Sentyabrın 6-da Bakı Ekspo Mərkəzində 4-cü Azərbaycan Beynəlxalq Müdafiə “ADEX” sərgisi öz işinə başlayıb. “ADEX-2022” Vətən müharibəsində qazanılan şanlı Zəfərdən sonra Azərbaycanın təşkil etdiyi ilk beynəlxalq müdafiə sərgisidir. Müasir silah və texnika sərgisi olan “ADEX” Azərbaycanın və dünyanın 200-dən çox şirkətini bir araya gətirir. Sərgiyə ilk dəfə İordaniyadan olan şirkətlər də qatılıb. Regionda müdafiə sənayesi sahəsi üzrə kadr hazırlayan yeganə ali məktəb olan Azərbaycan Texniki Universiteti (AzTU) də sərgidə öz stendi ilə təmsil olunur. AzTU-nun rektoru və əməkdaşları universitetin stendi ilə tanış olub. Eyni zamanda, AzTU-nun əməkdaşlıq etdiyi dünyanın müdafiə sənayesi sahəsi üzrə tanınmış şirkətlərinin də nümayiş etdirdiyi məhsullara baxış keçirilib. Sərgidə ölkənin müdafiə kompleksindəki yeniliklərlə, həmçinin Azərbaycan Silahlı Qüvvələrinin mövcud və artmaqda olan imkanları ilə tanış olmaq mümkündür.“ADEX”də ən müasir silah növlərinin genişmiqyaslı nümayişi Silahlı Qüvvələrin texniki cəhətdən yenidən təchiz olunmasına töhfə verəcək, konstruktiv ünsiyyətə, təcrübə mübadiləsinə, hərbi-texniki sahədə yerli və xarici mütəxəssislər arasında səmərəli əlaqələrin qurulmasına şərait yaradacaq.        

Bakı Limanı Azərbaycan Texniki Universiteti (AzTU) ilə birgə tələbələrin liman əməliyyatları və logistika sahəsində peşəkar bacarıqlarının artırılması üçün təlim və mübadilə proqramları həyata keçirəcək Bu məqsədlə, AzTU-nun rektoru Vilayət Vəliyevin rəhbərlik etdiyi nümayəndə heyəti Bakı Limanında limanın rəhbərliyi və nümayəndələri ilə görüş keçiriblər. Görüş zamanı Bakı Limanı ilə universitet arasında tələbələrin ixtisasyönümlü bacarıqlarını artırmaq məqsədilə innovativ təlim proqramlarının birgə hazırlanması məsələləri müzakirə olunub. Qeyd edək ki, Bakı Limanının Təlim Tədris Mərkəzi artıq uzun müddətdir ki, AzTU ilə yaxından əməkdaşlıq edir. Belə ki, AzTU-nun 48 tələbəsi Azərbaycan Təhsil İnstitutunun təşəbbüsü ilə həyata keçirilən “Liman logistikası və dəniz daşımaları” adlı təlim kursunu Bakı Limanında müvəffəqiyyətlə bitirib və əyani istehsalat təcrübəsi qazanıb. Yaradılan əməkdaşlığın davamlı və institusional inkişafını təmin etmək məqsədi ilə bu gün Bakı Limanı və AzTU arasında qarşılıqlı əməkdaşlığa dair memorandum imzalandı. Sənəddə universitetin tələbələrinin liman əməliyyatları və logistika sahəsində praktik təcrübə keçməsi, həmçinin onların Bakı Limanı ilə yanaşı tərəfdaş limanlarda da mübadilə səfərlərinə cəlb olunması kimi fəaliyyətlər əhatə olunur. Bakı Limanı tələbələrin akademik təhsili zamanı əyani iş təcrübəsi qazanmasını, beləliklə, müasir bazarın tələblərinə cavab verəcək kadr potensialının inkişafına töhfə vermək təşəbbüslərini daim dəstəkləyir.    

Yeni tədris ilinin başlanması ərəfəsində Azərbaycan Texniki Universitetinin (AzTU) Tələbə Həmkarlar İttifaqı Komitəsi (THİK), Tələbə Gənclər Təşkilatı (TGT) və tələbə-rektorunun təşkilatçılığı ilə universitetin həyətyanı sahəsində iməcilik təşkil olunub. “Universitetimizi gözəlləşdir, sev, qoru!” layihəsi çərçivəsində keçirilən iməcilikdə tələbə təşkilatlarının fəalları universitetin həyətyanı sahəsinin abadlaşdırılması və tədris korpuslarının ərazisində təmizlik işlərinin görülməsində iştirak ediblər.Qeyd edək ki, yeni tədris ilindən AzTU-da tələbələrdən ibarət “Green team” formalaşdırılacaq, həmçinin mütəmadi olaraq ekoloji aksiyalar təşkil olunacaq.     

Son 10 ildə Azərbaycan Texniki Universitetində (AzTU) ilk dəfə qəbulun nəticələri kəskin şəkildə artıb.Belə ki, 2022/2023-cü tədris ili üzrə AzTU-nun plan yeri 97.62 % dolub. Bu rəqəm ötən il 78% təşkil edib.Yüksək ballar üzrə qəbulda da ötən illərlə müqayisədə xeyli artım var.Belə ki, 2022/2023-cü tədris ili üzrə AzTU-ya qəbul olunan 4 abituriyent 600-dən yuxarı nəticə göstərib. Onlar arasında ən yüksək nəticə göstərən abituriyent 643,7 balla kompüter mühəndisliyi ixtisası üzrə Ankara Universieti ilə ikili diplom proqramına qəbul olunub.500-dən yuxarı nəticə göstərənlərin sayı da ötən illərlə müqayisədə dəfələrlə artıb.Xatırladaq ki, 2022/2023-cü tədris ili üzrə AzTU-nun magistratura səviyyəsinə qəbul da ötən illərlə müqayisədə 5 dəfə artıb. 

Türk Əməkdaşlıq və Koordinasiya Agentliyinin (TİKA) Bakı nümayəndəliyinin təşkilatçılığı ilə türkiyəli tələbələr Azərbaycan Texniki Universitetinə (AzTU) səfər edib. Türkiyənin müxtəlif ali məktəblərində təhsil alan sonuncu kurs tələbələrinin AzTU-ya səfəri “Təcrübə paylaşım” proqramı çərçivəsində həyata keçirilib. Əvvəlcə  tələbələr AzTU-nun müxtəlif tədris korpusları ilə tanış olublar. Onlar həmçinin TİKA-nın dəstəyi ilə yaradılan “Cezeri Lab” laboratoriyasına baxış keçiriblər. Laboratoriyada tələbələrə burada aparılan sınaqlar barədə ətraflı məlumat verilib.Tələbələr daha sonra AzTU-nun rektoru Vilayət Vəliyevlə görüşüblər. Görüş zamanı AzTU-da görülən işlər, həyata keçirilən innovativ yeniliklər barədə tələbələrə ətraflı məlumat verilib.       

   Əziz abituriyentlər!Hər birinizi Azərbaycan Texniki Universitetinin (AzTU) tələbəsi adını qazanmağınız münasibətilə ürəkdən təbrik edirəm!Sizə təhsilinizdə və gələcək həyatınızda uğurlar, müvəffəqqiyyətlər və bol şans arzulayıram!AzTU ailəsinin üzvü olduğunuz üçün hər birinizi bir daha təbrik edirəm!Tələbə adınız mübarək!

Azərbaycan Texniki Universitetində (AzTU) 2022/2023-cü tədris ili üzrə (əyani və qiyabi) ödənişli əsaslarla təkrar ali təhsil almaq üçün sənəd qəbulunun vaxtı sentyabrın 20-dək uzadılıb.Qəbul yalnız elektron qaydada həyata keçirilir.Təkrar ali təhsil almaq istəyənlər http://tekrar-alitehsil.aztu.edu.az:9594/ linkinə daxil olub qeydiyyatdan keçərək aşağıdakı sənədləri elektron formada təqdim etməlidirlər· rektorun adına ərizə;· ali təhsil haqqında sənədin (diplomun və əlavəsinin) notarial təsdiqi;· 3x4 sm ölçüdə fotoşəkil;· şəxsiyyət vəsiqəsinin surəti.Qeyd: 1993-cü ildən sonra xarici ölkələrdə ali təhsil almış şəxslərin diplomları mövcud qaydada Azərbaycan Respublikası Təhsil Nazirliyi tərəfindən tanındıqdan sonra universitetdə təkrar ali təhsil ala bilərlər.Sənəd qəbulu üçün son tarix: 20.09.2022Əlavə məlumat üçün:Telefon: (+99450) 261-38-16,  (+99412) 539-12-65E-poçt: [email protected]

Azərbaycan Texniki Universitetinin (AzTU) rektoru Vilayət Vəliyev Türk Aviasiya və Kosmos Sənayesinin (TUSAŞ) nümayəndələri ilə görüşüb. Görüşdə universitet-sənaye işbirliyi çərçviəsində TUSAŞ-la əməkdaşlıq istiqamətləri müəyyənləşdirilib.Daha sonra TUSAŞ nümayəndə heyəti AzTU-da aparılan yenidənqurma işləri ilə tanış olub.Qonaqlar universitetin laboratoriya və auditoriyalarına da baxış keçiriblər.               

Azərbaycan Texniki Universitetinin (AzTU) rektoru Vilayət Vəliyevin rəhbərlik etdiyi nümayəndə heyəti “Azərenerji” ASC-nin Baş idarəetmə, elm, tədris və laboratoriya kompleksinə səfər edib.Əvvəlcə nümayəndə heyəti kompleksin Tədris və Laboratoriya mərkəzləri ilə tanış olub. Tanışlıq zamanı müvaviq ixtisaslar üzrə təhsil alan tələbələrin mərkəzlərdə praktiki məşğələlər keçməsi və yeni texnologiyalarla yaxından tanış olması istiqamətində faydalı müzakirələr aparılıb.Tanışlıqdan sonra “Azərenerji” ASC-nin prezidentinin ümumi məsələlər üzrə müşaviri Vüqar Əliyev AzTU nümayəndə heyəti ilə görüşüb və kompleks haqqında ətraflı məlumat verib. Bildirib ki, kompleksin Tədris və Laboratoriya mərkəzlərində universitetlərlə əməkdaşlıq çərçivəsində müvafiq ixtisaslar üzrə təhsil alan tələbələr təcrübə keçir. AzTU-nun ixtisasları bu mərkəzlərin profillərinə tam uyğun olduğundan tələbələrin burada müasir texnologiyaları öyrənməsi onların gələcək karyeralarına müsbət təsir göstərə bilər. Bu məqsədlə Tədris Mərkəzində müxtəlif sinif otaqları təşkil edilib. Kompleksin Laboratoriya Mərkəzində isə tələbələrə müxtəlif növ sınaqların aparılması üçün bütün imkanlar yaradılıb. Qeyd olunub ki, bu cür laboratoriyalar ölkədə ilk dəfə yaradılıb.AzTU-nun rektoru Vilayət Vəliyev bildirib ki, universitet kompeksin mərkəzləri ilə əməkdaşlıq etməkdə maraqlıdır. Tələbələrin praktiki məşğələlərinin burada təşkil edilməsi həm də onların bacarıq və vərdişlərinin müasir tələblərə uyğun formalaşmasına mühüm təsir edəcək. Həmçinin tələbələrin burada iştirakı universitet-sənaye işbirliyinin inkişafına da öz töhfəsini verəcək. Rektor qeyd edib ki, magistrlərin də mərkəzlərə cəlb olunması və onların dissertasiya mövzularını buradan götürməsi əsas məqsədlərdən biridir. Bundan başqa, komplekslə universitetin əməkdaşlığı çərçivəsində energetika sektoru üçün yeni ixtisasların açılması da mühüm şərtlərdəndir.              

Qazaxıstanla Azərbaycan arasında diplomatik münasibətlərin qurulmasının 30 illiyi Qazaxıstan Bakıdakı səfirliyi tərəfindən silsilə tədbirlərlə qeyd olunur. Bu tədbirlər çərçivəsində Azərbaycan Texniki Universiteti (AzTU) ilə Cənubi Qazaxıstan Dövlət Universiteti arasında əməkdaşlıq haqqında memorandum imzalanıb. Memorandumu AzTU-nun rektoru Vilayət Vəliyev və Cənubi Qazaxıstan Dövlət Universitetinin rektoru Dariya Kоjаmjarova imzalayıblar. Sənədə əsasən, hər iki universitet birgə tədris və elmi-tədqiqatların aparılması istiqamətində əməkdaşlıq edəcək.