AzTU-nun Maşınqayırma və robototexnika fakültəsinin nəzdində fəaliyyət göstərən Alman Mühəndislik Məktəbinin təşkilatçılığı ilə tələbələrin yaradıcılıq günü keçirilib. AzTU-nun alman dili təmayüllü qruplarında təhsil alan tələbələr maşın texnologiyaları və onların iş prinsiplərini alman dilində təqdim ediblər. Texnologiyalar multimedia texnologiyaları əsaslı videoçarxlarla və təqdimatlarla izləyicilərə təqdim olunub. Tədbir eləcə də tələbələrin alman dilində mahnı və dialoq şəklində hazırladıqları çıxışları ilə yaddaqalan olub. Tədbirdə habelə Maşınqayırma və robototexnika fakültəsinin tələbələrinin texnologiya ilə bağlı əl işləri nümayiş olunub. Tələbə qrupları həmçinin universitetin foyesində hazırladıqları süfrələri nümayiş etdiriblər. Tədbirin sonunda müəllim və tələbələr mükafatlandırılıb. Qeyd edək ki, tədbir AzTU-nun Xarici dillər kafedrasının alman dili müəllimi Claudio Kasperlin dəstəyi ilə təşkil edilib.

Azərbaycan Texniki Universiteti (AzTU) və “Gənclərin Anti-Narkomaniya” İctimai Birliyinin birgə təşkilatçılığı ilə “Narkotiklərə qarşı birgə mübarizə” mövzusunda maarifləndirmə tədbiri keçirilib. Tədbirdə Narkomanlığa və Narkotik Vasitələrin Qanunsuz Dövsiyyəsinə Qarşı Mübarizə üzrə Dövlət Komissiyası, Daxili İşlər Nazirliyinin Baş Narkotiklərlə Mübarizə İdarəsi, Bakı Şəhəri  üzrə Narkoloji Dispanseri və “Gənclərin Anti-Narkomaniya” İctimai Birliyinin nümayəndələri iştirak ediblər. AzTU-nun Kommunikasiya şöbəsinin müdiri Səfa Bağırov narkotik vasitələrdən istifadənin insan həyatı üçün təhlükəsi haqqında danışıb. O, tələbələri pis vərdişlərdən uzaq olmağa, idmanla məşğul olmağa və təhsil, elm, şəxsi inkişaf kimi faydalı işlərə maraq göstərməyə dəvət edib. Narkomanlığa və Narkotik Vasitələrin Qanunsuz Dövsiyyəsinə Qarşı Mübarizə üzrə Dövlət Komissiyasının nümayəndəsi  Vasif Quliyev narkomaniya ilə mübarizənin dövlətin prioritet istiqamətlərindən biri olduğunu və bu yöndə gənclərin davamlı olaraq maarifləndirilməsinin vacibliyini qeyd edib. O, xüsusi vurğulayıb ki, AzTU narkomaniyaya qarşı mübarizə ilə bağlı tələbələr arasında maarifləndirmə aparan ali təhsil müəssisələrindəndir. Daxili İşlər Nazirliyinin Baş Narkotiklərlə Mübarizə İdarəsinin təhqiqat bürosunun rəisi, polis kapitanı Nəcəf Aydınoğlu narkotiklərlə mübarizə ilə bağlı ən son statisitik məlumatları tələbələrin diqqətinə çatdırıb. O bildirib ki, narkobaronlar hər cür texniki vasitələrlə gənclərin aktiv olduğu sosial şəbəkələrə nüfuz edərək, onların nəinki həyatını cəhənnəmə döndərir, həmçinin şəxsi məlumatlarını şantaj yolu ilə hər yerdə yayacağı ilə hədələyərək onları asılı vəziyyətdə saxlayır. O, gəncləri bu cür tələlərə düşməməyi və ayıq-sayıq olmağı tövsiyə edib. Bakı Şəhəri  üzrə Narkoloji Dispanserin həkim-narkoloqu Günay Əliyeva tələbələrə narkotik vasitələr və psixotrop maddələrdən istifadənin fəsadlarını ətraflı izah edib. “Gənclərin Anti-Narkomaniya” İctimai Birliyinin sədri Büllur Məmmədova narkomaniya ilə mübarizə sahəsində davamlı maarifləndirmə tədbirlərinin keçirildiyini və bu sahədə təşkilatın 20 illik təcrübəyə malik olduğunu, tez-tez narkomaniya qurbanlarını ziyarət etdiyini bildirib. O, gəncləri çevrəsini və dostlarını diqqətlə seçməyə, bu cür maarifləndirmə tədbirlərində aktiv iştirak etməyə səsləyib. Tədbirin sonunda “Narkomaniya ilə mübarizə” mövzusunda hazırlanmış videoçarx nümayiş olunub.

Azərbaycan Texniki Universitetinin (AzTU) Həmkarlar İttifaqı Komitəsi (HİK) və Tələbə Həmkarlar İttifaqı Komitəsi (THİK) əməkdaş və tələbələrin asudə vaxtlarının səmərəli təşkili üçün müxtəlif layihələr həyata keçirir. Növbəti layihə çərçivəsində əməkdaş və tələbələr görkəmli şair-dramaturq, ictimai xadim Hidayət Orucovun “İrəvanda yanan çıraq” birpərdəli mistik tarixi pyesi əsasında Cəfər Cabbarlı adına İrəvan Dövlət Azərbaycan Dram Teatrının səhnələşdirdiyi “İrəvanda yanan çıraq” tamaşasına baxıb. Azərbaycan Səfəvi dövlətinin qurucusu və ilk hökmdarı Şah İsmayıl Xətainin İrəvan qalasının valisi Rəvanqulu xana əbədiyyət rəmzi kimi əmanət etdiyi çırağın tarixçəsindən qaynaqlanan əsərdə erməni millətçilərinin xalqımıza qarşı törətdiyi soyqırımı və deportasiyaların anatomiyasına dərindən nüfuz edilib.  Sovet epoxasının sonuna yaxın İrəvanda yaşayıb-yaradan (müəllifin prototipi kimi qavranılan) azərbaycanlı yazıçı Sultan Oğuzun bu mövzuda yazdığı “İrəvanda yanan çıraq” tarixi əsəri quduzlaşmış və xalqımızın Qərbi Azərbaycanda milli varlığına qənim kəsilmiş erməni millətçilərini o dərəcədə hiddətləndirir ki, ona şirnikləndirici tələ qururlar. Düşmənlər Şah İsmayılın İrəvanda yandırdığı çırağı öz adlarına çıxdıqlarına görə həqiqəti tarixi romanda canlandıran yazıçını öz xalqının gözündən salıb sıradan çıxarmaq üçün hiyləyə əl atır, əsəri keçmiş ittifaq dövlətinin ən yüksək mükafatına təqdim edirlər. Mübariz sənətkar düşmənlərin niyyətinin qarşısını kəsmək, tarixi həqiqəti xilas etmək üçün bu plana qarşı çıxır, mükafat almaqdan imtina edir. Tamaşa boyu Şah İsmayılın ruhu dəfələrlə peyda olub xalqımızı düşmənlərin xəyanətlərinə qarşı ayıq-sayıq və döyüşkən olmağa səsləyir. Milli varlığımıza açıq-gizli təcavüzlərdə erməni qadınlarının şeytani rolu tamaşada incə ştrixlərlə əksini tapıb. Tamaşanın sonunda İrəvanda söndürülmüş çırağının səhnədə təntənə ilə şölə saçması Ermənistanın xəyanətkar siyasətinin məğlubiyyətinin timsalı kimi canlanır. Qeyd edək ki, Azərbaycan Dövlət Akademik Rus Dram Teatrının səhnəsində təqdim olunan tamaşada 200-ə yaxın əməkdaş, 300-ə yaxın tələbə iştirak edib.   AzTU HİK və THİK gələcəkdə bu kimi tədbirlərin təşkilini davam etdirəcək.

Azərbaycan Texniki Universitetinin (AzTU) Ömürboyu Öyrənmə Məktəbinin nəzdində fəaliyyət göstərən MGP Qrupu tərəfindən həyata keçirilən plastik tullantıların təkrar emalı və 3D printerlər üçün filament istehsalı təşəbbüsünə növbəti dəstək Səttar Bəhlulzadə adına Xarici Dillər Təmayüllü Gimnaziyanın 8-ci sinif şagirdlərindən gəlib. Səfər çərçivəsində şagirdlər topladıqları plastik butulkaları AzTU-ya gətirərək MGP Emalatxanasına təhvil verib. Şagirdləri sinif rəhbərləri Ləman Babayeva və biologiya, eyni zamanda steam dərsi tədris edən Ofeliya Həzərxanova müşayiət edib. Görüş zamanı məktəblilər plastik tullantıların çeşidlənməsi, emal olunması və 3D printerlər üçün filamentə çevrilməsi prosesini yerində izləyib. MGP mühəndisləri şagirdlərə bu sahədə istifadə olunan müasir texnologiyalar, proqram təminatları və istehsal mərhələləri barədə ətraflı məlumat verərək onların çoxsaylı suallarını cavablandırıblar. Şagirdlər burada yalnız ekoloji layihə ilə deyil, eyni zamanda PUA (pilotsuz uçuş aparatları) texnologiyaları ilə də tanış olub. Onlara bu sahədə həyata keçirilən mühəndislik layihələri, aerodinamik dizayn prinsipləri və idarəetmə sistemləri nümayiş etdirilib. Bu təşəbbüs məktəblilər arasında mühəndislik və texnologiyaya marağın artırılmasına, eləcə də ətraf mühitin qorunmasına dair şüurlu yanaşmanın formalaşdırılmasına xidmət edir. Səttar Bəhlulzadə adına Xarici Dillər Təmayüllü Gimnaziyanın layihəyə qoşulması gənc nəslin ekoloji düşüncə və texnoloji bacarıqlarının erkən yaşlardan inkişaf etdirilməsi baxımından mühüm addımdır. Layihələr nəticəsində şagirdlər ətraf mühiti qorumağın yalnız vəzifə deyil, eyni zamanda innovasiya və texnologiya ilə birləşən yaradıcı bir proses olduğunu dərk edirlər. Plastik tullantıların emalı sadəcə texniki bir proses deyil –  həm də gənclərin düşüncəsində yeni baxış bucağının formalaşmasına, məsuliyyətli və gələcək yönümlü vətəndaş olmaq yolunda mühüm bir addıma çevrilir.

Türkiyənin Sivas Cümhuriyyət Universitetinin rektoru professor Ahmed Şengönülün başçılıq etdiyi nümayəndə heyəti Azərbaycan Texniki Universitetində (AzTU) olub. Qonaqlar AzTU-nun tədris işləri üzrə prorektoru professor Nurəli Yusifbəyli və universitetin nümayəndələri ilə görüşüb. Görüşdə həmçinin Türkiyə-Azərbaycan Universitetinin (TAU) prorektoru  Mehmet Şimşir də iştirak edib. Prorektor Nurəli Yusifbəyli qonaqları salamlayaraq onları AzTU-da görməkdən məmnunluğunu ifadə edib. Prorektor universitetdə elm və tədqiqat sahəsində görülən işlər, həyata keçirilən ikili diplom proqramları və layihələr, eləcə də AzTU-nun Azərbaycanın təhsil sahəsinə gətirdiyi yeniliklər barədə ətraflı məlumat verib. Sivas Cümhuriyyət Universitetinin nümayəndələri də öz növbəsində universitetin fəaliyyət istiqamətləri barədə təqdimat edib. Görüş zamanı AzTU ilə Sivas Cümhuriyyət Universiteti arasında əməkdaşlığın qurulması istiqamətində fikir mübadiləsi aparılıb. Hər iki universitet üçün faydalı olacaq birgə tədqiqat mərkəzlərinin yaradılması, bakalavriat, magistratura və doktorantura təhsil səviyyələrində birgə əməkdaşlıq, birgə tədqiqat layihələrinin hazırlanması ilə bağlı təkliflər səsləndirilib. Həmçinin professor-müəllim heyəti və tələbə mübadiləsi, universitetlərin təşəbbüsü ilə birgə tədbirlərin təşkili istiqamətində də məsələlər müzakirə olunub.

Azərbaycan Texniki Universitetinin (AzTU) əməkdaşları - Logistika və Nəqliyyat İnstitutunun direktoru Fuad Daşdəmirov, Nəqliyyat texnikası və idarəetmə texnologiyaları kafedrasının müdiri Qasım Manafov və dosent Nicat Zöhrabov Özbəkistanın Daşkənd Dövlət Nəqliyyat Universitetində keçirilən və Nəqliyyat vasitələrinin mühəndisliyi kafedrasının professoru Akmal Anvaroviç Muxitdinovun 70-illiyinə həsr olunmuş elmi-praktik konfransda iştirak edib. Tədbirdə Akmal Anvaroviç Muxitdinova AzTU rəhbərliyi və kollektivi adından hədiyyə təqdim edilib. Konfrans çərçivəsində AzTU əməkdaşları şəhərlərdə hərəkət (mobillik) planlarının hazırlanması, elektrik və hibrid mühərrikli avtomobillərin layihələndirilməsi üzrə Daşkənd Dövlət Nəqliyyat Universitetinin kafedra və elmi-tədqiqat mərkəzləri ilə təcrübə mübadiləsinin aparılması, nəqliyyat ixtisasları üzrə təhsil alan tələbələrin ortaq araşdırmalarda iştirakı haqqında müzakirələr aparıblar. Həmçinin elektromobillərin konstruksiyası, dəmiryolu qurğu və avadanlıqları, İlkin Mühəndislik Məktəbi Mərkəzində vaqon və lokomotiv təsərrüfatı laboratoriyaları ilə tanış olublar.

Azərbaycan Texniki Universitetinin (AzTU) abituriyentlərlə iş üzrə xüsusi nümayəndəsi Eyvaz Məhəmmədli və Xüsusi texnika və texnologiya fakültəsinin akademik məsləhətçisi Amin Mamedov Şəki şəhəri, İsmayıllı, Qəbələ, Oğuz, Zaqatala, Qax və Balakən rayonlarında abituriyentlərlə və rayon təhsil sektorlarının rəhbərləri ilə silsilə görüşlər keçiriblər. Görüşlər zamanı abituriyentlərə AzTU-nun ixtisasları, praktiki biliklərə əsaslanan tədris modeli, sənaye müəssisələri ilə əməkdaşlıq çərçivəsində həyata keçirilən istehsalat təcrübələri, startap yönümlü fəaliyyəti və tələbələrin bu sahədəki uğurları haqqında məlumat verilib. Eləcə də tələbələrin yeni layihələrdə iştirak edə bilməsi üçün yaradılan şərait və imkanlardan da söhbət açılıb. Universitetin beynəlxalq əlaqələri, ikili diplom proqramları və akademik mübadilə imkanları da abituriyentlər tərəfindən maraqla qarşılanıb. Yüksək göstəricilərlə AzTU-ya qəbul olunan tələbələr üçün nəzərdə tutulmuş xüsusi təqaüdlər, həmçinin onların şəxsi inkişafını və akademik nailiyyətlərini dəstəkləyən təşviq mexanizmləri haqqında da abituriyentlərə ətraflı məlumat verilib Səfər çərçivəsində rayon təhsil sektorlarının rəhbərləri ilə də əməkdaşlıq görüşləri keçirilib. Görüşlərdə AzTU ilə orta məktəblər arasında əsas əməkdaşlıq istiqamətləri olaraq texnologiya yönümlü təşəbbüslər, mühəndislik ixtisaslarının təbliği, şagirdlərin rəqəmsal bacarıqlarının inkişafına dəstək verəcək birgə layihələr, startap yönümlü fəaliyyətlər və bu sahədə mentor dəstəyinin təmin edilməsi məsələləri müzakirə olunub. Texnologiya və mühəndislik sahələrinə marağı olan abituriyentləri peşəkar və müasir tələblərə cavab verən mütəxəssislər kimi formalaşdırmaq məqsədilə AzTU bu cür görüşləri gələcəkdə də davam etdirəcək.

Azərbaycan Texniki Universitetində (AzTU) Kibertəhlükəsizlik kafedrası və “CyberDEV” kiberklubunun təşkilatçılığ ilə “Capture The Flag” (CTF) formatında kibertəhlükəsizlik yarışı keçirilib. Tədbirdə informasiya təhlükəsizliyi ixtisasında təhsil alan tələbələr iştirak ediblər. Məqsəd kibertəhlükəsizlik sahəsinə marağı olan tələbələr arasında praktiki bacarıqların inkişaf etdirilməsi, kritik düşüncə tərzinin və problem həlletmə qabiliyyətinin gücləndirilməsi və komanda şəklində işləmək bacarığının artırılması olub. CTF yarışında iştirakçılar açıq mənbə kəşfiyyatı, tərsinə mühəndislik, rəqəmsal kriminalistika və kriptoanaliz alətlərinin praktiki tətbiqi kimi müxtəlif istiqamətlərdə tapşırıqları yerinə yetiriblər. Belə yarışlar AzTU-da kibertəhlükəsizlik sahəsində xüsusi potensiallı gənclərin aşkara çıxarılması, daxili və xarici CTF yarşlarında universiteti layiqincə təmsil edəcək komandaların formalaşdırılması baxımından əhəmiyyətli rol oynayacaq.

Azərbaycan Texniki Universitetinin (AzTU) rektoru professor Vilayət Vəliyevin rəhbərlik etdiyi nümayəndə heyəti İndoneziyaya səfər edib. Nümayəndə heyətində AzTU-nun elm və innovasiyalar üzrə prorektoru professor Sübhan Namazov və Tədqiqat və inkişaf departamentinin direktoru Bəxtiyar Bədəlov təmsil olunub. Səfərin əsas məqsədi AzTU ilə İndoneziyanın aparıcı ali təhsil müəssisələri arasında elmi-tədqiqat, tədris və innovasiya sahələrində qarşılıqlı əməkdaşlıq əlaqələrinin qurulması və genişləndirilməsi, eləcə də bu istiqamətdə anlaşma memorandumlarının (MoU) imzalanması olub. Səfər çərçivəsində nümayəndə heyəti İndoneziya Universiteti, Jakarta Dövlət Universiteti, Atma Jaya Katolik Universiteti və BINUS Universitetini ziyarət ediblər. Görüşlər zamanı universitetlər arasında elmi və akademik əməkdaşlıq imkanları geniş müzakirə olunub. Müzakirələr zamanı hər bir universitetin prioritet fəaliyyət istiqamətləri nəzərə alınaraq konkret əməkdaşlıq sahələri müəyyənləşdirilib və gələcəkdə birgə layihələrin həyata keçirilməsi perspektivləri barədə fikir mübadiləsi aparılıb. İndoneziya Universitetində keçirilən görüş zamanı professor Vilayət Vəliyev AzTU-nun beynəlxalq tərəfdaşlıqlar çərçivəsində ortaq elmi layihələr, tələbə və müəllim mübadiləsi, eləcə də birgə elmi konfrans və seminarların təşkili kimi sahələrə xüsusi önəm verdiyini vurğulayıb. İndoneziya Universitetinin rektoru professor Ir. Heri Hermansyah və prorektorlar da bu təşəbbüsləri müsbət qiymətləndirərək mühəndislik və informasiya texnologiyaları sahəsində əməkdaşlıqda maraqlı olduqlarını bildiriblər. Görüşün sonunda tərəflər arasında qarşılıqlı anlaşma və əməkdaşlığı möhkəmləndirmək məqsədilə anlaşma memorandumu imzalanıb. Jakarta Dövlət Universitetində keçirilən görüşdə birgə tədris proqramlarının həyata keçirilməsi, mühəndislik ixtisasları üzrə tədris texnologiyalarının təkmilləşdirilməsi, ortaq tədqiqatların təşkili və təcrübə proqramlarının hazırlanması məsələləri ətraflı müzakirə olunub. Görüşdə AzTU-nun rektoru professor Vilayət Vəliyev və Jakarta Dövlət Universitetinin rektoru professor Komarudin M. Sİ iştirak ediblər. Tərəflər bu istiqamətdə əməkdaşlıq etmək barədə razılığa gəlib və əlaqələr anlaşma memorandumu ilə rəsmiləşdirilib. Səfər çərçivəsində nümayəndə heyəti İndoneziyanın iki aparıcı özəl ali təhsil müəssisəsi olan Atma Jaya Katolik Universiteti və BINUS Universitetində də olub. Atma Jaya Katolik Universitetində universitetin tədris və innovasiya potensialı ilə yaxından tanışlıq olub, xüsusilə startap yönümlü tədqiqatlar və birgə layihələr barədə geniş fikir mübadiləsi aparılıb. BINUS Universitetində isə süni intellekt, rəqəmsal transformasiya və elmi-tədqiqatların kommersiyalaşdırılması sahəsində təcrübə öyrənilib. Tərəflər BINUS-un qabaqcıl tədqiqat platformasının AzTU-da tətbiq imkanlarını nəzərdən keçirərək qarşılıqlı maraq doğuran sahələr üzrə əməkdaşlıq istiqamətlərini müəyyənləşdiriblər. Görüşün sonunda universitetlər arasında anlaşma memorandumu imzalanıb. Səfər zamanı rektor professor Vilayət Vəliyev AzTU-nun beynəlxalq elmi-tədqiqat, tədris və innovasiya sahəsində tərəfdaşlıq şəbəkəsinin genişləndirilməsi və dünya elm məkanına inteqrasiya olunması istiqamətində fəaliyyətlərinin artırılmasının, xüsusilə Asiya ölkələri ilə əməkdaşlığın AzTU-nun perspektiv strateji planında mühüm yer tutduğunu vurğulayıb. O, bu əməkdaşlıqların universitet üçün yeni imkanlar yaradacağına əminliyini ifadə edib.

Mayın 21-də ali təhsil müəssisələrinin tələbələri arasında futzal üzrə Azərbaycan Tələbə Liqasının 2024/2025 mövsümünə yekun vurulub. Tədbirdə elm və təhsil nazirinin müavini, Azərbaycan Tələbə Futbol Federasiyası İctimai Birliyinin prezidenti Firudin Qurbanov, Milli Olimpiya Komitəsinin vitse-prezidenti Çingiz Hüseynzadə, Azərbaycan Təhsil İşçiləri Azad Həmkarlar İttifaqı Respublika Komitəsinin sədri Araz Paşayev, Azərbaycan Futbol Federasiyaları Assosiasiyasının, Azərbaycan Tələbə Futbol Federasiyası İctimai Birliyinin rəsmi şəxsləri, veteran futbolçular iştirak ediblər. Qeyd edək ki, Azərbaycan Tələbə Liqası 2023-cü ildən etibarən Elm və Təhsil Nazirliyi və Azərbaycan Tələbə Futbol Federasiyası İctimai Birliyinin təşkilatçılığı, Azərbaycan Təhsil İşçiləri Azad Həmkarlar İttifaqı Respublika Komitəsi və Azərbaycan Futbol Federasiyaları Assosiasiyasının dəstəyi ilə keçirilir. Liqanın keçirilməsində məqsəd ali təhsil müəssisələrinin tələbələri arasında futzal idman növünün təbliğ edilməsi, onlar arasında perspektivli idmançıların aşkar edilməsi, bu idman növünə marağın artırılması, tələbələrdən ibarət futzal üzrə yığma komandanın formalaşdırılmasından ibarət olub. Azərbaycan Tələbə Liqasının 2024/2025 mövsümünə 29 noyabr 2024-cü il tarixində start verilib və liqada 12 ali təhsil müəssisəsi mübarizə aparıb. Azərbaycan Texniki Universitetinin (AzTU) komandası liqanın final mərhələsində ikinci yerdə qərarlaşıb. Oyunlardan sonra qaliblərin mükafatlandırılma mərasimi keçirilib. Qalib komandalara medal və pul mükafatı təqdim olunub.