Azərbaycan Texniki Universitetinin (AzTU) 75 illik yubiley tədbirləri çərçivəsində universitetin təşəbbüsü və təşkilatçılığı, Türkiyə-Azərbaycan Universitetinin (TAU), Kiçik və Orta Biznesin İnkişafı Agentliyinin (KOBİA), Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) və “Caspian Energy Club”un tərəfdaşlığı ilə “Universitet-sənaye əməkdaşlığı, istiqamətlər, nümunələr və süni intellekt” mövzusunda beynəlxalq forum keçirilib. Məqsəd universitet və sənaye arasında əməkdaşlıq modellərinin müzakirəsi, qabaqcıl beynəlxalq təcrübənin paylaşılması və yeni texnologiyaların, xüsusilə süni intellektin istehsalat mühitinə inteqrasiyası prosesində ali təhsil müəssisələrinin artan rolunun dəyərləndirilməsidir. Tədbiri giriş sözü ilə açan və qonaqları salamlayan AzTU-nun rektoru Vilayət Vəliyev universitet-sənaye əlaqələrinin dayanıqlı modeli və təcrübəyə əsaslanan birgə fəaliyyətin qurulmasının əhəmiyyətindən bəhs edib. Rektor AzTU-nun KOBİA ilə birgə ərsəyə gətirdiyi və uğurla fəaliyyət göstərən KOB Model Müəssisəsinin universitet-sənaye əməkdaşlığı üçün böyük töhfəsindən, bu cür təşəbbüslərin davamlı olmasının vacibliyindən danışıb. KOBİA-nın İdarə Heyətinin sədri Orxan Məmmədov mikro və kiçik sahibkarlıq fəaliyyətlərində ali təhsil müəssisələrinin iştirakı, gənc sahibkarların formalaşmasındakı rolundan bəhs edib. Bildirib ki, universitet-sənaye əməkdaşlığının effektivliyi üçün çağdaş çağırışları düzgün anlamaq və qəbul etmək, elmi-tədqiqat istiqamətlərini bazarın tələblərinə görə qurmaq, təcrübə proqramları, peşəkar kadr hazırlığı və maliyyə resurslarına çıxış vacibdir. Xəzər Universitetinin təsisçisi Hamlet İsaxanlı bildirib ki, çağdaş zamanda universitet-sənaye əməkdaşlığını qurmaq asan deyil. Yalnız elmi-tədqiqatlara önəm verib vəsaitlər ayıran araşdırma universitetləri bu cür yanaşmanı gerçəkləşdirə bilərlər. O, dünyanın ən nüfuzlu universitetlərinin iş prinsipini universitet-sənaye-süni intellekt üzrə qurduğunu və daha sonra sənayeyə yön verən və yeniliklər gətirən, çağdaş bazarın tələbləri ilə uyğunlaşan lider magistr və doktorlar yetişdirdiyini bildirib. “Caspian Energy Club”ın sədri və qrupun baş icraçı direktoru Telman Əliyev istehsalatda süni intellektin tətbiqi və bu sahədə ali təhsilin cavabdehliyindən bəhs edərək bildirib ki, çağdaş universitetlər təhsildən istehsala qədər süni intellektin təklif etdiyi imkanlardan yararlanmalı və eyni zamanda təhlükəsizlik məsələləri də paralel olaraq prioritet olmalıdır. Sahibkarlar (İşəgötürənlər) Təşkilatları Milli Konfederasiyasının prezidentinin baş məsləhətçisi Fərid Vəlizadə universitet-sənaye-dövlət üçbucağında əməkdaşlığın təşkilati və institusional mexanizmləri haqqında bölüşərək qeyd edib ki, həm universitet nümayəndələri, həm dövlət qurumlarının əməkdaşları, həm də sənaye təmsilçiləri birgə çalışaraq effektiv iş ortaya qoymalıdır. Daha sonra Türkiyə-Azərbaycan Universitetinin (TAU) prorektoru professor Mehmet Şimşir, TUBİTAK-ın sədr müavini professor Mesut Güner və İzmir Yüksək Texnologiya İnstitunun professoru Mustafa Güdən, “Azəralüminium” MMC-nin Gəncə İstehsalat Kompleksinin direktroru Cəmil Səfərov, Azərbaycan Milli Aviasiya Akademiyasının birinci prorektoru professor Ədalət Səmədov, Müdafiə Sənayesi Nazirliyinin şöbə müdiri Məmmədsaleh Əliyev, “Aselsan-Bakü” şirkətinin direktoru Özgür Kürüm, AzTU Texnoloji Transfer Ofisinin direktoru Yadullah Babayev universitetlərin texnologiya transferi və innovasiya mərkəzləri vasitəsilə sənayeyə elmi biliklər ötürməsi yolları, startap ekosistemində universitet-sənaye əlaqələrinin möhkəmləndirilməsi və yeni təşəbbüslərə dəstək mühiti, beynəlxalq texnologiya transferi ofislərinin təcrübələri, onların sənayeyə inteqrasiyada rolu, eləcə də müdafiə və aviasiya sənayesində ixtisaslı kadr hazırlığı və elmi-texniki təcrübənin birgə inkişafı kimi istiqamətlər haqqında ətraflı təqdimatlar ediblər. Tədbirdə 100-dən artıq sənaye nümayəndəsi və müxtəlif ölkələrdən akademik və texnoloji qurumların təmsilçiləri iştirak edib.

Yeni Azərbaycan Partiyası Nərimanov Rayon Təşkilatı və “EMEDIA GROUP” Media Təşkilatının birgə təşkilatçılığı ilə Azərbaycan xalqının Ümummilli Lideri Heydər Əliyevin əziz xatirəsinə və anadan olmasının 102-ci ildönümünə həsr olunmuş "Gələcəyin səmasında Azərbaycan imzası" tədbiri keçirilib. Tədbirdə dövlət nümayəndələri, Milli Məclisin deputatları, qeyri-hökumət təşkilatlarının rəhbərləri, media nümayəndələri, ictimai-siyasi xadimlər, Azərbaycan Texniki Universitetinin (AzTU) rəhbər heyəti, tələbələr və digər qonaqlar iştirak ediblər. Tədbir AzTU tələbələri tərəfindən hazırlanmış “M.AERO H10” adlı innovativ dron layihəsinin təqdimatı ilə yadda qalıb. Əvvəlcə tədbir iştirakçıları foyedə Ümummilli Lider Heydər Əliyevin büstü önünə gül dəstələri düzüb, xatirəsinə ehtiramını ifadə ediblər. Tədbirin açılışında Ulu Öndərin, ərazi bütövlüyümüz və suverenliyimiz naminə canlarından keçən qəhrəmanların əziz xatirəsi bir dəqiqəlik sükutla yad edilib və Dövlət Himni səsləndirilib. Sonra dronun əsas texniki xüsusiyyətləri barədə ətraflı məlumat verilib. Bildirilib ki, tam avtoritar rejimdə fəaliyyət göstərə bilən dron kəşfiyyat təyinatlı kamera sistemi, kamikadze funksiyası, yüksək manevr qabiliyyəti və amortizatorlu təkərlərə malikdir. Aerodinamik quruluşu ilə sanki küləklərlə danışa bilən səssiz lakin iradəli bir varlıq kimi havada süzür. Dronun bütün proqram təminatı - süni intellektdən idarəetməyə qədər - tələbələrin öz intellekt məhsuludur. Qeyd olunub ki, layihə Ulu Öndər Heydər Əliyevin gənclərə olan diqqət və qayğısının, onun uzaqgörən siyasətinin bariz nəticəsidir. “H10” adının “Heydər Əliyev 10” kimi seçilməsi də təsadüfi deyil – bu, tələbələrin Ulu Öndərə olan dərin sevgisi və ehtiramının rəmzidir. Onlar bu layihə vasitəsilə yalnız texnoloji yenilik yaratmayıb, Ümummilli Lider Heydər Əliyevin gənclərə aşıladığı siyasəti yaşadaraq, onun ideyalarını real nəticələrə çeviriblər. Layihədə əməyi keçən komanda üzvləri səhnəyə dəvət olunaraq ictimaiyyətə təqdim ediliblər: Layihə rəhbəri Rəşvin Şirəlizadə, mühəndis Anar Məmmədov, mexanik Adil Orucov, elektrik və elektronika mütəxəssisi İsmayıl Rəhimli, proqramçı Elmir Nəbiyev. 44 günlük haqq savaşımızda qazanılan şanlı Qələbədən ilhamlandıqlarını bildirən gənclər Vətən müharibəsində əldə edilən Zəfərdə qardaş ölkə Türkiyənin istehsal etdiyi pilotsuz uçuş aparatlarının rolunun böyük olduğunu xatırladıblar. Bildirilib ki, müasir texnologiyaların tətbiqinin gətirdiyi üstünlükləri nəzərə alaraq iki ay əvvəl layihənin icrasına başlanılıb. Hazırladıqları dron haqqında danışan gənclər qeyd ediblər ki, kameraya xüsusi yazılmış proqramlar sayəsində çəkilişlər daha dəqiq və funksional şəkildə həyata keçirilir. Havadakı sabitliyi və uçuş dəqiqliyi özəl alqoritmlərlə tənzimlənir. Hərəkətləri zərif, amma qətiyyətlidir. Sonra çıxış edən YAP Nərimanov rayon təşkilatının sədri Elçin Quliyev, Əsir və itkin düşmüş, girov götürülmüş vətəndaşlarla əlaqədar Dövlət Komissiyası işçi qrupunun rəhbərinin müavini Eldar Səmədov, müdafiə sənayesi nazirinin müşaviri Arif Babayev, Milli Məclisin deputatları – Jalə Əliyeva, Könül Nurullayeva, Aydın Mirzəzadə, Günay Ağamalı, Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova, Medianın İnkişafı Agentliyinin İcraçı direktorun müavini Natiq Məmmədli, Yeni Azərbaycan Partiyası Yasamal rayon təşkilatının sədri Bəxtiyar Nəbiyev, AzTU-nun prorektoru Rəşad Əliyev, “EMEDIA GROUP” Media Təşkilatının sədri Elşən Əliyev və başqaları Ulu Öndər Heydər Əliyevin əsasını qoyduğu dövlətçilik və gənclər siyasətinin bu gün onun layiqli davamçısı Müzəffər Ali Baş Komandan Prezident İlham Əliyev tərəfindən uğurla davam etdirildiyini bildiriblər. Elə həmin siyasətin nəticəsidir ki, 44 günlük Vətən müharibəsi zamanı ölkə başçısının bir çağırışı ilə minlərlə gənc könüllü şəkildə cəbhəyə axışaraq Vətən uğrunda savaşa atıldı. Bu həm birliyin, həm liderə inamın, həm də vətənpərvərliyin ən ali nümunəsi idi. Dron və PUA-ların İkinci Qarabağ müharibəsi zamanı hərbi əməliyyatların aparılmasında, Silahlı Qüvvələrin hücumuna dəstək verilməsində, yeni mövqelərin əldə olunmasında, həmçinin itkilərin minimuma endirilməsində Azərbaycana çox kömək etdiyini qeyd edən çıxışçılar gənclərin ərsəyə gətirdiyi texnologiyanı və onların peşəkarlığını yüksək dəyərləndirib, onun təkmilləşdirilməsi və yeni texnologiyaların hazırlanması istiqamətində təkliflərini verib, onların daha böyük uğurlar qazanacaqlarına əminliklərini ifadə ediblər. Sonda komanda üzvləri fəxri fərmanlarla təltif olunublar.

Azərbaycan Texniki Universitetində (AzTU) nüfuzlu “Springer Nature” beynəlxalq elmi nəşriyyatının vitse-prezidenti Aliaksandr Birokou tərəfindən seminar təşkil olunub. “Springer Nature” ilə beynəlxalq nəşr imkanları: Azərbaycan üçün perspektivlər” mövzusunda keçirilən seminarda AzTU-nun akademik heyəti fəal iştirak edib, iştirakçılar elmi məqalələrin beynəlxalq jurnallarda dərc olunması, açıq giriş (Open Access) modelləri, konfrans materiallarının nəşri və “Springer Nature” tərəfindən təqdim olunan digər nəşr imkanları haqqında ətraflı məlumat əldə ediblər. Seminar zamanı Birokou “Springer Nature” beynəlxalq elmi nəşriyyatı və onun iş prinsipləri haqqında məlumat verib. Daha sonra qonaq Azərbaycan alimlərinin beynəlxalq elmi platformalarda təmsil edilməsinin artırılması yolları və regiona xas tədqiqat mövzuları üzrə nəşr strategiyaları barədə fikir mübadiləsi aparıb. O bildirib ki, Azərbaycandan bir çox universitetlərin nəşrləri onların bazasında yer alır, AzTU isə bu bazaya 474 nəşrlə daxil olub. Azərbaycandan ən çox müraciət edilmiş tədqiqat mövzuları əsasən fizika, kimya, tətbiqi riyaziyyat, informatika və kompüter elmləri, mühəndislik və s. kimi sahələrdən seçilib. Seminarın sonunda AzTU-nun professor-müəllim heyətinin sualları cavablandırılıb.

Azərbaycan Texniki Universitetinin (AzTU) rektoru Vilayət Vəliyev beynəlxalq statistik viktorinada uğur qazanan Maşınqayırma və robototexnika fakültəsinin tələbəsi Kənan Niftəliyevlə görüşüb. Qeyd olunub ki, Kənan Niftəliyev Müstəqil Dövlətlər Birliyinin (MDB) Dövlətlərarası Statistika Komitəsinin təşkilatçılığı ilə Böyük Vətən müharibəsində qazanılmış qələbənin 80-ci ildönümünə həsr olunan "Qələbənin rəqəmləri və faktları" mövzusunda onlayn statistik viktorinada təqdim olunan 85 sualdan 75 sualı düzgün cavablandırıb. Mümkün 176 baldan 156 bal toplayan Kənan Niftəliyev Azərbaycan ali məktəbləri arasında viktorinada ən yüksək bal toplayan iki tələbədən biri olub. Rektor Vilayət Vəliyev beynəlxalq statistik viktorinada qazandığı nailiyyət münasibətilə Kənan Niftəliyevi təbrik edib. Ona dərslərində və növbəti müsabiqələrdə uğurlar arzulayıb.   

Azərbaycan Texniki Universitetinin (AzTU) Keyfiyyətin təminatı şöbəsinin əməkdaşları Nərmin Xasayeva, Afaq İsmayılzadə, Həmidə Həsənova Bakı Dövlət Universitetində (BDU) təşkil olunan “Ali təhsildə keyfiyyət təminatı sistemi” mövzusunda 4 günlük təlim proqramında iştirak ediblər. Təlim proqramı Azərbaycan universitetləri ilə Türkiyənin Kırşehir Ahi Evran Universiteti arasında imzalanmış əməkdaşlıq haqqında anlaşma memorandumu çərçivəsində, Türk Əməkdaşlıq və Koordinasiya Agentliyinin (TİKA) dəstəyi və BDU-nun Keyfiyyət Təminatı Mərkəzinin təşkilatçılığı ilə keçirilib. Təlim zamanı ali təhsildə keyfiyyət təminatı sistemlərinin qurulması və inkişaf etdirilməsi mövzularında təqdimatlar edilib, müzakirələr aparılıb. Kırşehir Ahi Evran Universitetinin prorektoru Hüseyn Şimşek Azərbaycan və Türkiyə arasında ali təhsil sahəsində təcrübə mübadiləsinin əhəmiyyətini qeyd edərək, bu təşəbbüsün strateji tərəfdaşlıq baxımından mühüm rol oynadığını bildirib. Təlim proqramının sonunda iştirakçılara sertifikat təqdim olunub.

Mayın 10-u müasir müstəqil Azərbaycanın memarı və qurucusu, xalqımızın dahi oğlu və ümummilli lideri Heydər Əliyevin anadan olmasının 102 illiyi qeyd olunur. Bununla əlaqədar Azərbaycan Texniki Universitetinin (AzTU) və Türkiyə-Azərbaycan Universitetinin (TAU) kollektivi Fəxri xiyabanda Ulu Öndərin məzarını ziyarət ediblər.

Yeni Azərbaycan Partiyası Yasamal rayon təşkilatı, Yasamal Rayon İcra Hakimiyyəti, Bakı şəhər Gənclər və İdman İdarəsinin Yasamal rayonu üzrə Gənclər və İdman sektorunun birgə təşkilatçılığı və Azərbaycan Nar İstehsalçıları və İxracatçıları Assosiasiyasının sədri Fərhad Qaraşovun tərəfdaşlığı ilə ümummilli lider Heydər Əliyevin anadan olmasının 102 illiyinə həsr olunan ali və orta ixtisas təhsil müəssisələrinin komandaları arasında silsilə idman yarışlarının bağlanış və mükafatlandırma mərasimi keçirilib. Tədbirdə Azərbaycan Texniki Universitetini (AzTU) Humanitar fənlər kafedrasının müdiri Həbib Mirzəyev təmsil edib. Yarışın nəticələrinə əsasən, AzTU komandaları minifutbol, voleybol (oğlanlar arasında), basketbol, tenis idman növü üzrə 1-ci, şahmatda isə 2-ci yerə layiq görülüb.

Azərbaycan Texniki Universiteti (AzTU) və Türkiyə-Azərbaycan Universitetinin (TAU) birgə təşkilatçılığı ilə ulu öndər Heydər Əliyevin anadan olmasının 102 illiyinə həsr olunan tədbir keçirilib. Əvvəlcə müasir müstəqil Azərbaycanın memarı və qurucusu, xalqımızın dahi oğlu və ümummilli lideri Heydər Əliyevin və torpaqlarımızın azadlığı uğrunda canlarından keçən Vətən övladlarının əziz xatirəsi bir dəqiqəlik sükutla yad olunub. Azərbaycanın Dövlət Himni səsləndirilib. Tədbirin moderatoru AzTU-nun Humanitar fənlər kafedrasının müdiri Həbib Mirzəyev açılış nitqi ilə çıxış edərək, Ulu Öndərin Azərbaycan xalqı qarşısında tarixi və əvəzsiz xidmətlərindən danışıb. AzTU-nun rektoru Vilayət Vəliyev görkəmli dövlət xadimi, xalqımızın ümummilli lideri Heydər Əliyevin elm və təhsil strategiyasından danışıb. Bildirib ki, Ulu Öndər ölkədə savadlı kadrların hazırlanmasına hər zaman önəm verirdi.  Qeyd olunub ki, dahi şəxsiyyət Heydər Əliyev türk dünyasının lideri idi. Azərbaycanla türk dünyası arasında bütün sahələrdə əlaqələrin qurulmasında Ulu Öndərin əvəzsiz xidmətləri olub. Azərbaycançılıq ideologiyasının yaranması və inkişafı da məhz Ulu Öndərin adı ilə bağlıdır. Ulu Öndərin memarı olduğu Azərbaycanın bütün sahələrdə inkişafı bu gün Prezident, Ali Baş Komandan İlham Əliyev tərəfindən uğurla davam etdirilir. Daha sonra TAU-nun prorektoru Mehmet Şimşir, AzTU-nun Humanitar fənlər kafedrasının dosenti Akif Nağı çıxış edib. Qeyd olunub ki, xalqın yaddaşında xilaskar obrazı ilə qalan Heydər Əliyev Azərbaycanı məhv olmaq təhlükəsindən xilas edib. Bu günün qalib Azərbaycanı məhz Ulu Öndərin siyasətinin təntənəsidir. Fədakarlığın və mübarizliyin rəmzi olan ümummili lider Heydər Əliyev hər zaman sevgi və qürurla xatırlayacağımız dahi şəxsiyyətdir.

Pakistan İslam Respublikasının İslamabad Vəqf Universitetinin (FUI) rektoru Muhammad Kaleem Asifin rəhbərlik etdiyi nümayəndə heyəti Azərbaycan Texniki Universitetinin (AzTU) qonağı olub. Qonaqlar AzTU-nun rektoru Vilayət Vəliyev və universitetin nümayəndələri ilə görüşüb. Qonaqları salamlayan rektor Vilayət Vəliyev AzTU-da son illər həyata keçirilən layihələrdən danışıb. Rektor Azərbaycanla Pakistan universitetləri arasında tədris və tədqiqat sahəsində əməkdaşlığın daha da genişləndirilməsinin vacibliyini vurğulayıb. FUI rektoru Muhammad Kaleem Asif təmsil etdiyi ali təhsil müəssisəsində görülən işlərdən və yeniliklərdən bəhs edib. Görüşdə qarşılıqlı maraq doğuran digər məsələlər ətrafında fikir mübadiləsi aparılıb.  Daha sonra iki universitet arasında anlaşma memorandumu imzalanıb.  

Azərbaycan Texniki Universitetinin (AzTU) İdman sarayında ulu öndər Heydər Əliyevin anadan olmasının 102 illiyinə həsr olunmuş AzTU əməkdaşları və tələbələri arasında keçirilən ənənəvi XII Spartakiada sona çatıb. AzTU Həmkarlar İttifaqı Komitəsi (HİK), Tələbə Həmkarlar İttifaq Komitəsi (THİK) və AzTU İdman Klubunun təşkilatçılığı ilə keçirilən bağlanış mərasimində ulu öndər Heydər Əliyevin və Azərbaycanın ərazi bütövlüyü və suverenliyi uğrunda canlarından keçən şəhidlərin əziz xatirəsi bir dəqiqəlik sükutla yad olunub. Daha sonra Azərbaycanın Dövlət Himni səsləndirilib.  Spartakiadada iştirak edən AzTU əməkdaşları idmanın futbol, voleybol, stolüstü tennis, dama və şahmat üzrə, AzTU tələbələri isə futbol, voleybol, stolüstü tennis, dama, şahmat, basketbol və güləş üzrə yarışıblar. Qalibləri təbrik edən AzTU-nun prorektoru Rəşad Əliyev bildirib ki, Spartakiadada 250-ə yaxın əməkdaş və 400-ə yaxın tələbə iştirak edib. Prorektor AzTU-da idmanın, bədən tərbiyəsinin inkişafının hər zaman diqqətdə saxlanıldığını vurğulayıb. Daha sonra Azərbaycan Təhsil İşçiləri Azad Həmkarlar İttifaqı Respublika Komitəsinin sədrinin müşaviri Elşad Novruzov və AzTU Həmkarlar İttifaqı Komitəsinin sədri Elvin Bəxtiyarlı yarış iştirakçılarına öz təbriklərini çatdırıb və fəal iştirak etdiklərinə görə təşəkkürlərini ifadə ediblər. Çıxışlarda Ümumilli Liderin gənclərin və vətəndaşların idmana və sağlamlığa göstərdiyi diqqət və qayğı xüsusi vurğulanıb. Həmçinin əməkdaşların asudə vaxtlarının səmərəli təşkili və onların sağlamlıqlarının qorunması istiqamətində AzTU-nun Azərbaycan Təhsil İşçiləri Azad Həmkarlar İttifaqı Respublika Komitəsi ilə birgə əməkdaşlığı və gələcək imkanlar barədə də məlumat verilib. Daha sonra təltifetmə mərasimi olub. Şahmat yarışlarında əməkdaşlar arasından I yerə Nəqliyyat və logistika fakültəsi, tələbələr arasından isə Xüsusi texnika və texnologiya fakültəsi layiq görülüb. Stolüstü tennis yarışlarında əməkdaşlar arasından I yerə Maşınqayırma və robototexnika fakültəsi, tələbələr arasından isə İnformasiya texnologiyaları və telekommunikasiya fakültəsi layiq görülüb. Dama yarışlarında əməkdaşlar arasından I yerə Ümumi şöbələr komandası, tələbələr arasından isə Maşınqayırma və robototexnika fakültəsi layiq görülüb. Volleybol yarışlarında əməkdaşlar arasından I yerə Ümumi şöbələr komandası, tələbələr arasından isə İnformasiya texnologiyaları və telekommunikasiya fakültəsi layiq görülüb. Futzal yarışlarında əməkdaşlar arasından I yerə Ümumi şöbələr komandası, tələbələr arasından isə Metallurgiya və kimya texnologiya fakültəsi layiq görülüb. Tələbələr arasında keçirilən basketbol yarışlarında I yerin sahibi Energetika fakültəsi olub. Sərbəst güləş üzrə yarışlarda isə AzTU tələbələri fərqli çəki dərəcələrində I, II və III yerləri bölüşdürüblər. Qaliblər AzTU rektorluğu, HİK və THİK tərəfindən diplom, medal və hədiyyələrlə təltif olunub.