Azərbaycan Texniki Universitetində (AzTU) YAP Yasamal rayon təşkilatı, universitetin Humanitar fənlər kafedrası, Tələbə Həmkarlar İttifaqı Komitəsinin (THİK) birgə təşkilatçılığı ilə Beynəlxalq Ana Dili Gününə həsr olunan tədbir keçirilib. Tədbirdə çıxış edən Humanitar fənlər kafedrasının müdiri Həbib Mirzəyev və kafedranın müəllimi Afaq Zeynalova ölkəmizdə Azərbaycan dilinin saflığının qorunması istiqamətində görülən işlər və həyata keçirilən tədbirlərdən danışıblar. Qeyd olunub ki, ana dilimiz bizim milli sərvətimizdir. Onun qorunması və gələcək nəsillərə olduğu kimi ötürülməsi hər bir azərbaycanlının vətəndaşlıq borcudur. Çıxışlardan sonra tədbir tələbələrin ifasında ana dilimizə həsr olunan şeir və mahnılarla davam edib.

Azərbaycan Texniki Universitetinin (AzTU) tərəfdaş olduğu “Azərbaycan ali təhsil sistemində davamlı sahibkarlıq ekosisteminin gücləndirilməsi” (ENGAGE) layihəsi çərçivəsində akademik heyət üçün məlumatlandırma sessiyası keçirilib. Sessiya zamanı Beynəlxalq əlaqələr şöbəsinin müdiri Orxan Vətənxah ENGAGE layihəsinin qısa icmalı, layihə çərçivəsində həyata keçirilən səfərlər və qazanılmış təcrübələr haqqında məlumat verib. Eyni zamanda, layihənin Avropa tərəfdaşları olan İsveçin Kral Texnologiya Universiteti, Estoniyanın Tallin Texnologiya Universiteti, İspaniyanın Kataloniya Politexnik Universiteti və Portuqaliyanın Lissabon Universitetində mövcud sahibkarlıq ekosistemi haqqında təqdimat nümayiş olunub, Azərbaycan universitetlərində tətbiq oluna biləcək yeniliklər müzakirə olunub.

İnformasiya Texnologiyaları İnstitutu ilə Azərbaycan Texniki Universitetinin (AzTU) elmi şuralarının birgə iclası keçirilib. Görüşdə hər iki elmi müəssisənin professor və müəllim heyəti, alim və mütəxəssisləri, eləcə də digər aidiyyəti şəxslər iştirak ediblər. Əvvəlcə AzTU-nun rəhbərliyi və digər məsul əməkdaşları institutun AzScienceNet, Tədris-İnnovasiya, Multimedia Texnologiyaları və Elektron Kitabxana Mərkəzi ilə yaxından tanış olublar. Sonra AMEA-nın vitse-prezidenti, İnformasiya Texnologiyaları İnstitutunun baş direktoru, akademik Rasim Əliquliyev tədbiri giriş sözü ilə açaraq ali məktəblə elmi müəssisənin elm, təhsil və innovasiyanın inteqrasiyası naminə birgə fəaliyyətinin böyük əhəmiyyət kəsb etdiyini, bu istiqamətdə dövlət başçısı İlham Əliyevin müvafiq dövlət qurumları və alimlərin qarşısına mühüm strateji vəzifələr qoyduğunu söyləyib. Elm və Təhsil Nazirliyinin tabeliyində fəaliyyət göstərən elmi müəssisələrə əldə olunmuş qabaqcıl biliklərin paylanması, təhsilə ötürülməsi, yüksəkixtisaslı kadrların hazırlanması və s. istiqamətlərdə ciddi tapşırıqların verildiyini bildirib.   Akademik Rasim Əliquliyev Azərbaycan Texniki Universiteti və İnformasiya Texnologiyaları İnstitutu arasında elmi-tədqiqat üzrə fəaliyyətin birgə həyata keçirilməsinə dair əməkdaşlıq haqqında Anlaşma Memorandumundan irəli gələn məsələlər, praktiki vəzifələr barədə məruzə ilə çıxış edib. İnstitutun əsas elmi problemləri və prioritetləri, bu elmi müəssisədə beynəlxalq əməkdaşlığın inkişafı istiqamətində görülən işlər, elmi və texnoloji dəstək qrantları, AzScienceNet şəbəkəsinin xidmətləri, institutun kadr potensialı, həmçinin Azərbaycan Texniki Universiteti ilə İnformasiya Texnologiyaları İnstitutu arasında əməkdaşlığın tarixi haqqında məlumat verib. Alim iki qurum arasında əməkdaşlıq çərçivəsində AzScienceNet şəbəkəsi, Data Mərkəz, Elektron Kitabxana və Tədris-İnnovasiya Mərkəzinin imkanlarından istifadənin nəzərdə tutulduğunu qeyd edib. Daha sonra Azərbaycan Texniki Universitetinin rektoru, professor Vilayət Vəliyev çıxış edib. O, universitetin əsas fəaliyyət istiqamətləri, qarşısında duran vəzifələr və prioritetlər, bu ali məktəbdə həyata keçirilən layihələr, əməkdaşlıq əlaqələri və s. haqqında ətraflı məlumat verib. Vilayət Vəliyev İnformasiya Texnologiyaları İnstitutu ilə elmi-tədqiqat üzrə birgə fəaliyyətlə yanaşı, tədrisin keyfiyyətinin yaxşılaşdırılması və kadr hazırlığı istiqamətində də uğurlu əməkdaşlığın həyata keçiriləcəyinə əminliyini ifadə edib. Texniki Universitetin bu elmi müəssisənin qabaqcıl təcrübəsindən, elmi potensialı və imkanlarından səmərəli istifadə etməsinin vacibliyini vurğulayıb. Professorun sözlərinə görə, AzTU-nun əsas prioritet istiqamətləri bilavasitə informasiya texnologiyalarının inkişafı, kibertəhlükəsizlik problemləri, süni intellekt həllərinin yaradılması kimi çox ciddi, aktual və ölkə əhəmiyyətli məsələlərin həllinə yönəlib. Rektor AzTU-da İT Departamentinin yenidən qurulmasında İnformasiya Texnologiyaları İnstitutunun mütəxəssislərinin imkanlarından istifadə olunmasının vacibliyindən də danışıb. AzTU-nun İnformasiya Texnologiyaları İnstitutunda gedən rəqəmsallaşma və innovasiya proseslərinə inteqrasiyasının məqsədəuyğun olduğunu qeyd edib: “Bu, universitetin resurslarına qənaət edilməsi, yeni baxışların ortaya qoyulması və daha səmərəli elmi tədqiqatların aparılması üçün geniş imkanlar yaradacaq”. Vilayət Vəliyev eyni zamanda AzTU tərərfindən daxili “Qrant Layihəsi Müsabiqəsi”nin elan olunması üçün prioritet elmi istiqamətlərin seçilməsi və müsabiqənin keçirilməsi şərtləri haqqında məlumat verib. Tədbirdə institutun şöbə müdiri, AMEA-nın müxbir üzvü Ramiz Alıquliyev də çıxış edərək kibertəhlükəsizlik ixtisası üzrə SABAH Magistri Proqramında təhsil alan magistrantların hazırlığının İnformasiya Texnologiyaları İnstitutunun mütəxəssisləri ilə birgə həyata keçirilməsi, mövzuların seçilməsi və rəhbərlərin təyin olunması ilə bağlı məlumatları diqqətə çatdırıb. Eləcə də institunun “Problems of Information Technology” jurnalının beynəlxalq elmmetrik bazalarda indeksləşdirilməsi istiqamətində birgə fəaliyyətin təşkili barədə məlumat verib. İclasda həmçinin iki qurum arasında birgə tədqiqatların həyata keçirilməsi, qrant layihələrdə iştirak, İKT kurslarının, konfrans, seminar və dərslərin təşkili, elmi-ekspertiza fəaliyyətinin  həyata keçirilməsi, dərsliklərin, tədris resurslarının hazırlanması, tərcümə olunması və s. istiqamətlərdə geniş fikri mübadiləsi aparıldı, müvafiq qərarlar qəbul edilib.

Azərbaycan Texniki Universiteti (AzTU) Kitabxana İnformasiya Mərkəzi (KİM) akademik informasiya bazaları üzrə aparıcı şirkət olan “Elsevier” şirkətinin bölgə təmsilçisi “Informascope” şirkəti ilə əməkdaşlıq nəticəsində Azərbaycanın ali təhsil müəssisələrində “Scopus” və “ScienceDirect” akademik informasiya bazaları üzrə silsilə təlimlər proqramına başlayıb. Məqsəd ölkədə “Scopus” və “ScienceDirect” akademik bazalarından istifadəni daha da artırmaqdır. Silsilə təlimlərin ilk görüşündə müxtəlif ali məktəb və institutlarından kitabxanaçı, müəllim və tətqiqatçılar iştirak edib. Əvvəlcə AzTU-nun tədris işləri üzrə prorektoru, professor Nurəli Yusifbəyli təlimin önəmindən danışıb. Sonra “Elsevier” şirkətinin bölgə üzrə baş meneceri Ayhan Saracoğlu tərəfindən “Scopus” və “ScienceDirect” bazalarına ümumi baxış, onların əhatə dairəsi, istifadə imkanları, hər iki bazanın tətbiq etdiyi yenilklər barəsində ətraflı məlumat verilib, praktiki tətbiqlər həyata keçirilib və iştirakçıların sualları cavablandırılıb. Sonda iştirakçılarla növbəti təlimlə bağlı müzakirələr aparılıb. Qeyd edək ki, təlimdə AzTU əməkdaşları və akademik heyətlə yanaşı, ADA Universiteti, Azərbaycan Dövlət İqtisad Universiteti, Azərbaycan Dövlət Pedaqoji Universiteti, Azərbaycan Dillər Universiteti, Azərbaycan Dövlət Bədən Tərbiyəsi və İdman Akademiyası, Bakı Slavyan Universiteti, Molekulyar Biologiya və Biotexnologiyalar İnstitutu, Polis Akademiyası, Fövqəladə Hallar Nazirliyinin Akademiyası, Dövlət Gömrük Komitəsinin Akademiyası, Azərbaycan Dövlət Neft və Sənaye Universiteti, Azərbaycan Dövlət Mədəniyyət və İncəsənət Universiteti və Odlar Yurdu Universitetinin kitabxanasının nümayəndələri iştirak edib. 

“Xocalıya Ədalət!” kampaniyası çərçivəsində Azərbaycan Gənclər Fondu və Azərbaycan Texniki Universitetinin (AzTU) dəstəyi, “Gənclərin Maarifləndirilməsinə Dəstək” İctimai Birliyinin təşkilatçılığı ilə “Reza Deqatinin gözündə Xocalı soyqırımı” adlı görüş keçirilib. AzTU-da təşkil olunan görüşdə əvvəlcə Azərbaycanın Dövlət Himni səsləndirilib, ölkəmizin müstəqilliyi və ərazi bütövlüyü uğrunda şəhidlik zirvəsinə yüksələn Vətən övladlarının əziz xatirəsi bir dəqiqəlik sükutla yad edilib. Görüşdə Xocalı faciəsini çəkdiyi fotolarla dünyaya çatdıran fotojurnalist Reza Deqati də iştirak edib. Tədbirdə çıxış edən AzTU-nun sosial məsələlər və ictimaiyyətlə əlaqələr üzrə prorektoru Nərmin Rzayeva Xocalı faciəsinin hər il yad edilməsinin önəmini diqqətə çatdırıb. Gənclər Fondunun icraçı direktoru vəzifəsini icra edən Qədir Xəlilov soyqırımı barədə həqiqətlərin beynəlxalq ictimaiyyətə çatdırılmasında Azərbaycan dövlətinin zəruri addımlar atdığını qeyd edib.  Dünyaşöhrətli fotojurnalist Reza Deqati Xocalı faciəsi, Vətən müharibəsi və Qarabağda yenidənqurma işləri zamanı çəkdiyi fotoları təqdim edib, şahidi olduğu hadisələrdən danışıb. O, həmin ağrılı və acılı günlərin indi də gözünün önündə olduğunu deyib. Fotoqraf Xocalıda çəkdiyi fotolarla bağlı həqiqətləri hər zaman dünyaya çatdırmağa çalışdığını bildirib. Qeyd edək ki, Reza Deqati Azərbaycan həqiqətlərini dünyaya çatdırmaq üçün bir sıra Avropa ölkələrində sərgilər təşkil edib.

Azərbaycan Texniki Universitetinin (AzTU) Metallurgiya və materialşünaslıq fakültəsinin II kurs tələbəsi Sahil Əhmədli ürək tutmasından vəfat edib. AzTU-nun rəhbərliyi və kollektivi Sahil Əhmədlinin vaxtsız vəfatından kədərlənir, ailəsinə və yaxınlarına başsağlığı verir. Allah rəhmət eləsin!

Dünyaşöhrətli fotojurnalist, həmyerlimiz Reza Deqati Azərbaycan Texniki Universitetinin (AzTU) qonağı olub. Qonağı AzTU-da salamlamaqdan məmnunluğunu bildirən rektor Vilayət Vəliyev Reza Deqatinin 90-cı illərdə xalqımıza qarşı törədilən faciələr zamanı lentə aldığı fotolar vasitəsilə Azərbaycan həqiqətlərinin dünyaya çatdırılmasında mühüm rolunu qeyd edib. 44 günlük Vətən müharibəsi zamanı ermənilərin Azərbaycanın dinc əhalisinə qarşı törətdiyi cinayətlərin geniş auditoriyaya Reza Deqatinin obyektivi vasitəsilə çatdırıldığı da xüsusi vurğulanıb. Dünyaşöhrətli fotojurnalist Reza Deqati bildirib ki, fotojurnalistika təcrübəsində onu 1992-ci ildə Xocalıda gördüyü dəhşətli mənzərə qədər təsirləndirən məqamlar olmayıb. Fotojurnalist deyib ki, Ali Baş Komandan, Prezident İlham Əliyevin siyasi iradəsi, ordumuzun gücü nəticəsində haqq-ədalət öz yerini tapıb, işğala son qoyulub, Xocalı azad olunub. O, Xocalı faciəsi, Vətən müharibəsi və Qarabağda yenidənqurma işləri zamanı çəkdiyi fotoları hər zaman beynəlxalq ictimaiyyətin diqqətinə çatdırmağa çalışacağını bildirib. Qeyd edək ki, görüşdə Gənclər Fondunun icraçı direktoru vəzifəsini icra edən Qədir Xəlilov da iştirak edib.    

Ali təhsil müəssisələrinin ictimaiyyətlə əlaqələr üzrə nümayəndələri ilə görüş keçirilib.   Görüşdə Elm və Təhsil Nazirliyinin, Elm və Ali Təhsil üzrə Dövlət Agentliyinin və ali təhsil müəssisələrinin nümayəndələri iştirak ediblər.   Söhbət zamanı ictimaiyyət və media ilə işin təkmilləşdirilməsi, media sahəsində peşəkar vərdişlərin inkişafına dəstək olmaq, ali təhsil müəssisələri arasında kommunikasiyanın gücləndirilməsi və bu istiqamətdə birgə əməkdaşlıq imkanları müzakirə olunub.   Görüşdə Azərbaycan Texniki Universitetini (AzTU) İctimaiyyətlə əlaqələr şöbəsinin müdiri - mətbuat katibi Sevinc İsgəndərova təmsil edib. 

Azərbaycan Texniki Universitetində (AzTU) yerləşən “Bilişim Vadisi Bakı”ya üzv olan 20 şirkətin nümayəndələri ilə görüş keçirilib. “Bilişim Vadisi Bakı”nın direktoru Qamət Kərimov qonaqları salamlayaraq, görüşün əsas məqsədinin dövlət-universitet-sənaye sahəsində əməkdaşlıq imkanlarının qurulması, innovativ layihələrin həyata keçirilməsi istiqamətində müzakirələrin aparılması olduğunu bildirib.  AzTU-nun rektoru Vilayət Vəliyev dünyada texnopark anlayışının çox əhəmiyyətli məsələyə çevrildiyini bildirib. Rektor Bilişim Vadisi ilə əməkdaşlığın əsas hədəfinin Bilişim Vadisinə üzv şirkətlərin AzTU, eləcə də digər universitetlərə müəyyən texnoloji dəstəyin verilməsi olduğunu vurğulayıb. Təhsilin İnkişafı Fondunun İdarə Heyətinin sədri Elnur Nəsibov Fondun yaranması, əsas fəaliyyət istiqamətləri, hazırda icra edilən layihələr haqqında görüş iştirakçılarını məlumatlandırıb. Təhsilin İnkişafı Fondunun həm dövlət, həm özəl şirkətlər ilə əməkdaşlığa açıq olduğunu qeyd edən sədr, tərəfdaşlarla birgə sosial və biznes yönlü layihələrin həyata keçirildiyini diqqətə çatdırıb. Elnur Nəsibov iclasın keçirildiyi AzTU-da yerləşən Davamlı İnkişaf Mərkəzinin də Fondla əməkdaşlıq çərçivəsində qurulduğunu qeyd edib. Görüş “Bilişim Vadisi Bakı”ya üzv olan şirkət nümayəndələrinin təqdimatları və müzakirələrlə davam edib.

“Yüksəliş” müsabiqəsi qaliblərinin tələbələrlə Mentorluq proqramı çərçivəsində növbəti görüşü keçirilib. İkinci “Yüksəliş” müsabiqəsinin qalibi Xanbaba Sultanlı proqrama qəbul olunan Azərbaycan Texniki Universitetinin (AzTU) Xüsusi texnika və texnologiya fakültəsinin 4-cü kurs tələbəsi Sənan Veysəlovla tanışlıq görüşü keçirib. Görüşdə Xanbaba Sultanlı öz bacarıqlarını inkişaf etdirmək, yeni biliklər əldə etmək, karyera hədəflərini düzgün müəyyənləşdirmək barədə atılacaq ilkin addımlardan bəhs edib. Yeni layihələrin uğurlu icrası, innovativ texnologiyalardan istifadə edərək rəqabət qabiliyyətini gücləndirmək məqsədilə aparılan islahatlar barədə məlumat verib, AzTU tələbəsinin bu mövzuda fikirlərini dinləyib. O, Mentorluq proqramının gələcək gedişatı ilə əlaqədar atılacaq addımları bölüşüb.  AzTU tələbəsi Sənan Veysəlov isə öz növbəsində ixtisas artımı istiqamətində yararlı olacaq layihələrdə iştirak etməkdə maraqlı olduğunu qeyd edib, Mentorluq proqramı çərçivəsində yaradılan imkana və səmimi görüşə görə təşəkkürünü bildirib.   Tələbələr üçün Mentorluq proqramının əsas məqsədi 3-cü və 4-cü kurs tələbələrinin “Yüksəliş” müsabiqəsinin qaliblərinin idarəçilik təcrübəsindən yararlanmasını və gələcək karyera fəaliyyəti ilə bağlı tövsiyələr almasını təmin etməkdir. Mentorluq proqramının sonunda “Yüksəliş” müsabiqəsinin qalibləri tərəfindən tələbələrə tövsiyə məktubu təqdim ediləcək. “Yüksəliş” müsabiqəsinin təşəbbüsü ilə start götürən proqrama 65 nəfər tələbə qəbul olunub. Seçim tələbələrin tərcümeyi-halı və motivasiya məktublarına əsasən həyata keçirilib. Proqramın 2024-cü ilin iyun ayının sonunadək davam etməsi gözlənilir.  Onu da bildirək ki, tələbələrin tərcümeyi-halı və motivasiya məktublarının seçim üçün Mentorluq proqramına göndərilməsi AzTU-nun Karyera və Məşğulluq Mərkəzi tərəfindən həyata keçirilir. Qeyd edək ki, “Yüksəliş” müsabiqəsi Prezident İlham Əliyevin 26 iyul 2019-cu il tarixində imzaladığı Sərəncamla intellektual səviyyəsi və idarəçilik bacarıqları yüksək olan perspektivli rəhbər şəxslərin müəyyən edilməsini, dəstəklənməsini və ölkədə kadr ehtiyatı bankının yaradılmasını təmin etmək məqsədilə təsis olunub.