Azərbaycan Texniki Universitetinin (AzTU) Tələbə Gənclər Təşkilatının (TGT) təşkilatçılığı ilə tələbələrə antinarkomaniya mövzusunda seminar keçirilib.   Seminarda çıxış edən AzTU-nun Sosial İnkişaf Mərkəzinin direktoru Qəmər İsayeva bildirib ki, narkomaniya bəşəriyyətin ən qorxulu bəlasına çevrilib. Dünyanı ciddi şəkildə narahat edən bu problemlə bağlı gəncləri maarifləndirmək məqsədilə universitetdə mütəmadi olaraq antinarkomaniya mövzusunda seminarlar təşkil olunur. Daxili İşlər Nazirliyi (DİN) Baş Narkotiklərlə Mübarizə İdarəsinin müvəkkili, polis mayoru Kamran Mayılov narkomaniyanın bəşəriyyətə vurduğu fəsadlardan söz açıb. Qeyd edib ki, narkotiklərin qanunsuz dövriyyəsinə qarşı mübarizədə dövlətlə yanaşı, cəmiyyətin hər bir fərdi də fəal rol oynamalıdır. Eyni zamanda bu istiqamətdə maarifləndirmə işlərinin genişləndirilməsinin zəruriliyi də xüsusi vurğulanıb. Daha sonra  narkomaniyanın insan həyatına təhlükəsini və fəsadlarını əks etdirən müxtəlif videoçarxlar nümayiş olunub.

AzTU-da universitet-sənaye əməkdaşlığı kontekstində dövlət - akademiya - biznes və ictimai təşkilatların nümayəndələrinin birgə iştirakı ilə “Qida tullantılarının təkrar emalı” mövzusunda dəyirmi masa keçirilib. Dəyirmi masada Hacettepe Universitetinin professoru Türkiyənin İzmir şəhərində fəaliyyət göstərən “Ilgınlar” şirkətinin tədqiqat və inkişaf məsələləri üzrə məsləhətçisi Behzat Gürkan və şirkətin təmsilçisi Osman Ilgının geniş təqdimatları dinlənilib. Tədbirdə AzTU, İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti, Qida Təhlükəsizliyi Agentliyi, Azad İstehlakçılar Birliyi, “Sun Food” MMC, “Təhlükəli Tullantılar” MMC, “Təmiz Sumqayıt-Kənan” MMC, Azərbaycan Qida Təhlükəsizliyi İnstitutu, İqtisadi Elmi Tədqiqat İnstitutu, Azərbaycan Standartlaşma İnstitutu, “Təmiz Şəhər” ASC, Azərsun Holding, İqtisadi Zonaların İnkişafı Agentliyi, Kiçik və Orta Biznesin İnkişafı Agentliyi (KOBİA), Azərbaycan İnvestisiya Şirkəti, Veysəloğlu Şirkətlər Qrupu, “Azərbaycan Supermarket” MMC, Aqrar Tədqiqatlar Mərkəzinin nümayəndələri geniş müzakirələr aparıblar. Türkiyə Sənaye və Texnologiyalar Nazirliyi tərəfindən maliyyləşdirilən “Qida tullantılarının təkrar emalı” layihəsinin operatoru “Ilgınlar” sənayeyönümlü qida emalı və yem maddələri şirkətinin bu sahədə uzunmüddətli təcrübəsi müzakirələr zamanı böyük marağa səbəb olub. Qeyd olunub ki, vaxtı keçmiş və ya zay olmuş qida məhsullarının çeşidlənməsi, qida tullantılarının qiymətləndirilərək üzvü gübrə, şəkər tozu, etil spirti (sənaye məqsədli) və digər təkrar emalın aparılması ölkəmiz üçün də son dərəcə əhəmiyyətlidir. Tədbirdə çıxış edən AzTU-nun rektoru Vilayət Vəliyev son illər universitetdə magistratura səviyyəsində yerinə yetirilən dissertasiya tədqiqatlarında sosial-iqtisadi inkişafın problemlərinə həsr olunan mövzuların seçilməsini və qida tullantılarına dair bir neçə magistr işlərinin yerinə yetirildiyini vurğulayıb. Qeyd olunub ki, Dayanıqlı İnkişaf Məqsədlərinin (DİM) həyata keçirilməsi və universitetlərin sənayenin bu sektorunda iştirakı gələcək zaman üçün gözlənilən tələblərdir. Bu çağırışların fonunda AzTU-da akademik bilik və təcrübənin sənayeyə inteqrasiyası, dünyada istifadə olunan ən yaxşı təcrübələrin ölkəmizə gətirilməsi və tətbiqinin genişləndirilməsi istiqamətində əhəmiyyətli iş aparılır. Qeyd edək ki, sözügedən mövzu istiqaməti ötən il AzTU rektorunun Türkiyəyə səfəri çərçivəsində aparılan müzakirələr zamanı meydana gəlib. Bu istiqamətdə işlər AzTU-nun Universitet-Sənaye Əməkdaşlığı və Ömürboyu Təhsil Mərkəzi tərəfindən koordinasiya edilir.   

AzTU-nun “İnTech” komandası növbəti ödənişsiz təlimlərə start verib. Müsahibə əsasında seçilən tələbələr “Elektronika və mikrokontroller” və “Modelləmə və CNC” istiqamətində formalaşan qruplarlar üzrə həftədə 3 dəfə keçirilən təlimlərdə iştirak hüququ qazanıb. Təlimi müvəffəqiyyətlə bitirənlər yeni startaplara cəlb olunacaq, yarışlara dəvət ediləcək, layihələri üçün mentor dəstəyi alacaq, “CezeriLab” sertifikatı əldə edəcək, ən əsası isə işlə təmin olunmaq imkanı qazanacaqlar. Təlim dekabrın sonunda yekunlaşacaq.

Azərbaycan Texniki Universiteti (AzTU) və 1 nömrəli Bakı Tibb Kollecinin (1BTK) TGT-lərinin təşkilatçılığı ilə "Təməl həyat dəstəyi" mövzusunda təlim keçirilib. Əvvəlcə ulu öndər Heydər Əliyevin və torpaqlarımızın ərazi bütövlüyü uğrundan canlarından keçmiş Vətən övladlarının əziz xatirəsi bir dəqiqəlik sükutla yad olunub. AzTU TGT-nin sədri Ruslan Qənbərov və 1BTK TGT-nin sədri Elnur Həsənbəyli təlim haqqında tələbələrə ətraflı məlumat veriblər. Qeyd olunub ki, hər bir şəxs bilik və bacarıqlarını inkişaf etdirməklə yanaşı, sağlamlığının da qeydinə qalmalı və ilkin tibbi yardımla bağlı zəruri məlumatları bilməlidir. Daha sonra kollecin əməkdaşları suda boğulma, venoz qanaxma, epileptik tutmalar və digər təhlükəli məqamlar zamanı xəstəyə edilən ilkin tibbi yardım haqqında məlumat veriblər. Təlimin sonunda tələbələrin sualları cavablandırılıb.

Polşanın Maria Curie-Sklodowska Universitetinin və “Perspektivlər” Təhsil Fondununun nümayəndələri Azərbaycan Texniki Universitetinin (AzTU) qonağı olub. Görüşdə Maria Curie-Sklodowska Universiteti ilə AzTU arasında əməkdaşlıq istiqamətləri müzakirə olunub. Yaxın zamanlarda iki universitet arasında əməkdaşlığın yeni mərhələdə icrasına başlamaq qərarına gəlinib.   

“Nar” Azərbaycan Texniki Universiteti (AzTU) ilə birgə tələbələr üçün “Mobil rabitənin əsasları” təlimi təşkil edib. Rabitə sahəsinin peşəkar kadrlarını hazırlamaq məqsədilə keçilən təlim “Nar” GSM laboratoriyasında keçirilib. “Nar”ın peşəkar texniki heyəti tərəfindən hazırlanan təlimlərin mövzusu müxtəlif nəsil mobil texnologiyaların iş prinsiplərini, əşyaların interneti və cihazlararası bağlantı kimi sahələri əhatə edir. Təlimdə iştirak edən tələbələr təcrübədə əldə edilən biliklərə yiyələnir və gələcək işləri barədə bilmək istədiklərini “Nar” texniki heyətindən öyrənir. Sonda tələbələr “Nar”ın sertifikatı ilə təltif edilir. Budəfəki təlim zamanı, “Nar” GSM Laboratoriyası üçün 10 ədəd müasir noutbuk da təqdim edilib. Xüsusi proqram təminatları vasitəsilə bu noutbuklar GSM avadanlığının işini tənzimləyir və tələbələrə verilən tapşırıqları daha operativ həyata keçirməyə imkan yaradır. 2013-cü ildə imzalanmış əməkdaşlıq memorandumu əsasında universitetin nəzdində yaradılan “Nar” GSM laboratoriyası tələbələrin mobil rabitə cihazlarını istifadə və tədqiq etməyə imkan yaradır. Artıq 10 ildir ki, “Nar” və AzTU arasında faydalı əməkdaşlıq uğurla davam edir.

“İRƏLİ” İctimai Birliyinin təşkilatçılığı, Qeyri-Hökumət Təşkilatlarına Dövlət Dəstəyi Agentliyinin dəstəyi və Qərbi Azərbaycan İcmasının tərəfdaşlığı ilə “BÜTÖV – Qərbi Azərbaycana Qayıdış Prosesində Gənclərin Rolunun Artırılması” proqramı çərçivəsində növbəti görüş Azərbaycan Texniki Universitetində keçirilib. Yüzdən çox gəncin iştirakı ilə keçirilən tədbir Azərbaycan Respublikasının Dövlət Himninin səsləndirilməsi, eləcə də Vətənimizin azadlığı və suverenliyi uğrunda canından keçmiş şəhidlərin əziz xatirəsinin bir dəqiqəlik sükutla yad edilməsi ilə başlayıb. Tədbiri giriş sözü ilə açan “İRƏLİ” İctimai Birliyinin baş katibi İlqar Axundov proqram çərçivəsində baş tutacaq fəaliyyətlərlə bağlı tələbələrə məlumat verib. Diqqətə çatdırılıb ki, layihənin növbəti mərhələlərində Qərbi Azərbaycanın tarixini, mədəniyyətini, coğrafiyasını gənclərə aşılamaq, Azərbaycan həqiqətlərini beynəlxalq ictimaiyyətə düzgün və ətraflı şəkildə çatdırmaq məqsədilə təşəbbüs qruplarının yaradılması nəzərdə tutulur.  “AzTU TV” studiyasının direktoru Səfa Bağırov “BÜTÖV” proqramı çərçivəsində keçirilən görüşün keçirilməsinə görə “İRƏLİ” İctimai Birliyinə təşəkkürünü bildirib. Proqramın işinə uğurlar arzulayan Səfa Bağırov gəncləri layihə müddətində fəal olmağa çağırıb. Daha sonra “İRƏLİ” İctimai Birliyinin sədri Şahin Rəhmanlı və Qərbi Azərbaycan İcmasının sözçüsü Ülviyyə Zülfiqar çıxış ediblər. Qeyd olunub ki, tarixi Azərbaycan torpağı olan indiki Ermənistan ərazisində min illər boyu yaşayan soydaşlarımız etnik təmizləmə siyasətinin qurbanı olublar. Son əsrlər ərzində qərbi azərbaycanlıların mədəni irsinin məhv edilməsinin erməni dövlət siyasəti səviyyəsində həyata keçirildiyi tədbir iştirakçılarının diqqətinə çatdırılıb. Qərbi azərbaycanlıların tezliklə öz tarixi torpaqlarına qayıdacağına əminliyini vurğulayan natiqlər bu istiqamətdə “Qayıdış” konsepsiyasının önəmindən danışıb, gəncləri bu sahədə həyata keçirilən proseslərdə fəal iştiraka çağırıb. Qeyd edək ki, “BÜTÖV – Qərbi Azərbaycana qayıdış prosesində gənclərin rolunun artırılması” proqramının keçirilməsində əsas məqsəd Qərbi Azərbaycan tarixinin, Azərbaycan həqiqətlərinin təbliği, yerli və beynəlxalq səviyyədə gənclərin iştirakçılığının artırılması, Qərbi Azərbaycanla bağlı multimedia, elektron resursların bolluğunun yaradılması, eləcə də gənclər arasında tarixi torpaqlarımız haqqında məlumatlılığın artırılmasıdır.

Azərbaycan Texniki Universitetinin (AzTU) İqtisadiyyat və statistika kafedrasının təşkilatçılığı ilə menecment ixtisasının 3-cü və 4-cü kursunda təhsil alan tələbələr, həmçinin MBA proqramında təhsil alan magistrlər üçün “İnsan resurslarının idarə edilməsi peşəsi nədir?” mövzusunda onlayn vebinar keçirilib.   "Fireworks" şirkətinin təsisçisi, SHRM Beynəlxalq Sertifikasiya proqramı üzrə təlimçi Laura Həmidova uğurlu karyeranın qurulması zamanı diqqət olunmalı nüanslar, müsahibə mərhələsində davranış qaydaları, CV formasının hazırlanmasında vacib məqamlar və digər məlumatları tələbələrin diqqətinə çatdırıb. Bundan başqa, insan resursları istiqamətində çalışmaq istəyən tələbələr üçün zəruri olan kompetensiya və sertifikatların əldə edilməsi üsulları da diqqətə çatdırılıb. Vebinarın sonunda tələbələrin sualları cavablandırılıb.

Azərbaycan Texniki Universitetində (AzTU) Azərbaycan Dövlət Mədəniyyət və İncəsənət Universitetinin (ADMİU) 100 illik yubileyinə həsr olunan "Yüzillik" adlı konsert keçirilib. Tədbirdə AzTU-nun rektoru Vilayət Vəliyev, ADMİU-nun rektoru Ceyran Mahmudova, YAP Yasamal Rayon Təşkilatının sədri Bəxtiyar Nəbiyev, Yasamal Rayon İcra Hakimiyyəti başçısının müavini Təravət Muradova, millət vəkilləri Anar İsgəndərov və Naqif Həmzəyev, hər iki universitetin müəllim və tələbələri iştirak ediblər. ADMİU-nun 100 illik yubileyini təbrik edən AzTU-nun rektoru Vilayət Vəliyev universitetin yaranma tarixi və inkişafından danışıb. Bildirib ki, ADMİU-da mədəniyyət və incəsənət sahəsində yüksəkixtisaslı kadrların hazırlanması, milli- mənəvi dəyərlərimizin, mədəni irsimizin gələcək nəsillərə öyrədilməsi istiqamətində  əhəmiyyətli işlər görülür. Sonra AzTU adından ADMİU-nun rektoruna xatirə hədiyyəsi təqdim olunub. ADMİU-nun rektoru Ceyan Mahmudova qonaqpərvərliyə və universitetin yubileyinin keçirilməsinə göstərdiyi diqqətə görə AzTU-nun rektoruna təşəkkür edib. Çıxışlardan sonra tədbir konsert proqramı ilə davam edib. ADMİU-nun müəllim və tələbələrinin ifaları alqışlarla qarşılanıb. Konsertdən sonra "ADMİU-100 il" adlı auksion keçirilib. AzTU və ADMİU tələbələrinin əl işləri auksiona çıxarılıb. Əl işlərinin satışından əldə olunan gəlir sahiblərinə təqdim olunub.

Azərbaycan Texniki Universitetinin (AzTU) tərəfdaşı olduğu “Erasmus+ KA2” proqramı üzrə həyata keçirilən “Rusiya Federasiyası, Qazaxıstan və Azərbaycanda səhiyyədə strateji keyfiyyət menecmenti və risklərin idarə olunması üzrə açıq və distant təhsil formatında bakalavr və magistr hazırlığı” (LMQS) layihəsi çərçivəsində növbəti menecment görüşü Naxçıvanda keçirilib. Naxçıvan Dövlət Universitetinin ev sahibliyi ilə keçirilən görüşdə Azərbaycan və Qazaxıstandan olan tərəfdaşların 3 illik fəaliyyət hesabatları dinlənilib. Daha sonra layihənin koordinatoru Qərbi Attika Universitetinin nümayəndəsi professor Panayotis Yannakopoulos və layihənin eksperti Jean Noel Pachoud növbəti ildə görüləcək işlər və büdcənin təfərrüatları barədə məlumat veriblər. Menecment görüşündə AzTU-nu layihənin yerli koordinatoru professor Həsən Hüseynov və Beynəlxalq əlaqələr şöbəsinin baş mütəxəssisi Nabat Cabbarova təmsil edib.