Azərbaycan Texniki Universitetinin (AzTU) məzunu, Vətən müharibəsində şəhidlik zirvəsinə yüksələn Eltun Qasımov 1994-cü il oktyabrın 18-də Bakıda anadan olub. O, 2012-2016-cı illərdə AzTU-da Sənayenin təşkili və idarə olunması ixtisası üzrə təhsil alıb. Universiteti bitirdikdən sonra həqiqi hərbi xidmətə yollanan Eltun Qasımov xidməti uğurla başa vurub.   Eltun Qasımov 2020-ci il sentyabrın 27-də başlanan Vətən müharibəsində iştirak edib. O, Füzulinin və Hadrutun azadlığı uğrunda gedən döyüşlərdə iştirak edib. Eltun Qasımov 2020-ci il oktrabrın 18-də Hadrut uğrunda gedən döyüşlərdə qəhrəmancasına şəhidlik zirvəsinə yüksəlib. Prezident İlham Əliyevin sərəncamlarına əsasən, Eltun Qasımov ölümündən sonra "Vətən uğrunda", “Xocavəndin azad olunmasına görə” və “Füzulinin azad olunmasına görə” medalları ilə təltif olunub. Allah bütün şəhidlərimizə rəhmət eləsin! Şəhidlərimizin ruhu qarşısında baş əyirik!

Bu gün Azərbaycanda Müstəqilliyin Bərpası Günüdür. 1991-ci il oktyabrın 18-də “Azərbaycan Respublikasının dövlət müstəqilliyi haqqında” Konstitusiya Aktı qəbul olunub. Konstitusiya Aktında 1918-ci il 28 may tarixli İstiqlal Bəyannaməsinə və “Azərbaycan Respublikasının dövlət müstəqilliyini bərpa etmək haqqında” Azərbaycan Respublikası Ali Sovetinin 1991-ci il 30 avqust tarixli Bəyannaməsinə istinad olunub, Azərbaycan Respublikasının Azərbaycan Xalq Cümhuriyyətinin varisi olduğu təsbit edilib. Beləliklə, “Azərbaycan Respublikasının dövlət müstəqilliyi haqqında” Konstitusiya Aktına əsasən Azərbaycan xalqı 1991-ci il oktyabrın 18-də öz müstəqilliyini bərpa edib. Azərbaycan parlamentinin 15 oktyabr 2021-ci il tarixli plenar iclasında isə “Müstəqillik Günü haqqında” yeni qanun qəbul edilib. Elə həmin gün Prezident İlham Əliyev "Müstəqillik Günü haqqında" yeni Qanunu təsdiqləyib. Qanuna əsasən, mayın 28-i Müstəqillik Günü, oktyabrın 18-i isə Müstəqilliyin Bərpası Günü elan olunub. Azərbaycan xalqı 1991-ci ildən sonra ikinci dəfədir ki, Müstəqilliyin Bərpası Gününü öz ərazi bütövlüyünü bərpa etmiş qalib xalq kimi qeyd edir.  

Azərbaycan Texniki Universitetinin (AzTU) məzunu, Aprel döyüşlərində şəhidlik zirvəsinə yüksələn Əbdülməcid Axundov 1993-cü il oktyabrın 15-də anadan olub. 2010-cu ildə orta məktəbi bitirən Əbdülməcid Axundov elə həmin il  AzTU-ya qəbul olunub.  Əbdülməcid Axundov 2016-cı il aprelin 2-də qəhrəmancasına şəhidlik zirvəsinə ucalıb. Prezident İlham Əliyevin Sərəncamı ilə Əbdülməcid Axundov ölümündən sonra “Hərbi xidmətdə fərqlənməyə görə” 3-cü dərəcəli medalı ilə təltif olunub. Allah bütün şəhidlərimizə rəhmət eləsin! Şəhidlərimizin ruhu qarşısında baş əyirik!  

Azərbaycan Kibertəhlükəsizlik Təşkilatları Assosiasiyası (AKTA) İdarə heyətinin sədri Rahid Ələkbərli Azərbaycan Texniki Universitetinin (AzTU) bakalavriat səviyyəsində informasiya təhlükəsizliyi, informasiya texnologiyaları və kompüter mühəndisliyi ixtisasları üzrə təhsil alan tələbələri ilə görüşüb. Görüş zamanı kiber-gündəmdə baş verən hadisələr, kiber-karyera qurulması, kiber-mədəniyyətin formalaşdırılması mövzularında interaktiv müzakirələr aparılıb. Rahid Ələkbərlinin “Birlikdə nə edə bilərik?” mövzusunda motivasiya məqsədli çıxışında kibertəhlükəsizlik və ümumilikdə informasiya kommunikasiya texnologiyaları sahəsində karyera imkanları, kiber-dünyada nümunəvi davranış, müasir peşəkar fəaliyyət üçün tələb edilən bacarıqlar təqdim olunub. Görüşdə tələbələrə kibertəhlükəsizlik sahəsində karyera planlaması, qlobal rəqabət mühitində karyeranın inkişaf imkanları, peşəkar özünüinkişaf üzrə yol xəritəsinin qurulması istiqamətində tövsiyələr verilib. Daha sonra iştirakçılar arasında interaktiv rəy sorğuları keçirilib, tələbələrin perspektiv karyera maraqları öyrənilib. Həmçinin ölkədə əsas prioritet sahələrə, qlobal texnoloji çağırışlara, texnoloji trendlərə və sənayenin tələblərinə uyğun mövzular dialoq formatında müzakirə edilib. Görüşün sonunda tələbələrin sualları cavablandırılıb.  

Azərbaycan Texniki Universitetində (AzTU) “Almaniyada təqaüdlü təhsil” mövzusunda məlumatlandırma sessiyası keçirilib. Məlumatlandırma sessiyası Alman Akademik Mübadilə Xidmətinin (DAAD) nümayəndəsi Klaudio Kasperl tərəfindən aparılıb. Sessiyasının açılışında çıxış edən AzTU-nun elm və innovasiya üzrə prorektoru Sübhan Namazov DAAD və AzTU-nun uzun illik səmərəli əməkdaşlığından, bu proqramların mühəndislik ixtisasları üzrə yaratdığı imkanlardan danışıb. Daha sonra DAAD nümayəndəsi Klaudio Kasperl Almaniyada təhsil, təqaüd proqramları haqqında geniş təqdimatla çıxış edib. Təqdimatdan sonra tələbələrin sualları cavablandırılıb.   Qeyd edək ki, DAAD-nin təşkilatçılığı ilə Almaniyadan dəvət olunan Klaudio Kasperl iki il ərzində AzTU-da alman dilini tədris edəcək və Xarici dillər kafedrasında fəaliyyət göstərəcək.     

  Oktyabrın 13-də Yeni Azərbaycan Partiyası (YAP) Yasamal rayon təşkilatının və Yasamal rayon Gənclər və İdman İdarəsinin birgə təşkilatçılığı ilə “Gənclər sağlam həyat tərzini seçir” devizi altında basketbol üzrə turnirin final mərhələsi keçirilib. Əvvəlcə Azərbaycanın Dövlət Himni səsləndirilib, ölkəmizin ərazi bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilib. Tədbirdə çıxış edən YAP Yasamal rayon təşkilatının sədri Bəxtiyar Nəbiyev, YAP Mərkəzi Aparatının Gender siyasəti və gənclərlə iş şöbəsi müdirinin müavini Zəkiyyə Musayeva, Yasamal Rayon İcra Hakimiyyəti başçısının birinci müavini Hüseyn Əfəndiyev, Azərbaycan Texniki Universitetinin (AzTU) rektoru Vilayət Vəliyev, Milli Məclisin deputatı Səbinə Xasayeva, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının İşçi Qrupunun milli informasiya sektorunun müdiri Raqif Allahverdiyev, “Azərbaycan Televiziyası və Radio Verilişləri” QSC-nin məsul əməkdaşı Şahin Verdiyev və Yasamal rayon Gənclər və İdman İdarəsinin rəisi İlham Səfərov bildiriblər ki, gənclər arasında narkomaniyaya qarşı mübarizədə təbliğat işləri daha da gücləndirilməlidir. Kütləvi idman tədbirlərinin keçirilməsində də əsas məqsəd cəmiyyətdə, xüsusilə də gənclər arasında zərərli vərdişlərin qarşısını almaqdan ibarətdir. Qeyd olunub ki, basketbol üzrə turnir də bu qəbildən olan tədbirlərdəndir. Bildirilib ki, 12 oktyabrda başlanan turnirdə Bakı Dövlət Universiteti (BDU), Azərbaycan Memarlıq və İnşaat Universiteti (AzMİU), AzTU, Bakı Biznes Universiteti, Bakı Dövlət Rabitə və Nəqliyyat Kolleci, 2 nömrəli Bakı Baza Tibb Kolleci, Azərbaycan Dövlət Pedaqoji Kollecinin komandaları mübarizəyə aparıblar. Turnirin final mərhələsində BDU və AzTU komandaları qarşılaşıb. Maraqlı idman mübarizəsi şəraitində keçən final oyununda AzTU komandası birinci hissədə 36:13, ikinci hissədə isə 52:28 hesablı qələbə qazanaraq turnirin qalibi olub. Sonda qaliblər və turnirin bütün iştirakçıları təltif olunublar.

Nurlan Əhmədli 1996-cı il oktyabrın 12-də Oğuz rayonunun Xaçmaz kəndində anadan olub. 2014-ci ildə orta məktəbi bitirib Azərbaycan Texniki Universitetinə (AzTU) qəbul olunub. 2018-cı ildə AzTU-nu bitirib həqiqi hərbi xidmətə çağırılıb. 2019-ci ilin iyulunda xidmətini uğurla başa vurub.O, 2020-ci il sentyabrın 27-də başlanan Vətən müharibəsində iştirak edib. Nurlan Əhmədli Füzuli uğrunda gedən döyüşlərdə qəhrəmancasına şəhidlik zirvəsinə yüksəlib. Prezident İlham Əliyevin sərəncamlarına əsasən, Nurlan Əhmədli ölümündən sonra "Vətən uğrunda" və "Füzulinin azad olunmasına görə" medalları ilə təltif edilib. Allah bütün şəhidlərimizə rəhmət eləsin! Şəhidlərimizin ruhu qarşısında baş əyirik!  

Azərbaycan Texniki Universitetinin (AzTU) Mühəndis fizikası və elektronika kafedrasının baş müəllimi Qadir Qafarovun müəllif olduğu “Biologically Active Points: studies, applications and technical possibilities” kitabı “LAP LAMBERT Academic Publishing” beynəlxalq nəşriyyatında çap olunub.   Kitabda bioloji aktiv nöqtələrin biofiziki və texniki xüsusiyyətləri qeyd edilir. Nəşrdə, həmçinin bioloji aktiv nöqtələrin lokalizasiyası ilə yanaşı, terapevtik təsir prosedurlarının realizasiyası üçün texniki imkanların yaradılması mərəhələləri də araşdırılır. Aparılan tədqiqatlar, eyni zamanda müəllifin araşdırmaları əsasında bioloji aktiv nöqtələrin tədqiqi üçün texniki vasitələrin aparat və proqram təminatının hazırlanması təklifi irəli sürülür. Kitab müvafiq sahə üzrə araşdırma aparan tədqiqatçılar, o cümlədən magistrantlar üçün nəzərdə tutulub.  

Azərbaycan Texniki Universiteti Tələbə Həmkarlar İttifaqı Komitəsinin (AzTU THİK) təşkilatçılığı ilə  “Şuşa İli” və Zəfər Gününə həsr olunan spartakiada keçirilir. AzTU-nun İdman sarayında təşkil olunan yarışlar şahmat, stolüstü tennis, futbol və voleybol idman növləri üzrə keçirilir. Spartakiadaya noyabrın 8-də yekun vurulacaq.  

Azərbaycan Texniki Universitetinin (AzTU) tələbə, müəllim və əməkdaşlarından ibarət qrup Xalq Təhsili Muzeyinə ekskursiya edib. Qeyd olunub ki, Xalq Təhsili Muzeyi 1932-ci il aprelin 27-də yaradılıb. Burada  təhsil sahəsində xidmətləri olan maarifçilər, elm xadimləri, ziyalılar, qabaqcıl müəllimlər haqqında ətraflı məlumatlar, həmçinin təhsil müəssisələrinə dair sənəd və materiallar, tədris prosesini əks etdirən fotoşəkillər və digər eksponatlar nümayiş olunur. Tələbələr, həmçinin ümummilli lider Heydər Əliyevin Azərbaycan təhsilinin inkişafında tarixi xidmətləri, Prezident İlham Əliyevin uğurlu təhsil siyasəti, bu sahəyə göstərilən diqqət və qayğını əks etdirən stendlərlə də tanış olublar. Ekskursiya zamanı tələbələri maraqlandıran suallar cavablandırılıb.