Azərbaycan Texniki Universitetində (AzTU) “Azərbaycanda Yüksək Texnologiyalar Parkının istismar proqramı: tətbiq və potensialın artırılması” layihəsi çərçivəsində forum keçirilir. Forum çərçivəsində AzTU-nun rektoru Vilayət Vəliyev Koreyanın Azərbaycandakı səfiri Eun Yong Lee və Koreya Elm və Texnologiya Siyasəti İnstitutunun (STEPI) əməkdaşları ilə görüşüb. Rektor AzTU-da görülən işlər və həyata keçirilən yeniliklərlə bağlı səfirə məlumat verib. Bildirib ki, AzTU STEPI ilə texnoparkların qurulması, innovativ ekosistemin formalaşdırılması və digər istiqamətlərdə əməkdaşlıq edə bilər. Koreyanın Azərbaycandakı səfiri Eun Yong Lee AzTU-da keçirilən forumun əhəmiyyətindən danışıb. Görüşdən sonra forumun açılış mərasimi keçirilib. Forumun sessiyalarında “Bilik laboratoriyası formatında keçirilən onlayn mühazirələrin nəticələrinə dair”, “Koreyada texnologiyanın kommersiyalaşdırılması idarəetməsi”, “Koreyada əqli mülkiyyətin idarə edilməsi”, “Koreyada texnologiyaların kommersiyalaşdırılması proqramı”, “Koreyada universitet startapları”, “Koreyada insan resurslarının inkişafı” mövzuları üzrə məruzələr dinlənilib. Qeyd edək ki, forumun sonunda iştirakçılara STEPI tərəfindən sertifikatlar təqdim ediləcək.

Azərbaycan Texniki Universitetində (AzTU) tələbələrlə işinin səmərəliliyinin artırılması, həmçinin təhsillə bağlı normativ sənədlərin hazırlanması, təlim-tərbiyə işinin təşkili və digər istiqamətlərdə tyutorların təlimatlandırılması üçün tyotor vəzifəsinə namizədlər üçün təlim keçirilib. Təlimdə təhsil qanunvericiliyinin tələbləri və tədris prosesinə tətbiqi, tədris sənədlərinin tərtibi və işlənməsi, təqaüdlərin təyini, təcrübələrin və yekun dövlət attestasiyasının keçirilməsi, Elektron Təhsil Sistemində işin təşkili, tələbələrlə davranış qaydaları və onlarla psixoloji işin təşkili və digər mövzular barədə ətraflı məlumat verilib. Bir həftə davam edən təlimin sonunda AzTU-nun Keyfiyyətin təminatı və öyrətmə-öyrənmə mərkəzi tərəfindən namizədlərin qiymətləndirilməsi aparılıb. Qiymətləndirilmənin nəticələrinə əsasən, təlimi uğurla başa vuranlara sertifikat təqdim olunub.    

Azərbaycan Texniki Universitetinin (AzTU) Ümumi şöbəsinin əməkdaşı Aygün Məmmədova uzunsürən xəstəlikdən sonra 41 yaşında vəfat edib. Aygün Məmmədova 1997-2001-ci illərdə Bakı Dövlət Universitetində təhsil alıb. 2016-cı ildən AzTU-da Ümumi şöbənin kargüzarı vəzifəsində işə başlayıb. 2021-cı ildən isə həmin şöbənin mütəxəssisi kimi fəaliyyətini davam etdirib. AzTU-nun rəhbərliyi və kollektivi Aygün Məmmədovanın vəfatından kədərlənir, ailəsinə və yaxınlarına başsağlığı verir. Allah rəhmət eləsin!

21 oktyabr 2022-ci il tarixində Şamaxı şəhərində “Mentorun 72 saatı” adlı "Bootcamp” tədbirinə start verilib. 3 gün davam edəcək tədbir Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi” tərəfindən həyata keçirilən “Gələcək üçün bacarıqlar” layihəsinin növbəti komponenti olan yeni “Mentorluq üzrə ixtisaslaşma proqramı”na keçid məqsədilə reallaşdırılıb.  Tədbirin açılış mərasimində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, elm və təhsil nazirinin müşaviri Nicat Məmmədli,  Azərbaycan Dövlət Neft və Sənaye Universitetinin rektoru Mustafa Babanlı, Azərbaycan Texnologiya Universitetin rektoru Yaşar Ömərov, Bakı Mühəndislik Universitetinin rektoru Havar Məmmədov, Mingəçevir Dövlət Universitetinin rektoru Şahin Bayramov, Azərbaycan Texniki Universitetin (AzTU) prorektoru Rəşad Əliyev,  “Azərikard" MMC-nin direktor müavini Zakir Əhmədov və digər şəxslər iştirak ediblər. Tədbirdə “Rəqəmsal dünyada yenilik”, “Şəbəkələşmə”, “Liderlik bacarıqları”,  “Komandanın effektiv idarə olunması”, “Startup pitching”, “Mentorluq, texnika və mexanizmləri”, “Startapın həyat dövrü”, “Təqdimat bacarıqlarının inkişaf etdirilməsi”, “Maliyyə cəlb edilməsi strategiyaları”, “Emosional intellekt” və “İdeya müsabiqəsi - İnnovativ məhsul inkişafı” mövzularında təlimlər, sonra isə komandalar üzrə iş təşkil olunacaq, həmçinin "Bilim Bakı" Mərkəzinin rəhbəri “Milli Teknoloji Hamlesi T3 Vakfı & Teknofest” haqqında məlumat verəcək. 2021-ci ilin aprel ayından həyata keçirilən “Gələcək üçün bacarıqlar” layihəsinin məqsədi innovasiya sahəsində kadr potensialının artırılması, təhsildə innovasiya fəaliyyətinin dəstəklənməsi, innovativ ideyalarını inkişaf etdirmək üçün təhsil prosesində tələbələrə dəstək göstərilməsi və tələbələrin ölkənin texnoloji inkişafında önəmli rol oynayan kəşf, ixtira sahəsinə yönləndirilməsidir. Layihə universitetlərdə müəllimlərin mentor kimi hazırlanması üzrə mentorluq proqramını və mentorların iştirakı ilə tələbələrin startap kimi yetişdirilməsi üzrə inkubasiya proqramlarını əhatə edən 2 komponentdən ibarətdir.  

   Elm və Təhsil Nazirliyinin SABAH qrupları layihəsi çərçivəsində Mühəndislik üzrə Bilik Yarışmasının final mərhələsi keçirilib. “Nar”ın dəstəyi ilə Azərbaycan Texniki Universitetində (AzTU) keçirilən Mühəndislik üzrə Bilik Yarışmasının final mərhələsi riyazi analiz, xətti cəbr və analitik həndəsə, fizika, kimya və mülkü müdafiə fənlərindən 25 qapalı tipli sual əsasında təşkil olunub. Final mərhələsinin nəticələrinə əsasən, AzTU SABAH qruplarının radiotexnika və telekommunikasiya ixtisasının III kurs tələbəsi Əli Məhəmmədov Mühəndislik üzrə Bilik Yarışmasında 3-cü yerə layiq görülüb. Qeyd edək ki, Əli Məhəmmədov 44 günlük Vətən müharibəsində iştirak edib. O, Suqovuşan və Ağdam istiqamətində gedən döyüşlərdə iştirak edib. Prezident İlham Əliyevin sərəncamlarına əsasən, Əli Məhəmmədov "Vətən müharibəsi iştirakçısı",  "Ağdamın azad olunmasına görə", “Suqovuşanın azad olunmasına görə” medalları ilə təltif olunub. Əli Məhəmmədov hazırda AzTU-nun əməkdaşlıq etdiyi “Code Academy” də təhsil alır.

Azərbaycan Texniki Universitetinin (AzTU) və Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi təşkilatçılığı ilə əmək yarmarkası keçirilib. Yarmarkada AzTU-nun rektoru Vilayət Vəliyev, Dövlət Məşğulluq Agentliyinin İdarə Heyətinin sədri Mustafa Abbasbəyli, Yasamal Rayon İcra Hakimiyyəti başçısının birinci müavini Hüseyn Əfəndiyev, Kiçik və Orta Biznesin İnkişafı Agentliyinin (KOBİA) İdarə Heyəti sədrinin birinci müavini Natiq Həsənov, Azərbaycan Dövlət Neft Şirkətinin (SOCAR) “Azneft” İstehsalat Birliyinin baş direktorunun birinci müavini Rövşən Qarayev və digər rəhbər şəxslər iştirak edib. AzTU-nun rektoru Vilayət Vəliyev universitetdə əmək bazarının tələblərinə uyğun kadr hazırlanması istiqamətində görülən işlərdən danışıb. Bildirib ki, AzTU ölkənin bir sıra qurumları ilə əməkdaşlıq edir. Müvafiq ixtisaslar üzrə təhsil alan tələbələr sözügedən qurumlarda təcrübə proqramlarında iştirak edirlər. Bu da tələbələrin karyeralarının gələcəkdə inkişaf etdirilməsində mühüm rol oynayır. Rektor AzTU-da keçirilən növbəti əmək yarmarkasının da həm işə götürənlər, həm də məzunlar üçün uğurlu olacağına inandığını qeyd edib.  Daha sonra çıxış edən Dövlət Məşğulluq Agentliyinin İdarə Heyətinin sədri Mustafa Abbasbəyli son illər ölkədə məşğulluq sahəsində aparılan yenilik və islahatlardan danışıb. Bildirib ki, müasir dövrdə bir çox peşələr transformasiyaya uğrayır. Bu baxımdan hər kəs əmək bazarının çağırışlarına hazır olmalıdır. Texniki peşələrin hər zaman arzuolunan olduğunu qeyd edən Mustafa Abbasbəyli AzTU məzunlarını bu baxımdan çox şanslı adlandırıb. Qeyd edib ki, Agentlik hazırda ali təhsil müəssisələri ilə sıx əməkdaşlıq edir və mütəmadi olaraq bu cür tematik yarmarkalar təşkil olunur. KOBİA-nın İdarə Heyəti sədrinin birinci müavini Natiq Həsənov, Azərbaycan Dövlət Neft Şirkətinin (SOCAR) “Azneft” İstehsalat Birliyinin baş direktorunun birinci müavini Rövşən Qarayev də əmək yarmarkasının məzunlar üçün əhəmiyyəti barədə danışıb.   Qeyd edək ki, əmək yarmarkasında 1000-ə yaxın AzTU məzunu iştirak edib. Həmçinin yarmarkada 74 dövlət və özəl müəssisəsi tərəfindən ümumilikdə 800-ə yaxın boş iş yeri və təcrübə proqramları təqdim edilib. Məzunlara Dövlət Məşğulluq Agentliyinin fəaliyyət istiqamətləri, gənclərə yönəlmiş layihələr barədə məlumat verilib.  

Azərbaycan Texniki Universitetinin (AzTU) Rəqəmsal Transformasiya üzrə Məşvərət Şurasının növbəti iclası keçirilib. İclasda Elm və Təhsil Nazirliyinin “Ali və orta ixtisas təhsilinin 2021/2022-ci illər üzrə inkişafı” mövzusunda keçirdiyi qrant müsabiqəsi üzrə AzTU-nun qalib olduğu “AzTU-da prioritet mühəndislik ixtisasları üzrə professor-müəllim heyətinin akademik mobilliyinin səmərəli təşkili ilə elmi potensialın gücləndirilməsi və yüksəkixtisaslı kadr hazırlığının təmin olunması mexanizminin yaradılması” layihəsi çərçivəsində təhsil və tədrisin idarə edilməsi istiqamətində hazırlanan bir sıra rəqəmsal həllər iştirakçılara təqdim edilib və onun tamamlanma vəziyyəti haqqında ətraflı məlumat verilib.    Həmçinin universitetin yenilənmiş saytı şura üzvlərinə təqdim olunub. AzTU-da texnoparkın yaradılması və universitet-sənaye işbirliyinin inkişaf etdirilməsi ilə bağlı məsələlər də şura üzvləri tərəfindən müzakirə olunub.   Rektor Vilayət Vəliyev AzTU-nun bu istiqamətdə əməkdaşlıq etdiyi xarici universitetlər və şirkətlər barədə məlumat verib.  İclasda universitet-sənaye işbirliyinin inkişafında ali təhsil müəssisələrinin üzərinə düşən öhdəliklərlə bağlı müzakirələr aparılıb və təkliflər verilib.    

Azərbaycan Texniki Universitetinin (AzTU) məzunu, Vətən müharibəsində şəhidlik zirvəsinə yüksələn Eltun Qasımov 1994-cü il oktyabrın 18-də Bakıda anadan olub. O, 2012-2016-cı illərdə AzTU-da Sənayenin təşkili və idarə olunması ixtisası üzrə təhsil alıb. Universiteti bitirdikdən sonra həqiqi hərbi xidmətə yollanan Eltun Qasımov xidməti uğurla başa vurub.   Eltun Qasımov 2020-ci il sentyabrın 27-də başlanan Vətən müharibəsində iştirak edib. O, Füzulinin və Hadrutun azadlığı uğrunda gedən döyüşlərdə iştirak edib. Eltun Qasımov 2020-ci il oktrabrın 18-də Hadrut uğrunda gedən döyüşlərdə qəhrəmancasına şəhidlik zirvəsinə yüksəlib. Prezident İlham Əliyevin sərəncamlarına əsasən, Eltun Qasımov ölümündən sonra "Vətən uğrunda", “Xocavəndin azad olunmasına görə” və “Füzulinin azad olunmasına görə” medalları ilə təltif olunub. Allah bütün şəhidlərimizə rəhmət eləsin! Şəhidlərimizin ruhu qarşısında baş əyirik!

Bu gün Azərbaycanda Müstəqilliyin Bərpası Günüdür. 1991-ci il oktyabrın 18-də “Azərbaycan Respublikasının dövlət müstəqilliyi haqqında” Konstitusiya Aktı qəbul olunub. Konstitusiya Aktında 1918-ci il 28 may tarixli İstiqlal Bəyannaməsinə və “Azərbaycan Respublikasının dövlət müstəqilliyini bərpa etmək haqqında” Azərbaycan Respublikası Ali Sovetinin 1991-ci il 30 avqust tarixli Bəyannaməsinə istinad olunub, Azərbaycan Respublikasının Azərbaycan Xalq Cümhuriyyətinin varisi olduğu təsbit edilib. Beləliklə, “Azərbaycan Respublikasının dövlət müstəqilliyi haqqında” Konstitusiya Aktına əsasən Azərbaycan xalqı 1991-ci il oktyabrın 18-də öz müstəqilliyini bərpa edib. Azərbaycan parlamentinin 15 oktyabr 2021-ci il tarixli plenar iclasında isə “Müstəqillik Günü haqqında” yeni qanun qəbul edilib. Elə həmin gün Prezident İlham Əliyev "Müstəqillik Günü haqqında" yeni Qanunu təsdiqləyib. Qanuna əsasən, mayın 28-i Müstəqillik Günü, oktyabrın 18-i isə Müstəqilliyin Bərpası Günü elan olunub. Azərbaycan xalqı 1991-ci ildən sonra ikinci dəfədir ki, Müstəqilliyin Bərpası Gününü öz ərazi bütövlüyünü bərpa etmiş qalib xalq kimi qeyd edir.  

Azərbaycan Texniki Universitetinin (AzTU) məzunu, Aprel döyüşlərində şəhidlik zirvəsinə yüksələn Əbdülməcid Axundov 1993-cü il oktyabrın 15-də anadan olub. 2010-cu ildə orta məktəbi bitirən Əbdülməcid Axundov elə həmin il  AzTU-ya qəbul olunub.  Əbdülməcid Axundov 2016-cı il aprelin 2-də qəhrəmancasına şəhidlik zirvəsinə ucalıb. Prezident İlham Əliyevin Sərəncamı ilə Əbdülməcid Axundov ölümündən sonra “Hərbi xidmətdə fərqlənməyə görə” 3-cü dərəcəli medalı ilə təltif olunub. Allah bütün şəhidlərimizə rəhmət eləsin! Şəhidlərimizin ruhu qarşısında baş əyirik!