Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti ilə Azərbaycan Texniki Universiteti (AzTU) arasında 2022-ci il 5 noyabr tarixində imzalanan əməkdaşlıq haqqında memorandumda nəzərdə tutulmuş müvafiq bəndin icrası ilə bağlı universitetin informasiya təhlükəsizliyi ixtisasında təhsil alan bakalavr və magistr tələbələri arasında müsabiqə keçirilib. Ulu öndər Heydər Əliyevin 100 illiyinə həsr olunan iki mərhələli müsabiqədə tələbələrin kibertəhlükəsizlik sahəsində biliklərinin yoxlanılması və təqaüdlərin verilməsi nəzərdə tutulub. Müsabiqənin nəticələrinə əsasən, AzTU-nun İnformasiya və telekommunikasiya texnologiyaları fakültəsinin (bakalavriat səviyyəsi) 2-ci kurs tələbəsi Tərlan Haqverdi və 4-cü kurs tələbəsi Samir Əbilhəsənli, “SABAH Magistratura” proqramının (kibertəhlükəsizlik ixtisası üzrə) 1-ci kurs tələbələri Sənan Vəlizadə və Aytac İbrahimova xüsusi fərqləniblər.  Qaliblər Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti tərəfindən təqaüdlə mükafatlandırılıb. Memorandum çərçivəsində növbəti semestrlərdə də xüsusi fərqlənən tələbələrə təqaüdlərin verilməsi üçün müsabiqələrin keçirilməsi nəzərdə tutulur.

“Alstom” şirkətinin 2022-2023-cü tədris ili üzrə Azərbaycan Texniki Universitetinin (AzTU) dəmiryol nəqliyyatı və təsərrüfatı mühəndisliyi ixtisasında təhsil alan tələbələri üçün təşkil etdiyi təlimlər başa çatıb. Təlimləri uğurla bitirən tələbələrə sertifikatların təqdim olunması mərasimi keçirilib. Tədbirdə AzTU-nun rektoru Vilayət Vəliyev, Fransanın ölkəmizdə yeni təyin olunmuş fövqəladə və səlahiyyətli səfiri xanım Ann Buayon, Təhsilin İnkişafı Fondunun, Azərbaycan-Fransa Ticarət və Sənaye Palatasının Təhsil Komitəsinin, “Azərbaycan Dəmir Yolları” QSC-nin və universitetin nümayəndələri iştirak ediblər.    Qonaqları salamlayan “Alstom” şirkətinin Azərbaycan üzrə icraçı direktoru Elşən Zeynalov AzTU ilə şirkətin əməkdaşlığı barədə məlumat verib. Bildirib ki, şirkətin AzTU ilə əməkdaşlığı 2016-cı ildən başlanıb. 2021-ci ildə tərəflər arasında əməkdaşlıq haqqında memorandum imzalanıb. Elşən Zeynalov qeyd edib  ki, sertifikat alan tələbələr ümumilikdə 14 nəfərdir. Onlardan 10-u AzTU-nun, 4-ü isə Milli Aviasiya Akademiyasının tələbələridir. Şirkət rəsmisi hazırda AzTU məzunlarının “Alstom” da uğurla fəaliyyət göstərdiyini də diqqətə çatdırıb. “Alstom” şirkətinin təlimlərini uğurla başa vuran tələbələri təbrik edən AzTU-nun rektoru Vilayət Vəliyev bildirib ki, ötən il universitetdə şirkətin tədris mərkəzi fəaliyyətə başlayıb. Mərkəz son bir il ərzində dəmiryolu mühəndisliyi istiqamətində yüksək ixtisaslı kadrların hazırlanması üçün mühüm işlər görüb. Rektor qeyd edib ki, sertifikat alan tələbələrdən 4-ü MAA tələbəsidir. AzTU-nun MAA ilə müvafiq istiqamətlər üzrə əməkdaşlıq əlaqələrini genişləndirdiyini diqqətə çatdıran rektor akademiya ilə birgə layihələr həyata keçirildiyini də əlavə edib. Rektor ölkədə nəqliyyat, xüsusilə dəmiryolunun inkişafı istiqamətində aparılan islahatlardan da danışıb. Çıxışını Azərbaycan dilində səsləndirən Fransanın ölkəmizdə yeni təyin olunmuş fövqəladə və səlahiyyətli səfiri xanım Ann Buayon “Alstom” şirkəti ilə AzTU əməkdaşlığının mühəndis kadrların hazırlanması istiqamətində mühüm addım olduğunu vurğulayıb. Dəmiryolu sahəsinin inkişafının ölkə iqtisadiyyatına faydalarından danışan xanım səfir bu mənada yüksəkixtisaslı kadrların hazırlanmasına hər zaman ehtiyac olduğunu diqqətə çatdırıb. Təlimlərdə iştirak edən tələbələri təbrik edən səfir onlara fəaliyyətlərində uğurlar arzulayıb. Təhsilin İnkişafı Fondunun İdarə Heyətinin sədr müavini Nərgiz İsmayılova AzTU-nun universitet-sənaye işbirliyi istiqamətində gördüyü işləri müsbət qiymətləndirib. Bildirib ki, digər universitetlərin də bu istiqamətdə fəaliyyətləri yüksəkixtisaslı kadrların hazırlanması baxımından faydalı ola bilər. “Azərbaycan Dəmir Yolları” QSC-nin İnsan resursları idarəsinin rəisi Ceyhun Nağıyev gənc dəmiryolçuları təbrik edib, onlara fəaliyyətlərində uğurlar arzulayıb. Tədbirin sonunda tələbələrə sertifikat təqdim olunub.

23-24 iyun tarixlərində  Azərbaycan Texniki Universitetinin (AzTU) Logistika və Nəqliyyat İnstitutunda yerinə yetirilən  “Şəhərdaxili hərəkət (mobillik) planının hazırlanması” layihəsi çərçivəsində Şəki və Mingəçevir şəhərlərində ictimai müzakirələr keçirilib. Layihənin həyata keçirilməsində məqsəd şəhərin nəqliyyat infrastrukturunun kompleks inkişafı proqramının, ictimai sərnişin nəqliyyatı ilə əhaliyə nəqliyyat xidmətlərinin təşkili üzrə sxemin, nəqliyyat infrastrukturunun və yol hərəkətinin təşkili sxeminin hazırlanmasından ibarətdir.  İctimai müzakirlərdə nəqliyyat infrastrukturu zonalarına dair məlumatlar, yolların keyfiyyəti, nəqliyyat və avtonəqliyyat vasitələri parkının strukturu ilə bağlı ictimaiyyətin fikirləri dinlənilib. Həmçinin şəhər əhalisinə nəqliyyat xidmətlərinin bütün növləri üzrə, o cümlədən marşrut şəbəkəsi, hərəkət tərkibi, sərnişin daşıyan təşkilatların nəqliyyat xidməti, avtomobil yollarında hərəkət sıxlığı və digər məsələlər müzakirə olunub, ictimaiyyətin fikirlərinə əsasən müvafiq qeydlər aparılıb, suallar cavablandırılıb.  Tədbirdə Şəki və Mingəçevir şəhər icra hakimiyyətlərinin nümayəndələri ilə yanaşı  AzTU-nun Logistika və Nəqliyyat İnstitutunun direktoru Fuad Daşdəmirov, Nəqliyyat və logistika fakültəsinin layihənin işinə cəlb edilən müəllim heyəti dosentlər - Əlləz Əliyev və Ramin Aslanov, gənc müəllimlər - Turan Verdiyev, Ülvi Cavadlı, Röyal Allahverdiyev iştirak ediblər.

Azərbaycan Texniki Universitetinin (AzTU) Sosial İnkişaf Mərkəzi tərəfindən həyata keçirilən “AzTU könüllüləri” proqramının iştirakçılarına sertifikatların təqdim olunması mərasimi keçirilib. Tədbirdə Sosial İnkişaf Mərkəzinin əməkdaşı Eyvaz Məhəmmədli, AzTU Həmkarlar İttifaqı Komitəsinin sədri Elvin Bəxtiyarlı, Maşınqayırma və robototexnika fakültəsinin dekanı Malik Qarayev və “AzTU TV studiyası”nın direktoru Səfa Bağırov çıxış edərək proqramın əhəmiyyətindən danışıblar, həmçinin iştirakçıları təbrik ediblər. Qeyd olunub ki, aprel ayında icrasına başlanılan iki aylıq proqramda iştirak üçün 200-ə yaxın tələbə müraciət edib. AzTU-nun 14 struktur bölməsindən mərkəzə daxil olan müraciət əsasında ilkin mərhələdə tələbələrdən 33 nəfəri könüllü kimi cəlb olunub. Proqramın yekununda isə könüllülərin bacarıqlarının qiymətləndirilməsi üçün struktur bölmələri tərəfindən mərkəzə xasiyyətnamə təqdim olunub. Daha sonra sertifikatların təqdim olunması mərasimi olub. Beləliklə, komandada işləmə və kommunikasiya qurmaq, həmçinin verilən tapşırıqları vaxtında və qüsursuz yerinə yetirmək bacarıqları ilə fərqlənən könüllülərə fərqlənmə sertifikatı, digər tələbələrə isə proqramda iştirak etdiklərinə görə sertifikat təqdim olunub. Qeyd edək ki, “AzTU könüllüləri” təcrübə proqramının növbəti mərhələsinə sentyabr ayında start veriləcək.

“Azərbaycanda Rektorlar Konfransının yaradılması” (ECAR) layihəsi üzrə komitələrin idarə heyəti üzvlərinin növbəti işgüzar görüşü  keçirilib. Görüşdə layihə çərçivəsində təsis ediləcək jurnalın adı, məzmunu, redaksiya heyəti, nəşr tarixi və digər mühüm məsələllər barədə müzakirələr aparılıb. Görüşdə AzTU-nu elm və innovasiyalar üzrə prorektor Sübhan Namazov təmsil edib. Qeyd olunub ki, jurnalda ECAR layihəsinə üzv olan ali təhsil müəssisələrinin uğurları, fəaliyyətləri, qarşılaşdıqları problemlər, əməkdaşlarının uğur hekayələri və layihə müddətində yaradılmış komitələrin fəaliyyət və tədqiqatlarının nəticələri öz əksini tapacaq. Jurnalın hazırlanması ilə bağlı Avropa təcrübəsinin öyrənilməsi üçün komitələrin idarə heyətinin üzvləri 3-7 iyul tarixlərində Belçikada səfərdə olacaq.     

Azərbaycan Texniki Universitetində (AzTU) “Məzun Günü-2023” adlı tədbir keçirilib. Tədbirdə Elm və Təhsil Nazirliyinin, Təhsildə Keyfiyyət Təminatı Agentliyinin (TKTA), Yasamal Rayon İcra Hakimiyyətinin rəhbər şəxsləri, millət vəkilləri, müəllimlər, tələbələr və valideynlər iştirak ediblər. Əvvəlcə tədbir iştirakçıları universitetin foyesində ulu öndər Heydər Əliyevin büstü önünə gül dəstələri düzüb, xatirəsinə ehtiramlarını bildiriblər. Məzun Günü torpaqlarımızın ərazi bütövlüyü uğrunda canlarından keçən Vətən övladlarının xatirəsinin bir dəqiqəlik sükutla yad olunması və Azərbaycanın Dövlət Himninin səsləndirilməsi ilə başlayıb.    Məzunları təbrik edən AzTU-nun rektoru Vilayət Vəliyev bildirib ki, bu il bakalavriat və magistratura səviyyələri üzrə ümumilikdə 2500-dən çox tələbə məzun olur. Məzunlara gələcək fəaliyyətlərində uğurlar arzulayan rektor AzTU-da görülən işlər, beynəlalq əlaqələr, ikili diplom proqramları, həyata keçirilən yeni layihələr barədə də məlumat verib. Bildirib ki, universitetin əsas hədəflərindən biri  əmək bazarının tələblərinə cavab verən yüksəkixtisaslı mühəndis kadrları hazırlamaqdır. Tədbirdə çıxış edən Elm və Təhsil Nazirliyinin aparat rəhbərinin müavini Fərzəli Qədirov, Yasamal rayon icra hakimiyətinin başçısının 1-ci müavini Hüseyn Əfəndiyev və millət vəkilləri məzunları təbrik edib, onlara uğurlar arzulayıb. Çıxışlardan sonra AzTU-nu fərqlənmə ilə bitirən, həmçinin universitetin ictimai-sosial həyatında fəal iştirak edən məzunlara fəxri fərmanlar və hədiyyələr təqdim olunub. Tədbirin növbəti hissəsində ilk dəfə olaraq Azərbaycan və Türkiyə universitetlərinin Məzun Günü tədbirlərinə videobağlantı vasitəsilə keçid edilib. Belə ki, AzTU, Bakı Dövlət Universiteti və İstanbul Texniki Universitetinin rektorları videobağlantı zamanı məzunları salamlayıb, onlara ən xoş arzularını bildirib. Qeyd olunub ki, bu təşəbbüs Azərbaycan və Türkiyənin növbəti dəfə əməkdaşlıq və qardaşlıq nümunəsini ortaya qoyur. Məzun Günü konsert proqramı ilə davam edib. 

“Erasmus +” proqramı çərçivəsində yerinə yetirilən “Rusiya Federasiyası, Qazaxıstan və Azərbaycanda səhiyyədə strateji keyfiyyət menecmenti, risklərin idarə olunması üzrə açıq və distant təhsil formatında peşə bakalavrı, peşə magistri hazırlığı” (LMQS) layihəsi üzrə  işçi heyətin görüşü keçirilib. Görüşdə layihə çərçivəsində görülmüş işlərin hesabatı verilib, gələcəkdə həyata keçiriləcək fəaliyyətlər üzrə planlaşdırma aparılıb. Layihənin işçi heyətinin rəhbəri Azərbaycan Texniki Universitetinin (AzTU) professoru Həsən Hüseynov layihənin koordinatoru Qərbi Attika Universitetinin  nümayəndəsinin  ölkəmizə gözlənilən səfəri barədə iştirakçıları məlumatlandırıb.     

Azərbaycan Texniki Universitetinin (AzTU) Metallurgiya və materiallar texnologiyası kafedrasının müəllimləri - professor Arif Məmmədov və dosent Ramiz Həsənlinin həmmüəlifi olduqları “Kürəvi qrafitli legirlənmiş çuqun” adlı ixtira beynəlxalq patent alıb. Yeni ixtira aqressiv mühitlərdə nəzərdə tutulan neft-mədən və kimya maşıqayırması qurğularının hazırlanması üçün tətbiq oluna bilər . Qeyd edək ki, ixtira müəlliflik hüququ qorunmaqla müvafiq sənaye sahələrində istifadə oluna bilər.

“SABAH academy"nin Azərbaycan Texniki Universitetində (AzTU) təşkil etdiyi “Sahibkarlığa giriş” təliminin bağlanış mərasimi keçirilib. Tədbirdə çıxış edən AzTU-nun prorektoru Rəşad Əliyev bildirib ki, 15 həftə davam edən təlimlərdə dərslər yerli və xarici mütəxəssislər tərəfindən aparılıb. Qeyd olunub ki, tələbələrin bu təlimlərdə iştirakı onların gələcək karyeralarında faydalı olacaq. Rəşad Əliyev sözügedən təlimlərin mütəmadi olaraq keçiriləcəyini də deyib. “SABAH academy"nin icraçı direktoru Fərhad Paşayev təlimlərdə tələbələrin göstəriciləri ilə bağlı hesabat verib. Daha sonra tələbələrə sertifikat təqdim olunub.

Azərbaycan Texniki Universitetinin (AzTU) Metallurgiya və materialşünaslıq fakültəsinin 3-cü kurs tələbəsi Samir Əhədli bədbəxt hadisə nəticəsində vəfat edib. Samir Əhədli iyunun 20-də Xəzər rayonu, Buzovna qəsəbəsi yaxınlığında dənizdə batıb. Onun nəşi iyunun 23-ü səhər saatlarında FHN xilasediciləri tərəfindən sudan çıxarılaraq aidiyyəti üzrə təhvil verilib. AzTU-nun rəhbərliyi və kollektivi Samir Əhədlinin vaxtsız vəfatından kədərlənir, ailəsinə və yaxınlarına başsağlığı verir. Allah rəhmət eləsin!