Türkiyə-Azərbaycan Universiteti (TAU) ilə bağlı Azərbaycan Texniki Universitetində (AzTU) təşkil olunan “Açıq qapı” günü davam edir.

Avqustun 10-da keçirilən “Açıq qapı” günündə də abituriyentlərin TAU-ya böyük marağı müşahidə olunub.

Abituriyentlər və onların valideynləri TAU-nun prorektoru Mehmet Şimşir və tərəfdaş universitetlərin nümayəndələri ilə görüşüb. Görüş zamanı abituriyentlərin TAU ilə bağlı sualları cavablandırılıb.

Qeyd edək ki, TAU-da tədris prosesinə Türkiyədən Orta Doğu Tekniki Universiteti, İstanbul Tekniki Universiteti və Haccettepe Universiteti, Azərbaycandan isə Azərbaycan Texniki Universiteti tərəfdaş kimi cəlb olunub.

Yeni tədris ilində universitetdə kompüter mühəndisliyi, sənaye mühəndisliyi, qida mühəndisliyi ixtisasları üzrə tədris aparılacaq.

Bütün ixtisaslar üzrə tədris ingilis dilində həyata keçiriləcək.