Tükiyənin Karamanoğlu Mehmetbey Universitetinin rektoru professor Mehmet Qavqalının rəhbərlik etdiyi nümayəndə heyəti AzTU-da olub. Qonaqlar AzTU-nun rektoru Vilayət Vəliyev və universitetin nümayəndələri ilə görüşüb. Görüş zamanı ikitərəfli əməkdaşlıq əlaqələri, xüsusilə Avropa İttifaqının proqramlarında birgə iştirak, qida mühəndisliyi və energetika sahələrində tələbə hazırlığı və digər məsələlər müzakirə olunub. Görüşdən sonra universitetlər arasında əməkdaşlıq haqqında memorandum imzalanıb. 

Azərbaycan Texniki Universitetinin (AzTU) Kitabxana İnformasiya Mərkəzinin (KİM) direktoru Xəyalə Hacıyeva və Kitabxana sistemləri və rəqəmsallaşdırma üzrə iş şöbəsinin baş məsləhətçisi İltifat İbrahimov Latviya Milli Kitabxanasının dəvəti ilə “EU4Dialogue” layihəsi çərçivəsində “Library as a community cultural space” adlı yay məktəbində iştirak ediblər. 10 gün davam edən yay məktəbi Latviyanın Riqa və Çesis şəhərlərində keçirilib. Səfərdə Azərbaycan nümayəndəliyinin qrup rəhbəri AzTU KİM-in direktoru Xəyalə Hacıyeva olub. Layihəyə Azərbaycanla yanaşı Moldova, Latviya, Gürcüstandan kitabxana və muzey əməkdaşları da qatılıb. İştirakçılar proqram çərçivəsində Riqa və Çesis şəhərlərinin milli, akademik və ictimai kitabxanalarında müxtəlif (informasiya resurslarının menecmenti və kolleksiyaların inkişafı, mədəni və akademik irsin rəqəmsallaşdırılması və qorunması, kitabxana və mədəniyyət mərkəzlərinin xidmətlərinin planlaşdırılması və inkişaf etdirilməsi, mədəniyyət və informasiya sahəsində fəaliyyət göstərən təşkilat və institutlarla əməkdaşlıq) mövzularda təlimlər keçərək yeni bacarıq və biliklər əldə edib. Səfər çərçivəsində iştirakçılar üçün hər iki şəhərin mədəni, elmi və tarixi mərkəzlərinə ekskursiyalar təşkil edilib. Proqramın sonunda iştirakçılara sertifikat təqdim olunub.

Azərbaycan Texniki Universitetinin (AzTU) iki tələbəsi 2023/2024-cü tədris ilinin payız semestrində “Erasmus+ KA171” proqramı çərçivəsində İtaliyada təhsil alacaq. Belə ki, İnformasiya və telekommunikasiya texnologiyaları fakültəsinin kompüter mühəndisliyi ixtisası üzrə təhsil alan II kurs tələbələri Selcan Kərimli və Aydın Əliyev İtaliyanın Roma Sapienza Universitetində bir semestrlik təhsil almaq hüququ qazanıblar. AzTU-nun rektoru Vilayət Vəliyev tələbələrlə görüşüb, onlara dərslərində uğurlar arzulayıb.

“Erasmus+” proqramı üzrə həyata keçirilən “Azərbaycan və Rusiya ali təhsil müəssisələrində tədris, təlim və qiymətləndirmə prosesinin daxili keyfiyyət təminatının təkmilləşdirilməsi” (IQAinAR) layihəsi çərçivəsində növbəti menecment görüşü keçirilib. Görüş zamanı cari ilin oktyabr ayının əvvəllərində layihənin yerli tərəfdaşı Azərbaycan Dövlət Pedaqoji Universitetinin təşkilatçılığı ilə planlaşdırılan konfransın gündəliyi, konsorsium üzvlərinin səfər hazırlıqları, eləcə də layihənin 2-ci paketi, habelə layihə çərçivəsində məlumatların geniş ictimaiyyətə çatdırılması üzrə görülən işlərin müzakirəsi aparılıb. Həmçinin keyfiyyət təminatı indikatorları üzrə 2 tədqiqat mövzusunun işlənilməsi və iş bölgüsü ətrafında müzakirələr aparılıb. Niderlandın Vittenborq Tətbiqi Elmlər Universitetinin baş koordinatorluğu ilə keçirilən görüş layihənin digər tapşırıqları üzrə qarşılıqlı müzakirələrlə davam etdirilib.  Xatırladaq ki, layihədə Azərbaycandan 3 tərəfdaş universitet və  Təhsildə Keyfiyyət Təminatı Agentliyi (TKTA) iştirak edir.  

Azərbaycan Texniki Universitetinin (AzTU) rektoru Vilayət Vəliyevin və Milli Aviasiya Akademiyasının (MAA) birinci prorektoru Ədalət Səmədovun rəhbərlik etdiyi nümayəndə heyətlərinin Türkiyənin müdafiə sənayesi müəssisələrinə və bir sıra universitetlərinə səfəri başa çatıb. Səfər çərçivəsində Türk Aviasiya və Kosmik Sənaye Şirkəti (TUSAŞ), TEİ – TUSAŞ Motor Sanayii A.Ş, Eklemeli İmalat Teknoloji Merkezi (EKTAM), Türk Hava Kurumu Universiteti, Gazi Universiteti, Çankaya Universiteti və Əskişəhər Texniki Universitetində görüşlər keçirilib. TUSAŞ-da keçirilən görüşdə birgə həyata keçirilən layihələrlə bağlı müzakirələr aparılıb, TUSAŞ-AzTU-MAA arasında işbirliyi protokulunun imzalanması mərasimi keçirilib. TUSAŞ-ın istehsal müəssisələri ilə tanışlıq zamanı sentyabrda AzTU və MAA tələbələri üçün Mühəndis İnkişafı Proqramının (MGP) icrası və görülən işlər müzakirə olunub. ETKAM-ın rəhbəri professor Mətin Salamçı ilə görüşdə doktorant hazırlığı, alüminium sənayesi istiqamətində birgə layihələrin həyata keçirilməsi, AzTU və MAA əməkdaşlarının məqalələrinin beynəlxalq jurnallarda nəşr olunması ilə bağlı fikir mübadiləsi aparılıb. TEİ – TUSAŞ Motor Sanayii A.Ş-nin baş direktoru professor Mahmut Faruk Aktiş və nümayəndə heyəti ilə görüşdə TEİ-nin Havacılık Motorları Məktəbində, TEİ və Qəbzə Texniki Universitetinin birlikdə yerinə yetirdiyi Magistr Proqramına AzTU və MAA tələbələrinin qoşulmasına imkan yaradılması barədə razılıq əldə edilib. Daha sonra üçtərəfli müqavilənin imzalanması mərasimi keçirilib. Türk Hava Kurumu Universiteti ilə tanışlıq zamanı kosmik sənaye sahəsində əməkdaşlıq imkanları müzakirə olunub. Daha sonra Türk Hava Kurumu Universiteti-AzTU-MAA arasında üçtərəfli əməkdaşlıq müqaviləsi imzalanıb. Çankaya Universitetinin rektoru professor Hadi Hakan Maraş və nümayəndə heyəti ilə görüşdə təhsil və tədqiqat sahəsində qarşılıqlı təcrübə mübadiləsinin həyata keçirilməsi istiqamətində fikir mübadiləsi aparılıb və birgə əməkdaşklıq müqaviləsinin hazırlanması barədə razılıq əldə edilib. Əskişəhər Texniki Universitetində keçirilən görüşdə yeni əməkdaşlıq imkanları, “Erasmus+” proqramı çərçivəsində əməkdaşlığın davam etdirilməsi və digər məsələlərlə bağlı fikir mübadiləsi aparılıb. Qeyd edək ki, AzTU rektorunun rəhbərlik etdiyi nümayəndə heyətində elm və innovasiyalar üzrə prorektor Sübhan Namazov, Universitet-Sənaye Əməkdaşlığı və Ömürboyu Təhsil Mərkəzinin müdiri Aynurə İsmayılova iştirak edib. MAA-nın birinci prorektoru Ədalət Səmədovun başçılıq etdiyi nümayəndə heyətində isə MAA-nın Elm-İstehsalat birliyinin direktoru Kamal Əsgərov təmsil olunub.

  Slovakiya Respublikasının Jilina Universitetinin Mexanika mühəndisliyi fakültəsinin beynəlxalq əlaqələr üzrə dekan müavini professor İvan Kuliç Azərbaycana səfəri çərçivəsində AzTU-da olub. Qonaq AzTU-nun rektoru Vilayət Vəliyev və universitetin nümayəndələri ilə görüşüb. İvan Kuliç əvvəlcə təmsil etdiyi universitet haqqında geniş təqdimatla çıxış edib, AzTU ilə enerji, nəqliyyat və logistika, mexatronika sahələrində əməkdaşlığın qurulmasının önəmini bildirib. İvan Kuliç Jilina Universitetinin layihələri haqqında da danışıb. “Horizon Europe” və “Erasmus+” proqramlarında AzTU ilə birgə iştirak istiqamətində əməkdaşlığın qurulacağı da qeyd olunub. Rektor Vilayət Vəliyev AzTU-nun Avropanın müxtəlif  universitetləri ilə əməkdaşlığa önəm verdiyini diqqətə çatdırıb.  Jilina Universitetinin beynəlxalq tədqiqatlar sahəsində geniş təcrübəsini olduğunu vurğulayan rektor AzTU-nun bu təcrübədən yararlanacağını diqqətə çatdırıb. Görüş zamanı birgə tədqiqatların aparılması və elmi məqalələrin yazılması, professor-müəllim heyəti və tələbə mübadiləsi, universitetlərin təşəbbüsü ilə konfransların təşkili istiqamətində əməkdaşlığın yol xəritəsi müəyyən olunub.  

Azərbaycan Texniki Universitetinin (AzTU) Beynəlxlaq əlaqələr şöbəsinin müdiri Orxan Vətənxah və İqtisadiyyat və idarəetmə fakültəsinin dekanı Farqanə Musayeva “Azərbaycan ali təhsil müəssisələrində davamlı sahibkarlıq ekosisteminin gücləndirilməsi” (ENGAGE) layihəsi çərçivəsində İsveçə səfər edib. Səfərin məqsədi ali təhsil müəssisələrində universitet-sənaye işbirliyinin gücləndirilməsi, innovasiya və sahibkarlıq fəaliyyətlərinin inkişaf etdirilməsi sahəsində İsveç təcrübəsinin öyrənilməsindən ibarətdir. Səfər çərçivəsində innovasiya və sahibkarlığın inkişafı üçün əlverişli mühitin yaradılması, universitet-sənaye əməkdaşlığının formalaşdırılması, sahibkarlıq və innovasiya məzmunlu təhsilin təşkili, İsveç İnnovasiyalar Agentliyinin fəaliyyəti, İsveç Strateji İnnovasiya Proqramı, innovasiyanın və onun təsirlərinin artırılması üzrə beynəlxalq layihələr və digər mövzularda seminarların təşkili, həmçinin qarşılıqlı fikir mübadilələrinin aparılması nəzərdə tutulub. Tədbirə layihənin Avropa tərəfdaşı İsveçin Kral Texnologiya Universiteti ev sahibliyi edir. Səfərdə Azərbaycanın 11 universitetindən rektorlar, prorektorlar, inzibati və akademik heyət üzvləri, eləcə də Polşanın WSG Universiteti (University of Economy in Bydgoszcz) əməkdaşları iştirak edirlər. Qeyd edək ki, layihənin koordinatoru Mingəçevir Dövlət Universitetidir.

Almaniyanın “Siemens Energy” şirkətinin Elm və texnika bölməsinin rəhbəri Yaşar Musayev Azərbaycan Texniki Universiteti (AzTU) və digər ali təhsil müəssisələrinin, həmçinin elmi-tədqiqat institutlarının və sənaye sahələrinin əməkdaşlarına “Yaşıl enerji texnologiyası: Yaşıl hidrogen” mövzusunda seminar keçib. Qonağı AzTU-da görməkdən məmnunluğunu ifadə edən rektor Vilayət Vəliyev bu mövzuda seminarın keçirilməsi təşəbbüsünü yüksək qiymətləndirib. Bildirib ki, yaşıl enerji texnologiyalarının tədqiqi zamanı Almaniya təcrübəsindən yararlanmaq faydalı ola bilər. Rektor AzTU-da bu istiqamətdə görülən işlər və adıçəkilən mövzuda keçiriləcək konfrans barədə də məlumat verib. Daha sonra Yaşar Musayev sözügedən mövzuda mühazirə oxuyub. O, əvvəlcə “Siemens Energy” şirkəti haqqında ətraflı məlumat verib. Daha sonra yaşıl enerji, habelə yaşıl hidrogen texnologiyaları sahəsində həyata keçirilən yeniliklər barədə geniş təqdimatla çıxış edib. Seminarın sonunda suallar cavablandırılıb. 

Azərbaycan Texniki Universitetində (AzTU) “Elsevier” şirkətinin “Scopus” və “ScienceDirect” bazalarının təqdimatı keçirilib. Təqdimatda AzTU-nun rektoru Vilayət Vəliyev, universitetin Kitabxana İnformasiya Mərkəzinin əməkdaşları, “Elsevier” şirkətinin nümayəndələri - Damir Rakhmatov və Helena Pacsuzka, həmçinin müxtəlif ali məktəblərin nümayəndələri iştirak ediblər. İştirakçıları salamlayan rektor Vilayət Vəliyev müasir dövrdə tədrisin və elmi-tədqiqatların inkişafından danışaraq bu istiqamətdə kitabxanaların mühüm rolunu qeyd edib. Bildirib ki, kitabxanaların beynəlxalq əməkdaşlığı inkişaf etdirməsi elmin inkişafı üçün mühüm amillərdən biridir.   AzTU-nun Kitabxana İnformasiya Mərkəzinin direktoru Xəyalə Hacıyevanın moderatorluğu ilə keçirilən təqdimatda “Elsevier” şirkətinin nümayəndələri - Damir Rakhmatov və Helena Pacsuzkanın “Scopus” və “ScienceDirect” bazaları ilə bağlı ətraflı məlumat veriblər. Sonda iştirakçıları maraqlandıran suallar cavablandırılıb.

Azərbaycan Texniki Universitetinə (AzTU) qəbul olmaq istəyən abituriyentlər (həmçinin subbakalavrlar) üçün ixtisas seçiminin vaxtı açıqlanıb. Belə ki, AzTU-ya qəbul olmaq üçün müsabiqə şərtlərini ödəyən abituriyentlərin (həmçinin subbakalavrlar) ixtisas seçimi 16-28 avqust tarixlərində aparılacaq. 2023/2024-cü tədris ili üzrə AzTU-da tələbə qəbulu aparılacaq ixtisaslar: 1. 050607 - Elektrik və elektronika mühəndisliyi 2. 050607 - Elektrik və elektronika mühəndisliyi* 3. 050608 - Energetika mühəndisliyi 4. 050630 - Mühəndis fizikası 5. 050634 - Proseslərin avtomatlaşdırılması mühəndisliyi 6. 050604 - Cihaz mühəndisliyi 7. 050622 - Maşın mühəndisliyi 8. 050628 - Mexanika mühəndisliyi 9. 050629 - Mexatronika və robototexnika mühəndisliyi 10. 050635 - Qida mühəndisliyi 11. 050638 - Sənaye mühəndisliyi 12. XTB050101 - Hərbi kompozisiya materialları mühəndisliyi 13. XTB050102 - Hərbi rabitə vasitələri mühəndisliyi 14. XTB050103 - Optotexnika mühəndisliyi 15. XTB050104 - Pirotexniki və partladıcı vasitələr mühəndisliyi 16. XTB050106 - Silah və silah sistemləri mühəndisliyi 17. 050601 - Aerokosmik mühəndislik 18. 050621 - Logistika və nəqliyyat texnologiyaları mühəndisliyi 19. 050632 - Nəqliyyat mühəndisliyi 20. 050806 - Nəqliyyatda servis (avtomobil nəqliyyatı üzrə) 21. 050606 - Ekologiya mühəndisliyi 22. 050614 - Həyat fəaliyyətinin təhlükəsizliyi mühəndisliyi 23. 050618 - Kimya mühəndisliyi 24. 050623 - Materiallar mühəndisliyi 25. 050624 - Mədən mühəndisliyi 26. 050627 - Metallurgiya mühəndisliyi 27. 050509 - Kompüter elmləri 28. 050615 - İnformasiya təhlükəsizliyi 29. 050616 - İnformasiya texnologiyaları 30. 050620 - Kompüter mühəndisliyi 31. 050620 - Kompüter mühəndisliyi** 32. 050636 - Radiotexnika və telekommunikasiya mühəndisliyi 33. 050401 - Beynəlxalq ticarət və logistika 34. 050402 - Biznesin idarə edilməsi 35. 050405 - İqtisadiyyat 36. 050407 - Marketinq 37. 050408 - Menecment 38. 050410 - Statistika   *Türkiyə Respublikasının Qazi Universiteti ilə birgə ikili diplom proqramı. **Türkiyə Respublikasının Ankara Universiteti ilə birgə ikili diplom proqramı.