Daşkənddə Mirzə Uluqbəy adına Özbəkistan Milli Universitetinin Tarix fakültəsinin təşəbbüsü ilə “Tolerantlıq sülhün zəmanəti, vətəndaşlar arasında həmrəylik, millətlərarası və dinlərarası sabitlikdir” mövzusunda beynəlxalq elmi-praktik konfrans keçirilib.  

Böyük özbək tarixçisi Raxbarxon Murtazayevanın anadan olmasının 75 illiyinə həsr edilən konfransda müxtəlif ölkələrin alimləri iştirak edib. 

Tədbirdə Azərbaycan Texniki  Universitetini (AzTU) Humanitar fənlər kafedrasının professoru Əyyub Kərimov təmsil edib. Onun “Multikulturalizm və tolerantlıq: Beynəlxalq münasibətlərin ikili standartları konteksində problemlər və perspektivlər” mövzusunda çıxışı iştirakçılar tərəfindən maraqla qarşılanıb.

Konfransda Türk dövlətlərinin tarixinin öyrənilməsi sahəsində görülən işlər, ölkələr arasında tarix üzrə informasiya mübadiləsinin aparılması, qarşılıqlı faydalı əməkdaşlığın genişləndirilməsi və digər məsələlər müzakirə olunub.