Azərbaycan Texniki Universitetinin (AzTU) rektoru Vilayət Vəliyev Təhsildə Keyfiyyət Təminatı Agentliyinin (TKTA) İdarə Heyətinin sədri Ülkər Səttarova ilə görüşüb. Rektor universitetin gələcək hədəfləri, həmçinin beynəlxalq akkreditasiya təşkilatları ilə əlaqələri haqqında məlumat verib. Bildirib ki, akkreditasiyanın keçirilməsi universitetlərin inkişafına xidmət edir. TKTA-nın İdarə Heyətinin sədri Ülkər Səttarova qeyd edib ki, təhsilin bütün səviyyələrində keyfiyyətin təminatı sisteminin beynəlxalq standartlara uyğun qurulması akkreditasiya prosesinin əsas məqsədlərindən biridir. Ülkər Səttarova AzTU-da akkreditasiya prosesinin uğurla tamamlandığını bildirib və universitetin rektoru Vilayət Vəliyevi bu münasibətlə təbrik edib. Daha sonra Elm və Təhsil Nazirliyinin Akkreditasiya Şurasının qərarı ilə AzTU-nun 5 il müddətində institusional akkreditasiya olunduğu ilə bağlı şəhadətnamə rektor Vilayət Vəliyevə təqdim olunub.

AzTU-da yaşıl enerji texnologiyalarının tədrisi üzrə bilik və bacarıqların davamlı yüksəldilməsi, energetika sahəsində yüksəkixtisaslı kadrların hazırlanması üçün universitetin həyətində külək qurğuları istifadəyə verilib. Qurğu hər birinin gücü 2 kVt olan 2 ədəd külək turbini, elektrik enerjisinin akkumlyasiyası üçün tutumu 2000 Amper-saat olan batareyadan ibarətdir. Külək qurğuları həm avtonom, həm də paylayıcı şəbəkə sisteminə qoşulma imkanına malikdir. AzTU-da bərpa olunan enerji sahəsində təhsil alan tələbələr sözügedən avadanlıqlar vasitəsilə yaşıl enerji qurğularının ümumi şəbəkəyə qoşulması, şəbəkədən asılı olmadan avtonom rejimdə işləməsi, əsas konstruktiv elementlərinin iş prinsipi ilə tanış olacaq və praktiki vərdişlərə yiyələnəcəklər.

İyulun 25-də saat 11:00-dan tələbələrin köçürülməsi üzrə sənəd qəbulu prosesinə başlanılır.  Sənəd qəbulu 31 iyul saat 23:59-dək davam edəcək.   Tələbələrin ölkə daxilində və xaricdə yerləşən ali təhsil müəssisələrindən köçürülməsi, yaxud ixtisasının dəyişdirilməsi, xarici ölkə ali təhsil müəssisələrindən ölkədaxili ali məktəblərə bərpası, eləcə də ölkəmizdə və xaricdə yerləşən orta ixtisas təhsili müəssisələrinin tələbələrinin köçürülməsi üzrə elektron sənəd qəbulu transfer.edu.az portalı vasitəsilə həyata keçirilir.   Portala müraciət edən şəxslər köçürülmək (bərpa olunmaq) istədikləri təhsil müəssisəsini və ya ixtisası seçmək imkanına malikdirlər. Bunun üçün təhsilalanlar tələb olunan məlumatları elektron müraciətlərinə daxil etməklə sorğu göndərə bilərlər.  Köçürülmə üçün Dövlət İmtahan Mərkəzi (DİM) tərəfindən keçirilən qəbul imtahanlarında tələbənin topladığı bal qəbul olunduğu ildə köçürülmək istədiyi təhsil müəssisəsində müvafiq ixtisas üzrə minimal keçid balından az olmamalıdır. Bununla yanaşı, tələbənin qəbul olunduğu və köçürülmək istədiyi ixtisaslar DİM tərəfindən müəyyən edilmiş eyni ixtisas qrupu daxilində olmalıdır.  Qaydalara əsasən, xarici ölkələrin akkreditə olunmayan təhsil müəssisələri tələbələrinin və digər ölkələrdə qiyabi təhsil alan şəxslərin köçürülməsinə icazə verilmir. Bununla yanaşı, tələbənin təhsil aldığı ali təhsil müəssisəsinin dünyanın ən yaxşı universitetlərinin reytinq siyahısında olması da nəzərə alınan göstəricilər sırasındadır. Bir ali təhsil müəssisəsindən digərinə köçürülən, ixtisasını dəyişən və tələbələr sırasına bərpa olunan şəxslər (dövlət sifarişi əsasında təhsil alanların eyni ixtisas üzrə köçürülməsi istisna olmaqla) təhsillərini yalnız ödənişli əsaslarla davam etdirirlər.  Proseslə bağlı əlavə məlumat əldə etmək üçün Elm və Təhsil Nazirliyinin 146-6 Çağrı Mərkəzi və ya rəsmi "Whatsapp" xidməti ilə (+994 51 206 78 48) əlaqə saxlamaq mümkündür. 

AzTU-nun Maşınqayırma və robototexnika fakültəsinin birinci kurs magistr tələbəsi Vüsal Niftalıyev vəfat edib.  AzTU-nun rəhbərliyi və kollektivi Vüsal Niftalıyevin vaxtsız vəfatından kədərlənir, ailəsinə və yaxınlarına başsağlığı verir. Allah rəhmət eləsin!

Türkiyənin Həsən Kalyoncu Universitetinin Strateji inkişaf və keyfiyyət təminatı departamentinin müdiri Tuba Gündoğdu “Erasmus+” proqramı çərçivəsində AzTU-da səfərdə olub. Səfər çərçivəsində Tuba Gündoğdu tərəfindən "Türkiyə nümunəsində ali təhsil müəssisələrinin strateji inkişafı və keyfiyyət təminatı" mövzusunda seminar keçirilib. Seminarda AzTU-nun nümayəndələri ilə yanaşı, Təhsildə Keyfiyyət Təminatı Agentliyinin (TKTA) nümayəndəsi, AzMİU, ADMİU və SDU-nun müvafiq strukturlarının rəhbərləri və əməkdaşları da iştirak edib. AzTU-nun Keyfiyyətin Təminatı Mərkəzi və Beynəlxalq əlaqələr şöbəsinin təşkilatçılığı ilə keçirilən seminarda iştirakçılara Həsən Kalyoncu Universitetində idarəetmə sistemi, keyfiyyət komissiyasının yaradılması və fəaliyyəti haqqında ətraflı məlumat verilib. Seminarın sonunda Tuba Gündoğdu iştirakçıları maraqlandıran sualları cavablandırıb.

Türk Aviasiya və Kosmik Sənaye Şirkəti (TUSAŞ) ilə əməkdaşlıq çərçivəsində sənayenin və əmək bazarının tələblərinə uyğun olamaqla yüksək ixtisaslı mühəndis hazırlığı üzrə  “AzTU-Türkiyə Aerspace, MGP 2023.1” təlimləri proqramına qəbul elan edilir. Təlim proqramı Azərbaycan Texniki Universitetinin (AzTU) təşkilatçılığı və Milli Aviasiya Akademiyasının (MAA) dəstəyi ilə həyata keçirilir. Təlim proqramı aerokosmik mühəndislik, informasiya texnologiyaları, mexatronika, maşın mühəndisliyi, elektrik-elektronika, xəbərləşmə (radioelektronika), metallurgiya və s. mühəndislik sahələrində ixtisaslaşanların birgə iştirakı və layihə yanaşması əsasında təşkil olunur. Təlim proqramının işçi dili Türkiyə türkcəsi olsa da, istifadə olunan bütün resurs və materiallar (ədəbiyyatlar, təqdimatlar) ingilis dilindədir. Tələblər: Namizədlərin texniki ingilis dili ədəbiyyatları ilə işləmək, başa düşmək, zəngin texniki söz ehtiyatlarına malik olmaq, ingilis dilində araşdırma apararmaq, təqdimat hazırlayacaq qədər yetkin olması mütləqdir. Şəxsi məlumatlar, CV (nümunəyə uyğun) və elektron poçt ünvanı dəqiq yazılmalıdır. Bu tələbləri ödəməyən müraciətlər texniki baxışdan keçmir və baxılmır. Qeydiyyat və CV qəbulu üçün son tarix: 27 iyul 2023-cü il Onlayn imtahan (qabiliyyət və ingilis dili): 28-29 iyul 2023-cü il Qiymət: AzTU və MAA tələbələri üçün ödənişsizdir. Əlaqələndirici şəxs Nicat Bəkirli: mobil/vatsap (+994 55) 2817109 İmtahandan keçən namizədlər müsabiqəyə (31 iyul-4 avqust 2023-cü il) dəvət olunacaq. Müsabiqə AzTU-da (Hüseyn Cavid 25) keçiriləcək. Qeydiyyat üçün link  CV nümunəsi   Proqram haqqında: Təlim proqramı 4 sentyabr-30 dekabr 2023-cü il tarixlərində (4 ay) saat 9:00-dan 18:00-dək həftədə 5 gün müddətində davam edəcək. Təlim proqramında iştirakçıların say həddi 48 nəfərdir. Kursu müvəffəqiyyətlə bitirənlərə sertifikat təqdim olunacaq.

Avropa Birliyinin maliyyə dəstəyi ilə “Erasmus+” proqramı çərçivəsində həyata keçirilən “Azərbaycan və Rusiya ali təhsil müəssisələrində tədris, təlim və qiymətləndirmə prosesinin daxili keyfiyyət təminatının təkmilləşdirilməsi” (IQAinAR) layihəsinin bir illik fasilədən sonra yenidən icraya başlaması ilə əlaqədar tədbir keçirilib. Açılış tədbirində layihənin yeni tərəfdaşları da iştirak edib.  Qeyd olunub ki, Niderlandın Vittenborq Tətbiqi Elmlər Universitetinin baş koordinatorluğu ilə keçirilən “IQAinAR” layihəsinin mövcud tərəfdaşları sırasına Azərbaycan Texniki Universiteti (AzTU) və Təhsildə Keyfiyyət Təminatı Agentliyi (TKTA) də daxil edilib. Layihənin müddəti isə 14.01.2025-ci ilə qədər uzadılıb. Açılış tədbirində yeni tərəfdaşların təqdimatı olub. Tərəfdaşlar yeni tərkibdə yaradılmış konsorsiumun bütün üzvlərinin iştirakı ilə layihə planı, iş qrafiki və bölgüsünü müzakirə edərək razılığa gəliblər. Həmçinin layihəyə edilən dəyişikliklər, büdcənin idarə edilməsi, eləcə də layihənin ictimaiyyətə çatdırılması ilə əlaqədar məsələlər müzakirə olunub. Görüşdə oktyabr ayında Bakıda keçirilməsi planlaşdırılan konsorsium üzvlərinin ilk toplantısı barədə də fikir mübadiləsi aparılıb.

Təhsilin İnkişafı Fondu (TİF) Azərbaycan Texniki Universitetinin (AzTU) Universitet-Sənaye İşbirliyi və Ömürboyu Təhsil Mərkəzində İKT sahəsində ixtisaslaşmış şirkətlərlə görüş keçirib. Görüşün məqsədi universitet-sənaye tərəfdaşlığının gücləndirilməsi istiqamətində dialoqun qurulması, həmçinin sənaye nümayəndələrinin TİF və “Women in Tech” təşkilatının Azərbaycan nümayəndəliyinin birgə təşkilatçılığı ilə təsis olunan Maya Hacıyeva adına “İKT bacarıqları” təqaüd proqramı haqqında məlumatlandırılmasıdır.    İştirakçıları salamlayan AzTU-nun rektoru Vilayət Vəliyev “Universitet-Sənaye işbirliyi və İT” mövzusunda təqdimatla çıxış edib. Rektor bildirib ki, universitet-sənaye işbirliyinin inkişafı sahibkarlıq universiteti modelinin formalaşdırılması üçün imkan yaradır. Bu işbirliyində İT sektorunun inkişafı da mühüm amildir. Bunun üçün öyrətmə prosesi kamil olmalı, universitet-sənaye işbirliyini dəstəkləyən innovasiya ekosistemi yaradılmalı, mühəndislik istiqamətində həyata keçirilən tədris prosesi proqram təminatı vasitəsilə aparılmalı, İT təşkilat və şirkətləri ilə əməkdaşlıqlar qurulmalıdır. TİF-in İdarə Heyətinin sədri Elnur Nəsibov qonaqları salamlayaraq fondun fəaliyyət istiqamətləri haqqında məlumatı diqqətə çatdırıb. O, müasir işəgötürənin tələblərinə cavab verən gənclərin yetişdirilməsində, həmçinin önəmli tədqiqat işlərinin aparılmasında sənaye nümayəndələrinin iştirakının vacib rol oynadığını bildirib. Universitet-sənaye işbirliyinin başlıca hədəflərindən biri insan kapitalının inkişafıdır. Bu əməkdaşlıq həm tərəfdaş müəssisələrin mövcud heyətinin, həm də iş həyatında ilk addımlarını atan tələbələrin təlimləndirilməsinə və təcrübə qazanmasına dəstək ola bilər. Ən mühim dəyər isə yaranacaq innovativ ideyaların məhsullara və xidmətlərə çevrilə bilməsidir. Təhsil Sisteminin İnformasiyalaşdırılması İdarəsinin rəisi Vüsal Xanlarov beynəlxalq konsaltinq şirkəti olan “Accenture” şirkətinin araşdırmasından maraqlı məlumatı görüş iştirakçıları ilə paylaşıb. Şirkət dünyada qızların İKT sahəsinə marağının az olması səbəblərini araşdırıb. Birinci səbəb İT və STEM sahəsinin kreativliyinin az olması, ikinci səbəb isə İT sahəsində müəllimlərin 70%-nin kişilərdən ibarət olmasıdır. Bu stereotip təhsilalanlara 4-cü sinifdən sonra təsir etməyə başlayır. Vüsal Xanlarov bu məsələnin həllinin İT təhsilinin kütləvi və hər kəsə əlçatan olmasında gördüyünü vurğulayıb. “Women in Tech” təşkilatının Azərbaycandakı nümayəndəliyinin səfiri Leyla Seyidzadə bildirib ki, təşkilat Azərbaycan daxil olmaqla 50-dən çox ölkədə qadınların İKT sahəsində təşəbbüslərinin reallaşmasına dəstək göstərir, lakin bənzər təqaüd proqramları çox az ölkədə var. Bu cür proqramların olmasının ölkəmizin imici üçün də vacib olduğunu qeyd edib. Leyla Seyidzadə təqaüd proqramının şərtləri barədə ətraflı məlumat verib. Sanaye və biznes nümayəndələri tədbirdə fəal iştirak ediblər. Azərbaycan Kibertəhlükəsizlik Təşkilatları Assosiasiyasının İdarə Heyətinin sədri Elvin Balacanov, Azərbaycan Beynəlxalq Bankının İdarə Heyəti sədrinin müşaviri Zaur Ələkbərov, “Edumedia Azərbaycan” MMC-nin rəhbəri Orxan Abbasov, Azərbaycan İnternet Forumunun prezidenti Osman Gündüz, “Azerbaijan Global İT Technology” şirkətinin icraçı direktoru Rəşad Əhmədov, “CAE” MMC-in rəhbəri Rahim Xasıyev, “BestComp Group” MMC-nin  insan resursları şöbəsinin rəhbəri Fuad Qənbərov və digər nümayəndələr bir sıra maraqlı suallar və təkliflər səsləndiriblər. Yekunda TİF sədri Elnur Nəsibov universitet-sənaye işbirliyi çərçivəsində dövlət-özəl təşkilatlar arasında dialoqun və tərəfdaşlığın davamlı şəkildə aparılmasının vacibliyini vurğulayıb və bütün iştirakçılara təşəkkürünü bildirib.  

AzTU-nun Mühəndis fizikası və elektronika kafedrasının professoru Sevda Qasımova elm və mühəndisliyin inkişafında cəmiyyətə verdiyi əhəmiyyətli töhfəyə görə, “IASED”in (The International Academy of Science and Engineering for Development) Direktorlar Şurası tərəfindən “Fellow Member” (həqiqi üzv) dərəcəsinə layiq görülüb. Qeyd edək ki, “Fellow Member” IASED-in ən yüksək dərəcəsidir.

AzTU-nun Energetika və avtomatika fakültəsinin dekanı, texnika elmləri doktoru Hüseynqulu Quliyev Rusiya Elmlər Akademiyasının Sibir Bölməsinin L.A.Melentyev adına Energetika Sistemləri İnstitutunun (İrkutsk şəhəri) “Böyük energetik sistemlərin etibarlılığının tədqiqinin metodik məsələləri” adlı Elmi Seminarının 95-ci yubiley konfransında iştirak edib. Hüseynqulu Quliyev konfransda “Energetik sistemlərin etibarlılığının təmin olunması üçün enerjisistemə inteqrasiya edilmiş külək stansiyalarının yekun təsirinin tədqiqi” mövzusunda məruzə ilə çıxış edib. Məruzədə böyük güclü bərpa olunan enerji mənbələrinin Azərbaycanın enerji sisteminə inteqrasiyası ilə bağlı problemlər əks olunub. Qeyd edək ki, məruzənin materialları “РИНЦ” və “Scopus” bazasına daxil edilən jurnallarda nəşr ediləcək.