Xəbər verdiyimiz kimi, Azərbaycan Texniki Universitetinin (AzTU) magistr, doktorant və gənc mütəxəssislərinin (Müdafiə Sənayesi İnstitutunun mütəxəssisi Nicat Bəkirli, Sosial İnkişaf Mərkəzinin baş mütəxəssisi, Radioelektron və aerokosmik sistemlər kafedrasının assistenti Malik Əliyev, 3311.01-cihazqayırma texnologiyası ixtisası üzrə (qiyabi) doktorant Bibixanım Cabbarlı və maşın mühəndisliyi ixtisası üzrə I kurs magistr tələbəsi Merac Abasquliyev) təmsil olunduğu “SKY Global Internship” Mübadilə Proqramı başa çatıb. 4 həftə müddətini əhatə edən proqram (2-26 may 2023-cü il) 5 tapşırıq blokundan ibarət olub və “Uçuş Elmləri Modulu: pilotsuz uçuş aparatının (PUA) layihələndirilməsi” mövzusunda təşkil edilib. İştirakçılar proqram çərçivəsində çəkisi 10-50 kq olan şaquli formada qalxan və enən PUA-ların tədqiqi, uçuş profilinin və çəkisinin qiymətləndirilməsi, uçuş profilinin və qanad parametrlərinin seçimi, quyruq mövqeyinin, ağırlıq mərkəzinin ilkin qiymətləndirilməsi, yastı plitələrin komponentlərinin yığılması, komponentlərin forma faktorlarının, düyünlərin, səthi sürtünmə əmsalının, səsaltı qaldırma əyrisinin mailliyinin, dözümlülüyünün, əsas komponentlərin və aerodinamik yüklərin hesablanması, sükan və həndəsi xarakteristikaların nizamlanması kimi layihələndirmə mərhələləri üzrə iş aparıblar. Qeyd olunan işlər Türk Aviasiya və Kosmik Sənaye Şirkətinin (TUSAŞ) “MGP Academy” laboratoriyasında “MS Excel”, “XFLR5”, “MatLab”, “Siemens NX” və “Ansys” proqram paketlərindən istifadə edilməklə həyata keçirilib. Proqram çərçivəsində dinləyicilər üçün sosial fəaliyyətlər təşkil edilib.    İştirakçılar proqramın sonunda verilən tapşırıqlar üzrə yekun hesabat hazırlayıblar. Onlara proqramı bitirdikləri ilə bağlı sertifikat təqdim olunub. “SKY Global Internship” Mübadilə Proqramında AzTU ilə yanaşı Milli Aviasiya Akademiyasının da magistr, doktorant tələbələri və gənc müəllimləri təmsil olunub. Qeyd edək ki, AzTU-nun TUSAŞ-la sıx əməkdaşlığı 2022-ci ildən başlayıb və bu istiqamətdə işlərin koordinasiyası Universitet-Sənaye Əməkdaşlığı və Ömurboyu Təhsil Mərkəzi tərəfindən həyata keçirilir.

Türkiyənin Bursa Texniki Universitetinin (BTU) Metallurgiya və materiallar mühəndisliyi kafedrasının dosenti Ayşe Kalemtaş və Polimer materiallar mühəndisliyi kafedrasının assistenti Duyqu Rüzgar Qazioğlu “Erasmus+” Mobillik Proqramı çərçivəsində Azərbaycan Texniki Universitetində (AzTU) olub. Qonaqlar AzTU-nun rektoru Vilayət Vəliyevlə görüşüb, metallurgiya və materialşünaslıq sahəsində AzTU-da görülə biləcək işlər və birgə layihələrlə bağlı fikir mübadiləsi aparıb. Səfər çərçivəsində Ayşe Kalemtaş Metallurgiya və materialşünaslıq fakültəsinin tələbələrinə, həmçinin akademik heyətə mühazirə oxuyub. Duyqu Rüzgar Qazioğlu isə AzTU-nun müvafiq kafedrasının əməkdaşları üçün təlim keçirib.

Azərbaycan Texniki Universitetinin (AzTU) Logistika və Nəqliyyat İnstitutunun əməkdaşları, eləcə də Nəqliyyat logistikası və hərəkətin təhlükəsizliyi və Nəqliyyat texnikası və idarəetmə texnologiyaları kafedralarının ümumilikdə 13 müəlliminin iştirakı ilə sahəvi sorğu və monitorinqlərin ilkin mərhələsi başa çatıb. Sorğu və monitorinqlər 17 aprel -12 may 2023-cü il tarixlərini əhatə edib.  AzTU ilə 16 şəhər və rayon icra hakimiyyətləri arasında həyata keçirilən “Şəhərdaxili hərəkət (mobillik) planının hazırlanması” layihəsi çərçivəsində ilkin təhlillər aparılıb, mövcud təcrübələr öyrənilib, qarşı tərəflə işçi qaydada görüşlər keçirilib və ətraflı müzakirələr aparılıb. Tədqiqatın aparılmasında tələb olunan sorğular əhalinin demoqrafik göstəriciləri, mövcud ictimai nəqliyyat şəbəkəsinin əhalinin tələbatına uyğunluq dərəcəsi, hərəkətin təhlükəsizlik səviyyəsinin əhalini qane edib-etməməsi, parklama və taksi duracaqları haqqında problemlərin müəyyən olunması, ərazidə yaşayan əhalinin ictimai nəqliyyat vasitələrinə əlçatanlığı, nəqliyyatdan istifadənin rahatlığı və şəxsi nəqliyyat vasitələri haqqında məlumatların öyrənilməsinə yönəldilib. Bu çərçivədə aparılan monitorinqlər isə yol ayrıclarında avtomobillərin intensivliyini və dayanacaqlarda avtobuslardan istifadə edən sərnişinlərin sayının qeydiyyatının aparılması məqsədi daşıyır. Məlumdur ki, inkişaf etməkdə olan ölkələrin şəhərlərinin ərazisinin genişlənməsi və əhalisinin sayının artması nəticəsində üzləşdiyi çətinliklərin həllində şəhər mobillik planları mühüm rol oynayır. Sözügedən planlar əlçatanlığı yaxşılaşdırmaq, tıxacları azaltmaq, ictimai nəqliyyatı təşviq etmək və sakinlərin ümumi hərəkətliliyini artırmaq üçün strategiya və tədbirləri müəyyən edir. Bu məqsədlə hazırlanan “Hərəkət (Mobillik) Planları” nəqliyyat infrastrukturunun kompleks inkişafı proqramının, ictimai nəqliyyat xidmətlərinin təşkili üzrə kompleks sxemin və nəqliyyat infrastrukturunun, həmçinin yol hərəkətinin kompleks təşkili sxeminin hazırlanmasını özündə ehtiva edir. Ümumilikdə dünya təcrübəsinə nəzərə yetirdikdə universitetlərin, xüsusilə ixtisaslaşmış profesosr-müəllim heyətinin məsləhətçi qismində cəlb edilməklə şəhər hərəkətliliyi planlarının hazırlanmasında iştirakının müsbət nəticələri və faydaları olur. Bu faydalara məsləhət xidməti və elmi əsaslandırma (tədqiqat), fənlərarası yanaşma (burada şəhər hərəkətliliyi planları infrastruktur, torpaqdan istifadə, davranış nümunələri və ətraf mühitə təsirlər daxil olmaqla, nəqliyyat sistemlərinə təsir edən kompleks amillərin hərtərəfli başa düşülməsini tələb edir), verilənlərin (məlumatların) toplanması və təhlili (sorğu və monitorinqlər), maraqlı tərəflərin cəlb edilməsi, xüsusilə ictimaiyyətin iştirakı, pilot layihələr və layihələri genişləndirmək imkanları (universitetlər innovativ mobillik həllərini araşdırmaq və qiymətləndirmək məqsədi daşıyan pilot layihələr və nümayişlər üçün sınaq meydançası kimi xidmət edir) daxildir. Son illərdə aparılan islahatlarda xüsusilə  layihə yanaşması və düşüncəsinin yüksəldilməsini əsas götürən AzTU-da sözügedən işlər layihələrin idarə olunması yolu ilə Logistika və Nəqliyyat İnstitutu və Universitet-Sənaye Əməkdaşlığı və Ömurboyu Təhsil Mərkəzinin birgə təşkilatçılğı ilə həyata keçirilir.

Azərbaycan Texniki Universitetində (AzTU) universitetin tələbəsi, 44 günlük Vətən müharibəsində şəhidlik zirvəsinə yüksələn Cəmil Məmmədlinin xatirəsinə həsr olunan “Elə bir ömür yaşayacam ki...” filminin təqdimat mərasimi keçirilib. Tədbirdə şəhidin ailə üzvləri, yaxınları, həmçinin universitetin müəllim və tələbələri iştirak edib. Əvvəlcə torpaqlarımızın ərazi bütövlüyü uğrunda canlarından keçən Vətən övladlarının xatirəsi bir dəqiqəlik sükutla yad olunub. Azərbaycanın Dövlət Himni səsləndirilib. Tədbirdə çıxış edən AzTU-nun sosial məsələlər və ictimaiyyətlə əlaqələr üzrə prorektoru Nərmin Rzayeva universitetdə şəhidlərin adlarının əbədiləşdirilməsi ilə bağlı görülən işlərdən danışıb. Nərmin Rzayeva 44 günlük Vətən müharibəsində AzTU-nun tələbə və məzunları arasından 35 nəfərin şəhidlik zirvəsinə yüksəldiyini deyib. Bildirib ki, AzTU-nun şəhidlik zirvəsinə yüksələn tələbə və məzunlarının adları universitetin auditoriyalarına verilib. Universitetdə mütəmadi olaraq tələbə və məzun şəhidlərimizin ailə üzvləri ilə görüşlər keçirilir. Prorektor şəhidlərin əziz xatirəsinin yaşadılması, onların qəhrəmanlıqlarının gənc nəslə aşılanması üçün belə tədbirlərin keçirilməsinin önəmindən danışıb.  “Elə bir ömür yaşayacam ki...” filminin ssenari müəllifi Mehriban Sadıqova ekran işinin çəkilməsində dəstək göstərənlərə təşəkkür edib. Daha sonra film nümayiş olunub. Filmdə Cəmil Məmmədlinin məktəb illəri və hərbi xidmətə yola düşməsi zamanı çəkilən görüntülərdən istifadə olunub. Ekran işində şəhidin doğmaları, yaxınları, müəllimləri, döyüş yoldaşları və dostlarının onunla bağlı xatirələri də yer alıb.  Tədbirin sonunda AzTU-nun Şəhid ailələri və vətən müharibəsi iştirakçıları ilə işlərin təşkili qrupunun rəhbəri Zöhrə Məmədova və şəhid Cəmil Məmmədlinin anası Aygün Məmmədli filmin hazırlanmasında zəhməti olan hər kəsə təşəkkür ediblər.  Qeyd edək ki, şəhid Cəmil Məmmədli 1999-cu il iyulun 28-də İsmayıllı rayonunda anadan olub. O, 2016-2020-ci illərdə AzTU-nun Metallurgiya və materialşünaslıq fakültəsində təhsil alıb. Təhsil aldığı dövrdə universitetin ictimai həyatında fəallığı ilə seçilib. Müəllim və tələbə yoldaşlarının yaddaşında vətənpərvər bir insan kimi qalan Cəmil Məmmədli 2020-ci il sentyabrın 27-də başladılan Vətən müharibəsində könüllü olaraq iştirak edib. Oktyabrın 14-dən 15-ə keçən gecə Füzuli rayonunun işğaldan azad olunması uğrunda gedən döyüşlərdə qəhrəmancasına şəhidlik zirvəsinə yüksəlib. Prezident İlham Əliyevin sərəncamlarına əsasən,  Cəmil Məmmədli ölümündən sonra “Vətən uğrunda”, “Xocavəndin azad olunmasına görə”,  “Füzulinin azad olunmasına görə" və “Cəsur döyüşçü”  medalları ilə təltif edilib.

Azərbaycan Texniki Universitetinin (AzTU) Kitabxana İnformasiya Mərkəzinin direktoru Xəyalə Hacıyeva və Təlim və tədqiqat xidmətləri üzrə şöbə müdiri Lamiyə Miryaqubova Əqli Mülkiyyət Agentliyinin tabeliyində olan Respublika Elmi-Texniki Kitabxanasında (RETK) “Heydər Əliyev və kitabxana” mövzusunda keçirilən konfransda iştirak edib. Konfransda RETK-nın direktorunun səlahiyyətlərini icra edən, innovasiya və inkişaf üzrə direktorun birinci müavini Mübariz Məmmədli çıxış edərək kitabxana işinin təşkili və inkişafında ümummilli lider Heydər Əliyevin əvəzsiz xidmətlərindən danışıb. AzTU-nun Kitabxana İnformasiya Mərkəzinin direktoru Xəyalə Hacıyeva ulu öndər Heydər Əliyevin kitabxanalara olan diqqət və qayğısından bəhs edib, həmçinin müasir kitabxana konsepsiyasının önəmli olduğunu vurğulayıb. Xəyalə Hacıyeva AzTU-da kitabxana işinin təşkili, bu istiqamətdə həyata keçirilən yeniliklər barədə də tədbir iştirakçılarına ətraflı məlumat verib.    

Polşanın Rzeszow Texnologiya Universitetinin professoru, WoS və SCOPUS indeksli “İqtisadiyyat və sosiologiya” jurnalının baş redaktor müavini və “Beynəlxalq araşdırmalar” jurnalının baş redaktoru Yuriy Bilan “Erasmus+” proqramı çərçivəsində Azərbaycan Texniki Universitetində (AzTU) olub. Səfər çərçivəsində Yuriy Bilan magistr və doktorantlara, həmçinin İqtisadiyyat və statistika kafedrasının müəllimlərinə “Elmi nəşrlərdə şəffaflıq prinsipləri və ən yaxşı təcrübə” mövzusunda mühazirə oxuyub. 

Azərbaycan Texniki Universiteti (AzTU) ilə orta məktəblər arasında əməkdaşlıq inkişaf etdirilir. Əməkdaşlıq çərçivəsində AzTU-nun İctimaiyyətlə əlaqələr şöbəsinin müdiri Sevinc İsgəndərova, AzTU TV studiyasının direktoru Səfa Bağırov və Sosial İnkişaf Mərkəzinin əməkdaşı Eyvaz Məhəmmədli qəbul imtahanlarının statistikasına görə texniki fənlər üzrə fərqlənən Bakının Binəqədi rayonu 313 və 283 saylı, Xəzər rayonu 149 saylı, Nərimanov rayonu 207 saylı, Suraxanı rayonu 270 saylı, Sabunçu rayonu 311 və 295 saylı tam orta məktəblərinin 9, 10 və 11-ci sinif şagirləri ilə görüşüb. Şagirlər əvvəlcə AzTU haqqında videoçarxa baxıblar. Daha sonra AzTU-nun tarixi, fakültələri, ixtisasları, ikili diplom və mübadilə proqramları barədə şagirdlərə ətraflı məlumat verilib. Bundan başqa, AzTU-da həyata keçirilən layihələr, tələbələrin müxtəlif startap və idman yarışlarında yüksək nailiyyətləri də şagirdlərin diqqətinə çatdırılıb. Sonda şagirdləri maraqlandıran suallar cavablandırılıb.     

          “Azərbaycanda Rektorlar Konfransının yaradılması” (ECAR) layihəsi çərçivəsində 6-cı idarəetmə heyəti görüşü keçirilib. Tədbirdə layihə konsorsiumunun üzvü olan Azərbaycanın 15 universitetindən nümayəndələr və Avropa tərəfdaşları iştirak edib. Görüşdə Azərbaycan Texniki Universitetini (AzTU) beynəlxalq layihələr üzrə qrupun rəhbəri Mətanət Paşayeva və beynəlxlaq layihələr üzrə aparıcı mütəxəssis Nabat Cabbarova təmsil edib. Əvvəlcə layihənin komponentləri üzrə görülmüş işlər barədə iştirakçılara məlumat verilib. Daha sonra elmi işlər, tələbə və məzunlarla iş üzrə komitə sədrlərinin hesabatı dinlənilib, həmçinin layihənin keyfiyyət təminatı və monitorinqi ilə bağlı xarici ekspert George Dafoulasın sualları iştirakçılar tərəfindən cavablandırılıb. İdarəetmə görüşündə layihənin 4 və 5-ci iş paketlərinə uyğun nəzərdə tutulan fəaliyyətlər, layihənin icrası ilə bağlı təşkilati və maliyyə məsələləri, layihə fəaliyyətinin ictimailəşdirilməsi tədbirləri haqqında da geniş müzakirələr aparılıb. Yekunda menecerlər tərəfindən növbəti mərhələlərdə yerinə yetiriləcək işlər dəqiqləşdirilib və bir sıra tapşırıqlar qarşıya qoyulub.

Ulu öndər Heydər Əliyevin anadan olmasının 100 illiyi və 28 May - Müstəqillik Gününə həsr olunan fləşmob keçirilib. Fləşmobda Azərbaycan Texniki Universitetinin (AzTU) və Milli Konservatoriyanın tələbələri Azərbaycanın Dövlət Himnini birlikdə oxuyub. AzTU TV-nin yeni layihəsi olan fləşmobda 70-dən çox tələbə iştirak edib. Görüntülər Fəxri xiyaban, Şəhidlər xiyabanı, Azərbaycan Texniki Universiteti və Milli Konservatoriyada lentə alınıb.

Xəbər verdiyimiz kimi, Azərbaycan Texniki Universiteti (AzTU) ilə ölkəmizin 16 şəhər və rayonunda “Şəhərdaxili hərəkət (mobillik) planının hazırlanması” layihəsinin həyata keçirilməsinə başlanılıb. Bu məqsədlə ilkin mərhələdə sorğu və monitorinqlərin təşkili üçün Nəqliyyat və logistika fakültəsində logistika və nəqliyyat texnologiyalari, yerüstü nəqliyyat vasitələri mühəndisliyi, nəqliyyat mühəndisliyi, nəqliyyatda servis və nəqliyyatda daşımaların və idarəetmənin təşkili mühəndisliyi ixtisasları üzrə bakalavriat və magistratura səviyyələrində təhsil alan 78 tələbədən ibarət sorğu (anketorlar) qrupları formalaşdırılıb.    Tələbələr tədqiqat sahəsinə uyğun ixtisas üzrə bakalavr və ya magistr təhsili alması, təhsildə fərqlənməsi, universitetin ictimai işlərində fəallığı, layihədə həll olunması nəzərdə tutulan məsələlərə marağı, intellektual səviyyəsi, respondentlərlə ünsiyyət qurma və komandada işləmə bacarığı, ərazini yaxşı tanıması və s. meyarlar əsasında seçilib. Sorğu və monitorinqin keçirilməsi üçün seçilmiş tələbələrə hazırlıq təlimləri təşkil edilib, onların çoxsaylı sualları cavablandırılıb, layihəyə dair tələblər məlumatlandırılıb.   Qeyd edək ki, layihənin icrasını AzTU-nun Logistika və Nəqliyyat İnstitutu və Universitet-Sənaye Əməkdaşlığı və Ömürboyu Təhsil Mərkəzi birgə həyata keçirir.