Avropa Birliyinin maliyyələşdirdiyi Erasmus+ proqramı çərçivəsində “İnnovasiya və dayanıqlılıq prinsipləri ilə klasterlərin işlənməsinə başlamaqda və iştirakda universitetlərin potensialının artırılması” layihəsi (UniClaD) üzrə tərəfdaşların iştirakı ilə növbəti onlayn görüş keçirilib. Görüşdə Azərbaycan Texniki Universitetinin (AzTU) beynəlxalq əlaqələr üzrə prorektoru Sübhan Namazov, Xarici əlaqələr şöbəsinin müdiri Orxan Vətənxah, layihələr və mübadilə proqramları üzrə baş mütəxəssis Mətanət Paşayeva, layihə çərçivəsində birgə əməkdaşlıq qurulan Aqrar İnnovasiya Mərkəzinin direktoru Əkbər Abbasov, direktor müavini Anar Cəfərov və Texnoloji transfer və innovasiya şöbəsinin müdiri Emin Nəsibli iştirak edib.  Görüş zamanı layihə çərçivəsində yaradılan Bilik Mərkəzlərinin fəaliyyətinin təşkili və pilot layihələrin icra edilməsi ilə bağlı tələblər müəyyənləşib. Pandemiya şəraitində səyahət məhdudiyyətləri nəzərə alınmaqla birgə tələbə mobilliyi və konfransların keçirilməsi, eyni zamanda öyrədici səfərlərin təşkili ilə bağlı məsələlər də müzakirə edilib. İlk səfərin oktyabrda Kiyev şəhərində keçirilməsi planlaşdırılıb. Layihə çərçivəsində növbəti görüşün sentyabrın sonunda keçirilməsi qərara alınıb.

Azərbaycan Texniki Univeristetinin (AzTU) tərəfdaşı olduğu Erasmus+ KA2 proqramı çərçivəsində yerinə yetirilən “Rusiya Federasiyası, Qazaxıstan və Azərbaycanda səhiyyədə strateji keyfiyyət menecmenti, risklərin idarə olunması üzrə açıq və distant təhsil formatında peşə bakalavrı, peşə magistr hazırlığı” (LMQS) layihəsi üzrə təlimlərə start verilib. Təlimlər layihənin koordinatoru Qərbi Attika Universitetinin  təşkilatçılığı ilə Yunanıstanın Afina şəhərində keçirilir.  Tədbirdə AzTU-nu Beynəlxalq əlaqələr üzrə prorektor Sübhan Namazov, rektorun müşaviri Fariz Məmmədov və layihənin əlaqələndiricisi, professor Həsən Hüseynov təmsil edir. Təlimdə Azərbaycanda menecment (səhiyyə xidmətlərində keyfiyyətin idarə olunması) ixtisaslaşması üzrə yeni magistr proqramının yaradılması ilə bağlı Avropa təcrübəsi öyrənilir. Eyni zamanda, bu sahədə müasir təcrübənin ölkəmizdə tətbiqi üçün Avropada səhiyyə xidmətlərinin keyfiyyətinə nəzarət, onun qiymətləndirilməsi, sertifikatlaşdırılması və səmərəliliyinin müəyyən edilməsi metodlarının öyrənilməsi və tədris prosesində tətbiqi istiqamətində müzakirələr aparılır. Təlim və müzakirələrdə Azərbaycandan layihənin tərəfdaş universitetləri olan İ.M.Seçenov adına Birinci Moskva Dövlət Tibb Universitetinin Bakı filialı və Naxçıvan Dövlət Universitetinin nümayəndələri də iştirak edirlər.

Azərbaycan Texniki Universitetinin (AzTU) tərəfdaşı olduğu ERASMUS+ proqramı çərçivəsində maliyyələşdirilən “Azərbaycanda Rektorlar Konfransının yaradılması” layihəsi üzrə 1-ci komponentin fəaliyyətinin nəticələrinə dair onlayn görüş keçirilib.    Layihə üzrə 1-ci komponentin rəhbəri, Mykolas Romeris Universitetinin nümayəndəsi Inga Juknytė Petreikienė müxtəlif kateqoriyalara aid hədəf qrupları üzrə keçirilən sorğuların hazırkı nəticələrinin qarşıya qoyulan sayı ilə müqayisədə çatışmazlıqları barədə məlumat verib. Müzakirələrdən sonra toplanılması nəzərdə tutulan məlumatların keyfiyyətinin artırılması üçün bəzi kateqoriyadan olan sorğuların yenidən keçirilməsi qərara alınıb. Həmçinin nəzərdə tutulan sorğu sayına nail olmaq üçün sorğuların keçirilmə vaxtının iyul ayının sonuna kimi uzadılması tövsiyyə edilib. Daha sonra sorğuların nəticələri üzrə kəmiyyət və keyfiyyət təhlillərinin, eyni zamanda açıq sualların ingilis dilinə tərcümələrinin həyata keçirilməsi layihənin tərəfdaşları arasında bölüşdürülüb. Bundan başqa, sentyabr ayında başlanılması nəzərdə tutulan fokus qrupları üzrə müsahibələrin keçirilməsinə hazırlıq üçün müzakirələr aparılıb və müvafiq tədbirlər planı müəyyən edilib.  Görüşdə Avropa tərəfdaşları arasında rektorlar konfransının fəaliyyəti ilə bağlı mövcud təcrübənin öyrənilməsi üzrə aparılan sorğular və hüquqi təhlillərin icrası istiqamətində işlərin gedişatı barədə də məlumat verilib. Bu sahədə aparılan sorğuların vaxtının da iyul ayının sonuna kimi uzadılması qərara alınıb.

Avropa İttifaqının maliyyə dəstəyi ilə həyata keçirilən Azərbaycan Texniki Universitetinin (AzTU) tərəfdaş olduğu ERASMUS+ KA2 proqramı çərçivəsində “Azərbaycanda Rektorlar konfransının yaradılması” (ECAR) layihəsi üzrə məlumatlandırma sessiyası keçirilib. Məlumatlandırma sessiyasında AzTU-nun Beynəlxalq əlaqələr üzrə prorektoru, Tədris işləri üzrə prorektoru, Elm və innovasiyalar üzrə prorektoru, Sosial məsələlər və ictimaiyyətlə əlaqələr üzrə prorektoru, fakültə dekanları, tədris hissəsinin və digər şöbələrin əməkdaşları iştirak edib. Tədbirə layihə üzrə koordinator Gülşən Bayramova da qatılıb.   Məlumatlandırma sessiyasında çıxış edən Beynəlxalq əlaqələr üzrə prorektor Sübhan Namazov layihənin əhəmiyyətindən, ali təhsil qurumları arasında əməkdaşlıq və şəbəkə platforması rolunu oynayacaq Rektorlar Konfransının qurulması mexanzmindən və Azərbaycanda ali təhsilin inkişafına verə biləcəyi tövfələrindən bəhs edib. Tədris işləri üzrə prorektor Nurəli Yusifbəyli Rektorlar Konfransı üzrə Avropa təcrübəsinin Azərbaycanda tətbiqini ali təhsil sahəsinə fayda gətirəcək layihə kimi qiymətləndirib. O, Azərbaycanda belə bir platformanın olmasının zəruriliyini bildirib. Elm və innovasiyalar üzrə prorektor Çətin Elmas və Sosial məsələlər və ictimaiyyətlə əlaqələr üzrə prorektor Kamran Rəsulov layihənin uğurla həyata keçirilməsi üçün təklif və tövsiyələrini qeyd edib. Daha sonra Xarici əlaqələr şöbəsinin layihələr və mübadilə proqramları üzrə baş mütəxəssisi Mətanət Paşayeva layihənin tərəfdaşları, komponentləri, onun nəticələri və uzunmüddətli baxışda təsirləri haqqında ətraflı təqdimatla çıxış edib. Xarici əlaqələr şöbəsinin müdiri Orxan Vətənxah layihə çərçivəsində görülən işlər barədə məlumat verib. Məlumatlandırma sessiyasında layihənin fəaliyyətinin səmərəli qurulması istiqamətində tövsiyyə və təkliflər təqdim edilib.   

Azərbaycan Texniki Universitetinin (AzTU) tərəfdaşı olduğu ERASMUS+KA2 proqramı çərçivəsində həyata keçirilən UniClad layihəsi üzrə hazırlanan “Yem kalkulyatoru” mobil tətbiqi Aqrar İnnovasiya Festivalında təqdim olunub. "Ağstafa Aqrar Sənaye Kompleksi”ndə  Aqrar İnnovasiya Mərkəzinin təşkilatçılığı ilə bölgələrdə aqrar innovasiyaların təbliğatı işi çərçivəsində təşkil olunan tədbirdə layihənin müəllifi, AzTU-nun Mühəndis riyaziyyatı və süni intelekt kafedrasının baş müəllimi Natiq Qurbanov iştirak edib. “Yem kalkulayatoru” mobil tətbiqi “İnnovasiya və dayanıqlılıq prinsipləri ilə klasterlərin işlənməsinə başlamaqda və iştirakda  universitetlərin potensialının artırılması” layihəsi  (UniClaD) çərçivəsində pilot olaraq hazırlanıb. Hazırda ərazilər üzrə hava məlumatı, yemlərin qidalılığı kimi məlumatların yerləşdirildiyi mobil tətbiqin gələcəkdə funksiyalarının daha da genişləndirilməsi ilə fermerlərə real vaxtda məlumat ötürmə və maarifləndirmə  vasitəsi kimi istifadə olunması nəzərdə tutulur.

Nəqliyyat və logistika fakültəsinin IV kurs tələbələrinin iştirakı ilə Avropa Birliyinin maliyyələşdirdiyi Erasmus +KA2 proqramı üzrə yerinə yetirilən “Nəqliyyat xidmətlərində risk və böhran mühəndisliyi” layihəsi çərçivəsində Azərbaycan Texniki Universitetində (AzTU) icra edilən magistr proqramı üzrə məlumatlandırma sessiyası keçirilib. Sessiyada çıxış edən layihənin koordinatoru, AzTU-nun Beynəlxalq əlaqələr üzrə prorektoru Subhan Namazov sözügedən magistr proqramının Avropa təhsil sisteminə uyğun təşkil olunduğunu bildirib. Qeyd edib ki, magistr proqramı Avropada təşkil olunan oxşar ixtisaslarla rəqabətli ixtisas olub, gələcəkdə bu ixtisas üzrə ikili  diplomların yerinə yetirilməsi nəzərdə tutulur.   Layihə üzrə AzTU-da yaradılan “Xidmət Ofisi”nin rəhbəri Fuad Daşdəmirov magistr proqramı haqqında təqdimatla çıxış edib. Təqdimatda proqram üzrə ümumi məlumat, onun rəqabət xüsusiyyətləri, tədris olunacaq fənnlər və burada öyrədiləcək ixtisas bilikləri ətraflı izah edilib.      

Avropa Birliyinin maliyyələşdirdiyi ERASMUS+KA2 proqramı üzrə həyata keçirilən “Nəqliyyat xidmətləri üçün risk və böhran mühəndisliyi” (CRENG) layihəsi çərçivəsində Azərbaycan Texniki Universitetində (AzTU) yaradılan “Nəqliyyat xidmətləri üçün risk və böhran mühəndisliyi” magistr proqramı ilə tədris müvəffəqiyyətlə yerinə yetirlir. 2020-2021-ci tədris ilində sözügedən magist proqramı üzrə 5 ixtisas fənninin tədrisi uğurla başa çatdırılıb. Layihə çərçivəsində növbəti tədris ilində keçirilməsi nəzərdə tutulan digər 8 fənn üzrə tədris materialları hazılanıb və müvafiq ixtisas kafedralarında müzakirə edilərək qəbul edilib. Layihəyə uyğun olaraqnəqliyyat sistemlərində risk və böhran mühəndisliyi, həmçinin risk vəziyyətlərində kompleks nəqliyyat prosesi və sistemlərinin simulyasiyası fənnləri üzrə öyrənmə üsulu uğurla tətbiq edilib. Eyni zamanda tələbələrə öyrəndikləri biliklərin tətbiqi imkanı yaradılıb, onlara müvafiq məsləhətlər verilib. Məlumat üçün qeyd edək ki, yeni magistr proqramı üzrə 13 ixtisas fənninin tədrisi nəzərdə tutulur. İxtisas fənnlərinin tədrisinə AzTU-nun 4 kafedrasının müəllimləri cəlb edilib.   

Avropa İttifaqının maliyyə dəstəyi ilə həyata keçirilən “Erasmus+ KA2” proqramı çərçivəsində “Azərbacanda Rektorlar Konfransının yaradılması” (ECAR) layihəsi üzrə növbəti onlayn görüş keçirilib. Tədbirdə Litva, Fransa, İsveç və Polşadan olan tərəfdaşlarla yanaşı, 15 yerli tərəfdaşın nümayəndələri də iştirak edib. Görüş zamanı layihə çərçivəsində yerli tərəfdaş universitetlərin iştirakı ilə müxtəlif hədəf qruplarını əhatə edəcək sorğuların keçirilməsi planlaşdırılıb. Sorğularda yerli universitetlərin rəhbər və  akademik heyətləri, tələbə və məzunları ilə yanaşı, sənaye müəssisələrindən nümayəndələrin də iştirakı nəzərdə tutulub. Görüşdə eləcə də tərəfdaşların iş bölgüsü, yerinə yetiriləcək tapşırıqlar üçün son tarixlərin müəyyənləşdirilməsi və müvafiq sənədlərin hazırlanma qaydalarının müzakirəsi aparılıb.  

Avropa Birliyinin maliyyələşdirdiyi Erasmus+ KA2 proqramının “İnnovasiya və dayanıqlılıq prinsipləri ilə klasterlərin işlənməsinə başlamaqda və iştirakda  universitetlərin potensialının artırılması” (UniClaD) layihəsi çərçivəsində idarəetmə heyətinin görüşü keçirilib. Görüşdə cari və gələcəkdə icra olunacaq məsələlər, həmçinin qarşıdan gələn 3 aylıq və aralıq hesabatlılıq üzrə öhdəliklər müzakirə edilib, müvafiq tapşırıqlar verilib.  Qeyd olunub ki, layihə çərçivəsində Azərbaycan Texniki Universitetinin (AzTU) Elmi Şuranın qərarı ilə İnnovativ Texnologiyalar Mərkəzi yaradılıb. Mərkəzin fəaliyyəti üçün zəruri avadanlıqlar alınaraq universitetə çatdırılıb və hüquqi sənədlər hazırlanılıb. Mərkəzin fəaliyyətinin təmin olunması məqsədilə yol xəritəsi tərtib olunub və bu istiqamətdə fəaliyyətlərin təşkili  davam etdirilir. 

Azərbaycan Texniki Universitetinin (AzTU) Elmi şurasının növbəti onlayn iclası keçirilib. İclasda rektor Vilayət Vəliyev ötən həftə Türkiyənin Qazi Universiteti ilə imzalanan ikili diplom proqramı haqqında müqavilənin detalları barədə şura üzvlərinə məlumat verib. Rektor may ayında Ukraynaya etdiyi işgüzar səfər və bu ölkənin aparıcı ali təhsil müəssisələri ilə imzalanan müqavilələr haqqında məlumatı da iclas iştirakçılarının diqqətinə çatdırıb. Qeyd edib ki, imzalanan əməkdaşlıq və ikili diplom proqramı haqqında müqavilələrə əsasən, AzTU-da Qazi Universitetinin və Ukrayna ali təhsil müəssisələrinin təcrübələrindən istifadə olunacaq. İclasın gündəliyinə uyğun olaraq 2020-2021-ci il yaz semestrinin imtahan sessiyasına hazırlıqla bağlı məlumat, həmçinin Xüsusi texnika və texnologiya fakültəsinin fəaliyyəti haqqında hesabat dinlənilib. Bundan başqa, Vətən müharibəsində iştirak edən tələbələrə yekun dövlət attestasiyasında güzəşt edilməsi ilə bağlı qərar da yekdilliklə qəbul edilib. İclasda AzTU-nun da tərəfdaş olduğu Erasmus+KA2 proqramının “İnnovasiya və dayanıqlılıq prinsipləri ilə klasterlərin işlənməsinə başlamaqda və iştirakda universitetlərin potensialının artırılması” (UniClaD) layihəsi çərçivəsində universitetdə İnnovativ Texnologiyalar Mərkəzi adlı bilik mərkəzinin yaradılması qərara alınıb. Qeyd olunub ki, UniClaD layihəsi 2020-2023-cü illəri əhatə edir. Məqsəd 9 ölkənin partnyor universitetlərinin Avropanın klaster təcrübəsini öyrənməsi, eyni zamanda universitet-sənaye işbirliyinin gücləndirilməsidir.