Gənclər və İdman Nazirliyi və Milli Elmlər Akademiyasında Gənc alim və mütəxəssislər şurasının birgə təşkilatçılığı ilə Qazax Olimpiya İdman Kompleksində “Gənc alimlərin yay düşərgəsi” təşkil olunub. Məqsəd 2025-ci il “Konstitusiya və Suverenlik İli” çərçivəsində magistr, gənc alim və tədqiqatçıları bir araya gətirərək onların ideoloji hazırlığını gücləndirmək, bilik və təcrübə mübadiləsinə şərait yaratmaq, həmçinin yeni dostluq və əməkdaşlıqların qurulmasına imkan yaratmaq olub.

90 nəfərə yaxın magistr, doktorant, gənc alim və tədqiqatçının qatıldığı düşərgədə Azərbaycan Texniki Universitetini (AzTU) gənc müəllim və doktorant Nigar Qurbanzadə təmsil edib.

O, 400 nəfər arasından müsabiqə yolu ilə seçilərək düşərgədə iştirak hüququ qazanıb.   

Düşərgə iştirakçıları 5 gün ərzində “Avey” Dövlət Tarix-Mədəniyyət Qoruğu, Xalq şairi Səməd Vurğunun Poeziya evi, Molla Pənah Vaqifin abidəsi, “Qarabağ Azərbaycandır!” Abidə Kompleksi, Qazax Tarix-Diyarşünaslıq və Ədəbiyyat muzeyləri, Qazax Cümə Məscidi, Qazax Müəllimlər Seminariyası və digər tarixi-mədəni məkanlara səfər ediblər.