Azərbaycan Texniki Universitetinin (AzTU) Rəqəmsal Transformasiya Şurasının yeni tərkibdə toplantısı keçirilib. Toplantıda Azərbaycan Fintex Assosiasiyasının və İT şirkətlərin rəhbərləri, ekspertlər, beynəlxalq şirkətlərin təmsilçiləri və universitetin nümayəndələri iştirak ediblər . AzTU-nun rektoru Vilayət Vəliyev Rəqəmsal Transformasiya Şurasının universitetin fəaliyyətində rolunun artırılmasının vacibliyini vurğulayıb. O, Transformasiya Şurasına biznes sektorundan qurumların cəlb olunmasının universitet-biznes əməkdaşlığı baxımından əhəmiyyətli olacağını bildirib. Rektor Transformasiya Şurasına biznes sektorunun nümayəndəsinin rəhbərlik etməsini də universitet-sənaye işbirliyinin gücləndirilməsi baxımından faydalı hesab edib. Universitetin rəqəmsal transformasiyası, proqramların məzmununun təkmilləşdirilməsi, əmək bazarının tələblərinə cavab verən peşəkar kadrların hazırlanması üçün Transformasiya Şurasından gözləntilərin çox olduğu diqqətə çatdırılıb. Toplantıda təşkilati məsələlərə baxılıb və “Akhundoff Group” şirkətinin direktoru Telman Axundov Rəqəmsal Transformasiya Şurasının sədri seçilib. Daha sonra çıxış edənlər universitetin rəqəmsal trasformasiyasında, resurslardan effektiv istifadə sahəsində, proqramların məzmununun təkmilləşməsində, universitet-biznes tərəfdaşlığının gücləndirilməsi istiqamətində faydalı təkliflər səsləndiriblər. Tədbir çərçivəsində Transformasiya Şurasının fəaliyyətinin təşkili ilə bağlı işçi qrup formalaşdırılıb.

Azərbaycan Texniki Universitetinin (AzTU) Dayanıqlı İnkişaf İnstitutunun əməkdaşı İqor Nasirovun "Azərbaycanın Dünyanın Yaşıl Gələcəyinə Artan Töhfəsi” (Growing Contribution of Azerbaijan to Earth’s Green Future) adlı növbəti master klassı onlayn formatda təşkil edilib. "COP29-Azərbaycan: İqlim Dəyişikliyi üzrə Bakı Konfransının Nəticələri" ("COP29-Azerbaijan: Outcomes of the Baku Climate Change Conference") adlanan sonuncu master klassda Bakıda keçirilən COP29 tədbirinin Azərbaycan üçün əhəmiyyəti, orada keçən əsas debatlar, verilən qərarlar və növbəti tədbir üçün həll edilməmiş məsələlərdən bəhs olunub.  Tədbirlər silsiləsinin əsas məqsədi COP29-un müxtəlif aspektlərini və onun qlobal iqlim gündəliyinə uyğunluğunu araşdırmaq və strategiayalarının təhlilini elmi tədqiqatçıların, professor-müəllim heyətinin, tələbələrin diqqətinə çatdırmaq olub. Tədbirdə qlobal tendensiyalar və təcrübələr, Azərbaycanın yaşıl dünyaya verəcəyi töhfələr, COP29-da Azərbaycanda icra olunan layihələr, “yaşıl gələcəyə” verəcəyi töhfə haqqında bacarıqlarını inkişaf etdirmək istiqamətində geniş müzakirələr aparılıb.Master klassın xüsusi qonağı BMT SDSN Türkiyə üzrə koordinatoru, davamlılıq və iqlim araşdırmaçısı Bahar Özay məruzə ilə çıxış edib.

Azərbaycan Texniki Universiteti (AzTU) ilə Türkiyənin Niğde Ömer Halisdemir Universiteti arasında əməkdaşlıq memorandumu imzalanıb. Memorandumu AzTU-nun rektoru professor Vilayət Vəliyev və Niğde Ömer Halisdemir Universitetinin rektoru professor Hasan Uslu imzalayıblar. Sənədə əsasən, hər iki universitetin uyğun sahələr üzrə birgə tədqiqat aparması, müəllim-tələbə mübadiləsi, birgə layihələrdə iştirakı nəzərdə tutulur.

Azərbaycan Texniki Universitetinin (AzTU) Tələbə Gənclər Təşkilatının (TGT) təşkilatçılığı ilə Qarabağ qazisi Kamil Musavi və marketinq mütəxəssisi Orxan Şahbazın tələbələrlə görüşü keçirilib. Əvvəlcə torpaqlarımızın ərazi bütövlüyü və suverenliyi uğrunda canlarından keçən Vətən övladlarının əziz xatirəsi bir dəqiqəlik sükutla yad olunub. Azərbaycanın Dövlət Himni səsləndirilib. Sual-cavab formatında keçən görüşdə qonaqlar AzTU tələbələrinin çoxsaylı suallarını cavablandırıb. Qonaqlara ünvanlanmış suallar əsasən vətənpərvərlik, 44 günlük Vətən müharibəsində qazanılan Zəfər, Qarabağın dirçəlməsi, Azərbaycan gəncliyinin nailiyyətləri, müxtəlif sahələrdə hazırlanan peşəkar kadrların cəmiyyətə təqdimat forması, insanlarda yüksək dəyər formalaşdırmağın yolları və s. kimi mövzuları əhatə edib. Qarabağ qazisi Kamil Musavi bildirib ki, insanların əksəriyyəti vətənpərvərliyi əsasən hərbi geyimdə, döyüş meydanında iştirakda, bayraqla çəkilən fotolarda görür. Əslində isə vətənpərvərlik hər kəsin həyat tərzinə çevrilməlidir: “İstəyirəm gənclər anlasın ki, biz sadəcə müharibə vaxtı deyil, hər gün səmimi-qəlbdən vətənpərvər olmalıyıq, sözümüzlə, əməlimizlə, işimizlə, xalqa vicdanla xidmət etməyimizlə örnək olmalıyıq bir-birimizə, əksi sadəcə görüntü yaratmaqdır”.  Marketinq mütəxəssisi Orxan Şahbaz gəncləri hər zaman inkişaf etməyə, öz üzərində çalışmağa, individual olaraq özünü sorğulamağa dəvət edib: “Əksər insanlar hər şeydən şikayətlənir, heç kim də sual vermir ki, nə qədər bilikli və bacarıqlıyam, bugünkü əmək bazarına nə qədər uyğunlaşa bilmişəm, biliyimi “satmağı” bacarırammı? Hamınıza tövsiyə edirəm ki, biliyinizi biznesə çevirəcək bacarıqlara yiyələnin”.

Elm və Təhsil Nazirliyi (ETN) və Elm və Ali Təhsil üzrə Dövlət Agentliyinin (EATDA) təşkilatçılığı ilə elm və ali təhsil üzrə ictimaiyyətlə əlaqələr və kommunikasiya işinin təşkilinə dair "Strateji kommunikasiya" mövzusunda təlim keçirilib. Təlimin açılış nitqi ilə çıxış edən ETN-nin aparat rəhbəri Mətin Kərimli elm, ali və orta ixtisas təhsil müəssisələrində çalışan əməkdaşlar üçün təlimlərin əhəmiyyəti, eləcə də daxili kommunikasiyanın qurulması və böhran kommunikasiyasının düzgün təşkilinin önəmini vurğulayıb. EATDA-nın direktoru Ülkər Səttarova elm və təhsil müəssisələrinin media ilə iş və ictimaiyyətlə əlaqələr sahəsində prioritet istiqamətləri barədə danışıb və iştirakçıların suallarını cavablandırıb. Təlimdə ictimaiyyətlə əlaqələr üzrə ekspertlər Vəli Əlibəyov və Emin Hüseynzadə iştirakçılara daxili kommunikasiyanın təşkili, effektiv mesaj hazırlamaq, əks əlaqənin təşkili, eləcə də hədəf kütləsi üçün təsirli hekayənin hazırlanması mövzusunda məlumat veriblər. Növbəti sessiyalarda media və kommunikasiya üzrə ekspert Vüqar Zifəroğlu KİV ilə münasibətlər, media üçün kontentin hazırlanması, media vasitəsilə xidməti məlumatların çatdırılması formaları, vizual kommunikasiyalar üzrə ekspert Fərid Rzazadə vizual elementlərin hekayəyə daxil edilməsi, rəqəmsal media üzrə ekspert Şəfəq Mehrəliyeva isə kommunikasiya planın hazırlanması mövzularında təlim keçiblər. Təlimdə Azərbaycan Texniki Universitetini (AzTU) İctimaiyyətlə əlaqələr şöbəsinin müdiri - mətbuat katibi Sevinc İsgəndərova təmsil edib. 

Azərbaycan Texniki Universitetinin (AzTU) Nəqliyyat və logistika fakültəsinin təşkilatçılığı və Tələbə Həmkarlar İttifaqı Komitəsinin (THİK) təşəbbüsü ilə Veysəloğlu MMC-nin anbarına tələbələrin ekskursiyası təşkil olunub. Tədbirdə Nəqliyyat və logistika fakültəsinin 2-ci, 3-cü kurs tələbələri və dekan müavini iştirak edib.Ekskursiya əvvəlcə təhlükəsizlik təlimi ilə başlayıb. Təlimdə tələbələrə anbarın iş prinsipləri və təhlükəsizlik qaydaları haqqında ətraflı məlumat verilib. Təhlükəsizlik tədbirlərinin önəmi və tətbiqi haqqında geniş izahlar təqdim edildikdən sonra iştirakçılar anbara yönləndirilib. Anbar gəzintisi zamanı tələbələrə logistika və nəqliyyat sahəsində tətbiq edilən iş prinsipləri və əməliyyat prosedurları barədə ətraflı məlumat verilib. Şirkətin mütəxəssisləri idxal olunan malların anbarda rəflərə yerləşdirilməsi, tez xarab olan yüklərin refrijeratorlu anbarlarda saxlanılması və həmin məhsulların soyuduculu maşınlarla daşınma qaydaları haqqında da vacib məlumatlar diqqətə çatdırılıb. 

Azərbaycan Texniki Universisteti (AzTU) Maşın dizaynı və sənaye texnologiyaları kafedrasının və Tələbə Həmkarlar İttifaqı Komitəsinin (THİK) təşkilatçılığı ilə Maşınqayırma və robototexnika fakültəsinin sənaye mühəndisliyi ixtisası üzrə təhsil alan III kurs tələbələrinin Bakı Gəmiqayırma Zavoduna təcrübə səfəri təşkil olunub.  İxtisas rəhbəri professor Bəyalı Əhmədov və Bakı Gəmiqayırma Zavodunun Təlim və inkişaf bölməsinin rəhbəri Nəcəf Mustafayevin iştirakı ilə keçirilən səfərdə tələbələr zavodun ərazisində fəaliyyət göstərən müxtəlif istehsalat sahələri, təmir-bərpa sexləri ilə tanış olub, eləcədə onlara orada tətbiq olunan müasir sənaye avadanlıqları haqqında ətraflı məlumatlar verilib.

Azərbaycan Texniki Universiteti (AzTU), Bakı Ali Neft Məktəbi (BANM), 4SIM və ESRİ şirkətlərinin tərəfdaşlığı ilə həyata keçirilən “ArcGIS Student Use” layihəsi çərçivəsində Coğrafi İnformasiya Sistemləri (CİS) üzrə maarifləndirici vorkşop keçirilib. Tədbirdə AzTU-nun Nəqliyyat və logistika fakültəsinin bakalavr və magistr tələbələri ilə yanaşı, müəllim heyəti də iştirak edib. Vorkşopda ArcGIS proqram təminatının coğrafi məlumatlarının təhlili, vizuallaşdırılması və idarə olunması sahəsində verdiyi imkanlar vurğulanıb. Tədbirdə tələbələr proqramın real tətbiqləri ilə tanış olmaqla yanaşı, onları maraqlandıran sualları səsləndirmək imkanı da əldə ediblər. “ArcGIS Student Use” layihəsi tələbələrin coğrafi məlumatların idarə edilməsi və analizi sahəsində bilik və bacarıqlarını inkişaf etdirmək məqsədi daşıyır. Bu cür təlimlər gənclərin CİS sahəsində daha geniş imkanlara yiyələnməsinə şərait yaradır, həm də onların gələcək karyera perspektivlərini artırır.

Azərbaycanda ilk dəfə olaraq Azərbaycan Texniki Universitetində (AzTU) keçirilən, tələbələrin şəxsi və peşəkar inkişafını dəstəkləyən “Bir Kouçum Var” layihəsinin təqdimatı olub. Layihənin məqsədi tələbələrin karyera planlarını dəqiq müəyyən etmələrinə, potensiallarını kəşf etmələrinə və gələcək hədəfləri istiqamətində düzgün addımlar atmalarına dəstək olmaqdır. Layihə Beynəlxalq Kouçinq Federasiyasının Azərbaycan bölməsi və AzTU-nun Tələbə Həmkarlar İttifaqı Komitəsinin birgə əməkdaşlığı ilə həyata keçirilib. Layihə rəhbəri AzTU-nun İnsan Resursları Departamentinin direktoru Aytən Şıxalıyeva bu təşəbbüsün tələbələrin şəxsi inkişafı və karyera uğurları üçün böyük əhəmiyyət kəsb etdiyini vurğulayıb. “Bir Kouçum Var” layihəsi çərçivəsində tələbələrə beynəlxalq dərəcəli peşəkar kouçlar tərəfindən 4-6 sessiyadan ibarət onlayn formatda fərdi kouçinq xidməti təqdim edilib. Bu xidmət tələbələrə şəxsi hədəflərini müəyyən etmək, güclü tərəflərini aşkara çıxarmaq və gələcəkdə uğur qazanmaq üçün lazım olan addımları atmaqda kömək edəcək. Layihə tələbələr üçün ödənişsiz əsaslarla həyata keçirilir. Layihə tələbələrə yalnız karyera sahəsində deyil, həm də şəxsi həyatlarında uğurlarını artırmaq üçün əhəmiyyətli bir fürsət təqdim edir. Hər bir tələbə peşəkar kouçların dəstəyi ilə öz potensialını yüksək səviyyədə inkişaf etdirmək imkanı qazanır. Qeyd edək ki, layihənin davamlı olması və daha geniş auditoriyaya xidmət etməsi məqsədilə “Bir Kouçum Var”ın digər ali təhsil müəssisələrində də həyata keçirilməsi planlaşdırılır. Bu təşəbbüsün tələbələrin şəxsi və peşəkar inkişafına töhfə vermək üçün bütün ölkə üzrə genişlənməsi nəzərdə tutulur.

Azərbaycan Texniki Universitetində (AZTU) Qırğız-Türk Manas Universiteti (QTMU), Əhməd Yasavi Universiteti və Niğde Ömər Halisdemir Universitetinin (NOHU) birgə təşkilatçılığı ilə Elm və Mühəndislik üzrə VI Beynəlxalq Türk Dünyası Konfransı (TURK-COSE) işinə başlayıb. TURK-COSE 2024 informasiya və telekommunikasiya texnologiyaları, təbiət və tətbiqi elmlər, fizika və texniki elmlər, material elmləri, tikinti texnologiyaları və kənd təsərrüfatı elmləri, həmçinin mühəndislik, nəqliyyat və enerji texnologiyası kimi müxtəlif mövzuları əhatə edir. AzTU-nun tədris işləri üzrə prorektoru professor Nurəli Yusifbəyli bu cür elmi konfransların türk dünyası üçün mühüm əhəmiyyət kəsb etdiyini bildirib. Çağdaş zamanda mühəndislik, elm və texnologiya sahəsində baş verən yeniliklərdən bəhs edən prorektor türk dünyasının alimləri və sənaye sahəsinin mütəxəssisləri ilə birlikdə layihələr etməyin, yeniliklərin birbaşa iştirakçısı kimi töhfə verməyin, türk dünyasını elm, mühəndislik, texnologiya sahəsində yüksək səviyyədə təmsil etməyin vacibliyini vurğulayıb. Daha sonra Niğde Ömər Halisdemir Universitetinin rektoru professor Hasan Uslu, Qırğız-Türk Manas Universitetinin rektoru professor Alpaslan Ceylan, Əhməd Yasavi Universitetinin rektoru Janar Temirbok, Türkiyə-Azərbaycan Universitetinin (TAU) prorektoru professor Mehmet Şimşir, Niğde Ömər Halisdemir Universitetinin Mühəndislik fakültəsinin dekanı professor Murat Barut  konfransda çıxış edərək iştirakçılara uğurlar arzulayıb, belə tədbirlərin türkdilli ölkələr arasında əlaqələrin möhkəmlənməsinə, təcrübə mübadiləsinin elm sahəsinə faydalı olacağını bildiriblər. Konfransda həmçinin İzmir Yüksək Texnologiya İnstitutunun Mexanika mühəndisliyi kafedrasının müəllimi professor Mustafa Güden “Quş təsirlərinə qarşı Polikarbonatın (dam örtüyü) təsir davranışlarının modelləşdirilməsi”, Böyük Britaniyanın Nottinqam Universiteti Elektrik mühəndisliyi kafedrasının professoru Marko Rivera “Güc çeviriciləri və elektrik ötürücü sistemləri üçün model proqnozlaşdırıcı nəzarət, Almaniyanın “Siemens Energy” şirkətinin Hidrogen kompressinin direktoru Adnan Görgülü “Hidrogen istehsalı texnologiyalarına biznes baxışı” mövzusunda məruzə ediblər. Plenar iclarla davam edən konfrans dekabrın 21-ində işini yekunlaşdıracaq.