Azərbaycan Texniki Universitetində (AzTU) ümummilli lider Heydər Əliyevin anadan olmasının 100 illiyinə həsr olunan tələbə və gənc tədqiqatçıların "Mütərəqqi texnologiyalar və innovasiyalar" mövzusunda Vll respublika elmi-texniki konfransı işinə başlayıb. Azərbaycanın Dövlət Himni səsləndirildikdən sonra tədbir iştirakçılarını salamlayan AzTU-nun rektoru Vilayət Vəliyev bildirib ki, konfransa AzTU və 50-dək müxtəlif təşkilat və universitetlərdən 500-ə yaxın elmi məruzə daxil olub. Rektor konfransın Ulu Öndərin 100 illiyinə həsr olunmasının xüsusilə əhəmiyyətli olduğunu və Ümummilli Liderin gənclərin inkişafı üçün  daim yüksək şərait yaratdığını vurğulayıb. Bildirib ki, konfransda müzakirə olunacaq mövzular gənclərin tədqiqat işlərinə daha ciddi cəlb olunması baxımından faydalı olacaq.   Daha sonra AzTU-nun tələbəsi Orxan Mustafaoğlu, Milli Aerokosmik Agentliyinin Təbii Ehtiyatların Kosmik Tədqiqi İnstitutunun şöbə rəisi, gənc tədqiqatçı Sevinc Bəşirova, AzTU-nun doktorantı Nadir Atayev, Heydər Əliyev adına Hərbi İnstitutun kursantı Seyfəddin Orucov konfransda geniş təqdimatla çıxış ediblər.      İki gün davam edəcək konfrans işini bölmə iclasları ilə davam etdirir.   

Almaniyanın Ali Təhsilin Qiymətləndirilməsi və Akkreditasiyası Agentliyinin (AQAS) direktor müavini Ronny Heintze Azərbaycan Texniki Universitetində (AzTU) olub. Qonaq AzTU-nun rektoru Vilayət Vəliyev və universitetin nümayəndələri ilə görüşüb.   Görüş zamanı AzTU haqqında qonağa ətraflı məlumat verən rektor Vilayət Vəliyev beynəlxalq akkreditasiyanın ali təhsil müəssisələrinin tanınmasında, həmçinin tədris və tədqiqat xidmətlərinin beynəlxalq tələblərə uyğun təşkilindəki rolundan danışıb. Ronny Heintze təmsil etdiyi təşkilatın beynəlxalq akkreditasiya sahəsindəki fəaliyyəti barədə məlumat verib. Bildirib ki, təmsil etdiyi qurum Azərbaycanın ali təhsil müəssisələri ilə əməkdaşlıqda maraqlıdır. Görüşdə AQAS tərəfindən AzTU-da bakalavriat və magistratura səviyyələri üzrə proqram akkreditasiyası sahəsində əməkdaşlıq imkanları da müzakirə olunub.  

Azərbaycan Texniki Universitetinin (AzTU) nümayəndələri “İnnovasiya və dayanıqlılıq prinsipləri ilə klasterlərin işlənməsinə başlamaqda və iştirakda universitetlərin potensialının artırılması” layihəsi (UniClaD) çərçivəsində Macarıstanda səfərdə olub. Macarıstanın Debrecen Universitetinin təşkil etdiyi səfərin məqsədi bu ölkənin aqrar klaster təcrübəsinin öyrənilməsi olub. Səfərdə AzTU-nu Kompüter texnologiyaları kafedrasının baş müəllimi Şəhla Əliyeva və Beynəlxalq əlaqələr şöbəsinin müdiri Orxan Vətənxah təmsil edib. Debrecen Universitetinin sənaye ilə sıx əməkdaşlığı çərçivəsində Macarıstanın aqrar sektorunda klaster təcrübəsi, onların fəaliyyəti, idarəetmə strukturları, maliyyələşmə mexanizmləri, yerli təsərrüfatçılarla əməkdaşlıq imkanları və kommunikasiya üsulları geniş müzakirə olunub, görülən işlərə baxış keçirilib. Daha sonra iştirakçılar Macarıstanın kənd təsərrüfatı təcrübəsinin öyrənilməsi məqsədilə bir neçə balıqçılıq müəssisəsinə və fermalara səfər edib, onların fəaliyyəti, tətbiq etdikləri ən yeni  texnologiyalarla tanış olublar.

Azərbaycan Texniki Universitetində (AzTU) “YENİ Klub”un təşkilatçılığı ilə ulu öndər Heydər Əliyevin anadan olmasının 100 illiyinə həsr olunan “Nə? Harada? Nə zaman?” intellektual yarışı keçirilib. Yarışda AzTU-nun bütün fakültələrindən tələbələr iştirak edib. Suallar Ulu Öndərin həyat və fəaliyyətini, həmçinin tələbələrin dünyagörüşünü əhatə edib. Yarışın sonunda qalib komandaların adları açıqlanıb. Nəticələrə əsasən, 1-ci yerə Xüsusi texnika və texnologiya, 2-ci yerə Nəqliyyat və logistika, 3-cü yerə isə İqtisadiyyat və idarəetmə fakültəsinin komandası layiq görülüb.   

AzEdu.az təhsil portalı və ali məktəblərin birgə təşkilatçılığı ilə həyata keçirilən "Brend tələbə" layihəsi çərçivəsində xüsusi meyarlara uyğun seçilən tələbələrin mükafatlandırılması davam edir.  Bu gün AzEdu.az və Azərbaycan Texniki Universitetinin (AzTU) birgə təşkilatçılığı ilə AzTU-da təhsil alan “Brend tələbə”lər mükafatlandırılıb. Tədbirdə AzEdu.az təhsil portalının rəhbəri Elşad Eyvazlı, icraçı direktoru Tünzalə Abbasova, universitetin İctimaiyyətlə əlaqələr şöbəsinin müdiri Sevinc İsgəndərova, Xüsusi texnika və texnologiya fakültəsinin dekanı Elçin Rzayev, Metallurgiya və materialşünaslıq fakültəsinin dekanı Nizami Poladov, Nəqliyyat və logistika fakültəsinin dekan müavini Qəzənfər Axundov və “Brend tələbə” statusuna layiq görülmüş tələbələr iştirak edib.  Tədbir Sevinc İsgəndərovanın açılış nitqi ilə başlayıb. Daha sonra çıxış edən Elşad Eyvazlı tələbələri təbrik edib və onlara təhsil həyatlarında nailiyyətlər arzulayıb.  Görüş zamanı tələbələrlə uğurun sirləri müzakirə edilib. "Brend tələbə"lər öz təəssüratlarını bölüşüb.Daha sonra onlara təltifnamələri təqdim olunub. AzTU-da "Brend tələbə" statusuna layiq görülmüş gənclər aşağıdakılardır:   Məmmədov Ayxan İlkin oğlu - Nəqliyyat və logistika fakültəsi  Babazadə Emil Aydın oğlu - Nəqliyyat və logistika fakültəsi  Rəşidli Atabəy Nahid oğlu - Nəqliyyat və logistika fakültəsi  Nəcəfov Elnur Həsən oğlu - Nəqliyyat və logistika fakültəsi  Mənəfov Şamil Mənəf oğlu - Nəqliyyat və logistika fakültəsi  Əsgərli Ayan Bayram qızı - İnformasiya və telekommunikasiya texnologiyaları fakültəsi  Zeynallı Maral Famiq qızı - İnformasiya və telekommunikasiya texnologiyaları fakültəsi  Əsgərli Flora İsmayıl qızı - Metallurgiya və materialşunaslıq fakültəsi  Veysəlov Sənan Tərlan oğlu - Xüsusi texnika və texnologiya fakültəsi  Məhəmmədli Eyvaz Mübariz oğlu - Maşınqayırma və robototexnika fakültəsi  Qeyd edək ki, “Brend tələbələr” ekspert komissiyasının hazırladığı meyarlar əsasında birbaşa universitetlər tərəfindən seçilib. Azərbaycanın 22 universiteti “Brend tələbə” ilə bağlı tələbə seçimini həyata keçirib.    

Türkiyənin Bahçeşehir Universitetinin rektoru professor Şirin Karadenizin rəhbərlik etdiyi nümayəndə heyəti Azərbaycan Texniki Universitetinə (AzTU) səfər edib. Səfər çərçivəsində qonaqlar AzTU-nun rektoru Vilayət Vəliyev və universitetin nümayəndələri ilə görüşüb. Görüş zamanı rektorlar rəhbərlik etdikləri universitetlərdə görülən işlər və yeniliklər barədə məlumat veriblər. Həmçinin AzTU ilə Bahçeşehir Universiteti arasında müvafiq sahələr üzrə yeni əməkdaşlıq istiqamətləri müzakirə olunub. Sonra hər iki universitet arasında əməkdaşlıq haqqında memorandum imzalanıb.    

“Şəhərdaxili hərəkət (mobillik) planının hazırlanması” layihəsinin həyata keçirilməsi məqsədilə 22 may 2023-cü il tarixində Azərbaycan Texniki Universiteti (AzTU) ilə Lənkəran və Şirvan şəhəri, Masallı və Biləsuvar rayon icra hakimiyyətləri arasında müqavilə imzalanıb.  Bu məqsədlə AzTU-nun rektoru Vilayət Vəliyevin başçılıq etdiyi nümayəndə heyəti - Logistika və Nəqliyyat İnstitutunun direktoru Fuad Daşdəmirov, Universitet-Sənaye Əməkdaşlığı və Ömürboyu Təhsil Mərkəzinin rəhbəri Aynurə İsmayılova Lənkəran və Şirvan şəhərləri, Masallı və Biləsuvar rayonlarında səfərdə olublar. AzTU-nun rektoru Vilayət Vəliyev, Lənkəran Şəhər İcra Hakimiyyətinin başcısı Taleh Qaraşov, Biləsuvar Rayon İcra Hakimiyyətinin başçısı Faiq Qürbətov, Masallı Rayon İcra Hakimiyyətinin başçısı Araz Əhmədov və Şirvan Şəhər İcra Hakimiyyətinin başçısı İlqar Abbasovun iştrakı ilə keçirilən geniştərkibli görüşlərdə bildirilib ki, müqavilənin Ulu Öndərin 100 illiyi ərəfəsində imzalanması və “Heydər Əliyev İli”ndə icra olunması mühüm hadisə olmaqla bərabər onun irsinin davamına əhəmiyyətli töhfədir. Məhz Ulu Öndər şəhərlərimizin dayanıqlı inkişafına, xüsusilə də yol şəbəkələrinin planlı layihələndirilməsi və icrasına ciddi fikir verirdi. Görüşlər zamanı “Şəhərdaxili hərəkət (mobillik) planının hazırlanması” layihəsinin başlanmasına start verilərək layihənin gedişatına dair fikir mübadiləsi aparılıb. Qeyd olunub ki, dünyaya sürətlə inteqrasiya olunan respublikamızın şəhərlərində mobillik planının işlənib hazırlanması əhalinin həyat keyfiyyətinin əhəmiyyətli dərəcədə artmasına təkan verəcək. Belə ki, hazırlanacaq hesabatlar şəhər nəqliyyat infrastrukturunun ümumi inkişafı, ictimai nəqliyyat şəbəkəsinin işinin yaxşılaşdırılması, piyada hərəkətinin təhlükəsizliyinin artırılması və asanlaşdırılması, velosiped yollarının istiqamətinin müəyyən edilməsi, yollarda digər təkmilləşdirmə üzrə tədbirlər “Şəhərdaxili hərəkət (mobillik) planları”nda öz əksini tapacaq. Natiqlər layihənin dövlətin dəstəyi ilə yaradılmış işgüzar şəraitdə universitet-sənaye əməkdaşlığının ən bariz nümunəsi olduğunu vurğulayıb və tələbə-müəllim-əmək bazarı iştirakçılarının təmas nöqtəsi kimi dəyərləndiriblər. Bununla da “Şəhərdaxili hərəkət (mobillik) planının hazırlanması” layihəsinin həyata keçirilməsi məqsədilə AzTU ilə ümumilikdə 16 şəhər və rayon (Yevlax şəhər, Şəki şəhər, Göyçay rayon, Ağcabədi rayon, Göygöl rayon, Şəmkir rayon, Naftalan şəhər, Mingəçevir şəhər, Tovuz rayon, Quba rayon, Qusar rayon, Xaçmaz rayon, Lənkəran şəhər, Biləsuvar rayon, Masallı rayon və Şirvan şəhər) icra hakimiyyətləri arasında müqavilə imzalanıb. AzTU qeyd olunan bölgələrin cari il ərzində şəhərdaxili mobillik planlarını hazırlayacaq.  

Azərbaycan Texniki Universitetində (AzTU) Alman Akademik Mübadilə Xidmətinin (DAAD) doktorantlar və akademik heyət üçün növbəti məlumatlandırma sessiyası keçirilib. “Almaniyada təqaüdlü təhsil və tədqiqat imkanları” mövzusunda təşkil olunan infosessiyada DAAD-nin AzTU-da alman dilinin tədrisinə cəlb olunan müəllimi Klaudio Kasperl çıxış edib. O, DAAD-nin doktorantura səviyyəsində təqaüd proqramları, habelə akademik heyət üçün tədqiqat imkanları, müraciət üçün şərtlər, tələb olunan sənədlər toplusu və seçim meyarları barədə ətraflı məlumat verib. Sonda iştirakçıların sualları cavablandırılıb.

Mayın 19-da Azərbaycan Texniki Universitetinin (AzTU) Elmi şurasının yeni tərkibdə ilk iclası keçirilib. İclasda cari ildə Elmi şuranın qarşısında duran prioritet məsələlər haqqında müzakirələr aparılıb. Həmçinin yeni yaranan bir sıra struktur bölmələrinin əsasnamələri təsdiq edilib. İclas cari məsələlərin müzakirəsi ilə davam edib. 

Rumıniyanın Buxarest İqtisadiyyat Universitetində “Erasmus+” proqramı çərçivəsində beynəlxalq həftə keçirilib. Tədbirdə iştirak edən Azərbaycan Texniki Universitetinin (AzTU) İqtisadiyyat və idarəetmə fakültəsinin dekanı Fərqanə Musayeva və Beynəlxalq əlaqələr şöbəsinin Beynəlxalq əməkdaşlıq və mübadilə qrupunun rəhbəri Mənzər Məmmədli AzTU haqqında təqdimatla çıxış ediblər. 5 gün davam edən tədbir çərçivəsind transmilli təhsil tərəfdaşlığı, “Erasmus+” çərçivəsində mümkün mübadilə və layihə fürsətlərinin dəyərləndirilməsi və həyata keçirilməsi mexanizmləri ilə bağlı təlimlər keçirilib, həmçinin müxtəlif fakültələrdə görüşlər təşkil edilib. Səfər çərçivəsində AzTU nümayəndələri hazırda Buxarest İqtisadiyyat Universitetində “Erasmus+” mübadilə proqramı çərçivəsində təhsil alan İqtisadiyyat və idarəetmə fakültəsinin tələbələri – Emil Gebekbəyov və Ramiz Səlimovun fəaliyyəti ilə də tanış olublar.