Azərbaycan Texniki Universitetinin (AzTU) rektoru Vilayət Vəliyev universitetin yeni tələbə-rektoru Elşən Çıraqovla görüşüb. Rektor Vilayət Vəliyev Elşən Çıraqovu tələbə-rektor seçkilərində qalib gəlməsi münasibətilə təbrik edib, ona fəaliyyət istiqamətləri ilə bağlı müvafiq tapşırıqlar verib. Rektor yeni tələbə-rektora fəaliyyətində uğurlar arzulayıb. Qeyd edək ki, AzTU-nun yeni tələbə-rektoru Elşən Çıraqov İnformasiya və telekommunikasiya texnologiyaları fakültəsinin ikinci kurs tələbəsidir. 

Azərbaycan Kibertəhlükəsizlik Təşkilatları Assosiasiyasının (AKTA) təşkilatçılığı ilə Azərbaycan Texniki Universitetində (AzTU) 14 ali təhsil müəssisəsinin aidiyyəti mütəxəssislərin iştirakı ilə kriptoqrafiya üzrə elmi-praktiki seminar keçirilib. Seminarın əsas məqsədi Azərbaycan Respublikasında kriptoqrafiya sahəsində ixtisaslaşmış mütəxəssislər arasında sahə üzrə aktual məsələlərin müzakirəsinin təşkil olunması və təkmilləşdirici təkliflərin hazırlanaraq aidiyyəti üzrə təqdim edilməsi olub. Sahə üzrə ekspertlərin iştirakı ilə kibertəhlükəsizlik kontekstində kriptoqrafiyanın əhəmiyyəti, kriptoqrafiya sahəsində baş verən yeniliklər, blokçeyn texnologiyalarında kriptoqrafiyanın rolu, kriptoqrafik təhlükəsizlik protokolları və digər mövzular müzakirə olunub.  

Azərbaycan Texniki Universitetinin (AzTU) beynəlxalq əlaqələr üzrə prorektoru Fariz Məmmədov Türkiyənin Uşak Universitetində beynəlxalq əməkdaşlıq həftəsində iştirak edib. Artıq dördüncü ildir keçirilən tədbir bu il “Tədrisdə keyfiyyət təminatı və tədqiqat sahəsində əməkdaşlıq” mövzusuna həsr olunub. 15 ölkədən 65 nümayəndənin iştirak etdiyi beynəlxalq həftədə ali təhsil müəssisələri arasında əməkdaşlıq perspektivləri müzakirə olunub. Tədbir çərçivəsində AzTU-nun prorektoru Fariz Məmmədov universitet haqqında geniş  təqdimatla çıxış edib. 

Ölkədə yerli İT mütəxəssislərini hazırlamaq məqsədilə mobil operator “Nar” Azərbaycan Texniki Universitetində (AzTU) mütəmadi olaraq təlimlər həyata keçirir. Bu dəfə təlim AzTU nəzdində fəaliyyət göstərən “Nar” GSM laboratoriyasında keçirilib.  Xüsusi bilik və bacarıqları ilə seçilən tələbələr üçün nəzərdə tutulan təlimin mövzusu mobil rabitənin təminatı ilə yanaşı, 5-ci nəsil mobil texnologiya, əşyaların interneti, cihazlararası bağlantı və müasir rabitə texnologiyalarının tətbiq sahələrini əhatə edib.  “Nar”ın peşəkar texniki heyəti tərəfindən hazırlanan təlimlərin məqsədi tələbələrin işi icraçılarından öyrənməsi və təcrübi biliklərin universitet tələbələri ilə paylaşılmasıdır. Eyni zamanda, tələbələr gələcək karyeraları haqqında bilmək istədiklərini “Nar” texniki heyətindən birbaşa öyrənmək imkanı əldə edir.  Qeyd edək ki, “Nar” və AzTU arasında əməkdaşlıq artıq 10-cu ildir ki, uğurla davam edir. 2013-cü ildə imzalanmış əməkdaşlıq memorandumu əsasında AzTU nəzdində “Nar” GSM laboratoriyası tələbələrin mobil rabitə cihazlarını universitetdə öyrənməklərinə imkan yaradır.

Azərbaycan Texniki Universitetinin (AzTU) Elmi şurasının növbəti iclası keçirilib. İclasda AzTU-nun prioritet elmi istiqamətləri barədə məsələ müzakirə olunaraq, müasir dövrün tələblərinə uyğun elmi-tədqiqat mövzularının müəyyən edilməsi ilə bağlı tapşırıqlar verilib. Bundan başqa, ixtisas kafedralarında keyfiyyətli kadr hazırlığına nail olmaq üçün “ixtisas rəhbəri” pilot layihəsinin həyata keçirilməsi ilə bağlı məsələ müzakirələrdən sonra qəbul edilib. İclasda AzTU-nun bir sıra strukturlarında təkmilləşdirilmə ilə bağlı məsələlərə də baxılıb. Mexatronika və maşın dizaynı kafedrasının adı dəyişdirilərək Maşın dizaynı və sənaye texnologiyaları adlandırılıb. Avtomatika və idarəetmə kafedrası isə yenidən təşkil olunaraq Mexatronika kafedrası adlandırılıb və Alman mühəndislik fakültəsinin tərkibinə daxil edilib. İclasda 2022-ci ildə fəlsəfə və elmlər doktoru proqramları üzrə doktoranturaya qəbul olan iddiaçıların mövzuları və elmi rəhbərləri təsdiq olunub.  Həmçinin Xarici dillər kafedrasında ingilis dili tədrisini aparacaq müəllimlərin qəbulu üzrə Seçki Qaydaları da müzakirələrdən sonra şura üzvləri tərəfindən təsdiq edilib. İclas cari məsələlərin müzakirəsi ilə davam edib.  

AzTU-da Alman Mədəniyyət Günü keçirilib. Rektor Vilayət Vəliyev AzTU ilə Almaniya universitetlərinin, o cümlədən Alman Akademik Mübadilə Xidmətinin (DAAD) uzunillik əməkdaşlıq əlaqələrindən danışıb. Bildirib ki, AzTU-da Alman Mədəniyyət Gününün keçirilməsi müəllim və tələbələrə bu ölkənin müxtəlif sahələri ilə daha yaxından tanış olmaq imkanı yaradır. Alman mühəndislik fakültəsinin dekanı Ərəstun Məmmədov və AzTU-da alman dili müəllimi kimi fəaliyyət göstərən Klaudio Kasperl AzTU-DAAD əlaqələrinin inkişafı ilə bağlı təqdimatla çıxış ediblər. Daha sonra tədbir iştirakçıları AzTU-nun foyesində Almaniyanın müxtəlif sahələrini əks stendlərə baxıblar. Tədbir çərçivəsində iştirakçılar arasında viktorinalar, həmçinin  tələbələrin təqdim etdikləri stendlərlə bağlı müxtəlif nominasiyalar üzrə müsabiqələr keçirilib. Qaliblərə Almaniyanın Azərbaycandakı səfirliyi və DAAD tərəfindən hədiyyələr təqdim olunub. Sonda iştirakçılar Almaniya istehsalı olan “Qaç Lola Qaç” filminə baxıblar.  

İyunun 8-də Azərbaycan Dövlət Pedaqoji Universitetində (ADPU) “Məktəb guşəsi” təhsil portalının "Hansı universitetin məzunu əmək bazarında daha tez iş tapa bilir?" mövzusunda keçirdiyi sorğunun qaliblərinin mükafatlandırılma mərasimi keçirilib.  Görüşün moderatoru professor Şahlar Əsgərov ictimaiyyətin iştirakı ilə ilk dəfə belə bir tədqiqatın aparılmasını hər bir ali təhsil müəssisəsi üçün önəmli hadisə kimi dəyərləndirib.  Sorğu haqqında məlumat verən "Məktəb guşəsi” portalının baş redaktoru Məzahir Məmmədli bildirib ki, sorğuda 3709 nəfər iştirak edib.  Nəticələrə əsasən, Azərbaycan Texniki Universiteti (AzTU) ikinci yerə layiq görülüb.  Tədbirdə çıxış edən ADPU rektoru Cəfər Cəfərov, millət vəkilləri, İctimai şuranın üzvləri və ali təhsil müəssisələrinin nümayəndələri son illər təhsil sahəsində aparılan islahatlar, məzunların məşğulluq vəziyyəti və digər məsələlər barədə fikir mübadiləsi aparıblar.  Sonda sorğunun qaliblərinə diplomlar təqdim olunub.  Qeyd edək ki, tədbirdə AzTU-nu İctimaiyyətlə əlaqələr şöbəsinin müdiri Sevinc İsgəndərova təmsil edib. 

Böyük Britaniyanın Coventry Universitetinin Tədqiqat məsələləri üzrə prorektoru Riçard Daşvud və universitetin nəzdində Etimad, Sülh və Sosial Münasibətlər İnstitutunun icraçı direktoru Maykl Hardi Azərbaycan Texniki Universitetində (AzTU) olub. Qonaqlar AzTU-nun rektoru Vilayət Vəliyev və universitetin nümayəndələri ilə görüşüb. AzTU-da görülən işlər haqqında məlumat verən rektor Vilayət Vəliyev universitetin fəaliyyətində universitet-sənaye işbirliyi, multidisiplinar tədqiqatlar və beynəlmiləlləşmənin əhəmiyyətini vurğulayıb. Coventry Universiteti haqqında məlumat verən prorektor Riçard Daşvud bildirib ki, sözügedən ali təhsil müəssisəsinin Şərqi Avropa və Asiyada da nümayəndəlikləri var. O, qeyd edib ki, Coventry Universitetində əsasən təbiət elmləri, humanitar,  səhiyyə və mühəndislik sahələrində tədris və tədqiqatlar aparılır. Görüş zamanı birgə tədris və tədqiqat imkanları da müzakirə olunub.      

Türkiyə Elmi və Texnoloji Tədqiqat Şurasının (TÜBİTAK) rəhbəri professor Hasan Mandal ölkəmizə səfəri çərçivəsində Azərbaycan Texniki Universitetində (AzTU) olub. Qonaq AzTU-nun rektoru professor Vilayət Vəliyev və universitetin rəhbər heyəti ilə görüşüb. Rektor Vilayət Vəliyev son illər AzTU-da həyata keçirilən yeniliklər, o cümlədən Türkiyənin aparıcı universitetləri ilə əməkdaşlıq əlaqələri, ikili diplom proqramları barədə məlumat verib. Bildirib ki, hazırda AzTU-nun hədəflərindən biri də universitet-sənaye əməkdaşlığının inkişafına nail olmaqla sahibkar universitetinə çevrilməkdir. Rektor bunun universitetdə tədqiqatların inkişafına töhfə verəcəyini deyib, həmçinin AzTU-nun tədqiqat institutları, onların fəaliyyət istiqamətləri haqqında geniş məlumat verib. TÜBİTAK-ın rəhbəri professor Hasan Mandal Azərbaycana səfəri çərçivəsində keçirdiyi görüşlərdən danışıb. Bildirib ki, hazırda TÜBİTAK uzunmüddətli tədqiqat platformalarının yaradılması, birgə layihələrin həyata keçirilməsi, gənclərin tədqiqat işlərinə dəstək göstərilməsi, elmi informasiya bazalarına daxil olmaq üçün lazımi dəstək mexanizmlərinin tətbiqini inkişaf etdirmək niyyətindədir. Görüş zamanı yeni əməkdaşlıq istiqamətləri də müzakirə olunub. Daha sonra TÜBİTAK-ın rəhbəri professor Hasan Mandal AzTU-nun kampusu və universitet-sənaye işbirliyi çərçivəsində aparılan yenidənqurma işləri ilə tanış olub.    

Azərbaycan Texniki Universiteti (AzTU) ilə “British Council” təşkilatının əməkdaşlığı çərçivəsində universitetin akademik heyətinin ingilis dili biliyinin qiymətləndirilməsi məqsədilə ilə APTİS imtahanı keçirilib. İmtahanda 80-ə yaxın professor-müəllim heyəti iştirak edib.