Türkiyənin İqtisadi İnkişaf və Sosial Tədqiqatlar İnstitutunun (İKSAD) direktoru Mustafa Latif Emekin rəhbərlik etdiyi nümayəndə heyəti ölkəmizə səfəri çərçivəsində Azərbaycan Texniki Universitetinin (AzTU) qonağı olub. Qonaqları salamlayan AzTU-nun tədris işləri üzrə prorektoru professor Nurəli Yusifbəyli Azərbaycan və Türkiyə arasında bütün sahələrdə olduğu kimi, tədris və tədqiqat sahələrində də əlaqələrin inkişaf etdiyini bildirib. Nurəli Yusifbəyli Türkiyənin aparıcı ali təhsil müəssisələri ilə ikili diplom proqramları, birgə tədqiqatlar və texnoparkların qurulması istiqamətində əməkdaşlığın AzTU-nun fəaliyyətinə mühüm təsirini vurğulayıb. Dünyanın tanınmış elm adamlarını sıralarına daxil edən İKSAD-ın müxtəlif sahələrə aid qlobal və regional tədqiqatlar apardığını, tədbirlər keçirdiyini qeyd edən təşkilatın direktoru Mustafa Emek türkdilli dövlətlərin elmi potensialının güclənməsinə önəm verildiyini diqqətə çatdırıb. Bildirib ki, ötən il İKSAD-ın AzTU ilə birgə təşkil etdiyi konfrans uğurlu olub və bu qəbildən olan tədbirlərin növbəti illərdə də keçirilməsi təklif olunur. Nümayəndə heyətinə daxil olan Türkiyənin Adana Alparslan Türkeş Elm və Texnologiya Universitetinin rektoru professor Mehmet Tümay da qardaş ölkələr arasında bütün sahələrdə əməkaşlığın bundan sonra da inkişafının vacibliyini qeyd edib. Daha sonra Adana Adana Alparslan Türkeş Elm və Texnologiya Universiteti və AzTU arasında tədris və tədqiqat sahəsində əməkdaşlıq məsələləri müzakirə olunub.

Azərbaycan Texniki Universitetinin (AzTU) və Türkiyənin Hacettepe Universitetinin birgə təşkilatçılığı ilə “100 il: Türkiyə Cümhuriyyəti və Ümummilli Lider Heydər Əliyev” mövzusunda konfrans keçirilib. Konfransda AzTU-nun rektoru professor Vilayət Vəliyev, Hacettepe Universitetinin rektoru professor Mehmet Cahit Güran, Azərbaycanın Türkiyədəki səfirliyinin təhsil məsələləri üzrə müşaviri Nəcibə Nəsibova və universitetin müəllim-tələbə heyəti iştirak edib.  Konfrans iştirakçıları əvvəlcə Fəxri xiyabanda ulu öndər Heydər Əliyevin məzarını ziyarət edib, önünə gül dəstələri düzüblər. Görkəmli oftalmoloq alim, akademik Zərifə xanım Əliyevanın da xatirəsi ehtiramla yad olunub. Daha sonra Şəhidlər xiyabanı və “Türk Şəhidliyi” abidəsi ziyarət olunub. AzTU-da davam etdirilən tədbirdə torpaqlarımızın ərazi bütövlüyü və suverenliyi uğrunda canlarından keçən Vətən övladlarının xatirəsi bir dəqiqəlik sükutla yad olunub. Azərbaycanın və Türkiyənin dövlət himnləri səsləndirilib. Konfransda açılış nitqi ilə çıxış edən AzTU-nun rektoru professor Vilayət Vəliyev bildirib ki, ulu öndər Heydər Əliyevin anadan olmasının və Türkiyə Cümhuriyyətinin qurulmasının 100 illiyinin qeyd olunması qardaş ölkələr üçün əlamətdar hadisədi. Bu mühüm tarixlərin məhz ərazi bütövlüyünü və suvereliyini tam bərpa etmiş Qalib Azərbaycanda qeyd olunması qürurvericidir. Fəxr hissi ilə qeyd etmək lazımdır ki, bu gün qardaş ölkələrin əlaqələri strateji müttəfiqlik səviyyəsinə yüksəlib. Hacettepe Universitetinin rektoru professor Mehmet Cahit Güran qardaş ölkələr üçün əlamətdar tarixlər münasibətilə təbriklərini çatdırıb. Bildirib ki, Türkiyə Cümhuriyyətinin qurucusu Mustafa Kamal Atatürk və Azərbaycanın ümummilli lideri Heydər Əliyev ən çətin anlarda xalqının yanında olub. Azərbaycanın sevinci Türkiyənin sevinci, kədəri Türkiyənin kədəridir. Bu mənada ulu öndər Heydər Əliyevin anadan olmasının və Türkiyə Cümhuriyyətinin qurulmasının 100 illiyinin Azərbaycan və Türkiyənin hər yerində qeyd olunması doğmalığın, rəğbətin, həmrəyliyin bariz nümunəsidir. Sonra AzTU-nun Humanitar fənlər kafedrasının müdiri dosent Həbib Mirzəyev, Hacettepe Universitetinin Beynəlxalq əlaqələr şöbəsinin müdiri professor Yonca İldeşin və İqtisadiyyat və idarəetmə fakültəsinin əməkdaşı Özləm Pınar Oran Azərbaycan və Türkiyə əlaqələrinin tarixi ilə bağlı geniş təqdimatla çıxış ediblər. Konfransın bədii hissəsində Azərbaycan Milli Konservatoriyasının tələbələrindən ibarət “Milli Avaz” xorunun ifasında “Çırpınırdın, Qara dəniz” və "Ey əziz anam, Azərbaycan" mahnıları səsləndirilib. Tədbir “Su səsi” rəqs qrupunun çıxışı və tələbələrin ifasında şeir kompozisiyası ilə başa çatıb.

Azərbaycan Texniki Universitetində (AzTU) yerinə yetirilən “Şəhərdaxili hərəkət (mobillik) planının hazırlanması” məsləhət xidmətinin - layihəsinin hesabat konfransı keçirilib. Tədbirdə Nazirlər Kabineti Aparatının Nəqliyyat, kommunikasiya və innovasiya şöbəsinin müdiri Musa Pənahov, Azərbaycan Yerüstü Nəqliyyat Agentliyinin (AYNA) İdarə Heyətinin sədri Anar Rzayev, Təhsilin İnkişafı Fondunun İdarə Heyətinin sədri Elnur Nəsibov, AzTU-nun rektoru Vilayət Vəliyev, müxtəlif qurumların nümayəndələri iştirak edib. Layihə haqqında məlumat verən AzTU-nun rektoru Vilayət Vəliyev  bildirib ki, universitet-sənaye-dövlət tandemində həyata keçirilən ilk layihələrdən olan mobillik planının icrası istiqamətində işlərin görülməsinə 2022-ci ildə başlanılıb. Layihə AzTU-nun Logistika və Nəqliyyat İnstitutunda yerinə yetirilib. 2023-cü ildə ilkin olaraq universitetlə 16 şəhər və rayon (Yevlax şəhər, Şəki şəhər, Göyçay rayon, Ağcabədi rayon, Göygöl rayon, Şəmkir rayon, Naftalan şəhər, Mingəçevir şəhər, Tovuz rayon, Quba rayon, Qusar rayon, Xaçmaz rayon, Lənkəran şəhər, Biləsuvar rayon, Masallı rayon və Şirvan şəhər) icra hakimiyyətləri arasında müqavilə imzalanıb. Müqavilə Dayanıqlı inkişaf məqsədlərinin ardıcıl həyata keçirilməsi üçün Azərbaycan Respublikası Prezidentinin 2018-ci il 27 dekabr tarixli 852 nömrəli Sərəncamı ilə təsdiq edilmiş “Azərbaycan Respublikasında yol hərəkətinin təhlükəsizliyinə dair 2019-2023-cü illər üçün Dövlət Proqramı”nın həyata keçirilməsi üzrə Tədbirlər Planının 7.4.6.1-ci yarımbəndinin icrasını təmin etmək məqsədilə Azərbaycan Respublikası Nazirlər Kabinetinin 2022-ci il 22 yanvar tarixli 25 nömrəli “Şəhərdaxili hərəkət (mobillik) planının hazırlanması” qərarına uyğun işlərin görülməsini nəzərdə tutur. Müqavilələrin icrasına uyğun olaraq tələbələrin də iştirakı ilə əhali arasında sorğular keçirilib. Sorğuların nəticəsi əsasında şəhərdaxili hərəkət (mobillik) planı və müvafiq tədbirlər planı hazırlanıb. Planda piyadalar üçün təhlükəli ərazilərdə piyada keçidlərinin salınması, avtobusların hərəkət rejimlərinin təkmilləşdirilməsi, yeni avtobus marşrutlarının yaradılması, parklanma yerlərinin seçilməsi, velosiped yollarının çəkilməsi kimi məsələlər əksini tapıb. Rektor onu da vurğulayıb ki, mobillik planında qeyd olunan məsələlərin sözügedən ərazilərdə tətbiqi nəticəsində nəqliyyatla bağlı neqativ hallar minimuma endiriləcək. Sonra Təhsilin İnkişafı Fondunun İdarə Heyətinin sədri Elnur Nəsibov və AYNA-nın İdarə Heyətinin sədri Anar Rzayev çıxış edərək sözügedən layihədə universitet-sənaye-dövlət tandeminin iştirakını müsbət dəyərləndiriblər. Qeyd olunub ki, AzTU-nun nəqliyat sahəsində yüksəkixtisaslı kadrlar hazırlayan universitet olaraq bu istiqamətdə həyata keçirilən layihələrə dəstəyi hər zaman hiss olunur. AzTU-nun Logistika və Nəqliyyat İnstitutunun direktoru Fuad Daşdəmirov görülən işlərin hesabatı ilə bağlı geniş təqdimatla çıxış edib. Bildirib ki, AzTU-nun Logistika və Nəqliyyat İnstitutunda yerinə yetirilən layihə üzrə bölgələrdə əhali arasında sorğuların aparılmasına 100-ə yaxın tələbə (77 bakalavr, 22 magistr) və 15 müəllim cəlb olunub. Bundan başqa, Özbəkistan və Türkiyənin mobilliklə bağlı təcrübəsi öyrənilib. Daha sonra Mingəçevir Şəhər İcra Hakimiyyətinin nümayəndəsi Hafiz Yolçuyev təqdim edilən hesabatla bağlı fikirlərini bölüşüb.   Tədbir sual-cavab sessiyası ilə davam edib.  

Türkiyənin Həsən Kalyoncu Universitetinin Biznesin idarə edilməsi kafedrasının professoru Mazlum Çelik “Erasmus+” mübadilə proqramı çərçivəsində Azərbaycan Texniki Universitetində (AzTU) olub. Səfər müddətində o, AzTU-nun İqtisadiyyat və idarəetmə fakültəsi və Beynəlxalq ticarət, logistika və marketinq kafedrasının fəaliyyəti ilə tanış olub. Türkiyəli professor həmçinin İqtisadiyyat və idarəetmə fakültəsinin tələbələrinə mühazirə deyib.

Türkiyənin İstanbul Texniki Universitetinin (İTÜ) 250 illiyi münasibətilə Azərbaycan Texniki Universitetində (AzTU) konfrans keçirilib. Konfransda elm və təhsil nazirinin müavini Həsən Həsənli,  Elm və Ali Təhsil üzrə Dövlət Agentliyinin İdarə Heyətinin sədri Ülkər Səttarova, Azərbaycanın Türkiyədəki səfirliyinin təhsil məsələləri üzrə müşaviri Nəcibə Nəsibova, müxtəlif universitetlərin rektorları, AzTU-nun müəllim-tələbə heyəti iştirak ediblər. Əvvəlcə torpaqlarımızın ərazi bütövlüyü və suverenliyi uğrunda canlarından keçən Vətən övladlarının xatirəsi bir dəqiqəlik sükutla yad olunub. Azərbaycanın və Türkiyənin dövlət himnləri səsləndirilib. Sonra elm və təhsil nazirinin müavini Həsən Həsənli çıxış edib. Bildirib ki, 2023-cü il Azərbaycanda ulu öndər Heydər Əliyevin 100 illik yubileyi münasibətilə “Heydər Əliyev İli” elan olunub. Bu əlamətdar ildə Ali Baş Komandan, Prezident İlham Əliyevin siyasi iradəsi, ordumuzun gücü nəticəsində Azərbaycan öz suverenliyini və ərazi bütövlüyünü tam bərpa etdi. Nazir müavini qeyd edib ki, bu qələbənin təməlində də Ulu Öndərin ideyaları, onun siyasi xətti dayanır. Bu il eyni zamanda Türkiyə Cümhuriyyətinin də 100 illiyi qeyd olunur. Həmçinin Türkiyənin ən qocaman ali təhsil müəssisələrindən olan İTÜ-nün 250 illiyi də 2023-cü ilə təsadüf edib. Bu əlamətdar tarixlərin AzTU-da təntənəli şəkildə qeyd olunması qardaş ölkələr arasında əlaqələrin yüksək səviyyədə inkişaf etdirilməsini bir daha sübut edir. Tədbirdə 2023-cü ildə İTÜ, AzTU və BDU-nun birgə təşkil etdikləri Məzun Günü ilə bağlı video nümayiş etdirilib. Daha sonra AzTU-nun rektoru professor Vilayət Vəliyev və İTÜ-nün rektoru professor İsmayıl Koyuncu çıxış edərək qeyd olunan əlamətdar tarixlərlə bağlı təbriklərini çatdırıblar. Tədbir İTÜ-nün “250-ci il Türk Musiqisi Xoru”nun ifası ilə davam edib.

“Bir Könüllü” Tələbələrin Əməkdaşlığı ictimai birliyinin “Elm və İnnovasiya” proqramının təşkilatçılığı, Təhsilin İnkişafı Fondu və Azərbaycan Texniki Universitetinin (AzTU) dəstəyi ilə “Azərbaycan Tələbələrinin Elm və İnnovasiya Forumu” keçirilib. Tələbələri elm və innovasiyalar istiqamətində davamlı fəaliyyətə cəlb etmək, onların elm sahəsində aparıcı mövqe tutmaqlarına istiqamət vermək, həmçinin elmi araşdırmaların və sərbəst məqalə yazmağın əsaslarını öyrətmək məqsədilə həyata keçirilmiş forumda ali təhsil müəssisələrinin təbiət elmləri ixtisaslarında bakalavriat və magistratura səviyyələrində təhsil alan 80 tələbə iştirak edib. Forum Azərbaycanın Dövlət Himninin səsləndirilməsi, ulu öndər Heydər Əliyevin və torpaqlarımızın ərazi bütövlüyü və suverenliyi uğrunda canlarından keçmiş şəhidlərin əziz xatirəsinin ehtiramla yad edilməsi ilə başlayıb. Təhsilin İnkişafı Fondunun Layihələrin idarə olunması və biznesin inkişafı şöbəsinin əməkdaşı Rəsul Həşimov tələbələri salamlayıb və elm yolunda daim öz üzərində çalışan tələbələrin fəaliyyətinin təqdirə layiq olduğunu qeyd edərək ölkəmizdə tələbələr üçün yaradılan bir çox təhsil imkanlarına əlçatanlıqdan bəhs edib. “Bir Könüllü” Tələbələrin Əməkdaşlığı ictimai birliyinin sədri Leyla Zeynalova forumun elm sahəsindəki gələcək liderləri bir araya toplamaq, həmçinin tələbələri öyrətmək və ilhamlandırmaq məqsədilə təşkil edildiyini vurğulayıb. “Yeni nəsil elmdə səyahət”, “Məqalə yazmaq sənəti”, “İnnovasiya və gələcəyə yönəlik həllər” mözularında keçirilən panel sessiyalarda forum iştirakçılarının sualları cavablandırılıb və maraqlı müzakirələr aparılıb. Qeyd edək ki, forum çərçivəsində elm və innovasiya sahəsindəki geniş spektrdəki tədqiqatları və ideyaları özündə əks etdirən 9 poster təqdimat sərgilənib və spikerlər tərəfindən dəyərləndirilib.

Türkiyənin Həsən Kalyoncu Universitetinin müəllimi Enes Özen "Erasmus+" mübadilə proqramı çərçivəsində Azərbaycan Texniki Universitetində (AzTU) olub. O, səfər müddətində AzTU-nun Mühəndis fizikası və elektronika, Metallurgiya və materiallar texnologiyası, Elektrotexnika kafedralarında və Yeni Materiallar və Nanotexnologiya Elmi-Tədqiqat İnstitutunda görüşlər keçirib. Enes Özen kafedra və institut əməkdaşları üçün pilotsuz uçuş aparatları mövzusunda seminar keçirib.

“ALSTOM Transport Azərbaycan” MMC-nin nümayəndələri şirkətin təşkil edəcəyi növbəti təlimlərlə bağlı məlumat və qaydaları açıqlamaq üçün Azərbaycan Texniki Universitetinin (AzTU) Nəqliyyat və logistika fakültəsinin tələbələri ilə görüşüb. Görüşdə AzTU ilə şirkətin əməkdaşlıq əlaqələri barədə məlumat verilib. Növbəti təlimlərlə bağlı iştirak mərhələləri, təlimlərin tələbələrin karyeralarının inkişafındakı rolu bə digər məsələlər diqqətə çatdırılıb. Görüşün sonunda tələbələri maraqlandıran suallar cavablandırılıb.

Alman Akademik Mübadilə Xidməti (DAAD) tərəfindən Cənubi Qafqazın bir sıra universitetlərinin rektorları və prorektorlarının Almaniyanın bir sıra şəhərlərinə səfəri təşkil olunub. Məqsəd Almaniyanın qabaqcıl universitetləri ilə əlaqələrin genişləndirilməsi və yeni əməkdaşlıqların qurulması olub. Səfərdə Azərbaycan Texniki Universitetini (AzTU) elm və İnnovasiyalar üzrə prorektor professor Sübhan Namazov təmsil edib. Qonaqları Berlin Hökumətinin Əlaqələndirmə Ofisinin rəhbəri və DAAD-nin Cənubi Qafqaz üzrə ölkə sözçüsü Kai Franke salamlayaraq açılış nitqi ilə çıxış edib, həmçinin səfərin perspektiv imkanları barədə müzakirələr aparılıb. Proqram çərçivəsində Almaniyanın müxtəlif şəhərlərindəki universitetlərə (Maqdeburq-Stendal Tətbiqi Elmlər Universiteti, Brandenburg Texniki Universiteti Cottbus-Senftenberg, Jena Tətbiqi Elmlər Universiteti, Zwickau Tətbiqi Elmlər Qərbi Sakson Universiteti) ziyarətlər təşkil olunub. Həmçinin nümayəndə heyəti ilə universitetlərin rektorları və müvafiq rəhbər heyətinin görüşləri keçirilib. Universitetləri ziyarətlər çərçivəsində “Menecment və İnformasiya texnologiyaları” adlı yeni ikili diplom proqramı, “İqlimə uyğunlaşdırılmış torpaqdan istifadə konsepsiyaları”, “Almaniyada davamlı bioiqtisadiyyat”, “Beynəlxalq sahibkarlıq və innovasiya” və digər mövzularda məruzələr dinlənilib. Səfərlər zamanı elm, innovasiya, tədris, ikili diplom proqramları, tələbə-müəllim mübadiləsi, birgə layihələrin yerinə yetirilməsi barədə faydalı müzakirələr aparılıb.

Türkiyənin İstanbul Texniki Universitetinin (İTÜ) rektoru professor İsmayıl Koyuncunun başçılıq etdiyi nümayəndə heyəti ölkəmizə səfəri çərçivəsində Azərbaycan Texniki Universitetinin (AzTU) qonağı olub. Əvvəlcə hər iki universitetin rəhbərliyi və nümayəndələri Fəxri xiyabanda ulu öndər Heydər Əliyevin məzarını ziyarət edib, önünə gül dəstələri düzüblər. Görkəmli oftalmoloq alim, akademik Zərifə xanım Əliyevanın da xatirəsi ehtiramla yad olunub. Daha sonra Şəhidlər xiyabanında torpaqlarımızın ərazi bütövlüyü və suverenliyi uğrunda canlarından keçən Vətən övladlarının məzarı və “Türk Şəhidliyi” abidəsi ziyarət olunub. AzTU-da davam etdirilən görüşdə rektor Vilayət Vəliyev qonaqları universitetdə görməkdən məmnunluğunu ifadə edib. Bildirib ki, AzTU və İTÜ əlaqələri müxtəlif istiqamətlər üzrə inkişaf etdirilir. Rektor deyib ki, AzTU-da yeni yanaşmaların tətbiqi zamanı İTÜ-nün təcrübəsindən istifadə olunur. Yüksək qonaqpərvərliyə görə AzTU rəhbərliyinə təşəkkür edən İTÜ-nün rektoru professor İsmayıl Koyuncu qeyd edib ki, iki universitet arasında əlaqələrin inkişafı Türkiyə və Azərbaycan ali təhsil sisteminin inkişafına töhfə verməkdədir. Görüş zamanı müəllim və tələbə mübadiləsi, müvafiq istiqamətlər üzrə ikili diplom proqramlarına hazırlıqla bağlı məsələlər müzakirə olunub.