Azərbaycan Teniki Universiteti (AzTU) ilə Kütahya Dumlupınar Universiteti arasında “Erasmus+” mübadilə proqramı çərçivəsində əməkdaşlıq uğurla davam etdirilir. Əməkdaşlıq çərçivəsində Kütahya Dumlupınar Universitetinin Elektronika və avtomatika kafedrasının müəllimi Dəniz Kaptan AzTU-nun qonağı olub. O, “Erasmus+” mübadilə proqramı çərçivəsində dörd gün ərzində AzTU-nun Energetika və avtomatika fakültəsinin tələbə-müəllim heyəti ilə görüşlər keçirib, həmçinin tələbələrə mühazirə deyib. Mühazirələr əsasən Kütahya Dumlupınar Universitetinin mühəndis hazırlığının prioritet istiqamətləri, elektrik və elektronikanın əsasları, elektrikli maşınlar, onların modelləşdirilməsi, idarə üsulları  və digər maraq doğuran məsələləri əhatə edib. Dəniz Kaptan keçirdiyi görüşlər zamanı tələbələri maraqlandıran suallarını cavablandırıb.   

17-19 noyabr 2022-ci il tarixlərində Almaniyanın Dortmund şəhərində keçirilən Dünya Robot Olimpiadasında 56 ölkədən 78 komanda arasında ölkəmizi təmsil edən Azərbaycan Texniki Universitetinin (AzTU) SABAH qruplarının "Platon Tech" komandası dünya üçüncüsü olub.“Platon Tech” komandasının üzvləri AzTU-nun SABAH qruplarının informasiya texnologiyaları ixtisasının tələbələri Rüfət Şixiyev, Qabil Hüseynli və ADNSU-nun tələbəsi Fərid Şixiyevdir.Komandaya Günel Məmmədli mentorluq edib. Layihə AzTU-nun "CezeriLab" laboratoriyasında formalaşıb.Həmyerlilərimiz "FUTURE INNOVATORS SENIOR" nominasiyası üzrə qalib olublar.Qeyd edək ki, 2000-dən çox iştirakçının qatıldığı yarışda birinci yerə Hindistan, ikinci yerə Yunanıstanı təmsil edən komanda layiq görülüb.    

Azərbaycan Texniki Universitetinin (AzTU) SABAH qruplarının elektronika, telekommunikasiya və radiotexnika mühəndisliyi ixtisası üzrə təhsil alan tələbələrinə ustad dərsi keçirilib. “Optik şəbəkələr üzərindən çoxkanallı rabitənin təşkili” mövzusunda keçirilən dərs əməkdar mühəndis, rabitə ustası Məzahir Vəliyev tərəfindən aparılıb. O, transmissiya avadanlığı, pon şəbəkəsinin təşkili (passiv optik şəbəkə) haqqında tələbələrə ətraflı məlumat verib. Sonda tələbələrin təklifləri dinlənilib və onları maraqlandıran suallar cavablandırılıb.  

  Azərbaycan Texniki Universiteti (AzTU) "Kibergigiyena" platformasından aktiv istifadəyə görə təşəkkürnamə ilə təltif olunub. Məlumat üçün bildirək ki, "Kibergigiyena" layihəsinin (https://kibergigiyena.az/) təlimlərində AzTU-nun insan resursları, maliyyə, beynəlxalq əlaqələr, karyera, dekanlıqlar, kafedralar və digər strukturlarını təmsil edən 100-ə yaxın əməkdaş iştirak edib. Onlar təlimin üç mərhələdə keçirilən test imtahanlarını yüksək nəticələrlə başa vurublar. Təlimlərdə kibertəhlükəsizlik tələbləri və qaydaları, kibertəhlükəsizlik sahəsində standartlar və ən yaxşı təcrübələr, kiberdünyada təhlükəsiz fəaliyyət üçün faydalı təlimat və tövsiyələr, müasir yanaşmalar və həllər təqdim olunub. Qeyd edək ki, AzTU bu layihədə iştirak edən ilk ali məktəbdir.    Xatırladaq ki, "Kibergigiyena" platforması Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin Elektron Hökumətin İnkişafı Mərkəzi, Xüsusi Rabitə və İnformasiya Təhlükəsizliyi Dövlət Xidməti və “B.EST Solutions” MMC arasında imzalanan üçtərəfli müqavilə çərçivəsində yaradılıb.

Azərbaycan Texniki Universitetinin (AzTU) basketbol komandası Tələbə Basketbol Liqasına (TBL) vəsiqə qazanıb. 27 oktyabr - 13 noyabr tarixləri arasında keçirilən TBL-in 2022/2023-cü il üzrə seçmə mərhələ oyunlarında AzTU-nun basketbol komandası bütün qarşılaşmalarda rəqiblərinə qalib gəlib. AzTU komandasının iştirak etdiyi seçmə mərhələ oyunlarının nəticələrini təqdim edirik: AzTU-BANM 106:52 AzTU-ADU 100:24 AzTU- Qərbi Kaspi Universiteti 107:28 AzTU-ADNSU 91:49

Azərbaycan Texniki Universitetində (AzTU) "Bilim Bakı” mərkəzinin rəhbəri Yusuf Polatın iştirakı ilə "TEKNOFEST-2023" festivalı ilə bağlı infosessiya keçirilib.AzTU-nun tədris işləri üzrə prorektoru Nurəli Yusifbəyli universitetin tələbələrinin "TEKNOFEST"də iştiraka xüsusi önəm verdiyini deyib. Bu ilin mayında ölkəmizdə keçirilən "TEKNOFEST Azərbaycan" festivalına universitetin 20 komandasının qatıldığını deyən prorektor onlardan 6-nın finala yüksəldiyini və 2-nin qalib olduğunu bildirib. Nurəli Yusifbəyli AzTU tələbələrini növbəti "TEKNOFEST" festivallarında da həvəslə iştirak etməyə dəvət edib. Daha sonra "Bilim Bakı" mərkəzinin rəhbəri Yusuf Polat çıxış edib. O, tələbələrə "TEKNOFEST-2023" haqqında ətraflı məlumat verib, həmçinin gəncləri maraqlandıran sualları cavablandırıb. Qeyd edək ki, bu il Türkiyənin İstanbul, İzmir və Ankara şəhərlərində keçiriləcək "TEKNOFEST-2023" festivalına qeydiyyat noyabrın 20-də yekunlaşacaq.

Noyabrın 11-də Azərbaycan Texniki Universiteti (AzTU) və Türkiyənin İqtisadi İnkişaf və Sosial Tədqiqatlar İnstitutunun (İKSAD) birgə təşkilatçılığı ilə Beynəlxalq Mühəndislik Elmləri Konfransı öz işinə başlayıb. Konfransın məqsədi mühəndislər, elm adamları və sənaye tərəfdaşlarının mühəndislik sahəsində son elmi-tədqiqat nəticələrini müzakirə etmək və geniş auditoriyaya çatdırmaq üçün bir platforma təmin etməkdir. İştirakçıları salamlayan AzTU-nun rektoru Vilayət Vəliyev konfransın əhəmiyyətindən danışıb. Bildirib ki, konfransda 15 ölkənin mühəndislik sahəsi üzrə alimləri, tədqiqatçıları iştirak edir. İki gün ərzində iştirakçılar mühəndislik sahəsində tədqiqatlarını paylaşaraq təcrübə körpüsü yaradacaq.   Sonra İKSAD-ın baş əlaqələndiricisi Atabek Movlyanov, “İKSAD Azərbaycan”ın baş koordinatoru Əlvan Cəfərov, professor Abdulla Sofiyev çıxış edib. Bölmə iclasları ilə ənənvi və onlayn formatda davam edən konfrans işini noyabrın 12-də yekunlaşdıracaq. 

Azərbaycan Texniki Universiteti (AzTU) Tələbə Həmkarlar İttifaqı Komitəsinin (THİK) təşkilatçılığı ilə “Şuşa İli” və Zəfər Gününə həsr olunan spartakiadanın bağlanış mərasimi keçirilib. Tədbirdə çıxış edən AzTU-nun elm və innovasiya üzrə prorektoru Sübhan Namazov “Şuşa İli” və Zəfər Gününə həsr olunan spartakiadanın əhəmiyyətindən danışıb. Bildirib ki, tələbələrin keyfiyyətli təhsil almaları ilə yanaşı, onların sağlamlıqlarının qorunması da diqqət mərkəzindədir. Bu məqsədlə AzTU-da mütəmadi olaraq idman yarışları, spartakiadalar keçirilir. Sübhan Namazov “Şuşa İli” və Zəfər Gününə həsr olunan spartakiadada qalib olan komandalara uğurlar arzulayıb. Qeyd edək ki, AzTU-nun İdman sarayında təşkil olunan yarışlar şahmat, stolüstü tennis, voleybol və futzal idman növü üzrə keçirilib. Spartakiadanın nəticələrinə əsasən, şahmat üzrə yarışda birinci yerə Energetika və avtomatika, ikinci yerə Xüsusi texnika və texnologiya, üçüncü yerə isə İqtisadiyyat və idarəetmə fakültəsinin komandası layiq görülüb. Stolüstü tennis idman növü üzrə qalib Energetika və avtomatika fakültəsinin komandası olub. Xüsusi texnika və texnologiya və Nəqliyyat və logistika fakültəsinin komandaları müvafiq olaraq ikinci və üçüncü yerdə qərarlaşıblar. Voleybol yarışında birinci yerə İnformasiya və telekommunikasiya texnologiyaları, ikinci yerə Xüsusi texnika və texnologiya, üçüncü yerə isə Nəqliyyat və logistika fakültəsinin komandası layiq görülüb. Futzal yarışının da qalibi İnformasiya və telekommunikasiya texnologiyaları fakültəsinin komandası olub. Maşınqayırma və robototexnika fakültəsinin komandası ikinci, Nəqliyyat və loqistika fakültəsinin komandası isə futsal yarışında üçüncü yerdə qərarlaşıb.    

Dünyanın ən qabaqcıl şirkətlərindən olan Türk Aviasiya və Kosmik Sənaye Şirkəti (TUSAŞ) Azərbaycan Texniki Universitetində (AzTU) yeni layihəyə başlayıb. Belə ki, icrasına başlanılan “AzTU-Turkish Aerospace, MGP 2023” adlı yeni proqram AzTU tələbələrinə təqdim olunub. Tədbirdə çıxış edən AzTU-nun rektoru Vilayət Vəliyev TUSAŞ-ın təyyarə layihələri, müdafiə sistemləri və digər fəaliyyətləri haqqında tələbələrə məlumat verib. Bildirib ki, dünyanın ən tanınmış şirkətlərindən olan TUSAŞ-ın AzTU-da icra ediləcək proqramının mühəndislik ixtisasları üzrə təhsil alan tələbələrin perspektiv inkişafı üçün müstəsna əhəmiyyəti olacaq.   Rektor qeyd edib ki, proqramda İqtisadiyyat və idarəetmə fakültəsi istisna olmaqla, digər fakültələrdə bakalavriat (IV kurs), magistratura (I və II kurs) və doktorantura səviyyələrində mexatronika, maşın mühəndisliyi, sənaye mühəndisliyi, maşınqayırma, elektrik-elektronika, radioelektronika, proqram təminatı, metallurgiya və materiallar mühəndisliyi, aerokosmik mühəndislik ixtisasları üzrə təhsil alan əlaçı tələbələr iştirak edə bilərlər. Daha sonra TUSAŞ-ın “Mühəndis Geliştirme Proqramı”nın (MGP) rəhbərləri Seyhan Gül və Görkem Mutallip Şimşek çıxış ediblər. Qeyd olunub ki, mühəndislik ixtisasları üzrə kadr potensialının gücləndirilməsi məqsədilə AzTU və TUSAŞ arasında əlaqələlər daha da inkişaf etdirilir. “AzTU-Turkish Aerospace, MGP 2023” proqramında isə ixtisas istiqamətləri bir qədər də genişləndirilib. Qeyd edək ki, sözügedən proqrama AzTU tələbələri ilə yanaşı Milli Aviasiya Akademiyasının (MAA) aerokosmik mühəndislik ixtisası üzrə təhsil alan tələbələri və müəllimləri də cəlb ediləcək. 2023-cü ilin fevral-iyun aylarını əhatə edəcək proqram AzTU-nun Universitet-Sənaye Əməkdaşlığı və Ömürboyu Təhsil Mərkəzi tərəfindən koordinasiya edilir.    

Azərbaycan Texniki Universitetinin (AzTU) Logistika və Nəqliyyat İnstitutunun direktoru Fuad Daşdəmirov, böyük elmi işçi Azər Qurbanov və kiçik elmi işçi Ülvi Cavadlı Özbəkistanda işgüzar səfərdə olublar. Səfərin ilk iki günü AzTU nümayəndə heyəti Daşkənd Dövlət Nəqliyyat Universitetində (DDNU) “Transproyekt” MMC tərəfindən təşkil olunan “PTV Traffic Suite” proqramı istifadəçilərinin illik görüşündə iştirak edib. Daha sonra Özbəkistan Dövlət Yol Polisi İdarəsinin Müşahidə Mərkəzi, Daşkənd Şəhər Hakimliyinin nəzdində Monitorinq Mərkəzi, eyni zamanda şəhər nəqliyyatının planlaşdırılması üzrə “PTV” Mərkəzinə ekskursiya təşkil olunub. Səfər çərçivəsində AzTU və DDNU-nun nümayəndələri iki universitet arasında logistika və nəqliyyat layihələrinin birgə həyata keçirilməsi üzrə məsələləri müzakirə ediblər. AzTU nümayəndə heyəti DDNU-nun tədris işləri üzrə prorektoru Abdüləziz Qulamov, elm üzrə prorektoru Said Şaumarov və xarici əlaqələr üzrə prorektoru Baxodır Turayev ilə də görüşlər keçirib.Görüşlərdə AzTU və DDNU-nun birgə təmsil olunacağı  logistika, daşıma prosesinin təşkili, yol hərəkətinin təhlükəsizliyi, elektromobillərin layihələndirilməsi və nəqliyyat koridorlarının problemləri ilə məşğul olacaq elmi-tədqiqat mərkəzinin yaradılması ilə bağlı perspektiv planlar nəzərdən keçirilib. Səfər çərçivəsində AzTU-nun əməkdaşları DDNU-nun tədris prosesi, universitetin elektromobillərin layihələndirilməsi üzrə laboratoroiyaları ilə tanış olub, həmçinin “PTV Traffic Suite” istifadəçisi olan şirkətlərə ekskursiya ediblər.