Türkiyənin Atılım Universitetinin Metal Formalaşdırmada Mükəmməllik Mərkəzinin tədqiqatçı mühəndisi Çağlar Ceylan “Erasmus+” mübadilə proqramı çərçivəsində Azərbaycan Texniki Universitetində (AzTU) səfərdə olub. Səfər çərçivəsində Çağlar Ceylan AzTU-da təlim keçib, müvafiq fakültə və kafedranın əməkdaşları ilə görüşüb, laboratoriyalarda aparılan işlərlə tanış oub. O həmçinin Atılım Universitetinin tanıtımı və Metal Formalaşdırmada Mükəmməllik Mərkəzinin fəaliyyəti barədə geniş təqdimatla çıxış edib.

Azərbaycan Texniki Universitetində (AzTU) məktəblilərin “Açıq qapı” günü keçirilib. “Açıq qapı” günündə X və XI sinif şagirdləri, həmçinin onların müəllimləri iştirak ediblər. Görüşdə AzTU-da həyata keçirilən yeniliklər barədə abituriyentlərə məlumat verilib. Universitetin tarixi, fakültələr, ixtisaslar, beynəlxalq əlaqələr, ikili diplom proqramları, laboratoriyalar, karyera imkanları və digər vacib məlumatlar abituriyentlərin diqqətinə çatdırılıb. Daha sonra məktəblilər AzTU-nun kampusu ilə tanış olublar.

Azərbaycan Texniki Universitetinin (AzTU) tərəfdaş olduğu “Erasmus+KA2” “Rusiya Federasiyası, Qazaxıstan və Azərbaycanda səhiyyədə strateji keyfiyyət menecmenti və risklərin idarə olunması üzrə açıq və distant təhsil formatında peşə bakalavrı və magistr hazırlığı” (LMQS) layihəsi çərçivəsində səhiyyə işçiləri üçün təlim keçirilib. Təlim “Səhiyyənin idarə edilməsi” mövzusunda təşkil edilib. Təlimi İqtisadiyyat və statistika kafedrasının baş müəllimi Pərvin Soltanlı və Beynəlxalq ticarət, logistika və marketinq kafedrasının baş müəllimi Mürşüd Mehdiyev keçiblər. Səhiyyə işçilərini salamlayan İqtisadiyyat və idarəetmə fakültəsinin dekanı Fərqanə Musayeva onlara layihə və layihə çərçivəsində yeni açılmış “Səhiyyədə keyfiyyətin və riskin idarəolunması” magistratura proqramı haqqında ətraflı məlumat verib, səhiyyə içiləri üçün təlimlərin əhəmiyyətindən bəhs edib. Təlim zamanı səhiyyə işçiləri üçün gərəkli olan ünsiyyət və yumşaq bacarıqlar, səhiyyənin idarə olunmasının əsas prinsipləri və strategiyaları, qərar qəbulunda çətinlik və həll yolları kimi bir sıra məsələlər barədə məlumat verilib.

“Rusiya Federasiyası, Qazaxıstan və Azərbaycanda səhiyyədə strateji keyfiyyət menecmenti və risklərin idarə olunması üzrə açıq və distant təhsil formatında peşə bakalavrı və magistr hazırlığı” (LMQS) layihəsi üzrə Fransada yeni yaradılan tədris proqramı üzrə təlimlər təşkil edilib. Təlimlər layihənin Avropa tərəfdaşı olan Kot d’Azur Universitetində keçirilib. Səfərdə AzTU-nu beynəlxalq əlaqələr üzrə prorektor Fariz Məmmədov və İqtisadiyyat və idarəetmə fakültəsinin dekanı Fərqanə Musayeva təmsil edib. Tədbir layihə çərçivəsində yaradılan “Səhiyyədə keyfiyyətin və risklərin idarə olunması” magistr proqramının məzmununun təkmilləşdirilməsinə xidmət edib. 10 gün davam edən təlimlərdə tədris modullarının hazırlanması, Boloniya prosesinə uyğun tədrisin təşkili, ikili diplom proqramlarının və distant təhsilin təşkili, eyni zamanda səhiyyədə keyfiyyət və risklərlərin idarə olunması ilə bağlı mövzularda təqdimatlar edilib.

Azərbaycan Texniki Universitetinin (AzTU) tələbəsi Lalə Qarayeva Avstriyanın Aqrar və Ekoloji Pedaqogika Universitetində (HUAP) təcrübə və tədqiqat proqramında mübadilədə iştirak edib. O, “Yaşıl Pedaqogika” mövzusunda seminar təşkil edərək tədris prosesində onun tətbiqi və prisipləri barədə Avstriyada qazandığı təcrübəni AzTU əməkdaşları ilə bölüşüb. Xatırladaq ki, Lalə Qarayeva “Erasmus+ KA2” proqramı üzrə həyata keçirilən “İnnovasiya və dayanıqlılıq prinsipləri ilə klasterlərin işlənməsinə başlamaqda və iştirakda universitetlərin potensialının artırılması” (UniClaD) layihəsi çərçivəsində Avstriyada 1 aylıq təcrübə proqramında iştirak edib. Təcrübə proqramında nəzəri mövzularla yanaşı, praktiki təcrübələr də təşkil edilərək universitetin ətraf mühitin qorunması sahəsindəki fəaliyyəti barədə ətraflı məlumatlar əldə edilib.

Azərbaycan Texniki Universitetinin (AzTU) rektoru Vilayət Vəliyevin başçılıq etdiyi nümayəndə heyəti Balakən rayonuna səfəri çərçivəsində rayonun təhsil ictimaiyyəti ilə görüşüb. Görüşdə məktəb və lisey direktorları, rayonda fəaliyyət göstərən tədris kurslarının rəhbərləri, gənclər təşkilatlarının nümayəndələri, müəllimlər, həmçinin qəbul imtahanlarında yüksək bal toplayan şagirdlər iştirak ediblər. AzTU-nun rektoru Vilayət Vəliyev universitet haqqında geniş təqdimatla çıxış edib. Bildirib ki, AzTU regionda müdafiə sənayesi üzrə kadr hazırlayan yeganə universitetdir. AzTU-nun hədəfi mühəndislik elmləri və ağıllı texnologiyaların tətbiqi sahəsində regionda lider universitet olmaqdır. Rektor AzTU-nun beynəlxalq əlaqələri, ikili diplom proqramları, tələbələr üçün yaradılan imkanlar, həyata keçirilən yeni layihələr barədə də ətraflı məlumat verib. Həmçinin universitetlə rayonun təhsil qurumlarının qarşılıqlı əməkdaşlığının gücləndirilməsinin faydalı olacağını diqqətə çatdırıb. Şəki-Zaqatala Regional Təhsil İdarəsinin Balakən rayonu üzrə təhsil sektorunun müdiri Mehparə Murtuzəliyeva görüşün universitet-məktəb əlaqələrinin genişləndirilməsi baxımından mühüm əhəmiyyət kəsb etdiyini bildirib. Sonda rektor görüş iştirakçılarının suallarını cavablandırıb. Qeyd edək ki, AzTU rektorunun rəhbərlik etdiyi nümayəndə heyətində Ömürboyu Öyrənmə Məktəbinin direktoru Aynurə İsmayılova, Logistika və Nəqliyyat İnstitutunun direktoru Fuad Daşdəmirov, AzTU-nun rəqəmsal transformasiya üzrə məşvərət şurasının koordinatoru, universitetin İctimai şurasının sədri Osman Gündüz, İctimaiyyətlə əlaqələr şöbəsinin müdiri Sevinc İsgəndərova iştirak edib.

Azərbaycan Texniki Universitetinin (AzTU) rektoru Vilayət Vəliyevin rəhbərlik etdiyi nümayəndə heyəti Qəbələ Dövlət Peşə Təhsil Mərkəzinə səfər edib. Məqsəd universitet-peşə təhsili işbirliyinin inkişaf etdirilməsi, ömürboyu təhsil istiqamətində müvafiq proqramların həyata keçirilməsi, həmçinin tədris proqramlarının sənayenin tələblərinə uyğunlaşdırılması və əməkdaşlığın yeni istiqamətlərinin müəyyənləşdirilməsi olub. Əvvəlcə Qəbələ Dövlət Peşə Təhsil Mərkəzinə infotur həyata keçirilib. Mərkəzin direktoru Qalib Nəbiyev burada görülən işlər, həyata keçirilən layihələr, tədris proqramları barədə qonaqlara məlumat verib. Qeyd edək ki, AzTU rektorunun rəhbərlik etdiyi nümayəndə heyətində Ömürboyu Öyrənmə Məktəbinin direktoru Aynurə İsmayılova, Logistika və Nəqliyyat İnstitutunun direktoru Fuad Daşdəmirov, AzTU-nun rəqəmsal transformasiya üzrə məşvərət şurasının koordinatoru, universitetin İctimai şurasının sədri Osman Gündüz, İctimaiyyətlə əlaqələr şöbəsinin müdiri Sevinc İsgəndərova iştirak edib.

Azərbaycan Texniki Universitetinin (AzTU) elm və innovasiyalar üzrə prorektoru, Metallurgiya və materiallar texnologiyası kafedrasının professoru Sübhan Namazov “Erasmus+” mübadilə proqramı çərçivəsində Türkiyənin Sakarya Tətbiqi Elmlər Universitetində (SUBÜ) inzibati heyət üçün nəzərdə tutulmuş bir həftəlik mobillikdə iştirak edib. Sübhan Namazov SUBÜ-nün rektoru Mehmet Sarıbıyıkla görüşüb, universitetdə görülən işlərlə tanış olub. Həmçinin iki universitet arasında əməkdaşlıq və mümkün birgə elmi və tədqiqat layihələrinin həyata keçirilməsi ilə bağlı müzakirələr aparılıb. SUBÜ prorektorları Sinan Serdar Özkan, Ali Fuat Boz və Oğuz Türkay və Robot Texnologiyaları və Ağıllı Sistemlərin Tətbiqi və Araşdırması Mərkəzinin (ROTASAM) direktoru Gökhan Atalının da iştirakı ilə rektor Mehmet Sarıbıyık tərəfindən imzalanan AzTU və SUBÜ arasında əməkdaşlıq müqaviləsi daha sonra AzTU-da rektor Vilayət Vəliyev tərəfindən imzalanıb.

AzTU “Şəhərdaxili hərəkət (mobillik) planının hazırlanması” məqsədilə daha 26 şəhər və rayonda şəhərdaxili mobillik planının icrasına başlayıb. Belə ki, 15-16 iyul tarixlərində AzTU ilə Balakən, Zaqatala, Oğuz, Qəbələ və Qax rayon icra hakimiyyətləri arasında müqavilə imzalanıb. AzTU-nun rektoru Vilayət Vəliyev, Balakən Rayon İcra Hakimiyyətinin başçısı İslam Rzayev, Zaqatala Rayon İcra Hakimiyyətinin başçısı Mübariz Əhmədzadə, Oğuz Rayon İcra Hakimiyyətinin başçısı Eyvaz Qurbanov, Qəbələ Rayon İcra Hakimiyyətinin başçısı Səbuhi Abdullayev, Qax Rayon İcra Hakimiyyətinin başçısı Musa Şəkiliyevin iştirakı ilə keçirilən görüşlərdə mobillik planının əhəmiyyətindən danışılıb. Qeyd olunub ki, sözügedən layihə rayonların dayanıqlı inkişafına, yol şəbəkələrinin planlı layihələndirilməsi və icrasına xüsusilə əhəmiyyətli olacaq. Belə ki, layihə hamı üçün əlverişli, əlçatan və dayanıqlı nəqliyyat sistemləri, o cümlədən həssas əhali qrupundan olanların, qadınların, uşaqların, fiziki qüsurlu və yaşlı insanların ehtiyaclarına xüsusi diqqət yetirməklə, ictimai nəqliyyatın genişləndirilməsi yolu ilə yol təhlükəsizliyinin yaxşılaşdırılmasını ehtiva edir. Bildirilib ki, dövlət-universitet-sənaye tandeminin ən bariz nümunəsi olan “Şəhərdaxili hərəkət (mobillik) planının hazırlanması” üzrə məsləhət xidmətinin–layihəsi adıçəkilən rayon icra hakimiyyətləri ilə AzTU arasında yerinə yetiriləcək ilk layihədir. Görüşlərdə Balakən, Zaqatala, Oğuz və Qəbələ rayon icra hakimiyyətlərinin nümayəndələri ilə yanaşı, AzTU-nun Ömürboyu Öyrənmə Məktəbinin direktoru Aynurə İsmayılova, Logistika və Nəqliyyat İnstitutunun direktoru Fuad Daşdəmirov, AzTU-nun rəqəmsal transformasiya üzrə məşvərət şurasının koordinatoru, universitetin İctimai şurasının sədri Osman Gündüz, İctimaiyyətlə əlaqələr şöbəsinin müdiri Sevinc İsgəndərova iştirak edib. 

Azərbaycan Texniki Universitetində (AzTU) Dayanıqlı İnkişaf İnstitutunun əməkdaşı  İqor Nasirovun "Azərbaycanın Dünyanın Yaşıl Gələcəyinə Artan Töhfəsi” (“Growing Contribution of Azerbaijan to Earth’s Green Future") adlı üçüncü master klassı təşkil edilib.  Master klass onlayn formatda keçirilib. Tədbir "Hidrogenin bütün rəngləri" ("All colors of hydrogen") mövzusuna həsr olunub. Əsas məqsəd bu istiqamətdəki prosesləri elmi tədqiqatçıların, professor-müəllim heyətinin, tələbələrin diqqətinə çatdırmaq olub. Tədbirin dəvətli qonağı Andrey Tsarikovskiy (thyssenkrupp Uhde) qlobal tendensiyalar və təcrübələr haqqında məruzə ilə çıxış edib. Daha sonra iştirakçılarla COP29-da Azərbaycanda icra olunacaqı layihələr, yaşıl gələcəyə veriəcək töhfə ilə bağlı inkişaf etdiriləcək bacarıqlar istiqamətində geniş müzakirələr aparılıb.