Azərbaycan Texniki Universitetinin (AzTU) Xarici dillər kafedrasının müəllimi Leyla Quliyeva “Erasmus+” mübadilə proqramı çərçivəsində Rumıniyanın Kluj-Napoka Texniki Universitetində akademik heyət üçün nəzərdə tutulmuş bir həftəlik mobillikdə iştirak edib. Leyla Quliyeva Kluj-Napoka Texniki Universitetinin Müasir dillər və kommunikasiya kafedrasının fəalliyəti ilə yaxından tanış olub, akademik heyətlə görüşərək AzTU-nun Xarici dillər kafedrasının fəaliyyəti barədə ətraflı məlumat verib. İki kafedra arasında mümkün əməkdaşlıq imkanları müzakirə olunub. Leyla Quliyeva həmçinin, kompüter elmləri ixtisası üzrə təhsil alan tələbələrə "Təqdimatlar və müsahibə" mövzusunda mühazirə deyib.

Azərbaycan Texniki Universitetinin (AzTU) Mexatronika kafedrasının müdiri professor İftixar Çələbi Almaniyada səfərdə olub. Səfər çərçivəsində İftixar Çələbi Drezden şəhərində keçirilən "DMK-2024" adlı texniki alman universitetlərinin təmsil olunduğu konfransda məruzə ilə çıxış edib. Daha sonra İftixar Çələbi Hannover və Aaxen universitetlərinə səfər edib, bu universitetlərdə mütəxəssislərlə işgüzar görüşlər keçirib, mexatronika və robototexnika laboratoriyaları ilə tanış olub. 

İstanbul Bahçeşehir Universitetinin rektoru professor Esra Hatipoğlunun başçılıq etdiyi nümayəndə heyəti ölkəmizə səfəri çərçivəsində Azərbaycan Texniki Universitetinin (AzTU) qonağı olub. Qonaqlar AzTU-nun rektoru professor Viliayət Vəliyev və universitetin nümayəndələri ilə görüşüblər. Rektor Vilayət Vəliyev AzTU-da görülən işlər və həyata keçirilən yeniliklər haqqında qonaqlara ətraflı məlumat verib. Esra Hatipoğlu İstanbul Bahçeşehir Universitetinin fəaliyyəti barədə geniş məlumat verib. Görüşdə müvafiq istiqamətlər üzrə əməkdaşlıq imkanları müzakirə olunub.

YAP Yasamal rayon təşkilatının dəstəyilə ümumilli lider Heydər Əliyevin 101 illiyinə həsr olunmuş şahmat, dama, voleybol, basketbol, stolüstü tennis və futzal idman növləri üzrə keçirilən turnirə yekun vurulub. Azərbaycan Texniki Universitetinin (AzTU) komandası basketbol və stolüstü tennis yarışlarında birinci, dama, şahmat və futzal yarışlarında ikinci olublar. Azərbaycan Tələbə Futbol Liqası İctimai Birliyinin Tələbə Liqası çempionatında isə AzTU İdman Klubunun futzal komandası 3-cü olub.

Azərbaycan Texniki Universitetinin (AzTU) məzunu şəhid Nəriman Həmidovun xatirə gecəsi keçirilib. Tədbirdə Nəriman Həmidovun ailə üzvləri, döyüş yoldaşları, şəhid ailələri, müharibə veteranları, AzTU-nun tələbə və müəllimləri iştirak edib. Əvvəlcə torpaqlarımızın ərazi bütövlüyü və suverenliyi uğrunda canlarından keçən Vətən övladlarının xatirəsi bir dəqiqəlik sükutla yad olunub. Azərbaycanın Dövlət Himni səsləndirilib. Tədbirdə çıxış edən AzTU-nun sosial məsələlər və ictimaiyyətlə əlaqələr üzrə prorektoru Nərmin Rzayeva universitetdə şəhid məzunların xatirəsinin hər zaman yad olunduğunu bildirib. Daha sonra çıxış edən şəhidin bacısı Səkinə Həmidova, döyüş yoldaşları və yaxınları onun haqqında xatirələrini bölüşüb, keçdiyi şərəfli ömür yolundan və döyüşlərdəki qəhrəmanlıqlarından danışıblar. Tədbirdə şəhid Nəriman Həmidov adına 208 nömrəli orta məktəbin şagirdlərinin hazırladıqları kompozisiya təqdim olunub. Qeyd edək ki, Nəriman Həmidov 1971-ci ildə Azərbaycan Politexnik İnstitutunun (indiki AzTU) metallurgiya ixtisasını bitirib. 1973-cü ildə könüllü olaraq birinci Qarabağ müharibəsində iştirak edib və ağır döyüşlər zamanı şəhidlik zirvəsinə yüksəlib. AzTU-da Metallurgiya və materialşünaslıq fakültəsinin auditoriyalarından birinə onun adı verilib.

Tələbələr arasında keçirilən cüdo üzrə Azərbaycan çempionatına yekun vurulub. Azərbaycan Cüdo Federasiyasının texniki dəstəyilə təşkil olunan yarışlarda müxtəlif ali təhsil ocaqlarının 100-ə yaxın tələbəsi iştirak edib. Çempionatın nəticələrinə əsasən Azərbaycan Texniki Universiteti (AzTU) komanda hesabında 3-cü yerdə qərarlaşıb. Belə ki, AzTU komandası 1 qızıl, 1 gümüş və 4 bürünc medal qazanıb.

Azərbaycan Texniki Universitetinin (AzTU) İnnovativ İqtisadi Araşdırmalar Mərkəzinin brifinqi keçirilib. Brifinqdə mərkəzin rəhbəri professor Elşad Məmmədov son bir ay ərzində iqtisadi sahədə baş verən proseslərlə bağlı jurnalistləri məlumatlandırıb. Xüsusilə istehsal proseslərinin lokallaşdırılması, regional texnoloji kooperasiyanın genişləndirilməsi, ölkə iqtisadiyyatına yatırılan birbaşa investisiyaların (kapital qoyuluşların) həcminin kəskin şəkildə artırılması, ölkənin pul-kredit siyasətinin fundamental olaraq investisiya artımına köklənməsi, ölkə iqtisadiyyatında innovativ tutumlu layihələrin payının artırılması, istehsal proseslərinin səmərəliliyini və gəlirliliyini artırmaq üçün regional satış bazarlarının formalaşdırılması, ölkədə daxili istehsalın fiskal stimullaşdırılması mexanizmlərinin dərinləşdirilməsi istiqamətində hesabatlar jurnalistlərin diqqətinə çatdırılıb. Brifinqin sonunda jurnalistlərin sualları cavablandırılıb.

Azərbaycan Texniki Universitetində (AzTU) ənənəvi olaraq Alman Mədəniyyət Günü keçirilib.  Tədbirdə beynəlxalq əlaqələr üzrə prorektor Fariz Məmmədov və AzTU-da alman dili müəllimi kimi fəaliyyət göstərən Klaudio Kasperl açılış nitqi ilə çıxış ediblər. AzTU-DAAD əməkdaşlığının perspektivi və burada alman dilinin təşviqi ilə bağlı görülən işlər haqqında ətraflı məlumat verilib. Daha sonra AzTU-nun alman dili qruplarında təhsil alan tələbələri Almaniyanın milli adətləri, şəhərləri və texniki universitetləri barədə təqdimatla çıxış ediblər. Həmçinin alman dilində mahnı və şeirlər səsləndirilib, rəqslər təqdim olunub. Tədbir çərçivəsində AzTU-nun foyesində alman mətbəxinə məxsus təamlar nümayiş etdirilib. Sonda iştirakçılar Almaniya istehsalı olan “Almaniyaya xoş gəlmisiniz” filmini izləyiblər.

Azərbaycan Texniki Universitetinin (AzTU) Tədqiqat və inkişaf şöbəsinin müdiri Bəxtiyar Bədəlov və Maliyyə və təminat departamentinin Maliyyə şöbəsinin baş mütəxəssisi Fidan Qurbanova “Erasmus+” mübadilə proqramı çərçivəsində  Türkiyənin Kütahya Dumlupınar Universitetinin təşkil etdiyi beynəlxalq həftədə iştirak ediblər. 25-dən çox ölkənin ali təhsil müəssisəsindən 80 nümayəndənin qatıldığı tədbirdə iştirakçı universitetlərin təqdimatı həyata keçirilib, tədris və tədqiqat sahəsində layihələrin yazılması, beynəlxalq əməkdaşlıqlar, təhsil və təcrübə mübadiləsi kimi mövzular müzakirə olunub.

Azərbaycan Texniki Universitetinin (AzTU) Maşın dizaynı və sənaye texnologiyaları kafedrasının professoru Bəyalı Əhmədov “Erasmus+” mübadilə proqramı çərçivəsində Türkiyənin Bartın Universitetində akademik heyət üçün nəzərdə tutulmuş bir həftəlik mobillikdə iştirak edib. Bəyalı Əhmədov Bartın Universitetinin Maşın mühəndisliyi kafedrasının əməkdaşlarına seminar keçib, həmçinin bu ali təhsil müəssisəsinin tələbələrinə mühazirə deyib. Səfər çərçivəsində professor Bəyalı Əhmədov Bartın Universitetinin rektoru professor Orhan Uzunla görüşüb. Görüşdə hər iki universitetin gələcək əməkdaşlıq imkanları barədə fikir mübadiləsi aparılıb.