“Konstitusiya və Suverenlik İli” çərçivəsində Azərbaycan Texniki Universitetinin (AzTU) tələbələri üçün hüquqşünas Şükufə Muradsoy tərəfindən seminar keçirilib. Əvvəlcə torpaqlarımızın ərazi bütövlüyü və suverenliyi uğrunda canlarından keçən Vətən övladlarının əziz xatirəsi bir dəqiqəlik sükutla yad edilib. Azərbaycanın Dövlət Himni səsləndirilib. Salamlama nitqi ilə çıxış edən AzTU-nun Kommunikasiya şöbəsinin əməkdaşı Mehti Namazov bildirib ki, Prezident İlham Əliyevin 28 dekabr 2024-cü il tarixli Sərəncamı ilə 2025-ci il “Konstitusiya və Suverenlik İli” elan olunub və bununla əlaqədar ölkədə müxtəlif tədbirlər keçirilir. Bu gün keçirilən seminar da həmin tədbirlərin məntiqi davamıdır. Daha sonra çıxış edən Humanitar fənlər kafedrasının müdiri Həbib Mirzəyev “Konstitusiya və Suverenlik İli”nin Azərbaycanın tarixində böyük ictimai-siyasi hadisə olduğunu diqqətə çatdırıb. Həbib Mirzəyev vurğulayıb ki, bu cür tədbirlər tələbələrin vətənpərvər ruhunun yüksəlməsinə xidmət edir. Hüquqşünas Şükufə Muradsoy tələbələri Azərbaycan Respublikasının Konstitusiyasının əsas müddəaları ilə tanış edərək, konstitusion hüquqlar barədə məlumat verib. Şəbnəm Muradsoy ailə, sağlamlıq, təhsil, nikah, əmək, şərəf və ləyaqətin müdafiəsi və digər hüquqlardan bəhs edib. İnteraktiv şəkildə keçən seminarda tələbələr onları maraqlandıran sualları hüquqşünasa ünvanlayıb.

Səhiyyə Nazirliyinin Respublika QİÇS-lə Mübarizə Mərkəzi (RQMM) insanın immunçatışmazlığı virusunun (İİV) törətdiyi xəstəliklə (İİV infeksiyası) mübarizə tədbirləri çərçivəsində Azərbaycan Texniki Universitetində (AzTU) infosessiya keçirib. AzTU Tələbə Gənclər Təşkilatının təşkilatçılığı ilə keçirilən tədbirin əsas məqsədi tələbələr arasında insanın immunçatışmazlığı virusu (İİV) və Qazanılmış İmmunçatışmazlıq Sindromu (QİÇS) barədə məlumatlılığı artırmaq və bu sahədə profilaktik tədbirlərin vacibliyini vurğulamaq olub. Maarifləndirmə tədbirində İİV və QİÇS-in yoluxma yolları, qarşısının alınması üsulları və xəstəliyin cəmiyyətə təsiri ilə bağlı geniş məlumat verilib. Tələbələrə həmçinin bu mövzuda düzgün məlumatlanmağın önəmi və İİV-lə yaşayan insanların hüquqlarının qorunması məsələləri izah edilib.

Azərbaycan Texniki Universitetində (AzTU) “Bitget Hackaton – Startap” müsabiqəsinin yekun mərhələsi keçirilib. Müsabiqəyə AzTU, Bakı Mühəndislik Universiteti (BMU) və Azərbaycan Memarlıq və İnşaat Universitetinin (AzMİU) tələbələrindən ibarət komandaların “Blockchain”, “Kriptovalyuta”, “Süni İntellekt” və “Data Analitika” mövzuları üzrə 30-a yaxın startap layihəsi təqdim edilib. Onlardan 19 layihə final mərhələsinə keçərək geniş təqdimat formatında nümayiş etdirilib. Layihələr 5 əsas meyar – komanda və təqdimat bacarığı, ideya, texniki əsaslandırma, praktiki tətbiq imkanı, kommersiya potensialı üzrə peşəkar münsiflər heyəti (Osman Gündüz, Elnur Quliyev, Orxan Əhmədov və Aytən Mövsümova) tərəfindən qiymətləndirilib. Gərgin rəqabət və yüksək səviyyəli təqdimatlar nəticəsində qalib komandalar müəyyənləşdirilib və ümumi 3.000 ABŞ dolları məbləğində mükafat (1-ci yer 1.500$, 2-ci yer 1.000$, 3-cü yer 500$) qaliblərə təqdim olunub. Nəticələrə görə, 1-ci yerə AzTU, 2-ci yerə BMU, 3-cü yerə isə AzTU komandası lazyiq görülüb. Tədbirin təşkilatçıları olan AzTU və “Bitget” platforması bu hakaton vasitəsilə Azərbaycanda startap ekosistemi və rəqəmsal texnologiyaların inkişafına dəstəyini nümayiş etdirib. Bu cür təşəbbüslər gənclərin texnoloji biliklərini yalnız nəzəriyyədə deyil, real layihələr və biznesyönümlü məhsullara inteqrasiya edilməsinə imkan yaradır. Belə tədbirlər gənclərin teorik biliklərini real texnoloji layihələrə çevirməsi, komanda ruhu formalaşdırması və qlobal texnologiya sektoruna çıxması üçün zəruri zəmin yaradır.

Azərbaycan Texniki Universitetində (AzTU) tələbələr üçün “Brainzy” mobil tətbiqi haqqında infosessiya keçirilib. Təqdimat zamanı “Brainzy” mobil tətbiqinin əsas imkanları, istifadə qaydaları və inkişaf perspektivləri haqqında ətraflı məlumat verilib. Qeyd olunub ki, mobil tətbiqin tələbələr arasında tanıdılması gələcək istifadəçi auditoriyasının genişlənməsi baxımından mühüm addımdır.   Tələbələr mobil tətbiqlə bağlı onları maraqlandıran sualları səsləndiriblər.

Azərbaycan Texniki Universitetinin (AzTU) Enerji effektivliyi və yaşıl enerji texnologiyaları kafedrasının müdiri professor Vaqif Həsənov Azərbaycan Metrologiya İnstitutunun (AzMİ) əməkdaşları üçün təlim keçib. “Scopus bazasında məqalələrin dərc edilməsi” mövzusunda keçirilən təlimdə elmi məqalələrin beynəlxalq bazalarda, xüsusilə də “Scopus” indeksli jurnallarda dərc olunma prosesi, tələblər və uğurlu nəşr strategiyaları barədə ətraflı məlumat verilib. İştirakçılar elmi tədqiqat işlərinin hazırlanması, məqalənin strukturu, yazılması, tərtibatı və təqdimatı, eləcə də uyğun jurnalın seçilməsi barədə məlumatlandırılıb. Təlimin sonunda iştirakçılara sertifikatlar təqdim olunub.

Beynəlxalq Kouçinq Federasiyasının (ICF) “Ruhlan, Dəyiş, Çiçəklən” şüarı ilə keçirilən Beynəlxalq Kouçinq Həftəsi çərçivəsində Azərbaycanda ilk dəfə geniş miqyaslı tədbir keçirilib. Beynəlxalq Kouçinq Həftəsi çərçivəsində hər il dünyanın müxtəlif ölkələrində keçirilən silsilə tədbirlər kouçinqin insanlara, təşkilatlara və cəmiyyətlərə olan müsbət təsirini nümayiş etdirməyi hədəfləyir. Əvvəlcə Azərbaycan Respublikasının Dövlət Himninin səsləndirilməsi ilə başlayıb. Tədbirdə müxtəlif sahələri təmsil edən rəsmilər, millət vəkilləri, ali təhsil müəssisələrinin rəhbər şəxsləri və kouçinq sahəsinin aparıcı mütəxəssisləri iştirak ediblər. Qonaqları salamlayan Azərbaycan Texniki Universitetinin (AzTU) rektoru Vilayət Vəliyev kouçinqin müasir təhsil və idarəetmə proseslərində əhəmiyyətini vurğulayaraq, bu sahənin həm fərdi, həm də təşkilati inkişaf üçün mühüm rol oynadığını qeyd edib. Tədbirdə çıxış edən Beynəlxalq Kouçinq Federasiyasının sədri Ebru Kaya Caymaz kouçinqin fərdi potensialın üzə çıxarılmasında və insanların özlərinə güvənməsində oynadığı rolu xüsusi vurğulayıb. ICF-in tədbirlər direktoru Aytən Şıxalıyeva da çıxışında bu tədbirin hazırlanması və reallaşması prosesindəki əhəmiyyətli detallara toxunaraq, yerli və beynəlxalq kouçların bir araya gəlməsinin qarşılıqlı öyrənməni təşviq etdiyini bildirib. O, bu təşəbbüsün gələcək illərdə də davamlı olacağını və kouçinq yanaşmasının yayılmasının cəmiyyətimizə böyük fayda verəcəyini dilə gətirib. Tədbirdə Milli Məclisin deputatları Arzu Nağıyev, Pərvin Kərimzadə və Sevinc Hüseynova da çıxış ediblər. Onlar kouçinqin cəmiyyətin rifahı, təhsilin inkişafı və insan kapitalının gücləndirilməsi baxımından əhəmiyyətini vurğulayaraq, bu sahənin dəstəklənməsinin vacibliyini qeyd ediblər. İki panel müzakirəsi və spiker çıxışları ilə davam edən tədbirdə ümumilikdə 14 spiker çıxış edib. Çıxışçılar arasında dövlət və özəl müəssisələrin rəhbər şəxsləri, tanınmış kouçlar yer alıb. Panel müzakirələrdə kouçinqin fərdi və təşkilati inkişafda rolu, liderlik, motivasiya və dəyişiklik menecmenti kimi aktual mövzular ətrafında dərin və maraqlı fikirlər səsləndirilib. Tədbir zamanı sponsor qismində çıxış edən qurumlara rəsmi təşəkkür bildirilib və onların dəstəyi yüksək qiymətləndirilib. Təşkilatçılar tərəfindən tədbirin sonunda iştirakçılar arasında maraqlı bir hədiyyə mərasimi də həyata keçirilib. Adları əvvəlcədən hazırlanmış siyahı əsasında şüşə qabdan adları çəkilən 10 iştirakçıya sponsor şirkətlər tərəfindən xüsusi hədiyyələr təqdim olunub. Tədbir iştirakçılar tərəfindən böyük maraq və yüksək qiymətləndirmə ilə qarşılanıb. Beynəlxalq Kouçinq Federasiyasının bu təşəbbüsü Azərbaycanda kouçinq sahəsinə artan marağın və bu sahənin inkişaf potensialının göstəricisi kimi dəyərləndirilir.

Mənzil-qərargahı Çin Xalq Respublikasının Pekin şəhərində yerləşən “GEİDCO” təşkilatının (Global Energy Interconnection Development and Cooperaton Organization – Energetika Sahəsində Qlobal Qarşılıqlı Əlaqələrin İnkişafı və Əməkdaşlığı Təşkilatı) Əməkdaşlıq departamentinin direktor müavini Xu Ming-in rəhbərlik etdiyi nümayəndə heyəti Azərbaycan Texniki Universitetinin (AzTU) qonağı olub. Qonaqlar AzTU- elm və innovasiyalar üzrə prorektoru professor Sübhan Namazov və universitetin nümayəndələri ilə görüşüb. Nümayəndə heyətini salamlayan Sübhan Namazov AzTU haqda məlumat verərək Çin Xalq Respublikası ilə Azərbaycan Respublikası arasında bütün sahələrdə olduğu kimi, tədris və tədqiqat sahəsində də əlaqələrin yüksələn xətlə inkişaf etdiyini bildirib. Xu Ming təmsil etdiyi təşkilat barədə ətraflı məlumat verərək təşkilatın məramının Birləşmiş Millətlər Təşkilatının Dayanıqlı İnkişaf Məqsədlərinin həyata keçirilməsinə töhfə verilməsi olduğunu vurğulayıb. O, təşkilatın məqsədinin, dövlət və özəl enerji şirkətləri, tədqiqat qurumları və ali təhsil müəssisələrini bir araya gətirməklə bütün dünyada dayanıqlı və yaşıl enerji təchizatının təmin edilməsini diqqətə çatdırıb. Təşkilatın nəzdində fəaliyyət göstərən Universitetlər Alyansı bu baxımdan xüsusi əhəmiyyət kəsb edir. Görüş zamanı GEİDCO ilə AzTU arasında elektroenergetika sahəsində birgə layihələr, elmi tədbirlər və mütəxəssis hazırlığının həyata keçirilməsi imkanları müzakirə olunub. Qeyd edək ki, 2016-cı təsis olunmuş GEİDCO təşkilatının 141 ölkədən 1300-dən çox üzvü varr. Təşkilatın missiyası ölkələrarası qlobal enerji qoşulmalarını təşviq etmək və elektrik enerjisinə tələbatın yaşıl enerji hesabına təmin edilməsinə nail olmaqdır.

Türkiyədə Tokat Gaziosmanpaşa Universiteti və Azərbaycan Texniki Universitetinin (AzTU) birgə təşkilatçılığı ilə II Beynəlxalq İqtisadi və İnzibati Araşdırmalar Konfransı keçirilib. Tokat Gaziosmanpaşa Universitetinin İqtisadiyyat və idarəetmə fakültəsi və AzTU-nun İqtisadiyyat və statistika kafedrasının birgə əməkdaşlığı çərçivəsində təşkil olunan konfransda iqtisadi və inzibati elmlərin müxtəlif sahələri üzrə müzakirələr aparılıb. Tədbirdə bank və maliyyə, əmək iqtisadiyyatı və sənaye münasibətləri, ekonometrika, iqtisadiyyat, statistika, biznesin idarə edilməsi, dövlət idarəçiliyi, maliyyə və beynəlxalq iqtisadi münasibətlər mövzularında təqdimatlar edilib. Konfransda AzTU-nu İqtisadiyyat və statistika kafedrasının dosentləri -  Enerji və Dayanıqlı İnkişaf İnstitutunun direktoru Natəvan Namazova və Ömürboyu Öyrənmə Məktəbinin direktoru Aynurə İsmayılova təmsil ediblər. 

Azərbaycan Texniki Universiteti (AzTU) və Cəfər Cabbarlının ev-muzeyinin birgə təşkilatçılığı ilə 18 May – Beynəlxalq Muzeylər Gününə həsr olunmuş “Muzeylər tariximizdir” adlı tədbiri keçirilib. Tədbir çərçivəsində həmçinin muzeyin səyyar sərgisi təşkil olunub. Tədbirdə AzTU-nun müəllim və tələbə heyəti, muzey və kitabxana işçiləri iştirak ediblər. Cəfər Cabbarlının ev-muzeyinin hazırladığı, dahi dramaturqun zəngin ədəbi irsini əks etdirən səyyar sərgidə ədibin həyat və yaradıcılığıının müxtəlif dövrlərini əks etdirən maraqlı materiallardan və zəngin foto-arxivdən istifadə olunub. Onun müxtəlif ədəbi janrlarda yaratdığı əsərlər haqqında, həmçinin mədəniyyətin müxtəlif sahələrindəki fəaliyyəti barədə geniş məlumatlar təqdim olunub. Sərgi materialları arasında Cəfər Cabbarlının uzun illər geniş oxucu kütləsindən gizli saxlanılan ədəbi nümunələri (“Ədirnə fəthi”,”Trablis müharibəsi”), eləcə də siyasi fəaliyyəti (1923-1927), məhbəs yaradıcılığı haqqında da bir sıra faktlar diqqətə çatdırılıb. Tədbirdə çıxış edən Cəfər Cabbarlının ev-muzeyinin direktoru, dahi dramaturqun nəvəsi Qəmər Seyfəddinqızı tələbələrə Cəfər Cabbarlının Azərbaycan ədəbiyyatı və mədəniyyətinin inkişafındakı böyük xidmətlərindən, onun Azərbaycan Xalq Cümhuriyyəti (1918-1920) quruculuğundakı fəal iştirakından, həbsxana yaradıcılığından bəhs edib. AzTU-nun Humanitar fənlər kafedrasının müdiri Həbib Mirzəyev yazıçının ədəbi yaradıcılıqla bərabər incəsənətin müxtəlif vacib sahələrində gördüyü işlərdən, ədibin həm də istedadlı tərcüməçi və kino xadimi kimi tanınmasından danışıb. AzTU tələbələri Sərxan Mikayıllı, Durna Həsənli və Canpolad Quliyev dramaturqun “Ana”, “Mən bir susmaz duyğuyam ki” və “Azərbaycan bayrağına” şeirlərini səsləndiriblər. AzTU-nun məzunu, gənc müğənni Fərhad Rəhimli ədibin sözlərinə yazılmış “Gərək günəş dağları aşıb sönməyəydi” və “Həyat söylə sən kiminsən” mahnılarını ifa edib. Tədbirdə böyük sənətkarın həyat və yaradıcılığından bəhs edən film nümayiş olunub.

Azərbaycan Texniki Universitetinin (AzTU) Enerji effektivliyi və yaşıl enerji texnologiyaları kafedrasının müdiri professor Vaqif Həsənov Özbəkistan beynəlxalq elmi-praktiki konfransda iştirak edib. Səmərqənd Memarlıq və İnşaat Universiteti və İ.Kərimov adına Daşkənd Dövlət Texniki Universitetinin birgə təşkilatçılığı ilə keçirilən konfransda Vaqif Həsənov “Memarlıq, mühəndislik, təhsil və ətraf mühitin mühafizəsində innovativ texnologiyalar” mövzusunda məruzə ilə çıxış edib.  Konfrans iştirakçıları tərəfindən maraqla qarşılanan məruzə ətrafında müzakirələr aparılıb. Səfər çərçivəsində AzTU-nun professoru İ.Kərimov adına Daşkənd Dövlət Texkiki Universiteti və Səmərqənd Memarlıq və İnşaat Universitetinin aidiyyəti kafedralarında olub, elmi-tədqiqat laboratoriyalarına baxıb. Həmçinin hər iki universitetin struktur bölmələrinin rəhbərləri ilə görüşlər zamanı gələcək əməkdaşlıq üçün konkret istiqamətlər müəyyən edilib. Görüşlər zamanı universitetlər arasında əməkdaşlığın inkişaf etdirilməsi, birgə layihələrin həyata keçirilməsi, tələbə və müəllim mübadiləsi, birgə elmi nəşrlər və beynəlxalq proqramlarda iştirakla bağlı fikir mübadiləsi də aparılıb. Səfər kafedralar üçün beynəlxalq elmi əlaqələrin gücləndirilməsi, mühəndislik sahəsində innovativ texnologiyaların tətbiqi üzrə təcrübə mübadiləsi baxımından böyük əhəmiyyət daşıyır.