Türkiyənin Yıldız Texniki Universitetinin rektoru professor Eyüp Debik, prorektor Vatan Karakaya, rektorun baş müşaviri Özer Çınar, İstanbul Texniki Universitetinin prorektoru professor Şenol Ataoğlu, Gebze Texniki Universitetinin prorektoru professor Hasari Çelebi, Azərbaycanın Türkiyədəki səfirliyinin təhsil məsələləri üzrə müşaviri Nəcibə Nəsibova Azərbaycan Texniki Universitetinin (AzTU) qonağı olub. Qonaqlar AzTU-nun rektoru professor Vilayət Vəliyev və universitetin nümayəndələri ilə görüşüb. Görüşdə AzTU ilə Türkiyə universitetləri arasında əlaqələrin inkişaf etdiyi diqqətə çatdırılıb. Əməkdaşlıq çərçivəsində görülən işlər yüksək qiymətləndirilib. Görüş zamanı Türkiyə universitetləri ilə AzTU arasında magistratura səviyyəsində müvafiq ixtisaslar üzrə ikili diplom proqramlarının həyata keçirilməsi imkanları müzakirə olunub. Daha sonra AzTU ilə Yıldız Texniki Universiteti arasında tədris və tədqiqat sahəsində əməkdaşlığa dair anlaşma memorandumu imzalanıb. Görüşdən sonra qonaqlar universitetin kampusunu ziyarət ediblər.

Azərbaycan Texniki Universitetinin (AzTU) Maşınqayırma və robototexnika fakültəsinin 1-ci kurs tələbələri Anabacı Əmiraslanova və Orxan Salmanov beynəlxalq müsabiqədə qalib olublar.  AzTU tələbələri Almaniyanın nüfuzlu Constructor Universiteti və “Constructor Talent School”un təşkilatçılığı ilə keçirilən "Constructor Spring Challenge 2025" beynəlxalq riyaziyyat və proqramlaşdırma müsabiqəsində fərdi şəkildə iştirak edərək 3-cü yerə layiq görülüb və “Bürünc” (“Bronze”) sertifikatı ilə təltif olunublar. Hər il Almaniyanın Constructor Universitetinin 14-18 yaş qrupları üçün təşkil etdiyi bu yarışma yüksək rəqabətli elm müsabiqəsidir. Azərbaycan, ABŞ, Almaniya, Rusiya, Türkiyə, Danimarka və digər ölkələrin tələbələrinin iştirakı ilə keçirilən müsabiqədə tələbələrin intellektual bilikləri yoxlanılaraq müxtəlif problemlərə yaradıcı həll yolları axtarılır.

Sənayedə İşlərin Təhlükəsiz Görülməsi və Dağ-Mədən Nəzarəti Dövlət Agentliyinin rəis müavini İsmayıl Nəsirov və Azərbaycan Dövlət Əməyin Mühafizəsi və Texniki Təhlükəsizlik Elmi-Tədqiqat İnstitutunun direktoru Məmməd Bağırzadə Azərbaycan Texniki Universitetinin (AzTU) qonağı olub. Qonaqlar AzTU-nun rektoru Vilayət Vəliyev və universitetin nümayəndələri ilə görüşüb. Görüşdə agentliyin və institutun  gördüyü işlər haqqında məlumat verilib. Həmçinin birgə tədqiqatların yerinə yetirilməsi və layihələrin həyata keçirilməsi istiqamətində fikir mübadiləsi aparılıb. Daha sonra AzTU ilə Azərbaycan Dövlət Əməyin Mühafizəsi və Texniki Təhlükəsizlik Elmi-Tədqiqat İnstitutu arasında əməkdaşlıq haqqında anlaşma memorandumu imzalanıb.

Azərbaycan Texniki Universiteti (AzTU) Türkiyənin İstanbul şəhərində keçirilən ikigünlük Beynəlxalq Təhsil Sərgisində uğurla təmsil olunub.Sərgidə AzTU-nun Beynəlxalq əlaqələr şöbəsinin müdiri Orxan Vətənxah, Yüksək Təhsil İnstitutunun Magistr proqramları mərkəzinin rəhbəri Emin Abıyev, Beynəlxalq əlaqələr şöbəsinin Əcnəbi tələbələrin qəbulu sektorunun müdiri Zemfira Süleymanova və həmin sektorun aparıcı mütəxəssisi Xanım Ağadadaşova iştirak edib.Səfərin ilk günü AzTU nümayəndə heyəti “International Community School” və “Koç School”u ziyarət edərək məktəb rəhbərliyi və şagirdlərlə görüşlər keçirib. Görüşlərdə universitetin ixtisasları, beynəlxalq proqramları, tədris imkanları və tələbələr üçün yaradılan şərait barədə ətraflı məlumat verilib.Səfərin ikinci günü nümayəndə heyəti Beynəlxalq Təhsil Sərgisində iştirak edib. Sərgi çərçivəsində AzTU nümayəndələri Türkiyədən və digər ölkələrdən olan abituriyentlər və onların valideynləri ilə birbaşa ünsiyyət quraraq universitetin tədris mühiti, texniki sahələrdəki güclü təməli, müasir laboratoriyaları və beynəlxalq əməkdaşlıqları barədə məlumat veriblər.AzTU-nun stendi sərgi iştirakçıları tərəfindən böyük maraqla qarşılanıb və təqdimatlar yüksək qiymətləndirilib.

Azərbaycan Texniki Universiteti (AzTU) dünyanın nüfuzlu reytinq sistemlərindən olan “QS Stars” qiymətləndirmə proqramı çərçivəsində 5 ulduza (“mükəmməl”) layiq görülüb. Bu mühüm nailiyyət AzTU-nun tədris, tədqiqat, idarəetmə, müxtəliflik, bərabərlik və inklüzivlik, məzun məşğulluğu, infrastruktur təminatı, beynəlxalq əməkdaşlıq, sosial təsir, innovasiya və bilik transferi kimi əsas fəaliyyət istiqamətlərində beynəlxalq səviyyədə tanınmasının göstəricisidir. “QS Stars” sistemi ali təhsil müəssisələrinin güclü və inkişaf potensialı olan sahələrini obyektiv meyarlarla qiymətləndirərək onların qlobal səviyyədə tanınmasına dəstək verir. Qeyd edək ki, Türkiyə və Mərkəzi Asiya regionunun ölkələri ilə müqayisədə Azərbaycan “QS Stars” reytinq sistemində ilk dəfədən fəaliyyəti 5 ulduz (“mükəmməl”) ilə qiymətləndirilən ali təhsil müəssisələrinin sayına görə lider mövqedədir.

Azərbaijan Texniki Universitetinin (AzTU) Xarici dillər kafedrasının ingilis dilini tədris edən müəllimləri üçün “Danışıq vaxtının maksimuma çatdırılması” mövzusunda seminar keçirilib. Kafedra müdiri professor Səbinə Alməmmədovanın redaktorluğu ilə təşkil olunan seminar və təlim ABŞ-nin ingilis dili üzrə təqaüdçüsü Cordan Teylor Braun tərəfində aparılıb. Tədbirin fəxri qonağı isə ingilis dili üzrə ekspert Tiffani Tillman olub.  Professor-müəllim heyəti seminar zamanı dünya təcrübələri ilə tanış olmaq və danışıq bacarıqlarını inkişaf etdirməyə yönəlmiş praktik fəaliyyətlərdə iştirak etmək imkanı əldə ediblər. Seminarın nəticəsi olaraq iştirakçılar əldə etdikləri metod və yanaşmaları öz dərslərinə inteqrasiya edərək fərdi dərs planları hazırlayıblar. Sonda iştirakçılara sertifikat təqdim olunub.

Süni intellektin bir çox istiqamətlər, o cümlədən iqtisadiyyat, mədəniyyət və incəsənətdə, eyni zamanda, siyasətdə geniş tətbiqi var. Bu gün Mədəniyyət və İncəsənət Universitetinin təşkil etdiyi “Müasir incəsənət məkanında süni intellekt: problemlər və perspektivlər” konfransı da süni intellektlə bağlıdır. Bunu Azərbaycan Texniki Universitetinin (AzTU) rektoru professor Vilayət Vəliyev jurnalistlərə müsahibəsində deyib. Rektor deyib: “Bu gün biz daha çox süni intellektin mədəniyyət və incəsənətə tətbiqini görürük. Bununla bağlı süni intellektin əsas mahiyyəti ondan ibarətdir ki, o tətbiqi bir sahədir. Texniki Universitetin rektoru kimi deyə bilərəm ki, bizim süni intellektlə bağlı ciddi platformamız var. Məsələn, biz bunun bir istiqamətini süni intellekt texnologiyalarının tətbiqində görürük. Tətbiq edilən digər sahə müdafiə sənayesidir. Azərbaycan müdafiə sənayesində süni intellektin çox ciddi tətbiqləri var. Süni intellektin ən çox tətbiq sahələrindən biri də energetika sektorudur. Habelə elektronika, telekommunikasiya sahələrində süni intellekt tətbiq edilir. Əsas məsələ odur ki, süni intellekt insanı əvəz edə bilməsə də, onun işini yüngülləşdirir və insan daim öyrəndikcə ciddi nəticələr əldə edir”.

Əqli Mülkiyyət Agentliyinin təşkilatçılığı ilə Azərbaycan Texniki Universitetində (AzTU) “Sənaye mülkiyyəti obyektləri və onların qeydiyyatı” mövzusunda tədbir təşkil olunub. AzTU-nun elm və innovasiyalar üzrə prorektoru Sübhan Namazov əqli mülkiyyətin qorunması və effektiv idarə olunmasının ölkənin elmi potensialının reallaşdırılması baxımından strateji əhəmiyyət kəsb etdiyini vurğulayıb. O, bu baxımdan elmi-tədqiqat və ali təhsil müəssisələrinin agentliklə birgə fəaliyyətinin gələcək uğurlar üçün möhkəm zəmin yaradacığını diqqətə çatdırıb. Qeyd edib ki, əqli mülkiyyət sahəsində maarifləndirmə işləri gənc tədqiqatçıların bu sahəyə cəlb olunması və innovasiya mühitinin formalaşdırılması üçün əhəmiyyətli olacaq. Görüşdə Əqli Mülkiyyət Agentliyinin tabeliyində olan Patent və Əmtəə Nişanlarının Ekspertizası Mərkəzinin İxtira və faydalı modelin ekspertizası şöbəsinin müdiri Sevinc Zeynalova çıxış edərək, tədbirin təşkilinə görə universitet rəhbərliyinə təşəkkürünü bildirib və görüşü qarşılıqlı əməkdaşlığın ilk addımı kimi dəyərləndirib. Əqli mülkiyyətin qorunması və bu sahədə biliklərin artırılması məqsədilə keçirilən tədbirdə iştirakçılar üçün mütəxəssislər tərəfindən təqdimatlar olunub. Şöbə müdiri Sevinc Zeynalova “Əqli mülkiyyət obyektlərinin mahiyyəti üzrə ekspertizanın aparılması” və “Beynəlxalq və regional patentləşdirmə prosedurları”, Patent və Əmtəə Nişanlarının Ekspertizası Mərkəzinin İlkin ekspertiza və sənaye nümunələrinin ekspertizası şöbəsinin müdiri Afət Qasımova “Patent hüququ obyektləri və patentin alınmasına dair iddia sənədinin tərtibatı və verilməsi” mövzularında təqdimatla çıxış ediblər. İnteraktiv müzakirələrlə davam etdirilən tədbirdə agentliyin nümayəndələri iştirakçıların suallarını cavablandırıblar. Əqli Mülkiyyət Agentliyinin İdarə Heyətinin sədri Kamran İmanovun müəllifi olduğu əqli mülkiyyətə dair kitablar AzTU kitabxanasına hədiyyə edilib.

Azərbaycan Texniki Universitetinin (AzTU) AI-Baku 2025: Süni İntellekt və Biotibbi İnnovasiyalar üzrə Azərbaycan-Almaniya Strateji Tərəfdaşlıq Forumu çərçivəsində Yeni Klinikada “İşemik insultların müalicəsində müasir yanaşmalar" mövzusunda elmi seminar və Angioqrafiya laboratoriyasında master-klass təşkil olunub.Dünyadakı ən son yeniliklərin müzakirəsi və klinik praktikada tətbiq imkanlarının genişləndirilməsi məqsədilə təşkil olunan tədbirdə TƏBİB-in İcraçı direktorunun müavini Anar İsrafilov, TƏBİB-in İcraçı direktorunun müşaviri, Yeni Klinikanın direktor müavini, Somatika və STROK mərkəzinin rəhbəri Pərvin Əkbərov, Almaniya-Azərbaycan Radioloji və Neyroradioloji Cəmiyyətinin sədri, Almaniyanın 600 minlik əhalisi olan Reyn Zig bölgəsinin Radiologiya, Nuklear Tibb və Neyroradiologiya Klinikasının rəhbəri, Köln Universitetinin əməkdaşı və AzTU-nun Biotibbi Mühəndislik İnstitutunun direktoru professor Nuran Abdullayev çıxış ediblər.TƏBİB-in İcraçı direktorunun müavini Anar İsrafilov insult xəstəliyinin müasir dövrdə cəmiyyət üçün ciddi sağlamlıq problemi olduğunu vurğulayaraq, insult mərkəzinin fəaliyyəti və əhəmiyyətindən söz açıb.TƏBİB-in İcraçı direktorunun müşaviri Pərvin Əkbərov işemik insult və digər nevroloji xəstəliklərin müalicəsi üçün multidisiplinar komandanın vacibliyini qeyd edərək Azərbaycanda bu istiqamətdə işlərin həyata keçirildiyini vurğulayıb və TƏBİB tabeliyində fəaliyyət göstərən 4 xəstəxanada insulta hazır olan xidmətlərin beynəlxalq standartlara uyğunlaşdırılması üçün müvafiq işlərin həyata keçirildiyini bildirib.AzTU-nun Biotibbi Mühəndislik İnstitutunun direktoru professor Nuran Abdullayev bildirib ki, AI-Baku 2025: Süni İntellekt və Biotibbi İnnovasiyalar üzrə Azərbaycan-Almaniya Strateji Tərəfdaşlıq Forumu 2025-ci il 19 mart tarixli Sərəncamı ilə təsdiq olunmuş “Azərbaycan Respublikasının 2025–2028-ci illər üçün süni intellekt Strategiyası” çərçivəsində müəyyən edilmiş prioritet hədəflərə uyğun olaraq təşkil olunub. O, qeyd edib ki, işemik insultların müalicəsində müasir yanaşmalarda da artıq süni intellektin rolu qaçılmazdır və bunun tətbiqi mütləqdir. Məhz buna görə də forum çərçivəsində belə bir elmi-praktik konfransın keçirilməsinə qərar verildi. Professor Nuran Abdullayev elmə əsaslanan, doğru qurulmuş müasir insult mərkəzlərinin digər ölkə səhiyyələrində inqilabi dəyişikliyə səbəb olduğu nümunələri qeyd edib və Avropa təcrübəsinə əsaslanan müasir müalicə yanaşmaları barədə ətraflı məlumat verib. Mobil insult diaqnostikasından bəhs edən Nuran Abdullayev onun tətbiqinin yaxın gələcəkdə çox önəmli olduğunu vurğulayıb. Tanınmış mütəxəssis seminarın tibb sahəsində peşəkar inkişaf və beynəlxalq təcrübələrin paylaşılması baxımından böyük əhəmiyyət daşıdığını xüsusi vurğulayıb.İnteraktiv şəkildə klinik təcrübələr və aktual yanaşmaların təqdim olunduğu seminarda Yeni Klinikanın digər həkimləri də çıxış ediblər.Daha sonra Angioqrafiya laboratoriyasında master-klass təşkil olunub. Master-klass zamanı Nuran Abdullayev beyin damarlarında icra olunan ən müasir əməliyyat texnikaları barədə azərbaycanlı həmkarlarına əyani təqdimatla ətraflı məlumat verilib.Tədbir çərçivəsində xüsusilə beyin insultu zamanı tətbiq olunan qabaqcıl müdaxilə üsullarına diqqət yetirilib və Nuran Abdullayev tərəfindən inkişaf etdirilən ən yeni əməliyyat texnikası, Avropada artıq patent almış ən yeni stent azərbaycanlı həkimlərə nümayiş olunub. Bundan başqa, iştirakçılar beynin damar anevrizmalarının müalicəsində istifadə olunan, ən müasir mühəndis texnologiyaları ilə hazırlanmış və hazırda Azərbaycanda istifadə olunmayan stentlərlə tanış olmaq imkanı da əldə ediblər.Qeyd edək ki, Yeni Klinikada təşkil olunan seminar çərçivəsində ilk dəfə yeni texnologiyaların tətbiqinə dair məlumatlar geniş auditoriyaya təqdim olunub və iştirakçılara beyin damarlarının müalicəsində innovativ yanaşmalar nümayiş etdirilib.Nəzərinizə çatdıraq ki, ən müasir mühəndis texnologiyaları ilə hazırlanmış stentlərin elmi tətqiqatlarla daha da öyrənilməsi bundan sonra Azərbaycanda da aparılacaq. Belə ki, AzTU-da keçirilən AI - Baku 2025: Süni İntellekt və Biotibbi İnnovasiyalar üzrə Azərbaycan-Almaniya Strateji Tərəfdaşlıq Forumu çərçivəsində Azərbaycan Texniki Universitetində “AI-MED LAB” laboratoriyasının açılış mərasimi keçirilib. AzTU-nun Biotibbi Mühəndislik İnstitutunun nəzdində yaradılan “AI-MED LAB”ın məqsədlərindən biri də qeyd edilən elmi-tətqiqat işlərini aparmaq və Azərbaycanı beynəlxalq səviyyədə layiqincə təmsil etməkdir. Bu isə təkcə milli səhiyyəmiz üçün deyil, həmçinin beynəlxalq səviyyədə elmi innovasiyalara və müasir elmin inkişafına mühüm töhfədir.

“Baykar Texnoloji Azərbaycan” şirkətinin direktoru Hüseyin Topuz Azərbaycan Texniki Universitetində (AzTU) olub. Qonaq AzTU-nun rektoru Vilayət Vəliyev və universitetin nümayəndələri ilə görüşüb. Görüşdə həmçinin “Bilim Bakı” Mərkəzinin direktoru Ahmet Köse də iştirak edib. Rektor Vilayət Vəliyev qonaqları salamlayaraq universitetdə həyata keçirilən layihələr və müasir mühəndislik təhsilinin inkişafı istiqamətində görülən işlərdən danışıb. O, “Baykar Texnoloji Azərbaycan” şirkəti ilə qurulan əməkdaşlığın universitet-sənaye işbirliyinin inkişafı baxımından mühüm addım olduğunu vurğulayıb. “Baykar Texnoloji Azərbaycan” şirkətinin direktoru Hüseyin Topuz qonaqpərvərliyə görə təşəkkürünü bildirib, rəhbərlik etdiyi qurumun universitetlərlə əməkdaşlıqda maraqlı olduğunu, o cümlədən AzTU ilə birgə layihələrdə iştirakdan məmnunluğunu ifadə edib. Daha sonra AzTU ilə “Baykar Texnoloji Azərbaycan” şirkəti arasında elm, təhsil və texnologiya sahələrində əməkdaşlıq haqqında anlaşma memorandumu imzalanıb. Sənəd tərəflər arasında elmi-tədqiqat layihələrinin təşkili, tələbələr üçün təcrübə proqramları, birgə tədris və təlim fəaliyyətlərinin həyata keçirilməsi, konfrans və seminarların təşkili, habelə akademik əməkdaşlığın daha da genişləndirilməsini nəzərdə tutur. Memorandumda göstərilən istiqamətlərə uyğun olaraq beynəlxalq standartlara uyğun birgə kurs və proqramların hazırlanması, birgə elmi tədbirlərin təşkili və universitetin tələbə və gənc müəllim heyəti üçün təlim imkanlarının yaradılması da planlaşdırılır.