Azərbaycan Texniki Universitetinin (AzTU) Kompüter texnologiyaları kafedrasının müdiri, texnika elmləri doktoru, professor Vaqif Qasımov Belarus Dövlət İnformatika və Radioelektronika Universitetinin dəvəti ilə sözügedən ali məktəbdə səfərdə olub.   Bir həftəlik səfər müddətində professor Vaqif Qasımov Belarus Dövlət İnformatika və Radioelektronika Universitetinin bakalavr və magistr tələbələrinə “İnformasiya təhlükəsizliyinin təmin edilməsinin aktual məsələləri” mövzusunda mühazirə oxuyub. Mühazirə təhsilalanlar və universitet rəhbərliyi tərəfindən yüksək qiymətləndirilib. Vaqif Qasımov səfər çərçivəsində universitetin aparıcı mütəxəssisləri və professor-müəllim heyəti ilə də görüşüb. Görüşlərdə AzTU ilə Belarus universitetləri arasında müvafiq sahələrdə əməkdaşlığın inkişaf etdirilməsi ilə bağlı müzakirələr aparıb.

Ekologiya və Təbii Sərvətlər Nazirliyi yanında Milli Hidrometeorologiya Xidmətinin təşkilatçılığı ilə Azərbaycan Texniki Universitetində (AzTU) seminar keçirilib. Seminardan əvvəl AzTU rəhbərliyi və Milli Hidrometeorologiya Xidmətinin nümayəndələri arasında əməkdaşlıq görüşü keçirilib. Görüşdə qarşılıqlı əməkdaşlıq, “Horizon Europe” proqramı çərçivəsində əməkdaşlıq, birgə layihələr, təlim xidmətləri və s. məsələlər müzakirə olunub. Seminarı giriş sözü ilə açan elm və innovasiyalar üzrə prorektor professor Sübhan Namazov tədbirin əhəmiyyətindən danışıb. Daha sonra çıxış edən tədris işləri üzrə prorektor professor Nurəli Yusifbəyli seminarın mövzusunun aktuallığı barədə iştirakçılara məlumat verib.    Milli Hidrometeorologiya Xidmətinin Beynəlxalq əməkdaşlıq və ictimaiyyətlə əlaqələr sektorunun müdiri Fuad Hümbətov iqlim dəyişmələri, karbonsuzlaşma, istilik effekti yaradan qaz emmisiyaları haqqında çıxış edib.   Seminarda xidmətin əməkdaşları “Nəqliyyat sektorunda atılan istilik effekti yaradan qazlar və onların azaldılması”, “Fəlakət riskini azaltmaq üçün Sendai çərçivəsi”, “Hidrometroloji məlumatlar” mövzularında geniş təqdimatla çıxış ediblər. Sonda iştirakçıların sualları cavablandırılıb. Həmçinin fərqlənən tələbələrə təşəkkürnamə təqdim edilib. 

Azərbaycan Texniki Universitetində (AzTU) "Yanğınsöndürmə balonlarından istifadə qaydaları" ilə bağlı təlim keçirilib. Təlimə universitetin 16 nəfərdən ibarət yanğınsöndürən manqası, həmçinin bütün strukturlardan ümumilikdə 41 nəfər könüllü cəlb olunub. Məqsəd fövqəladə hadisələr zamanı əməkdaşların çevik davranışlarının artırılması və digər qaydalarla bağlı məlumatlı olmalarıdır. Əvvəlcə Əməyin mühafizəsi və texniki təhlükəsizlik şöbəsinin müdiri Vidadi Mustafayev təlim iştirakçıları ilə inzibati binada yanğın təhlükəsizliyinin təmin olunması istiqamətində maarifləndirici söhbət aparıb. Daha AzTU-nun həyətində sonra yanğınsöndürən balonlardan istifadə əyani olaraq izah edilib.  

Azərbaycan Texniki Universitetində (AzTU) SmartTech İnnovatorlar Mərkəzinin və "Bestcomp Group" şirkətinin birgə təşkilatçılığı ilə “Biznes dünyasının yeni kadrlardan gözləntisi. IT-də trendlər və əsas istiqamətlər” mövzusunda seminar keçirilib. "Bestcomp Group" şirkətinin baş direktorun müavini, Rəqəmsal Transformasiya üzrə baş müdiri Orxan Bədəlov İKT sahəsində trendlər və əsas istiqamətlər haqda tələbələrə ətraflı məlumat verib. Orxan Bədəlov işə qəbulla bağlı tələblər və bu istiqamətdə digər zəruri məlumatları da tələbələrin diqqətinə çatdırıb.

Azərbaycan Texniki Universitetinin (AzTU) İctimaiyyətlə əlaqələr şöbəsinin müdiri – mətbuat katibi Sevinc İsgəndərova Bakı Dövlət Universitetinin (BDU) Jurnalistika fakültəsinin ikinci kurs tələbələrinə “İctimaiyyətlə əlaqələrin təşkili və mətbuat xidmətlərinin fəaliyyəti” mövzusunda təlim keçib. Təlimdə ictimaiyyətlə əlaqələrin mahiyyəti, idarə edilməsi, reklam və ictimaiyyətlə əlaqələrin fərqli cəhətləri, mətbuat xidmətlərinin fəaliyyəti, mətbuat katibinin funksiyası, məsuliyyəti ilə bağlı tələbələrə ətraflı məlumatlar verilib.    Təlimin sonunda tələbələrin sualları cavablandırılıb.   

Azərbaycan Texniki Universitetində (AzTU) Alman Akademik Mübadilə Xidmətinin (DAAD) təqaüd proqramları haqqında növbəti məlumatlandırma sessiyası keçirilib. Tədbirdə elm və innovasiyalar üzrə prorektor Sübhan Namazov DAAD ilə AzTU arasında uzunmüddətli əməkdaşlıqdan, Almaniyanın Brandenburq Texniki Universiteti Cottbus-Senftenbergin (BTU Cottbus-Senftenberg) ilə imzalanan ikili diplom proqramından və yeni yaradılan Alman mühəndislik fakültəsinin inkişaf perspektivlərindən danışıb. Daha sonra DAAD-nin AzTU-da fəaliyyət göstərən alman dili müəllimi Klaudio Kasperl Almaniyada təhsil, DAAD-nin fəaliyyəti, təqaüdlü yay kursları və magistratura səviyyəsi üzrə təqaüd proqramıları haqqında tələbələrə ətraflı məlumat verib. Tədbirin sonunda iştirakçıları maraqlandıran suallar cavablandırılıb.

“Azərbaycan ali təhsil müəssisələrində davamlı sahibkarlıq ekosisteminin gücləndirilməsi” (ENGAGE) layihəsi çərçivəsində Portuqaliyanın Ali Texniki İnstitutunda layihə konsorsiumunun nümayəndələri üçün təlimlərə başlanılıb. Təlimlərin əsas məqsədi innovasiya və sahibkarlıq fəaliyyətləri və tədbirlərinin universitetdə tətbiqinə dair Portuqaliya ali təhsil müəssisələrinin qabaqcıl təcrübələrinin öyrənilməsidir. 23-27 oktyabr tarixlərini əhatə edən işgüzar səfərdə Azərbaycan Respublikası Elm və Təhsil Nazirliyinin nümayəndəsi, layihədə iştirak edən 11 Azərbaycan  ali təhsil müəssisəsinin rektorları, prorektorları, inzibati və akademik heyət üzvləri, eləcə də layihənin İsveç, Polşa, İspaniya, Estoniyadan olan xarici tərəfdaş universitetlərinin nümayəndə heyəti iştirak edirlər. Səfərdə Azərbaycan Texniki Universitetini (AzTU) tədris işləri üzrə prorektor Nurəli Yusifbəyli və Beynəlxalq əlaqələr şöbəsinin müdiri Orxan Vətənxah təmsil edir. Təlimlərin proqramına uyğun olaraq iştirakçılar texnologiya mərkəzləri, sosial innovasiya laboratoriyası, texnologiya əsaslı sahibkarlıq proqramları kimi mövzularda təqdimatlarla tanış olaraq və müzakirələr aparacaq, o cümlədən  Lissabonun bir sıra texnologiya laboratoriyaları və innovasiya mərkəzlərini ziyarət edəcəklər. Təlimlərin yekununda isə layihənin cari vəziyyətinin təhlilinin aparılması və gələcək 6 ay üçün fəaliyyət planının qurulması, eləcə də layihə konsorsiumunun üzvü olan ali təhsil müəssisələrinin məsul şəxslərinin iştirakı ilə 5 gün müddətində keçirilən təlim və təqdimatlara əsasən qrup işlərinin təşkili və Portuqaliyalı tərəfdaşlarla qarşılıqlı fikir mübadilələrinin aparılması nəzərdə tutulub. Qeyd edək ki, layihə Avropa Komissiyası tərəfindən maliyyələşdirilən “ERASMUS+” çərçivəsində “Ali təhsildə potensialın gücləndirilməsi” profili üzrə həyata keçirilir.

“Regional İnkişaf” İctimai Birliyi (RİİB) tərəfindən icra edilən Azad Mirzəcanzadə inkişaf proqramı çərçivəsində Azərbaycan Texniki Universitetində (AzTU) infosessiya keçirilib. İştirakçıları salamlayan AzTU-nun rektoru Vilayət Vəliyev innovativ gənc mühəndislərin aşkar olunması, onların ideyalarıın dəstəklənməsi istiqamətində görülən işləri təqdirəlayiq hesab edib. Tədbir zamanı iştirakçılara proqramın məqsədi, icra mərhələləri, qeydiyyat prosesi barədə ətraflı məlumat verilib. Bildirilib ki, proqrama təqdim edilən layihə təklifləri aktuallığı, reallığı, innovativ və yenilikçi olması əsasında seçiləcək. İkinci mərhələdə iştirakçılara layihələrin hazırlanması və təqdimatı istiqamətində peşəkar dəstək veriləcək, həmçinin onların liderlik bacarıqlarının inkişafı üçün müxtəlif fəaliyyətlər təşkil olunacaq. Sonda qalib olan layihələrin icrası üçün maliyyə vəsaiti ayrılacaq. Qeyd edək ki, Azad Mirzəcanzadə inkişaf proqramı yeni imkanları dəyərləndirməyi, aktual problemlərin yaradıcı həlli yollarını tapmağı bacaran, dayanıqlı gələcəyə töhfə verməyə çalışan, çevik, innovativ yanaşmalara sahib gənclərin üzə çıxarılması və onların inkişafına dəstək verilməsi məqsədi daşıyır. Proqrama qoşulmaq istəyən 18-35 yaşarası hər bir Azərbaycan vətəndaşı  https://bitly.ws/VVKj linki vasitəsilə qeydiyyatdan keçə bilər.

Türkiyənin Milli Müdafiə Nazirliyinin tərkibindəki Makina və Kimya Sənayesi Korporasiyasının (MKEK) baş direktoru Prof. Dr. İlhami Keleşin rəhbərlik etdiyi nümayəndə heyəti ölkəmizə səfəri çərçivəsində Azərbaycan Texniki Universitetində (AzTU) olub. AzTU-nun fəaliyyəti barədə nümayəndə heyətinə geniş məlumat verən rektor Vilayət Vəliyev müasir dövrdə mühəndislik universitetlərində tədris və tədqiqatın keyfiyyətinin yüksəldilməsində universitet-sənaye əməkdaşlığının əhəmiyyətini diqqətə çatdırıb. Nümayəndə heyəti AzTU-da fəaliyyət göstərən “Bilişim Vadisi Bakı”, “Cezeri” laboratoriyası və digər mərkəzləri ziyarət edib. Ziyarət zamanı “Bilşim Vadisi Bakı”da təmsil olunan rezident şirkətlərin AzTU-da aparılan mühəndis hazırlığına faydaları, universitet-sənaye əməkdaşlığının inkişafında rolu, innovasiyaların dəstəklənməsinə verəcəkləri töhfələri barədə fikir mübadiləsi aparılıb. Daha sonra təfərlər gələcək əməkdaşlıq imkanları barədə müzakirələr aparıblar.

Azərbaycan Texniki Universitetinin (AzTU) İctimai Şurasının növbəti iclası keçirilib. İclasda AzTU-da son vaxtlar həyata keçirilən layihələr, görülən işlər və yeniliklər barədə geniş fikir mübadiləsi aparılıb. Müzakirələr zamanı universitetdə yaradılmış “Bilişim Vadisi Bakı”nın fəaliyyətindən də danışılıb. Həmçinin mühəndis hazırlığı istiqamətində AzTU-da tətbiq olunan yeni yanaşmalar təqdirəlayiq hesab olunub. Daha sonra AzTU İctimai Şura üzvləri “Bilişim Vadisi Bakı” ilə tanış olub, bu sahədə perspektivlər müzakirə edilib. Şura üzvləri “Bilşim Vadisi Bakı”da təmsil olunan rezident şirkətlərin AzTU-da aparılan mühəndis hazırlığına faydası barədə maraqlanıb eyni zamanda, innovasiyaların dəstəklənməsi üçün mümkün mexanizmlər haqqında fikirlərini bildiriblər. Universitet-sənaye əməkdaşlığının müasir modelləri, yeni əməkdaşlıq platformaları barədə də geniş müzakirələr aparılıb.