“Schneider Electric” şirkətinin nümayəndələri Azərbaycan Texniki Universitetində (AzTU) silsilə görüşlər keçirib. Qonaqlar AzTU-nun rektoru Vilayət Vəliyev və universitetin nümayəndələri ilə görüşüb. Görüşlərin əsas məqsədi AzTU ilə “Schneider Electric” şirkətinin gələcək əməkdaşlıq istiqamətlərinin müəyyənləşdirilməsi və birgə mühəndis yetişdirmə proqramlarının icrası barədə olub. “Schneider Electric” şirkətinin Azərbaycan, Gürcüstan və Türkmənistan üzrə ölkə direktoru Bihter Gönenlinin rəhbərlik etdiyi nümayəndə heyətinin iştirak etdiyi görüşün ilkin mərhələsi zamanı şirkətin AzTU ilə birgə planlaşdırılmış layihələri, Dayanıqlı İnkişaf Məqsədləri (SDGs) sahəsində gördüyü işlər barədə məlumat verilib, həmçinin universitetlə ilə birgə həyata keçiriləcək fəaliyyətlər, öhdəliklər və əməkdaşlıq konsepsiyası müzakirə edilib. Görüşün ikinci mərhələsində “Schneider Electric” şirkətinin Türkiyə və Mərkəzi Asiya ölkələri üzrə Mühəndislik, Konsultasiya və Təlim üzrə komandasının rəhbəri Tayfur Aydın təqdimatla çıxış edərək elektrik enerjisi istehsalı sahəsində praktiki mühəndis yetişdirmə proqramlarında yol xəritəsi hazırlamağın, davamlı həll yolları düşünən, analiz edən və real işlər görən komanda formalaşdırmağın əhəmiyyətindən bəhs edib. Şirkət əməkdaşları həmçinin rəqəmsal çağda elektrik enerjisi istehsalında keyfiyyətli xidmət və enerjidən ağıllı istifadə üçün yeni imkanlardan danışıblar. Rektor Vilayət Vəliyev yeni tədris ili üçün tədris laboratoriyalarının sayının artırılması, orada sənaye ilə əməkdaşlıq çərçivəsində real işlərin görülməsi, tələbələrin sənaye üçün ixtisaslı kadr kimi yetişməsi, eləcə də tədqiqat işlərinin ən yüksək səviyyəyə çatdırılmasının AzTU-nun hədəfləri sırasında olduğunu bildirib. Rektor “Schneider Electric” şirkəti ilə əməkdaşlıq etməyin AzTU-nun elektrik enerjisi üzrə ixtisaslaşan tələbələrinə faydalı olacağını vurğulayıb. Görüşlər zamanı birgə əməkdaşlıq çərçivəsində tələbələr üçün mübadilə və təcrübə proqramları kimi məsələlər də müzakirə olunub.

Dövlət İmtahan Mərkəzinin elektron imtahanlar korpusunda təşkil olunan ali təhsil müəssisələrinin sərgisi başa çatıb. Sərgidə Azərbaycan Texniki Universitetinin (AzTU) də nümayəndələri iştirak ediblər. 3 gün müddətində AzTU stendini 300-ə yaxın abituriyent və onların valideynləri ziyarət edib. Xatırladaq ki, sərginin keçirilməsində məqsəd ixtisas seçimindən öncə abituriyentləri ali təhsil müəssisələrinin mövcud imkanları ilə tanış etmək və onların ixtisas seçiminin müəyyən olunmasına dəstək göstərmək idi.

Azərbaycan Texniki Universitetinin (AzTU) rektoru Vilayət Vəliyev Dövlət İmtahan Mərkəzində elektron imtahanlar korpusunda təşkil olunan ali təhsil müəssisələrinin sərgisini ziyarət edib. Rektor AzTU və Türkiyə-Azərbaycan Universitetinin (TAU) stendinə baxış keçirib, ziyarətçilərlə görüşüb. Daha sonra rektor digər universitetlərin də stendini ziyarət edib. Sərgi ilə tanışlıqdan sonra rektor Vilayət Vəliyev AzTU-nun hər gün saat 12:00-da təşkil olunan geniş təqdimatında da iştirak edib. Burada abituriyent və onların valideynləri ilə görüşən rektor sualları cavablandırıb, həmçinin mühəndislik ixtisasları ilə bağlı AzTU-da yeni yanaşmalar haqqında məlumat verib.   Qeyd edək ki, sərgi avqustun 1-də işini yekunlaşdıracaq.  

“Synergia Academy” şirkətinin icraçı direktoru Rəna Əfəndiyevanın rəhbərlik etdiyi nümayəndə heyəti Azərbaycan Texniki Universitetində (AzTU) olub. Qonaqlar AzTU-nun rektoru Vilayət Vəliyev və universitetin nümayəndələri ilə görüşüb. Görüşün əsas məqsədi AzTU-da universitet-sənaye işbirliyi çərçivəsində sənaye müəssisələrinin peşə tələblərinə uyğun birgə təlim imkanlarının müzakirəsi və digər əməkdaşlıq istiqamətlərinin müəyyənləşdirilməsi olub. Əvvəlcə “Synergia Academy” şirkətinin təlim üzrə baş məsləhətçisi Əhəd Kazımov sənaye müəssisələrinin peşə tələblərinə uyğun birgə təlim imkanları barədə təqdimatla çıxış edib,  mümkün təlim istiqamətləri və idarəetmə mexanizmləri üzrə ətraflı məlumat verib. Görüş zamanı  AzTU və “Synergia Academy”nin xarici ölkələrin qabaqcıl mühəndislik universitetləri ilə birgə tədris və tədqiqat layihələrini həyata keçirməsi imkanları müzakirə olunub. Görüşün sonunda qonaqlar AzTU-nun tədris və tədqiqat laboratoriyaları ilə tanış olub.

Bu gün Dövlət İmtahan Mərkəzində ali təhsil müəssisələrinin sərgisinin açılışı olub. Sərginin keçirilməsində məqsəd ixtisas seçimindən öncə abituriyentləri ali təhsil müəssisələrinin mövcud imkanları ilə tanış etmək və onların ixtisas seçiminin müəyyən olunmasına dəstək göstərməkdir. Dövlət İmtahan Mərkəzinin aparat rəhbəri Vəfadar Misirov iştirakçıları salamlayaraq ali təhsil müəssisələrinə qəbul kampaniyası və müsabiqədə iştirak etmək hüququ qazanmış abituriyentlərin qarşısında duran ən vacib məsələ – ixtisas seçimi haqqında məlumat verib. Daha sonra sərgiyə baxış keçirilib.   Qeyd edək ki, Azərbaycan Texniki Universiteti (AzTU) də sərgidə öz stendi ilə təmsil olunur. Hər gün saat 12:00-da AzTU haqqında geniş təqdimat nümayiş olunur.   30 iyul – 1 avqust 2025-ci il tarixlərində Mərkəzin elektron imtahanlar korpusunda təşkil olunan sərgidə ziyarətçilər AzTU nümayəndələri ilə birbaşa ünsiyyət quraraq ixtisaslar, tədris proqramları, maddi-texniki baza, təhsil haqqı, güzəştlər, təqaüd proqramları və digər məsələlərlə bağlı onları maraqlandıran suallara cavab tapa bilərlər.

Azərbaycan Texniki Universiteti (AzTU) universitet-sənaye işbirliyi çərçivəsində “PAŞA Property Management” şirkəti ilə əməkdaşlığı davam etdirir. Əməkdaşlıq çərçivəsində “PAŞA Property Management”də keçirilən görüşdə AzTU-nun rektoru Vilayət Vəliyev universitet-sənaye işbirliyinin təkcə tələbə və məzunların təcrübə və məşğulluq məsələləri ilə məhdudlaşmadığını bildirib. Rektor müəssisələrin qarşılaşdığı problemlərin birgə elmi- tədqiqatlar formasında araşdırılmasının da bu əməkdaşlıqda yer almasının vacibliyini vurğulayıb. “PAŞA Property Management” şirkətinin baş icraçı direktoru Tural Əliyev universitet-sənaye əməkdaşlığının genişləndirilməsi üçün göstərilən təşəbbüsə görə təşəkkür edib. O, təmsil etdiyi şirkətin ali təhsil müəssisələri ilə birgə layihələr həyata keçirməsinə önəm verdiyini diqqətə çatdırıb. Görüş zamanı şirkətin fəaliyyət istiqamətləri çərçivəsində binalarda infrastrukturun və kommunal xidmətlərin təkmilləşdirilməsi ilə bağlı birgə elmi-tədqiqatların aparılması kimi məsələlər müzakirə olunub.

Azərbaycan Texniki Universitetində (AzTU) ICPC Azərbaycan İcması, AzTU-nun Təhsildə İnformasiya Texnologiyaları və Metodik Dəstək İnstitutu, ADA Universiteti, İnnovasiya və Rəqəmsal İnkişaf Agentliyinin birgə təşkilatçılığı ilə görkəmli alim və pedaqoq Ramin Mahmudzadənin anadan olmasının 90 illik yubileyinə həsr olunmuş “Beynəlxalq Proqramlaşdırma Düşərgəsi” keçirilib. Düşərgə 2025-2026 Beynəlxalq Universitetlərarası Proqramlaşdırma Müsabiqəsinin (ICPC) dörddəbir və yarımfinal mərhələlərinə hazırlıq üçün silsilə təlimlərdən biridir. Təlimdə Azərbaycanın 13 ali təhsil müəssisəsindən 14 komanda və Belarusiyanın 2 ali təhsil müəssisəsindən 3 komanda (hər komanda 3 tələbə və komanda rəhbəri ilə təmsil olunmaqla), ümumilikdə 17 komanda iştirak edib. 6 gün davam edən təlimlərdə hər gün iştirakçılara müxtəlif alqoritmik mövzularda məsələlərin proqramlarını tərtib etmək və avtomatik qiymətləndirmə sistemində sınaqdan keçirmək tapşırıqları verilib. Günün sonunda məsələlərin optimal həlli alqoritmləri şərh olunub. 6 yarışın ümumi nəticələrinə görə iştirakçılara diplom və sertifikatlar təqdim edilib.  “Beynəlxalq Proqramlaşdırma Düşərgəsi” çərçivəsində Belarus Dövlət Universitetinin professoru Vladimir Kotov “Huawei” şirkətinin müxtəlif mərkəzlərində təcrübə və iş imkanları mövzusunda təqdimat edib və iştirakçıları maraqlandıran sualları cavablandırıb.

Azərbaycan Texniki Universitetinin (AzTU) Maşınqayırma və robototexnika fakültəsinin sənaye mühəndisliyi ixtisasının III kurs tələbələri Bakı Gəmirqayırma Zavodunda yay təcrübə proqramında uğurla iştirak edir. 1 aylıq nəzərdə tutulan təcrübə proqramı müddətində tələbələr SƏTƏM qaydaları, gəmilərin layihələndirilməsi, hazırlanması və təmiri zamanı tətbiq olunan texnoloji əməliyyatların icrası, eləcə də müəssisədə mövcud olan müasir sənaye qurğularının iş prinsipi, konstruksiyası və istismarını öyrənəcək. İxtisaslı mentorlar və peşəkar mühəndislərin iştirakı ilə keçirilən təlimlər zamanı AzTU tələbələri nəzəri biliklərini istehsalatda tətbiq etməklə real təcrübə əldə edir.

Azərbaycan Texniki Universitetində (AzTU) rektor Vilayət Vəliyevin iştirakı ilə “Açıq qapı” günü keçirilib. “Açıq qapı” günündə AzTU-nun struktu bölmələrinin rəhbərləri, dekanlar, abituriyentlər və onların valideynləri iştirak ediblər. Əvvəlcə AzTU haqqında geniş təqdimat nümayiş olunub. Daha sonra rektor Vilayət Vəliyev “Açıq qapı” günündə iştirak edən abituriyentlər və onların valideynlərinin suallarını cavablandırıb. Görüşdən sonra “Açıq qapı” gününün iştirakçıları AzTU-nun Kitabxana İnformasiya Mərkəzi, MGP emalatxanası və tədris laboratoriyaları ilə tanış olublar.

Azərbaycan Texniki Universitetində (AzTU) Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi tərəfindən icra olunan “Kadr İndeksi” pilot layihəsinin nəticələrinə dair görüş keçirilib. Görüşdə AzTU-nun rektoru Vilayət Vəliyev, Dövlət Məşğulluq Agentliyinin İdarə Heyətinin sədri Sadiq Əliyev və hər iki tərəfdən aidiyyəti üzrə nümayəndələr iştirak edib. Məlumat verilib ki, ilkin olaraq layihədə universitetin iki fakültəsindən ikinci kursda təhsil alan 65 tələbə iştirak edib və 7 istiqamətdə onların qeyri-akademik fəaliyyətləri qiymətləndirilib. Növbəti mərhələ olaraq isə layihəyə cəlb olunan tələbələrin fərdi inkişafına dəstək məqsədilə tədbirlər planı hazırlanacaq. Qeyd edək ki, 10-dan artıq nüfuzlu beynəlxalq universitetin təcrübəsi əsasında hazırlanan “Kadr İndeksi”nin məqsədi tələbələrin əmək bazarında rəqabət qabiliyyətinə təsir edən fərdi göstəriciləri ölçmək, səriştələrarası balansı qiymətləndirmək, tələbələrin fərdi inkişafına yönəlik sistemli yanaşmanı formalaşdırmaqdır. Gələcəkdə layihənin genişləndirilərək AzTU-nun digər fakültələrində də həyata keçirilməsi nəzərdə tutulur.