Azərbaycan Texniki Universitetinin (AzTU) Rəqəmsal Transformasiya Şurasının işçi qrupunun iclası keçirilib. İclasda universitetin “Rəqəmsal Transformasiya Strategiyası”nın hazırlanması müzakirə olunub. Bundan başqa, yerli və xarici universitetlərin rəqəmsal transformasiya təcrübələri, əmək bazarının tələblərinə uyğun kadr hazırlığında yeni yanaşmalar, təhsil və tədrisin keyfiyyətini beynəlxalq səviyyəyə uyğunlaşdrmaq və s. mövzularda fikir mübadiləsi aparılıb.

Azərbaycan Texniki Universitetinin (AzTU) tərəfdaşı olduğu “Erasmus+ KA2” proqramı çərçivəsində icra edilən “Şərqi, Mərkəzi Asiya və Asiyada qonşuluqda təhsil və innovasiya vasitəsilə ikili yaşıl və rəqəmsal keçidlərin təşviq edilməsi” (GreenTech Horizons) layihəsinin növbəti onlayn görüşü keçirilib. Görüş zamanı layihə tapşırıqlarının icrası vəziyyəti barədə ətraflı məlumatlar verilib, əldə olunan nəticələr barədə hesabat dinlənilib və fikir mübadiləsi aparılıb. Eyni zamanda, layihənin icrasında izlənilən çətinliklər və növbəti aylarında planlaşdırılan tədbirlər barədə məlumatlar verilib.  Görüşdə layihənin meneceri AzTU-nun Elektrotexnika kafedrasının müdiri Hikmət Əliyev və Beynəlxalq layihələrin idarə olunması sektorunun əməkdaşları iştirak edib.

Azərbaycan Texniki Universiteti (AzTU), Türkiyə-Azərbaycan Universiteti (TAU) və Türkiyənin Milli Zəmin Təhlükəsizliyi İnstitutu (UZGE) arasında əməkdaşlıq memorandumu imzalanıb. Əməkdaşlıq çərçivəsində elmi-tədqiqat, texnologiya transferi, metrologiya, standartlaşdırma və sınaq laboratoriyalarının qurulması sahəsində birgə fəaliyyət nəzərdə tutulur. Memoranduma əsasən, tərəflər birgə elmi layihələrin icra olunması, beynəlxalq elmi jurnallarda məqalələrin nəşri, sənaye ilə innovativ həllərin tətbiqi istiqamətində əməkdaşlıq edəcəklər. Eyni zamanda, AzTU və TAU tələbələri üçün UZGE-nin mütəxəssisləri tərəfindən təlimlər keçiriləcək, laboratoriyalarda praktiki təcrübə imkanları yaradılacaq. Startapların inkişafı və innovasiya ekosisteminin gücləndirilməsi məqsədilə tərəflər Texnologiya Transfer Ofisləri vasitəsilə birgə fəaliyyət göstərəcəklər.

Antiinhisar və İstehlak Bazarına Nəzarət Dövlət Xidmətinin tabeliyində olan Azərbaycan Metrologiya İnstitutunda (AzMİ) Türkiyənin Sivas Cümhuriyyət Universitetinin texnoparkında fəaliyyət göstərən Milli Zəmin Təhlükəsizliyi İnstitutunun (UZGE) rəhbəri, dosent Gültekin Coşkunla görüş keçirilib. Görüşdə Azərbaycan Texniki Universitetinin (AzTU) rektoru Vilayət Vəliyev, Türkiyə-Azərbaycan Universitetinin (TAU) prorektoru Mehmet Şimşir, o cümlədən Azərbaycan Standartlaşdırma İnstitutunun (AZSTAND) nümayəndələri də iştirak ediblər. Görüş zamanı AzMİ-nin fəaliyyət istiqamətləri, xidmət sahələri, ölçmə və kalibrlənmə imkanları, mövcud kalibrlənmə və yoxlanılma laboratoriyaları, o cümlədən yeni yaradılan etalon laboratoriyaları barədə məlumat verilib. Daha sonra UZGE-nin rəhbəri Gültekin Coşkun tətbiq edilən mühəndislik və təhlükəsizlik standartlarının inkişafından söz açıb, dövlət və özəl sektorlarda binadaxili döşəmələrdə sürüşmə tezliyinin ölçmə metodları və istifadə olunan avadanlıqlar, həmçinin ölçmələr zamanı əsas tutulan beynəlxalq standartlardan bəhs edib. Görüş çərçivəsində piyada infrastrukturunun təhlükəsizliyi üzrə EN 16165 “Piyada səthlərinin sürüşməyə davamlılığının təyini - Qiymətləndirmə üsulları”, TS 13882 “Piyada səthlərinin təsnifatı qaydaları – Ümumi tələblər və qiymətləndirmə üsulları”, EN 14231:2003 Təbii daşların sınaq üsulları – Riyazi rəqqas ilə sürüşmə müqavimətinin təyini”, EN 13036-4:2011 “Yol və aerodrom səthinin xüsusiyyətləri – Sınaq üsulları – Hissə 4: Səthin sürüşmə müqavimətinin/sürüşkənliyin ölçülməsi üsulu – Riyazi rəqqas ilə sınaq üsulu” Avropa və türk standartlarının tətbiqinə dair müzakirələr aparılıb. Bundan əlavə, AzTU və TAU-da təhsil alan tələbələrin AzMİ-nin laboratoriyalarından istifadə etməklə elmi-tədqiqat işləri aparması, həmçinin metrologiya sahəsi üzrə yeni layihələrin hazırlanması və bu sahədə əməkdaşlığın genişləndirilməsi müzakirə edilib. Sonda tərəflər arasında qarşılıqlı əməkdaşlıq, o cümlədən müvafiq sahədə beynəlxalq təcrübənin ölkəmizdə tətbiqi məsələlərinə nəzər salınıb.

Azərbaycan Texniki Universitetinin (AzTU) Xarici dillər kafedrasının təşkilatçılığı ilə "Xarici dilin tədrisi metodikasının yenilikləri və müasir trendlər" mövzusunda vebinar keçirilib. Vebinar çərçivəsində keçirilən təlimlərdə Xarici dillər kafedrasının müdiri professor Səbinə Alməmmədova, kafedranın müəllimləri  Rəşid Sultanov, Aydan Rəhimova və Aygül Xəlilova müasir dövrdə xarici dilin tədrisinin müxtəlif aspektləri barədə məlumat veriblər.

Türkiyənin Sivas Cümhuriyyət Universitetinin texnoparkında fəaliyyət göstərən UZGE - Milli Zəmin Təhlükəsizliyi İnstitutunun rəhbəri, dosent Gültəkin Coşqun Azərbaycan Texniki Universitetinin (AzTU) qonağı olub. Səfər çərçivəsində o, AzTU-nun rektoru Vilayət Vəliyevlə görüşüb. Görüşdə həmçinin Türkiyə-Azərbaycan Universitetinin (TAU) və AzTU-nun nümayəndələri iştirak ediblər. Gültəkin Coşqun institutun fəaliyyəti barədə məlumat verərək bildirib ki, qurum metrologiya və döşəmə təhlükəsizliyi sahəsində yüksək keyfiyyətli sınaq və sertifikatlaşdırma xidmətləri təqdim edir. Bununla yanaşı, institut vertolyot eniş zolaqları və müxtəlif növ döşəmə örtü materiallarının səthlərinin sürtünmə əmsallarının tədqiqi istiqamətində araşdırmalar aparır. O, bu sahələrdə AzTU və TAU ilə əməkdaşlığın institut üçün prioritet olduğunu qeyd edib. Rektor Vilayət Vəliyev AzTU və TAU-nun institutla birgə fəaliyyətinin əhəmiyyətini vurğulayaraq, ilkin mərhələdə pilot layihənin həyata keçirilməsinin məqsədəuyğun olduğunu bildirib.

Fevralın 2-də Ağ Şəhərdə yerləşən Bazar Meydanında Azərbaycan Gəncləri Günü münasibətilə “GenZ FEST” festivalı keçirilib. Azərbaycan Respublikasının Gənclər Fondunun dəstəyi ilə Azərbaycan Tələbə Gənclər Təşkilatları İttifaqı (ATGTİ) tərəfindən keçirilən festivalda 5 mindən çox tələbə iştirak edib. Tədbirdə Azərbaycan Texniki Universitetinin (AzTU) Tələbə Gənclər Təşkilatının (TGT) sədri Ruslan Qənbərov və təşkilat üzvləri iştirak edib. Festival çərçivəsində “İlin Tələbə Gənclər Təşkilatı” nominasiyasına layiq görülən TGT-lərin adları açıqlanıb. Qeyd olunub ki, il ərzində ölkənin ictimai-sosial həyatına verdiyi töhfəyə və aktiv fəaliyyətinə görə AzTU TGT “İlin Tələbə Gənclər Təşkilatı” adına layiq görülüb.

Azərbaycan Texniki Universitetinin (AzTU) Həmkarlar İttifaqı Komitəsi (HİK) və Tələbə Həmkarlar İttifaqı Komitəsinin (THİK) təşkilatçılığı ilə 2 fevral – Azərbaycan Gəncləri Gününə həsr olunmuş tədbir keçirilib. Əvvəlcə Azərbaycanın ərazi bütövlüyü və suverenliyi uğrunda canlarından keçmiş Vətən övladlarının əziz xatirəsi bir dəqiqəlik sükutla yad olunub, Dövlət Himni səsləndirilib. AzTU HİK sədri Elvin Bəxtiyarlı Gənclər Günü münasibətilə təbriklərini bölüşüb. O, ölkədə aparılan gənclər siyasəti və gənclərə göstərilən diqqət və qayğıdan danışıb.  HİK sədri qeyd edib ki, AzTU-da da il ərzində tələbə və gənc müəllimlərin bilik və bacarıqlarının, həmçinin innovativ ideyalarının təşkmilləşdirilməsi istiqamətində müxtəlif tədbirlər və interaktiv yarışlar keçirilir. AzTU-nun prorektoru Rəşad Əliyev Gənclər Gününün tarixinə nəzər salıb. O, bu günün təşəbbüskarı ümummilli lider Heydər Əliyevi yad edərək onun gənclər siyasətinin formalaşmasındakı rolu və gördüyü işlərdən danışıb. Daha sonra AzTU-nun İnsan resursları departamentinin müdiri Aytən Şıxəliyeva, “Dent House Group”un rəhbəri doktor Anar Əmiraslanov, “Prestij S tədris Mərkəzi”nin rəhbəri Samid Səfərov çıxış edərək gəncləri təbrik edib, onlara fəaliyyətlərində uğurlar və hər zaman öz üzərlərində çalışmağı arzulayıblar. Tədbir çərçivəsində ənənvi olaraq HİK tərəfindən Gənclər Günü münasibətilə keçirilən müsabiqənin nəticələri açıqlanıb. Müsabiqədə il ərzində namizədlik dissertasiyası müdafiə edən, elmi məqaləsi nəşr olunan, AzTU-nun ictimai-sosial həyatında aktivlik nümayiş etdirən, nizam-intizamı ilə fərqlənən gənc əməkdaşlar iştirak edib. Müsabiqənin nəticələrinə görə, Ramil Dadaşov “İlin gələcək vəd edən gənci” nominasiyası üzrə III, Şamxal Əliyev “İlin peşəkar gənci” nominasiyası üzrə II, Rüxsarə Seyfullalı isə I yerə layiq görülərək “AzTU Gəncləri - 3” müsabiqəsinin qalibi olub. Müsabiqənin qalibləri, eləcə də il ərzində nizam-intizamı ilə seçilən və universitetin fəaliyyətinə verdiyi töhfəyə görə fərqlənən gənc əməkdaşlara fəxri fərman və hədiyyələr təqdim olunub.

Azərbaycan Texniki Universitetinin (AzTU) 12 tələbəsi 2024/2025-ci tədris ilinin yaz semestrində “Erasmus+ KA171” mübadilə proqramı çərçivəsində xaricdə təhsil alacaq. Belə ki, “Sabah” qruplarının bakalavr tələbələri Yunus Həşimov və Ayaz Bağırzadə İtaliyanın Roma Sapienza Universitetində, İnformasiya və telekommunikasiya texnologiyaları fakültəsinin bakalavr tələbələri Ülviyyə Məmmədova və Saməddin Hüseynli müvafiq olaraq Türkiyənin Ankara Universiteti və Fırat Universitetində, həmin fakültənin bakalavr tələbəsi Sahib Bağırzadə Rumıniyanın Kluj-Napoka Texniki Universitetində, Maşınqayırma və robototexnika fakültəsinin bakalavr tələbələri Səbinə Əsgər-zadə və Elvin Hüseynov müvafiq olaraq Türkiyənin Zonquldak Bülent Ecevit Universiteti və Qazi Universitetində, həmin fakültənin bakalavr tələbəsi Mirəli Verdiyev Almaniyanın Brandenburq Texniki Universitetində, İqtisadiyyat və idarəetmə fakültəsinin bakalavr tələbəsi İsirafil Şiriyev isə Rumıniyanın Buxarest İqtisadiyyat Universitetində bir semestrlik təhsil almaq hüququ qazanıblar.  Həmçinin Yüksək Təhsil İnstitutunun magistrantları Həmidə Zeynalzadə və Romil Məsimov Türkiyənin Bursa Texniki Universitetində, Nihad İbrahimov isə İstanbul Okan Universitetində 2 aylıq təcrübə keçəcəklər.  AzTU-nun rektoru Vilayət Vəliyev tələbələrlə görüşüb, onlara dərslərində və gələcək fəaliyyətlərində uğurlar arzulayıb.

“Synergia Academy” və “Facility Management Group” (FMG) şirkətləri, Azərbaycan Texniki Universiteti (AzTU), həmçinin Azərbaycan Memarlıq və İnşaat Universiteti ilə birgə gənclərin karyera inkişafına dəstək göstərən yeni proqramı təqdim edib. Proqram 18-30 yaş arası ali təhsilli Azərbaycan gənclərinin peşəkar fəaliyyətlərinə dəstək olmağı və onları “FMG”nin tabeliyindəki müxtəlif biznes və ticarət obyektlərində işlə təmin etməyi hədəfləyir. Tədbirin açılış mərasimində çıxış edən AzTU-nun rektoru Vilayət Vəliyev bu cür layihələrin aktual olduğunu vurğulayıb. O, tələbələrin karyera inkişafında universitet proqramlarının sənayenin tələblərinə uyğunlaşdırılmasının, eləcə də sənaye ilə əməkdaşlığın dərinləşdirilməsinin vacibliyindən bəhs edib. Daha sonra çıxış edən Azərbaycan Memarlıq və İnşaat Universitetinin tədris işləri üzrə prorektoru Akif Qasımov, “Synergia Academy”nin icraçı direktoru Rəna Əfəndiyeva, “FMG”nin icraçı direktoru İlham Allahverdiyev proqramın gənclərə karyera imkanları yaratmaqla Azərbaycanın iqtisadi inkişafına töhfə verəcəyini bildiriblər. Qeyd edək ki, “Təhsildən – Karyeraya” proqramı “Synergia Academy” və “FMG” şirkətlərinin birgə təşəbbüsü ilə gəncləri müasir peşə tələblərinə uyğun hazırlamaq və onların uzunmüddətli karyera perspektivlərini gücləndirmək məqsədi daşıyır.