Azərbaycan Texniki Universitetinin (AzTU) Xüsusi texnika və texnologiya fakültəsi tədris müəssisələrində idarəetmənin beynəlxalq standartlara uyğunluğunu təsdiqləyən ISO 21001:2018 – Tədris təşkilatlarında idarəetmə sistemi sertifikatına layiq görülüb. Sertifikatlaşdırma “STAREGISTER International Inc.” beynəlxalq sertifikatlaşdırma şirkəti tərəfindən həyata keçirilib. Sertifikatı “STAREGISTER International Inc.” beynəlxalq sertifikatlaşdırma şirkətinin Azərbaycan üzrə rəsmi nümayəndəsi, “INCERT” sertifikatlaşdırma şirkətinin direktoru Şamo Muradov AzTU-nun rektoru Vilayət Vəliyevə təqdim edib. Rektor Vilayət Vəliyev ISO 21001:2018 standartının tədris müəssisələrində idarəetmənin sistemli qurulması, tələbəyönümlü yanaşmanın gücləndirilməsi və davamlı keyfiyyət təminatının formalaşdırılması baxımından xüsusi əhəmiyyət daşıdığını vurğulayıb. Rektor qeyd edib ki, Xüsusi texnika və texnologiya fakültəsi ölkə üçün strateji əhəmiyyətə malik sahələr üzrə kadr hazırlığını həyata keçirir və bu sertifikat fakültənin institusional inkişafının beynəlxalq səviyyədə tanınmasının göstəricisidir. Qeyd edək ki, sertifikatlaşdırma prosesi çərçivəsində fakültədə tədris və idarəetmə prosesləri, fənn proqramları və sillabuslar, tələbə məmnunluğu, eləcə də davamlı təkmilləşdirmə prosedurları ISO 21001:2018 standartının tələblərinə uyğun olaraq hərtərəfli audit edilib və müsbət qiymətləndirilib.

Azərbaycan Texniki Universitetinin (AzTU) SABAH mərkəzinin rəhbəri Aytən Sadıqova mobillik proqramı ilə Türkiyənin Gazi Universitetində səfərdə olub. Səfər çərçivəsində Aytən Sadıqova Gazi Universitetinin Texnologiya fakültəsi, Mühəndislik fakültəsi, Yüksək Təhsil İnstitutu və Elektrik-energetika fakültəsinin tələbələrinə seminar keçib. Aytən Sadıqova həmçinin AzTU-da SABAH qrupları çərçivəsində tətbiq olunan praktiki yönümlü, nəticəəsaslı və sənaye ilə inteqrasiya olunmuş təhsil modeli, innovativ tədris yanaşmaları və elmi-tədqiqat fəaliyyəti barədə ətraflı məlumat verib. Görüşlər zamanı birgə elmi-tədqiqat layihələrinin həyata keçirilməsi, müəllim və tələbə mübadiləsi, beynəlxalq və regional layihələrdə birgə iştirakla bağlı fikir mübadiləsi aparılıb.

Azərbaycan Texniki Universiteti (AzTU) ilə universitetin Həmkarlar İttifaqı Komitəsi arasında kollektiv müqavilə imzalanıb. Müqaviləni AzTU-nun rektoru Vilayət Vəliyev və universitetin Həmkarlar İttifaqı Komitəsinin sədri Lalə Piriyeva imzalayıb. Kollektiv müqavilə Azərbaycan Respublikasının Əmək Məcəlləsinə və Azərbaycan Respublikası Elm və Təhsil Nazirliyi və Elm və Təhsil İşçiləri Həmkarlar İttifaqı Respublika Komitəsi arasında bağlanmış 06.10.2025-ci il tarixli Kollektiv Sazişə (2025-2027) uyğun olaraq işəgötürənlə işçilər arasında əmək, sosial-iqtisadi və digər münasibətləri tənzimləmək məqsədilə bağlanılır.

Azərbaycan Texniki Universitetinin (AzTU) Kompüter texnologiyaları kafedrasının müdiri Zəfər Cəfərov, kafedranın dosenti Elman İmaməliyev, baş müəllimlər Mübariz Qəmbərov və Zaur Qəmbərov mobillik proqramı ilə Türkiyənin İstanbul Texniki Universiteti (İTÜ) və Yıldız Texniki Universitetində (YTÜ) səfərdə olub. Nümayəndə heyəti sözügedən universitetlərin Kompüter mühəndisliyi kafedralarında görüşlər keçirib. Görüşlər zamanı kompüter mühəndisliyi sahəsində birgə elmi-tədqiqatların və ikili diplom proqramlarının həyata keçirilməsi, həmçinin əməkdaşlıq imkanlarınını genişləndirilməsi ilə bağlı müzakirələr aparılıb.

Azərbaycan Texniki Universitetinin (AzTU) Humanitar fənlər kafedrasının müdiri dosent Həbib Mirzəyev və professor Əyyub Kərimov mübadilə proqramı ilə Qazaxıstanın K.İ.Satbayev adına Qazax Milli Tədqiqat Texniki Universitetində səfərdə olub. Səfər çərçivəsində İ.K.Satbayev adına Qazax Milli Tədqiqat Texniki Universitetinin elm və korporativ inkişaf üzrə prorektoru professor Kuldeev Erjan İtemenoviç, Layihələrin İdarə Edilməsi İnstitutunun direktoru professor Bakıtcan Amralinova, Elmi layihələrə dəstək və doktorantura təhsili departamentinin direktoru Jumadilova Janar Orazbekova və Qazax və rus dilləri kafedrasının müdiri dosent Almas Uderbayevlə səmərəli görüşlər keçirilib.  Görüşlərdə elmi əməkdaşlığın inkişaf etdirilməsi, birgə layihələrin icrası, prioritet tədqiqat sahələri üzrə əməkdaşlıq imkanları geniş müzakirə olunub. AzTU-nun kafedra müdiri Həbib Mirzəyev tərəfindən K.İ.Satbayev adına Universitetin Qazax və rus dilləri kafedrasında AzTU haqqında təqdimat olub, kafedra əməkdaşları üçün elmi seminar təşkil edilib. AzTU nümayəndələri həmçinin İ.K.Satbayev adına Qazax Milli Tədqiqat Texniki Universitetinin rektoru Meyram Muxametraximoviç Beqentaevin 2025-ci ilin yekunlarına həsr olunmuş hesabat yığıncağında da iştirak edib. Səfər çərçivəsində AzTU nümayəndə heyəti Qazaxıstan Milli Elmlər Akademiyası Axmet Baytursınulu adına Dilçilik İnstitutununu və Fəlsəfə, Politologiya və Dinşünaslıq İnstitutunu da ziyarət ediblər. Fəlsəfə, Politologiya və Dinşünaslıq İnstitutunun Dünya və Qazax Fəlsəfəsi Mərkəzində keçirilən işgüzar görüşdə türk fəlsəfəsinə dair tədqiqatların inkişaf etdirilməsi üçün müvafiq istiqamətlər müzakirə olunub. Səfər zamanı AzTU  nümayəndə heyətinə Qazax dilçiliyinə dair müxtəlif elmi ədəbiyyatlar, həmçinin İFPR-in Qazax və dünya fəlsəfi düşüncəsi sahəsində müasir tədqiqatları əks etdirən elmi nəşrlər təqdim olunub.

Azərbaycan Texniki Universitetinin (AzTU) Kimya texnologiya, təkrar emal və ekologiya kafedrasının müdiri professor Fəxrəddin Yusubov, kafedranın əməkdaşları professor Güləhməd Talıbov və dosent Əli İbrahimov mübadilə proqramı ilə Türkiyənin Malatya və Elazığ şəhərlərində səfərdə olub. Səfər çərçivəsində İnönü, Turgut Özal və Fırat universitetlərinin rektorları ilə görüşlər keçirilib. Görüşlər zamanı birgə layihələrin həyata keçiriləsi, müəllim və tələbə mübadiləsi ilə bağlı müzakirələr aparılıb. AzTU nümayəndə heyəti sözügedən universitetlərin tədris və tədqiqat laboratoriyaları ilə tanış olub.

“Synergia Academy” şirkətinin icraçı direktoru Rəna Əfəndiyevanın rəhbərlik etdiyi nümayəndə heyəti Azərbaycan Texniki Universitetini (AzTU) ziyarət edib. Məqsəd AzTU və “Synergia Academy” arasında əməkdaşlığın genişləndirilməsi imkanlarının müzakirəsi olub. Qonaqları salamlayan Rektor Vilayət Vəliyev əmək bazarı ilə əlaqələrin genişləndirilməsi baxımından “Synergia Academy” şirkətinin rolunu yüksək qiymətləndirib, şirkətlə əməkdaşlığın genişləndirilməsinin əhəmiyyətini vurğulayıb. “Synergia Academy” şirkətinin nümayəndələri AzTU-da birgə mərkəzin yaradılması, habelə təlim, sertifikatlaşdırma və tədqiqatyönümlü tədris proqramlarının formalaşdırılması imkanlarını müzakirə edib. Mərkəzin tədqiqat və innovasiya əsaslı modelləri, texnoloji və tətbiqi sahələr üzrə ixtisaslaşmış kursları, eləcə də dizayn yönümlü proqramları əhatə edəcəyi qeyd olunub. İlkin mərhələdə pilot layihənin tətbiqi və mərkəzin kompleks həll modeli əsasında qurulmasının vacibliyi diqqətə çatdırılıb. Görüşdə həmçinin “Synergia Academy”nin univeristetin müəllim və tələbələrində yumşaq bacarıqların formalaşmasına hədəflənmiş “Körpü” Proqramı müzakirə olunub və gələcəkdə layihənin AzTU-da həyata keçirilməsi imkanları müzakirə olunub. Sonda “Synergia Academy”nin mühəndis yönümlü Mini MBA Proqramı üzrə təklifləri təqdim olunub və bu proqramın gələcəkdə AzTU ilə birgə icası imkanları barədə fikir mübadiləsi aparılıb.

Azərbaycan Texniki Universitetinin (AzTU) Enerji effektivliyi və yaşıl enerji texnologiyaları kafedrasının müdiri professor Vaqif Həsənov, kafedranın professoru Fuad Məmmədov və baş müəllim Elbəy Rüstəmzadə mübadilə proqramı ilə Özbəkistanın İ.Kərimov adına Daşkənd Dövlət Texniki Universiteti və Özbəkistan Elmlər Akademiyasının Fiziki-Texniki İnstitutunda səfərdə olub. Səfərin əsas məqsədi enerji səmərəliliyi, bərpa olunan enerji mənbələri və müasir yaşıl texnologiyalar sahəsində təcrübə mübadiləsinin aparılması, birgə elmi-tədqiqat imkanlarının müzakirəsi və gələcək əməkdaşlıq perspektivlərinin müəyyənləşdirilməsi olub. Səfər çərçivəsində kafedra nümayəndələri İ.Kərimov adına Daşkənd Dövlət Texniki Universitetinin müvafiq fakültə və kafedra əməkdaşları ilə görüşlər keçirib. Görüşlər zamanı hər iki ali təhsil müəssisəsində enerji mühəndisliyi, alternativ enerji mənbələri, enerji auditinin aparılması və dayanıqlı inkişaf istiqamətində görülən işlər barədə ətraflı məlumatlar təqdim olunub. Xüsusilə günəş və külək enerjisi texnologiyaları, ağıllı enerji sistemləri və karbon emissiyalarının azaldılması mövzuları diqqət mərkəzində olub. Kafedra əməkdaşları İ.Kərimov adına Daşkənd Dövlət Texniki Universiteti və Özbəkistan Elmlər Akademiyasının Fiziki-Texniki İnstitutunun elmi laboratoriyaları, tədris mərkəzləri və tədqiqat infrastrukturu ilə yaxından tanış olublar. Səfər zamanı həmçinin seminar və müzakirələr təşkil edilib, Enerji effektivliyi və yaşıl enerji texnologiyaları kafedrasının nümayəndələri tərəfindən mövzu üzrə təqdimatlar olub.

Azərbaycan Texniki Universitetinin (AzTU) Elmi şurasının 2025-ci ildə sonuncu iclası keçirilib. Rektor Vilayət Vəliyev 31 Dekabr - Dünya Azərbaycanlılarının Həmrəyliyi Günü və Yeni il münasibətilə şura üzvlərini təbrik edib, onlara işlərində uğurlar arzulayıb. Daha sonra universitetin növbəti il üçün Strateji İnkişaf Planı (SİP) təsdiq olunub. Strukturların fəaliyyətində növbəti il ərzində keyfiyyətin daha da artırlıması ilə bağlı tapşırıqlar verilib.  

Azərbaycan Texniki Universitetinin (AzTU) rektoru Vilayət Vəliyev elmi-tədqiqat və akademik mübadilə proqramlarında iştirak edən müəllimlərlə görüş keçirib. Görüşün məqsədi universitetin beynəlxalq elm və tədris əməkdaşlıqlarının mövcud vəziyyətinin qiymətləndirilməsi, əldə olunan nəticələrin nəzərdən keçirilməsi və növbəti fəaliyyət istiqamətlərinin müəyyənləşdirilməsi olub. Qeyd olunub ki, son bir ay ərzində AzTU-nun 74 əməkdaşı və 14 tələbəsi Türkiyə, Pakistan, Qazaxıstan və Özbəkistanın 15 ali təhsil müəssisəsində müxtəlif elmi-tədqiqat və akademik mübadilə, seminar və təcrübə proqramlarında iştirak edib. Bu əməkdaşlıqlar çərçivəsində birgə layihələrin icrası, ikitərəfli tədqiqat təşəbbüsləri, elmi nəşrlərin hazırlanması və yeni tədris istiqamətlərinin formalaşdırılması üzrə ilkin razılaşmalar əldə olunub. Görüş zamanı AzTU-nun beynəlxalq tərəfdaşlıq şəbəkəsinin genişləndirilməsi, müəllim və tələbələrin xaricdə elmi-təcrübə imkanlarına çıxışının artırılması, həmçinin birgə laboratoriya və tədqiqat mərkəzlərinin yaradılması istiqamətində növbəti addımlar müəyyən edilib. Rektor bildirib ki, universitetin qarşıya qoyduğu əsas hədəf beynəlxalq əməkdaşlıqların davamlı institusional əməkdaşlıq mexanizmlərinə və ölçülə bilən elmi nəticələrə çevrilməsidir. Tədbirdə iştirakçılar gələcək perspektivlər, əməkdaşlığın təkmilləşdirilməsi və yeni imkanların dəyərləndirilməsi ilə bağlı təkliflər səsləndiriblər. AzTU rəhbərliyi beynəlxalq fəaliyyətlərin universitetin inkişaf strategiyasında prioritet istiqamət kimi müəyyənləşdirildiyini vurğulayıb və bu sahədə işlərin davam etdiriləcəyini qeyd edib.