Azərbaycan Texniki Universiteti (AzTU), İnformasiya Texnologiyaları İnstitutu, İdarəetmə Sistemləri İnstitutu, Milli Müdafiə Universiteti, Naxçıvan Dövlət Universiteti, Türkiyənin İstanbul Texniki Universiteti və Qazi Universitetinin təşkilatçılığı ilə “İnfokommunikasiya sistemləri və süni intellekt texnologiyaları” adlı II beynəlxalq elmi-texniki konfransı öz işinə başlayıb. AzTU-da təşkil olunan konfransda qonaqları salamlayan rektor Vilayət Vəliyev müasir dövrdə infokommunikasiya, süni intellekt, idarəetmə sistemləri, informasiya təhlükəsizliyi, radioelektron və aerokosmik sistemlər kimi sahələrin inkişafının önəmindən danışıb. Bildirib ki, bu istiqamətdə universitetlər və institutlar birgə tədqiqatlar aparmalı, yeni modellər ortaya qoymalıdırlar. Tədbirin əhəmiyyətindən danışan rektor bildirib ki, konfransa Azərbaycan, Türkiyə, Rusiya, Almaniya, Belarus, Qazaxıstan, İsveç, Özbəkstan, Ukrayna, Hindistan və s. ölkələrdən 150-dən çox məqalə daxil olub. Məruzələrin sayının çox olması infokommunikasiya sistemləri, kibertəhlükəsizlik, radioelektron, idarəetmə sistemləri, mütərəqqi istehsal və süni intellekt texnologiyaları sa­hələrinin problemlərini məruzəçilərin hər birinin nöqteyi-nəzərindən öy­rə­nil­mə­sinə, təcrübə mübadiləsi aparılmasına və müzakirəyə qoyulan problemlərin həlli üçün alqoritmin və yeni metodların formalaşdırılmasına imkan verəcək. Daha sonra İdarəetmə Sistemləri İnstitutunun baş direktoru akademik Əli Abbasov, İnformasiya Texnologiyaları İnstitutunun baş direktoru akademik Rasim Aliquliyev, Naxçıvan Dövlət Universitetinin rektoru Elbrus İsayev, Türkiyə-Azərbaycan Universitetinin prorektoru professor Mehmet Şimşir, Belarus Dövlət İnformatika və Radioelektronika Universitetinin dosenti Olqa Boipraf, AzTU-nun Radiotexnika və telekommunikasiya kafedrasının dosenti Aqil Mövsümov çıxış edib. Qeyd olunub ki, konfransın keçirilməsində əsas məqsəd elm, təhsil və tədqiqat sahələrinin vahid informasiya infrastrukturunun tələblərinə uyğun yaradılması və bu sektorların dördüncü sənaye inqilabının əsas prinsipləri bazasında effektivliyinin yüksəldilməsini təmin edən, elmi və texniki zəmin yaradan perspektiv konsepsiyaların, rəqəmsal, kvant və intellektual texnologiyaların formalaşdırılmasıdır. Qeyd edək ki, konfransa təqdim olunan məqalələr nüfuzlu xülasələndirmə və indeksləmə sistemlərinə daxil olan 6 jurnalda çap olunmaq üçün tövsiyə ediləcək. Beş bölmədə işini davam etdirən konfrans dekabrın 5-i yekunlaşacaq.  

ADA Universitetində ölkə kitabxanalarının informasiya sistemlərinin davamlı inkişafı kontekstində Kitabxana Assosiasiya və İnstitutlarının Beynəlxalq Federasiyasının (KAİBF) Sənəd Təchizatı və Resurs paylaşımı komitəsinin 18-ci KAİBF Resurs mübadiləsi və Sənəd Təchizatı Konfransı keçirilib. "Qlobaldan Lokala: Resursların paylaşımında Müxtəliflik və İnklüzivlik" mövzusunda keçirilən konfransda Azərbaycan Texniki Universitetini (AzTU) Kitabxana İnformasiya Mərkəzinin (KİM) direktoru Xəyalə Hacıyeva təmsil edib.

Azərbaycan Texniki Universiteti (AzTU) ilə Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidməti (ETX) arasında əməkdaşlıq haqqında memorandum imzalanıb. Məqsəd informasiya təhlükəsizliyi və fərdi məlumatların mühafizəsi, həmçinin sosial şəbəkələrdən istifadə qaydaları üzrə ictimai məlumatlılığın artırılması istiqamətində birgə fəaliyyətin təşkil edilməsidir. Memoranduma əsasən, ETX tələbələr üçün bilik mübadiləsi sessiyaları, maarifləndirici tədbir və təlimlər təşkil edəcək. Həmçinin xidmət nümayəndələrinin universitet tərəfindən təşkil ediləcək tədbirlərdə qonaq spiker qismində çıxış etmələri nəzərdə tutulur.

Azərbaycan Texniki Universitetinin (AzTU) tərəfdaş olduğu “Erasmus+KA2” proqramının “Şərq, Mərkəzi Asiya və Asiyada qonşuluqda təhsil və innovasiya vasitəsilə ikili yaşıl və rəqəmsal keçidlərin təşviq edilməsi” (Fostering Dual Green and Digital Transitions through Education and Innovation in the Neighbourhood East, Central Asia, and Asia)”  (Green Tech Horizon) layihəsinin Qazaxıstanın Almatı şəhərində ilk görüşü keçirilib. Qazaxıstan Milli Universitetində (Əl-Fərabi Universiteti) təşkil olunan görüşdə 8 ölkədən – Serbiya, Latviya, Litva, Polşa, Xorvatiya, Azərbaycan, Qazaxıstan və Monqolustandan 24 tərəfdaş universitet, tədqiqat institutu və müəssisədən 40-dək mütəxəssisin iştirakı ilə layihənin davam edəcəyi 3 il ərzində yerinə yetiriləcək fəaliyyətlə bağlı müzakirələr aparılıb. Səfərdə AzTU-nun elm və innovasiyalar üzrə prorektoru professor Sübhan Namazov, Elektrotexnika kafedrasının müdiri dosent Hikmət Əliyev iştirak ediblər. Layihənin əsas məqsədi Azərbaycan, Qazaxıstan və Monqolustandan olan 8 ali təhsil müəssisəsində mövcud kurikulumları modernləşdirməklə innovativ səriştəyönümlü təlim ekosisteminin dizayn edilməsi, səriştəyönümlü kurikulum modelinin inkişafı və sınaqdan keçirilməsi və bu modelə uyğunlaşdırılmış e-təlim kursları da daxil olmaqla e-Learning ekosistemi yaratmaqdan ibarətdir. Layihənin koordinatoru, Serbiyanın Novi Sad Universitetinin professoru Danijella Ciric Lalic və digər məsul şəxslər layihənin komponetləri barədə geniş məruzələrlə çıxış edib, fəaliyyətin planlaşdırılması və təşkil edilməsi barədə layihə konsorsiumun üzvləri ilə razılığa gəlinib, tərəfdaşların yerinə yetirəcəyi fəaliyyət növləri müəyyən edilib.

Azərbaycan Texniki Universitetinin (AzTU) Humanitar fənlər kafedrasının professoru Əyyub Kərimov Rusiya Federasiyası Tatarıstan Respublikasının paytaxtı Kazan şəhərində keçirilən “Şərq və Asiya ölkələri ilə mədəni qarşılıqlı əlaqələrin aktual problemləri”nə həsr olunmuş beynəlxalq elmi-praktik konfransda iştirak edib. Dünyanın 30 ölkəsindən və Rusiyanın 20 regionundan 50-dən çox nümayəndənin iştirak etdiyi konfransda professor Əyyub Kərimov “Mədəniyyətlərarası dialoqun təmin olunmsında fəlsəfənin rolu” mövzusunda məruzə ilə çıxış edib. Onun çıxışı konfrans iştirakçıları tərəfindən yüksək qiymətləndirilib.

Azərbaycan Texniki Universisteti (AzTU) Maşın dizaynı və sənaye texnologiyaları kafedrasının və Tələbə Həmkarlar İttifaqı Komitəsinin (THİK) təşkilatçılığı ilə qida mühəndisliyi ixtisası üzrə bakalavriat səviyyəsində təhsil alan II kurs tələbələrinin Ağsu rayonunda yerləşən “AzGranata” MMC-yə ekskursiyası təşkil olunub. Ekskursiyada Maşın dizaynı və sənaye texnologiyaları kafedrasının müdiri professor İsa Xəlilov, kafedranın ixtisas müəllimləri və Türkiyə-Azərbaycan Universitetinin professoru Ümran Uyqun iştirak edib.Tələbələr burada məhsulun qəbulu və emalı sexləri ilə tanış olub, şirələrin alınması və qablaşdırılması proseslərini izləyiblər. Tədqiqat laboratoriyasında qida məhsullarının tədqiqi üsulları və avadanlıqları haqqında tələbələrə geniş məlumat verilib. Ekskursiyanın sonunda dequstasiya zalında məhsulların dad meyarlarının müəyyən olunması xüsusiyyətləri də tələbələrin diqqətinə çatdırılıb.  

Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti kibertəhlükəsizlik sahəsində təhsil alan tələbələrin maarifləndirilməsi, onların bilik və bacarıqlıarının artırılması və ixtisaslı kadr kimi formalaşdırlıması məqsədilə ölkəmizdə fəaliyyət göstərən ali təhsil müəssələri ilə sıx əməkdaşlığını davam etdirir. Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti (XRİTDX) ilə Azərbaycan Texniki Universiteti (AzTU) arasında 2022-ci il 5 noyabr tarixində imzalanan əməkdaşlıq haqqında Memorandum çərçivəsində Xidmət tərəfindən Universitetin informasiya təhlükəsizliyi ixtisasında təhsil alan bakalavr və magistr tələbələrinin kibertəhlükəsizlik sahəsində biliklərinin yoxlanılması məqəsidilə növbəti müsabiqə keçirilib. Müsabiqənin nəticələrinə əsasən, AzTU-nun İnformasiya və telekommunikasiya texnologiyaları fakültəsinin informasiya təhlükəsizliyi ixtisasının 3-cü kurs bakalavr tələbələri Səməd Əlifxanov və Sübhan Məmmədov, AzTU nəzdində Yüksək Təhsil İnstitutunun dövlət informasiya sistemlərinin təhlükəsizliyi ixtisaslaşmasının magistr tələbələri Araz Əliyev və İnci Abdullayeva xüsusi fərqlənərək qalib elan olunublar. Qaliblər Xidmət tərəfindən mükafatlandırılıb. Qeyd edək ki, Memorandum çərçivəsində XRİTDX tərəfindən AzTU-da “Zərərverici Analizi Labaratoriyası”nın tələbələrin istifadəsinə verilməsi və növbəti semestrlərdə də xüsusi fərqlənən tələbələrin mükafatlandırılması məqsədilə müsabiqələrin keçirilməsi nəzərdə tutulur.

Azərbaycan Texniki Universitetinin (AzTU) tərəfdaşı olduğu “Erasmus+ KA2” proqramının “Azərbaycanda İnstitusional Repozitoriyalar Şəbəkəsi vasitəsilə Tədqiqat Potensialının İnkişafı” (DIRNA) layihəsi çərçivəsində təlimlər təşkil edilib. Akademik heyətin tədqiqat bacarıqlarının inkişaf etdirilməsi məqsədilə təşkil olunan təlimlər "Tədqiqat metodları" mövzusunda keçirilib. Təlimlərdə AzTU-nu Enerji effektivliyi və yaşıl enerji texnologiyaları kafedrasının müəllimləri Ülkər Əkbərova və Gülnar Abdullayeva, Kibertəhlükəsizlik kafedrasının müəllimi İlahə Qəhrəmanova, Elektrotexnika kafedrasının müəllimi Şamxal Əliyev, Yüksək Təhsil İnstitutunun mütəxəssisi Xumar Əbilova, elmi işçi Elçin Abdullayev və doktorantura tələbələri Abdullah Camalov, Ayxan Həsənov, Rəşid Qaraxanov təmsil edib. İki günlük təlimlərdə tədqiqatın planlaşdırılması, etik prinsipləri, tədqiqat suallarının müəyyənləşdirilməsi, metodoloji üsullar, verilənlərin təhlili və hesabatların yazılması barədə iştirakçılara nəzəri və praktiki məlumatlar verilib və praktiki tapşırıqlar icra olunub.

Azərbaycan Texniki Universitetinin (AzTU) Mühəndis riyaziyyatı və süni intellekt kafedrasının dosenti Firudin Ağayev “Erasmus+ KA171” mübadilə proqramı çərçivəsində İtalyanın Roma Sapienza Universitetində 2 həftə tədris prosesində iştirak edib. Firudin Ağayev Sapienza Universitetinin Kompüter, nəzarət və idarəetmə mühəndisliyi kafedrasının fəalliyəti ilə yaxından tanış olub və akademik heyətlə görüşüb. O, həmçinin kafedrada aparılan tədqiqat işləri ilə tanış olub. Firudin Ağayev Sapienza Universitetində tələbələrə “Data Mining və Data Science” mövzuları üzrə mühazirələr deyib və Data Mühəndisliyi üzrə praktiki  layihələri təqdim edib.   

Azərbaycan Texniki Universitetində (AzTU) COP29 çərçivəsində RİSK 2024 “İqlim Dəyişikliklərinin Təbii və Texnoloji Risklərinin Minimumlaşdırılmasında İnnovasiyalar: Metodologiya və Təcrübə” adlı 6-cı Avrasiya Konfransı keçirilir. Konfransda Nobel sülh mükafatı laureatları professor Sviatoslav Timashev və professor Elena Nikitina, eləcə də dünyanın müxtəlif ölkələrindən 100-ə yaxın alim iştirak edir. Konfrans Azərbaycanın Dövlət Himninin səsləndirilməsi ilə başlayıb. Açılış mərasimində çıxış edən Azərbaycan Texniki Universitetinin (AzTU) rektoru professor Vilayət Vəliyev COP29-un Azərbaycanda keçirilməsinin əhəmiyyəti, bu çərçivədə keçirilən tətbirlərdə müzakirə olunan məsələlərin önəmindən danışıb. Rektor BMT-nin Dayanıqlı İnkişaf Məqsədlərinə töhfə olaraq AzTU-nun “Dayanıqlı Universitet” kontekstində yeni layihənin icrasına başlayacağını bildirib. Qeyd edib ki, bərpaolunan enerji sahəsində həyata keçiriləcək layihə AzTU-nun bir hektar ərazidə yaradacağı Yaşıl Texnologiya Parkının yaşıl enerji ilə təmin olunmasına aiddir. Sözügedən Parkın ərzasizindəki tikililərin damında ümumi gücü 1,5 meqavat olan günəş panelləri quraşdırılacaq. Panellər elektrik enerjisi istehsal etməklə yanaşı, təbii işıqlandırmaya imkan verən pəncərə rolunu da oyanacaq. Layihənin həyata keçməsi ilə AzTU avtonom olaraq öz kampusunun ehtiyaclarını yaşıl enerji ilə təmin etməklə yanaşı, ətrafdakı obyektləri da enerji ilə təchiz edəcək. Daha sonra çıxış edən Nobel sülh mükafatı laureatları professor Sviatoslav Timashev və professor Elena Nikitina, İstanbul Texniki Universitetinin professoru Ahmet Duran Şahin, konfransın sədri, konfransın əsas təşkilatçısı və sponsoru olan “AMIR Technical Services” beynəlxalq şirkətinin direktoru, professor Vüqar Əliyev burada müzakirə olunacaq məsələlərin iqlim dəyişiklikləri ilə bağlı risklərin aradan qaldırılmasına töhfə verəcəyinə ümid etdiklərini bildiriblər. Tədbirdə konfransın ABŞ-dan olan  həmsədri, Ketterinq Universitetinin professoru Boyan Dmitrovun video-müraciəti yayımlanıb. 2 gün davam edəcək konfrans işini bölmə iclasları ilə davam etdirir.