Azərbaycan Texniki Universitetinin (AzTU) əməkdaşlarının respublikanın şəhər və rayonlarında texniki yönümlü ixtisaslara marağı olan XI sinif şagirdləri ilə yaxından tanışlıq məqsədilə sonuncu görüşü keçirilib. Bakının Nizami, Sabunçu, Xətai, Suraxanı, Xəzər və Pirallahı rayonlarının ümumtəhsil müəssisələrində təhsil alan XI sinif şagirdləri ilə onlayn təşkil edilən görüşlərdə məktəblərin rəhbərliyi, şagirdlərin müəllimləri və valideynləri iştirak edib.Əvvəlcə AzTU-nun tanıtım videoçarxı nümayiş olunub. Daha sonra AzTU əməkdaşları universitetdə görülən işlər, həyata keçirilən yeniliklər barədə təqdimatla çıxış ediblər. Universitetin tarixi, fakültələri, ixtisasları, beynəlxalq əlaqələri, ikili diplom proqramları, laboratoriyaları, karyera imkanları və digər vacib məlumatlar slaydlar vasitəsilə məktəblilərin diqqətinə çatdırılıb.Məktəb direktorları və müəllimlər AzTU ilə əməkdaşlıqdan məmnunluqlarını ifadə edib, həmçinin universitetin ətraflı təqdimatına görə təşəkkürlərini bildiriblər.Sonda şagirdlərin və valideynlərin sualları cavablandırılıb.     

Avropa İttifaqının maliyyə dəstəyi ilə həyata keçirilən Azərbaycan Texniki Universitetinin (AzTU) tərəfdaşı olduğu "Erasmus+" KA2 proqramı çərçivəsində “Azərbaycanda Rektorlar konfransının yaradılması” (ECAR) layihəsi üzrə Polşa Rektorlar Konfransı təcrübəsi öyrənilir. Layihə çərçivəsində Polşaya bir həfətəlik səfər təşkil edilib. AzTU-nun elm və innovasiya üzrə prorektoru Sübhan Namazov və rektorun beynəlxalaq əlaqələr üzrə müşaviri Fariz Məmmədov səfərdə iştirak edir. Səfər çərçivəsində ilk görüş Varşava İqtisadiyyat Məktəbində keçirilib. Görüşdə Azərbaycan Respublikası təhsil nazirinin müşaviri, layihə konsorsiumunun üzvü olan Azərbaycan universitetlərinin rektorları və digər səlahiyyətli nümayəndələri, eləcə də Macarıstan Rektorlar Konfransının nümayəndələri iştirak ediblər. Tədbiri giriş sözü ilə açan Varşava İqtisadiyyat Məktəbinin rektoru Piotr Wachowiak qonaqları salamlayıb və universitet haqqında geniş təqdimatla çıxış edib. Rektor Polşa Rektorlar Konfransına üzv olmağın universitet üçün əhəmiyyətindən danışıb. Polşa Rektorlar Konfransının prezidenti Arkadiusz Mezyk Azərbaycan nümayəndə heyətini salamlayıb və əməkdaşlıqdan məmnunluğunu ifadə edib. O, konfransın hüquqi forması, statusu, daxili idarəetməsi, əsas fəaliyyət istiqamətləri, qərarvermə prosesi, daimi heyəti, o cümlədən konfransın katibliyinin vəzifələri haqqında toplantı iştirakçılarına ətraflı məlumat verib. Arkadiusz Mezyk konfransın yarandığı gündən indiyə qədər Polşa ali təhsil sisteminə verdiyi töhfələrdən, keyfiyyətin yüksəldilməsi istiqamətində irəli sürülən təkliflərdən və əldə etdikləri uğurlardan da bəhs edib. Daha sonra Almaniya Rektorlar Konfransının Mərkəzi və Şərqi Avropa, Şərqi Asiya departamentinin rəhbəri Rudolf Smolarczyk Rektorlar Konfransının ali təhsil müəssisələrinin beynəlxalq əməkdaşlığının genişləndirilməsi, eləcə də ölkədə universitetlərin koordinasiyalı fəaliyyət göstərməsi baxımından vacibliyini vurğulayıb. Rudolf Smolarczyk, həmçinin Polşa və Almaniya Rektorlar Konfransının təhsil siyasəti və müxtəlif inkişaf istiqamətlərinin müzakirəsi üzrə müntəzəm əməkdaşlıq etdiklərini qeyd edib. Sonra toplantı iştirakçıları və Rektorlar Konfranslarının nümayənədləri arasında suallar əsasında faydalı müzakirələr aparılıb.      

Çexiyanın Liberec Texniki Universitetinin Maşınqayırma fakültəsinin Elektrik avadanlıqları kafedrasının professoru Karel Frana “Erasmus+” KA1 proqramı çərçivəsində Azərbaycan Texniki Universitetinə (AzTU) səfər edib. Səfər çərçivəsində Karel Frana AzTU-nun rektoru Vilayət Vəliyevlə görüşüb. Görüşdə universitetlərarası əməkdaşlığın mühüm nəticələri qeyd olunub. Universitetlər arasında imzalanmış müqaviləyə uyğun olaraq enerji və maşınqayırma sahələrində yeni əməkdaşlıq istiqamətləri barədə fikir mübadiləsi aparılıb, birgə elmi-tədqiqatların aparılmasının vacibliyi qeyd olunub. Bildirilib ki, yaxın zamanda iki universitet arasında yeni əməkdaşlıq istiqamətləri ilə bağlı təkliflər hazırlanılacaq. Qeyd edək ki, professor Frananın AzTU-ya səfəri çərçivəsində Maşınqayırma və robototexnika, həmçinin Metallurgiya və materialşünaslıq fakültələrinin professor və müəllim heyəti ilə də görüşləri nəzərdə tutulub.  

 Azərbaycan Texniki Universitetinin (AzTU) Vətən müharibəsində şəhidlik zirvəsinə ucalan məzunları - Kamran İsgəndərli və Cavid Bayramovun doğum günüdür. Kamran İsgəndərli 1997-ci il iyunun 29-da Cəlilabad rayonunda anadan olub. N. Gəncəvi adına 1 saylı məktəbdə orta təhsil alıb. 2015-2019-cu illərdə AzTU-da İnformasiya və telekommunikasiya texnologiyaları fakültəsinin Elektronika, telekommunikasiya və radiotexnika mühəndisliyi ixtisasına yiyələnib. 2020-ci il sentyabrın 27-də başlanan Vətən müharibəsi zamanı könüllü olaraq Füzulinin azadlığı uğrunda gedən döyüşlərdə vuruşub. 21 oktyabr 2020-ci ildə Füzuli rayonu istiqamətində düşmən üzərinə hücuma keçərkən şəhid olub.  Ölümündən sonra "Vətən uğrunda" və "Füzulinin azad olunmasına görə" medalları ilə təltif olunub. Cavid Bayramov 1997-ci il iyunun 29-da Bakıda anadan olub. Orta təhsilini Bakı şəhər 93 saylı məktəbdə alıb.  2014-2018-ci illərdə AzTU-da Nəqliyyat və logistika fakültəsinin Yerüstü nəqliyyat vasitələrinin mühəndisliyi ixtisasına yiyələnib. Vətən müharibəsi zamanı könüllü olaraq döyüşlərə qatılan Cavid Bayramov 2020-ci ilin oktyabrın 8-də Füzuli rayonu uğrunda gedən döyüşlərdə şəhid olub. Ölümündən sonra ''Vətən uğurunda'' və ''Cəbrayılın azad olunmasına görə'' medalları ilə təltif olunub.  Allah bütün şəhidlərimizə rəhmət eləsin! Şəhidlərimizin ruhu qarşısında baş əyirik!

Azərbaycan Texniki Universitetinin (AzTU) tərəfdaşı olduğu ERASMUS+KA2 proqramı çərçivəsində həyata keçirilən UniClad layihəsi üzrə hazırlanan “Yem kalkulyatoru” mobil tətbiqi Aqrar İnnovasiya Festivalında təqdim olunub. "Ağstafa Aqrar Sənaye Kompleksi”ndə  Aqrar İnnovasiya Mərkəzinin təşkilatçılığı ilə bölgələrdə aqrar innovasiyaların təbliğatı işi çərçivəsində təşkil olunan tədbirdə layihənin müəllifi, AzTU-nun Mühəndis riyaziyyatı və süni intelekt kafedrasının baş müəllimi Natiq Qurbanov iştirak edib. “Yem kalkulayatoru” mobil tətbiqi “İnnovasiya və dayanıqlılıq prinsipləri ilə klasterlərin işlənməsinə başlamaqda və iştirakda  universitetlərin potensialının artırılması” layihəsi  (UniClaD) çərçivəsində pilot olaraq hazırlanıb. Hazırda ərazilər üzrə hava məlumatı, yemlərin qidalılığı kimi məlumatların yerləşdirildiyi mobil tətbiqin gələcəkdə funksiyalarının daha da genişləndirilməsi ilə fermerlərə real vaxtda məlumat ötürmə və maarifləndirmə  vasitəsi kimi istifadə olunması nəzərdə tutulur. 

Azərbaycan Texniki Universitetinin (AzTU) tərəfdaşı olduğu Erasmus+ KA2 proqramı çərçivəsində həyata keçirilən “Azərbaycanda Rektorlar konfransının yaradılması” (ECAR) layihəsi üzrə hazırlanan nizamnamə rektorların müzakirəsinə təqdim edilib.Azərbaycan Respublikasının Təhsil nazirinin müavini İdris İsayevin rəhbərliyi və layihənin koordinatoru Bakı Biznes Universitetinin təşkilatçılığı ilə keçirilən görüşdə AzTU-nu rektor Vilayət Vəliyev və Elm və İnnovasiya üzrə prorektor Sübhan Namazov təmsil edib.Əvvəlcə layihənin koordinatoru Gülşən Bayramova Azərbaycanda Rektorlar konfransının icra vəziyyəti haqqında təqdimatla çıxış edib. Hazırlanmış nizamnamənin layihəsi müzakirə edilib, tərəfdaş universitetlərin rektor və prorektorlarının təklif və tövsiyələri dinlənilib.  Daha sonra layihə çərçivəsində növbəti mərhələdə görüləcək işlər və müxtəlif Avropa ölkələrinin Rektorlar konfranslarının müsbət təcrübələrinin öyrənilməsi ilə bağlı geniş müzakirələr aparılıb.     

Azərbaycan Texniki Universitetinə (AzTU) elmlər doktoru proqramı üzrə hazırlığa sənədlərin qəbulu davam edirQəbul 31.08.2022-ci il, saat 23:59-dək portal.edu.az və atis.edu.az sistemləri üzrə davam edəcək.Həmin tarixədək müraciət edən fəlsəfə doktoru elmi dərəcəsi olan iddiaçıların göstərilən linklər üzərindən qeydiyyatı aparılacaq.

Azərbaycan Texniki Universitetinin (AzTU) rektoru Vilayət Vəliyev universitetin basketbol komandası ilə görüş keçirib.Rektor ölkədə basketbolun inkişafı istiqamətində həyata keçirilən tədbirlərdən danışıb. Bildirib ki, AzTU-nun basketbol komandasının respublika və beynəlxalq miqyaslı yarışlara hazırlaşmalarını təmin etmək prioritet istiqamətlərdəndir.Görüşdə komandanın fəaliyyəti ilə bağlı görülən işlər barədə məlumat verilib,  perspektiv inkişaf ilə bağlı idmançı və məşqşilərin təklifləri dinlənilib. Rektor qeyd olunan məsələlərlə əlaqədar müvafiq tapşırıqlar verib və belə görüşlərin mütəmadi keçiriləcəyini diqqətə çatdırıb.     

Azərbaycan Texniki Universitetinin (AzTU) Elmi şurasının növbəti iclası keçirilib.İclasda AzTU-nun sosial tədbirlərində fəallıq göstərən tələbələrin mükafatlandırılması ilə bağlı qərar qəbul olunub. Bundan başqa, AzTU-nun Keyfiyyətin Təminatı və Öyrənmə-Öyrətmə Mərkəzinin əsasnaməsi də müzakirələrdən sonra təsdiq olunub.Həmçinin yeni tədris ilində universitetdə tədrisin keyfiyyətinin yüksəldilməsi istiqamətində tətbiq olunacaq innovativ yeniliklərlə bağlı fikir mübadiləsi aparılıb.İclas cari məsələlərin müzakirəsi ilə davam edib.

Yeni Azərbaycan Partiyası (YAP) Yasamal rayon təşkilatı və Azərbaycan Texniki Universitetinin (AzTU) birgə təşkilatçılığı ilə 26 iyun BMT-nin Ümumdünya Narkotiklər Əleyhinə Mübarizə Günü ilə əlaqədar “Gənclər sağlam həyat tərzini seçir” adlı fləşmob keçirilib. Fləşmobda iştirak edən AzTU tələbələri xüsusi plakatlar vasitəsilə “Gənclər sağlam həyat tərzini seçir”, “Biz narkomaniyaya yox deyirik!” adlı şüarlar yaradıb. Qeyd edək ki, fləşmob YAP Mərkəzi Aparatı, “Azərbaycan Televiziya və Radio Verlişləri” QSC və Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının daimi fəaliyyət göstərən işçi qrupu arasında imzalanana tədbirlər planına uyğun olaraq keçirilib.