Azərbaycan Texniki Universitetinin (AzTU) “AzMobility” komandası 5-8 sentyabr tarixlərində Türkiyənin Antalya şəhərində keçirilən “TEKNOFEST-2024”də “Ağıllı (smart) işıqfor” layihəsi ilə təmsil olunub. “AzMobility” komandasının tərkibinə Logistika və Nəqliyyat İnstitutunun direktoru Fuad Daşdəmirov, institutun əməkdaşları Turan Verdiyev, Ülvi Cavadlı, Röyal Allahverdiyev, AzTU-nun doktorantı Nuru Daşdəmirli daxildir. Komandamız “TEKNOFEST-2024”in “Ağıllı (smart) nəqliyyat” yarışmasında “Universitet və daha yuxarı səviyyə” kateqoriyasında final mərhələsində iştirak edib. Layihənin əsas məqsədi yol ayrıclarında ləngimə vaxtlarının minimuma endirilməsi üçün müasir informasiya texnologiyalarının səmərəli tətbiqidir. Komandanın təqdim etdiyi layihə ANFAŞ Antalya expo mərkəzini ziyarət edən çoxsaylı izləyici tərəfindən maraqla qarşılanıb. “AzMobility” komandası “Ağıllı (smart) nəqliyyat” yarışmasının final mərhələsində rəqabət aparan 19 komandadan biri olub. Bu mərhələdə AzTU-nun “AzMobility” komandası ilə birlikdə ölkəmizi ümumilikdə 3 komanda təmsil edib. Qeyd edək ki, "Ağıllı (smart) nəqliyyat" yarışmasının qalibləri yaxın həftələrdə məlum olacaq. Yarışmanın qaliblərinin mükafatlandırma mərasimi oktyabr ayında Türkiyənin Adana şəhərində keçiriləcək.

6-8 sentyabr tarixlərində Azərbaycan Təhsil İşçiləri Azad Həmkarlar İttifaqı Respublika Komitəsinin təşkilatçılığı ilə “yay məktəbi” təşkil edilib. Xaçmaz rayonunun Nabran qəsəbəsində yerləşən “Təhsil” İstirahət Mərkəzində təşkil edilmiş “yay məktəbi”ndə həmkarlar ittifaqı fəalı olan ali təhsil müəssisələrinin 120 tələbəsi, tələbə həmkarlar ittifaqı komitələrinin sədrləri və media nümayəndələri iştirak edib. Tədbirdə AzTU-nu THİK sədri Mirməhəmməd Ələkbərli və THİK fəalları təmsil edib.   “Yay məktəbi” çərçivəsində sentyabrın 7-də “Sağlam insan və dayanıqlı gələcək” mövzusunda konfrans keçirilib. Tədbiri giriş sözü ilə ATİAHİ Respublika Komitəsinin sədri Araz Paşayev açaraq qeyd edib ki, hər ilin sentyabr ayında həmkarlar ittifaqı fəalı olan tələbələr üçün “yay məktəbi”nin təşkil edilməsi ənənə halını alıb. Builki “yay məktəbi” “Yaşıl dünya naminə həmrəylik ili”nə həsr edilib. Azərbaycan Respublikası Prezidentinin Sərəncamı ilə 2024-cü il ölkəmizdə “Yaşıl dünya naminə həmrəylik ili” elan edilib. Bu il ərzində respublikamızda müxtəlif tədbirlər keçirilməkdədir. Bu tədbirlərin əsas məqsədi ətraf mühitin qorunması, iqlim dəyişmələrinin qarşısının alınması, ətraf mühitin sağlamlaşdırılması, təbii ehtiyatlardan qənaətlə və səmərəli istifadə və bu kimi mövzularda müzakirələrin aparılmasıdır. Həmçinin bu il Azərbaycan Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası – COP29 kimi mötəbər bir tədbirə ev sahibliyi edəcək. Bu tədbirdə də bütün dünyanı narahat edən qlobal ekoloji problemlərin qarşısının alınması ilə bağlı mühüm qərarların qəbul ediləcəyi gözlənilir. A.Paşayev qeyd edib ki, dünyanı narahat edən qlobal ekoloji problemlərin qarşısının alınması istiqamətində fərd olaraq hər birimiz öz vətəndaşlıq vəzifələrimizi məsuliyyətlə yerinə yetirməliyik. Sonra konfransda tələbə həmkarlar ittifaqı komitələrinin sədrləri, həmkarlar ittifaqı fəalı olan tələbələr çıxış edərək mövzu ilə bağlı fikirlərini bölüşüb, təkliflərini veriblər. “Yay məktəbi” çərçivəsində həmçinin tələbələr üçün müxtəlif idman yarışları, intellektual oyunlar təşkil edilib.

Azərbaycan Texniki Universitetinin (AzTU) təşkilatçılığı və DAAD-nin (Alman Akademik Mübadilə Xidməti) “Şərqə Get” proqramı çərçivəsində “Multikultural Şəraitlərdə Mühəndislik Bacarıqlarının İnkişafı” adlı “yay məktəbi”nin tələbələrinin “Bakı Gəmiqayırma Zavodu”na səfəri təşkil edilib. Zavodun Təlim Mərkəzinin təşkil etdiyi səfər çərçivəsində “yay məktəbi”ndə iştirak edən tələbələrə əvvəlcə müəssisənin fəaliyyəti haqqında təqdimatlar və videosüjetlər şəklində ətraflı məlumat verilib. Daha sonra onlar üçün sahə gəzintisi təşkil edilib. Tələbələr Xəzər dənizinin ən müasir tərsanəsində təmir gəmisinin göyərtəsi, kəsim sexi, təmir prosesinə nəzarət sistemləri ilə tanış olub, iş prosesləri barədə məlumat alıblar. Layihənin məqsədinə uyğun olaraq tələbələr üçün Təlim Mərkəzində qaynaq, kəsim və yanğınsöndürmə əməliyyatları nümayiş etdirilib. Həmçinin “yay məktəbi”nin proqramına uyğun olaraq tələbələrin birbaşa iştirakı ilə qeyd edilmiş sahə işləri praktiki icra olunub.    

Azərbaycan Texniki Universitetinin (AzTU) 6 tələbəsi 2024/2025-ci tədris ilinin payız semestrində “Erasmus+ KA171” mübadilə proqramı çərçivəsində xaricdə təhsil alacaq. Belə ki, İnformasiya və telekommunikasiya texnologiyaları fakültəsinin II kurs tələbələri Mir İsmayl Sadıqov və Ziyad Muradov İtaliyanın Roma Sapienza Universitetində, həmin fakültənin III kurs tələbələri Nihad Bəkirli və Hüseyn Murtuzov müvafiq olaraq Türkiyənin İstanbul Gedik Universiteti və Atatürk Universitetində, Maşınqayırma və robototexnika fakültəsinin III kurs tələbəsi Vaqif Haşımov Polşanın Rzeszow Texnologiya Universitetində, Yüksək Təhsil İnstitutunun magistrantı Şükür Alıyev Almaniyanın Brandenburq Texniki Universitetində bir semestrlik təhsil almaq hüququ qazanıblar. AzTU-nun rektoru Vilayət Vəliyev tələbələrlə görüşüb, onlara dərslərində və gələcək fəaliyyətlərində uğurlar arzulayıb.

Azərbaycan Texniki Universiteti (AzTU) və Təhsilin İnkişafı Fondu (TİF) arasında “TələbəPlus” layihəsi çərçivəsində əməkdaşlıq müqaviləsi imzalanıb. İmzalanma mərasimində AzTU və TİF rəhbərliyi, Kapital Bankın nümayəndələri iştirak edib. AzTU rektoru Vilayət Vəliyev “TələbəPlus” kartının tələbələr üçün ən önəmli layihələrdən olacağını bildirib və belə təşəbbüs üçün fonda təşəkkür edib. TİF-in İdarə Heyətinin sədri Elnur Nəsibov layihə üzrə tətbiq edilən güzəşt və endirimlərdən bütün tələbələrin yararlana biləcəyini bildirib. Layihə çərçivəsində ilkin olaraq 150 min tələbə kartının istifadəyə verilməsi planlaşdırılır.

Pakistana səfər çərçivəsində AzTU rektoru Vilayət Vəliyev və beynəlxalq əlaqələr üzrə prorektor Fariz Məmmədov Azərbaycanın Pakistandakı fövqəladə və səlahiyyətli səfiri Xəzər Fərhadovla görüşüblər. Görüşdə səfirliyin və Pakistanın Milli Elm və Texnologiya Universitetinin (NUST) nümayəndələri də iştirak edib. Səfir Xəzər Fərhadov səfirliyin fəaliyyəti, həmçinin qardaş ölkələr Pakistan və Azərbaycanın dostluğu, iqtisadi və humanitar sahələrdə əməkdaşlığı barədə geniş məlumat verib. Eyni zamanda o, bütün sahələrdə olduğu kimi, ali təhsil sahəsində də iki qardaş ölkə arasında əməkdaşlığın genişləndirilməsini, ölkələrin ali təhsil müəssisələrinin tədris və tədqiqat sahəsində birgə fəaliyyətlərinin qarşılıqlı faydalılığı baxımından vacibliyini vurğulayıb. Bu sahədə də səfirliyin hərtərəfli və geniş iş apardığını diqqətə çatdırıb.

AzTU rektoru Vilayət Vəliyev və beynəlxalq əlaqələr üzrə prorektor Fariz Məmmədov Pakistana səfər çərçivəsində Milli Elm və Texnologiya Universitetinin (NUST) Beynəlxalq Biznes Məktəbinin binasında yerləşən Heydər Əliyev adına auditoriyada olublar. Məktəbin müdiri Nauxez Sarvar auditoriyanın açılışı haqqında məlumat verərək Ulu Öndərin fəaliyyətinin Azərbaycanla yanaşı Pakistan üçün də dəyərli olduğunu qeyd edib. Bildirib ki, bu auditoriyanın açılışı Azərbaycan və Pakistan xalqlarının qardaşlığının rəmzi olmaqla bərabər ölkələrimiz arasında təhsil sahəsində əməkdaşlığın inkişaf etdirilməsinin simvoludur. 200 nəfərdən çox tutumu olan amfiteatr tipli, yüksək təqdimat və müzakirə imkanı olan bu təhsil mərkəzi müxtəlif səviyyəli elmi müzakirələr, konfranslar və tədqiqat disskusiyaları aparmaq üçün ideal məkan hesab olunur. Auditoriyanın mütəmadi olaraq elmi tədbirlərin keçirilmə mərkəzi olması ulu öndər Heydər Əliyevin elmə verdiyi töhfə və qoyduğu irsin ölkəmizin hüdudlarından kənarda, xüsusilə Pakistanda hər zaman yad edilməsinin və elm-təhsilə göstərdiyi xüsusi diqqətinin göstəricisidir. Ulu öndər Heydər Əliyevin adını daşıyan auditoriyanın hər zaman elmi müzakirələrin mərkəzində olması, Azərbaycan və Pakistan elmi məktəblərinə və elmi əməkdaşlığına verdiyi töhfəni diqqətdə saxlamaq üçün əhatəli iş planının hazırlanması razılaşdırılıb.

AzTU rektoru Vilayət Vəliyev və beynəlxalq əlaqələr üzrə prorektor Fariz Məmmədov Pakistana səfər çərçivəsində bu ölkənin ən gənc texnoloji ali təhsil müəssisələrindən olan Milli Texnologiya Universitetinin (MTU) rektoru Moazzam Ecaz və professor-müəllim heyəti ilə görüşüblər. Pakistanda peşəyönümlü təlim xidmətləri sahəsində qabaqcıl ali təhsil müssəsisəsi olan MTU-nun bu sahədə zəngin təcrübəsi üzrə təqdimatlarla tanışlıq olub və maddi-texniki bazasına baxış keçirilib. Birgə mövcud peşəyönümlü ixtisaslar üzrə sertifikasiya proqramlarının dərhal icrası, eləcə də bu istiqamətdə sənaye tələbləri əsasında yeni diplom və müxtəlif müddətli sertifikasiya proqramlarının birgə hazırlanması barədə razılığa gəlinib.

Azərbaycan Texniki Universitetinin (AzTU) təşkilatçılığı və DAAD-nin (Alman Akademik Mübadilə Xidməti) “Şərqə Get” proqramı çərçivəsində “Multikultural Şəraitlərdə Mühəndislik Bacarıqlarının İnkişafı” adlı “yay məktəbi” öz işinə başlayıb. “Yay məktəbi” AzTU-nun ev sahibliyi ilə 14 sentyabra kimi davam edəcək. İki həftəlik xüsusi proqram mühəndislik sahəsində biliklərini genişləndirmək və real iş şəraitində praktiki bacarıqlar əldə etmək üçün Azərbaycan və Almaniyadan 18 tələbəni bir araya gətirib. “Yay məktəbi”nə Almaniyanın müxtəlif universitetlərindən 8, AzTU-dan isə 10 tələbə qatılıb. Tələbələr iki həftə ərzində müxtəlif seminarlarda iştirak edəcək, AzTU-nun müasir texnologiyalarla təchiz olunmuş MGP Emalatxana - 3D Printer Mərkəzində 3D (Layihələndir, Düzəlt və İşlət) iş prinsi əsasında müxtəlif layihələr üzərində komanda şəklində işləyəcəklər. “Yay məktəbi”nin fəaliyyəti çərçivəsində tələbələr üçün peşəkar təlimçilərin iştirakı ilə müxtəlif mövzularda təlimlər, Azərbaycanı daha yaxından tanımaq üçün səfərlər və mədəni turlar təşkil ediləcək.  Bu proqram tələbələrə mültikultural mühitlərdə ilk iş təcrübələrini formalaşdırmaqla yanaşı, yeni perspektivlər qazanmaq və beynəlxalq dostluqlar qurmaq üçün fürsət təqdim edir.

26-26 avqust  2024-cü ildə Niderland Krallığının paytaxtı Amsterdam şəhərində İn­for­ma­­siya Texnologiyaları, Robototexnika, Dizayn, Mühəndislik və Tətbiqi Elmdə Yeni Trendlər üzrə 6-cı Beynəlxalq Konfransı  (6th International Conference on Emerging Trends in Information Technology, Robotics , Design, Engineering and Applied Scien­ce (ETITR-AUG-2024)) keçirilib. Bu konfrans tədqiqatçılara yeni ideyalar və tətbiq təcrübələri mübadiləsi, biz­nes və ya tədqiqat əlaqələri qurmaq və gələcək əməkdaşlıq üçün qlobal tərəfdaşlar tap­maq imkanı verir. Bu ümumi platformanın cəmiyyətə daha yaxşı xidmət etmək üçün müxtəlif sahələr arasında birgə sahibkarlıq fəaliyyətinə zəmin yaradacağı göz­lə­nilir. Maşınqayırma texnologiyası kafedrasının doktorantı Samir Əmirli 26 avqust 2024-cü ildə Amster­dam şəhərində bu konfransda “S.Simon, N.Yusubov, S.Amirli, F.Ami­rov.  Hidroabrazivlə HARDOX-500 markalı poladın kəsilməsində kələ-kötür­lüyün tədqiqi üçün tam faktorlu eksperimentlərin planlaşdırılması (“Planning of full Factorial Experiments For The Investigation Of Roughness In Hydroabrasive Waterjet Cutting of HARDOX-500 Steel”)” adlı məruzə ilə çıxış edib. Məruzə maraqla qarşılanıb və seçilmiş konfrans məqaləsi kimi çap üçün Scopus xülasələn­dir­mə və indeksləmə sisteminə düşən jurnalda çap üçün tövsiyə olunub. Qeyd edək ki, dərc ediləcək konfrans materiallar eyni zamanda xülsələndirmək və indeksləşdirmək üçün ISI Thomson Reuters Web of Science-a təqdim olunacaq.