Azərbaycan Texniki Universitetinin (AzTU) Maşınqayırma texnologiyası kafedrasının müdiri professor Nizami Yusubov Almaniyanın Brandenburq Texniki Universiteti  Kottbus – Senf­tenberqdə (BTU Kottbus – Senf­tenberq) işgüzar səfərdə olub.

Məqsəd BTU Kottbus – Senf­tenberq ilə tədqiqat əməkdaşlığının genişləndirilməsi, birgə elmi-tədqiqat işlərinin nəticələrinin müzakirəsi, dokto­rant­ların tədqiqat fəaliyyətinin, həmçinin BTU Kottbus – Senftenberqin Maşınqayırma, elektrik və enerji sis­tem­ləri fa­kültəsində birgə araşdırmaların nəticələrinin AzTU ilə birlikdə kvartili yüksək olan jur­nal­larda çapı və digər əməkdaşlıq məsələlərinin mü­­za­kirəsi olub.

Professor Nizami Yusubov BTU Kottbus – Senftenberqin beynəlmiləlləşmə üzrə vitse-prezidenti professor Volfram Berger, Maşınqayırma, elektrik və enerji sis­tem­ləri fa­kültəsinin Metalkəsən dəzgahlar kafedrasının müdiri professor Sylvio Simon və BTU Kottbus – Senf­tenberqdə təhsil alan azərbaycanlı magistrant, doktorant və elmi işçilərlə görüşlər keçirib.

Professor Volfram Berger görüş zamanı AzTU-nun rektoru Vilayət Vəliyevə 15 illik əməkdaşlığa görə təşəkkür edib. Görüşdə gələcəkdə də BTU Kottbus – Senf­tenberqin AzTU ilə səmərəli əməkdaşlığının davam etdirilməsində maraqlı olduqları vurğulanıb.

Professor Volfram Berger 4-5 dekabr 2025-ci il tarixlərində AzTU-da keçiriləcək “Maşınqayırma və energetika: yeni konsepsiyalar və texnologiyalar” adlı III beynəlxalq elmi-praktik konfransın təşkilatçılığında iştiraklarını təsdiqləyib və 2027-ci ildə keçiriləck növbəti IV konfransın BTU Kottbus – Senf­tenberqdə keçirilməsi təklifini irəli sürüb.  

Professor Nizami Yusubov səfər çərçivəsində BTU Kottbus – Senf­tenberqin Metalkəsən dəzgahlar kafedrasında AzTU-nun Maşınqayırma texnologiyası kafedrasının doktorantı Samir Əmirlinin 3313.01-“Maşınqayırma texnologiyası” ixtisası üzrə "Hidroabraziv emal üsulu ilə materialı çətin emal olu­nan detalların keyfiyyət göstəricilərinin yüksəldilməsi" mövzusunda texnika elmləri üzrə fəlsəfə dok­toru elmi dərəcəsi almaq üçün dissertasiya işinin ilkin müzakirəsində elmi rəhbər olaraq iştirak edib.

İlkin müzakirənin nəticəsi olaraq dissertasiya işi 3313.01- “Maşınqayırma texnologiyası” ixtisasından texnika üzrə fəlsəfə doktoru elmi də­rəcəsi al­maq üçün müvafiq Dissertasiya şurasına müdafiəyə təqdim edilməsi töv­si­yə olunub.

Dissertasiya işi iki ali təhsil müəssisəsində yerinə yetirildiyi üçün növbəti ilkin müzakirənin AzTU-da keçirilməsi nəzərdə tutulur.