Elm və Təhsil Nazirliyinin dəstəyi, Elm və Ali Təhsil üzrə Dövlət Agentliyi və “Times Higher Education” (THE) beynəlxalq reytinq agentliyinin birgə təşkilatçılığı ilə Bakıda “THE Avrasiya Universitetlərinin Sammiti” keçirilir. Bu il “Transmilli tədqiqat: bilikdən qlobal təsirə doğru” mövzusuna həsr olunan sammitdə dünyanın müxtəlif regionlarından nüfuzlu ali təhsil müəssisələri ilə yanaşı, Azərbaycan Texniki Universiteti (AzTU) də öz stendi ilə təmsil olunur. Sammitdə iştirak edən AzTU rektoru Vilayət Vəliyevin rəhbərlik etdiyi nümayəndə heyəti beynəlxalq əməkdaşlıq, transmilli tədqiqat imkanları və universitetlərarası tərəfdaşlıqların genişləndirilməsi istiqamətində görüşlər keçirir. Qeyd edək ki, nümayəndə heyətində elm və innovasiyalar üzrə prorektor Sübhan Namazov, beynəlxalq əlaqələr üzrə prorektor Fariz Məmmədov, Tədqiqat və inkişaf departamentinin müdiri Bəxtiyar Bədəlov, Keyfiyyətin təminatı şöbəsinin müdiri Pərvanə Mövsümova iştirak edir.

Namangan Dövlət Texniki Universitetinin beynəlxalq əməkdaşlıq üzrə prorektoru Ilhom Abdurahmanov Azərbaycan Texniki Universitetində (AzTU) olub. Görüşün əsas məqsədi universitetlər arasında gələcək əməkdaşlıq imkanlarını müzakirə etmək və mövcud əlaqələri daha da gücləndirmək olub. AzTU-nun elm və innovasiyalar üzrə prorektoru Sübhan Namazov universitetdə görülən işlərlə bağlı qonağa məlumat verib. Görüş zamanı ikitərəfli əməkdaşlıq sahələri müzakirə olunub. Xüsusi olaraq elmi-tədqiqat sahəsində əməkdaşlıq, tələbə və müəllim mübadiləsi, universitetlərin beynəlxalq reytinqlərdə mövqeyinin yaxşılaşdırılması, ikili diplom proqramlarını həyata keçirilməsi və digər mövzularda fikir mübadiləsi aparılıb.

Azərbaycan Texniki Universitetinin (AzTU) rektoru Vilayət Vəliyevin rəhbərlik etdiyi nümayəndə heyəti Almaniyanın mühəndislik, informasiya və kompüter elmləri, dəqiq elmlər və təbiət elmləri sahəsində ali təhsilin bakalavr, magistr və doktorantura səviyyələrində təhsil proqramlarının akkreditasiyasını həyata keçirən dünyada nüfuzlu Beynəlxalq Akkreditasiya Agentliyində (ASIIN) işgüzar səfərdə olub. Nümayəndə heyətində elm və innovasiyalar üzrə prorektor Sübhan Namazov və Tədqiqat və inkişaf departamentinin müdiri Bəxtiyar Bədəlov da iştirak edib. Rektor Vilayət Vəliyev AzTU-nun ASIIN-lə mövcud uğurlu əməkdaşlığını vurğulayaraq, Almaniya universitetləri ilə ikitərəfli əlaqələr və təhsil proqramlarının keyfiyyətinin artırılması istiqamətində görülən işlər barədə geniş məlumat verib. Müzakirələr zamanı AzTU-nun bir sıra ixtisaslarının proqram akkreditasiyasında maraqlı olduğu bildirilib və gələcəkdə sertifikasiya proqramlarının akkreditasiyasının mümkünlüyü barədə razılıq əldə olunub. Müzakirələrdən sonra ilkin olaraq AzTU-nun 20-dək proqramının akkreditasiyasının keçirilməsi üçün razılıq əldə olunub və anlaşma memorandumu imzalanıb.

Azərbaycan Texniki Universitetində (AzTU) elmi-tədqiqatların beynəlxalq səviyyədə inkişafı və universitetin elmi göstəricilərinin yüksəldilməsi məqsədilə Tədqiqat və inkişaf departamentinin təşəbbüsü ilə təlim təşkil olunub. Təlimi dünyanın aparıcı elmi nəşriyyat şirkətlərindən biri olan “Elsevier”in Azərbaycandakı rəsmi nümayəndəsi Saida Sak aparıb. Təlimdə professor-müəllim heyəti, magistrant və doktorantlar iştirak ediblər. Saida Sak “Scopus” elmi məlumat bazasının imkanları, elmi məqalələrin axtarışı və təhlili, sitat göstəricilərinin izlənməsi, h-index və digər elmmetrik göstəricilərin hesablanması barədə ətraflı məlumat verib. Həmçinin iştirakçılara “Scopus” platformasında səmərəli axtarış üsulları, tədqiqat mövzularının seçilməsi, beynəlxalq elmi əməkdaşlıq imkanlarının genişləndirilməsi və yüksək impakt faktorlu jurnallara məqalə göndərilməsi prosesləri izah edilib. Saida Sak indeksləşmə meyarları, məqalələrin qəbul prosedurları, elmi etika və müəllif hüquqları ilə bağlı sualları da cavablandırıb. Təlim zamanı AzTU-nun elmi fəaliyyətinin səmərəliliyinin artırılması, beynəlxalq elmi məkanda görünürlüyünün gücləndirilməsi və institusional profil bazasının daha səmərəli idarə olunması istiqamətində müzakirələr aparılıb. Sonda AzTU-da elmi fəaliyyətin beynəlxalq standartlara uyğun inkişaf etdirilməsi, beynəlxalq elmi jurnallarda dərc olunan məqalələrin sayının artırılması və universitetin qlobal elm məkanında mövqeyinin gücləndirilməsinin vacibliyi vurğulanıb.

Azərbaycan Texniki Universitetinin (AzTU) rektoru Vilayət Vəliyevin rəhbərlik etdiyi nümayəndə heyəti Almaniyanın və dünyanın ən qabaqcıl universitetlərindən biri olan Aaxen Texniki Universitetində (RWTH Aachen) işgüzar səfərdə olub. Nümayəndə heyətində elm və innovasiyalar üzrə prorektor Sübhan Namazov və Tədqiqat və inkişaf departamentinin müdiri Bəxtiyar Bədəlov da iştirak edib. Rektor Vilayət Vəliyev AzTU-nun Almaniya universitetləri ilə uğurlu əməkdaşlıq əlaqələri və universitetin fəaliyyət istiqamətləri barədə məlumat verib. RWTH Aachen-in Tekstil Texnologiyaları İnstitutunun (İTA) rəhbəri professor Tomas Grieslə görüş zamanı "Synergia Academy"nin təşəbbüsü ilə ikitərəfli əməkdaşlıq əlaqələrin qurulması yüksək qiymətləndirilib, elmi-tədqiqat və tədris sahəsində birgə əməkdaşlıq əlaqələri, Alman Tədqiqat Təcrübə Proqramının həyata keçirilməsi, Robototexnika və Mexatronika Laboratoriyasının yaradılması, birgə sənaye əsaslı mini MBA proqramının, birgə tədqiqat layihələrinin və konfranslarının həyata keçirilməsi müzakirə olunub. Həmçinin birgə sertifikasiya proqramının təşkili, beynəlxalq reytinqlərdə qarşılıqlı dəstək istiqamətində fəaliyyətləri əks etdirən anlaşma memorandumunun imzalanmasına hazırlıq istiqamətində razılıq əldə olunub. Hər iki tərəf qeyd edilən istiqamətlərdə əməkdaşlıqda maraqlı olduqlarını vurğulayıblar. Səfər çərçivəsində nümayəndə heyəti İTA-nın universitet-sənaye əməkdaşlığı fonunda qurulmuş zəngin multidissiplinar tədqiqat laboratoriyaları, son illərdə İTA-nın inkişafı istiqamətində meqatrendlərlə yaxından tanış olub, müzakirələr aparılıb və real əməkdaşlıq mövzuları müəyyən olunub.

Şamaxıda Kənd Təsərrüfatı Nazirliyinin Aqrar İnnovasiya Mərkəzi və Şamaxı Rayon İcra Hakimiyyətinin birgə təşkilatçılığı ilə “Dəqiq kənd təsərrüfatında süni intellektin tətbiqi” layihəsinə həsr olunmuş növbəti “Bootcamp” keçirilib. Üzüm və Şərab Festivalı çərçivəsində təşkil olunan “Bootcamp”da Azərbaycan Texniki Universitetini (AzTU) Xüsusi texnika və texnologiya fakültəsinin tələbəsi Əli Mustafasoylu, İnformasiya texnologiyaları və telekommunikasiya fakültəsinin tələbəsi Selcan Kərimli və “SmartTech” İnnovatorlar Mərkəzinin tədqiqat və layihələndirmə laboratoriyasının təlimçi-konstruktoru Ömər Ələsgərov təmsil edib. “Bootcamp”ın əsas məqsədi kənd təsərrüfatında rəqəmsal texnologiyaların tətbiqini təşviq etmək, gənclərin nəzəri biliklərini praktik bacarıqlara çevirməsinə şərait yaratmaq, həmçinin aqrar sahədə startap ekosisteminin inkişafına dəstək olmaqdır. Proqram çərçivəsində aqrar sahədə ixtisaslaşmış şirkətlərin, eyni zamanda 10-dan artıq akselerasiya və inkubasiya mərkəzlərinin mütəxəssisləri tərəfindən təqdimatlar həyata keçirilib. Təqdimatlar zamanı mütəxəssislər iştirakçıların təqdim etdikləri layihələrinin daha da təkmilləşdirilməsi, istehsalatda tətbiq olunma imkanları, kommersiyalaşdırılması və bazara çıxarılması ilə bağlı öz təcrübə və tövsiyələrini bölüşüblər. “Bootcamp” iştirakçıları biotexnoloji üsullarla istehsal edilmiş bitkilərin satışını təşkil edən vahid platforma, suvarma şəbəkələrinin avtomatlaşdırılması, sensor texnologiyaları, aqrar fəaliyyətlərin ağıllı idarəedilməsi üzrə proqram təminatı, su hövzələrində və akvariumda toplanan balıq atqılarını filtrdən keçirməklə təbii, saf və maddi sərfəli gübrənin alınmasına yönəltmək, heyvandarlıqda Concox Qbit-4G modulu əsasında yerli GPS izləmə sistemi, propandiol molekulunun bioloji fermentasiya ilə ekoloji təmiz mühitdə alınması, bitki xəstəliklərinin foto əsasında müəyyən olunmasına köməklik göstərən applikasiya və digər innovativ ideya və modellərlə bağlı təqdimatlar ediblər. “Bootcamp” iştirakçılarının aqrar sahəyə dair bilik və təcrübəsini zənginləşdirmək məqsədilə Şamaxı rayonunda aqrar sahə üzrə ixtisaslaşmış istehsalat müəssisələrinə infotur təşkil olunub. İştirakçılar “Az-Granata” MMC-nin təsərrüfatında, Üzümçülük və Şərabçılıq Elmi-Tədqiqat İnstitutunun təcrübə təsərrüfatında, “Şirvan Şərabları” MMC-nin istehsalat sahəsində real iş prosesi ilə yaxından tanış olmaq imkanı qazanıblar.

8–13 sentyabr tarixlərində “Təhsil” istirahət mərkəzində keçirilən “Tələbələrin yay düşərgəsi”ndə Azərbaycan Texniki Universiteti (AzTU) Tələbə Həmkarlar İttifaqı Komitəsinin (THİK) fəal tələbələri də iştirak edib. Düşərgə haqqında AzTU THİK sədri Mirməhəmməd Ələkbərli ilə müsahibəni təqdim edirik. “Tələbələrin yay düşərgəsi” sizin üçün hansı məqamlarla yadda qaldı? Bu düşərgə mənim üçün sadəcə yay tətilini səmərəli keçirmək deyil, həm də tələbələrimizin sosial bacarıqlarını inkişaf etdirmək, bir-biri ilə ünsiyyətini möhkəmləndirmək, komandada işləmə vərdişlərini artırmaq üçün geniş imkanlar yaradan bir platformadır. Müxtəlif universitetlərdən gələn tələbələr burada yeni dostluqlar və əməkdaşlıqlar qurur, gənclər üçün üfüqlər genişlənir. Düşünürəm ki, AzTU tələbələri də düşərgədə maraqlı və faydalı zaman keçirdilər.  Bu tədbirdə AHİK və ETİHİ-nin rolu nədən ibarət idi? Mən hesab edirəm ki, Azərbaycan Həmkarlar İttifaqları Konfederasiyası (AHİK) və Elm və Təhsil İşçiləri Həmkarlar İttifaqı (ETİHİ) gənclər və tələbələrin şəxsi inkişafına böyük önəm verir. Sözügedən qurumların dəstəyi ilə belə düşərgələr gənclərin sosial müdafiəsini, asudə vaxtının səmərəli təşkilini və peşəkar inkişafını təmin edir. Bu tədbir bir daha göstərdi ki, həmkarlar təşkilatları gənclərin rifahı və inkişafı üçün real işlər görür.  Düşərgədə digər universitetlərin nümayəndələrinin iştirakı haqqında nə deyə bilərsiniz? Mənim üçün xüsusi sevindirici məqam ondan ibarətdir ki, düşərgədə dost universitetlərin tələbələri və THİK sədrləri də fəal iştirak edirdi. Onların müsbət fəaliyyəti və təşəbbüsləri gənclər arasında əməkdaşlıq və dostluq münasibətlərinin möhkəmlənməsinə böyük töhfə verdi. Bu cür birgə tədbirlər universitetlərarası əlaqələrin inkişafına xidmət edir, tələbələrimiz üçün yeni perspektivlər açır.  Sonda nə demək istərdiniz? Mən əminəm ki, “Tələbələrin yay düşərgəsi” kimi layihələr tələbələrin həm sosial, həm də peşəkar inkişafına mühüm təsir göstərir. AHİK və ETİHİ-nin yaratdığı bu imkanlar tələbələrdə həmkarlar hərəkatına bağlılıq hissini gücləndirir. Həmkarların dəstəyi və dost universitetlərin fəal iştirakı ilə belə tədbirlər gələcəkdə də gənclərin birlikdə uğurlu layihələr həyata keçirməsinə zəmin yaradacaq.

Azərbaycana səfərə gələn Şimali Kipr Türk Cümhuriyyətinin Kipr Bahçeşehir Universitetinin (KBU) rektoru Mehmet Toycanın rəhbərlik etdiyi nümayəndə heyəti Azərbaycan Texniki Universitetində (AzTU) olub. Qonaqlar AzTU-nun rektoru Vilayət Vəliyev və universitetin nümayəndələri ilə görüşüb. Qonaqları salamlayan rektor Vilayət Vəliyev onları AzTU-da görməkdən məmnunluğunu ifadə edib. Rektor universitetdə görülən işlər, həyata keçirilən təhsil proqramları, icra edilən layihələr, beynəlxalq əməkdaşlıq, eləcə də AzTU-nun elm və tədqiqat sahəsində gələcək hədəfləri barədə qonaqları məlumatlandırıb. KBU-nun rektoru Mehmet Toycan təmsil etdiyi ali təhsil müəssisəsi haqqında geniş məlumat verib. O, Şimali Kipr Türk Cümhuriyyətindəki ali təhsil müəssisələrinin Azərbaycan ali təhsil müəssisələri ilə tədris və tədqiqat sahəsində əməkdaşlıq qurmasında maraqlı olduğunu deyib. Görüş zamanı AzTU ilə KBU nümayəndələri arasında tələbə və akademik heyətin qarşılıqlı mübadiləsi, birgə elmi-tədqiqatlar, ikili diplom proqramları imkanları müzakirə olunub. Sonda universitetlər arasında əməkdaşlıq haqqında müqavilə imzalanıb. 

2025/2026-cı tədris ilində Xüsusi texnika və texnologiya fakültəsinə qəbul olunan I kurs tələbələri ilə görüş keçirilib. Fakültə dekanı dosent Yadullah Babayev tələbələri qazandıqları uğur münasibətilə təbrik edib. O, Xüsusi texnika və texnologiya fakültəsinin regionda müdafiə sənayesi sahəsində ixtisaslı kadr hazırlayan yeganə fakültə olduğunu vurğulayıb. Yadullah Babayev çıxışında müdafiə sənayesinin qloballaşan dünyanın yeni çağırışları fonunda əhəmiyyətinin gündən-günə artdığını qeyd edərək tələbələrə dərslərində fəal olmağı, daim öyrənməyə həvəsli və məsuliyyətli olmağı tövsiyə edib. Daha sonra fakültə dekanının tədris işləri üzrə müavini Qoşqar Rəsulov çıxış edərək I kursa qəbul olunan tələbələri təbrik edib və onlara ilk tədris illərində uğurlar arzulayıb. Görüşün sonunda fakültə dekanının sosial məsələlər, ictimaiyyətlə əlaqələr və infrastruktur üzrə müavini Amin Mamedov təqdimatla çıxış edərək tələbələrə universitetdə dərslərin təşkili mexanizmi, kredit sistemi və digər vacib məqamlar barədə ətraflı məlumat verib.

Azərbaycana səfərə gələn İsrailin Holon Texnologiya İnstitutunun (HİT) prezidenti Eduard Yakubovun rəhbərlik etdiyi nümayəndə heyəti Azərbaycan Texniki Universitetində (AzTU) olub. Qonaqlar AzTU-nun rektoru Vilayət Vəliyev və universitetin nümayəndələri ilə görüşüb. Qonaqları salamlayan rektor Vilayət Vəliyev onları AzTU-da görməkdən məmnunluğunu ifadə edib. Rektor universitetdə görülən işlər, həyata keçirilən təhsil proqramları, icra edilən layihələr, İsrailin ali təhsil müəssisələri ilə əməkdaşlıq, eləcə də AzTU-nun elm və tədqiqat sahəsində gələcək hədəfləri barədə qonaqları məlumatlandırıb. HİT-in prezidenti Eduard Yakubov təmsil etdiyi ali təhsil müəssisəsi haqqında geniş məlumat verib. Bildirib ki, HİT İsrailin mühəndislik sahəsində ilk ali təhsil müəssisələrindən biridi. O, İsrailin ali təhsil müəssisələrinin Azərbaycan ali təhsil müəssisələri ilə tədris və tədqiqat sahəsində əməkdaşlığının genişləndirilməsində maraqlı olduğunu deyib. Görüş zamanı AzTU ilə HİT nümayəndələri arasında tələbə və akademik heyətin qarşılıqlı mübadiləsi, birgə elmi-tədqiqatlar, ikili diplom proqramları imkanları müzakirə olunub. Sonda universitetlər arasında əməkdaşlıq haqqında müqavilə imzalanıb.