Azərbaycan Texniki Universitetinin (AzTU) məzunları, Vətən müharibəsində şəhidlik zirvəsinə ucalan Ələddin Səidov və Elçin Bağırovun doğum günüdür. Ələddin Səidov 1992-ci il iyunun 17-də Bakıda anadan olub. 1998-2009-cu illərdə 193 nömrəli məktəbdə orta, 2009-2013-cü illərdə isə AzTU-da ali təhsil alıb. Müddətli həqiqi hərbi xidmətini 2013-2014-cü illərdə Naxçıvanda yerləşən "N" saylı hərbi hissədə keçib. 2020-ci il sentyabrın 29-dan Vətən müharibəsinə qatılan Ələddin Səidov Füzuli, Cəbrayıl, Xocavənd - xüsusilə Hadrut və Qırmızıbazarda - Laçın və Şuşa istiqamətində gedən döyüşlərdə iştirak edib. Noyabrın 3-də Şuşada şəhidlik zirvəsinə ucalıb. Ölümündən sonra "Vətən uğrunda", "Şuşanın azad olunmasına görə", "Füzulinin azad olunmasına görə", "Laçının azad olunmasına görə" medalları ilə təltif olunub. Elçin Bağırov 1994-cü il iyunun 17-də Bakıda anadan olub. Ailənin yeganə övladı olan Elçin Bağırov 2014-2018-ci illərdə AzTU-da ali təhsil alıb. Daha sonra Naxçıvanda N saylı hərbi hissənin artilleriya diviziyasında həqiqi hərbi xidmətini yerinə yetirib. Vətən müharibəsində könüllü iştirak edən Elçin Bağırovun xidmət etdiyi minaatan taburu böyük qəhrəmanlıqlar göstərib. Oktyabrın 21-də evə sonuncu dəfə zəng edib. Bir neçə gün sonra isə şəhidlik zirvəsinə ucalıb. Ölümündən sonra “Vətən uğrunda” və “Xocavəndin azad olunmasına görə” medalları ilə təltif olunub. Allah bütün şəhidlərimizə rəhmət eləsin! Şəhidlərimizin ruhu qarşısında baş əyirik!    

Müdafiə Sənayesi Nazirliyinin “Cihaz” İstehsalat Birliyində Azərbaycan Texniki Universitetinin (AzTU) tədris mərkəzinin açılış mərasimi keçirilib. Mərasimdə AzTU-nun rektoru Vilayət Vəliyev, İB-nin direktoru Fəlah Quliyev və hər iki tərəfdən nümayəndələr iştirak edib. Mərkəzin açılmasında əsas məqsəd bakalavriat, magistratura və doktorantura tələbələrinə sənayenin problemləri ilə daha yaxından tanış olmaq, tədris prosesi və tədqiqatları bilavasitə istehsalat şəraitində yerinə yetirmək imkanı yaratmaqdan ibarətdir. Tələbələrin praktik dərslərinin əsasən mərkəzdə təşkil olunması da planlaşdırılıb. Tədris mərkəzində AzTU-nun Xüsusi təyinatlı materiallar və vasitələr kafedrası fəaliyyət göstərəcək. Mərkəz tələbələr üçün auditoriya, müəllimlər otağı və yeməkxana ilə də təchiz olunub. Mərkəzlə tanışlıqdan sonra AzTU-nun rektoru Vilayət Vəliyev və “Cihaz” İstehsalat Birliyinin direktoru Fəlah Quliyev arasında görüş keçirilib. Rektor AzTU-da müdafiə sənayesi sahəsi üzrə görülən işlər barədə ətraflı məlumat verib. Bildirib ki, müəssisədə AzTU-nun tədris mərkəzinin açılması tələbələrin perspektiv inkişafı istiqamətində uğurlu olacaq. Rektor mərkəzdə birgə elmi-tədqiqat işlərinin aparılması üçün də mühüm imkanların olduğunu qeyd edib. Mövcud problemlərdən də danışan Vilayət Vəliyev tədris materiallarının keyfiyyətinin yüksəldilməsinə ciddi ehtiyacın olmasını xüsusi qeyd edib və bu istiqamətdə yeni innovativ yanaşmaların zəruriliyini bildirib. “Cihaz” İB-nin direktoru Fəlah Quliyev AzTU ilə əməkdaşlıqda maraqlı olduqlarını deyib. Qeyd edib ki, son illər AzTU-da müdafiə sənayesi sahəsi üzrə hazırlanan kadrların səviyyəsi əvvəlki illərlə müqayisədə daha yüksəkdir. Fəlah Quliyev görüş zamanı qeyd olunan mövcud problemlərin həlli üçün elmi-tədqiqatlara üstünlük verilməsini və müştərək komissiyanın yaradılmasını təklif edib. Görüşdən sonra tərəflər arasında elmi-texniki əməkdaşlığa dair memorandum imzalanıb. Sənədə əsasən, tərəflər birgə layihələrin hazırlanması, elmi-tədqiqat işlərinin aparılması, elmi-texniki və texnoloji problemləri əhatə edən yeni mövzuların yazılması istiqamətində əməkdaşlıq edəcək.      

Azərbaycan Texniki Universitetinin (AzTU) məzunu, Vətən müharibəsində şəhidlik zirvəsinə yüksələn Elçin Həsənli 1993-cü il iyunun 16-da Ağstafa rayonunda anadan olub. O, 2010–2014-cü illərdə AzTU-da bakalavr, 2015–2017-ci illərdə magistratura səviyyəsində təhsil alıb. Elçin Həsənli 2014-2015-ci illərdə həqiqi hərbi xidmətdə olub. 2020-ci il sentyabrın 27-də başlayan Vətən müharibəsində könüllü iştirak edib. Elçin Həsənli 2020-ci il noyabrın 8-də Şuşa uğrunda döyüşlərdə şəhid olub. Ölümündən sonra "Vətən uğrunda", "Cəsur döyüşçü" və "Şuşanın azad olunmasına görə" medalları ilə təltif edilib. Allah bütün şəhidlərimizə rəhmət eləsin! Şəhidlərimizin ruhu qarşısında baş əyirik!    

İyunun 9-da Alman Akademik Mübadilə Xidmətinin (DAAD) Tbilisi Regional Ofisinin açılışı olub.  Açılış mərasimində Almaniyanın Gürcüstandakı səfiri Hubert Knirş, Gürcüstanın Təhsil və elm nazirinin müavini Nunu Mitskeviç, Azərbaycan Respublikası Təhsil nazirinin müşaviri Nicat Məmmədli (onlayn) və DAAD-ın baş katibi Dr. Kay Ziks çıxış ediblər. Daha sonra Heinrich Boell Fondunun Cənubi Qafqaz Regional Ofisinin direktoru Dr. Sonya Şiffersin moderatorluğu ilə “Qlobal çağırışlar fonunda Cənubi Qafqazla və onun daxilində akademik mübadilə” adlı panel müzakirələri keçirilib. Tədbirdə həmçinin “DAAD və onun Cənubi Qafqazdakı məzunları” mövzusu ilə əlaqədar məzunların fəaliyyəti, “Almaniya və Cənubi Qafqaz arasında ali təhsil sahəsində əməkdaşlıq: Ən yaxşı təcrübə nümunələri” mövzusu ilə bağlı regionda DAAD tərəfindən maliyyələşdirilən layihələr, təcrübələr,  problemlər, eləcə də DAAD mühazirəçilərinin və Tbilisi Regional Ofisinin fəaliyyətləri və planları müzakirə olunub. Açılış mərasimində Azərbaycan Texniki Universitetini (AzTU) Maşınqayırma texnologiyası kafedrasının müdiri professor Nizami Yusubov təmsil edib.      

  Azərbaycan Texniki Universitetində (AzTU) “İnnovativ öyrənmə-öyrətmə yanaşmaları - 1” mövzusunda təlim keçirilir. Türkiyəli mütəxəssislər professor Buket Akkoyunlu və dosent Salih Bardakçı tərəfindən aparılan təlimlərdə AzTU-nun 40-a yaxın professor-müəllim heyəti iştirak edir. Təlimin açılış mərasimində çıxış edən AzTU-nun elm və innovasiya üzrə prorektoru Sübhan Namazov professor-müəllim heyətinə uğurlar arzulayıb. Təlimin iştirakçıların fəaliyyətində faydalı olacağı qeyd olunub. Daha sonra professor Buket Akkoyunlu və dosent Salih Bardakçı təhsildə innovativ yanaşmanın tələbələrin gələcək karyeralarına təsiri, öyrətmə və öyrənmə prosesinin inkişafı və digər vacib nüansları geniş təqdimatla iştirakçıların diqqətinə çatdırıblar. Qeyd edək ki, iyunun 17-də yekunlaşacaq təlimin sonunda iştirakçılara sertifikat təqdim olunacaq.         

  13-14 iyun tarixlərində Azərbaycan Texniki Universitetinin (AzTU) Sosial məsələlər və ictimaiyyətlə əlaqələr üzrə prorektoru Kamran Rəsulov, Media ilə iş və kommunikasiya şöbəsinin müdiri Səfa Bağırov və AzTU-nun Tələbə Həmkarlar İttifaqı Komitəsinin sədri Mirməhəmməd Ələkbərli Türkiyədə işgüzar səfərdə olub. Səfər çərçivəsində İstanbul Universiteti, Yıldız Texniki Universiteti, İstanbul Aydın Universitetində görüşlər keçirilib. Görüşlər zamanı adı çəkilən universitetlərin sosial sahələrdəki fəaliyyətləri, o cümlədən tələbə və müəllimlərin sosial həyatı, tələbə təşkilatlarının iş prinsipləri, universitetlərin ictimaiyyətlə əlaqələri barədə geniş müzakirələr və fikir mübadiləsi aparılıb. Həmçinin universitetlərin kampuslarında mövcud olan texnopark, kitabxana, konqres mərkəzləri, “Klublar vadisi” kimi sosial fəaliyyət məkanlarına baxış keçirilib.             

Azərbaycan Texniki Universitetinin (AzTU) rektorunun beynəlxalq əlaqələr üzrə müşaviri Fariz Məmmədov və Xarici əlaqələr şöbəsinin müdiri Orxan Vətənxah “Erasmus+” KA1 mobillik proqramı çərçivəsində Rumıniyanın Buxarest İqtisadiyyat Universitetində səfərdədir.Səfər çəçivəsində AzTU əməkdaşları Buxarest İqtisadiyyat Universitetinin beynəlxalq əlaqələr üzrə prorektoru, professor Marius Profiroiu ilə görüşüblər.Görüşdə AzTU-da görülən işlər, həyata keçirilən layihələr, universitetin beynəlxalq əlaqələri haqqında ətraflı məlumat verilib. Həmçinin AzTU ilə Buxarest İqtisadiyyat Universiteti arasında müxtəlif istiqamətlərində əməkdaşlıq üçün yaxşı imkanların olduğu bildirilib.Buxarest İqtisadiyyat Universitetinin beynəlxalq əlaqələr şöbəsində və Dayanıqlı inkişaf üzrə tədqiqat mərkəzində keçirilən görüşlərdə isə universitetlər arasında “Erasmus+” proqramı çərçivəsində mobilliyin inkişaf etdirilməsi və birgə tədqiqatla bağlı əməkdaşlığın perspektivləri müzakirə olunub. 

İyunun 10-da Azərbaycan Texniki Universitetinin (AzTU) rektoru Vilayət Vəliyevin rəhbərlik etdiyi nümayəndə heyəti bölgələrə səfər çərçivəsində Yevlax Şəhər İcra Hakimiyyətinin başçısı Anar Tağıyev,  Naftalan Şəhər İcra Hakimiyyətinin başçısı Vüqar Novruzov, Göygöl Rayon İcra Hakimiyyəti başçısının I müavini Turani Əliyev, Şəmkir Rayon İcra Hakimiyyətinin başçısı Rəşad Tağıyev və Tovuz Rayon İcra Hakimiyyətinin başçısı Məmməd Məmmədovla görüşüb.  Səfərin məqsədi Nazirlər Kabinetinin təsdiq etdiyi "Şəhərdaxili hərəkət (mobillik) planının hazırlanması Qaydası"nın icrası istiqamətində müzakirələr aparmaqdır.  Görüşlər zamanı AzTU-nun rektoru Vilayət Vəliyev qərarın mahiyyəti barədə danışıb, ölkəmizdə bu sahədə aparılan işlərdə universitetlərin bilavasitə iştirakının zəruriliyini qeyd edib. Bildirib ki, burada əsas məqsəd dayanıqlı şəhər modelinin tətbiq edilməsidir. AzTU-nun Logistika və Nəqliyyat İnstitutunun direktoru Fuad Daşdəmirov şəhər mobillik planlarının hazırlanması ilə bağlı geniş təqdimatla çıxış edib, bu istiqamətdə institutda həyata keçirilən layihələrdən danışıb. Görüşlərdə, həmçinin yol hərəkətinin bütün iştirakçılarının səmərəli, təhlükəsiz və rahat hərəkətini təmin olunması ilə bağlı yaxın gələcəkdə görüləcək işlər müzakirə olunub. Eyni zamanda mobillik planı üzrə monitorinqlərin keçirilməsinin zəruriliyi qeyd olunub və bu tədbirlərlə bağlı  hədəflər müəyyən edilib. Daha sonra AzTU nümayəndə heyəti mövzu ətrafında səsləndirilən sualları cavablandırıb.         

Azərbaycan Texniki Universitetinin (AzTU) Heydər Əliyev Mərkəzində 15 iyun - Milli Qurtuluş Gününə həsr olunan tədbir keçirilib. Tədbirdə AzTU-nun rektoru Vilayət Vəliyev, Yeni Azərbaycan Partiyası (YAP) Yasamal rayon təşkilatının sədri Bəxtiyar Nəbiyev, millət vəkilləri, universitetin müəllim və tələbələri iştirak edib.Əvvəlcə universitetin foyesində ulu öndər Heydər Əliyevin büstünün önünə gül dəstələri düzülüb.Daha sonra ulu öndər Heydər Əliyevin və torpaqlarımızın ərazi bütövlüyü uğrunda canlarından keçən Vətən övladlarının xatirəsi bir dəqiqəlik sükutla yad olunub, Azərbaycanın Dövlət Himni səsləndirilib. Tədbirdə çıxış edən AzTU-nun rektoru Vilayət Vəliyev bildirib ki, Azərbaycan xalqının gələcək həyatını müəyyən edən mühüm başlanğıcların əsası 15 iyun – Milli Qurtuluş Günü ilə qoyulub. Bu əlamətdar gün ictimai, siyasi və tarixi baxımından çox böyük əhəmiyyətə malikdir. Rektor qeyd edib ki, 90-cı illərin əvvəllərində müstəqilliyini yenicə bərpa etmiş ölkədə hökm sürən hərc-mərclik, getdikcə gərginləşən siyasi, iqtisadi və sosial vəziyyət, torpaqlarımızın erməni silahlı qüvvələri tərəfindən işğalı Azərbaycanı bu bəlalardan xilas edə biləcək liderin hakimiyyətə gəlməsini zəruri edirdi. Bütün xalq bilirdi ki, həmin dövrdə ölkəni bu ağır və dözülməz vəziyyətdən xilas edəcək şəxsiyyət ulu öndər Heydər Əliyevdir. Məhz belə bir məqamda Heydər Əliyev xalqın təkidli tələbi ilə yenidən hakimiyyətə qayıtdı və ölkəmizi ağır bəlalardan xilas etdi. Ulu öndərin hakimiyyətə gəlişi ilə ölkə vətəndaş müharibəsindən və parçalanma təhlükəsindən xilas oldu. Ümummilli lider hakimiyyətə qayıdışı ilə Azərbaycanın müstəqilliyini qorudu, ölkəmizin bütün sahələrdə inkişafında, dünyada nüfuzunun artmasında mühüm və həlledici rol oynadı. Rektor onu da qeyd edib ki, bu gün ulu öndərin siyasi xəttini layiqincə davam etdirən Ali Baş Komandan, Prezident İlham Əliyevin iradəsi və qətiyyəti sayəsində Azərbaycan dünyanın ən nüfuzlu və güclü ölkələri sırasındadır.Daha sonra çıxış edən millət vəkilləri Elnur Allahverdiyev və Ramin Məmmədov, YAP Yasamal rayon təşkilatının sədri Bəxtiyar Nəbiyev, YAP-ın AzTU üzrə Ərazi Partiya Təşkilatının sədri Həbib Mirzəyev qurtuluş gününün tarixi əhəmiyyəti barədə fikirlərini bildiriblər. Qeyd olunub ki, artıq iki ildir Azərbaycan xalqı Milli Qurtuluş Gününü Ali Baş Komandan, Prezident İlham Əliyevin siyasi iradəsi nəticəsində qalib xalq kimi qeyd edir. 44 günlük Vətən müharibəsində qazanılan şanlı qələbə ilə Prezident İlham Əliyev ata vəsiyyətini yerinə yetirdi. O da vurğulanıb ki Heydər Əliyevin siyasi irsi uzun illər tarixçilər və politoloqların araşdırma mövzusu olacaq.Tərbirin sonunda AzTU-nun bir qrup əməkdaşı və tələbəsinə YAP-ın üzvlük vəsiqəsi təqdim edilib. Tələbələr adından çıxış edən AzTU-nun İqtisadiyyat və idarəetmə fakültəsinin birinci kurs tələbəsi Günay Ağabəyova YAP sıralarına qəbul olunduqları üçün partiya rəhbərliyinə təşəkkür edib.            

Azərbaycan Texniki Universitetinin (AzTU) əməkdaşlarının respublikanın şəhər və rayonlarında texniki yönümlü ixtisaslara marağı olan XI sinif şagirdləri ilə yaxından tanışlıq məqsədilə görüşləri davam edir. Növbəti tanışlıq görüşləri Bakının Yasamal, Binəqədi, Nərimanov, Nəsimi, Səbail, Qaradağ rayonlarının ümumtəhsil müəssisələrində təhsil alan XI sinif şagirdləri ilə keçirilib. Onlayn təşkil edilən görüşlərdə məktəblərin rəhbərliyi, şagirdlərin müəllimləri və valideynləri iştirak edib. Əvvəlcə AzTU-nun tanıtım videoçarxı nümayiş olunub. Daha sonra AzTU əməkdaşları universitetdə görülən işlər, həyata keçirilən yeniliklər barədə təqdimatla çıxış ediblər. Universitetin tarixi, fakültələr, ixtisaslar, beynəlxalq əlaqələr, ikili diplom proqramları, laboratoriyalar, karyera imkanları və digər vacib məlumatlar slaydlar vasitəsilə məktəblilərin diqqətinə çatdırılıb. Məktəb direktorları və müəllimlər AzTU ilə əməkdaşlıqdan məmnunluqlarını ifadə edib, həmçinin universitetin ətraflı təqdimatına görə təşəkkürlərini bildiriblər. Sonda şagirdlərin və valideynlərin sualları cavablandırılıb. Qeyd edək ki, AzTU əməkdaşlarının XI sinif şagirdləri ilə görüşləri mütəmadi olaraq davam etdiriləcək.