqi kimi bir çox elmtutumlu məsələlərin həlli zərurətinə diqqətin artırılması, Sənaye 4.0 çağırışları kontekstində ölkənin səhiyyə infrastrukturunun konseptual və arxitektur-texnoloji əsaslarının formalaşdırılması istiqamətində mövcud problemlərin, imkanların və perspektivlərin müzakirəsi üçün intellektual dialoq platformasının təşkilindən ibarətdir. Tədbirin açılış mərasimində AMEA-nın vitse-prezidenti, ETN İnformasiya Texnologiyaları İnstitutunun baş direktoru, akademik Rasim Əliquliyev çıxış edərək rəqəmsal tibb problemlərinə həsr olunmuş konfransın müvafiq sahədə aparılan tədqiqatlar, əldə olunan nailiyyətlər və mövcud problemlərin müzakirəsi, eləcə də yeni vəzifələrin müəyyənləşdirilməsi baxımından mühüm əhəmiyyət kəsb etdiyini söyləyib. Müasir dövrdə qlobal çağırışlar kontekstində süni intellektin tibbdə tətbiqi məsələsinin daha da aktuallaşdığını vurğulayan akademik R.Əliquliyev ölkəmizdə tibbi informatika, data elmləri, rəqəmsal səhiyyə, kibertəhlükəsizlik, rəqəmsal kriminalistika sahəsində yüksəkixtisaslı kadrların hazırlanmasının vacibliyini də önə çəkib. AR səhiyyə nazirinin müavini. dosent Nadir Zeynalov müasir dövrdə rəqəmsallaşmanın cəmiyyətin həyatının bütün sahələrinə nüfuz etdiyini qeyd edib. N.Zeynalov rəqəmsal həllərin tibb sahəsində sərhədsiz imkanlar açdığını və strateji əhəmiyyətə malik olduğunu, pasiyentlərə diaqnozun qoyulması, həkimə dəstək göstərilməsi və s. istiqamətlərdə geniş tətbiq olunduğunu vurğulayıb. Əlavə edib ki, rəqəmsal həllər, ekspert sistemləri müalicə üsulunun müəyyənləşdirilməsində yaranan çətinliklər zamanı bu sahədə toplanmış məlumatlardan istifadə etməklə həkimlərə qərarların qəbulu prosesində tövsiyələr verir.  Konfransda həmçinin Azərbaycan Texniki Universitetinin tədris işləri prorektoru professor Nurəli Yusifbəyli və digərləri çıxışında konfransın rəqəmsal tibbin elmi-nəzəri və praktiki problemlərin həlli üçün yeni imkanların yaranması baxımından böyük əhəmiyyət kəsb etdiyini bildiriblər. Daha sonra konfrans işini “Rəqəmsal tibbin formalaşmasının elmi-nəzəri problemləri” və “Tibbdə rəqəmsal texnologiyaların tətbiqinin elmi-praktiki problemləri” adlı seksiya iclasları ilə davam etdirib.

Böyük Britaniyanın Belfast Kraliça Universitetinin professoru, Dünya Azərbaycanlı Alimlər Birliyinin (DAAB) üzvü Vahid Garousi qonaq professor kimi Azərbaycan Texniki Universitetində (AzTU) fəaliyyət göstərəcək. Vahid Garousi AzTU-da elm və tədqiqat sahələri ilə yanaşı, proqram təminatı mühəndisliyi, o cümlədən universitet-sənaye iş birliyi istiqamətlərində tədris aparacaq. AzTU-nun rektoru Vilayət Vəliyev Vahid Garousi ilə görüşüb, ona fəaliyyətində uğurlar arzulayıb.

Türkiyənin Sivas Cümhuriyyət Universitetinin rektoru professor Ahmed Şengönülün başçılıq etdiyi nümayəndə heyəti Azərbaycan Texniki Universitetində (AzTU) olub. Qonaqlar AzTU-nun tədris işləri üzrə prorektoru professor Nurəli Yusifbəyli və universitetin nümayəndələri ilə görüşüb. Görüşdə həmçinin Türkiyə-Azərbaycan Universitetinin (TAU) prorektoru  Mehmet Şimşir də iştirak edib. Prorektor Nurəli Yusifbəyli qonaqları salamlayaraq onları AzTU-da görməkdən məmnunluğunu ifadə edib. Prorektor universitetdə elm və tədqiqat sahəsində görülən işlər, həyata keçirilən ikili diplom proqramları və layihələr, eləcə də AzTU-nun Azərbaycanın təhsil sahəsinə gətirdiyi yeniliklər barədə ətraflı məlumat verib. Sivas Cümhuriyyət Universitetinin nümayəndələri də öz növbəsində universitetin fəaliyyət istiqamətləri barədə təqdimat edib. Görüş zamanı AzTU ilə Sivas Cümhuriyyət Universiteti arasında əməkdaşlığın qurulması istiqamətində fikir mübadiləsi aparılıb. Hər iki universitet üçün faydalı olacaq birgə tədqiqat mərkəzlərinin yaradılması, bakalavriat, magistratura və doktorantura təhsil səviyyələrində birgə əməkdaşlıq, birgə tədqiqat layihələrinin hazırlanması ilə bağlı təkliflər səsləndirilib. Həmçinin professor-müəllim heyəti və tələbə mübadiləsi, universitetlərin təşəbbüsü ilə birgə tədbirlərin təşkili istiqamətində də məsələlər müzakirə olunub.

Azərbaycan Texniki Universiteti (AzTU) və “Gənclərin Anti-Narkomaniya” İctimai Birliyinin birgə təşkilatçılığı ilə “Narkotiklərə qarşı birgə mübarizə” mövzusunda maarifləndirmə tədbiri keçirilib. Tədbirdə Narkomanlığa və Narkotik Vasitələrin Qanunsuz Dövsiyyəsinə Qarşı Mübarizə üzrə Dövlət Komissiyası, Daxili İşlər Nazirliyinin Baş Narkotiklərlə Mübarizə İdarəsi, Bakı Şəhəri  üzrə Narkoloji Dispanseri və “Gənclərin Anti-Narkomaniya” İctimai Birliyinin nümayəndələri iştirak ediblər. AzTU-nun Kommunikasiya şöbəsinin müdiri Səfa Bağırov narkotik vasitələrdən istifadənin insan həyatı üçün təhlükəsi haqqında danışıb. O, tələbələri pis vərdişlərdən uzaq olmağa, idmanla məşğul olmağa və təhsil, elm, şəxsi inkişaf kimi faydalı işlərə maraq göstərməyə dəvət edib. Narkomanlığa və Narkotik Vasitələrin Qanunsuz Dövsiyyəsinə Qarşı Mübarizə üzrə Dövlət Komissiyasının nümayəndəsi  Vasif Quliyev narkomaniya ilə mübarizənin dövlətin prioritet istiqamətlərindən biri olduğunu və bu yöndə gənclərin davamlı olaraq maarifləndirilməsinin vacibliyini qeyd edib. O, xüsusi vurğulayıb ki, AzTU narkomaniyaya qarşı mübarizə ilə bağlı tələbələr arasında maarifləndirmə aparan ali təhsil müəssisələrindəndir. Daxili İşlər Nazirliyinin Baş Narkotiklərlə Mübarizə İdarəsinin təhqiqat bürosunun rəisi, polis kapitanı Nəcəf Aydınoğlu narkotiklərlə mübarizə ilə bağlı ən son statisitik məlumatları tələbələrin diqqətinə çatdırıb. O bildirib ki, narkobaronlar hər cür texniki vasitələrlə gənclərin aktiv olduğu sosial şəbəkələrə nüfuz edərək, onların nəinki həyatını cəhənnəmə döndərir, həmçinin şəxsi məlumatlarını şantaj yolu ilə hər yerdə yayacağı ilə hədələyərək onları asılı vəziyyətdə saxlayır. O, gəncləri bu cür tələlərə düşməməyi və ayıq-sayıq olmağı tövsiyə edib. Bakı Şəhəri  üzrə Narkoloji Dispanserin həkim-narkoloqu Günay Əliyeva tələbələrə narkotik vasitələr və psixotrop maddələrdən istifadənin fəsadlarını ətraflı izah edib. “Gənclərin Anti-Narkomaniya” İctimai Birliyinin sədri Büllur Məmmədova narkomaniya ilə mübarizə sahəsində davamlı maarifləndirmə tədbirlərinin keçirildiyini və bu sahədə təşkilatın 20 illik təcrübəyə malik olduğunu, tez-tez narkomaniya qurbanlarını ziyarət etdiyini bildirib. O, gəncləri çevrəsini və dostlarını diqqətlə seçməyə, bu cür maarifləndirmə tədbirlərində aktiv iştirak etməyə səsləyib. Tədbirin sonunda “Narkomaniya ilə mübarizə” mövzusunda hazırlanmış videoçarx nümayiş olunub.