Baş nazir Əli Əsədov “Azərbaycan Texniki Universitetinin yenidən təşkili və Nizamnaməsinin təsdiq edilməsi haqqında” Qərar imzalayıb. Qərara əsasən, Azərbaycan Texniki Universiteti Elm və Təhsil Nazirliyinin tabeliyində publik hüquqi şəxs statusuna malik olan Azərbaycan Texniki Universitetinə çevrilmə yolu ilə yenidən təşkil edilib və “Azərbaycan Texniki Universitetinin Nizamnaməsi” təsdiq edilib. Elm və Təhsil Nazirliyi bu Qərar qüvvəyə mindiyi tarixdən üç gün müddətində Azərbaycan Texniki Universitetinin “Hüquqi şəxslərin dövlət qeydiyyatı və dövlət reyestri haqqında” Azərbaycan Respublikasının Qanununa uyğun olaraq dövlət qeydiyyatına alınması üçün zəruri tədbirlərin görülməsini təmin edəcək.

Azərbaycan Texniki Universitetinin (AzTU) Maşınqayırma və robototexnika fakültəsinin qida mühəndisliyi ixtisasında təhsil alan tələbələrlə Azərbaycan Qida Təhlükəsizliyi İnstitutunun (AQTİ) nümayəndələrinin görüşü keçirilib. “Şəkəri azalt, ömrünü uzat!” kampaniyası çərçivəsində keçirilən görüşdə “Şəkərin zərərləri”, “Şəkər əvəzediciləri” və “Gündəlik qida rasionunda meyvə-tərəvəzin əhəmiyyəti” mövzularında təqdimatlar edilib. Qeyd olunub ki, kampaniya əhali arasında sağlam həyat tərzinin təbliğ olunması və vətəndaşların sağlam qidalanmaya, o cümlədən şəkərin normaya uyğun qaydada istehlak edilməsinə təşviq olunması məqsədilə həyata keçirilir.  Xüsusi vurğulanıb ki, şəkərdən normadan artıq istifadə edilməsi insan orqanizmində ürək-damar xəstəlikləri, ll tip diabet, piylənmə, diş çürüməsi, uşaqlarda diqqət zəifliyi və allergik reaksiyaların yaranması, yeniyetmələrdə qavrama qabiliyyətinin aşağı düşməsi, immun sistemin zəifləməsi və xərçəng xəstəliyinin bəzi növlərinin yaranma ehtimalını artırması kimi problemlər yarada bilər. Görüşün sonunda tələbələrin sualları cavablandırılıb.

Taylandın Banqkok şəhərində Stamford Beynəlxalq Universitetinin təşkilatçılığı ilə “İxtiraçılıq hesablamaları və informasiya texnologiyaları” mövzusunda 6-cı beynəlxalq konfrans keçirilib. Onlayn formatda təşkil olunan konfransda dünyanın müxtəlif ölkələrindən alimlər və tədqiqatçılar iştirak edib. Konfransda Azərbaycan Texniki Universitetini (AzTU) Radiotexnika və telekommunikasiya kafedrasının müdiri professor Mehman Həsənovun rəhbərliyi ilə kafedranın doktorantları Nadir Atayev, Emin Payızov, Turanə Rəsullu, həmçinin Mühəndis riyaziyyatı və süni intellekt kafedrasının dosenti Sahib Piriyev təmsil edib. AzTU nümayəndələri konfransda “Süni neyron analizindən istifadə edərək boş fəzada optik şəbəkələrin adaptiv monitorinqi (Adaptive monitoring of free space optical networks utilizing artificial neuron analysis)” mövzusunda çıxış ediblər. Konfransın sonunda iştirakçılara sertifikat təqdim olunub. Qeyd edək ki, konfransda seçilən məqalələr “Web of Science” və “Scopus” bazalarında indeksləşən jurnallarda nəşr olunacaq.

Azərbaycan Texniki Universitetində (AzTU) “İntech Academy”nin təşkilatçılığı ilə “IT Vision” adlı seminar keçirilib. “Front-end”, “QA manual”, “IT business analyst” və kibertəhlükəsizlik mövzularını əhatə edən seminarın keçirilməsində məqsəd tələbələrin qeyd olunan sahələr üzrə layihlərə cəlb olunması və onların praktik bacarıqlarının inkişaf etdirilməsidir. Seminarda tələbələrə müvafiq istiqamətlərdə həyata keçiriləcək yeniliklər, əmək bazarının tələbləri, xarici ölkələrin bu sahədə təcrübəsi və digər vacib məqamlarla bağlı məlumatlar verilib.  

Gənclər və İdman Nazirliyi və Azərbaycan Milli İdman Növləri Assosiasiyasının dəstəyi, Dünya Alpaqut Federasiyasının Azərbaycan nümayəndəliyinin təşkilatçılığı ilə keçirilən Alpaqut Turan döyüş sənəti üzrə Respublika Kuboku başa çatıb. 400-dən çox idmançının təmsil olunduğu turnirdə Azərbaycan Texniki Universitetinin (AzTU) Energetika və avtomatika fakültəsinin 2-ci kurs tələbəsi Toğrul Zeynallı da iştirak edib. O, Alpaqut döyüş sənətinin Batur sistemi üzrə 55 kq çəki dərəcəsində bütün rəqiblərinə qalib gələrək birinci yerə layiq görülüb. 

Avropada sənaye mühəndisliyi və sənaye menecmenti üzrə ixtisaslaşan tələbələri bir araya toplayan ESTİEM təşkilatının 68-ci Şura Toplantısı keçirilib. Portuqaliyanın Aveiro şəhərində  təşkil olunan toplantıda ölkəmizi “Baku ESTİEM” qrupu adından Azərbaycan Texniki Universitetinin (AzTU) tələbələri Riad Sadıqov və Sariyyə Bağırova təmsil ediblər. Onlar Azərbaycan və AzTU haqqında geniş təqdimatla çıxış edib və sualları cavablandırıblar. Bundan başqa, proqram çərçivəsində təşkil olunan vorkşop və seminarlar da iştirak ediblər. Qeyd edək ki, toplantıda 77 qrup olmaqla ümumilikdə 300 tələbə iştirak edib.

Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi, Azərbaycan Texniki Universiteti (AzTU) və Yasamal Rayon İcra Hakimiyyətinin birgə təşkilatçılığı ilə əmək yarmarkası keçirilib. Yarmarkada Dövlət Məşğulluq Agentliyinin İdarə Heyətinin sədri Mustafa Abbasbəyli, AzTU-nun rektoru Vilayət Vəliyev və Yasamal Rayon İcra Hakimiyyətinin başçısı Elşad Həsənov iştirak edib.  Tədbirdə çıxış edən AzTU-nun rektoru Vilayət Vəliyev universitetdə əmək bazarının tələblərinə uyğun kadr hazırlanması istiqamətində görülən işlərdən danışıb. Bildirib ki, bu tip tədbirlər məzunların və tələbələrin əmək bazarına daxil olması, öz karyeralarını qurması üçün böyük əhəmiyyət daşıyır. Rektor AzTU-nun öz  məzunlarının karyera imkanlarının genişləndirilməsinə daim diqqətlə yanaşdığını və bunun üçün müxtəlif dövlət və özəl qurumlarla əməkdaşlıq etdiyini bildirib.  Yasamal Rayon İcra Hakimiyyətinin başçısı Elşad Həsənov çıxışında əhalinin məşğulluğunun təmin edilməsinin dövlət siyasətinin prioritetlərindən olduğunu qeyd edib, işəgötürənlərlə işaxtaranlar arasında bu cür görüşlərin təşkilinin əmək bazarının inkişafına xidmət etdiyini bildirib.  Dövlət Məşğulluq Agentliyinin İdarə Heyətinin sədri Mustafa Abbasbəyli son illər ölkəmizdə məşğulluq sahəsində aparılan yenilik və islahatlardan danışıb. Bildirib ki, dünyada və ölkəmizdə əmək bazarının tələbləri mütəmadi olaraq dəyişir, yeni çağırışlar formalaşır. Bu isə işaxtaranlardan daim öz üzərində çalışmalarını və yeni əmək vərdişləri qazanmalarıını tələb edir. Əmək bazarının tələblərinə uyğunlaşmada təhsil müəssisələrinin əhəmiyyətinə də toxunan Mustafa Abbasbəyli AzTU-nun bu baxımdan fərqlənən təhsil ocaqlarından biri olduğunu vurğulayıb.   Qeyd edək ki, yarmarkada 95 dövlət və özəl müəssisəsi tərəfindən ümumilikdə 800-dən artıq boş iş yeri və təcrübə proqramları təqdim edilib. Yarmarka iştirakçılarına Dövlət Məşğulluq Agentliyinin fəaliyyət istiqamətləri, gənclərə yönəlmiş layihələr barədə də məlumat verilib.

Prezident İlham Əliyev tərəfindən 2024-cü ilin “Yaşıl dünya naminə həmrəylik ili” elan olunması və COP29-un Azərbaycanda keçirilməsi ilə bağlı tədbirlər ekoloji proseslərdə gənclərin rolunun artmasına şərait yaradacaq. Bunu Azərbaycan Texniki Universitetinin rektoru professor Vilayət Vəliyev aprelin 15-də “COP tələbləri: İqlim dəyişikliyi və təbii fəlakətlərə qarşı müqavimət” mövzusunda keçirilən konfransda çıxışı zamanı söyləyib. V.Vəliyev bildirib ki, Azərbaycan Texniki Universitetində keçirilən konfrans olduqca mühüm əhəmiyyət kəsb edir. Ölkəmizin bu sahədəki təşəbbüslərini və bununla bağlı mühüm tədbirlərini xüsusilə vurğulamaq lazımdır: “COP29 dünyada olduqca əhəmiyyətli konfrans hesab olunur. Təbiətin, ətraf mühitin qorunması, yaşıllıqların qurulması, biomüxtəliflik, yaşıl enerji və sair prioritet sahələr COP29-un əsas mövzularıdır. Bu beynəlxalq tədbirin ölkəmizdə keçirilməsi gənclər üçün geniş imkanlar yaradır. Həmçinin gənclər arasında beynəlxalq miqyasda birgə təşəbbüs və əməkdaşlığın vacibliyindən xəbər verir”.

Azərbaycan Texniki Universiteti (AzTU), Fövqəladə Hallar Nazirliyinin (FHN) Bakı Regional Mərkəzi, Azərbaycan Tələbə Gənclər Təşkilatları İttifaqı (ATGTİ) və ali təhsil müəssisələrində fəaliyyət göstərən Tələbə Gənclər təşkilatlarının təşkilatçılığı ilə aprelin 15-də Bakı şəhərində “COP tələbləri: İqlim dəyişikliyi və təbii fəlakətlərə qarşı müqavimət” mövzusunda tələbə elmi konfransı keçirilib. Elmi konfransın rəsmi açılış mərasimi dövlət himninin səsləndirilməsi, ölkəmizin bütövlüyü və suverenliyi uğrunda canından keçən şəhidlərimizin əziz xatirəsinin bir dəqiqəlik sükutla yad edilməsi ilə başlayıb. AzTU-nun rektoru, professor Vilayət Vəliyev açılış nitqində iştirakçılara günümüzün ən aktual mövzularına həsr edilən konfransın universitetdə keçirilməsinin təsadüfi olmadığını, belə konfransların gənclərin maarifləndirilməsində mühüm rol oynadığını, Prezident, Müzəffər Ali Baş Komandan İlham Əliyevin rəhbərliyi və şanlı Ordumuzun şücaəti ilə Vətən müharibəsində qazanılmış Zəfər fonunda tarixi dövrdə yaşadığımızı, həmçinin COP29-un Azərbaycanda keçirilməsinin əhəmiyyətini vurğulayıb. FHN-in Bakı Regional Mərkəzinin rəisi, general-mayor Məhərrəm Həsənov nazirlik tərəfindən fövqəladə yönümlü işlərin görülməsindən, gənclərin təhlükəsizliyinin təminatının dövlət siyasətinin prioritet istiqaməti olmasından bəhs edib. ATGTİ-nin sədri Pərviz Mirələmli bu kimi əhəmiyyətli layihələrin təşkil olunmasının tələbələrin təcrübi bacarıqlarının formalaşmasına göstərdiyi müsbət təsirlərdən və bu tipli layihələrin perspektivlərindən danışıb. Qeyd olunub ki, Azərbaycan Tələbə Gənclər Təşkilatları İttifaqı da COP29 kimi əhəmiyyətli tədbirdə yer alır. Sonra tədbir Bakıda yerləşən 10 ali təhsil müəssisəsini təmsil edən tələbələr tərəfindən “COP tələbləri” başlığı ilə hazırlanmış çıxışlarla davam edib. Sonda gənclər sertifikatla təltif olunub.

Azərbaycan Texniki Universitetinin (AzTU) professoru, texnika elmləri doktoru Namiq Abdullayev 77 yaşında vəfat edib.Namiq Abdullayev 2013-cü  ildən AzTU-da müxtəlif vəzifələrdə çalışıb. O, 40-dan çox dərslik və metodiki vəsaitin, 12 monoqrafiyanın, 200-dən çox elmi və elmi-pedaqoji əsərin müəllifi idi.Prezident İlham Əliyevin Sərəncamına əsasən Namiq Abdullayev 2010-cu ildə “Tərəqqi” medalı  ilə təltif olunub. AzTU-nun rəhbərliyi və kollektivi Namiq Abdullayevin vəfatından kədərlənir, ailəsinə və yaxınlarına başsağlığı verir.Allah rəhmət eləsin!