Azərbaycan Respublikasının Gənclər Fondunun dəstəyi, Azərbaycan Tələbə Gənclər Təşkilatları İttifaqının təşkilatçılığı ilə Tələbə Gənclər Təşkilatlarının 2 fevral – Azərbaycan Gəncləri Gününə həsr olunan "ReBrend" Forumu keçirilib. Forumun keçirilməsində əsas məqsəd TGT-lərin uzunmüddətli PR strategiyasının müəyyən olunması, inkişaf üçün düzgün planlanma aparılmasına dəstək göstərilməsindən ibarət olub.  Əvvəlcə Azərbaycanın Dövlət Himni səsləndirilib, şəhidlərin əziz xatirəsi bir dəqiqəlik sükutla yad olunub.  Daha son “Tələbə Gənclər Təşkilatlarının qarşısındakı hədəflər və gözləntilər” mövzusunda tələbələrlə panel görüş keçirilib.  Rəsmi hissə müxtəlif nominasiyalar üzrə TGT-lərin, TGT sədrlərinin və aktiv üzvlərin mükafatlanması ilə yekunlaşıb.  İl ərzində ölkənin ictimai-sosial həyatına verdiyi töhfəyə və aktiv fəaliyyətinə görə Azərbaycan Texniki Universitetinin (AzTU) Tələbə Gənclər Təşkilatı (TGT)  “İlin Tələbə Gənclər Təşkilatı” adına layiq görülüb.  “İlin Tələbə Gənclər Təşkilatı” adına layiq görülən AzTU TGT-nin sədri Eyvaz Məhəmmədli öz fikirlərini bölüşüb:  “Hesab edirəm ki, TGT-lərin düzgün kommunikasiya qurması istiqamətində bu kimi tədbirlərin keçirilməsi biz gənclərin inkişafı üçün çox faydalı və əhəmiyyətlidir. Bizim üçün xüsusi önəmli bir məqamı da qeyd etmək istərdim. “ReBrend” Forumunda Azərbaycan Texniki Universitetinin Tələbə Gənclər Təşkilatı olaraq “İlin TGT-si” adına layiq görüldük. Bu bizi çox sevindirdi, eyni zamanda məsuliyyətimizi daha da artırdı. Qarşıda bizi gözləyən hədəflərimiz var. Gənclərlə birgə hədəflərimizə çatacağımıza inanırıq. Bir daha diqqət üçün ATGTİ-yə təşəkkür edirik.”

Azərbaycan Texniki Universiteti (AzTU) Həmkarlar İttifaqı Komitəsinin (HİK) təşkilatçılığı ilə 2 fevral – Azərbaycan Gəncləri Gününə həsr olunan “AzTU Gəncləri 2023” müsabiqəsinin mükafatlandırılması mərasimi keçirilib. Tədbirdə AzTU HİK-in sədri Elvin Bəxtiyarlı, sosial məsələlər və ictimaiyyətlə əlaqələr üzrə prorektor Nərmin Rzayeva gəncləri təbrik edib. Gənclərin ölkənin bütün sahələrdə inkişafında önəmli rolu xüsusi vurğulanıb. Qeyd olunub ki, AzTU-da da gənc müəllim və əməkdaşların gələcək inkişafı istiqamətində müxtəlif tədbirlər həyata keçirilir. Daha sonra universitetin ictimai həyatında fəallıq göstərən AzTU-nun gənc əməkdaş və müəllimləri fəxri fərman və müxtəlif hədiyyələrlə mükafatlandırılıb. Tədbirin sonunda “AzTU Gəncləri 2023” müsabiqəsinin qaliblərinin adı açıqlanıb. Müsabiqənin nəticəsinə əsasən, Nuran Süleymanova “AzTU-da ilin gələcək vəd edən gənci”, İsmayıl İsmayılov “AzTU-da ilin peşəkar gənci”, Qoşqar Rəsulov isə “AzTU-da ilin gənci” nominasiyası üzrə qalib elan olunub.  

Azərbaycan Basketbol Federasiyasının təşkilatçılığı ilə Azərbaycan Texniki Universitetinin (AzTU) İdman sarayında keçirilən Basketbol üzrə Tələbə Liqasının oyunları davam edir.   Liqanın 8-ci turunda AzTU komandası Bakı Mühəndislik Universitetinin (BMU) komandası ilə qarşılaşıb. Maraqlı mübarizə şəraitində davam edən oyun 95:53 hesabı ilə AzTU komandasının xeyrinə yekunlaşıb.  Qeyd edək ki, liqanın oyunlarında AzTU, ADBTİA, ADAU, ADNSU, UNEC, BMU və Xəzər Universitetinin komandaları iştirak edir. Oyunları “AzTU TV” yutub kanalından canlı izləyə bilərsiniz.  

Alman Akademik Mübadilə Xidmətinin (DAAD) Tbilisi Regional Ofisinin rəhbəri Gebhard Reul Azərbaycan Texniki Universitetinin (AzTU) qonağı olub. Rektor Vilayət Vəliyevlə görüşən Gebhard Reul DAAD ilə AzTU-nun mövcud əməkdaşlığından və bu əlaqələrin genişləndirilməsindən danışıb.    AzTU-da yeni yaradılan Alman mühəndislik fakültəsi barədə qonağa məlumat verən rektor bu fakültənin fəaliyyəti çərçivəsində mövcud əməkdaşlığın genişləndirilməsinin zəruriliyini bildirib. Tələbə və müəllimlərin alman dili biliklərinin artırılması üçün 2022-ci ilin payız semestrindən AzTU-da fəaliyyət göstərən DAAD-nin alman dili müəlliminin bu baxımdan əhəmiyyətini vurğulayan Vilayət Vəliyev elektroenergetika, bərpa olunan enerji texnologiyaları, metallurgiya, kibertəhlükəsizlik, süni intellekt və informasiya texnologiyaları sahəsində əməkdaşlığın vacibliyini vurğulayıb. Həmçinin bu istiqamətdə DAAD-nin mövcud proqramlarına müraciət ediləcəyini bildirib. Vilayət Vəliyev Brandenburq Texniki Universiteti Cottbus-Senftenberg (BTU Cottbus-Senftenberg) ilə magistatura və doktorantura səviyyələrində imzalanan ikili diplom müqavilələrindən də bəhs edib və bu əməkdaşlığın həyata keçirilməsində DAAD-nin dəstəyini xüsusi vurğularaq təşəkkürünü bildirib.     Daha sonra Gebhard Reul DAAD-nin magistratura proqramına müraciət edən namizədlərin müsahibə mərhələsinin mart ayında AzTU-da keçirilməsi üçün yaradılacaq şəraitlə tanış olub və dəstək üçün təşəkkürünü bildirib.        

Azərbaycan Texniki Universitetinin (AzTU) InTech komandasının üzvləri Nəqliyyat və logistika fakültəsinin IV kurs tələbəsi Mirsahib Ağazadə, İnformasiya və telekommunikasiya texnologiyaları fakültəsinin III kurs tələbəsi Ömər Ələsgərov və Energetika və avtomatika fakültəsinin I kurs  tələbəsi Sübhan Ələsgər ilk dəfə Azərbaycan dilində proqramlaşdırılan 3D printer hazırlayıblar. AzTU-nun “Cezeri Lab” laboratoriyasında hazırlanan 3D printer keyfiyyəti, sürəti və səssizliyi ilə digərlərindən fərqlənir. Bu cihaz kompüterdəki 3D modeli lay-lay çap edərək emal olunmasına imkan verir. 3D printerdə müxtəlif materiallardan istifadə etmək mümkündür. Ən çox istifadə olunan isə PLA (plastik) materialdır. Texnologiyanın ən böyük üstünlüyü dizaynların tez və asanlıqla çap olunub fiziki hala gətirilməsidir. Bu həm də dizayn və istehsal prosesini sürətləndirir. Tələbələrin hazırladıqları sözügedən layihə təhsil müəssisələri və şəxsi istifadə üçün nəzərdə tutulub. Qeyd edək ki, “Cezeri Lab” laboratoriyası Türk Əməkdaşlıq və Koordinasiya Agentliyi (TİKA) tərəfindən qurulub.    

Qızların STEM təhsili, eləcə də gələcək fəaliyyətlərinə həsr olunmuş "Qadınlar STEM"də festivalının 2-ci günündə müzakirə olunan mövzulardan biri də “Niyə STEAM sahələrində qadınların sayı azdır?” mövzusu olub. Müzakirələrdə Azərbaycan Texniki Universitetinin (AzTU) rektoru Vilayət Vəliyev də iştirak edib. Rektor deyib ki, savadlı gələcək üçün qızların təhsilə cəlb olunması mühüm amildir. Bu baxımda festivalın böyük əhəmiyyəti var. Rektor həmçinin bildirib ki, festival çərçivəsində təşkil olunan əmək yarmarkası tələbə və gənc mütəxəssislərin iş tapması baxımından faydalıdır. Qeyd edək ki, 2 gün davam edən festival “QadınFest” və “Women in Tech” platformalarının təşkilatçılığı ilə keçirilib.    

Azərbaycan Texniki Universitetinin (AzTU) Kitabxana İnformasiya Mərkəzi daha bir tammətnli kitab və jurnal bazasını oxucularının istifadəsinə təqdim edib. "Edward Elgar Publishing" bazası innovasiya və texnologiya, biznes və menecment, iqtisadiyyat və maliyyə, həmçinin sosial elmlər sahəsində 7000 adda akademik kitab nəşr edən ən böyük müstəqil nəşriyyatlardan biridir. "Edward Elgar Publishing" həmçinin 10.000-dən çox başlıqdan ibarət, redaksiya heyətinin nəzarətindən keçmiş nüfuzlu və keyfiyyətli jurnal portfoliosuna sahibdir.   Kitabxana İnformasiya Mərkəzi bu akademik bazaya abunəliyi Azərbaycan Kitabxana və İnformasiya Konsorsiumu ilə olan əməkdaşlığı çərçivəsində əldə edib. Kitabxana İnformasiya Mərkəzinin bu əməkdaşlığı çərçivəsində 1303 adda elektron kitab, eyni zamanda hüquq, iqtisadiyyat, idarəetmə, liderlik və s. sahələr üzrə 17 jurnala abunəliyi artıq istifadəyə verilib. Bazadan istifadə ödənişli olmasına baxmayaraq aparılmış danışıqlar əsasında 2 il (2023-2025) müddətinə ödənişsiz olaraq istifadə oluna biləcək.  Bazadan universitet daxilində AzTU-nun internet şəbəkəsinə qoşulmuş bütün üzvləri istifadəçi adı və parol tələb olunmadan sərbəst istifadə edə bilərlər.  Bazanın linki: https://www.elgaronline.com/browse?access=user  Bazanın istifadəsi ilə bağlı sualları [email protected] elektron ünvanına göndərməyiniz xahiş olunur.  

Bakı Şəhəri üzrə Təhsil İdarəsində (BŞTİ) Azərbaycan Texniki Universitetinin (AzTU) rəhbərliyi ilə görüş keçirilib.Görüşdə BŞTİ-nin müdiri Mehriban Vəliyeva, AzTU-nun rektoru Vilayət Vəliyev, İdarənin struktur bölmə rəhbərləri, universitetin rəhbər şəxsləri iştirak edib.BŞTİ müdiri Mehriban Vəliyeva təhsil pillələri arasında qarşılıqlı əlaqənin inkişaf etdirilməsi və təhsilin keyfiyyətinin yaxşılaşdırılması məqsədilə sıx inteqrasiyanın təmin edilməsi, həmçinin məktəblilərin innovativ təşəbbüslərinin dəstəklənməsinə və yaradıcı ideyalarının reallaşdırılması üçün münbit şəraitin yaradılmasına xidmət edən startapçılar hərəkatının başlanılması üçün səylərin birləşdirilməsinin mühüm rol oynadığını söyləyib. Bu baxımdan əməkdaşlığa açıq olan ali məktəblərə, o cümlədən AzTU-nun rəhbərliyinə və kollektivinə təşəkkürünü bildirib.İdarə müdiri bilik və bacarığını reallaşdıra, ideyasını məhsula çevirə bilən startapçı gənclərin inkişafında, elmin sirlərinə sahiblənməsində ali məktəblərin dəstəyinin mühüm şərtlərdən biri olduğunu deyib. M.Vəliyeva müvafiq meyarlar əsasında startapçı şagirdlərin seçimi ilə bağlı elektron portalın yaradılması təklifi ilə çıxış edib.Görüşdə çıxış edən AzTU-nun rektoru Vilayət Vəliyev BŞTİ ilə əməkdaşlıqdan məmnunluğunu və bu əlaqələrin qarşılıqlı fayda verəcəyinə əminliyini bildirib. V.Vəliyev qeyd edib ki, bu əməkdaşlıq şagirdlərin universitetin tədqiqat imkanlarından səmərəli istifadə olunmasına şərait yaradılması baxımından faydalı olacaq.Rektor universitetlə ümumi təhsil məktəbləri arasında qarşılıqlı təcrübə mübadiləsinin həm tələbələr, həm də şagirdlər üçün əhəmiyyətli olacağını, startap layihələrlə işləyən gənclərin motivasiyasının yüksəldilməsinə müsbət təsir göstərəcəyini nəzərə çatdırıb.Görüşdə Bakı şəhərində yeləşən ümumi təhsil məktəblərində şagirdlərin startap ideyalarının dəstəklənməsində köməklik göstərilməsi və bu istiqamətdə universitetlə birgə görülə biləcək işlərdən danışılıb, BŞTİ ilə AzTU-nun gələcək əməkdaşlıq perspektivlərinə dair fəaliyyət barədə fikir mübadiləsi aparılıb.

Azərbaycan Texniki Universitetinin (AzTU) məzunu, Vətən müharibəsində şəhidlik zirvəsinə yüksələn Seymur Sərxoşov 1987-ci il yanvarın 28-də Bakıda anadan olub. 2004-cü ildə orta məktəbi bitirdikdən sonra AzTU-nun Nəqliyyat və logistika fakültəsinə qəbul olunub. 2008-ci ildə universiteti bitirib həqiqi hərbi xidmətə yollanıb. 2009-cu ildə hərbi xidmətdən qayıdıb və ixtisası üzrə işləyib.  Seymur Sərxoşov 2020-ci ildə başladılan 44 günlük Vətən müharibəsində iştirak edərək qəhrəmanlıqlar nümayiş etdirib. O, oktyabrın 14-də Qubadlı uğrunda döyüşlərdə şəhidlik zirvəsinə yüksəlib. Prezident İlham Əliyevin sərəncamlarına əsasən, Seymur Sərxoşov ölümündən sonra "Vətən uğrunda" və "Xocavəndin azad olunmasına görə" medalları ilə təltif olunub.  Allah bütün şəhidlərimizə rəhmət eləsin! Şəhidlərimizin ruhu qarşısında baş əyirik!

Azərbaycan Texniki Universitetinin (AzTU) rektoru Vilayət Vəliyevin başçılıq etdiyi nümayəndə heyəti Türkiyənin İstanbul, Qebze və Çorum şəhərlərinə səfər edib. Səfər çərçivəsində AzTU nümayəndə heyəti Boğaziçi, İstanbul Texniki, Hitit universitetlərində, həmçinin TÜBİTAK BİLGEM, Bilişim Vadisi və SAHA İstanbulda (SAHA İstanbul Müdafiə Aerokosmik Klasteri) bir sıra görüşlər keçirib. Boğaziçi Universitetində rektor Mehmet Naci İnci və universitetin nümayəndə heyəti ilə görüş zamanı birgə beynəlxalq konfransların təşkili, informasiya texnologiyaları və iqtisadi sahələrdə tədqiqatların həyata keçirilməsi müzakirə olunub. Tərəflər 2023-cü ilin üçüncü rübündə ulu öndər Heydər Əliyevin anadan olmasının 100 illiyi, Türkiyə Cümhuriyyətinin yaranmasının 100 illiyi və Boğaziçi Universitetinin 160 illiyinə həsr olunacaq beynəlxalq konfransların keçirilməsi barədə razılığa gəliblər. İstanbul Texniki Universitetinin (İTÜ) rektoru İsmayıl Koyuncu və universitetin nümayəndə heyəti ilə görüşdə enerji, logistika, qabaqcıl nəqliyyat texnologiyaları, elmi nəşrlər və birgə tədris mövzularında, həmçinin AzTU müəllimlərinin İTÜ-yə təcrübəyə göndərilməsi ilə bağlı müzakirələr aparılıb. Bundan başqa, 26-28 aprel 2023-cü il tarixlərində Özbəkistanın Səmərqənd şəhərində İTÜ, AzTU və Daşkənd Dövlət Nəqliyyat Universiteti tərəfindən keçiriləcək seminarla bağlı ilkin hazırlıqlar, həmçinin hər üç universitet tərəfindən nəqliyyat və logistika sahəsində yaradılacaq ortaq mərkəz barədə fikir mübadiləsi aparılıb. TÜBİTAK BİLGEM-in rəhbəri Ali Görçin və əməkdaşlarla görüş zamanı BİLGEM-in kibertəhlükəsizlik sahəsində tədris təcrübəsinin öyrənilməsi, bu istiqamətdə AzTU-da oxşar laboratoriyanın yaradılması ilə bağlı fikir mübadiləsi aparılıb. Görüşdə 2023-cü ildə AzTU tələbələrinin kibertəhlükəsizlik istiqamətində BİLGEM-də təlimə göndərilməsi imkanları da qeyd olunub. Eyni zamanda, BİLGEM-in kibertəhlükəsizlik sahəsində tədqiqat təcrübəsindən də AzTU müəllimlərinin faydalanması ilə bağlı müzakirələr aparılıb.  Bilişim Vadisinin baş direktoru Ahmet Serdar İbrahimcioğlu ilə görüşdə AzTU-da texnopark qismində “Bilişim Vadisi Bakı Mərkəzi”nin yaradılması ilə bağlı vəziyyət müzakirə olunub. Qeyd olunub ki, mərkəzin 2023-cü ilin ikinci rübünədək yaradılması nəzərdə tutulur. Tərəflər həmçinin Bilişim Vadisinin keçirdiyi startap müsabiqələrində AzTU tələbələrinin iştirak imkanları barədə fikir mübadiləsi aparıblar. SAHA İstanbulun baş direktoru İlhami Keleşin rəhbərlik etdiyi nümayəndə heyəti ilə görüşdə birgə təlimlərin və elmi-tədqiqat işlərinin həyata keçirilməsi müzakirə olunub. Bundan başqa, SAHA İstanbulun SAHA Akademiyasının MBA proqramının Azərbaycanda tətbiqi imkanlarının araşdıralacağı da bildirilib.  Hitit Universitetinin rektoru Ali Osman Öztürk və universitetin nümayəndə heyəti ilə görüşdə mühəndislik və qida texnologiyaları sahələrində birgə tədris və tədqiqat fəaliyyətinin həyata keçirilməsi müzakirə olunub. Bundan başqa, magistratura səviyyəsində qida mühəndisliyi ixtisası üzrə ikili diplom proqramı ilə bağlı imkanların  araşdırılacağı qərara alınıb. Həmçinin Çorum şəhəri ilə qardaşlaşmış Füzuli şəhərinin bərpası ilə bağlı birgə layihələrdə AzTU və Hitit Universitetinin iştirakı ilə bağlı da müzakirələr aparılıb. Qeyd edək ki, AzTU rektorunun rəhbərlik etdiyi nümayəndə heyətində beynəlxalq əlaqələr üzrə prorektor Fariz Məmmədov və Universitet-Sənaye Əməkdaşlığı və Ömürboyu Təhsil Mərkəzinin müdiri Aynurə İsmayılova iştirak edib.