Azərbaycan Texniki Universitetinin (AzTU) rektoru Vilayət Vəliyev və Azərbaycan Kibertəhlükəsizlik Təşkilatları Assosiasiyasının (AKTA) İdarə Heyətinin sədri Elvin Balacanov arasında görüş keçirilib. Görüşdə hər iki tərəfdən nümayəndələr iştirak edib. “Cyberpoint”, “Simbrella”, “AzeRobot”, “PNetworks”, “Digital Umbrella” şirkətlərinin, “Azərbaycan Kibertəhlükəsizlik Platforması” nümayəndələrinin, habelə müvafiq ekspertlərin də qatıldığı görüşün əsas məqsədi AzTU və AKTA arasında əməkdaşlığın genişləndirilməsi və möhkəmləndirilməsi, ölkənin kibertəhlükəsizlik ekosisteminin gücləndirilməsinə real töhfə verə bilmək üçün birgə atılacaq addımların müzakirəsi olub. Rektor Vilayət Vəliyev qarşılıqlı əməkdaşlığın genişlənməsindən məmnunluğunu ifadə edib və rəhbərlik etdiyi ali təhsil müəssisəsində müvafiq sahə üzrə son illərdə həyata keçirilən işlər, mütəxəssis hazırlığı, tədris proqramları, eləcə də Kibertəhlükəsizlik kafedrasının fəaliyyəti barədə məlumat verib. AKTA-nın ölkənin kibertəhlükəsizlik ekosisteminin gücləndirilməsindəki rolundan və yaxın gələcək üzrə hədəflərindən bəhs edən AKTA-nın İdarə Heyətinin sədri Elvin Balacanov universitetlərin fəaliyyətinin yaxından dəstəklənməsinin və beləliklə, qarşılıqlı əməkdaşlığın genişləndirilməsinin zəruri olduğunu vurğulayıb. Görüşdə AzTU və AKTA arasında gələcək əməkdaşlıq istiqamətləri, o cümlədən universitetdə kibertəhlükəsizlik üzrə müvafiq infrastrukturun təkmilləşdirilməsi və laboratoriyaların formalaşdırılması, tədris proqramı və sillabusların inkişaf etdirilməsi, tədqiqatların genişləndirilməsi, əmək bazarı və sənaye ilə əlaqələrin gücləndirilməsi, birgə sertifikat proqramlarının hazırlanması və digər məsələlər ətrafında fikir mübadiləsi aparılıb. AKTA üzvləri tərəfindən qeyd olunan istiqamətlərlə yanaşı tələbələrə təcrübə və iş imkanlarının yaradılması istiqamətində də dəstək verilə biləcəyi diqqətə çatdırılıb. Həmçinin AKTA tərəfindən tədris və tədqiqat sahəsində beynəlxalq əməkdaşlığın genişləndirilməsi, xüsusilə də bu məqsədlə Türkiyə, İsrail və digər ölkələrin müvafiq ekspertlərinin tədris və təlim proseslərinə cəlb olunması istiqamətində də dəstək verilə biləcəyi qeyd olunub.  

Azərbaycan Texniki Universitetində (AzTU) Xocalı soyqırımının 31-ci ildönümü ilə əlaqədar elmi seminar keçirilib. Tədbirdə çıxış edən Humanitar fənlər kafedrasının müdiri  Həbib Mirzəyev bildirib ki, Xocalı soyqrımı ermənilərin bəşəriyyətə, insanlığa qarşı törətdiyi ən dəhşətli cinayət hadisəsidir. Əsrlər boyu ermənilərin xalqımızın başına gətirdiyi faciələri, Azərbaycan torpaqlarına yönələn çirkin niyyətlərini, təcavüzkar əməllərini unutmamalıyıq. Daha sonra Humanitar fənlər kafedrasının professoru Əyyub Kərimov bu dəhşətli faciənin baş verməsinin səbəblərini tarixi faktlarla açıqlayıb. Qeyd edib ki, ermənilər öz mənfur və təhlükəli siyasətlərini gerçəkləşdirmək üçün müxtəlif üsul və vasitələrdən, tarixin saxtalaşdırılmasından, siyasi təxribatlardan istifadə edib. Bu baxımdan xalq olaraq həmişə ayıq-sayıq olmalı, tariximizi dərindən öyrənməli,  elmi biliklərə mükəmməl şəkildə yiyələnməli,  milli-mənəvi dəyərlərimizə böyük hörmət və ehtiram göstərməliyik. Sonda tələbələrin ifasında Xocalı faciəsinə həsr olunmuş kompozisiya nümayiş etdirilib.  

Azərbaycan Texniki Universiteti (AzTU), “Böyük Qayıdış” Gənclər Təşkilatı, Milli Qəhrəmanları Tanıtma İctimai Birliyi və Milli Kino Mərkəzinin təşkilatçılığı ilə Xocalı soyqırımının 31-ci ildönümünə həsr olunan “Xocalı yaddaşı” adlı tədbir keçirilib. Əvvəlcə torpaqlarımızın ərazi bütövlüyü uğrunda canlarından keçən Vətən övladlarının xatirəsi bir dəqiqəlik sükutla yad olunub, Azərbaycanın Dövlət Himni səsləndirilib. Tədbirdə AzTU-nun tələbəsi olmuş, Milli Qəhrəman, Xocalı rayonunun Dəhrəz kəndində gedən döyüşlərdə şəhidlik zirvəsinə yüksələn Rövşən Əliyev haqqında videoçarx nümayiş olunub. Daha sonra çıxış edən AzTU-nun tədris işləri üzrə prorektoru Nurəli Yusifbəyli bildirib ki, Xocalı soyqırımından 31 il keçsə də faciənin yaşatdığı ağrılar heç zaman sağalmayacaq. Bu faciə bəşəriyyətin ən dəhşətli və qanlı cinayət hadisələrindən biridir. “44 günlük Vətən müharibəsi tariximizin ən parlaq səhifələrinə qızıl hərflərlə yazıldı, şəhidlərimizin qanı yerdə qalmadı. Hər birimiz bundan sonra da xalqımızın başına gətirilən faciələrin unudulmaması, tariximizin saxtalaşdırılmaması üçün çalışmalıyıq”- deyə Nurəli Yusifbəyli bildirib. Milli Qəhrəmanları Tanıtma İctimai Birliyinin sədri Elşən Uluxanlı, “Böyük Qayıdış” Gənclər Təşkilatının idarə heyətinin üzvü Orduxan Qəhrəmanzadə, Milli Qəhrəmanları Tanıtma İctimai Birliyinin sədr müavini, Milli Qəhrəman Rövşən Əliyevin bacısı Fəranə Əliyeva və digərləri Xocalı faciəsinin dəhşətlərindən, ermənilərin dinc əhaliyə qarşı amansız divan tutmasından, Xocalı şəhərinin bir gecədə məhv edilməsindən danışıblar. Qeyd olunub ki, mülki əhaliyə qarşı soyqırımlar törətmək bütün dövrlərdə Ermənistanın  dövlət siyasətinin tərkib hissəsi olub. Xocalı həqiqətlərinin dünya ictimaiyyətinin diqqətinə çatdırılması, faciəyə hüquqi qiymət verilməsi üçün Heydər Əliyev Fondunun vitse-prezidenti Leyla Əliyevanın təşəbbüsü ilə başladılan “Xocalıya ədalət!” kampaniyası çərçivəsində görülən işlər də tədbir iştirakçılarının diqqətinə çatdırılıb. Xatırladaq ki, 1992-ci il fevralın 25-dən 26-na keçən gecə erməni təcavüzkarları Azərbaycanın Xocalı şəhərində bəşəriyyət tarixində ən qanlı faciələrlə bir sırada duran soyqırımı törədiblər. 613 nəfər qətlə yetirilib, 1275 nəfər girov götürülüb, 150 nəfərin taleyi hələ də məlum deyil. Qətlə yetirilənlərin 63 nəfəri uşaq, 106 nəfəri qadın, 70 nəfəri ahıl insandır. Hərbi təcavüz nəticəsində 8 ailə tamamilə məhv edilib, 25 uşaq hər iki valideynini, 132 uşaq isə valideynlərindən birini itirib. Soyqırımı zamanı 56 nəfər xüsusi qəddarlıqla öldürülüb, insanlar diri-diri yandırılıb, onlara ağlasığmaz işgəncələr verilib.

Abşeron Logistka Mərkəzinin İdarə Heyətinin sədri Ziya Ağayevin rəhbərlik etdiyi nümayəndə heyəti Azərbaycan Texniki Universitetinə səfər edib. Səfər çərçivəsində Abşeron Logistka Mərkəzinin İdarə Heyətinin sədri Ziya Ağayevlə AzTU-nun rektoru Vilayət Vəliyev arasında görüş keçirilib. Rektor bildirib ki, Abşeron Logistka Mərkəzində keçirilən sonuncu görüş zamanı verilən təkliflərin və müzakirə olunan məsələlərin daha operativ icrası ilə əlaqədar müştərək komissiya yaradılıb. Komissiyanın üzvləri ilkin olaraq görülən və görüləcək işlərlə bağlı plan hazırlayıblar. Plana uyğun olaraq komissiya tədris, elmi-tədqiqat və təcrübə istiqamətində müəyyən olunan məsələlərin icrasını həyata keçirəcəklər. Daha sonra qonaqlar AzTU-nun Logistika və Nəqliyyat İnstitutu ilə tanış olublar. Xatırladaq ki, fevralın 9-da Abşeron Logistka Mərkəzində AzTU-nun tədris mərkəzi istifadəyə verilib.  

Azərbaycan Texniki Universitetinin (AzTU) Xüsusi texnika və texnologiya fakültəsinin bir qrup tələbəsinin Hərb Tarixi Muzeyinə ekskursiyası təşkil edilib. Qeyd olunub ki, iki mərtəbədən ibarət olan Hərb Tarixi Muzeyi 1992-ci ildə yaradılıb. Azərbaycan hərb tarixinin qədim dövrdən bu günə kimi keçdiyi inkişaf yolu, ordumuzun istifadə etdiyi texnikalar, silahlar barədə tələbələrə məlumat verilib. Tələbələr muzeydə ulu öndər Heydər Əliyevin həyat və fəaliyyətini əks etdirən fotolar, sənədlər və ona məxsus əşyalar, hərbi geyim nümunəsi, ordu quruculuğu ilə bağlı gördüyü işlərlə tanış olublar. 44 günlük Vətən müharibəsinə həsr olunan Zəfər zalı, həmçinin muzeyin həyətində nümayiş olunan hərbi texnikalar barədə də tələbələrə ətraflı məlumat verilib.  

                                                                                Erasmus+ proqramı üzrə həyata keçirilən “Azərbaycanda Rektorlar Konfransının yaradılması” (ECAR) layihəsi çərçivəsində Tələbə və məzunlarla iş üzrə komitənin ilk iclası keçirilib. Onlayn təşkil olunan iclasda Azərbaycan Texniki Universitetini (AzTU) Karyera və məşğulluq mərkəzinin müdiri Elnur Rüstəmov və Tədris hissəsinin nəzdində Qeydiyyat, qiymətləndirmə və monitorinq şöbəsinin müdiri Tuti Abdullayeva təmsil edib. Görüş zamanı müzakirə olunan əsas mövzular komitə üzvləri ilə tanışlıq, sahə üzrə ilkin müzakirələrin aparılması, komitənin funksiyaları, sədrliyə namizədliklə bağlı tələblər, həmçinin idarə heyəti və sədrin seçilməsi qaydaları olub. İclasın gedişində qeyd olunan məsələlərlə bağlı tərəfdaşların rəyləri dinlənilərək müvafiq düzəlişlər edilib.   Daha sonra İdarə Heyətinin sədri vəzifəsinin tutulması üçün 3 nəfərin namizədliyi irəli sürülüb. 65 faiz səs çoxluğu ilə Bakı Biznes Universitetinin təlim-tərbiyə işləri üzrə prorektoru Cavidan Heydarov İdarə Heyətinin sədri seçilib. Növbəti mərhələdə sədr müavini vəzifəsinin tutulması üçün səsververmə keçirilib. Azərbaycan Turizm və Menecment Universitetinin Karyera və kommunikasiya şöbəsinin müdiri Səidə Məmmədova və Bakı Mühəndislik Universitetinin Müəssisələrlə əlaqələr və karyera departamentinin direktoru Gülçöhrə İbrahimova sədrin müavinləri seçiliblər. Qeyd edək ki, ECAR layihəsi çərçivəsində yaradılacaq Azərbaycan Rektorlar Konfrasının tərkibində Beynəmiləlləşmə, Tədris işləri və keyfiyyət təminatı, Elmi işlər, Strateji inkişaf və Tələbə və məzunlarla iş üzrə komitələrin fəaliyyəti nəzərdə tutulub.                                                                                                                                                                                                                                    

Azərbaycan Texniki Universitetində (AzTU) 21 fevral - Beynəlxalq Ana Dili Gününə həsr olunan “Dilim varsa, mən varam!” adlı tədbir keçirilib. Tədbirdə AzTU-nun sosial məsələlər və ictimaiyyətlə əlaqələr üzrə prorektoru Nərmin Rzayeva çıxış edib. Ana dilimizin zənginliyindən danışan prorektor ulu öndər Heydər Əliyevin milli-mənəvi dəyərlərimizə daim xüsusi önəm verdiyini xatırladıb. Qeyd olunub ki, dilimizin rəsmi dövlət dili statusu alması ümummilli lider Heydər Əliyevin adı və fəaliyyəti ilə bağlıdır. Nərmin Rzayeva Prezident İlham Əliyevin Azərbaycan dilinin saflığının qorunması və onun inkişafı ilə bağlı imzaladığı sənədlərin əhəmiyyətindən də danışıb. Humanitar fənlər kafedrasının müdiri Həbib Mirzəyev və kafedranın dosenti Afaq Əsgərova belə bir görüşün keçirilməsini əhəmiyyətli və təqdirəlayiq bir hadisə kimi dəyərləndirib. Bildirilib ki, mənəviyyatın formalaşmasında və inkişafında dil ən mühüm vasitədir. Bu baxımdan ana dilimizin qorunması və inkişaf etdirilməsi hər bir vətəndaşın müqəddəs borcudur. İnsanın mənəvi aləminin zənginləşməsində, mükəmməl təhsil almasında ana dilinin mühüm rolu xüsusi vurğulanıb. Qeyd olunub ki, dilimizin saflığının və zənginliyinin qorunması istiqamətində ulu öndər Heydər Əliyevin düşünülmüş siyasəti hazırda Prezident İlham Əliyev tərəfindən uğurla davam etdirilir. Tədbirdə videoçarx nümayiş etdirilib və tələbələrin ifasında ana dili haqqında şeirlər səsləndirilib.   

Azərbaycan Basketbol Federasiyasının təşkilatçılığı ilə Azərbaycan Texniki Universitetinin (AzTU) İdman sarayında keçirilən Basketbol üzrə Tələbə Liqasının oyunları davam edir. Liqanın 10-cu turunda AzTU komandası Azərbaycan Dövlət Bədən Tərbiyəsi və İdman Akademiyasının (ADBTİA) komandası ilə qarşılaşıb. Maraqlı mübarizə şəraitində davam edən oyun 103:82 hesabı ilə AzTU komandasının xeyrinə yekunlaşıb.  Qeyd edək ki, liqanın oyunlarında AzTU, ADBTİA, ADAU, ADNSU, UNEC, BMU və Xəzər Universitetinin komandaları iştirak edir. Oyunları “AzTU TV” yutub kanalından canlı izləyə bilərsiniz.

Fevralın 16-da Elm və Təhsil Nazirliyinin Medianın İnkişafı Agentliyi ilə birgə təşkilatçılığı ilə “Effektiv kommunikasiya” mövzusunda təlim-seminar keçirilib.  Təlim-seminarın keçirilməsində əsas məqsəd elmi müəssisələrin və universitetlərin sosial media hesablarının təhlili, kommunikasiyanın düzgün təşkili və digər bu kimi mövzularla bağlı bilik, bacarıqları təkmilləşdirmək, media sahəsində peşəkar vərdişlərin inkişafına dəstək olmaqdır. Təlim-seminarda nazirliyin tabeliyindəki elmi müəssisə və universitetlərin ictimaiyyətlə əlaqələrə məsul əməkdaşları, eləcə də media nümayəndələri iştirak ediblər. Açılış mərasimində çıxış edən Medianın İnkişafı Agentliyinin İcraçı direktoru Əhməd İsmayılov media sahəsində aparılan islahatlardan danışıb. Əhməd İsmayılov bildirib ki, bu islahatların əsas hissəsi cəmiyyətlə düzgün kommunikasiyanın təşkil edilməsidir.   Elm və təhsil nazirinin müşaviri Elnur Nəsibov çıxışında qeyd edib ki, nazirliyin tabeliyindəki müəssisələrin kommunikasiyasının gücləndirilməsi əsas prioritetlərdəndir. Nazir müşaviri əlavə edib ki, ötən ilin dekabrından elm sahələrinin ehtiyaclarının müəyyənləşdirilməsi istiqamətində monitorinqlərə başlanılıb. Yaxın zamanlarda elmi müəssisələrin yeni əsasnamələrinin təsdiqi gözlənilir.  Elm və təhsil nazirinin müşaviri Nicat Məmmədli də öz növbəsində bildirib ki, bu gün əsas məsələ elmin populyarlaşdırılmasıdır. İnformasiyaların daha çox fakta yönləndirilməsi, yanlış məlumatların verilməməsi olduqca vacibdir və elmin cəmiyyətdə təbliği üçün ciddi addımlar atılmalıdır.  Daha sonra çıxış edən AMEA-nın vitse-prezidenti, İnformasiya Texnologiyaları İnstitutunun baş direktoru Rasim Əliquliyev sözügedən təlim-seminarın təşkilindən məmnunluğunu ifadə edib. Rasim Əliquliyev nazirlik və ona tabe olan qurumlar arasında mövcud əlaqələrin gücləndirilməsini, kommunikasiya işinin effektiv təşkilinin vacibliyini önə çəkib, bu kimi təlimlərin əhəmiyyətli olduğunu nəzərə çatdırıb.  Daha sonra Elm və Təhsil Nazirliyinin İctimaiyyətlə əlaqələr sektorunun müdiri Cəsarət Valehov "Elmi müəssisə və universitetlərin sosial media hesablarının təhlili" mövzusunda təqdimatla çıxış edib.  Təlim-seminarın davamında Medianın İnkişafı Agentliyinin eksperti Pərvanə İbrahimova "Media savadlılığı", "Alibayov" Kommunikasiya və Konsultinq şirkətinin rəhbəri Vəli Əlibəyov "Uğurlu kommunikasiyanın qurulması, kommunikasiya alətlərindən düzgün istifadə", təlimçilər Toğrul Ələkbərov "Effektiv təqdimat bacarıqları", Fəxri Ağayev "Şəxsi və peşəkar inkişaf", Azər Nəzərov "Təhsil müəssisələri üçün PR və kommunikasiyanın əsasları", həmçinin Təhsil TV-nin rəhbəri Rəşad Cəfərov "Təhsil TV ilə əməkdaşlıq imkanları" mövzularında çıxış edərək təcrübələrini bölüşüblər. Təlim-seminar çərçivəsində müzakirələr aparılıb, iştirakçıları maraqlandıran suallar cavablandırılıb.

Azərbaycan Texniki Universitetinin (AzTU) Elmi şurasının növbəti iclası keçirilib. İclasda 2022/2023-cü tədris ilinin qış imtahan sessiyasının nəticələri barədə hesabat təqdim olunub. Həmçinin təhsilin keyfiyyətinin yüksəldilməsi ilə bağlı müzakirələr aparılıb.   Bundan başqa, 2022-ci ildə AzTU-nun elmi-tədqiqat və innovasiya fəaliyyəti haqqında da hesabat verilib. Bildirilib ki, 2022-ci ildə aparılan tədqiqat işlərinin nəticələrinə uyğun AzTU-da professor-müəllim heyəti üçün Differensial Əməkhaqqı Sisteminin tətbiqi ilə bağlı təqdim edilən məlumatlar təsdiqlənib. Belə ki, professor-müəllim heyəti arasından 64 nəfərin əməkhaqqına 2023-cü il ərzində əlavələrin edilməsi, həmçinin 85 əməkdaşın beynəlxalq bazalara daxil olan elmi nəşrlərdə dərc olunan məqalələrə görə mükafatlandırılması təsdiq edilib.   Müzakirələrdən sonra əməkdaşların layihə əsaslı tədqiqat və nəşr işinin gücləndirilməsi, həmçinin sənaye əhəmiyyətli tədqiqatların aparılmasına diqqətin artırılması barədə qərar qəbul edilib.