Azərbaycan Texniki Universitetinin (AzTU) Biotibbi Mühəndislik İnstitutunun “From Bedside to Bot-Side: Artificial Intelligence in Emergency Appendicitis Management” adlı növbəti elmi məqaləsi Avropanın müxtəlif ölkələrindən olan tədqiqatçılarla birgə beynəlxalq bazalarda indekslənmiş “Life” jurnalında nəşr olunub.

Məqalədə təcili yardım şöbəsinə ağrı ilə müraciət edən şəxslərdə kor bağırsağın iltihabının diaqnostikası və cərrahi qərarvermə prosesində süni intellekt texnologiyalarının (GPT-4.5, DeepSeek R1 və maşın öyrənməsi modelləri) effektivliyi müqayisəli şəkildə araşdırılıb.

Almaniyanın fərqli mərkəzlərində, eləcə də AzTU-da aparılan multimərkəzli retrospektiv tədqiqat çərçivəsində  xəstələrin klinik, laborator və radioloji göstəriciləri təhlil olunub. Nəticələr göstərib ki, süni intellekt əsaslı yanaşmalar illərlə təcrübəsi olan cərrahların qərarları ilə yüksək səviyyədə uyğunluq nümayiş etdirərək, gələcəkdə xüsusən resurs məhdudiyyətli səhiyyə mühitlərində həkimlərə dəstək ola bilər.

Bu uğurlu tədqiqat həm AzTU-nun Biotibbi Mühəndislik İnstitutunda beynəlxalq əməkdaşlıq potensialını, həm də universitet alimlərinin süni intellekt və biotibbi mühəndislik sahəsində elmi töhfələrini bir daha təsdiqləyir.