Elm və Təhsil Nazirliyi və Təhsilin İnkişafı Fondunun təşəbbüsü ilə həyata keçirilən 2-ci “Maarifçi” tələbə-məzun təcrübə proqramının iştirakçıları ilə görüş keçirilib. Görüşdə Azərbaycan Texniki Universitetinin (AzTU) rektoru Vilayət Vəliyev, Təhsilin İnkişafı Fondunun İdarə Heyətinin sədri Elnur Nəsibov, Elm və təhsil nazirliyinin İnsan resursları şöbəsinin müdiri Çapay Məmmədov, nazirliyin və fondun nümayəndələri iştirak edib. AzTU-nun rektoru Vilayət Vəliyev tələbə və məzunları salamlayaraq, bu kimi proqramların gənclərlə ünsiyyət, onların dövlət qurumlarının fəaliyyəti barədə məlumatlandırılması baxımından faydalılığını bildirib. Təhsilin İnkişafı Fondunun İdarə Heyətinin sədri Elnur Nəsibov proqramın mahiyyəti barəsində məlumat verib. Sədr “Maarifçi” tələbə-məzun təcrübə proqramının gənc kadrların hazırlanması baxımından faydalı olduğunu vurğulayaraq proqram iştirakçılarına uğurlar arzulayıb. Elm və Təhsil Nazirliyinin İnsan resursları şöbəsinin müdiri Çapay Məmmədov proqrama qəbul edilən namizədləri təbrik edərək onları fəal olmağa dəvət edib, uğurlar arzu edib. Görüşün davamında Təhsilin İnkişafı Fondunun Layihələrin idarə olunması şöbəsinin müdiri Rəsul Həşimov Fondun fəaliyyətini əks etdirən geniş təqdimatla çıxış edib. Daha sonra I “Maarifçi” tələbə-məzun təcrübə proqramının iştirakçısı Səbinə Hüseynova öz təəssüratlarını bölüşərək, yeni iştirakçılara uğurlar arzulayıb. Yekunda gənclərlə qarşılıqlı fikir mübadiləsi aparılıb, proqramla bağlı onları maraqlandıran suallar cavablandırılıb. Qeyd edək ki, “Maarifçi” tələbə-məzun təcrübə proqramına II mərhələdə 37 nəfər təcrübəçi seçilib. 3 ay davam edəcək proqram çərçivəsində seçilmiş iştirakçılar Elm və Təhsil Nazirliyi, həmçinin Naxçıvan Muxtar Respublikası Təhsil Nazirliyinin müxtəlif struktur bölmələrində təcrübə keçəcəklər. İştirakçılar onlar üçün təşkil olunan təlimlərdən yararlanacaq və sosial bacarıqlarını inkişaf etdirəcəklər. Proqramın məqsədi tələbə və məzunlara təcrübə imkanı yaratmaq, onların bilik və bacarıqlarını artırmaq, nəzəri biliklərini real iş mühitində tətbiq etmək və gənclərə peşəkar vərdişlər qazandırmaqdır.

Azərbaycan Texniki Universitetinin (AzTU) tərəfdaşı olduğu “Erasmus+KA2” proqramının “Azərbaycanda institusional repozitoriyalar şəbəkəsi vasitəsilə tədqiqat potensialının inkişafı” (DIRNA) layihəsi çərçivəsində təlim keçirilib. "AzTU-da Rəqəmsal Repozitoriyasının təqdimatı və açıq istifadə imkanları” mövzusunda keçirilən təlim AzTU Kitabxana İnformasiya Mərkəzinin (KİM) direktoru Xəyalə Hacıyeva, KİM-in kitabxana sistemləri və rəqəmsallaşdırılması üzrə eksperti İltifat İbrahimovun təqdimatları əsasında təşkil edilib.  İştirakçılar açıq elm, açıq əlyetərlilik anlayışları, beynəlxalq lisenziyalar, müəllif hüquqları, açıq nəşr imkanları, AzTU-nun açıq əlyetərlilik siyasəti, müəllif razılaşmaları haqqında ətraflı məlumatlandırılıb. İştirakçılar üçün həm də AzTU-nun rəqəmsal repozitariyası ilə tanışlıq, repozitariyaya resurs qəbulu qaydaları barədə təqdimat verilib. Təlimdə habelə iştirakçılara AzTU KİM-in təmin etdiyi abunə bazaları, açıq əlyetərli bazalar haqqında məlumatlar da təqdim edilərək bazalar üzərindən ədəbiyyat axtarışı icra edilib və informasiya təminatı ilə bağlı auditoriya ətraflı məlumatlandırılıb. Sonda iştirakçıları maraqlandıran suallar cavablandırılıb. 

Azərbaycan Texniki Universitetinin (AzTU) tələbələri üçün Alman Akademik Mübadilə Xidmətinin (DAAD) təqaüd proqramlarına müraciətlə bağlı növbəti seminar keçirilib. “Uğurlu motivasiya məktubunu necə hazırlamalı” mövzusunda keçirilən seminarda tələbələrə DAAD-nin magistratura səviyyəsində təqaüd proqramlarına müraciət edən zaman təqdim edilməli olan motivasiya məktubunun hazırlanması qaydaları izah olunub. Seminar AzTU-da fəaliyyət göstərən DAAD-nin alman dili müəllimi Klaudio Kasperl tərəfindən keçirilib. Seminarda DAAD-nin fəaliyyəti və təqaüd proqramları, müraciət şərtləri, tələb olunan sənədlər toplusu və motivasiya məktubunun düzgün hazırlanması qaydaları haqqında tələbələrə ətraflı məlumat verilib. Tədbirin sonunda iştirakçıların sualları cavablandırılıb. Bununla yanaşı, Klaudio Kasperl “Almaniyada təqaüdlü dil kursları” üzrə məlumatlandırma sessiyası da təşkil edib. DAAD-nin bakalavr və magistr tələbələri üçün təşkil edilən məlumatlandırma sessiyasında Almaniyada yay məktəbləri və onlara müraciət qaydaları ətraflı izah olunub.

Azərbaycan Texniki Universitetində (AzTU) 15-ci Beynəlxalq Elm və Texnologiya Konfransı (ISTEC) öz işinə başlayıb. Sakarya Universiteti, Kocaeli Sağlamlıq və Texnologiya Universiteti, eləcə də Çankaya Universitetinin tərəfdaşlığı ilə keçirilən beynəlxalq konfrans elm dünyasının alimlərini bir araya toplayıb. Tədbirdə açılış nitqi ilə çıxış edən Azərbaycan Texniki Universitetinin (AzTU) rektoru professor Vilayət Vəliyev konfransa ev sahibliyi etməkdən məmnunluğunu bildirib. O, belə konfransların və əməkdaşlığın elmi-texniki sahələrin inkişafına mühüm töhfələr verdiyini,  gələcəkdə daha çox beynəlxalq əməkdaşlığa zəmin yaradacağını vurğulayıb. Beynəlxalq konfransın gündəliyində mühəndislik, informasiya texnologiyaları, enerji sistemləri və süni intellekt kimi sahələrdə aparılan tədqiqatlar və innovativ həllər müzakirə olunub. Bundan əlavə, davamlı enerji, ağıllı şəhərlər və rəqəmsal transformasiya ilə bağlı təqdimatlar edilib. Konfrans həmçinin gənc tədqiqatçılara və tələbələrə layihələrini təqdim etmək, beynəlxalq səviyyədə alimlərlə qarşılıqlı əlaqə yaratmaq imkanı verib. İki gün davam edəcək Beynəlxalq Elm və Texnologiya Konfransına 22 ölkədən məruzəçilər müraciət edib və 75 məqalə təsdiq olunub. Konfransda xüsusi dəvətli məruzəçi qismində iştirak edən Kocaeli Sağlamlıq və Texnologiya Universitetinin rektoru professor Müzəffər Elmas “Ali təhsildə keyfiyyətdə yeni inkişaflar”, Ohayo Universitetindən professor Teresa Franklin “Ali təhsildə K12 və süni intellektlə paradiqmaların dəyişməsi”, professor Con Hitchcock “Tədqiqatlarda süni intellektin istifadəsi”, professor Badrul H. Khan “Rəqəmsal dünyada ağıllı öyrənmə” kimi mövzularda təqdimatla çıxış ediblər.  

İtaliyanın Milan şəhərində keçirilən 75-ci Beynəlxalq Astronavtika Konqresinin geniş auditoriyası qarşısında öz layihəmi təqdim etmək qürurvericidir. Bu sözləri AZƏRTAC-a açıqlamasında konqresdə ölkəmizi təmsil edən milli elmi komandanın üzvü, Azərbaycan Texniki Universitetinin tələbəsi Səfərəli Səfərli deyib. “Ötən gün konqresin elmi sessiyasında layihəmi təqdim etdim. “Süni intellekt naviqasiya və müşahidə sistemi (A.I.N.O.S)” layihəsi fiziki formula əsasən işləyən süni intellektdir. Süni intellekt yer səthindən səmadakı göy cisimlərinin, ulduzların və peyklərin koordinatlarını müəyyən etmək, izləmək və onlar haqqında ekranda məlumat vermək qabiliyyətinə malikdir. Şadam ki, təqdimatım iştirakçılar tərəfindən maraqla qarşılandı. Belə böyük kosmik elmi platformada iştirak etdiyim üçün özümü xoşbəxt hiss edirəm”, - deyə “SABAH” qruplarının bakalavriat səviyyəsinin tələbəsi bildirib. Xatırladaq ki, Milan Konqresində ölkəmizi 50-dək tələbə, gənc mütəxəssis və alimdən ibarət milli elmi komanda təmsil edir.

Azərbaycan Texniki Universitetində (AzTU) keçirilən Beynəlxalq Elm və Texnologiya Konfransı çərçivəsində AzTU rektoru Vilayət Vəliyev və Türkiyənin Kocaeli Səhiyyə və Texnologiya Universitetinin rektoru Müzəffər Elmas arasında görüş keçirilib. Görüş çərçivəsində tədris və tədqiqat istiqamətində razılaşdırılmış birgə əməkdaşlıq məsələləri üzrə iki ali təhsil müəssisəsi arasında Anlaşma Memorandumu imzalanıb.

Azərbaycan Texniki Universitetində (AzTU) Zəfər Gününə həsr olunmuş ənənəvi turnirə start verilib. AzTU İdman Klubu və Həmkarlar İttifaqı Komitəsinin birgə təşkil etdiyi “Zəfər turniri” universitet əməkdaşlarının asudə vaxtının səmərəli təşkili və sağlamlığının qorunması məqsədilə hər il keçirilir. Turnir çərçivəsində AzTU əməkdaşları komandalar şəklində özlərini 5 idman növü üzrə (şahmat, dama, stolüstü tennis, voleybol və futbol) sınayacaqlar.  Turnirin açılış günü AzTU-nun ayrı-ayrı fakültə və struktur bölmələrini təmsil edən ümumilikdə 10 komanda şahmat idman növü üzrə mübarizə aparıb. Yarışın nəticələrinə görə, İnformasiya və telekommunikasiya texnologiyaları fakültəsinin komandası 24 xalla I yer, Maliyyə və təminat departamentinin komandası 19,5 xalla II yer, Xüsusi texnika və texnologiya fakültəsinin komandası isə 17 xalla III yeri qazanıb. Şahmat üzrə nəzərdə tutulmuş fərdi yarışların qalibi isə Xüsusi texnika və texnologiya fakültəsinin akademik məsləhətçisi Nurlan Hüseynov olub. Qeyd edək ki, “Zəfər turniri” üzrə müxtəlif yarışlar 2 həftə davam edəcək. Qaliblər kubok, medal və Həmkarlar İttifaqı Komitəsinin qiymətli hədiyyələri ilə mükafatlandırılacaq.

Koreya Beynəlxalq Əməkdaşlıq Agentliyinin (KOICA) dəstəyi ilə Koreya Respublikasının Ticarət, Sənaye və Energetika Nazirliyi yanında Milli İnformasiya Texnologiyaları Sənayesinin Təşviqi Agentliyinin (NIPA) “Dünyanın Dostları Koreya (WFK) Məsləhətçiləri Proqramı” çərçivəsində koreyalı mütəxəssis Woojik Chun (Vujik Çun) Azərbaycan Texniki Universitetində (AzTU) qonaq mühazirəçi qismində fəaliyyətə başlayıb. Fəaliyyəti çərçivəsində koreyalı mütəxəssis AzTU-nun professsor-müəllim heyəti və tələbələri üçün “İnternetin müasir çağırışları və təkamülü prosesi” mövzusunda seminar keçib. Seminarda interneti dəstəkləyən cari texnologiyalar, həm də onun daxili məhdudiyyətləri nəzərdən keçirilib, eyni zamanda internetin gələcəyini formalaşdıran mümkün həllər və inkişaf tendensiyaları aktiv şəkildə müzakirə edilib. Daha sonra seminarın mövzusu ilə bağlı iştirakçılarla müzakirələr aparılıb.

İtaliyanın Milan şəhərinin ev sahibliyi etdiyi 75-ci Beynəlxalq Astronavtika Konqresi çərçivəsində ölkəmizi təmsil edən milli elmi komandanın üzvü, Azərbaycan Texniki Universitetinin (AzTU) tələbəsi Səfərəli Səfərli elmi məqaləsi üzrə təqdimat keçirib. AzTU tələbəsi konqresin panel sessiyasında “Süni intellekt naviqasiya və müşahidə sistemi (Artificial Intelligence Navigation and Observation System - A.I.N.O.S)” layihəsini təqdim edib. “SABAH” qruplarının bakalavriat səviyyəsinin tələbəsi fiziki formula əsasən işləyən süni intellekt barədə auditoriya iştirakçılarına ətraflı məlumat verib. Bildirib ki, süni intellekt yer səthindən səmadakı göy cisimlərinin, ulduzların və peyklərin koordinatlarını müəyyən etməyə, izləməyə və onlar haqqında ekranda məlumat vermə qabiliyyətinə malikdir. Səfərəli Səfərlinin təqdimatı iştirakçılar tərəfindən maraqla qarşılanıb. Qeyd edək ki, Azərbaycandan Milan Konqresinə 345 elmi məqalə təqdim olunub. Ölkəmizdən təqdim olunan elmi məqalələrin 90 faizi gənclər tərəfindən hazırlanıb. AZƏRTAC

Səhiyyə Nazirliyinin Respublika QİÇS-lə Mübarizə Mərkəzi (RQMM) insanın immunçatışmazlığı virusunun (İİV) törətdiyi xəstəliklə (İİV infeksiyası) mübarizə tədbirləri çərçivəsində Azərbaycan Texniki Universitetində (AzTU) infosessiya keçirib. Tədbirdə sağlamlığa ciddi təhlükə olan İİV və QİÇS haqqında məlumat verilib. Sonda tələbələri maraqlandıran suallar cavablandırılıb.