Azərbaycan Texniki Universitetinin (AzTU) Yüksək Təhsil İnstitutu və Tədqiqat və inkişaf şöbəsinin təşkilatçılığı ilə doktorantura səviyyəsi üzrə təhsil alan tələbələrlə görüş keçirilib. Görüşdə elm və innovasiyalar üzrə prorektor Sübhan Namazov, beynəlxalq əlaqələr üzrə prorektor Fariz Məmmədov, Yüksək Təhsil İnstitutunun direktoru Anar Eminov, Tədqiqat və inkişaf şöbəsinin müdiri Bəxtiyar Bədəlov, Magistratura və doktorantura şöbəsinin müdiri Şahin Maşayev iştirak ediblər. Məqsəd doktorantların tədqiqat fəaliyyəti ilə tanışlıq, onların universitetlə əlaqələrinin gücləndirilməsi, tədris və tədqiqat fəaliyyətinə cəlb edilməsi imkanlarının müzakirəsi olub. Görüşdə qeyd olunan məsələlərlə bağlı fikir mübadiləsi aparılıb, doktorantları maraqlandıran suallar cavablandırılıb.

Azərbaycan Texniki Universitetinin (AzTU) Maşın dizaynı və sənaye texnologiyaları kafedrasının müəllimi Anar Hacıyev “Erasmus+ KA171” mübadilə proqramı çərçivəsində Polşanın Rzeszow Texniki Universitetində akademik heyət üçün nəzərdə tutulmuş bir həftəlik mobillikdə iştirak edib. Anar Hacıyev Rzeszow Texniki Universitetində mühəndislik ixtisaslarının tədris metodologiyası ilə tanış olub, universitetin İstehsalat texnologiyaları və istehsalat mühəndisliyi kafedrasının akademik heyəti ilə birlikdə çalışmaq, müasir tədqiqat texnologiyaları ilə bağlı məlumatlar əldə etmək imkanı qazanıb. O, həmçinin Mexanika mühəndisliyi və aeronavtika fakültəsinin tələbələrinə mühazirə deyib.

Ölkəmizə səfərləri çərçivəsində Almaniyanın “Siemens Energy” şirkətinin Elm və texnika bölməsinin rəhbəri Yaşar Musayev və “DCH” Şirkətlər Qrupunun baş icraçı direktoru Gang Zhang Azərbaycan Texniki Universitetində (AzTU) olublar. “Siemens Energy”nin dünyada və ölkəmizdə uzunmüddətli fəaliyyətini diqqətə çatdıran Yaşar Musayev təmsil etdiyi şirkətin ali təhsil müəssisələri ilə əməkdaşlığa, xüsusilə birgə tədqiqatların yerinə yetirilməsinə önəm verdiyini bildirib. Geniş təqdimatla çıxış edən Gang Zhang rəhbərlik etdiyi şirkətlər qrupunun dünyada günəş enerjisi texnologiyaları sahəsində aparıcı şirkətlərdən biri olduğunu bildirib. O,  “DCH”in bərpa olunan enerji sahəsində davamlı olaraq texnoloji yeniliklər həyata keçirdiyini də diqqətə çatdırıb. AzTU-da görülən işlər və həyata keçirilən yeniliklər haqqında qonaqlara məlumat verən rektor Vilayət Vəliyev Azərbaycanda dayanıqlı sosial-iqtisadi inkişafın təmin edilməsi baxımından yaşıl enerji texnologiyalarının tətbiqinin genişləndirilməsinə xüsusi diqqət ayrıldığını bildirib. Rektor ölkədə texniki sahədə fəaliyyət göstərən ali təhsil müəssisələrinin sözügedən istiqamətdə tədris və tədqiqat fəaliyyətinin daha da gücləndirilməsinin əhəmiyyətini vurğulayıb. Daha sonra AzTU ilə şirkətlər arasında tədqiqat sahəsində əməkdaşlıq imkanları müzakirə olunub.

Noyabrın 28-də Elm və Təhsil Nazirliyinin (ETN) təşkilatçılığı ilə “Effektiv kommunikasiya” mövzusunda seminar-təlim keçirilib.    Seminar-təlimin keçirilməsində məqsəd Elm və Təhsil Nazirliyinin tabeliyindəki qurumların əsas fəaliyyət istiqamətləri barədə geniş məlumatlandırma işini aparmaq, media sahəsində peşəkar vərdişlərin inkişafına dəstək olmaq, qurumlar və media arasında kommunikasiyanın düzgün təşkili kimi mövzularla bağlı bilik və bacarıqları təkmilləşdirməkdir.     Seminar-təlimdə nazirliyin qurum və layihələrinin, regional təhsil idarələrinin, ali təhsil müəssisələrinin ictimaiyyətlə əlaqələrə məsul əməkdaşları və media təmsilçiləri iştirak ediblər. Tədbirdə Azərbaycan Texniki Universitetini (AzTU) İctimaiyyətlə əlaqələr şöbəsinin müdiri - mətbuat katibi Sevinc İsgəndərova təmsil edib.    Açılış nitqi ilə çıxış edən Elm və Təhsil Nazirliyinin Aparat rəhbəri Mətin Kərimli iştirakçıları salamlayaraq seminar-təlimin əsas məqsədinin kommunikasiyanı möhkəmləndirmək, daha operativ informasiyanı təmin etmək olduğunu diqqətə çatdırıb.    Mətin Kərimli əlavə edib ki, həm media subyektləri, həm də Elm və Təhsil Nazirliyinin müxtəlif qurumları arasındakı mövcud şəbəkələşməni artırmaq da əsas məqsədlər sırasındadır.    Daha sonra Elm və Təhsil Nazirliyinin Təhsil islahatlarının əlaqələndirilməsi şöbəsinin müdiri Leyla Xəlilova "Elm və Təhsil Nazirliyinin Fəaliyyət Planı: əsas strateji istiqamətlər", Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov "Məktəbəqədər və Ümumi Təhsil üzrə Dövlət Agentliyinin fəaliyyət istiqamətləri", Elm və Ali Təhsil üzrə Dövlət Agentliyinin direktoru Ülkər Səttarova "Elm və Ali Təhsil üzrə Dövlət Agentliyinin fəaliyyət istiqamətləri" mövzularında təqdimatlar ediblər.    Seminar-təlim çərçivəsində Peşə Təhsili üzrə Dövlət Agentliyinin direktoru Ceyhun Kərəmov "Peşə təhsili: uğurlar və yeni çağırışlar", Təhsildə Keyfiyyət Təminatı Agentliyinin İdarə Heyətinin sədr müavini, sədr vəzifəsinin müvəqqəti icraçısı Kamran Rəsulov "Təhsildə Keyfiyyət Təminatı Agentliyinin 2023-cü il ərzində fəaliyyət istiqamətləri" mövzusunda təqdimatlarla çıxışlar edib.    Seminar-təlimdə iştirak edən Dövlət Proqramı çərçivəsində ABŞ-nin Cənubi Florida Universitetində doktorantura təhsili alan Lalə Orucovanın təqdimatında "Hekayə necə yaradılır?" mövzusunda təlim keçirilib.   Seminar-təlim çərçivəsində iştirakçıları maraqlandıran çoxsaylı suallar cavablandırılıb.

Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti ilə Azərbaycan Texniki Universiteti (AzTU) arasında 2022-ci il 5 noyabr tarixində imzalanan əməkdaşlıq haqqında memorandumda nəzərdə tutulmuş müvafiq bəndin icrası ilə əlaqədar universitetin informasiya təhlükəsizliyi ixtisasında təhsil alan bakalavr və magistr tələbələri üçün növbəti müsabiqə keçirilib. Ulu öndər Heydər Əliyevin 100 illiyinə həsr olunan iki mərhələli müsabiqədə tələbələrin kibertəhlükəsizlik sahəsində biliklərinin yoxlanılması və təqaüdlərin verilməsi nəzərdə tutulub. Müsabiqənin nəticələrinə əsasən, AzTU-nun İnformasiya və telekommunikasiya texnologiyaları fakültəsinin (bakalavriat səviyyəsi) 3-cü kurs tələbələri Orxan Cəfərov, İsmayıl Hüseynli və 4-cü kurs tələbəsi Rəvan Abdinov, “SABAH Magistratura” proqramının (kibertəhlükəsizlik ixtisası üzrə) 2-ci kurs tələbəsi Aytac İbrahimova xüsusi fərqləniblər. Qaliblər Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti tərəfindən təqaüdlə mükafatlandırılıb. Bununla yanaşı, onlar təcrübə proqramından da yararlanacaqlar. Qeyd edək ki, memorandum çərçivəsində növbəti semestrlərdə də xüsusi fərqlənən tələbələrə təqaüdlərin verilməsi üçün müsabiqələrin keçirilməsi nəzərdə tutulur.

Azərbaycan Texniki Universitetinin (AzTU) Tələbə Həmkarlar İttifaqı Komitəsinin (THİK) “Sağlam gənclik – sağlam gələcək” adlı maarifləndirmə aksiyası keçirilib. Səhiyyə Nazirliyinin Respublika QİÇS-lə Mübarizə Mərkəzinin (RQMM) təşəbbüsü ilə təşkil olunan aksiyada universitetin müəllim və tələbələri iştirak ediblər. Tədbirdə ali təhsil ocağının tələbələrinə sağlamlığa ciddi təhlükə olan İnsanın İmmunçatışmazlığı Virusu (İİV) və Qazanılmış İmmun Çatışmazlığı Sindromu (QİÇS) haqqında geniş məlumat verilib. Təcrübəli həkimlər xəstəlik və virusun yoluxma yolları, profilaktikası, müayinəsi və müalicəsi ilə bağlı təqdimatla çıxış ediblər. Mərkəzdə müayinə və müalicənin anonim, ödənişsiz qaydada icra olunduğu, vaxtında müəyyən edilən diaqnozla ölüm hallarının qarşısının alınmasının mümkünlüyü tədbir iştirakçılarının diqqətinə çatdırılıbMütəxəssislərə ünvanlanan fərdi suallar cavablandırılıb, İİV/QİÇS-ə aid broşurlar, bukletlər paylanıb. Həmçinin RQMM-in əməkdaşlarının təşkil etdiyi səyyar tibbi müayinə məntəqəsində universitetin müəllim və tələbələri üçün İİV-ə ekspres-testdən keçmək imkanı yaradılıb.

Azərbaycan Texniki Universitetində (AzTU) süni intellekt texnologiyaları və kibertəhlükəsizlik sahələrində fəaliyyət göstərən dövlət qurumları nümayəndələrinin, şirkət rəhbərlərinin, mühəndislərin iştirakı ilə sektor görüşü keçirilib. Tədbir AzTU və “Bilişim Vadisi Bakı”nın birgə təşkilatçılığı ilə təşkil olunub.  Əvvəlcə “Bilişim Vadisi Bakı”nın direktoru Qamət Kərimov sektor görüşü barədə iştirakçılara məlumat verib. Qamət Kərimov “Bilişim Vadisi Bakı”da görülən işlərdən, həmçinin universitetlərdə texnoparkların yaradılmasının önəmindən danışıb. Tədbirdə çıxış edən AzTU-nun rektoru Vilayət Vəliyev Azərbaycanda texnoloji proseslərin sürətlə inkişaf etdiyi bildirib. Qeyd edib ki, artıq universitetlər də tədris və tədqiqat proqramlarını müasir texnoloji proseslərə uyğunlaşdırır. Rektor deyib ki, 44 günlük Vətən müharibəsində Azərbaycan Ordusunun savaş strategiyası, müasir texnologiyalardan düzgün istifadə olunması dünya hərb tarixində bir ilk idi. Bu mənada son illər ölkəmizdə müdafiə sənayesi üzrə yüksəkixtisaslı kadrların hazırlanması, onların müasir bilik və bacarıqlara yiyələnməsi dövlətin diqqət mərkəzindədir.  Regionda müdafiə sənayesi üzrə kadr hazırlayan ilk və yeganə universitet olan AzTU-nun bu istiqamətdə üzərinə böyük vəzifələr düşür. Müdafiə sənayesi üzrə yüksəkixtisaslı kadrlar AzTU-nun Xüsusi texnika və texnologiya fakültəsində hazırlanır. Rektor deyib ki, AzTU müdafiə sənayesi istiqamətində Türkiyə universitetləri və şirkətləri ilə sıx əməkdaşlıq edir. Tədbirdə “Bilişim Vadisi Bakı”nın rezidenti Türkiyənin “Ordulu Texnologiya” şirkətinin qurucusu Nizaməddin Ordulu süni intellekt texnologiyalarının müdafiə sənayesi sahəsində tətbiqinə həsr olunan təqdimatla çıxış edib. Daha sonra AzTU-da fəaliyyət göstərən “Bilişim Vadisi Bakı” ziyarət olunub.

“Erasmus+” proqramı üzrə həyata keçirilən “Azərbaycan və Rusiya ali təhsil müəssisələrində tədris, təlim və qiymətləndirmə prosesinin daxili keyfiyyət təminatının təkmilləşdirilməsi” (IQAinAR) layihəsi çərçivəsində İspaniyanın Mursiya şəhərində təlimlər təşkil olunub. Təlimlər layihənin tərəfdaşı Mursiya Katolik Universitetinin təşkilatçılığı və ev sahibliyi ilə keçirilib.     Təlimlərin proqramı çərçivəsində Azərbaycan universitetlərində də tətbiqi nəzərdə tutulan keyfiyyətə nəzarət siyasəti, institusional səviyyədə həyata keçiriləcək fəaliyyətlər, layihənin qarşısında duran tapşırıqlar müzakirə olunub, keyfiyyət meyarlarının pilot olaraq sınaqdan keçirilməsi tövsiyə edilib.   Açılış mərasimində layihənin koordinatoru Niderlandın Vittenborq Tətbiqi Elmlər Universitetinin baş icraçı direktoru Maggie Feng, Mursiya Katolik Universitetinin beynəlxalq əlaqələr üzrə prorektoru Pablo Blesa Aledo və beynəlmiləlləşmə üzrə fakültə koordinatoru, tədqiqatçı və lektor Katrin Schuette salamlama nitqi ilə çıxış edib və layihənin benefisiar universietelərə töhfələri barədə danışıblar. Səfərdə AzTU-nu beynəlxalq əlaqələr üzrə prorektor Fariz Məmmədov, Beynəlxalq əlaqələr şöbəsinin müdiri Orxan Vətənxah, Beynəlxalq əlaqələr şöbəsinin beynəlxalq əməkdaşlıq və mübadilə üzrə qrup rəhbəri Mənzər Məmmədli, Tədris şöbəsinin müdiri Sevda Hacıbəyova və İqtisadiyyat və idarəetmə fakültəsinin dekanı Fərqanə Musayeva təmsil ediblər. Təlimlər çərçivəsində beynəlxalq əlaqələr üzrə prorektor Fariz Məmmədov İspaniyanın televiziya kanalına AzTU-da görülən işlər haqqında müsahibə verib və IQAinAR layihəsi barədə gözləntilərini diqqətə çatdırıb.

Azərbaycan Texniki Universitetində (AzTU) universitetin məzunu, Aprel döyüşləri şəhidi Əbdülməcid Axundovun 30 illik yubileyinə həsr olunan tədbir keçirilib. Tədbirdə şəhidin ailə üzvləri, şəhid ailələri, qazilər və universitetin nümayəndələri iştirak ediblər. Əvvəlcə torpaqlarımızın ərazi bütövlüyü və suverenliyi uğrunda canlarından keçən Vətən övladlarının əziz xatirəsi bir dəqiqəlik sükutla yad olunub. Azərbaycanın Dövlət Himni səsləndirilib. Daha sonra “Mən səninləyəm, Ana Vətən!” adlı bədii-sənədli film nümayiş olunub. Tədbirdə çıxış edənlər Əbdülməcid Axundovla bağlı xatirələrini bölüşüblər. Qeyd olunub ki, Əbdülməcid Axundov istər məktəbdə, istərsə də universitetdə təhsil aldığı vaxtlarda həm təhsili, həm də vətənpərvərliyi ilə nümunə olub. O da vurğulanıb ki, AzTU-da şəhid tələbə və məzunların xatirəsinin əbədiləşdirilməsi, onların qəhrəmanlığının gələcək nəsillərə ötürülməsi istiqamətində müxtəlif layihələr həyata keçirilir, tədbirlər təşkil olunur. Əbdülməcid Axundovun valideyni Ceyran Həsənova AzTU-da şəhidlərin əziz xatirəsinin hər zaman yad olunduğunu vurğulayıb. Bildirib ki, şəhidlərin qəhrəmanlığının gələcək nəsillərə ötürülməsi gənclərdə vətənpərvərlik hisslərinin yüksəlməsinə xidmət edir. Tədbirdə Əməkdar artist Aqşin Abdullayev və digər ifaçılar vətənpərvərlik mövzusunda mahnılar ifa ediblər.

“Erasmus+ KA2” proqramı üzrə həyata keçirilən “Azərbaycanda institusional repozitoriyalar (elektron arxivlər) şəbəkəsi vasitəsilə tədqiqat potensialının inkişaf etdirilməsi” (DIRNA) layihəsi çərçivəsində Türkiyənin İzmir Yüksək Texnologiya İnstitutuna səfər təşkil olunub. Səfər çərçivəsində keçirilən təlimdə Azərbaycan Texniki Universitetini (AzTU) Kitabxana İnformasiya Mərkəzinin (KİM ) direktoru Xəyalə Hacıyeva və  kitabxana sitemləri və rəqəmsallaşdırma prosesləri üzrə baş məsləhətçi İltifat İbrahimov təmsil edib. Təlimdə İzmir Yüksək Texnologiya İnstitutunun institusional rəqəmsal repozitariyası olan GCRİS elektron arxiv sistemi, onun texniki infrastrukturu, idarəetmə paneli, metaverilənlərin sistemə daxil edilməsi standartları və digər mövzularda məruzələr dinlənilib. Bundan başqa, repozitariyaların qurulması, metadatanın formalaşdırılması istiqamətində müzakirələr aparılıb, iştirakçıların sualları cavablandırılıb. Səfər çərçivəsində iştirakçıların İzmir Yüksək Texnologiya İnstitutunun rektoru professor Yusuf Baranla görüşü olub.