Noyabrın 25-də Türkiyənin TED Universitetinin rektoru İhsan Sabuncuoğlunun “Ali təhsildə dəyişikliklər: yeni tendensiya və tətbiqlər” mövzusunda seminarı keçirilib. Seminar Təhsilin İnkişafı Fondunun təşəbbüsü, Azərbaycan Texniki Universitetinin (AzTU) təşkilati dəstəyi ilə baş tutub. AzTU-nun rektoru Vilayət Vəliyev qonaqları salamlayaraq seminar çərçivəsində “Universitet-sənaye əməkdaşlığı”, “Müəllim-tələbə münasibətləri”, “Tədrisin keyfiyyəti və tədqiqatların sənayeyə tətbiqi”, eləcə də “Gələcəyin universitetləri necə olacaq?” mövzularına toxunulacağından bəhs edib. Daha sonra Təhsilin İnkişafı Fondunun İdarə Heyətinin sədri Elnur Nəsibov Fondun əsas məqsəd və fəaliyyət istiqamətləri haqqında tədbir iştirakçılarına ətraflı məlumat verib. Seminar İhsan Sabuncuoğlunun təqdimatı əsasında davam etdirilib.Təqdimatın birinci hissəsində rektor “Ali təhsildə qlobal trendlər və tətbiqlər” mövzusunda çıxış edib. İkinci hissədə isə “Azərbaycanda ali təhsil və universitet-sənaye əməkdaşlığı” adlı tədqiqat mövzusundan danışılıb.Tədbirin sonunda iştirakçıların sualları cavablandırılıb və interaktiv müzakirələr aparılıb.

Azərbaycan Texniki Universitetinin (AzTU) birinci kurs tələbəsi Raul Qasımzadə Yunanıstanın Afina şəhərində keçirilən uşu-kunq fu üzrə Avropa çempionatınının yeniyetmələr arasında sanda yarışlarında 56 kq çəki dərəcəsində ölkəmizi təmsil edib. O, bütün rəqiblərinə qalib gələrək qızıl medala layiq görülüb və Avropa çempionu adını qazanıb. Qeyd edək ki, Raul Qasımzadə AzTU-nun Energetika və avtomatika fakültəsinin proseslərin avtomatlaşdırılması mühəndisliyi ixtisası üzrə təhsil alır. AzTU-nun rektoru Vilayət Vəliyev Raul Qasımzadəni qəbul edib və onu qazandığı qələbə münasibətilə təbrik edib. Gələcək yarışlarda Raul Qasımzadəyə uğurlar arzu edən rektor onu fəxri fərmanla təltif edib. Raul Qasımzadə göstərdiyi diqqətə görə rektora təşəkkür edib. Xatırladaq ki, uşu-kunq fu üzrə Avropa çempionatında Azərbaycan komandası 12 qızıl medal qazanıb.  

Azərbaycan Texniki Universitetində (AzTU) “Avrasiyada Dinamik Enerji Landşaftı: Enerji Təhlükəsizliyinə Qlobal Təhdidlər, Regional Problemlər və İmkanlar” mövzusunda 3-cü Beynəlxalq Avrasiya Enerji və Dayanıqlılıq Konfransı işinə başlayıb. 10 ölkədən 500-ə yaxın nümayəndənin iştirak etdiyi konfrans AzTU və Türkiyənin Boğaziçi Universitetinin təşkilatçılığı ilə keçirilir. İştirakçıları salamlayan AzTU-nun rektoru Vilayət Vəliyev bildirib ki, konfransın əsas məqsədi biznes, hökumət və akademik qurumların iştirakı ilə Avrasiya regionunda enerji və dayanıqlı inkişafla bağlı problemləri müzakirə edərək müəyyən həllər və təkliflər verməkdir. Rektor deyib ki, “Koronavirus (COVID-19) pandemiyasının verdiyi mesajlar, Rusiya-Ukrayna müharibəsi və digər regional proseslər Avrasiya məkanında, xüsusilə də enerji sektorunda və dayanıqlı inkişafda yeni trendləri meydana çıxarıb. Bu isə öz növbəsində Avrasiya məkanında yeni çağırışlar formalaşdırıb. Qeyd olunub ki, müzakrə olunan məsələlərin və təqdim edilmiş məqalələrin nəşrini təşkil etmək üçün SOCAR-ın Neft Qaz Elmi-Tədqiqat Layihə İnstitutunun impakt faktorlu jurnalında konfransa təqdim edilmiş məqalələrdən 12-si seçilərək çap olunacaq. Daha sonra çıxış edən Boğaziçi Universitetinin rektoru Mehmet Naci İnci, elm və təhsil nazirinin müavini Firudin Qurbanov, energetika nazirinin müavini Samir Vəliyev, BP-nin Xəzər regionunda kommunikasiya və xarici əlaqələr üzrə vitse-prezidenti Bəxtiyar Aslanbəyli, SOCAR-ın vitse-prezidentinin müavini Vitali Bəylərbəyov, Türkiyənin Enerji Birjasının (EPİAŞ) baş direktoru Ahmet Türkoğlu və Avropa Enerji Birjaları Assosiasiyasının (EUROPEX) baş katibi Kristian Bayer iki gün ərzində konfransda müzakirə olunacaq məsələlərin əhəmiyyətindən danışıblar. Bildirilib ki, konfrans Azərbaycanda və bütövlükdə Avrasiya məkanında enerji sənayesinin yeni problemlərini dövlət, akademik və biznes nümayəndələri ilə daha geniş auditoriyalarda müzakirə etmək, müasir qlobal sənaye tendensiyalarını təhlil etmək və ən yaxşı beynəlxalq təcrübələri öyrənmək üçün zəruri platforma rolunu oynayacaq. İki gün davam edəcək konfransın bölmə iclaslarında “Avrasiyanın enerji sektoruna geosiyasi təsirlər”, “Son dövlərdə qlobal enerji bazarlarında baş verən meyllər”, “BMT-nin Dayanıqlı İnkişaf Məqsədləri çərçivəsində təmiz enerji hədəflərinə nail olmaq üçün enerji siyasəti”, “Təmiz enerjiyə keçidin dəstəklənməsi”, “Bərpa olunan enerji məsələləri və enerji səmərəliliyi ilə bağlı çağırışlar”, “Yeni enerji mənbələrinin və qabaqcıl enerji texnologiyalarının inkişafı və iqtisadi təsirləri”, “Avrasiya bölgəsinin enerji təhlükəsizliyi baxımından üzləşdiyi problemlər” və digər mövzularda müzakirələr aparılacaq. Qeyd edək ki, konfransın platinium sponsorları SOCAR, BP və ABB şirkətləridir.    

Azərbaycan Texniki Universitetinin (AzTU) məzunu, Milli Qəhrəman, şəhid Çingiz Qurbanov 1994-cü il noyabrın 24-də Qusarın Həzrə kəndində anadan olub. 2012-ci ildə orta məktəbi bitirən Çingiz Qurbanov elə həmin il AzTU-ya qəbul olunub. 2016-cı ildə universiteti bitirib və hərbi xidmətə yollanıb. Azərbaycan ordusunun əsgəri Çingiz Qurbanov 2016-cı il dekabrın 29-da Ermənistan silahlı qüvvələrinin kəşfiyyat qrupunun təxribat-pozuculuq fəaliyyətinin qarşısını alarkən baş vermiş döyüşdə şəhidlik zirvəsinə ucalıb. Çingiz Qurbanovun nəşi Prezident İlham Əliyevin tapşırığına əsasən, aidiyyəti dövlət qurumları tərəfindən beynəlxalq təşkilatlarla aparılmış müntəzəm tədbirlər nəticəsində 2017-ci il fevralın 5-də qarşı tərəfdən alınıb. Bakıda vida mərasimi keçirildikdən sonra Çingiz Qurbanov fevralın 6-da doğulduğu Qusar rayonunda dəfn edilib. Fevralın 7-də Prezident İlham Əliyev Azərbaycanın ərazi bütövlüyünün qorunub saxlanılmasında xüsusi xidmətlərinə və döyüş tapşırığını yerinə yetirərkən göstərdiyi şəxsi igidliyə görə əsgər Çingiz Qurbanova ölümündən sonra “Azərbaycanın Milli Qəhrəmanı” adı verilməsi barədə Sərəncam  imzalayıb.

Azərbaycan Texniki Universitetinin (AzTU) rektoru Vilayət Vəliyev 17-19 noyabr 2022-ci il tarixlərində Almaniyanın Dortmund şəhərində keçirilən Dünya Robot Olimpiadasında üçüncü yerə layiq görülən AzTU SABAH qruplarının "Platon Tech" komandasının üzvlərini qəbul edib. Rektor dünyada Azərbaycanın adını layiqincə təmsil etdiklərinə görə komanda üzvlərinə təşəkkür edib. Bildirib ki, komandanın daha da inkişaf etməsi üçün tələbələrə bundan sonra da bütün şərait yaradılacaq. “Platon Tech” komandasının üzvləri AzTU-nun SABAH qruplarının informasiya texnologiyaları ixtisasının tələbələri Rüfət Şixiyev, Qabil Hüseynli və ADNSU-nun tələbəsi Fərid Şixiyev onların olimpiadaya hazırlaşması üçün AzTU-nun "CezeriLab" laboratoriyasında yüksək şərait yaradıldığını bildiriblər. Tələbələr onlara göstərdiyi dəstəyə görə AzTU-nun rektoru Vilayət Vəliyevə təşəkkür ediblər. Daha sonra çıxış edən AzTU SABAH mərkəzinin rəhbəri Aytən Sadıqova, komandanın mentor Günel Məmmədli komandanın olimpiadaya hazırlıq prosesindən yarışın sonuncu gününə kimi AzTU rəhbərliyinin xüsusi dəstəyinin olduğunu vurğulayıblar. AzTU-nun İctimai şurasının sədri Osman Gündüz də Azərbaycanı yüksək səviyyədə təmsil etdikləri üçün komandaya təbriklərini çatdırıb. Görüşün sonunda komanda üzvlərinə təşəkkürnamə və noutbuk təqdim olunub.   Xatırladaq ki, 76 ölkədən 2000-dən çox iştirakçının qatıldığı Dünya Robot Olimpiadasında həmyerlilərimiz "FUTURE INNOVATORS SENIOR" nominasiyası üzrə dünya üçüncüsü olublar.  

Azərbaycan Texniki Universitetinin (AzTU) magistr məzunu, Vətən müharibəsi şəhidi Məhəmmədəli İbrahimlinin doğum günüdür. Məhəmmədəli İbrahimli 1996-cı ildə Beyləqanda anadan olub. Əslən Füzulinin Cuvarlı kəndindən olan Məhəmmədəli 2003-2014-cü illərdə 215 nömrəli orta məktəbdə təhsil alıb. O, 2018-2020-ci illərdə AzTU-da magistr təhsili alıb. Məhəmmədəli İbrahimli 2020-ci ildə həqiqi hərbi xidmətə çağırılıb. Azərbaycan ordusunun kəşfiyyatçı əsgəri olan Məhəmmədəli İbrahimli 2020-ci il sentyabrın 27-də başlanan Vətən müharibəsində iştirak edib. Oktyabrın 3-də Suqovuşanın alınması uğrunda gedən ağır döyüşlərdə iştirak edən cəsur hərbçi hər iki qolundan və ayağından yaralanıb. Buna baxmayaraq, üç yaralı və bir şəhid yoldaşını təhlükəsiz əraziyə çıxartmağı özünə borc bilib. Döyüşdən sonra yaralarının sağalması üçün 15 günlük Bərdə Rayon Diaqnostika Xəstəxanasına yerləşdirilib. Lakin üç gün sonra müalicəsini yarımçıq qoyaraq könüllü şəkildə ön cəbhəyə qayıdıb. Məhəmmədəli İbrahimli oktyabrın 13-də Ağdərə istiqamətində düşmən postuna kəşfiyyat bölüyünün hücumunda iştirak edib. Döyüş yoldaşlarının şəhid olduğunu görən Məhəmmədəli təkbaşına düşmən səngərinə hücum edib. O, qumbara ilə 20-dən çox düşmən əsgərini məhv edib, özü də şəhidlik zirvəsinə ucalıb. Ailəsinin iki aydan çoxdur xəbər gözlədiyi şəhidin nəşini ərazidən 63 gün sonra götürmək mümkün olub. Məhəmmədəli İbrahimli dekabrın 15-də Sabunçu rayonundakı Şəhidlər xiyabanında dəfn edilib. Allah bütün şəhidlərimizə rəhmət eləsin!Şəhidlərimizin ruhu qarşısında baş əyirik!

Azərbaycan Texniki Universitetinin (AzTU) nümayəndə heyəti Türkiyənin bir sıra universitetlərində işgüzar səfərdə olub. Səfər Elm və Təhsil Nazirliyinin “Ali və orta ixtisas təhsilinin 2021/2022-ci illər üzrə inkişafı” mövzusunda keçirdiyi qrant müsabiqəsi çərçivəsində AzTU-nun qalib olduğu “AzTU-da prioritet mühəndislik ixtisasları üzrə professor-müəllim heyətinin akademik mobilliyinin səmərəli təşkili ilə elmi potensialın gücləndirilməsi və yüksək ixtisaslı kadr hazırlığının təmin olunması mexanizminin yaradılması” layihəsi çərçivəsində həyata keçirilib. Səfərdə AzTU-nun elm və innovasiyalar üzrə prorektoru Sübhan Namazov, beynəlxalq  əlaqələr üzrə prorektoru Fariz Məmmədov və  Elektrotexnika və elektrik avadanlıqları kafedrasının müdiri Hikmət Əliyev iştirak edib. Səfər çərçivəsində AzTU nümayəndə heyəti Qazi Universiteti ilə elektrik və elektronika mühəndisliyi ixtisası üzrə yerinə yetiriləcək ikili diplom proqramının detallarını barədə fikir mübadiəsi aparıb, həmçinin Ankara Universiteti ilə birgə həyata keçirilən kompüter mühəndisliyi ixtisası üzrə ikili diplom proqramının icrası zamanı yaranan məsələləri müzakirə edib, universitetlərin rəhbər şəxsləri ilə görüşlər keçiriblər. Nümayəndə heyəti eyni zamanda Türkiyənin Bilkent, Eskişeher Texniki və Hacettepe Universitetində olub, prorektor və digər rəhbər şəxslərlə görüşlər keçiriblər. Bilkent Universitetində keçirilən görüşlərdə multidissiplinar istiqamətlərdə birgə tədqiqatlar və professor-müəllim heyətinin qarşılıqlı mübadilə imkanları müzakirə edilib. Eskişeher Texniki Universitetində kimya mühəndisliyi ixtisası üzrə ikili diplom proqramının həyata keçirilməsinin perspektivləri ilə bağlı fikir mübadiləsi aparılıb. Hacettepe Universitetində görüş zamanı tərəflər arasında icra edilən layihələr və əməkdaşlıqla bağlı müzakirələr aparılıb. Eyni zamanda Hacettepe Universiteti ilə AzTU-nun magistratura səviyyəsində ikili diplom proqramının həyata keçirilməsi barədə ilkin razılığa gəlinib.  

Zonguldak Bülent Ecevit Universitetinin rektoru İsmail Hakkı Özölçerin rəhbərlik etdiyi nümayəndə heyəti AzTU-ya səfər edib. Səfər çərçivəsində qonaqlar AzTU-nun rektoru Vilayət Vəliyev və əməkdaşlarla görüşüb. Görüş zamanı hər iki universitet arasında perspektiv əməkdaşlıq istiqamətlərinin müəyyənləşdirilməsi ilə bağlı fikir mübadiləsi aparılıb. Daha sonra AzTU və Zonguldak Bülent Ecevit Universiteti arasında əməkdaşlıq haqqında memorandum imzalanıb. Memoranduma əsasən, hər iki universitet birgə layihələrin hazırlanması, tədqiqat işlərinin yerinə yetirilməsi, tələbə-müəllim mübadiləsinin həyata keçirilməsi və digər istiqamətlərdə əməkdaşlıq edəcək.  

Azərbaycan Teniki Universiteti (AzTU) ilə Kütahya Dumlupınar Universiteti arasında “Erasmus+” mübadilə proqramı çərçivəsində əməkdaşlıq uğurla davam etdirilir. Əməkdaşlıq çərçivəsində Kütahya Dumlupınar Universitetinin Elektronika və avtomatika kafedrasının müəllimi Dəniz Kaptan AzTU-nun qonağı olub. O, “Erasmus+” mübadilə proqramı çərçivəsində dörd gün ərzində AzTU-nun Energetika və avtomatika fakültəsinin tələbə-müəllim heyəti ilə görüşlər keçirib, həmçinin tələbələrə mühazirə deyib. Mühazirələr əsasən Kütahya Dumlupınar Universitetinin mühəndis hazırlığının prioritet istiqamətləri, elektrik və elektronikanın əsasları, elektrikli maşınlar, onların modelləşdirilməsi, idarə üsulları  və digər maraq doğuran məsələləri əhatə edib. Dəniz Kaptan keçirdiyi görüşlər zamanı tələbələri maraqlandıran suallarını cavablandırıb.   

17-19 noyabr 2022-ci il tarixlərində Almaniyanın Dortmund şəhərində keçirilən Dünya Robot Olimpiadasında 56 ölkədən 78 komanda arasında ölkəmizi təmsil edən Azərbaycan Texniki Universitetinin (AzTU) SABAH qruplarının "Platon Tech" komandası dünya üçüncüsü olub.  Məlumat üçün bildirək ki, “Platon Tech” komandasının üzvləri AzTU-nun SABAH qruplarının informasiya texnologiyaları ixtisasının tələbələri Rüfət Şixiyev, Qabil Hüseynli və ADNSU-nun tələbəsi Fərid Şixiyevdir. Rüfət və Fərid Şixiyevlər əkiz qardaşlardır.  Qeyd edək ki, 2000-dən çox iştirakçının qatıldığı yarışda birinci yerə Hindistanı, ikinci yerə Yunanıstanı təmsil edən komanda layiq görülüb.